¿Aswan qhipapaqchu saqichkanki?
¿Imamantá parlachkanchik? Directriz anticipada para la atención de la salud (DPA) nisqa tarjetaman juntʼachinamanta parlachkanchik, chaytataq tukuy Jehovamanta sutʼinchaqkuna apaykachanchik. “Imachus qʼaya kananta” mana pi yachasqanrayku ñawpaqmantapacha imaynatachus, imaswanchus jampichikuyta munasqaykita ima qillqanayki tiyan (Sant. 4:14; Hech. 15:28, 29). Allinta akllanaykipaq, Asistencia médica sin transfusiones; Necesidades y derechos del paciente, nisqa video urqhukun. Ñawpaqtaqa kay videota qhaway, chantá Diosmanta mañakuytawan, kay videopi rikusqaykimanjina kay tapuykunaman kutichiy. (Chay videopiqa runasta operachkasqanku rikukun, chayrayku tatasta yuyaychayku wawitasninkuwan qhawanankutachus manachus allin yuyaywan akllanankuta.)
1) ¿Imaraykutaq wakin doctores operachkaspa manaña yawarta churayta munachkankuchu? 2) Doctores mana yawarta churaspalla kimsa runasta operasqankumanta parlariy. 3) ¿Machkha doctorestaq yawarta mana churaspalla operayta munanku? ¿Imaraykutaq jinata ruwayta munanku? 4) Yawarta churaspa operasqankumanta achkha hospitalespi tapurikusqanmanjina, ¿imataq sutʼi rikukurqa? 5) Yawarta churachikuy, ¿imaraykutaq astawan unquchiwasunman? 6) Yawarta mana churaspalla runata operay astawan allin kasqanmanta, ¿imatá achkha doctores ninku? 7) ¿Imaraykutaq juk runa anemiawan kanman? Anemiawan sinchi unqusqa runata, ¿doctores operayta atinkumanchu? ¿Imaynatá? 8) ¿Imatá ruwakunman unqusqap yawarninpi astawan eritrocitos (glóbulos rojos) nisqa yapakunanpaq? 9) ¿Imatataq doctores ruwanku operachkaspa mana achkha yawarta suruchinankupaq? 10) ¿Atikullanmantaqchu yawarta mana churaspalla wawasta, wañuy patapi kaqkunata ima operay? 11) ¿Mayqintaq kay principio ético primordial nisqa, unqusqasta sumaqmanta jampinapaq? 12) ¿Imaraykutaq yawarta mana churachikuspalla operachikuyta munasqanchikta ñawpaqmantapacha juk documentopi qillqananchik tiyan? ¿Ima documentopitaq chayta qillqasunman?
Chay videopi rikusqanchikmanjina operachikuyqa, sapa jukninchikmanta kachkan, sapa jukninchiktaq Bibliawan yachachisqa conciencianchikmanjina akllayta atinchik. ¿Sutʼitañachu yachanki imaynatachus operachikunaykita, wawitasniykitapis imaynatachus operachinaykita? Tarjeta DPA nisqapi, ¿qillqankiñachu imaynatachus operachikuyta munasqaykita? Astawan yachanaykipaq “Diospa munakuynin”, libromanta 7 yachaqananta, chaypi sutʼinchakusqanmanjina wak publicacionesta ima ñawiriy. Chantá Nuestro Ministerio del Reino 2006 noviembre killamanta, “¿Qué opino de las fracciones sanguíneas y de los procedimientos médicos que impliquen el uso de mi sangre?”, nisqata ñawirillaytaq. Imatachus akllasqaykita chay Ministeriopi qillqaytawan tarjeta DPA nisqamanñataq kikinta qillqay. Familiayki, sutiykipi parlanankupaq pikunatachus akllasqayki ima, imaynatachus operachikuyta munasqaykita sutʼita yachananku tiyan.
[3 paginapi recuadro]
• ¿Sutʼitañachu yachanki imaynatachus operachikunaykita, wawitasniykitapis imaynatachus operachinaykita?
• ¿Tarjeta DPA nisqata sumaq juntʼasqatachu apaykachachkanki, imanarpakuptiyki chayta qhawanankupaq?