Jeremías
Babilonia runakunata castigananpaq nishqan
50 Kaychömi qelqaraykan caldeo runakuna tashqan Babilonia nacionpaq* profëta Jeremíaswan TAYTA DIOS wilakatsishqan.
2 “Intëru nacionkunacho wilakäriy.
Nishqäkunata maytsaychöpis musyatsipäkuy.
Pïmaypis musyananpaq bandërata jawipäkuy.*
Imatapis mana qonqaypa kayno nir wilakäriy:
‘¡Babilonia nacionta vincishqanami!
¡Bel diosninpis penqakushqami kaykan!
¡Merodac diosninpis fiyupa mantsakashqami kaykan!
3 “Babilonia nacionta atacananpaqmi norti kaq lädupita juk nación runakuna aywarkaykämun.
Paykuna chayamurmi lapanta ushakätsinqa.
Runakunapis ni uywakunapis manami kanqanatsu.
Tsaycho taqkunaqa lapanmi qeshpir aywakärinqa”.
4 TAYTA DIOSMI kayno nin:
“Tsay witsanmi Israel runakuna y Judá runakuna TAYTA DIOSNIN kashqäta tantiyakärinqa.
Tsaymi markankunaman waqaraykar kutipäkamushpan perdonta manakamanqa.
5 *Siónman* aywaq nänipami tapukuraykar kutipäkamunqa.
Kutimushpanmi kayno nipäkunqa:
‘TAYTA DIOSTA cäsukunantsipaq lapantsi templuman aywaykur paywan *pactuta rurashun.
Tsay pactuta imaypis cumplishun’.
6 “Kuyashqä runakunaqa oqrakashqa uyshakunanömi kashqa.*
Autoridäninkuna lutanta rurar kawaptinmi jirkacho pantakashqa uyshano purikärishqa.
Jirkakunapa purikurmi kunchantapis qonqaykärishqa.
7 Tsayno puriykaqta tarirmi pïmaypis mikukurkushqa.
Contrankunami kayno nishqa:
‘Paykunaqa unay aylunkuna yärakushqan TAYTA DIOSTA manami cäsukärintsu.
Lapan nistashqanta kamaripaptinpis manami cäsukärintsu.
Tsawraqa paykunata atacarpis manami jutsatatsu ruraykantsi, sinöqa Diosnin munashqannömi atacaykantsi’.
8 “¡Kuyashqä runakuna, Babiloniapita qeshpikäriy!*
¡Uyshakunapa puntanta chïvu aywaqno qamkunapis runakunapa puntanta aywakäriy!
9 Noqami kamakätsishaq Babiloniata atacananpaq.
Norti kaq lädupitami munayniyuq nacionkuna wilanakurkur atacaq aywapäkunqa.
Atacaqkunami flëchawan wanutsir Babilonia runakunata vincipäkunqa.
10 Babilonia runakunapa imaykantapis apakärinqami.
Apaytapis mana puëdishqanyaqmi shuntapäkunqa.
Noqa TAYTA DIOSMI tsayno nï.
11 “Babilonia runakuna, kuyashqä runakunata ushakätsir pasaypami kushikärirqayki.
Becërru malwa ali qewata mikur pañashqannöraqmi qamkunapis kushishqa saltaykacharqayki.
Cawallu wijijyashqannömi asikacharqayki.
12 Tsayno karpis yurishqayki nación ushakaptin fiyupami penqakärinkipaq.
Nacionnikiqa wakin nacionpita mas peormi rikakunqa.
Tsaycho pipis mana taptin chunyaqmi rikakunqa.
13 Fiyupa rabyakur ushakätsiptïmi nacionnikicho pipis mana tanqanatsu.
Tsayta rikarmi runakuna fiyupa mantsakashqa rikakunqa.
14 “Babilonia runakunaqa jutsata rurashpanmi rabyatsimashqa.
¡Paykunata atacanaykipaq tumariq tsaparpay!
¡Flëchaykikunawan mana kuyapaypa flëchapäkuy!
15 ¡Intëru kuchunpa atacar qaparpay!
¡Babilonia vincishqanami!
¡Rikachakuna törrinkunapis tunishqanami!
¡Murällankunapis juchushqanami!
Imanömi qamkunata rurashurqayki, tsayno kikinkunatapis rurapäkuy.
