Kuma ku bu pudi da utrus bon konsiju?

1. Kin ku pirsisa di da konsiju? Bu pudi splika.

SERA ki bu gosta di da utrus konsiju? Alguns ta oja di kuma i fasil da konsiju. Ma utrus ta medi o e ka ta sta avontadi pa da utrus konsiju. Di kualker manera, utrora anos tudu no obrigadu da utrus konsiju. Pabia di ke? Pabia Jesus fala di kuma no dibi di mostra amor pa n̈utru si no misti sedu si disipulus. (Jon 13:35) Un manera di mostra amor i ora ku no da no ermons ku irmas konsiju ora ki pirsis. Palabra di Deus mostra tambi di kuma bon konsiju ta torna no amisadi ku utrus forti. — Dit 27:9.

2. Ke ku ansions dibi di sibi fasi, i pabia di ke? (Jubi tambi kuadru “Konsiju na runion di semana.”)

² Ansions dibi di sibi da bon konsiju. Atraves di Jesus, Jeova da elis tarbaju di kuida di kongregason. (1 Ped 5:​2, 3) Un di maneras ke ta fasi kila i ora ke na da konsiju basiadu na Biblia na diskursus ke ta fasi pa kongregason. E ta danu konsiju di manera individual ora ku no pirsisa. E ta juda tambi kilis ku disa Jeova, pa e riba pa kongregason. Kuma ku ansions, i anos tudu no pudi da bon konsiju?

3. (a) Kuma ku no pudi aprindi sedu un bon konsijadur? (Isaias 9:6; jubi tambi kuadru “Kopia isemplu di Jesus ora ku bu na da konsiju.”) (b) Ke ku no na bin fala del nes studu?

³ No pudi aprindi sedu un bon konsijadur ora ku no na studa isemplu di bon konsijaduris ku Biblia fala del, spesialmenti di Jesus. Un di titulus ki dadu i ‘Maravilyosu Konsijadur’. (Lei Isaias 9:6.) Nes studu, no na fala di ke ku no pudi fasi ora ku un algin pidinu konsiju i ke ku no pudi fasi si no ten ku da konsiju ora ku algin ka pidinu. No na oja tambi importansia di da konsiju na mumentu sertu i di bon manera.

ORA KU UN ALGIN PIDINU KONSIJU

4-5. Ora ku un algin pidinu konsiju, kal purgunta ku no dibi di fasi no kabesa? Bu pudi da un isemplu.

⁴ Ora ku un algin pidinu konsiju, ke ku no dibi di fasi? No pudi sinti di kuma no sedu importanti i misti juda logu. Ma no dibi di purgunta no kabesa: ‘Sera ki N tene kuñisimentu ku spiriensia pa da es konsiju?’ Utrora minjor manera di juda un algin i pa ka dal konsiju, en ves di kila, oriental pa utru algin ku kualifika pa da konsiju aserka di ki asuntu.

⁵ Pensa nes isemplu. Imaẑina di kuma bu amigu tene un purblema di saudi gravi. I falau di kuma i kumsa buska diferentis opson di tratamentu ku ten. Dipus i puntau kal un di ki opsons ku bu pensa di kuma i minjor. I bardadi di kuma bu pudi pirfiri un di ki tratamentus, ma abo i ka mediku ku risibi formason pa kura ki tipu di duensa. Nes kasu, minjor manera di juda bu amigu, i judal oja un algin ku tene kualifikason pa judal.

6. Ke ki bon fasi antis di da konsiju?

⁶ Mesmu si no pensa di kuma no sta kualifikadu pa da konsiju aserka di un asuntu, no pudi disidi pera un bokadu antis di ruspundi algin ku pidinu konsiju. Pabia di ke? Ditus 15:28 fala di kuma “justu ta pensa na kil ki dibi di ruspundi”. Ma ke gora si kontra no pensa di kuma no sibi resposta? Mesmu asin no pirsisa di tempu pa fasi piskisa, pa ora i pensa fundu. Asin no na tene mas sertesa di kuma no resposta sta di akordu ku manera ku Jeova ta oja ki asuntu. Jubi isemplu di profeta Natan.

