Mostra rispitu pa utrus

1. Pabia ku no ta kontenti ora ku utrus mostra rispitu pa nos? (Ditus 22:1)

KUMA ku bu ta sinti ora ku utrus mostra rispitu pa bo? Sin duvida, bu ta kontenti! Tudu pekadur gosta di rispitu. No ta kontenti ora ku utrus rispitanu. E ku manda Biblia fala “sedu rispitadu i minjor di ki prata ku uru”! — Lei Ditus 22:1.

2-3. Pabia ku utrora i ta difisil mostra rispitu pa utrus, i ke ku no na bin aprindi nes studu?

² Utrora i ta difisil mostra rispitu pa utrus pabia di kuma, no ta oja se falias. Utru kusa tambi i di kuma, aos manga di jintis ka ta mostra rispitu pa utrus. Mesmu asin, anos no dibi di sedu diferenti. Pabia di ke? Pabia Jeova misti pa no mostra rispitu pa “tudu jinti”. — 1 Ped 2:17.

³ Nes studu no na oja ke ku signifika mostra rispitu pa utrus i kuma ku no pudi mostral pa (1) membrus di no familia, (2) pa no ermons ku irmas, tambi pa (3) kilis ku ka fasi parti di kongregason. Ma no na mas konsentra na kuma ku no pudi mostra rispitu na situasons difisil.

KE KU SIGNIFIKA MOSTRA RISPITU PA UTRUS?

4. Ke ku signifika mostra rispitu pa utrus?

⁴ Pa bo, ke ki rispitu? Na alguns lingua, palabras “rispitu” ku “onra” tene ligason. Pabia ku no pudi fala kila? “Rispitu” ta rifiri kuma ku no ta oja un algin. Ora ku no rispita un algin, no ta ojal suma kin ku mersi no atenson ku konsiderason, talves pabia di si maneras di sedu, kusas ki fasi o si pusison. “Onra” ta rifiri kuma ku no ta trata un algin. Ora ku no onra un algin, no ta tratal di manera ki na sinti di kuma i tene balur, no gosta del, tambi i rispitadu. Ma pa onra sedu di bardadi, i dibi di bin di korson. — Mat 15:8.

5. Ke ku pudi judanu mostra rispitu pa utrus?

⁵ Jeova misti pa no mostra rispitu pa utrus. Pur isemplu, i fala pa no mostra rispitu pa “otridadi”. (Rom 13:​1, 7) Ma talves alguns pudi fala: “Na rispita so kin ku mersi rispitu.” Sera ki es i bon manera di pensa? Suma servus di Jeova, no ta rispita jintis i ka so pabia di kusas ke ta fasi. Ma i pabia di amor ku no tene pa Jeova ku di diseẑu di kontental. — Jos 4:14; 1 Ped 3:15.

6. Sera ki i pusivel mostra rispitu pa un algin ku ka rispitau? Bu pudi splika. (Jubi tambi diseñu.)

⁶ Algin pudi punta: ‘Sera ki na bardadi i pusivel mostra rispitu pa un algin ku ka ta tratanu ku rispitu?’ Sin i pusivel. Jubi alguns isemplus. Rei Saul umilia si fiju Jonatan dianti di jinti. (1 Sam 20:​30-34) Mesmu asin, ku rispitu Jonatan apoia si pape Saul na gera te na fin. (Sai 20:12; 2 Sam 1:23) Ŝef di saserdoti Eli akusa Ana di kuma i cami. (1 Sam 1:​12-14) Ma, oca ki na ruspundil, Ana papia ku rispitu, mesmu manera ku tudu jinti na Israel sibiba di kuma, Eli ka kuriẑi si fijus pa mau kusas ke ta fasi, kusa ki dibi di fasiba suma pape i ŝef di saserdoti. (1 Sam 1:​15-18; 2:​22-24) Alguns omis di Atenas nsulta apostolu Paulu, e comal di “papiadur”. (At 17:18) Mesmu asin, Paulu papia ku elis ku rispitu. (At 17:22) Es isemplus ta mostra di kuma amor garandi ku no tene pa Jeova ku medu di fasi kusa ku ka na kontental, pudi lebanu na mostra rispitu pa utrus i ka so ora ki sedu fasil, ma tambi ora ki difisil. Gosi no bin fala di ba kin ku no dibi di rispita, i pabia ku no dibi di rispita elis.