Noqa castigaptïmi Babilonia runakunata tsayno atacankipaq.
16 “¡Babiloniacho muruqkunatapis lapanta wanutsipäkuy!
¡Mikuy shuntaqkunatapis lapanta ushakätsiy!
Babiloniaman prësu apashqan runakunapis nacionninkunaman kutikäritsun.
Babiloniacho mantsakuypaq guërrata rikashpan markankunaman qeshpikäritsun.*
17 “Israel runakunaqa jirkacho oqrakashqa uyshanömi karkaykan. Puntataqa Asiria nacionpa mandaqnin reymi mikanashqa leonno paykunata wanutsishqa. Nirkurqa Babilonia nacionpa mandaqnin rey Nabucodonosormi tulunkunatapis pakir ushashqa”.
18 Israel runakunata kuyaq y lapanta mandaq TAYTA DIOS kaynömi nin: “Asiria nacionpa mandaqnin reyta castigashqänömi Babilonia nacionpa mandaqnin reyta y nacionninta castigashaq. 19 Israel runakunata nacionninmanmi kutitsimushaq. Uyshata mitsiqnömi Carmeluchöpis, Basánchöpis, Efraín jalqakunachöpis y Galaadchöpis paykunata ali rikashaq. 20 Tsay tiempu chayamuptin Israel runakunata y Judá runakunata lapan jutsa rurashqantami perdonashaq. Kawaykar quëdaqkunataqa lapantami perdonashaq. Noqa TAYTA DIOSMI tsayno nï”.
21 TAYTA DIOSMI kayno nin:
“Babilonia nacionpa contrankuna, ¡Merataim particho taqkunata atacapäkuy!
¡Pecod particho taykaqkunatapis asulapäkuy!
¡Tsay partikunacho taqkunata lapanta wanutsipäkuy!
¡Nishqätaqa lapanta rurapäkuy!
22 Intëru Babilonia nacionchömi mantsakuypaq guërrata rurashqan mayakanqa.
Mantsariypaqmi imaykapis ushakanqa.
23 “Martilluwan imaykatapis pakir ushashqannömi maytsay nacionkunata Babilonia runakuna ushashqa.*
Kananqa kikin Babilonia nacionpis ushakanqami.
Babilonia ushakashqanta rikarmi maytsay nación runakuna fiyupa espantashqa rikakunqa.
24 “Babilonia runakuna, qamkunata castigarmi toqlata* churapashqä.
Mana tantiyakuypami tsay toqlaman yaykushqanki.
Rabyatsimashqaykipitami manyashqatano contraykikuna tsarishushqanki.
25 “Guërra armäkuna churaräkunantami kicharishqä.
Wanutsikuq kaq armäkunatami tsaypita jorqamushqä.
Yarpashqänölami Babilonia* nacionta castigashaq.
Lapanta mandaq TAYTA DIOS karmi tsayno rurashaq.
26 “¡Karupita shamuq soldädukuna, Babilonia runakunata atacapäkuy!
¡Pirwankunatapis ushakätsiy!
¡Nacionnin raqälana kananpaq lapanta ushakätsiy!
¡Ama imapis markankunacho putsütsuntsu!
27 ¡Soldädunkunatapis lapanta wanutsipäkuy!
Paykunata castiganäpaq kaq junaq chayamushqanami.
28 “¡Shumaq mayapäkuy!
Babiloniapita Siónman qeshpimuq runakunami wilakurkaykan Babilonia runakunata tumanta kutitsishqäta.
Templüta ushakätsishqanpitami Babilonia runakunata tumanta kutitsishqä.
29 “¡Babiloniata atacanaykipaq flëchawan flëchaqkunata shuntapäkuy!
¡Pipis mana qeshpinanpaq intëru marka kuchunpa tsapapäkuy!
¡Rurashqanman tupu tumanta kutitsipäkuy!*
¡Jukta nakatsishqannöla paykunatapis nakatsipäkuy!
Paykunaqa conträmi sharkushqa.
Noqaqa Israel runakunapa *santu TAYTA DIOSNINMI kaykä.
30 Castigaptïmi lapan mözukuna cällikunacho wanushqa jitarpanqa.
Tsay junaqmi lapan Babilonia soldädukunapis wanunqa.
Noqa TAYTA DIOSMI tsayno nï.
