¿Ruwasqasninchikmanta imatá runas yachakunkuman?
1. Jesusta qhawarispa, ¿imatá discípulos yachakurqanku?
1 Jesús nirqa: “Yugoyman churakuychej, yachaqakuychejtaj noqamanta” (Mateo 11:29). Jesusqa mana parlasqallanwanchu yachachirqa manaqa, ruwaykunasninwanpis. Payta qhawarispa discipulosnin imatachus yachakusqankupi tʼukuriy. Payqa, kʼacha, khuyakuyniyuq, munakuyniyuq ima karqa (Mat. 8:1-3; Mar. 6:30-34; Luc. 6:43-48). Llampʼu sunqutaq karqa (Juan 13:2-5). Discipulosninqa, paywan khuska willaq risqankupi, chiqa kaqta mana saykʼuspa willamusqanta repararqanku (Luc. 8:1-3; 21:37, 38). Willaypi kaptinchik ñuqanchikmanta, ¿imatá runas yuyanku?
2. Allinta pʼachallikusqanchikta, allin ruwaykunata ruwasqanchikta rikuspa, ¿imatá runas ñuqanchikmanta yuyanku?
2 Runasman parlasqanchik. Allinta pʼachallikusqanchikta, allin ruwaykunata ruwasqanchikta, wak runasrayku tukuy sunqu dakusqanchikta rikuspa, ichapis ñuqanchikmanta allinta yuyanankupaq yanapanman (2 Cor. 6:3; Fili. 1:27). Chaywanpis Bibliamantapuni yachachisqanchikta reparanku, chantá parlasqankuta kʼachamanta uyarisqanchikmanta, mayta kusikunku. Kay allin ruwaykunata ruwananchikpuni tiyan, ajinamanta runas Diospa Reinonmanta uyariyta munanqanku.
3. Allin ruwaykunasninchikwan, ¿imaynatá hermanosninchikta yanapasunman?
3 Hermanosninchik. Chaykunata ruwaspaqa, hermanosninchiktapis yanapallasunchiktaq. Sunqu kʼajaywan willamuptinchikqa, hermanosninchikta kikinta ruwanankupaq tanqanqa. Imaynatachus fierroqa fierrollawantaq awsakun, ajinallatataq runasman parlanapaq allinta wakichikuspaqa, hermanosninchikpis aswan sumaq willaqkunaman tukunqanku (Pro. 27:17). Chayrayku pikunachus astawan yachakuyta munaqkunamanta, sutisninta allinta qillqaspa, chantá usqhayllata chay wasisman kutispaqa, hermanosninchikpis chayta rikuspa kikillantataq ruwanqanku. Willayninchikta maychus kaqta juntʼaptinchikqa, hermanosninchik kikinta ruwanankupaq yanapasun (2 Tim. 4:5).
4. ¿Imaraykutaq tapurikunanchik tiyan ruwasqasninchikwan wakkunata yanapachkasqanchiktachus, manachus?
4 Allin kanman tapurikunanchik: ¿Ruwasqasniywan wakkunata yanapachkanichu, manachu?, nispa. Allin ruwaykunata ruwasqanchikqa, Jehovap sunqunta mayta kusichinqa, ajinata ruwasqanchikmanta apóstol Pablojina, nisun: “Noqata qhawarispa imatapis ruwaychej, imaynatachus noqapis Cristota qhawarispa ruwani, ajinata”, nispa (1 Cor. 11:1).