Kuma ku bu pudi tene sertesa di kuma Jeova ta kontenti ku bo

1. Kal duvida ku alguns servus di Jeova ta tene?

I NKORAẐANTI sibi di kuma, Jeova ta kontenti ku si povu suma grupu! Biblia fala sin: Jeova “ta kontenti ku si pobu”. (Sal 149:4) Ma utrora, alguns ta fika disanimadu i e ta punta se kabesa: ‘Sera ki Jeova ta kontenti ku mi?’ Manga di servus fiel di Jeova ku Biblia fala del sintiba disanimadu, pabia e ta pensaba di kuma Jeova ka ta kontenti ku elis. — 1 Sam 1:​6-10; Jo 29:​2, 4; Sal 51:11.

2. Ba kin ku Jeova ta kontenti ku el?

² Biblia mostra di manera klaru di kuma, jintis imperfeitu pudi kontenta Jeova. Di kal manera? No dibi di mostra fe na Jesus Kristu i batisa. (Jon 3:16) Des manera, no ta mostra utrus di kuma, no ripindi di no pekadus i no purmiti Deus di kuma no na fasi si vontadi. (At 2:38; 3:19) Jeova ta kontenti dimas ku nos, ora ku no fasi es kusas pa pudi tene amisadi forti ku el. Si no kontinua fasi no minjor pa kumpri no purmesa di sirbil, Jeova ta kontenti ku nos, tambi i ta ojanu suma si amigus intimu. — Sal 25:14.

3. Ke ku no na bin fala del?

³ Ma, pabia ku utrora, alguns ta pensa di kuma Deus ka ta kontenti ku elis? Kuma ku Jeova ta mostra di kuma i ta kontenti ku nos? Kuma ku un kriston pudi tene sertesa di kuma Jeova ta kontenti ku el?

PABIA KU ALGUNS TA PENSA DI KUMA JEOVA KA TA KONTENTI KU ELIS

4-5. Kal sertesa ku no pudi tene, nin si no pensa di kuma no ka tene balur?

⁴ Disna di mininesa, manga delis entri nos ta pensa di kuma e ka tene balur. (Sal 88:15) Un ermon comadu Adrián fala sin: “N ta sinti tudu ora di kuma N ka tene balur. Ocanba pikininu, N lembra di kuma N ora pa ña familia vivi na Paraísu, ma N ka teneba sertesa di kuma N mersi vivi la.” Tony, ku ka kirsi na un familia di Tustumuñas di Jeova, fala sin: “Nunka ña papes ciga di falan di kuma e aman o ngaban. Es fasin sinti di kuma, tudu ke ku N ta fasi ka ta kontenta elis.”

⁵ Si utrora no ta sinti di kuma no ka bali nada, no pudi lembra di kuma i propi Jeova ku tisinu pa rel. (Jon 6:44) El i ta oja ke di bon ku no tene, ku talves no ka nota del, tambi i sibi kal tipu di algin ku na bardadi no sedu. (1 Sam 16:7; 2 Kron 6:30) Pa kila, no pudi konfia nel ora ki falanu di kuma no tene balur pa rel. — 1 Jon 3:​19, 20.

6. Kuma ku apostolu Paulu ta sintiba ku pekadus ki fasiba?

⁶ Antis di kunsi bardadi, alguns di nos fasiba kusas ku talves ta punu inda sinti kulpadu. (1 Ped 4:3) Utrus ku sta na sirbi Jeova di manera fiel, pudi sta inda na luta ku se frakesas. Sera ki bu korson ta kondenau? Si sedu sin, bu pudi sinti animadu di sibi di kuma, utrus servus fiel di Jeova ta luta ku mesmu sentimentu. Pur isemplu, apostolu Paulu ta sintiba mal dimas, ora ki pensa na si erus. (Rom 7:24) Na bardadi, Paulu ripindiba di si pekadus i batisa. Ma, i coma si kabesa suma kil ku “mas ka ten importansia di ki tudu apostolus” i “pior” algin ku ta fasi pekadu. — 1 Kor 15:9; 1 Tim 1:15.

