LISON 02
Biblia purmiti un futuru bonitu
Jintis na mundu ntidu ta lida ku purblemas ku ta pui elis fika tristi, sta preokupadu i te mesmu ku dur. Bu ciga ja di pasa un situason ku fasiu sinti asin? Talves bu sta na sufri pabia di un duensa o pabia un algin ku bu ama muri. Talves bu pudi punta: ‘Sera ki un dia vida na sedu minjor?’ Resposta ku Biblia da pa es purgunta pudi animau.
1. Kal speransa ku Biblia danu pa futuru?
Biblia ka splikanu so pabia ku mundu sta ŝeiu di purblemas. Ma tambi i kontanu bon noba di kuma i ka na tarda es purblemas di aos na bin kaba. Promesas ku sta na Biblia pudi ‘danu futuru ku no na pera.’ (Lei Jeremias 29:11, 12.) Promesas di Biblia pudi judanu lida ku purblemas di aos, sedu pusitivu i tene kontentamentu pa tudu tempu.
2. Di akordu ku Biblia kuma ku futuru na bin sedu?
Biblia fala di un futuru nunde ku “mortu ka na ten mas, nin tristesa, nin cur, nin dur”. (Lei Apokalipsi 21:4.) Purblemas ku ta fasi no vida parsi sta sin speransa aos, suma koitadesa, injustisa, duensa ku mortu, ka na bin ten mas. Biblia purmiti kuma jintis na bin vivi filis pa sempri na paraísu li na Tera.
3. Kuma ku bu pudi fortalisi bu konfiansa di kuma promesas di Biblia na bin kumpri?
Manga di jintis tene speransa di kuma bon kusas na bin akontisi, ma e ka pudi tene serteza di kuma kil ke na spera na sedu. Ma kusa ku Biblia purmiti ka na maina. No pudi fortalisi no konfiansa na ke ku Biblia fala atraves di “rabista Skritura”. (Atus 17:11) Nkuantu bu na studa Biblia bu na oja kusas ku na judau disidi, si bu na fia na promesas di Biblia o nau.
APRINDI MAS
Jubi alguns kondisons ku Biblia purmiti kuma no na bin tene na futuru. Jubi kuma ku promesas di Biblia sta na juda jintis aos.
4. Biblia purmiti di kuma no na bin vivi pa sempri na un bon kondison
Jubi lista di alguns promesas ku sta na Biblia. Kal un des promesas ku bu mas misti oja pa i kumpri? I pabia di ke?
Na kada promesa, lei testus ku sitadu, i bo kombersa aserka des purguntas:
Ke ku bu pensa, sera ki es testus pudi dau speransa? Sera ke pudi da speransa pa bu familia ku bu amigus?
Imaẑina kuma bu sta na vivi na un mundu nunde ku
NINGIN KA NA . . . |
TUDU JINTIS NA BIN . . . |
|---|---|
|
|
|
|
|
|
|
|
|
|
5. Promesa di Biblia pudi fasi diferensa na bu vida
Manga di jintis fika disanimadu te mesmu ku raiba pabia di purblemas ke sta na oja. Alguns ta luta pa tenta muda kusas pa minjor. Biblia purmiti kuma kusas na bin minjoria. Jubi kuma ku es sta na juda jintis aos. Mostra VIDEO, dipus bo kombersa aserka des purguntas:
Na video, kal injustisa ku Rafika ka kontenti kel?
Kuma ku Biblia judal, apesar di kuma injustisa ki staba na oja ka kaba?
Promesas ku Biblia fasi aserka di futuru, pudi judanu vensi disanimu i sai ben na lida ku no purblemas. Lei Ditus 17:22 ku Romanus 12:12, dipus bo kombersa aserka des purguntas:
Bu pensa kuma mensaẑen di speransa ku sta na Biblia pudi fasi diferensa na bu vida gosi? Pabia ku bu pensa asin?
ALGUNS JINTIS TA FALA: “Promesas di Biblia i bon, ma i na sedu me?”
Pabia ku bu pensa kuma i importanti pa izamina provas?
RUSUMU
Biblia purmiti un futuru ŝeiu di filisidadi, es ta danu speransa i judanu lida ku purblemas di vida.
Rekapitulason
Ke ku manda jintis pirsisa di kunsi promesas ku Biblia fasi?
Ke ku Biblia fala aserka di futuru?
Kuma ku kunsi promesas di Biblia pa futuru pudi judau gosi?
TENE MAS INFORMASON
Aprindi mas aserka di kuma ku speransa pudi judau.
“Nunde ku Bu Pudi Oja Speransa?” (No Korda!, 22 di abril di 2004)
Diskubri kuma ku speransa pa futuru pudi juda kilis ku tene duensa ku ka tene kura.
“Sera ki Biblia pudi juda un algin lida ku duensa ku ka tene kura?” (Artigu na internet)
Diskubri kuma ku vida di un algin ku ta difindi sosiedadi muda, oca i aprindi promesas di Biblia pa futuru.
“N ka pensa mas kuma N dibi di muda mundu” (Sintinela di 1 di juliu di 2013)