MOSTRA RISPITU PA MEMBRUS DI NO FAMILIA

7. Ke ku manda i pudi sedu difisil trata membrus di no familia ku rispitu?

⁷ Ke ku manda i difisil. No ta pasa manga di tempu ku no familia. Pa kila, no kunsi se bon maneras di sedu, ku se imperfeisons. Talves alguns pudi sta na sufri di un duensa ku ta pui pa i difisil no kuida delis, o e pudi tene manga di preokupason. Te mesmu utrus pudi papia o fasi kusas ku na denu. No dibi di sinti ben ora ku no sta ku no familia. Ma ora ku membrus di familia ka sta na mostra rispitu pa n̈utru, e pudi kumsa ku paña raiba di n̈utru. Ora ki sedu asin, armonia ka na ten na familia. No pudi kompara familia ku kurpu di pekadur. Un duensa pudi tuji kurpu funsiona ben. Di mesmu manera, si membrus di familia ka rispita n̈utru e ka na pudi tarbaja juntu na pas. Suma ki ten tratamentu pa manga di duensas, asin tambi ku membrus di familia pudi aprindi mostra rispitu pa n̈utru.

8. Pabia ki importanti mostra rispitu pa membrus di no familia? (1 Timótiu 5:​4, 8)

⁸ Pabia ku no dibi di mostra rispitu? (Lei 1 Timótiu 5:​4, 8.) Na si purmeru karta pa Timótiu, Paulu splika kuma ku membrus di familia dibi di kuida di nesesidadis di n̈utru. I mostra di kuma, motivu prinsipal di onra no familia i ka so pa obrigason, ma i un “dever riliẑiosu.” Es signifika di kuma, no ta fasil pabia no ama Jeova i no ta ojal suma parti di no adorason pa rel. Jeova ku pui pa familia ten. (Ef 3:​14, 15) Nton, ora ku no mostra rispitu pa un membru di no familia, na bardadi no sta na mostra rispitu pa kin ku kumpu familia. (Jubi notas di studu na 1 Timótiu 5:4.) Es i un bon motivu di mostra rispitu pa membrus di no familia!

9. Kuma ku omi ku minjer pudi mostra rispitu pa n̈utru? (Jubi tambi fotos.)

⁹ Kuma ku no pudi mostra rispitu. Un omi ku rispita si minjer ta mostra si minjer di kuma i tene balur, i ta fasil ora ke sta elis son, tambi ora ke sta na metadi di jinti. (Dit 31:28; 1 Ped 3:7) I ka ta sutal, i ka ta nfatil o fasil sinti di kuma i ka bali nada. Ariela ku mora na Arẑentina, fala sin: “Pabia di si duensa, ña minjer ta dati i falan kusas ku ta den. Ora ku kila kontisi, N ta fala ña kabesa, i ka es ki i tene na si korson. Ora ku situason sta difisil, N ta lembra di 1 Koríntius 13:​5, kila ta judan papia ku rispitu en ves papia ku raiba.” (Dit 19:11) Un minjer ku rispita si omi ta papia ben del dianti di utrus. (Ef 5:33) I ta ivita palabras di dispresu, gozu, i comal di nomi; i sibi di kuma es tipu di komportamentu i suma feruẑen, i pudi dana kasamenti. (Dit 14:1) Un irma na Italia ku si omi tene manga di preokupasons fala sin: “Utru ora N ta sinti di kuma preokupasons di ña omi i ka normal, i dimas. Na pasadu ña palabras ku ña kara ta mostra kuma N ka rispital. Ma pasa tempu ku jintis ku ta papia ku rispitu ku utrus, judan mostra mas rispitu pa ña omi.”

