Karanih Koht

“Komw Ketin Mweidohng Kiht Sen Pwurehng Papah Komwi”

Ke kin papah Siohwa mahs? Mie pak ke kin medewe ma ke kak pwurehng papah ih, ahpw kin medemedewe ma e pahn ketin kupwurki kasamwo iuk? Menlau wadek kanahieng ire wet me wiawihda ong uhk.

EMEN lih me uhdihsang papah Koht oh eh wiewia kan sohte pahrekiong dahme e kaiahnda loale nin duwen Kristian men, koasoia: “I kapakapkiong Siohwa oh peki reh en ketin mweidohng ie ien pwurehng papah ih oh ketin mahkohng ie pwehki ei kansensuwedihala.” Ia duwe, ke poakehla oh wehwehki eh pepehm? Ke kin medemedewe: ‘Ia sapwellimen Koht pepehm duwen irail ko me mahs kin papah ih? E kin ketin tamataman irail? E kin ketin kupwurki ren pwurodohng reh?’ Pwehn sapengala peidek pwukat, kitail pahn tehkpene dahme Seremaia ntingihedi. Pasapeng pwukat pahn uhdahn sair omw mohngiong.​—Wadek Seremaia 31:18-20.

Song medewehla dahme Seremaia ntingihedi. Nan pahr 740 mwohn Krais, sounpar epwiki kei mwohn mwehin Seremaiao, Siohwa ketin mweidohng keinek eisek en wehin Israel en kalipilipala rehn mehn Asiria kan.a Koht ketin mweidohng kahpwal wet en wiawi nin duwen peneu ehu pwehki sapwellime aramas akan tepida wiahda dihp laud kan, oh pohnsehsehla mehn kataman kan me sapwellime soukohp ko kin pwurepwurehng kihda. (2 Nanmwarki 17:5-18) Ia duwe, irail wekila pwehki kahpwal kan me re lelohng ni ahnsou me re tohrohrasang arail Koht oh dohlahsang sapwarailo? Siohwa ketin likidmeliehla irail koaros? E pahn kak ketin pwurehng kasamwodohng irail reh?

“Se Men Mwadang Patohwan Pwurowei Rehmwi”

Aramas ako pehmada diparail ni arail kalipilipala oh mwekidkihda ren koluhla. Siohwa ketin tehkada arail koluhla mehlel. Rong duwen Siohwa eh ketin kawehwehda arail madamadau oh pepehm kan.

Siohwa ketin mahsanih: “I kin rong mehn Israel ar ndinda nan ar nsensuwed.” (Iretikitik 18) E ketin karonge mehn Israel ko ar nsensuwedkihla imwilahn arail wiahda dihp. Emen kawehwehda me lepin lokaia me kawehwehda “nsensuwed” ni lokaiahn Pohnpei kak wehwehki ni lokaiahn Ipru “itiitikek.” Irail duwehte seri ketihwo men me itihtik moangeo pwehki e uhdahn nsensuwedkihla dahme e wiahda ni eh medemedewe kahpwal ko me e kahrehiong pein ih, oh loaleidkihda eh mouren mahs me e ahneki imweo. (Luk 15:11-17) Dahme aramas pwuko ndinda?

“Se rasehng mahn lawalo, komwi ahpw ketin padahkihong kiht duwen at pahn peikiong komwi.” (Iretikitik 18) Irail pohnese me re anahne ale peneu, pwe re duwehte kou men me anahne kaiahn. Ehu pwuhk koasoia me karasaras wet wehwehki me irail duwehte kou men me aramas kin doakoa pwehki e kahng wa eh mehn wisik.

“Komw ketin kapwureikitewei; se ahpw pahn pwurowei, komwi me KAUN-O, at Koht.” (Iretikitik 18) Arail mohngiong aktikitikla oh re likweriong Koht. Re salongala nan arail mour en dihp, ahpw met re pekipeki sawas ren kak diarada ahl me re kak pwurala rehn Koht. Ehu kawehwe kawehwehda iren Paipel wet: “Komwi me at Koht​—menlau mweidohng kiht sen pwurowei rehmwi.”​—Contemporary English Version.

“Se men mwadang patohwan pwurowei rehmwi. . . . Se itiengkihdi at nsensuwed. Se nameneklahr oh sarohdi.” (Iretikitik 19) Irail koluhla pwehki re dipadahr. Re pohnese arail sapwung kan. Re pil namenekla oh mworusala douluhl.​—Luk 15:18, 19, 21.

