Bibliamanta yachachiyta qallarinapaq wakichisqapuni kana
1. Mateo 28:19, 20 pʼitikunapi Jesús kamachisqanta, ¿imaynatá juntʼasunman?
1 Jesusqa, “tukuy laya runasta yachachisqas[ninman]” tukuchinanchikpaq, yachachinanchikta nirqa (Mat. 28:19, 20). Chayrayku, Bibliamanta yachachiyta qallarinapaq tukuy tiempo wakichisqapuni kayta munanchik, manataq Bibliamanta yachakuyta munaqkunata maskʼanapaq pʼunchayllapaqchu. Chaypaqtaq qhipan yuyaychaykunaqa, mayta yanapawasunchik.
2. ¿Pikunatataq “Bibliamanta yachachiykiman” nispa niwaq?
2 ‘Bibliamanta yachachiykiman’ niy. Tukuy runasman Bibliamanta yachachiyta munasqanchikta nispaqa, yachakuyta munaqkunata achkhata tarisunchik (Ecl. 11:6). Willaypi, ¿pillamanpis “Bibliamanta yachachiykiman” nispa nirqankichu? Estados Unidospi juk qutuchakuypi, hermanosqa killantinpi chayjinamanta ruwarqanku. Killa tukukuytataq, ¡42 runasman yachachichkarqanku! Qampis Bibliamanta yachakuyta munaqkunaman kutispa, Bibliamanta yachachiyta munasqaykita niwaq. Ama yuyaychu chayta yachasqankutaña. Manaraq munaptinkutaq, paykunaman kutillaypuni. Chantá vecinosniykiman, familiaresniykiman, yachaywasipi chayri llamkʼaypi compañerosniykiman, Bibliamanta yachachiyta munasqaykita niwaq. Yachakuqkunap amigonku, familiarninku ima, ¿Bibliamanta yachakuyta munanmanchu?
3. ¿Imataq yanapawasunman Bibliamanta yachachiyta qallarinapaq, imaynatá chaywan willamusunman?
3 Juk sumaq yanapa. Chiqa kutichiykunata yachayta munawaqchu tratadoqa, Bibliamanta yachachiyta qallarinapaq yanapawasunman. Kaytataq juk publicacionwan mana qhipakuqkunamanpis jaywasunman. Chantá kay tratadowan mercadospi, callespi, cartaniqta, Bibliamanta yachakuqkunaman kutispa ima willasunman, juk wasipi mana ni pipis kaptintaq chayta saqisunman. Micropi richkaspa, rantimuq, llamkʼamuq ima richkaspa, ¿chay tratadota apawaqchu? Tukukuyninpiqa, imaynatachus Bibliamanta yachachisqanchik sutʼinchakun, Yachachin librotaq rikukun.
4. ¿Imaynatá Chiqa kutichiykunata nisqa tratadowan Bibliamanta yachachiyta qallarisunman?
4 Chay tratadota quytawan ñawpa paginapi kaq tapuykunata rikuchiy, tapuriytaq: “¿Mayqin tapuypa kutichiynintataq yachayta munawaq?” Chantá kutichiyninta chay tratadomanta ñawiripuy. Chantá 4 paginanmanta tumpata parlariy Bibliamanta astawan yachakuyta atisqanta rikuchinaykipaq. Chantá Yachachin libropi, ima yachaqanapichus astawan yachakunanta rikuchiy, chay librotataq saqiy, ima pʼunchaychus kutinaykitataq niy.
5. ¿Imaraykutaq Bibliamanta yachachiyta qallarinapaq wakichisqapuni kananchik tiyan?
5 Bibliamanta yachakuyta munaqkuna kankuraq. Kawsayman pusaq ñanta purinankupaq paykunata yanapaspa, kusikunchik. Chayrayku Bibliamanta yachachiyta qallarinapaq wakichisqapuni kaspaqa, runasta yachachispa astawan kusikusunchik (Mat. 7:13, 14).