Jatun tantakuypi, kusiywan Jehovata yupaychana

1. ¿Imapí Israelpi fiestaswan, jatun tantakuyninchikwan kikillan kanku?

¹ José, María, wawasnin, wak chiqa sunqu runas ima, sapa wata Jerusalenpi fiestasman riq kanku. Chay fiestaspiqa, Jehovap khuyakuyninpi tʼukuriq, Leyninta ukhunchariq ima, kanku. Kikillantataq, jamuq jatun tantakuypi tukuy sunqu Jehovata yupaychayta atisun.

2. ¿Jatun tantakuyman rinapaq imasta ruwana tiyan?

² Wakichikunachik. Jesuspa familianqa, Nazaretmanta Jerusalenkama, rispa kutimuspa ima, 200 kilometrostajina puriq kanku. Mana yachanchikchu machkhachus Jesuspa sullkʼasnin kasqankuta, chaywanpis Josewan, Mariawan maytachá wakichikuq kanku. Qamrí, ¿jatun tantakuyman kimsantin pʼunchayman rinaykipaq wakichikunkiñachu? Ichapis llamkʼayniykimanta vacacionesta urqhunayki kanqa, chayrí patronniykiwan, wawasniykip profesoresninwan ima parlanayki kanqa, jatun tantakuyman rinaykipaq. Juk hotelpi qhipakunayki kaptin, chay pʼunchaykuna qhipakunaykipaq ¿waqyarinkiñachu? ¿Qutuchakuyniykimanta mana riyta atiqta yanapariwaqchu? (1 Juan 3:17, 18.)

3. Israelpa fiestasnin, ¿imaynatá amigosninkuwan tinkunankupaq yanapaq?

³ Hermanoswan parlarina. Judiospa fiestasninkuqa, Jehovata yupaychaqkunata jukchaykuq. Jesuspa familianpis, unaymantaña riqsinakusqanku amigosninkuwan maytachá tinkuyta munaq kanku. Chantapis, Jerusalenpi judioswan mana judioswan, chayrí richkaspa kutimuchkaspa, wak amigosta tariyta atiq kanku.

4. ¿Imaynatá hermanosninchikta mana pisipaqchu qhawasqanchikta rikuchisunchik?

⁴ Allin kamachi yuyayniyuqqa, mana papelniqllatachu yachachiwanchik, manaqa umallirichiykunata uyarinanchikpaqpis wakichillantaq. ¿Imaraykú? Puraqmanta kallpachanakunanchikpaq (Heb. 10:24, 25). Chayrayku, sapa pʼunchay ñawpaqta chayanaykipaq kallpachakuy, jinamanta manaraq tiyamunapaq takiykunata churakuchkaptin, hermanoswan parlarinaykipaq. Khuskan pʼunchaypi mikhunata rantiq lluqsinamantaqa, allin kanman imitallatapis apakunanchik, jinamanta hermanoswan parlarikunapaq. Jehovaqa, hermanosninchikta sumaq tʼinkatajina quwanchik, manataq pisipaq qhawanachu (Miq. 2:12).

5. Sumaqta yachakunapaq, ¿imastaq yanapawasunman?

⁵ Sumaqta yachakunapaq. Jesusqa juchʼuymantapacha Tatanmanta astawan yachakunanpaq, judiospa fiestasninman riq (Luc. 2:41-49). ¿Imaynatá ñuqanchikpis jatun tantakuypaq wakichikusqanmanta sumaqta yachakusunman? Umallirichikusaptin ama puriychu nitaq parlaychu. Nillataq celularniykita wak aparatosniykita ima, japʼichiychu. Chantapis, umallirichiqta qhaway, parlachkasqanmantataq qillqariy. Tataspis wawasninkuwan khuska tiyakunanku tiyan, jinamanta wawasninkuta sumaqta uyarinankupaq qhawanqanku. Chʼisinpitaq, yachakusqanchikmanta parlarisunman.

6. ¿Imatá pʼachallikuchkaspa, kʼachanchakuchkaspa ima yuyarikunanchik tiyan?

⁶ Pʼachallikuymanta, kʼachanchakuymanta ima. Wak suyusmanta ranqhaqkuna ñanta richkaspa, Jesuspa familianta, wak judiosta ima, fiestaman richkasqankuta chayrí kutimuchkasqankuta reparaq kanku. ¿Imaraykú? Imaraykuchus pʼachasninkup kantun flecosniyuq chantá patitanpitaq azul qʼaytuwan ruwasqa karqa (Núm. 15:37-41, NM). Cristianosqa mana juk laya pʼachallatachu churakunchik, chaywanpis maychus kaqta pʼachallikusqanchiqrayku, llimphu risqanchikrayku ima, riqsichikunchik. Kikillantaq jatun tantakuyman viajachkaptinchik chayrí kutimuchkaptinchik kanan tiyan. Tantakuy tukukusqantawan wak pʼachata churakuspapis allinta tarjeta de solapata ima, churakunanchik tiyan. Jinamanta, wakkuna Jehovamanta sutʼinchaqkuna kasqanchikta reparanqanku.

