Sounkadehdehn Siohwa kan Kin Kamehlele Duwen Sises?

E KESEMPWAL EN KAMEHLELE SISES

Anthony: Kaselel Tim. I perenki ei pwurehng tuhwong uhk.

Tim: I pil perenki ei tuhwong uhk.

Anthony: I wahdo noumw Kahn Iroir me keieu kapw. I leme me ke pahn perenki wadek ire kan nan Kahn Iroir wet.

Tim: Kalahngan. Ni mehlel, I perenki omw kohdo rahnwet pwehki mie mehkot I men idek rehmw.

Anthony: Mwahu. Ia omw peidek en?

Tim: Rahn teio, I koasoakoasoiong emen iengei tohndoadoahk. I ndaiong ih duwen kisin pwuhk kan me ke kihong ie oh ia uwen ei kin perenki wadek. Ahpw e nda me I en dehr wadek pwe Sounkadehdehn Siohwa kan sohte kin kamehlele duwen Sises. Met mehlel? I ndaiong me I pahn idek rehmw ahnsou me ke pahn pwurodo.

Anthony: I perenki omw idek rehi peidek en. Pwehki e sou mwahu en pein idek rehn aramas men dahme e kamehlele sang omw pahn idek rehn meteikan?

Tim: Ihme I medewe.

Anthony: Ni mehlel, Sounkadehdehn Siohwa kan kin uhdahn kamehlele duwen Sises. Se kamehlele me en pwoson Sises kin kesempwal ong komourpatail.

Tim: Ihme I medewe. Ahpw ni ahnsou me iengei tohndoadoahko nda me kumwail sohte kamehlele duwen Sises, e kahrehda I men idek rehmw. I leme kita saikinte koasoiahpene ire wet.

Anthony: I kak kasalehiong uhk ekei iren Paipel me kasalehda duwen kesempwalpen en pwoson Sises? Sounkadehdehn Siohwa kan kin kalapw doadoahngki ire pwukat nan kalohk.

Tim: OK.

Anthony: Ehu ire mwahu iei me Sises mahsanih nan Sohn 14:6. Mahsen pwukat iei me Sises mahsaniong emen sapwellime tohnpadahk ko. Wasaht mahsanih: “Sises ahpw ketin mahsanihong, ‘Ngehi me ahl, ngehi me mehlel, ngehi me mour; sohte me kak kolahng Semei ma soh ngehi.’” Nin duwen me ire wet kasalehda, ia ehute ahl me kitail kak kolahng Samatailo?

Tim: Ahlo iei Sises.

Anthony: Pwung. Sounkadehdehn Siohwa kan uhdahn kamehlele met. I men idek rehmw: Ni mwaren ihs me emen kin wia eh kapakap?

Tim: Ni mwaren Sises.

Anthony: Pwung rehmw. Ihme kahrehda ei kapakap koaros I kin wia ni mwaren Sises. Sounkadehdehn Siohwa kan koaros kin wia met.

Tim: Mwahu ei ese met.

Anthony: Pil ehu ire me kita kak tehkpene iei Sohn 3:16. Ire wet inenen kesempwal me kahrehda ekei kin nda me e oarepene Pwuhken Rongamwahu ko pwon. Met wehwehki me ma ke kak kihpene soahng koaros duwen sapwellimen Sises mour nin sampah oh sapwellime doadoahk en kalohk oh kawehwehdi nan ire ehute, ih ireo met. Ke men wadek ire wet?

Tim: OK. Wasaht mahsanih: “Pwe iei uwen Koht eh ketin loalloale sampah, me e ketikihdohki Sapwellime Iehros, pwe mehmen me kin pwosonla ih en dehr salongala, a en ahneki mour soutuk.”

Anthony: Kalahngan. Ke ese iren Paipel wet?

Tim: Ei, I kin kalapw rong met nan at imwen sarawio.

Anthony: Aramas tohto ese ire wet. Tehk kanahieng wasaht. Sises ketin kasalehda me sapwellimen Koht limpoak kin kahrehda aramas akan en kak ahneki mour soutuk. Ahpw dahme kitail anahne wia?

Tim: Kitail anahne pwoson.

Anthony: Ei. Pwoson Iehroso, Sises Krais. Oh ire kesempwal me pid atail pwoson Sises eh ritingadahng kitail mour soutuk iei me sansalda nan pali 2 en kisin pwuhk wet me I wahdo rehmw. Wasao kasalehda kahrepe kan me Kahn Iroir wet wiawihda. Ehu kahrepe iei e “kin kangoange aramas en pwoson Sises Krais me pwoulahr pwe kitail en kak alehdi mour soutuk oh met e kin ketin kakaun nin duwen Nanmwarki en Wehin Koht.”

Tim: E uhdahn sansal. Nan noumwail kisin pwuhken kadehdehda me Sounkadehdehn Siohwa kan kin kamehlele duwen Sises.

Anthony: Mehlel.

Tim: Eri dahme kahrehda aramas akan kin nda me kumwail sohte kamehlele duwen Sises?

Anthony: Ele mie kahrepe tohto me aramas kin ndahki met. Ekei aramas nda men pwehki re rong dahme meteikan kin ndahki kiht. De mwein dahme irail rong sang arail kaunen pelien lamalam kan duwen kiht sohte pwung.

