OARALAP | NI AHNSOU ME EMEN ME KE POAKOHNG MEHLA
Ia Duwe, E Sapwung en Pahtou?
Mie pak me ke soumwahuda? Ele ke mwadangete mwahula oh ke manokehla omw soumwahu. Ahpw, pahtou weksang met. Dr. Alan Wolfelt ntingihedi nan nah pwuhk: “Aramas sohte kin mwahudahsang douluhl ar pahtou.” Ahpw e pil kapatahiong: “Mwurin ahnsou laud oh sawas en aramas teikan, omw pahtou pahn kak tikitikla.”—Healing a Spouse’s Grieving Heart.
Karasepe, tehk dahme Eipraam wia ni ahnsou me eh pwoudo mehla. Tepin ntingdahn Paipel mahsanih me “Eipraam ahpw tepida pahtouki oh sengisengki mehlahn Sara.” Lepin lokaia ko “ahpw tepida” kihong kitail en medemedewe me e anahne ahnsou laud en powehdi mehlahn eh pwoudo.a Pil ehu karasepe iei Seikop, me alehdi rohng likamw me mahn lawalo kemehla nah pwutak Sosep. E pahtouki “rahn tohtohie” oh tohn eh peneinei kan sohte kak kansenamwahwihala. Sounpar tohto kei mwuri, e kin wie toutoukihte mehlahn Sosep.—Senesis 23:2, NW; 37:34, 35; 42:36; 45:28.
Eipraam sengisengki mehlahn eh pwoud kompoak Sara
Met pil duwehte rahnpwukat, me tohto kin pahtouki mehlahn emen me re uhdahn kin karanih. Tehk karasepe riau pwukat.
“Ei pwoud, Robert, mehla nan July 9, 2008. Ni menseng en rahn me e mehkihla aksidento sohte weksang rahn teikan koaros. Mwurin mwengehn menseng, nin duwen dahme se kin kalapw wia mwohn e pahn kohkohla doadoahk, e kin metik ie, pwoaleiehdi oh ndaiong ie ‘I poakepoakeiuk.’ Sounpar weneu mwuri medek me mi nan mohngiongiet mihmihte. I sohte leme I kak powehdi ahn Rob eh mehsang ie.”—Gail, sounpar 60.
“Mendahki dauliher sounpar 18 me ei pwoud kompoak mehsang ie, I kin loaleidkihte oh pahtouki eh mehsang ie. Ahnsou koaros me I kin kilangada soangen kapikipik kaselel kan, I kin tamanda ih oh medemedewe uwen eh pahn perenki iang ie kilang dahme I kilikilang.”—Etienne, sounpar 84.
Sansal me soangen medek oh pepehm werei pwukat uhdahn wia ahnepen aramas. Emenemen aramas kin wekpeseng ni ar kin dadaur nan ar pahtou kan, oh e sohte pahn wia elen loalokong en kadeik ahn emen eh mwekid nan apwal me e lelohng. Pil ni ahnsowohte, ele kitail anahne soikala en dehr kalokehkin kitail ma atail mwekid kan ong kahpwalo nohn daulihala. Ia duwen atail kak nantihong powehdi pahtou?
a Nein Eipraam pwutak Aisek pil pahtou ahnsou reirei. Ni atail tehk nan ehu oaralap en kisin pwuhk wet “Kahlemengih Arail Pwoson” Aisek papahtoukihte mehlahn eh nohno, Sara, sounpar siluh mwurin eh mehla.—Senesis 24:67.