7. Ke ku bu aprindi di isemplu di profeta Natan?

⁷ Rei Davi fala profeta Natan di kuma i misti kumpu templu pa Jeova. Natan konsijal logu pa i fasi kila. Ma antis di ruspundil, Natan dibi di puntaba inda Jeova. Pabia di ke? Pabia Jeova ka misti pa Davi kumpu templu. (1 Kron 17:​1-4) Es isemplu ta mostra di kuma ora ku algin pidinu konsiju, i bon pa no “tarda pa papia”. — Tiagu 1:19.

8. Kal ki utru motivu ku pui no dibi di toma kuidadu ora ku no na da konsiju?

⁸ Jubi utru motivu ku pui no dibi di toma kuidadu ora ku no na da un algin konsiju: No pudi tene un parti di kulpa si no konsiju leba un algin na toma un disison ku da mau rusultadu. Na bardadi no tene bon motivu di pensa diritu antis di da konsiju.

KUMA KU NO PUDI DA KONSIJU ORA KU ALGIN KA PIDINU

9. Antis di da konsiju, ke ku ansions dibi di sertifika del? (Gálatas 6:1)

⁹ Utrora ansions pirsisa di toma inisiativa pa da konsiju pa un ermon o irma ku “kai di repenti na un kulpa”. (Lei Gálatas 6:1.) Nota di studu pa es versikulu fala sin aserka des tipu di algin, “i sta na bai na mau kamiñu, mesmu si ka fasi inda un pekadu gravi.” Objetivu di ansions i juda ki algin kontinua yanda na kamiñu ku ta leba pa vida ku ka ta kaba. (Tiagu 5:​19, 20) Pa se konsiju da bon rusultadu, ansions dibi di sertifika di kuma na bardadi ki algin sta na bai na mau kamiñu. Jeova da kada un di nos liberdadi di toma disisons basiadu na si propi konsiensia. (Rom 14:​1-4) Ke gora si na bardadi un ermon sta na bai na mau kamiñu i ansions disidi dal konsiju?

10-12. Ke ku ansions dibi di fasi ora ke da un algin konsiju sin i ka pidi elis? Bu pudi da un isemplu. (Jubi tambi diseñus ku fotos.)

¹⁰ I ka fasil pa ansions da un algin konsiju sin i pidi elis. Pabia di ke? Apostolu Paulu mostra di kuma algin pudi ka nota kuma i sta na bai na mau kamiñu. Pa kila, antis di ansions da ki algin konsiju i ten alguns kusas ke dibi di fasi, pa i sedu mas fasil pa i seta konsiju.

¹¹ Da konsiju ku ka pididu i suma tenta sumia planta na un kau risu. Antis di labradur kumsa sumia i ta labra inda con. Es ta pui pa con moli, asin i ta sta pruntu pa risibi simentera. Dipus i ta pui simentera. Pa fin, i ta regual pa simentera pudi kirsi. Di mesmu manera, i ten alguns kusas ku un ansion dibi di fasi pa i sedu mas fasil pa un ermon seta konsiju. Pur isemplu, ansion pudi kuji un bon mumentu pa papia ku ermon i falal di kuma i ta preokupa ku el, tambi i ten algun kusa ki misti papia ku el. Si kin ku na da konsiju kunsidu suma un algin ku ta mostra amor ku bondadi, i na sedu mas fasil pa utrus seta si konsiju.

¹² Duranti kombersa ansion pudi kontinua molisi con atraves di rikuñisi di kuma anos tudu no ta yara i utrora no ta pirsisa di konsiju. (Rom 3:23) Ku un vos kalmu i ku rispitu, ansion na usa Biblia pa mostral klaru di kuma i sta na bai na mau kamiñu. Ora ku ermon rikuñisi di kuma i yara, ansion ta “sumia simentera” ora ki splikal di manera simplis ke ki pirsisa di fasi pa tenta kuriẑi si situason. Pa fin, ansion ta “regua” ora ki ngabal di manera sinseru i ora ku el. — Tiagu 5:15.

