Kuma ku no pudi oja bon konsiju?

1. Kuma ku no pudi toma bon disisons ku na da bon rusultadu? (Ditus 13:10; 15:22)

ANOS tudu no misti toma bon disisons. Tambi no misti pa kusas ku no plania sai ben. Palabra di Deus falanu di kuma, si no misti pa kila sedu, no pirsisa di buska konsiju. — Lei Ditus 13:10; 15:22.

2. Ke ku Jeova purmiti fasi pa nos?

² Na bardadi, no Pape Jeova, i minjor Algin ku pudi danu jiresa ku konsiju. I purmiti di kuma i na judanu. I fala sin: “N na giau ku ña uju.” (Sal 32:8) Es palabras ta mostra di kuma Jeova ka ta danu so konsiju, ma tambi i ta mostra interesi na kada un di nos, i ta judanu aplika si konsiju.

3. Ke ku no na fala del nes studu?

³ Nes studu, no na usa Palabra di Deus pa judanu ruspundi kuatru purguntas: (1) Si N misti benefisia di konsiju, kal maneras di sedu ku N dibi di tene? (2) Kin ku pudi dan bon konsiju? (3) Kuma ku N pudi mostra di kuma, na bardadi N misti risibi konsiju? i (4) Pabia ku N dibi di ivita pidi utrus pa e toma disisons na ña lugar?

KAL MANERAS DI SEDU KU N DIBI DI TENE?

4. Si no misti benefisia di bon konsiju, kal maneras di sedu ku no dibi di tene?

⁴ Pa pudi benefisia di bon konsiju, no dibi di sedu umildi i rikuñisi no limiti. No dibi di rikuñisi di kuma, no pirsisa di ajuda di utrus pa toma bon disison, si no sta na un situason ku no ka ciga inda di pasa. Tambi no dibi di rikuñisi di kuma, no ka sibi tudu kusa. Si no ka sedu umildi i no ka rikuñisi no limiti, Jeova ka na judanu. I ora ku no lei si Palabra, no ka na oja nesesidadi di aplika konsiju ki danu. (Mik 6:8; 1 Ped 5:5) Ma, si no sedu umildi i rikuñisi no limiti, no na sta dispostu pa sukuta i aplika konsiju di Biblia.

5. Kal kusas ku rei Davi fasi ku pudiba lebal na sedu orgulyosu?

⁵ No jubi ke ku no pudi aprindi di isemplu di rei Davi. Kusas ki fasi pudiba lebal na sedu orgulyosu. Manga di anus antis di sedu rei, i kunsiduba suma algin ku tene abilidadi na musika. Te mesmu i kujidu pa ba ta toka musika pa rei. (1 Sam 16:​18, 19) Jeova kuji Davi pa i sedu prosimu rei, tambi i usa si spiritu santu pa dal puder. (1 Sam 16:​11-13) Povu ngabal pa manera ki mata se inimigus, nkluindu jiganti filisteu, comadu Golias. (1 Sam 17:​37, 50; 18:7) Si Davi seduba orgulyosu, i pudiba pensa di kuma suma i konsigi fasi tudu es kusas, i ka pirsisaba di sukuta konsiju di utrus. Ma Davi seduba umildi.

6. Kuma ku no sibi di kuma Davi risibiba diritu konsiju ki dadu? (Jubi tambi diseñu.)

⁶ Dipus di sedu rei, Davi kuji amigus ku pudiba dal konsiju. (1 Kron 27:​32-34) No ka dibi di fika dimiradu kes, pabia Davi sempri ta sukutaba bon konsiju. I ka seta so konsiju di omis, ma tambi i seta konsiju di un minjer comadu Abigail. I kasaba ku Nabal, ku seduba orgulyosu, ingratu i ku ka rispitaba utrus. Ku umildadi, Davi sukuta bon konsiju ku Abigail dal, i kila pul pa i ivita fasi un eru garandi. — 1 Sam 25:​2, 3, 21-25, 32-34.

7. Kal lisons ku no pudi aprindi di isemplu di Davi? (Eklesiastis 4:13) (Jubi tambi fotos.)

⁷ No pudi aprindi alguns lisons di isemplu di Davi. Pur isemplu, no pudi sibi fasi un kusa diritu, o talves no tene algun otridadi riba di utrus. Ma, no ka dibi di pensa di kuma no sibi tudu kusa i no ka pirsisa di konsiju di utrus. Tambi suma Davi, no dibi di sta dispostu pa sukuta bon konsiju, i ka mporta kin ku danu el. (Lei Eklesiastis 4:13.) Si no fasil, talves no na ivita fasi erus garandi ku pudi tisi purblemas pa nos i pa utrus.

