Kopia Jeova — Ka bu nsisti na bu ideia

1. Na kal sintidu ku kristons dibi di sedu suma un arvuri? (Jubi tambi diseñu.)

“BENTU ka pudi bati un arvuri ku ta dobra.” Es ditu mostra di kuma, pa arvuris sedu forti e pirsisa di dobra ora ku bentu supra ku forsa. Pa kirsi na sintidu spiritual, kristons dibi di adapta, sta prontu pa dobra. Kuma ku no pudi fasi kila? No ka ta nsisti na no ideia si no adapta ora ki ten mudansas na no vida, i rispita manera di pensa ku disisons di utrus.

2. Kal maneras di sedu ku na judanu adapta ora ki ten mudansas na no vida, i ke ku no na bin fala del nes studu?

² Suma servus di Jeova, no misti sedu jintis ku ka ta nsisti na se ideia. No misti tambi sedu jintis umildi i ku ta sinti pena pa utrus. Nes studu, no na bin oja kuma ku es maneras di sedu juda alguns kristons sai ben oca ki ten mudansas na se vida. No na oja tambi kuma ku es maneras di sedu pudi judanu. Ma antis, no na aprindi kuma ku Jeova ku Jesus sedu isemplu perfeitu di jintis ku ka ta nsisti na se ideia.

JEOVA KU JESUS KA TA NSISTI NA SE IDEIA

3. Kuma ku no sibi di kuma Jeova ka ta nsisti na si ideia?

³ Jeova comadu di “Roca” pabia el i firmi i ka ta bulbuli. (Lei 32:4) Ma nin ku sin, i ka ta nsisti na si ideia. Nkuantu kusas sta na muda nes mundu, no Deus kontinua adapta pa pudi kumpri ke ki purmiti. Jeova kumpu pekaduris suma el propi, ku kapasidadi di adapta ora ki ten mudansas na vida. Jeova danu prinsipius klaru na Biblia ku pudi judanu toma bon disisons i ka mporta kal purblemas ku no pudi tene na vida. Propi isemplu di Jeova ku prinsipius ki da, ta judanu sibi kuma, mesmu pa manera ki sedu “Roca” el tambi i ka ta nsisti na si ideia.

4. Da isemplu di kuma ku Jeova ka ta nsisti na si ideia. (Sirmonias 5:7, 11)

⁴ Kamiñu di Jeova i perfeitu, i ka ta nsisti na si ideia. I ka ta sedu duru ora ki na lida ku pekaduris. Pur isemplu, jubi kuma ku Jeova mostra di kuma i ka ta nsisti na si ideia kontra i na lida ku israelitas. I ka iziẑiba mesmu sakrifisiu pa tudu jintis, i ka mporta si bu sedu riku o pobri. Na alguns situasons, i pirmiti pa kada kin da sakrifisiu di akordu ku si pusibilidadi. — Lei Sirmonias 5:7, 11.

5. Da un isemplu di umildadi di Jeova i kuma ki ta sinti pena di jintis.

⁵ Umildadi di Jeova ku manera ki ta sinti pena di jintis, ta pul pa i ka nsisti na si ideia. Pur isemplu, umildadi di Jeova ojadu oca ki staba pa kaba ku jintis mau na Sodoma. Atraves di si anjus, Jeova fala Lo, ku sedu omi justu, pa i kuri pa montis. Lo mediba bai la. Pa kila, i pidi pa i bai ku si familia pa Zoar, un sidadi pikininu ku Jeova disidi kababa ku el. Jeova pudiba nsisti pa Lo fasi ke propi ki falalba pa i fasi. Ma i seta pididu di Lo mesmu si kila signifikaba ka kaba ku Zoar. (Kum 19:18-22) Manga di anus dipus, Jeova mostra di kuma i sinti pena pa jintis di Ninive. I manda profeta Jonas pa i konta jintis mau di Ninive di kuma i na kaba ku elis ku se sidadi. Ma kontra ninivitas ripindi, Jeova sinti pena delis, i ka kaba ku se sidadi. — Jonas 3:1, 10; 4:10, 11.

