Jehovamanta sutʼinchaqkunap, 2008 watapaq jatun tantakuyninku
1. a) Pablo hebreo hermanosninman yuyaychasqan, ¿imaraykutaq may allin ñuqanchikpaq? (Hebreos 10:24, 25, ñawiriy.) b) ¿Maypitaq Pablop yuyaychasqanta kasukusqanchikta rikuchisun?
1 Apóstol Pabloqa, hebreo hermanosninman tantakuykunaman riy, puraqmanta kallpachanakuy ima, allin kasqanta nirqa, astawanraq “Señorpa jamunan pʼunchay qayllapiña kasqanta” yachaspa (Heb. 10:24, 25). Pablo, Señorpa jamunan pʼunchay nisqanqa, astawan qayllapiña kachkasqanta reparanchik, chayrayku hermanosninchikwan tantakuyta astawan maskʼanchik, jinamanta Diospa yachachiynin ‘qhipa manchay saqra pʼunchaykunapi’, yanapanawanchikpaq (2 Tim. 3:1). Kay 2008 watamanta, kimsa pʼunchaymanta jatun tantakuypitaq, juktawan hermanosninchikwan tantakusun.
2. a) ¿Imaraykutaq may allin chay jatun tantakuyman kimsantin pʼunchayta rinanchik? b) ¿Imaynatá chay tantakuyman rinaykipaq wakichikuyta qallariwaq?
2 Kimsantin pʼunchayta rina. Allin kanman jatun tantakuymanta, kimsantin pʼunchayninta rinayki. Pablo, “Diosta yupaychana tantakuytaqa ama saqeychejchu”, nisqanqa, ninayan chay tantakuypi yachachikusqanmanta, tukuyninta uyarinanchik, mayqintachus mayta necesitanchik (Heb. 10:25). Chayrayku kunanmantapacha, chay tantakuyman rinaykipaq wakichikuy. Usqhayllata patronniykiman, chay pʼunchaykunapi mana llamkʼaq rinaykita willay, ajinamanta necesitakuptin, chay pʼunchaykunapaq wak llamkʼaqta maskʼakunanpaq. Wawasniyki, chay jatun tantakuy ruwakuchkaptin, yachay wasipiraq kachkaptinku, allin kanman yachachiqninkuwan parlarinayki, chay tantakuypi Diosta yupaychanankupaq rinankupuni kasqanta. Jehová, Reinonta ñawpaqman churasqaykimanta, tʼinkasunanta mana iskaychakuychu (Mat. 6:33).
3. ¿Imaynatá chay tantakuyman rinankupaq wak runasta yanapasunman?
3 Wakkunata rinankupaq yanapay. Pabloqa, hermanosninman ‘puraqmanta kallpachanakuspa yanapanakunankuta’, yuyaycharqa (Heb. 10:24). Libromanta yachaqanapaq tantakuyniykimanta, ¿kanchu pillapis chay tantakuyman rinanpaq yanapaykita necesitaq? Bibliamanta qamwan yachakuqkunata, ¿yanapawaqchu chay tantakuyman juk pʼunchayllatapis rinankupaq? Familiaykimanta mana cristiano kaqkunawan, jatun tantakuyman rinaykimanta parlarichkaspa, paykunatapis chay jatun tantakuyman rinankupaq waqyariwaq. Chayta ruwaptiyki, ichapis paykuna chay jatun tantakuyman rinqanku.
4. Chay jatun tantakuykuna maypichus, maykʼaqchus ruwakunanta yachanapaq, ¿imatataq qhawarisunman?
4 Astawan yachanapaq. Sapa wataqa, achkha runas sucursalman waqyanku, chay jatun tantakuy maypichus, maykʼaqchus ruwakunanta, yachayta munaspa. Chay waqyaqkunataq, yaqha tukuyninku hermanos kanku, chantapis yacharqankuña maypichus chay tantakuy ruwakunanta, chayrayku, kay 2008 watamanta, marzo killamanta Torremanta Qhawaq revistata qhawarinaykichikta, mañayku.
5. a) ¿Imaynasmantataq Jehovata, jatun tantakuykunaman rispa jatunchanchik? b) ¿Imatataq hotelesta kamachiqkuna, hermanosninchikmanta ninku?
5 Allin ruwaykuna. Jehová, payta yupaychanapaq tantakuyman rinanchikta kamachisqanta kasukusqanchikqa, ñuqallanchiktataq yanapawanchik. Chantapis chayjina tantakuykunapiqa, Diospa sutinta jatunchanchik (Isa. 48:17). Kimsa pʼunchaymanta jatun tantakuykunaman riptinchik, ‘allin ruwasqasninchik’ sutʼita rikukun, wakin runastaq chay ruwasqanchikta may allinpaq qhawanku (1 Tim. 5:25). Juk llaqtapi, maypichus Jehovamanta sutʼinchaqkuna achkha kutitaña jatuchaq tantakuykunata ruwanku, juk hotelmanta kamachiq, kayta nirqa: “Achkha runas Jehovamanta sutʼinchaqkunap jatun tantakuyninkumanta, allinta parlanku. Yachayku, imaynatachus chay tantakunku lugarta, maypichus autonkuta sayachinku chaykunata ima, sumaqta llimphuchasqankuta. Mayta kusikuyku, sapa wata qʼuñi tiempopi paykuna, kaypi kasqankumanta. Chayrayku sapa wata jamunallankutapuni munayku”. Wak hotelpi kamachiq runa, imaynatachus chay hotelman wak runas chayaqkuna, chʼampaykunata ruwasqankumanta parlaytawan, hermanosninchik, chay hotelman chayasqankupi, yanapakusqankumanta, pacienciayuq kasqankumanta ima, parlarqa. Chantá jinata nirqa: “¡Tukuy kay hotelman chamuqkuna, Jehovamanta sutʼinchaqkunajina kanankuta munaykuman”, nispa. Hermanosninchik cristianojina purisqankutaqa, mana kay runasllachu qhawanku, manaqa wak runaspis kikillantataq qhawanku, chantapis jinata ruwasqankuqa, Jehovap sunqunta kusichin.
6. ¿Imaynatataq Mateo 4:4 nisqan sapa juk umallirichiyta allinta uyarinapaq yanapawasun?
6 Jesusqa, ‘Diospa siminmanta tukuy lluqsimuq palabrasninta’ uyarisqanchikwan kawsananchikta nirqa (Mat. 4:4). Jehovaqa, sapa wata jatun tantakuykunapi ‘allin kamachi’ wakichisqanniqta, ‘horanpi Diosmanta yachachiyta mikhunatajina, jaywawanchik’ (Mat. 24:45). Kay tantakuykunaqa, mana pisi tiempollapichu, wakichikun. Chayrayku, chay tantakuykunaman rispa, sapa juk umallirichiyta allinta uyarispa ima, Jehovaman agradecesqa kasqanchikta rikuchisun.
[4 paginapi recuadro]
Wakichikusqanmanta horarion
Viernes, sábado ima
9.20 paqarinmanta - 4.55 tardekama
Domingo
9.20 paqarinmanta - 4.00 tardekama