7. ¿Imaraykú jatun tantakuypi yanapakuna tiyan?

⁷ Yanapaqkuna necesitakun. Jatun tantakuy sumaq ruwakunanpaqqa, achkha yanapaqkuna necesitakun. ¿Qam yanapakuwaqchu? (Sal. 110:3.) Tantakuykunapi yanapakuspaqa Jehovata yupaychallanchiktaq, chaytaq wakkuna Jehovata jatunchanankupaq tanqan. Juk gerente, hermanosman jatun tantakuyta ruwanankupaq mañaq, sumaqta llimphuchasqankumanta, jinata nirqa: “Kay tantakuyta sumaqta ruwasqaykichikmanta agradeceykichik, imaraykuchus qamkunamanta uyarirqani, tantakuyta ruwasqaykichik lugarta aswan llimphuta saqisqaykichikta. Qamkuna Jehovamanta sutʼinchaqkuna sumaqta allinchankichik ñuqaykupaq chantapis may munakuywan ruwankichik, manataq qamkunajina kʼacha runasta riqsirqanichu”.

8. Jatun tantakuypi, ¿maykunapí Diosmanta willarisunman?

⁸ Diosmanta willarina. Jatun tantakuy ruwakunqa chay llaqtapiqa allin pʼachallisqas tarjeta de solapasniyuqta sumaqta qhawanqanku. Chayrayku ichá ñuqanchikwan jatun tantakuymanta parlariyta munanqanku. Juk tawa watitayuq yuqallitu, musuq publicacionta restauranteman aparqa chantá mikhunata apamuq warmiman rikuchirqa, tatasnintaq jatun tantakuyman waqyarirqanku.

9. ¿Imaynatá Jesuspa familianjina, sumaq yachachiykunata jatunpaq qhawasqanchikta rikuchisunman?

⁹ Judiospa fiestasninqa Diosmanta yachakunankupaq may kusiyta apamuq (Deu. 16:15). Jesuspa familianqa chay tantakuyman rinankupaq, kusiywan kallpachakuq kanku sumaqta yachakunankupaq.Ñuqanchikpis kikillantataq ruwanchik, imaraykuchus chay tantakuykunaqa, munakuyniyuq Diosninchikpa qusqan (Sant. 1:17). ¡Kunanmantapacha chay tantakuyman tukuy sunqu rinaykipaq, wakichikuy!

[6, 7 paginaspi recuadro]

Jatun tantakuypaq yuyarichiykuna

◼ Wakichikusqan. Jatun tantakuypaq wakichikusqanqa, kimsantin pʼunchayta 9.20 qallarinqa. Punkuqa, 8.00 kicharikunqa. Chantapis, tantakuy Diosta jatunchananpaqjina qallarinanpaqqa, takiykuna qallariptinkama tiyananchikman rinanchik tiyan. Viernes, sábado pʼunchaytawanqa, 4.55 tukukunqa, domingotaq 4.00 tukukunqa.

◼ Autosta saqinapaq. Jatun tantakuypi, hermanos maypichus autoykita saqinaykita nisunqanku chaypi, mana pagaspalla autoykita saqiyta atinki, chaywanpis chayasqankumanjina kʼuchunchanqanku. Chantapis, allin kanman juk autollapi tantakuyman rinaykichik, imaraykuchus autosta saqinapaq lugarqa, mana jatunchu kayta yachan.

◼ Tiyanapaq. Qamwan, jamuqkunallapaq, qamwan tiyakuqkunallapaq, qamwan Bibliamanta yachakuqkunallapaq ima, tiyanata japʼiyta atinki (1 Cor. 13:5).

◼ Mikhuna. Khuskan pʼunchaypi mikhunata rantiq lluqsinamantaqa, allin kanman apakunanchik. Chantapis, tiyananchik uraman yaykunanpaqjina mankasllapi mikhunata apana, manataq imatapis vidriomanta apanachu.

◼ Munasqanchikmanjina qullqita churanapaq. jatun tantakuy allinta ruwakuchkasqanmanta agradecesqa kasqanchikta rikuchinapaqqa, Tantakunapaq Wasipi, jatun tantakuypipis, tukuy sunqu munasqanchikmanjina qullqita churasunman.