6. Da isemplus di kuma ku Jesus kopia Jeova ku ka ta nsisti na si ideia.

⁶ Jesus kopia Jeova ku ka ta nsisti na si ideia. I mandadu pa Tera pa prega “jinti di nason di Israel ku pirdi suma karnel.” Ma i ka nsisti na si ideia oca ki na pregaba jintis. Un bias, un minjer ki ka israelita pidil pa i kura si fiju femia ku “tene dimoniu ku na kansal dimas.” Jesus sinti pena i fasi ke ku minjer pidil, i kura si fiju femia. (Mat 15:21-28) Jubi utru isemplu. Na kumsada di si ministeriu, Jesus fala sin: “Kil ku negan . . . , tambi N na negal”. (Mat 10:33) Ma sera ki i nega Pedru, kontra i negal tris bias? Nau. Jesus sibi kuma Pedru ripindi, tambi i tene fe. Dipus ku Jesus resusitadu, i parsi dianti di Pedru, talves i dal garantia di kuma i purdal, tambi i kontinua amal. — Luk 24:33, 34.

7. Di akordu Filipensis 4:5, kuma ku no misti pa jintis kunsinu?

⁷ No oja di kuma Jeova Deus ku Jesus Kristu i jintis ku ka ta nsisti na se ideia. I anos gora? Jeova misti pa no sedu jintis ku ka ta nsisti na se ideia. (Lei Filipensis 4:5.) Un traduson traduzi es versikulu asin: “Kunsidu suma algin ku ka ta nsisti na si ideia.” No pudi punta no kabesa: ‘Sera ki jintis kunsin suma algin ku ka ta nsisti na si ideia, algin ku ta disa si ideia pa tras i algin ku ta tolera? O sera ki e ta ojan suma un algin duru, iziẑenti o ku risu kabesa? Sera ki N ta nsisti pa utrus fasi kusas suma ku N pensa kuma i dibi di fasidu? O sera ki N ta sukuta utrus i disa elis fasi ke ke misti ora ki pirsis?’ Konformi no na kopia Jeova ku Jesus, no mas na sedu jintis ku ka ta nsisti na se ideia. Gosi, no na jubi dus situason nunde ku no pirsisa di ka nsisti na no ideia, ora ki ten mundansas na no vida i ora ku manera di pensa ku disisons di utrus i diferenti ku di nos.

SEDU ALGIN KU KA TA NSISTI NA SI IDEIA ORA KI TEN MUDANSAS

8. Ke ku pudi judanu pa ka nsisti na no ideia, ora ki ten mudansas na no vida? (Jubi tambi nota.)

⁸ No pirsisa di ka nsisti na no ideia, ora ki ten mudansas na no vida. Es mudansas pudi tisi purblemas ku nunka no pensa kuma no na ciga di tene. No pudi tene purblema di saudi di repenti. O i pudi ten di repenti mudansa na guvernu o mudansa na ekonomia ku pudi torna no vida difisil dimas. (Ekl 9:11; 1 Kor 7:31) Te mesmu i pudi sedu difisil pa nos si organizason pidinu pa no sirbi Jeova di manera diferenti o na kau diferenti. I ka mporta kal mudansas ku no pasa, no pudi sai ben na adapta pa nobu situason si no fasi es kuatru kusas: (1) Rikuñisi di kuma bu situason i diferenti, (2) jubi pa futuru, (3) konsentra na kusas pusitivu, i (4) fasi kusas pa utrus.b No jubi kuma ku fasi es kusas juda alguns di no ermons ku irmas.

9. Kuma ku un kasal misionariu lida ku purblemas ke ka spera?

⁹ Rikuñisi di kuma bu situason i diferenti. Emanuele ku Francesca disignadu suma misionariu na un tera stranjeru. Oca ke kumsa ku aprindi lingua i kumsa ku kunsi ermons ku irmas di nobu kongregason, duensa di COVID-19 kumsa, pa kila, e dibi di lunjusi di utrus jintis. Dipus mame di Francesca muri di repenti. Francesca mistiba mal sta juntu ku si familia, ma pabia di duensa i ka pudi baiba pa la. Ke ku judal lida ku tudu es purblemas ku disanimal? Emanuele ku Francesca ora juntu pa pidi jiresa pa lida ku purblemas di kada dia, sin preokupa ku di utru dia. Jeova ruspundi se orason na mumentu sertu atraves di si organizason. Pur isemplu, e nkoraẑadu pa un ermon ku fala sin na un video: “Mas sedu ku no seta nobu situason, mas sedu ku no ta rekupera no alegria, juntu ku oportunidadi di sirbi Deus i juda utrus sirbil.”c Sugundu, e disidi minjoria se manera di da tustumuñu pa telefoni, te mesmu e kumsa un studu di Biblia. Terseru, e seta risibi ajuda di se ermons ku irmas i e gardisi pa amor ke mostra pa relis. Un irma ku ta mostra bondadi ta manda elis kada dia un mensaẑen pikininu di testu di Biblia duranti un anu. Anos tambi si no seta no nobu situason, no na tene kontentamentu na kualker kusa ku no pudi fasi.