KIN KU PUDI DAN BON KONSIJU?

8. Pabia ku Jonatan pudiba da Davi bon konsiju?

⁸ No jubi utru lison ku no pudi aprindi di isemplu di Davi. I sukutaba konsiju di kilis ku tene amisadi intimu ku Jeova, tambi ku pudiba ntindi diritu situason ki staba na pasa. Pur isemplu, oca ki i mistiba sibi si pudi torna tene mas amisadi ku rei Saul, Davi obi konsiju di Jonatan, fiju di Saul. Pabia ku Jonatan pudiba dal bon konsiju? Pabia Jonatan teneba amisadi intimu ku Jeova tambi i kunsi Saul diritu. (1 Sam 20:​9-13) Kuma ku no pudi aplika es lison?

9. Ora ku no pirsisa di konsiju kin ku no dibi di pidi? Bu pudi splika. (Ditus 13:20)

⁹ Ora ku no pirsisa di konsiju, i na sedu bon pidi konsiju na mon di un algin ku tene amisadi intimu ku Jeova, tambi i sibi di asuntu ku no na pirsisa di ajuda.a (Lei Ditus 13:20.) Pur isemplu, imaẑina di kuma un ermon joven sta na buska un bon algin pa sedu si parseru. Kin ku pudi dal un bon konsiju? Un amigu ku ka kasa pudi dal bon konsiju, si basia na prinsipius di Biblia. Ma es ermon joven pudi risibi konsiju mas pratiku si i punta un kasal maduru na sintidu spiritual ku kunsil diritu, ku fasija alguns anus ke kasa. E pudi kontal i ka so kuma di aplika konsijus di Biblia, ma tambi ke ke aprindi na se kasamenti.

10. Ke ku no na bin fala del gosi?

¹⁰ No fala ja di dus manera di sedu ku no dibi di tene pa risibi konsiju, i kin ku pudi danu bon konsiju. Gosi no oja pabia ku no dibi di mostra di kuma, na bardadi no misti risibi konsiju, i si kontra no dibi di pidi utrus pa e toma disisons na no lugar.

KUMA KU N PUDI MOSTRA DI KUMA NA BARDADI N MISTI RISIBI KONSIJU?

11-12. (a) Ke ku no dibi di ivita fasi? (b) Ke ku rei Reoboan fasi oca ki tene un disison importanti pa toma?

¹¹ Utrora, un algin pudi finji di kuma i na buska konsiju, ma na bardadi i misti so pa utrus konfirmal disison ki tomaba ja. Si un algin fasi es, i na mostra di kuma na bardadi i ka misti risibi konsiju. I dibi di aprindi di ke ku kontisi ku rei Reoboan.

¹² Reoboan torna rei oca ku si pape Salomon muri. Oca ku Reoboan kumsa ku manda, jintis teneba manga di bon kusas, ma e sintiba di kuma Salomon pui elis tarbaju duru. Povu bai pa Reoboan i e pidil pa i rapati elis tarbaju. Reoboan pidi elis pa e dal tempu pa i pensa na disison ki na toma. I kumsa diritu, i pidi konsiju na mon di omis garandi ku judaba Salomon. (1 Re 12:​2-7) Ma, i nega konsiju ku omis garandi dal. Pabia ki fasi kila? Sera ki Reoboan disidiba ja ke ki i na fasi, i staba so na buska kin ku na konkorda ku el? Si kontra i kila ki na buskaba, i ojal na mon di si amigu jovens. (1 Re 12:​8-14) Reoboan ruspundi povu di akordu ku konsiju ku jovens dal. Pabia di kila, manga di jintis rebela i e kuji un nobu rei. Dipus di kila, Reoboan kumsa ku tene sempri purblema. — 1 Re 12:​16-19.

13. Kuma ku no pudi sibi si na bardadi no misti risibi konsiju?

¹³ Ke ku no pudi aprindi di isemplu di Reoboan? Ora ku no pidi konsiju no dibi di mostra di kuma no misti risibil. Kuma ku no pudi sibi si na bardadi no misti risibi konsiju? No pudi punta no kabesa: ‘Sera ki N ta pidi konsiju i dipus N ta negal, so pabia di kuma i ka ke ku N misti obi?’