Mehn Israel ko koluhkihla diparail. Re uhdahn nsensuwedla, wehkada diparail ong Koht oh sohte pwurehng wia dihp ko. Ia duwe, Koht pahn ketin kupwurehla arail koluhla? E pahn ketin pwurehng kasamwoiraildohng reh?

“I Pahn Kin Kupwurkalahngan ong Uhk”

Siohwa sapwellimanki nanpwungmwahu tohrohr ehu rehn mehn Israel kan. E ketin mahsanih: “Pwe I rasehng sahm emen ong Israel, oh Epraim iei nei mesenih.” (Seremaia 31:9) Ia duwen sahm limpoak men eh sohte pahn kak kasamwohdo nah pwutak me eh mohngiong koluhkihla eh sapwung kan? Tehk ia duwen Siohwa eh ketin kasalehda sapwellime pepehm ong sapwellime aramas akan nin duwen Sahm emen.

“Israel, kowe me nei seri keieu kesempwal, seri me I keieu poakohng. Ahnsou koaros me I kin tamanda edomw.” (Iretikitik 20) Ia uwen kansenamwahu en mahsen pwukat! Duwehte pahpa limpoak men me kin kehlailki eh koasoandi, Koht anahne ketin kapwungala sapwellime seri kan oh kin ketin pwurepwurehng kaweidkin irail elen dihp kan. Ni arail keptakaila sohte kin rong Siohwa, e ketin mweidala ren kalipilipala oh kohkohsang sapwarailo. Ahpw mendahki e ketin anahne panawih irail, e sohte ketin likidmeliehiirailla. E sohte kak ketin wia met. Papah limpoak men sohte kin manokehla nah seri kan. Ahpw ia mwomwen sapwellimen Siohwa pepehm ni eh ketin mahsanih sapwellime ko ar kin koluhla mehlel?

“I kin loaleidkin uhk mehlel. Kupwurei kin mwekimwekidkin uhk; I pahn kin kupwurkalahngan ong uhk.” (Iretikitik 20) Siohwa uhdahn ketin loaleidki sapwellime ko. Arail koluhla mehlel sair kupwure, oh e ketin inenen kupwurki ren pwurodo reh. Duwehte semen pwutak me salongalao nan sapwellimen Sises karasaras, kupwuren Siohwa “mwekidkihda kowahlap” oh uhdahn ketin kupwurki kasamwohdo sapwellime ko reh.​—Luk 15:20.

“Siohwa Komw Ketin Mweidohng Ie Ien Pwurehng Papah Komwi!”

Mahsen kan nan Seremaia 31:18-20 sewese kitail en wehwehki sapwellimen Siohwa limpoak oh mahk. Koht sohte kin ketin likidmeliehla irail ko me kin papah ih mahs. Ia duwen ma re men pwurodo reh? Koht me ketin “diren mahk.” (Melkahka 86:5) E sohte mwahn pahn ketin sohpeisang irail kan me koluhla oh pwurodo reh. (Melkahka 51:17) Ahpw e kin ketin kupwurperenki kasamwohiraildo.​—Luk 15:22-24.

Lih me pwarada nin tapio tiengla mwowe pwehn pwurodo rehn Siohwa oh tuhwong mwomwohdisohn Sounkadehdehn Siohwa kan me mi eh wasao. Keieu, e anahne powehdi eh pepehm suwed duwen pein ih. E tamanda met: “I pehm me I uhdahn sohte warohng.” Ahpw elder kan nan mwomwohdiso kihong ih mehn kangoang oh sewese ih en ale kehl pwehn kak pwurehng ahneki nanpwungmwahu rehn Siohwa. E uhdahn kalahnganki met oh nda, “I uhdahn perenki me Siohwa ketin mweidohng ie ien pwurehng papah ih!”

Ma ke kin papah Siohwa mahs oh kin medemedewe ken pwurehng papah ih, se luke iuk ken tuhwong mwomwohdisohn Sounkadehdehn Siohwa kan. Tamataman me Siohwa kin ketin mwekidki limpoak oh mahk ni emen me koluhla eh kin likweriong patohwan, “Menlau mweidohng ie ien pwurehng papah komwi.”

Wadawad en Paipel Ong April:

◼ Seremaia 17-31

[Nting tikitik me mi pah]