10. Kuma ku un irma adapta pa un mudansa garandi ki pasa na si vida?

¹⁰ Jubi pa futuru, i konsentra na kusas pusitivu. Christina, un irma di Romenia ku mora na Japon, fikaba mal kontra si kongregason di lingua Inglis kabadu ku el. Ma, i ka kontinua pensa na ke ku kontisi. En ves di kila, i disidi bai pa kongregason di lingua Japones, i fasi si minjor na pregason. I pidi si antigu kolega di tarbaju pa i judal pa i pudi papia diritu Japones. Ki minjer seta usa Biblia ku broŝura Bu Pudi Tene un Vida Filis pa Sempri! pa nsina Christina Japones. I ka so Christina ku minjoria na papia Japones, ma tambi minjer kumsa ku mostra interesi pa bardadi. Ora ku no jubi pa futuru, i no sedu pusitivu, mudansas ku bin di repenti pudi tisi bensons ku no ka spera.

11. Ke ku un kasal ku tene purblema ekonomiku fasi?

¹¹ Fasi kusas pa utrus. Un kasal ku sta na vivi na un tera nunde ku no tarbaju tujidu, kumsa ku tene purblema di diñeru, kontra ku ekonomia di ki tera kai. Kuma ke konsigi adapta? Purmeru, e tenta rapati ke ke ta gasta. Dipus, en ves de konsentra na se purblemas, e disidi pasa mas tempu na pregason na juda utrus. (At 20:35) Omi fala sin: “Sta mas okupadu na pregason ta danu puku tempu pa no pensa na no purblemas, i mas tempu pa konsentra na fasi ke ku Deus misti.” Ora ku no situason muda, no dibi di lembra kuma i importanti kontinua juda utrus, spesialmenti atraves di pregason.

12. Kuma ku isemplu di apostolu Paulu pudi judanu adapta, ora ki ten mudansa na no pregason?

¹² No pirsisa di adapta na no pregason. No ta prega jintis ku ta fia na diferenti kusas aserka di Deus i ku bin di lugaris i kulturas diferenti. Apostolu Paulu sedu algin ku ta adapta i no pudi aprindi di si isemplu. Jesus kuji Paulu suma “apostolu di kilis ki ka judeu”. (Rom 11:13) Nes tarbaju, Paulu prega pa judeus, pa gregus, pa jintis jiru, jintis ku sta na tabanka, kilis ku tene pusison na guvernu ku reis. Pa pudi toka korson des diferenti jintis, Paulu “sedu tudu kusa pa tudu jinti”. (1 Kor 9:19-23) I ta sta atentu pa kulturas di jintis, lugaris nunde ke sai, na ke ke ta fia nel, i kila ta judal adapta na si manera di papia ku elis. Anos tambi no pudi minjoria no pregason si no ta adapta i tenta pensa na minjor manera di juda kilis ku na sukutanu.

RISPITA MANERA DI PENSA DI UTRUS

13. Si no rispita manera di pensa di utrus, kal pirigu ku faladu del na 1 Koríntius 8:9 ku no pudi ivita?

¹³ Ka nsisti na no ideia ta judanu tambi rispita manera di pensa di utrus. Pur isemplu, alguns di no irmas gosta di makia, ma utrus ka gosta. Alguns kristons gosta di bibi alkol un bokadu, ma utrus disidi ka bibil. Tudu kristons gosta di tene un bon saudi, ma e ta kuji diferenti manera di kuida di se saudi. Si no pensa kuma, kusa ku no disidi fasi i minjor, i no tenta konvensi no ermons ku irmas pa fasi ke ku no fasi, kila pudi pui pa utrus kai i tisi divison na kongregason. Na bardadi, no ka misti fasi es! (Lei 1 Koríntius 8:9; 10:23, 24) Gosi, no jubi dus isemplu ku na mostra kuma ku aplika prinsipius di Biblia pudi judanu sedu ekilibradu i manti pas.