7. Ke ku no dibi di lembra del aserka di pekadus ku no fasiba?

⁷ No Pape ku sta na seu purmiti di kuma, i na purdanu si no ripindi. (Sal 86:5) Si no ripindi di bardadi pa pekadus ku no fasi, no pudi tene sertesa di kuma ke ku Jeova fala i bardadi, i purdanu ja. — Kol 2:13.

8-9. Kuma ku no pudi vensi sentimentu di kuma, no ka pudi nunka kontenta Jeova?

⁸ Anos tudu no misti fasi tudu ku no pudi pa sirbi Jeova. Ma, alguns ta pensa di kuma e ka pudi nunka fasi kusas ku na kontenta Jeova. Un irma comadu Amanda fala sin: “N ta pensaba sempri di kuma, da ña minjor pa Jeova signifika di kuma, N pirsisa sempri di fasi mas. Pa kila, N ta sforsa sempri pa fasi mas di ki ke ku N pudi fasi. Ora ku N ka konsigi yangasa ke ku N misti, N ta pensa di kuma Jeova fika mal ku mi, suma ku N fika mal ku ña kabesa.”

⁹ Kuma ku no pudi vensi sentimentu di kuma, no ka pudi nunka kontenta Jeova? Lembra di kuma Jeova ka sedu iziẑenti. I ka ta pidinu nunka pa no fasi mas di ke ku no pudi fasi. I ta da balur pa kualker kusa ku no fasi pa rel, si kontra no fasi no minjor. Pensa tambi na kilis ku Biblia fala del, ku sirbi Jeova di tudu se korson. Pur isemplu, pensa na apostolu Paulu. I tarbaja ciu pa manga di anus, i viaẑa manga di kilometrus, tambi i forma manga di kongregasons. Ma, oca ku kusas muda na si vida i ka pudiba mas prega suma antis, sera ki Jeova ka kontenti mas ku el? Nau. I kontinua fasi ke ki pudi i Jeova bensual. (At 28:​30, 31) Di mesmu manera, ke ku no pudi da pa Jeova pudi muda ku tempu. Ma, pa rel, ke ku mas importanti i ke ku lebanu na sirbil. Gosi no jubi alguns maneras ku Jeova ta mostra di kuma i kontenti ku nos.

KUMA KU JEOVA TA MOSTRA DI KUMA I KONTENTI KU NOS?

10. Kuma ku no pudi “obi” Jeova na fala di kuma i kontenti ku nos? (Jon 16:27)

¹⁰ I danu Biblia. Jeova ta buska maneras di mostra si povu di kuma i ama elis, tambi i ta kontenti ku elis. Biblia fala di dus bias nunde ku Jeova fala Jesus di kuma i sedu si Fiju ki ama, tambi i kontenti ku el. (Mat 3:17; 17:5) Sera ki bu misti obi Jeova na falau di kuma i kontenti ku bo? Jeova ka ta papia ku nos di seu, ma i ta papia ku nos atraves di Biblia. No pudi obi vos di Jeova ku na fala di kuma i kontenti ku nos, ora ku no lei palabras di Jesus ku sta na Ivanjelius. (Lei Jon 16:27.) Jesus kopia diritu maneras di sedu di si Pape. Pa kila, ora ku no lei ke ku Jesus fala ku mostra di kuma i kontenti ku si sigiduris imperfeitu, ma ku sedu fiel, no pudi imaẑina Jeova na fala mesmu kusa pa nos. — Jon 15:​9, 15.

11. Pabia ku pasa situasons difisil ka signifika di kuma, Jeova ka kontenti mas ku nos? (Tiagu 1:12)

¹¹ I ta danu ke ku no pirsisa del. Jeova tene vontadi garandi di judanu, pur isemplu, i ta danu kusas material ku no pirsisa del. Ma utrora, Jeova ta disa pa mau kusas pasa ku nos suma ki kontisiba ku Jo. (Jo 1:​8-11) Ora ku no na pasa pa purblemas, kila ka signifika di kuma Deus ka kontenti ku nos. En ves di kila, no ta tene oportunidadi di mostra Jeova di kuma no amal ciu, tambi no konfia nel. (Lei Tiagu 1:12.) Ora ku no na pasa purblemas, no ta nota di kuma i amanu ciu, tambi i ta judanu nguenta.

