21 SAMUEL
Un mininu ku konta mensaẑen di Jeova ku koraẑen
NA UN sertu sintidu, situason di Samuel parsiba ku di fiju femia di Jefté i ku Sanson. Ke ku e parsiba nel i di kuma, se papes seduba obdienti pa Jeova, i kila afeta se vida ciu dimas. Suma fiju femia di Jefté, Samuel pasa tudu si vida na sirbi Jeova di un manera spesial. (1 Sam 2:11) Suma Sanson, Samuel seduba un nazireu pa tudu si vida. (Ŝef 13:7) Tambi suma elis dus, Samuel pirsisaba di koraẑen.
Oca ku Samuel tiradu na mama, talves ku tris anu o mas, si mame Ana, tisil pa sirbi Jeova na tabernakulu ku staba na Siló, suma ki purmitiba Jeova. Ma Ana ta visitaba si fiju un bias kada anu, i ta lebalba un ropa nobu na tabernakulu. Samuel vivi na tabernakulu ku ŝef di saserdotis Eli, ku seduba un omi garandi. Talves alguns minjeris na tabernakulu juda na kuida di mininu Samuel.
Ma, jintis ta fasiba mau kusas na tabernakulu, i Eli ka toma tudu mididas ki pirsis pa para elis. Si dus fiju, Ofni ku Fineias seduba omis mau. E ta fasiba pekadu seksual ku alguns minjeris ku ta sirbiba na tabernakulu. Tambi e ta trataba sakrifisius di Jeova ku falta di rispitu. Pudi sedu di kuma, elis ku ta manda ajudantis di saserdoti pa e miti medu pa jintis umildi ku ta bin adora Jeova la, i e ta toma a forsa minjor parti di sakrifisius antis propi di e pudi dadu pa Jeova. Eli sibi ke ku si fijus staba na fasi. Ma, i papia so kelis, nin e ka sukutal. Apesar di tudu e kusas mau ku staba na kontisi na tabernakulu, Samuel pertusi di Jeova nkuantu i na kirsi i tambi jintis gostaba del. Oca ku tempu ciga pa Jeova risolvi purblemas na Siló, i kuji joven Samuel pa i sedu si porta-vos.
Un dia di noti, Samuel korda pabia i obi un vos. Jeova ku staba na comal! Ma Samuel pensa di kuma i Eli, ku seduba beju i segu. Pa kila, Samuel kuri i bai nunde el pa sibi ke ki i mistiba. Eli falal pa i riba i bai dita pabia i ka comal. Mesmu kusa kontisi dus bias mas. Finalmenti na turseru bias, Eli kaba pa ntindi di kuma i Jeova ku staba na coma Samuel, pa kila, i fala Samuel pa i bai dita. Si Jeova torna comal mas, Samuel tenba ku fala sin: “Papia, SIÑOR, pabia bu servu na obi.” Samuel fasi suma ki faladu.
Pa kuartu bias Jeova comal: “Samuel, Samuel.” I ruspundil: “Papia, pabia bu servu na obi.” Dipus Jeova papia ku el, i falal di kuma i na risolvi purblemas na Siló, i Eli na kastigadu pabia i ka pui si fijus para fasi ke ki mau. Jeova na kastiga Eli ku si famlia nkluindu si fijus. Samuel tenba ku konta Eli tudu es kusas!
Samuel torna dita mas, ma Biblia ka konta si konsigi durmi. I lanta parmaña i yabri portas di tabernakulu. Samuel “mediba konta Eli ki vison”, i normal pa i sinti asin. Talves Eli ntindi di kuma Samuel staba ku medu, pa kila i comal i puntal: “Ke ki kontau? Di fabur, ka bu sukundin el.”
Nin si manera ki sedu mininu, Samuel tenba ku konta mensaẑen di julgamentu di Jeova pa Eli, ŝef di saserdotis.
Ku sertesa i seduba un mumentu difisil pa Samuel. Sera ki Samuel rispitaba Eli suma si dona? Di kualker manera i rispitalba, pabia Eli seduba ŝef di saserdotis di Israel! Nin ku sin, Samuel konta Eli tudu kusa ku Jeova falal. Eli sibi di kuma kasabi na bin nin i ka na tarda. Sera ki i kuriẑi si fijus mau? I ka ten nin un prova ku ta mostra di kuma i fasil.
Jeova bensua Samuel ciu dimas manera ki mostra es koraẑen garandi. Biblia fala: ‘Jeova staba ku el’. Apartir di ki mumentu, Samuel pasa sedu profeta di Jeova, i tudu ke ki i fala kumpri. Tudu palabras di Samuel aserka di Eli ku di si fijus bin kumpri. Pa manga di anus dipus, Jeova usa Samuel pa da orientason i gia nason di Israel. Duranti anus, Samuel sirbi di manera fiel suma profeta di Jeova ku ŝef na Israel. Disna di pikininu i aprindi sedu koraẑosu ku ajuda di Jeova, i kontinua mostra koraẑen i sirbi Jeova ku fidelidadi duranti tudu si vida.
Lei es storia na Biblia:
1 Samuel 1:9-11, 24-28; 2:12-36; 3:1-21; 25:1
Ebreus 11:32
Pa kombersa del:
Di kal maneras ku Samuel mostra koraẑen?
Fasi piskisa pa ntindi minjor
1. Siló seduba kau ku tabernakulu di Jeova staba nel. Konta kuma ku la seduba. (w92-T 1/11 paẑina 8 ku 9) A
Todd Bolen/BiblePlaces.com
Foto A: Kau nunde ku antigu Siló staba nel
2. Kuma ku vida di Samuel seduba na tabernakulu? (ia-T paẑina 60 te 62 paragrafu 9 te 13) B
Diseñu B
3. Na kal sintidu ku joven Samuel ‘ka kunsiba inda Jeova’? (1 Sam 3:7; w02-T 15/12 paẑina 8 paragrafu 5 ku 6)
4. Kuma ku profesia aserka di familia di Eli kumpri? (it-T “Eli, I” paragrafu 5 te 7)
Pensa na kuma di aplika es lisons
Ke ku jovens pudi aprindi di Samuel aserka di importansia di . . .
sta pruntu pa obdisi? (1 Sam 3:5)
mostra rispitu? (1 Sam 3:6-10)
sedu algin di konfiansa? (1 Sam 3:15) C
Foto C
Na kal mumentu ku talves un joven na pirsisa di koraẑen pa papia, i kuma ku isemplu di Samuel pudi judal?
Di kal utrus manera ku bu pudi kopia koraẑen di Samuel?
Pensa fundu na lisons mas garandi
Ke ku es storia nsinan aserka di Jeova?
Kal ligason ku es storia tene ku intenson di Jeova?
Ke ku N na gostaba di punta Samuel ora ki resusitadu?
Aprindi mas
Na kal mumentu ku talves jovens ku garandis na pirsisa di koraẑen pa fasi ke ki sertu?
Nin si manera ku jintis nunde ki staba ka rispita Jeova, joven Samuel disidi fasi ke ki sertu.