1 Komprimisu

KE KI SIGNIFIKA

Omi ku minjer ku tene komprimisu ta oja se kasamenti suma un union permanenti, i kila ta fasi elis sinti suguru. Kada un delis ta tene konfiansa di kuma ki utru na rispita se union, mesmu na mumentu difisil.

Alguns kasadus ta sinti kuma e obrigadu sta juntu pabia di preson di jintis o di familia. Ma na bardadi, i komprimisu ke tene basiadu na amor ku rispitu pa n̈utru ku dibi di pui pa e sta juntu.

PRINSIPIU DI BIBLIA: “Maridu tambi pa ka i larga si minjer.” — 1 Koríntius 7:11.

“Si bu sta komprimitidu na bu kasamenti bu ka na lestu ku paña raiba. Bu na lestu ku purda i pidi diskulpa. Bu na oja purblemas suma un obstakulu i ka suma un diskulpa pa kaba kasamenti.” — Micah.

PABIA KI IMPORTANTI

Ora ke tene purblema, kasadus ku ka tene komprimisu entri elis ta lestu ku fala: ‘Ami ku bo no ka ta da’ i dipus e ta buska manera di kaba kasamenti.

“Manga di jintis ta entra na kasamenti, ma ‘ku utru sintidu’, di bin kaba kasamenti. Ora ku algin entra na un kasamenti ku sintidu di kuma, i pudi bin kaba kasamenti, i pabia desdi kumsada i ka tene komprimisu.” — Jean.

KE KU BU PUDI FASI

FASI ES TESTI

Ora ku bo na jusia . . .

• Sera ki bu ta ripindi pa manera ku bu kasa ku bu parseru?

• Sera ki bu ta imaẑina kasa ku utru algin?

• Sera ki bu ta fala “no na kaba” o “N na bai ranja utru algin ku mas na dan balur”?

Si bu ruspundi sin pa un o mas des purguntas, i mumentu di bu fortalisi bu komprimisu.

KOMBERSA KU BU PARSERU

• Sera ki nivel di komprimisu di no kasamenti rapati? Si rapati, pabia?

• Ke ku no pudi fasi desdi gosi pa fortalisi no komprimisu?

SUẐESTONS

• Ba ta dati bu skirbi alguns frasi di amor pa bu parseru

• Pui foto di bu parseru na bu mesa na kau di tarbaju pa mostra kuma bu tene komprimisu

• Liga bu parseru kada dia ora ku bu sta na kau di tarbaju o na utru kau

PRINSIPIU DI BIBLIA: “Kil ku Deus junta, omi ka dibi di rapatil.” — Mateus 19:6.