13. Kuma ku ansions pudi sertifika di kuma algin ntindi konsiju ki dadu?

¹³ Utrora un algin pudi ka ntindi diritu konsiju ki dadu. Ke ku ansions pudi fasi pa ka es kontisi? Ku rispitu, e pudi fasi ermon purguntas pa sibi si ntindi pontus prinsipal. (Ekl 12:11) Respostas na juda ansion ku da konsiju sibi si kontra ermon ntindi diritu konsiju ki dadu.

DA KONSIJU NA BON MUMENTU I DI BON MANERA

14. Sera ki no dibi di da konsiju ora ku no sta ku raiba? Bu pudi splika.

¹⁴ Anos tudu no ta yara, pa kila no pudi fasi o fala un kusa ku na pui utrus fika mal. (Kol 3:13) Biblia mostra di kuma utrora un algin pudi fasi o fala un kusa ku na punu paña raiba. (Ef 4:26) Ma no ka dibi di da konsiju ora ku no paña raiba. Pabia di ke? Pabia “raiba di omi ka ta juda pa kusa sta diritu suma ku Deus misti.” (Tiagu 1:20) Si no da konsiju ora ku no sta ku raiba, no pudi pui pa situason piora en ves di minjoria. Es ka signifika di kuma nunka no ka dibi di konta algin ku punu paña raiba kal ki no sentimentus. Ma no dibi di pera te ora ku no sta mas kalmu pa kumsa papia ku ki algin. Jubi bon isemplu di Eliu, konsijadur fiel di Jo.

15. Ke ku no pudi aprindi di isemplu di Eliu? (Jubi tambi diseñu.)

¹⁵ Pa manga di dias Jo tenta ruspundi akusason di si falsu konsoladuris. Eliu sukutal diritu. Eliu sintiba pena di Jo. Ma oca ku Jo na tenta prova di kuma el i inosenti, i fala kusas aserka di Jeova ki ka bardadi. Es pui pa Eliu paña raiba. Mesmu asin, Eliu pera si ves di papia, dipus di manera kalmu i ku rispitu i konsija Jo. (Jo 32:2; 33:​1-7) Isemplu di Eliu ta nsinanu un lison importanti: Konsiju ta sai mas diritu ora ki dadu na mumentu sertu i di bon manera, tambi ku amor i ku rispitu. — Ekl 3:​1, 7.

KONTINUA DA KONSIJU I SETA KONSIJU

16. Kal lison ku bu aprindi di Salmu 32:8?

¹⁶ Jeova fala sin aserka di kuma ki ta danu konsiju: “N na giau ku ña uju.” (Lei Salmu 32:8.) Es signifika di kuma i na kontinua judanu. I ka ta danu so konsiju ma tambi i ta judanu aplikal. No pudi tambi kopia isemplu di Jeova! Ora ku no tene oportunidadi di konsija utrus, no pudi kontinua nkoraẑa elis i juda elis toma bon disisons.

17. Ora ku ansions danu konsiju basiadu na Biblia, ke ke ta mostra di kuma e sedu? Bu pudi splika. (Isaias 32:​1, 2)

¹⁷ Tempu ku no sta na vivi, i tempu ku no mas pirsisa di da i risibi bon konsiju. (2 Tim 3:1) Ansions ku ta da konsijus basiadu na Biblia e sedu “suma riusiñus di yagu na kau seku”. (Lei Isaias 32:​1, 2.) Amigus ku sibi ke ku no misti obi, ma ku ta kontanu ke ku no pirsisa di obi, ta danu un prenda di balur ku sedu suma “fruta di uru na bandeẑa di prata.” (Dit 25:11) Pa anos tudu, no kontinua sforsa pa tene jiresa ki pirsis pa da i risibi bon konsiju.