Ke ku no pudi aprindi di ultimus 40 dia di Jesus na Tera?

1-2. Ke ku kontisi ku dus disipulus di Jesus, oca ke na bai pa Emaús?

NA DIA 16 di Nisan di anu 33 EK, disipulus di Jesus staba tristi i ku medu. Dus delis sai di Jerusalen i e na bai pa Emaús, un tabanka ku fika serka di 11 kilometru di Jerusalen. E staba disanimadu dimas, pabia algin ke staba na sigi, matadu. E speraba di kuma Mesias na bin fasi bon kusas, ma gosi i muri. Dipus i kontisi un kusa ke ka spera.

² Un algin pertusi delis i kumsa ku yanda ku elis. Disipulus kontal kusas tristi ku kontisi ku Jesus. Ki algin kumsa ku papia di kusas ku toka elis i ku nunka e ka diskisi del. Pa splika elis pabia ku Mesias dibi di sufri i muri, “i kumsa na libru di Moisés, i pasa na tudu anunsiaduris”. Oca ke ciga Emaús, disipulus nota di kuma ki omi ke staba na papia ku el, i Jesus ku lantandadu di mortu! Bu pudi imaẑina kuma ku disipulus kontenti, oca ke sibi di kuma Mesias sta di vida! — Luk 24:​13-35.

3-4. Kuma ku nkoraẑamentu di Jesus afeta si disipulus, i ke ku no na aprindi nes studu? (Atus 1:3)

³ Jesus parsi pa si disipulus manga di bias na si ultimus 40 dia na Tera.a (Lei Atus 1:3.) Duranti ki dias, Jesus nkoraẑa si disipulus ku staba ku medu i tristi. Asin e pasa tene alegria ku koraẑen di prega i nsina bon noba di Renu.

⁴ No pudi aprindi ciu ora ku no studa ke ku Jesus fasi duranti ki tempu. Nes studu, no na oja kuma ku Jesus usa es tempu (1) pa nkoraẑa si disipulus, (2) pa juda elis ntindi Skrituras minjor, i (3) pa trena elis pa responsabilidadis ke na bin tene na futuru. Na kada situason, no na oja kuma ku no pudi kopia isemplu di Jesus.

NKORAẐA UTRUS

5. Pabia ku disipulus di Jesus pirsisa di nkoraẑamentu?

⁵ Disipulus di Jesus pirsisa di nkoraẑamentu. Pabia di ke? Alguns disa se kasas, se familia, ku se nogos pa sigi Jesus pa tudu tempu. (Mat 19:27) Utrus maltratadu pabia e sedu si disipulus. (Jon 9:22) E staba dispostu pa fasi es mudansas na se vida i sufri pabia e fiaba di kuma, Jesus i Mesias ku faladuba di kuma i na bin. (Mat 16:16) Ma oca Jesus matadu e staba tristi i disanimadu, pabia e ka sibiba ke ku na bin kontisi ku elis.

6. Ke ku Jesus fasi dipus ki lantandadu di mortu?

⁶ Jesus ntindiba di kuma i normal pa si disipulus fika tristi oca ki muri, kila ka seduba falta di fe. E ku manda dias dipus ki lantandadu di mortu, i kumsa ku nkoraẑa si amigus. Pur isemplu, Jesus parsi pa Maria Madalena oca ki na cora dianti di si koba. (Jon 20:​11, 16) I parsi tambi pa dus disipulus ku faladu del na kumsada des studu. Tambi i parsi pa apostolu Pedru. (Luk 24:34) Ke ku no pudi aprindi di isemplu di Jesus? No jubi ke ku kontisi oca ki parsi pa Maria Madalena.

7. Suma ki sta na Jon 20:​11-16, ke ku Jesus oja Maria na fasi parmaña sedu di dia 16 di Nisan, i ke ku kila lebal pa i fasi? (Jubi tambi diseñu.)

⁷ Lei Jon 20:​11-16. Parmaña sedu di dia 16 di Nisan, un grupu di minjeris fiel bai pa koba nunde ku Jesus pudu. (Luk 24:​1, 10) No jubi ke ku kontisi ku un di minjeris, comadu Maria Madalena. Oca ku Maria ciga na koba, i ka oja nada. I kuri i bai konta Pedru ku Jon. Es dus omis kuri pa koba i Maria bai se tras. Dipus ke oja di kuma koba ka tene nada, omis riba kasa. Ma Maria ka fasi kila. I fika la i pega cora. I ka notaba di kuma Jesus staba la. Jesus nota di kuma es minjer fiel staba na cora pabia del, i mistiba konsolal. Pa kila, i parsi dianti di Maria dipus i fala alguns palabras simplis, ma ku nkoraẑal. I falal pa i bai konta si ermons un mensaẑen importanti, di kuma i lantandadu di mortu. — Jon 20:​17, 18.