12. Ke ku no pudi aprindi ku ke ku pasa ku Dmitrii?

¹² Pensa na ke ku pasa ku un ermon na Asia comadu Dmitrii. I pirdi si tarbaju, i ka konsigi oja utru pa manga di misis. I disidi aumenta si atividadi na pregason, asin i mostra si konfiansa na Jeova. I pasa manga di misis, ma i ka konsigi oca tarbaju. Dipus i duensi risu, i ka konsigi lanta di kama. I kumsa ku tene duvida si kontra i sedu bon omi o bon pape, i si kontra Jeova kontinua kontenti ku el. Un dia di noti, si fiju femia mprimi palabras ku sta na Isaias 30:15 ku fala sin: “Si bo susega, bo fiansa na mi, bo ta ten forsa”. I leba ki foja nunde ku si pape dita nel i falal sin: “Papa, ora ku bu sta na sinti mal, bu pudi lembra des testu.” Dmitrii nota di kuma, ku ajuda di Jeova, si familia kontinua tene kusas di kume, ropas ku kau di mora. I fala sin: “Ke so ku N pirsisa di fasi, i sta susegadu i kontinua fiansa na Deus.” Si bu sta na pasa mesmu purblema, bu pudi fiansa di kuma Jeova ta preokupa ku bo, tambi i na judau nguenta.

13. Ba kin ku Jeova pudi usa pa mostra di kuma i kontenti ku nos, i kuma ki ta fasil?

¹³ I danu no ermons ku irmas. Jeova ta usa no ermons ku irmas, pa mostranu di kuma i kontenti ku nos. Pur isemplu, i pudi usa utrus pa papia palabras ku na nkoraẑanu na tempu sertu. Es kontisi ku un irma na Asia oca ki teneba manga di preokupason. I pirdi si tarbaju, i duensi risu. Dipus, si omi fasi pekadu gravi, pa kila i ka pudi sirbi suma ansion. I fala sin: “N ka konsigi ntindi pabia kes kontisi. N pensaba di kuma talves N fasi un kusa di mal i Jeova ka kontenti ku mi.” No irma pidi Jeova pa i mostral di kuma i kontenti ku el. Kuma ku Jeova mostral di kuma i kontenti ku el? I fala sin: “Ansions di kongregason papia ku mi i e judan oja di kuma, Jeova kontinua aman.” Dipus i pidi mas Jeova pa i judal. I fala sin: “Ki mesmu dia, N risibi karta di ermons ku irmas di kongregason. Oca ku N lei ki palabras nkoraẑanti, N sinti di kuma Jeova obi ña orason.” Na bardadi, manga di bias, Jeova ta mostra di kuma i kontenti ku nos atraves di bon palabras di utrus. — Sal 10:17.

14. Kal ki utru manera ku Jeova ta mostra di kuma i kontenti ku nos?

¹⁴ Tambi Jeova ta mostra di kuma i kontenti ku nos, ora ki usa no ermons ku irmas pa danu konsiju ku no pirsisa del. Pur isemplu, na purmeru sekulu, Jeova usa apostolu Paulu pa skirbi 14 kartas pa si ermons ku irmas. Es kartas tene konsijus diretu, ma ku dadu ku amor. Pabia ku Jeova orienta Paulu pa da es konsijus? Pabia Jeova i bon Pape, i ta raprindi si fijus “ki ta kontenti ku el”. (Dit 3:​11, 12) Pa kila, ora ku no risibi konsiju di Biblia, no pudi ojal suma proba di kuma i kontenti ku nos, i ka pabia i paña raiba di nos. (Eb 12:6) Ke mas ku ta mostra di kuma Jeova ta kontenti ku nos?