Tim: I medemedewe me mwein ekei aramas nda me kumwail sohte kin kamehlele duwen Sises pwehki amwail kahdaneki pein kumwail Sounkadehdehn Siohwa kei, ahpw kaidehn Sounkadehdehn Sises.

Anthony: Mwein pil ehu kahrepe men.

Tim: Dahme kahrehda kumwail kin kalapw koasoia duwen Siohwa?

“MWAROMWI EN SARAWIHLA”

Anthony: Ehu kahrepe iei me se kamehlele me e kesempwal en doadoahngki mwaren Koht, Siohwa, duwehte me sapwellime Ohlo Sises kin wia. Medewehla dahme Sises ketin kangoangehki sapwellime tohnpadahk ko ren kapakapki. E kileldi nan Madiu 6:9. Ke kak menlau wadek ire wet?

Tim: Ei. Wasaht mahsanih: “Iet duwen amwail pahn kin kapakap: ‘Samat me ketiket nanleng: Mwaromwi en sarawihla rehn aramas koaros.’”

Anthony: Kalahngan. Tehk me Sises ketin kangoangehkin irail en kapakapki me mwaren Koht en sarawihla. Ia omw madamadau? Dahme kahrehda e ketin wiahki met?

Tim: I sohte nohn wehwehki.

Anthony: Mwein kita kak kilang pil ehu iren Paipel me pahn kalaudehla ata wehwehki ire wet. Ehu me I medemedewe iei Wiewia 2:21. E mahsanih: “Sohte lipilipil ihs ih me pahn likweriong mwaren Kaun-o, e pahn mourla.” Eri ih kamehlele me ke pahn pwungki me kitail anahne likweriong mwaren Siohwa pwe kitail en mourla. Sises pil mwahngih duwen kesempwalpen en wia met.

Tim: Ei, pwung rehmw.

Anthony: Eri ehu kahrepe e kesempwal ong Sises me sapwellime tohnpadahk kan en ese oh doadoahngki mwaren Koht iei pwehki e pidada komourparail. Oh ih ehu kahrepe keieu kesempwal se kin kalapw koasoia duwen Siohwa. Se kamehlele me e kesempwal en kasalehda mwaren Koht oh me e pahn sewese meteikan en likweriong mwar wet.

Tim: Ahpw mehnda ma aramas sehse mwaren Koht de re kin doadoahngki mwaro, re esehte ihs me re koasoakoasoia ahnsou me irail koasoia duwen Koht.

Anthony: Mwein ke pil kak nda men. Ahpw sang eh ketin kasalehiong kitail mwareo, Koht kin ketin kamangaiong kitail en karanihala ih.

Tim: Ia wehwehn men?

Anthony: Nna medewehla: Kitail sohte anahne ese eden Moses. Kitail kakete nda me ih ohlo me kihpeseng Sehd Weitahtao de ohlo me ale Kosonned Eiseko. Pil duwehte Noha, ia kahrepen atail en ese edeo? Kitail kak ndahte me ih ohlo me kauwada warihmw ehu oh kapitala eh peneineio oh mahn akan. Pil duwehte, kitail kak ndahki me Sises Krais iei ohlo me ketido sang nanleng oh pwoukihla dipatail kan, kaidehn?

Tim: Mwein.

Anthony: Ahpw Koht ketin kupwurki kitail en ese eden aramas pwukat. Atail ese eden emenemen aramas pwukat kin kahrehiong kitail en uhdahn ese dahme wiawi ong irail. Mendahki sohte pak ehu kitail tuhwong Moses, Noha, de Sises, ahpw atail ese adarail kin kahrehiong kitail en mwomwen uhdahn ese irail.

Tim: I sohte medewe men nin tapio, ahpw met I wehwehkidahr.

Anthony: Oh met pil wia ehu kahrepe me Sounkadehdehn Siohwa kan kin kalapw doadoahngki mwaren Koht. Kitail men sewese aramas akan en kakairada arail pwoson Siohwa nin duwen emen me re uhdahn kak karanihala. Ni ahnsowohte se kin kesempwalki pwukoa me Sises ketin wia ong komourpatail. Mwein kita pil kak wadek ehu iren Paipel me kak kawehwehda mwahu wasaht.

Tim: Mwahu.

Anthony: Mwoweo, kita wadek Sohn 14:6, wasa me Sises mahsanih “Ngehi me ahl, ngehi me mehlel, ngehi me mour.” Ahpw met kita tehk iretikitik kante mwowe oh tehk dahme e mahsanih nan Sohn 14:1. Ke kak menlau wadek dahme Sises mahsanih ni kaimwiseklahn iretiktiko?

Tim: OK. Wasaht mahsanih: “Kumwail pwoson Koht oh pil pwoson ie.”

Anthony: Kalahngan. Eri ia duwe, ke pahn kak nda me pwoson mehlel kohsang en pwosonte Koht kelehpw de pwosonte Sises kelehpw?

Tim: Soh, Sises mahsanih me kitail anahne pwoson ira koaros.

Anthony: Ei pwung, oh I kamehlele me ke pahn pwungki me e sohte itar en ndahte me kitail pwoson Koht oh pwoson Sises. Mehlel kitail anahne ahneki soangen mour me kin kasalehda atail pwoson ira koaros.

Tim: Pwung rehmw.

Anthony: Ahpw ia duwen emen eh kak kasalehda me e uhdahn pwoson Koht oh Sises? Mwein kita kak koasoiapene peidek wet ehu rahn.a

Tim: Ei mwahu.