8. Kuma ku no pudi kopia Jesus?

⁸ Kuma ku no pudi kopia Jesus? No na kopia Jesus ora ku no nkoraẑa no ermons ku irmas pa e kontinua sirbi Jeova. Suma Jesus, no pirsisa di sta atentu ku se difikuldadis, tenta ntindi ke ke na sinti i konsola elis. Jubi isemplu di Jocelyn, ku si irma muri di repenti. I fala sin: “N cora ciu dimas pa manga di misis.” Ma un ermon ku si minjer kumbidal pa se kasa, e obil ku bondadi, e mostral di kuma Deus dal balur. Jocelyn fala sin: “N sinti suma si Jeova usa elis pa tiran na un mar sukuru ku tene turbada pa pudi salban. E judan tene mas vontadi di kontinua sirbi Jeova.” Anos tambi no pudi nkoraẑa utrus, si no disa elis kontanu ke ke na sinti i sukuta elis diritu. Asin, no na pudi konsola elis i juda elis kontinua sirbi Jeova. — Rom 12:15.

JUDA UTRUS NTINDI PALABRA DI DEUS

9. Kal situason difisil ku disipulus di Jesus pasa, i kuma ku Jesus juda elis?

⁹ Disipulus di Jesus seta Palabra di Deus i e sforsa pa aplikal na se vida. (Jon 17:6) Ma e staba konfusu manera ku Jesus matadu suma un kriminosu na staka di turtura. Jesus sibiba di kuma si disipulus tene fe i e ama Jeova, ma i notaba di kuma e pirsisa di ntindi Skrituras minjor. (Luk 9:​44, 45; Jon 20:9) Pa kila, i juda elis ntindi signifikadu di ke ke lei na Skrituras. Jubi ke ki fasi oca ki parsi pa dus disipulus na kamiñu di Emaús.

10. Ke ku Jesus fasi pa konvensi si disipulus di kuma na bardadi el i Mesias? (Lukas 24:​18-27)

¹⁰ Lei Lukas 24:​18-27. Nota di kuma Jesus ka konta ki omis logu kin na bardadi ki sedu. Ma i fasi elis purguntas. Pabia di ke? Talves i misti pa e konta ke ke na pensa i ke ke na sinti. I e fasil. E falal di kuma e speraba di kuma Jesus ku na liberta Israel di kastigu di Romanus. Dipus ku es omis konta di manera klaru ke ke sinti, Jesus usa Skrituras pa juda elis ntindi ke ku kontisi.b Dipus ki mesmu dia di noti, Jesus parsi pa utrus disipulus, tambi i splika elis es mesmu profesias. (Luk 24:​33-48) Ke ku no pudi aprindi des storia?

11-12. (a) Kal lison ku no pudi aprindi manera ku Jesus nsina bardadis di Biblia? (Jubi tambi fotos.) (b) Ke ku instrutor di Biblia di Nortey fasi pa judal?

¹¹ Kuma ku no pudi kopia Jesus? Purmeru, ora ku bu na nsina studantis di Biblia, fasi elis purguntas ku rispitu ku na judau sibi ke ke sta na pensa i ke ku sta na se korson. (Dit 20:5) Ora ku bu ntinti se sentimentus, mostra elis kuma ke pudi buska testus di Biblia ku na aplika na se situason. Risisti tendensia di konta elis ke ke dibi di fasi. En ves di kila, juda elis rasiosina na basi di Skrituras pa e ntindi kuma ke pudi aplika prinsipius di Biblia na se vida. Jubi spiriensia di un ermon na Gana comadu Nortey.

¹² Nortey kumsa ku studa Biblia oca i tene 16 anu. I ka tarda, si familia kumsa ku pirsigil. Ke ku judal kontinua firmi? Si instrutor di Biblia usa Mateus kapitulu 10 pa splikal di kuma, kristons di bardadi na pirsigidu. Nortey fala sin: “Pa kila, kontra pirsigison kumsa, N staba konvensidu di kuma N oja bardadi.” Si instrutor judal rasiosina na testu di Mateus 10:​16, asin, pa i pudi sta atentu ku kualker situason ku pudi lebal na tene purblema ku si familia. Tambi e papia di kuma kes versikulu pudi judal mostra rispitu, ora ki na papia di asuntus riliẑiosu na kasa. Dipus di si batismu, Nortey misti sedu pioneru, ma si pape misti pa i bai universidadi. En ves di konta Nortey ke ki dibi di fasi, si instrutor fasil purguntas i judal rasiosina na basi di prinsipius di Biblia. Kal ku sedu rusultadu? Nortey disidi yentra na sirvisu di tempu kompletu. Si pape serkal di kasa. Kuma ku Nortey sinti ku tudu ke ku kontisi? I fala sin: “N sta konvensidu di kuma N toma un bon disison.” Di mesmu manera, si bu toma tempu pa juda utrus rasiosina na basi di Skrituras, bu pudi juda elis sedu kristons maduru. — Ef 3:​16-19.