UTRU KUSAS KU TA MOSTRA DI KUMA JEOVA TA KONTENTI KU NOS

15. Ba kin ku Jeova ta da si spiritu santu i pabia kes pudi danu konfiansa?

¹⁵ Jeova ta da si spiritu santu pa kilis ki ta kontenti ku el. (Mat 12:18) No pudi punta no kabesa: ‘Sera ki N ta mostra alguns maneras di sedu ku fasi parti di frutu di spiritu santu?’ Sera ki bu nota di kuma, bu mas ta mostra pasensa ku utrus di ki antis di bu kunsi Jeova? Na bardadi, konformi bu na mostra frutu di spiritu di Deus, bu mas na tene konfiansa di kuma Jeova ta kontenti ku bo! — Jubi kuadru “Spiritu di Deus ta padi frutu di . . . ”

16. Ba kin ku Jeova ta usa pa prega bon noba, i kuma kes ta fasiu sinti? (1 Tesalonisensis 2:4)

¹⁶ Jeova ta ntrega bon noba pa kilis ki kontenti ku el. (Lei 1 Tesalonisensis 2:4.) Nota kuma ku un irma comadu Jocelyn benefisia di konta bon noba pa utrus. Un dia, Jocelyn staba tristi dimas oca ki korda. I fala sin: “N ka teneba forsa i N staba na sinti suma algin ku ka bali nada. Ma, N staba na sirbi suma pioneru, tambi i seduba ña dia di pregason. Pa kila, N ora i N bai pregason.” Kil parmaña, Jocelyn oja un minjer amigavel comadu Mary ku seta un studu di Biblia. Alguns misis dipus, Mary fala di kuma i oraba Deus pa i judal, i logu dipus Jocelyn konki si porta. Oca Jocelyn pensa nes spiriensia, i fala sin: “N sinti suma si Jeova staba na falan, ‘N kontenti ku bo.’” Na bardadi, i ka tudu jintis ku na seta no mensaẑen, ora ku no na prega. Ma no pudi tene sertesa di kuma Jeova ta kontenti, ora ku no fasi no minjor pa konta bon noba.

17. Ke ku bu aprindi di ke ku Vicky fala aserka di resgati? (Salmu 5:12)

¹⁷ Jeova ta aplika balur di resgati pa kilis ki kontenti ku el. (1 Tim 2:​5, 6) Ma ke gora si no kontinua sinti di kuma, Jeova ka kontenti ku nos, mesmu si no tene fe na resgati i no batisa? Lembra di kuma, no ka pudi konfia sempri na no sentimentus, ma no pudi konfia na Jeova. I ta oja kilis ku tene fe na resgati suma justus na si ujus, tambi i purmiti bensua elis. (Lei Salmu 5:12; Rom 3:26) Pensa fundu na resgati juda un irma comadu Vicky. Un dia, dipus di pensa fundu na resgati, i fala sin: “Jeova mostra pasensa ku mi pa manga di tempu. . . . Ma, i sta suma si N staba na fala Jeova: ‘Bu ka pudi ama un algin suma mi. Sakrifisiu di bu Fiju ka pudi kubri ña pekadus.’” Oca i pensa fundu na prenda di resgati, i kumsa ku sinti di kuma Jeova amal. Anos tambi, ora ku no pensa fundu na resgati, no ta sinti di kuma Jeova amanu, tambi i ta kontenti ku nos.

18. Kal sertesa ku no pudi tene si no kontinua ama no Pape ku sta na seu?

¹⁸ No pudi sforsa ciu pa fasi ke ku faladu nes studu, ma mesmu asin, utrora no pudi sinti disanimadu i punta si Jeova ta kontenti ku nos. Si kila kontisi, lembra di kuma i ta kontenti ku “kilis ku amal.” (Tiagu 1:12) Pa kila, kontinua pertusi di Jeova i nota tudu kusas ku ta mostra di kuma i ta kontenti ku bo. Lembra sempri di kuma, Jeova “ka sta lunju di kada un di nos”. — At 17:27.