14. Ora ku no risibi konsiju, ke ku no dibi di lembra del? Bu pudi da un isemplu. (Jubi tambi diseñu.)

¹⁴ Pur isemplu, imaẑina kuma un ermon risibi proposta di un bon tarbaju. Ma antis di setal i pidi konsiju na mon di un ansion. Ermon konta ansion di kuma, es tarbaju na lebal manga di bias, pa i sta lunju di si familia pa alguns semanas. Ansion lembrantal di prinsipiu di Biblia ku mostra di kuma, si responsabilidadi prinsipal i kuida di nesesidadi spiritual di si familia. (Ef 6:4; 1 Tim 5:8) Ermon ka konkorda ku ke ku ansion falal, i kontinua buska konsiju di utrus ermon na kongregason, tok i oja kin ku falal i pudi seta ki tarbaju. Sera ki na bardadi es ermon, staba na buska konsiju o i disidiba ja ke ki i na fasi, i gosi i sta so na buska kin ku na konkorda ku el? No dibi di lembra di kuma no korson ta ngana. (Jer 17:9) Utrora, no pudi risibi konsiju ku no ka misti, ma i ki konsiju propi ku no pirsisa del.

SERA KI N DIBI DI PIDI UTRUS PA E TOMA DISISONS NA ÑA LUGAR?

15. Ke ku no dibi di toma kuidadu pa ka fasi, i pabia di ke?

¹⁵ Kada un di nos tene responsabilidadi di toma si propi disison. (Gal 6:​4, 5) Suma ku no aprindi, antis di toma un disison i importanti buska konsiju na Palabra di Deus i na mon di kristons maduru. Ma no dibi di toma kuidadu pa ka pidi utrus, pa e toma disisons na no lugar. Alguns pudi fasil di manera diretu, e pudi punta algin ke rispita: “Si bu staba na ña lugar ke ku bu na fasiba?” Utrus pudi fasil di manera finu, atraves di kopia ke ku un algin fasi, sin elis propi e pensa fundu na ki asuntu.

16. Kal disison ku ermons na kongregason di Korintu dibi di toma aserka di karni ku sakrifikadu pa idulus? (1 Koríntius 8:7; 10:​25, 26)

¹⁶ Nota un situason ku kontisi na purmeru sekulu na kongregason di Korintu, aserka di karni ku talves sakrifikadu pa idulus. Paulu skirbi asin pa es kristons: “No sibi kuma idulu i ka nada na mundu di bardadi, suma ku bo fala. I ka ten utru deus fora di un son.” (1 Kor 8:4) Pabia des, alguns na kongregason disidi di kuma e pudi kume karni ku sakrifikadu pa un idulu i ku mas tardi lebadu fera pa bai bindi. Utrus disidi di kuma e ka na pudi kume ki karni pabia di se konsiensia. (Lei 1 Koríntius 8:7; 10:​25, 26.) Es i un disison pesual. Paulu nunka konsija ermons di Korintu pa e toma disisons pa utrus o pa e kopia ke ku utrus fasi. Kada un delis ‘na da konta di si kabesa dianti di Deus.’ — Rom 14:​10-12.

17. Ke ku pudi kontisi si no ta kopia so ke ku utrus ta fasi? Bu pudi da un isemplu. (Jubi tambi fotos.)

¹⁷ Kuma ku un situason suma es pudi kontisi aos? Jubi asuntu di partis mas pikininu di sangi. Kada kriston dibi di toma si propi disison basiadu na si konsiensia trenadu pa Biblia, si kontra i na seta o nega es partis mas pikininu di sangi.b No pudi oja di kuma i difisil ntindi es asuntu diritu, ma es disison fasi parti di kargu ku kada un di nos ten ku karga, pabia no sedu responsavel pa no propi amisadi ku Jeova. (Rom 14:4) Si no kopia so ke ku utru disidi fasi, no pudi nfraksi no konsiensia. No pudi trena i minjoria no konsiensia so si no usal. (Eb 5:14) Gosi gora, na kal mumentu ku no pudi pidi un kriston maduru konsiju? No pudi fasil ora ku no kaba fasi no propi piskisa, ma no pirsisa inda di ajuda pa ntindi prinsipius di Biblia ku sta ligadu ku no situason.

KONTINUA BUSKA KONSIJU

18. Ke ku Jeova danu?

¹⁸ Jeova mostra konfiansa garandi na nos manera ki disanu toma no propi disisons. I danu si Palabra, Biblia. I danu tambi amigus ku pudi judanu ntindi prinsipius di Biblia. I kumpri si responsabilidadi suma no Pape. (Dit 3:​21-23) Kuma ku no pudi mostra Jeova no gardisimentu pa ajuda ki ta danu?

19. Kuma ku no pudi kontinua pui pa Jeova kontenti?

¹⁹ Pensa nes isemplu: Papes ta kontenti oja se fijus kirsi i e sedu bon servus di Jeova ku ta juda utrus. Di mesmu manera, Jeova ta kontenti ora ki oja no kontinua sedu kristons maduru, no kontinua buska konsiju, i kontinua toma disisons ku na kontental.