14. Kal prinsipius di Biblia ku no dibi di pensa nel ora ku no na disidi manera di bisti ku aparensia?

¹⁴ Manera di bisti ku aparensia. Jeova ka kontanu ke ku no dibi di bisti, ma i danu prinsipius ku no dibi di sigi. No pirsisa di bisti suma servus di Deus, mostra ekilibriu, bisti di un manera simplis, i di “manera diritu”. (1 Tim 2:9, 10; 1 Ped 3:3) Pa kila, no ka misti coma atenson dimas pa no kabesa na manera ku no ta bisti. Prinsipius di Biblia ta juda tambi ansions pa e ivita pui se propi regras aserka di manera di bisti ku aparensia. Pur isemplu, ansions di un kongregason mistiba juda alguns ermons jovens ku staba na sigi un manera di korta kabelu ku sta na moda, ku ta kurtu i ku jurjuri. Kuma ku ansions pudi juda elis sin pui regra? Superintendenti di sirkuitu orienta ansions pa e fala ermons asin: “Si bu subi na palku i jintis mas presta atenson na kuma ku bu bisti i kuma ku bu korta kabelu mas di ki ke ku bu na fala, kila ta mostra di kuma, i ten purblema na bu manera di bisti ku aparensia.” Es splikason simplis juda es jovens ntindi ke ke dibi di fasi, i ansions ka pirsisaba di pui regra.d

15. Kal leis ku prinsipius di Biblia ku pudi judanu, ora ku no na toma disison aserka di saudi? (Romanus 14:5)

¹⁵ Kuida di saudi. Kada kriston dibi di disidi kuma ki na kuida di si saudi. (Gal 6:5) Ora ku kriston na disidi kal tratamentu di saudi ki na seta, e pirsisa di obdisi leis di Biblia di nega sangi ku spiritismu. (At 15:20; Gal 5:19, 20) Ma nunde ku Biblia ka fala nada, kada un di nos ku na disidi kal tratamentu di saudi ki na seta. I ten kilis ku ta buska so ajuda di mediku pa kuida di se saudi, nkuantu ku utrus ta pirfiri utru tipu di tratamentu. No pudi sta konvensidu di kuma sertu tipu di tratamentu i bon o i ka bon, ma no pirsisa di rispita diritu ku no ermons ku irmas tene di toma se propi disison. Pa kila, no dibi di lembra des kuatru kusas: (1) So Renu di Deus ku na kura tudu duensa i pa sempri. (Isa 33:24) (2) Kada kriston dibi di “ten sertesa” di ke ki minjor pa rel. (Lei Romanus 14:5.) (3) No ka ta julga utrus pa se disisons, nin no ka ta fasi nada ku na pui elis da tapada. (Rom 14:13) (4) Kristons ta mostra amor, e ntindi di kuma union di kongregason i mas importanti di ki se propi opinions. (Rom 14:15, 19, 20) Si no kontinua lembra des kusas, no na kontinua tene amisadi forti ku no ermons ku irmas, i no na juda pa i ten pas na kongregason.

16. Kuma ku un ansion pudi mostra di kuma i ka ta nsisti na si ideia ora ki na lida ku si kumpañeris ansions? (Jubi tambi fotos.)

¹⁶ Ansions dibi di sedu bon isemplu di jintis ku ka ta nsisti na se ideia. (1 Tim 3:2, 3) Pur isemplu, un ansion ka dibi di spera di kuma si opinion sempri na setadu so pabia di kuma, i mas garandi di ki utrus ansions. I ta rikuñisi di kuma spiritu di Jeova pudi leba kualker ansion fala un kusa ku na juda elis toma un bon disison. Tambi si un disison ka sta kontra prinsipius di Biblia, ansion ku ka ta nsisti na si ideia, ta sta dispostu pa apoia disison ku maioria di ansions toma, mesmu si i pirfiri utru kusa.

BENEFISIUS DI KA NSISTI NA NO IDEIA

17. Kal bensons ku kristons ku ka ta nsisti na se ideia na tene?

¹⁷ Ora ku no ka ta nsisti na no ideia no ta tene manga di bensons. No ta tene amisadi ku no ermons ku irmas, i pas ta ten na kongregason. Dentru di povu di Jeova i ten jintis ku diferenti maneras di sedu i ku kulturas diferenti. I bonitu sibi di kuma, mesmu ku es diferensa, no ta adora Jeova suma un familia unidu. Mas importanti, no sta kontenti di sibi di kuma, no sta na kopia no Deus Jeova, ku ka ta nsisti na si ideia.