10. Kuma ku Jovens pudi mostra di kuma e rispita se pape ku se mame?

¹⁰ Jovens bo obdisi regras ku bo papes ta pui na familia. (Ef 6:​1-3) Ora ku bu na papia ku bu papes, fasil ku rispitu. (Sai 21:17) Konformi se idadi na bai, mostra elis rispitu i da elis ajuda ke na pirsisa del. Fasi tudu ku bu pudi pa kuida delis. Jubi isemplu di María, ku si pape ka sedu Tustumuña di Jeova. Oca ku si pape duensi, i seduba difisil pa María kuida del, pabia kila ta papia mal ku el. María fala sin: “N ta ora Jeova, i ka so pa N tene rispitu pa ña pape, ma tambi pa N mostral na ason. N fala ña kabesa, si Jeova falan pa N rispita ña papes, i pabia di kuma i pudi dan forsa pa N fasil. Ku tempu, N ntindi di kuma N pirsisa di rispita ña pape, mesmu si ka muda.” Ora ku no mostra rispitu pa membrus di no familia apesar di se falias, no ta mostra di kuma no rispita Jeova ku pui pa familia ten.

MOSTRA RISPITU PA BU ERMONS KU IRMAS NA KONGREGASON

11. Ke ku manda i pudi sedu difisil trata no ermons ku irmas ku rispitu?

¹¹ Ke ku manda i difisil. No ermons ku irmas ta fasi sforsu di vivi di akordu ku ke ku Biblia fala; ma utrora e pudi tratanu mal, e pudi julganu o iritanu. Si un ermon fasinu algun kusa i no “ten keŝa kontra” el, i pudi sedu difisil tratal ku rispitu. (Kolosensis 3:13) Ke ku pudi judanu lida ku es situason?

12. Pabia ki importanti mostra rispitu pa no ermons ku irmas? (2 Pedru 2:​10-11)

¹² Pabia ku no dibi di mostra rispitu? (Lei 2 Pedru 2:​10-11.)b Na si sugundu karta nspiradu, Pedru fala kuma alguns na kongregason na ki tempu, sta na papia mal “di gloriosus” ku sedu, ansions. Kuma ku anjus fiel reaẑi kontra e oja ke ku kontisi? “Pabia di rispitu ke tene pa Jeova,” e ka fala nin un palabra mau kontra ki jintis. Es i interesanti! Anjus perfeitu nega papia duru kontra ki omis orgulyosu. Ma e disa pa Jeova julga i raprendi ki omis. (Rom 14:​10-12; komparal ku Judas 9.) No pudi aprindi di isemplu di anjus. Anjus ka trata kilis ku sta kontra nos ku falta di rispitu. Pa kila, no tene inda mas motivu di ivita mostra falta di rispitu pa no ermons ku irmas ku ama Jeova. No dibi di fasi no minjor pa rispita elis. (Rom 12:10) Si no fasi kila no na mostra di kuma no rispita Jeova.

13-14. Kuma ku no pudi mostra rispitu pa ermons na kongregason? Bu pudi da isemplus. (Jubi tambi fotos.)

¹³ Kuma ku no pudi mostra rispitu. Ora ku ansions na nsina utrus, e ta fasil sempri ku amor. (Filem 8, 9) Si bu dibi di konsija un algin, fasil ku bondadi, ka bu fasil ora ku bu sta ku raiba. Irmas, bo pudi juda pa i ten rispitu na kongregason, ora ku bo ivita sinta na nomi di algin o spalia mintida. (Titu 2:​3-5) Anos tudu no pudi mostra rispitu pa ansions ora ku no na kopera ku elis, i mostra no gardisimentu pa tarbaju duru ke ta fasi pa diriẑi runions, pregason, i juda kilis ku “kai di repenti na un kulpa”. — Gal 6:1; 1 Tim 5:17.

¹⁴ Un irma comadu Rocío ojaba di kuma i difisil rispita un ansion ku dalba konsiju. I fala sin: “N pañaba raiba, pabia N pensa kuma i papia duru ku mi. N papia mal del na kasa. Apesar di kuma N ka mostral el, dentru di mi N staba ku duvida si kontra na bardadi i misti judan, i N ka seta si konsiju.” Ke ku juda Rocío? I fala sin: “Oca ku N lei testu di 1 Tesalonisensis 5:​12, 13, na ña leitura di Biblia, N nota di kuma N ka staba na mostra rispitu pa es ermon, i ña konsiensia kumsa ku nkomodan. N ora i N fasi piskisa na no publikasons pa oja informasons ku pudi judan muda ña manera di pensa. Es judan oja di kuma, purblema ka staba na ki ansion, ma i staba na mi, ami ku teneba purblema di orgulyu. Gosi ntindi di kuma, si N ka sedu umildi i na sedu difisil pa N rispita utrus. Te gosi N pirsisa inda di minjoria, ma nkuantu na sforsa pa mostra rispitu, N ta sinti di kuma Jeova ta kontenti ku ña sforsu.”