JUDA ERMONS PA E SEDU “DONS PA OMIS”

13. Ke ku Jesus fasi pa sertifika di kuma tarbaju di si Pape na kontinua fasidu? (Efésius 4:​8, 11)

¹³ Oca Jesus staba na Tera, i fasi di manera kompletu tarbaju ku si Pape dal pa i fasi. (Jon 17:4) Ma Jesus ka pensaba di kuma, ningin ka pudi fasi ke ku Jeova misti pa i fasi. Duranti tris anu i meiu di pregason, i trena utrus pa e fasi es tarbaju. Jesus konfia na si disipulus. I da elis responsabilidadi di prega ku nsina bon noba, i kuida di povu di Jeova ku tene balur. Alguns disipulus ku toma diantera nes tarbaju, teneba menus di 30 anu di idadi. (Lei Efésius 4:​8, 11.) Kuma ku Jesus usa si ultimus 40 dia pa juda es omis dedikadu, fiel i ku ta tarbaja duru, pa e sedu “dons pa omis”? — Jubi nota di studu na Efésius 4:8.

14. Kuma ku Jesus juda si disipulus kirsi na sintidu spiritual na si ultimus 40 dia na Tera? (Jubi tambi diseñu.)

¹⁴ Jesus da si disipulus konsiju diretu, ma tambi ku amor. Pur isemplu, i nota di kuma alguns delis ta lestu ku duvida, pa kila, i konsija elis. (Luk 24:​25-27; Jon 20:27) I fala elis tambi pa e konsentra mas na kuida di povu di Jeova di ki buska diñeru. (Jon 21:15) I lembranta elis pa e ka kompara ke ke na fasi na se sirvisu pa Jeova ku ke ku utrus na fasi. (Jon 21:​20-22) I kuriẑi alguns ideias eradu ke tene aserka di Renu, i juda elis tambi konsentra na prega bon noba. (At 1:​6-8) Ke ku ansions pudi aprindi di Jesus?

15-16. (a) Di kal maneras ku ansions pudi kopia Jesus? Bu pudi splika. (b) Kuma ku Patrick benefisia di konsiju ki dadu?

¹⁵ Kuma ku ansions pudi kopia Jesus? E dibi di trena i juda omis, nkluindu kilis ku sedu joven, pa responsabilidadis ke na bin tene.c Ansions ka dibi di spera di kuma kilis ke na trena na sedu perfeitu. E dibi di da elis konsiju ku amor, asin es ermons jovens na tene spiriensia i oja importansia di sedu umildi, fiel i prontu pa sirbi utrus. — 1 Tim 3:1; 2 Tim 2:2; 1 Ped 5:5.

¹⁶ Jubi kuma ku un ermon comadu Patrick benefisia di konsiju. Ocal mas joven i teneba tendensia di papia risu i ka ta mostra bondadi, te mesmu pa irmas. Un ansion maduru nota di kuma Patrick teneba es tendensia, i dal konsiju ku amor, ma di manera diretu. Patrick fala sin: “N kontenti ku ke ki fasi, N ta staba disanimadu ora ku N oja ermons na risibi disignasons ku N mistiba risibi. Ma konsiju ku ansion dan, judan oja di kuma N pirsisa di konsentra na sedu umildi na sirbi no ermons ku irmas, en ves di konsentra na buska pusison o privileẑiu na kongregason.” Pa kila, Patrick bin disignadu suma ansion antis di 30 anu. — Dit 27:9.

17. Kuma ku Jesus mostra di kuma i konfia na si disipulus?

¹⁷ Jesus da si disipulus responsabilidadi i ka so di prega, ma tambi di nsina. (Jubi “ensinando-as” na nota di studu di Mateus 28:20.) Disipulus sintiba di kuma e ka na konsigi fasi es tarbaju. Ma Jesus ka teneba duvida di kuma e ka na konsigi fasi es tarbaju. Pa kila, i fala elis pa e fasil. Jesus mostra di kuma i konfia ciu nelis oca ki fala elis asin: “Suma ku ña Pape mandan, asin tambi N na manda bos.” — Jon 20:21.

18. Kuma ku ansions pudi kopia Jesus?

¹⁸ Kuma ku ansions pudi kopia Jesus? Ansions ku tene spiriensia ta da utrus sertus responsabilidadi. (Fil 2:​19-22) Pur isemplu, ansions pudi pui jovens partisipa na limpesa ku manutenson di Salon di Renu. Ansions pudi da ermons un tarbaju pa fasi, trena elis pa e sibi kuma ke pudi fasil i konfia di kuma e na fasil diritu. Un nobu ansion comadu Matthew fala di kuma i kontenti manera ku ansions ku tene spiriensia trenal pa fasi un tarbaju i e konfia di kuma i na fasil tok i kabal. I fala sin: “Oca ku N fasi erus, e judan oja di kuma ku N pudi aprindi ku es erus i minjoria utru bias.”d

19. Ke ku no dibi di sta disididu pa fasi?

¹⁹ Jesus usa si ultimus 40 dia na Tera pa nkoraẑa, nsina i trena utrus. No sta disididu pa kopia isemplu di Jesus mas di pertu. (1 Ped 2:21) Jesus na judanu fasi kila. I fasinu es purmesa: “Ami N na sta ku bos tudu dia te na kabantada di tempu.” — Mat 28:20.