◼ Imanarpakuptinchik. Ama qhasi mana kaqta kay primeros auxilios nisqaman celularniqta waqyaychu. Manaqa, jatun tantakuypi pillapis imanarpakuptillan, astawan qayllapi kaq yanapaqta waqyay, paytaq usqhayllata Primeros Auxilios nisqaman willanqa. Primeros Auxilios nisqamanta kaqkunataq, ichá hospitalman waqyanqanku.

◼ Zapatos. Sapa wata, urmanapaqjina zapatosta churakusqankurayku chakinkuta qʼiwikunku, urmarpanku ima. Chayrayku, allinta puriyta atinapaqjina zapatosllawan jatun tantakuyman rina, ajinamanta gradasta, rejillasta purichkaspapis mana urmasunchu.

◼ Mana allinta uyariqkunapaq. Tukuy umallirichiykunaqa, radioniqta (FM) uyarikuyta atinqa. Chayrayku, allin kanman pilasniyuq juchʼuy radiota audifonosniyuqta apakunayki.

◼ Grabación. Mana ima grabadoratapis corrienteman japʼichinachu tiyan. Grabayta atikuptinpis, uyariqkunata mana pantachispalla grabana tiyan.

◼ Wawasta apaykachanapaq carritos, juchʼuyman tukuq sillas ima. Jatun tantakuymanqa, wawasta apaykachanapaq carritosta, juchʼuyman tukuq sillastapis, mana apanachu. Chaywanpis, wawasta tiyachinapaq tiyanata apayta atikun.

◼ Sírvase visitar nisqa formulario. Allin kanman Sírvase visitar (S-43) nisqa formulariota iskayllatapis tantakuyman apakunayki, ajinamanta Diosmanta willasqayki runa astawan yachakuyta munaptin, qillqayta atinki. Chay formulariota qillqaytawanqa, Departamento de Publicaciones nisqaman apay, chayri qutuchakuyniykimanta secretarioman jayway (Reinomanta Willayninchik 2009 noviembre killamanta 4 paginata, qhawariy).

◼ Restaurantes. Restaurantesman rispaqa, Diosta jatunchanapaqjina imatapis ruwana.

◼ Hoteles. Kay yuyaychaykunaqa, wakin lugaresllapaq allin kanqa. 1) Machkha cuartospichus qhipakunaykichik kanqa chaykunallata tʼaqachiychik, chantapis chay cuarto machkha runaspaqchus chaylla qhipakuychik. 2) Chay hotelman manaña rinkichikchu chayqa, usqhayllata willanaykichik tiyan. 3) Qʼipista apanapaq carritota necesitaqtillaykichik apaychik, chantá usqhayllata kutichipuychik wakkunapis qʼipisninkuta apanankupaq. 4) Chay cuartopi mana waykʼunachu kaptinqa, ama waykʼuychikchu. 5) Cuartota kʼuchunchaqpaq sapa pʼunchay qullqita saqipuychik. 6) Yakuquñita, wak imasta ima qhasilla quptinkuqa, ama achkhata uqharikuychikchu, wakkunapaqpis kanan tiyan. ) Hotelpi llamkʼaqkuna achkha ruwanasniyuq kanku, chayrayku tukuy imata ruwachkaspa kʼachas, khuyakuyniyuq, pacienciayuq ima, kasqaykichikta rikuchiychik, chaytataq mayta agradecenqanku. 8) Achkhata chayri wak imasmanta qullqita mañasunqachik chayqa, ama pagaychikchu manaqa usqhayllata kay Departamento de Alojamiento nisqaman willaychik. 9) Cuartoykichikpi ichá imallapis mana allinchu kanman chayqa, usqhayllata kay Departamento de Alojamiento nisqaman willaychik.

◼ Yanapaqkuna. Ancianosta, siervos ministerialesta ima, kay yanapaqkuna (Departamento de Acomodadores) nisqaman rinankuta mañayku, ajinata ruwaspaqa hermanosninchikta yanapariyta atinqanku, chaytataq Jehová Diosninchikqa, may allinpaq qhawan.

◼ Ñawpaqta chayana. Chay tantakuyman manaraq qallarichkaptin chayanapaq kallpachakuyqa, allinninchikpaq kanqa. Ajinamanta hermanoswan parlariyta, takiykunata uyariyta, qallariypi takinata takiyta, Diosmanta mañakuyta, imatachus qallariypi nikusqanta ima uyariyta, atisunchik. Chantapis ñawpaqta chayaspaqa, hermanosninchik sumaqta uyarinankuta mana pantachisunchu, chaytaq chay tantakuyta, Jehová Diosta ima, may allinpaq qhawasqanchikta rikuchinqa (1 Cor. 14:40).