31 “Lapanta mandaq TAYTA DIOS karmi kayno nï:
Mana cäsukuq runakuna, qamkunapa contraykimi kaykä.
Qamkunata castiganäpaq kaq junaq chayamushqanami.
32 Qamkunaqa pasaypami nakankipaq.
Nakaptikipis manami pipis yanapashunkipaqtsu.
Lapan markaykikunata ninawan rupatsiptïmi nawpan chakrakunatapis chipyaq rupar ushanqa”.
33 Lapanta mandaq TAYTA DIOS kaynömi nin:
“Israel runakunata y Judá runakunata Babilonia runakuna fiyupami nakaykätsin.
Paykunata prësu tsarirkur manami kachariyta munapäkuntsu.
34 Tsayno kaptinpis noqaqa paykunapa munayniyuq salvadorninmi kaykä.
Jutïpis lapanta mandaq TAYTA DIOSMI kaykan.
Munaynïwan jorqamurmi jawka kawananpaq nacionninman kutitsishaq.
Babilonia runakunatami itsanqa pasaypa castigashaq”.
35 TAYTA DIOSMI kayno nin:
“¡Babilonia markakunacho guërrala katsun!
¡Mandaqninkunapaq y yachaq runakunapaqpis guërrala katsun!
36 ¡Rikakuqninkunapis guërrawan löcutätsun!
¡Soldädunkunapis guërrawan mantsakur siksikyätsun!
37 ¡Cawallunkunatapis y carrëtankunatapis guërracho ushakätsitsun!
¡Babiloniata yanapaq juk lädu soldädukunapis warmino mantsakäritsun!
¡Babilonia runakunapa imaykantapis apakäritsun!
38 ¡Babiloniacho mayukunapis tsakitsun!
Lapanpis tsayno pasatsun intëru Babiloniacho ïdulukuna kashqanpita.
Tsay melanaypaq ïdulukunaman yärakurmi mana alikunata rurarkaykan.
39 “Babilonia ushakaptinmi munti uywakunala, chacalkunala y *avestruzkunala tsaycho tanqapaq.*
Tsaycho mananami imaypis wayita ni markatapis sharkatsinqanatsu.
40 Sodoma, Gomorra y nawpankunacho kaykaq markakuna ushakashqannömi* ushakanqa.
Tsayno ushakätsiptïmi Babilonia nacioncho pipis mana tanqanatsu.*
Noqa TAYTA DIOSMI tsayno nï.
41 “Norti kaq lädu munayniyuq nacionpita shamunanpaqmi soldädukunapis y reykunapis kamarikurkaykan.
Pasaypa karupitami shapäkamunqa.
42 Paykunaqa flëchata y espädata kamarikushqami karkaykan.
Pasaypa fiyu karmi pitapis mana kuyapantsu.
Pelyananpaq qaparashqanpis lamar yaku qaparaqnöraqmi mayakan.
Cawallun muntashqalanami guërrata rurananpaq karkaykan.
¡Babilonia runakuna, atacashunaykipaqmi shapäkamunqa!
43 Tsayta mayaykurmi Babilonia nacionpa mandaqnin rey mantsakashqa rikakunqa.
Qeshyaq warmita wachay nanay tsariqnömi pasaypa lakikuy tsarinqa.*
44 “Jordán mayu kuchun muntipita yarqamuq leonnömi kashaq.
Ali qewacho mikuykaq uywata tsariq leonnömi noqapis elaqpita castigashaq.
Tsaymi Babilonia runakuna mantsakashpan qeshpir aywakärinqa.
Nirkurnami akrashqä runata mandaqnin rey kananpaq churashaq.
¿Piraq noqano kanman?
¿Piraq noqawan churakanman?
¿Pï autoridäraq noqata ichipämanman?
45 “Babilonia runakunapaq wilakatsishqäta lapayki mayapäkuy.
Babiloniacho taqkunata castiganäpaq nishqäta shumaq mayapäkuy.
Tsaycho taqkunata wamrantintami prësu apakärinqa.
Intëru naciontami pasaypa ushakashqata kacharinqa.
46 Babilonia marka tsayno ushakaptinmi maytsaychöpis patsa kuyunqa.
Fiyupa qaparpashqanpis maytsay nacionmanmi mayakanqa”.*