Kansensuwed Mehlel Me Pid Duwen Mehla
MEDEWEHLA ni omw kilikilang kasdo ehu duwen aramas ndand men, mwein ele sounkoul ndand men me ke kin uhdahn lelki. E tepida kasalehda sang ni eh seri, ni eh sukuhlki duwen koul, oh eh pripraktis pak tohto. Eri ke kin kilang eh kin kokoul mwohn aramas akan, seiseiloakseli wasa koaros, oh wiahla aramas ndand men nan sampah pwon. Mwurin ahnsou kis, e kasalehda ahnsou me e mahlahr oh eri imwilahn kasdou—e mehla.
Kasdo wet soai mehlel pwoat duwen aramas emen me met melahr. Mehnda ma soaio pid duwen sounkoul men, saintis men, sounmwadong men, de aramas ndand kei, soaio pahn duduwehte. Aramaso ele wiahda soahng mwahu tohto, ahpw medewehla ia uwen laud me e pil kak wiahda ma e sohte mahla oh mehla?
Kitail pahn nsensuwed ni atail kin medewe duwen met, ahpw ih met me pahn wiawihong kitail koaros. (Eklesiasdes 9:5) Sohte lipilipil ia uwen laud me kitail kin songosong, kitail saikinte kak pitsang kahpwal en mahla oh mehla. De kitail kak mwadangete mehla ma kitail soumwahuda de lelohng nan aksident. Nin duwen Paipel eh kawehwehda, kitail duwehte pwoaik en nimenseng me “me kin pwarada ahnsou kis oh mwuri sohrala.”—Seims 4:14.
Pwehki kitail kakete mehla ahnsou sohte lipilipil, aramas kin ahneki madamadau me “kitail en mwenge oh nim, pwe lakapw kitail pahn mehla.” (1 Korint 15:32) Ahpw aramas kin mour ni soangen mwohmw wet pwehki re ese me mehla kak lelohng irail ahnsou sohte lipilipil oh sohte arail koapworopwor ong ahnsou kohkohdo. Nan ehu ahnsou nan mour, ahpw mehlel ni ahnsou me aramas lelohng kahpwal ehu, ele e pahn idek, ‘Ihte mwomwen mouren met?’ Ia wasa ke kak diarada pasapeng?
Me tohto koapworopworki me saintis kan pahn diarada pasapengo. Saintis oh toahkte kan diaradahr soahng kan me kin kareireila mouren aramas akan. Oh ekei saintis kan kin kadoakoadoahki pwe ren pil ahpwte kareireila mour. Mehnda ma saintis pwukat pweida de soh, peideko duduwehte: Dahme kahrehda kitail kin mahla oh mehla? Mie koapworopwor me atail imwintihtio mehla pahn lohdi? Oaralap kan en mwurin met pahn kawehwehda ire pwukat oh sapengala peidek wet, Ihte mwomwen mouren met?