MOSTRA RISPITU PA KILIS KU KA FASI PARTI DI KONGREGASON

15. Pabia ki difisil rispita kilis ku ka fasi parti di kongregason?

¹⁵ Ke ku manda i difisil. Manga di bias na pregason, no ta kontra ku jintis ku ka sta interesadu na Deus o na Biblia. (Ef 4:18) Alguns ta nega obi no mensaẑen pabia di ke ke fia nel oca elis mininu. No kolegas di tarbaju o di skola pudi sedu duru ku nos, o no pudi tene un patron o pursor ku ka gosta di no tarbaju. Ku tempu, no pudi pirdi rispitu pa es tipu di jintis i para trata elis di bon manera.

16. Pabia ki importanti mostra rispitu pa kilis ku ka sta inda na sirbi Jeova? (1 Pedru 2:12; 3:15)

¹⁶ Pabia ku no dibi di mostra rispitu? Lembra di kuma Jeova ta presta atenson na kuma ku no ta trata kilis ku ka sta inda na sirbil. Apostolu Pedru lembranta kristons di kuma se bon manera di yanda, pudi pui utrus “ngaba Deus”. Pabia des ku pui i konsija elis di kuma, ora ke na difindi se fe, pa e “fasil ku mansesa ku rispitu”. (Lei 1 Pedru 2:12; 3:15.) Ora ku kristons na difindi se fe dianti di un juis o di kualker algin, e dibi di fasil sempri ku rispitu. Na bardadi, Jeova sta na oja i obi ke ku no na fala i kuma ku no na falal. Es i un bon motivu di trata kilis ku ka fasi parti di kongregason ku rispitu!

17. Kuma ku no pudi mostra rispitu pa kilis ku ka fasi parti di kongregason?

¹⁷ Kuma ku no pudi mostra rispitu. Ora ku no na prega, nunka no ka dibi di fasi pa jintis sinti di kuma no mas elis jiru, pabia no kunsi Biblia. Ma pa kontrariu, no misti oja elis suma jintis ku tene balur pa Deus, tambi e mas nos. (Aẑeu 2:7; Fil 2:3) Pa kila, si un algin kobau pabia di kusas ku bu fia nel, ka bu sinti tentadu pa tornal. Pur isemplu, no ka misti fala kusas ku na mostra di kuma anos no jiru i elis e tulu. (1 Ped 2:23) Si bu fala un kusa ku bu ka dibi di fala, pidi diskulpa logu. Kuma ku bu pudi mostra rispitu pa kilis ku bu ta tarbaja kel? Sedu algin ku ta pega tesu na tarbaju, i oja bon kusas na bu kolegas di tarbaju, tambi na kilis ku bu ta tarbaja parel. (Titu 2:​9, 10) Ora ku bu sedu un algin onestu i tarbajadur, bu pudi ka kontenta tudu jinti, ma ku sertesa bu na kontenta Deus. — Kol 3:​22, 23.

18. Pabia ki bon tene i mostra rispitu pa utrus?

¹⁸ No tene manga di bon motivus di buska tene i mostra rispitu pa utrus! No oja di kuma ora ku no mostra rispitu pa no familia, no ta sta na mostra rispitu pa Jeova, ku sedu Ŝef di no familia. Di mesmu manera, ora ku no mostra rispitu pa no ermons ku irmas, no ta sta na mostra rispitu pa no Pape ku sta na seu. Ora ku no mostra rispitu pa kilis ku ka fasi parti di kongregason, no ta kria oportunidadi pa e ngaba i mostra rispitu pa no Deus. Mesmu si utrus ka mostra rispitu pa nos, i bon pa no mostra elis sempri rispitu. Pabia? Pabia Jeova na bensuanu. I fasi es purmesa: “Kilis ku rispitan, N na rispita elis”. — 1 Sam 2:30.