Lamentaciones
Kimsa kaq poesía
Álef
3 Tayta Dios rabyakushpan castigamaptinmi fiyupa nakashqä.
2 Atski kashqanpa pushamänanpa trukan yanawyaykaq tsakaypami pushamashqa.*
3 Yaparir yaparirmi noqataqa castigaykäman.*
Bet
4 Qaräpis* aytsäpis pasaypanami shikrayaykan.
Tulükunatapis lapantanami pakir ushaykan.*
5 Mayman chayaptïpis lakikuylami y nakaylami kaykan.
6 Unayna wanushqatano y tsakäpakushqatanömi kachaykamashqa.*
Guímel
7 Maypapis mana qeshpinäpaqmi wichqaykamashqa.*
Raku cadinakunawanmi wataykamashqa.
8 Yanapamänanpaq ruwakuptïpis manami mayamantsu.*
9 Nänita tsapaqnömi imata rurayta munaptïpis tsapäman.
Nänita juk lädupa jitariqnömi mana ali kawayman churaman.
Dálet
10 Imatapis tsarinanpaq shuyaraykaq ösunömi shuyaraykäman.*
Pakaraykaq leonnömi atacamänanpaq kaykan.
11 Ali nänipa aywaykaqtami pantakätsimashqa.
Puyuypa puyur ushamaqnömi mantsakashqata kachaykamashqa.
12 Flëchakunanwanmi apuntaykamar flëchamashqa.
He
13 Flëchanmi shonqüyaq jatikashqa.*
14 Marka mayïkunapis pasaypami asipäman.
Asikunalanpaqmi jutïtapis joqarkärin.*
15 Fiyupa lakikuylamanmi Tayta Dios churamashqa.
Asqaq ilawrutami uputsimashqapis.*
Vav
16 Rumiwan takarmi kirütapis jorqushqa.
Uchpaman lätakaqpaqmi saqtaramashqa.
17 Noqaqa imaypis lakishqalami kawaykä.
Manami kushikuytapis tarïnatsu.
18 Pasaypa lakikuptïmi TAYTA DIOSMAN yärakushqäpis ushakaqnöna kaykan.
Zayin
19 Tayta Dios, lakikushqäta y fiyupa nakashqäta rikar kuyapaykalämay.
Pasaypa asqaq jachata y venënuta upushqanömi kaykä.
20 Kayjinanpa nakar yarpachakuptï shonqüpis pasaypami lakikun.
21 Tsayno kaptinpis kuyapäkuq kashqaykita tantiyakur qammanmi yärakamü.
Jet
22 TAYTA DIOSQA imaypis kuyamantsimi.
Kuyapäkuq kashqanqa manami ushakantsu.
23 Waran waranmi mana ajayaypa kuyamantsi.
Promitimashqantsitaqa imaypis cumplinmi.*
24 Tsaymi shonqulächo kayno nï:
“TAYTA DIOSLAMI herenciä kaykan.
Paymanmi imaypis yärakushaq”.*
Tet
25 Lapan shonquntsiwan yärakur ruwakuptintsiqa TAYTA DIOS yanapamantsimi.*
26 Tsayno kaptinqa TAYTA DIOS salvamänantsipaq mana ajayaypa shuyaräshun.
27 Mözu kashqantsipita patsa Tayta Dios corrigimashqantsita chaskikushun.
Yod
28 Tayta Dios castigamaptintsiqa upälala chaskikushun.
Runakunapita witikur payta manakushun.
29 Makintsita choqpakurkur qonqurpakuptintsiqa capazchari kuyapämäshunpis.
30 Maqamaptintsipis qaqlantsita kamapäshun.
Imata qayapämaptintsipis upälakushun.*
Caf
31 Tayta Diosqa kacharimashpantsipis yapaymi kuyapämäshun.
32 Castigamashpantsipis kuyapäkuq karmi yanapamäshun.*
33 Shonqun nanaykaptinmi payqa nakatsimantsipis y lakikatsimantsipis.
Lámed
34 Tayta Diosqa rikaykanmi prësukunata nakatsishqanta.
35 Tsaynöpis rikaykanmi pï runata makitsakushqanta.
36 Musyaykanmi demanducho jutsayuqpa favornin sharkushqanta.
Tsayno ruraqkunataqa juzganqami.
Mem
37 Tayta Dios mana kamakätsiptinqa imapis manami pasanmantsu.
38 Jawka kawaypis y nakaypis poderniyuq Tayta Dios niptinraqmi kaykan.*
39 Jutsata rurashqantsipita castigamaptintsipis kawaykarraqqa ¿imanirraq jaqayashwan?
Nun
40 Imano kawashqantsitapis shumaq yarpachakur jutsa rurayta kacharishun.
TAYTA DIOSTA *ashir pay munashqannöna kawashun.
41 Makintsita joqarir jana patsacho kaykaq Tayta Diosta lapan shonquntsiwan kayno nir manakushun:
42 “Nishqaykita mana cäsukurmi jutsata rurapäkushqä.
Tsaymi mana perdonamashqankitsu”.*
Sámej
43 Fiyupa rabyakushpaykimi mana kuyapaypa qati qatiykur wanutsipäkamashqanki.
44 Ruwakamushqäta mana mayanaykipaqmi pukutay rurinman pakakushqanki.
45 Lapan runakunapa nawpanmanmi qanratano jitarimashqanki.
Pe
46 Chikimaqnïkunapis tukuytami qayapäman.
47 Ashipa ashiykur marka mayïkunata wanutsiptin y imaykäkunatapis ushakätsiptinmi mantsakashqa kawapäkü.
48 Kuyashqä markata tsayno ushakätsiptinmi weqïpis mayunöraq aywan.*
Ayin
49 Mana chawaypami waqaykä.
Kushikuytapis manami tarïnatsu 50 jana patsacho kaykaq TAYTA DIOS mana yanapamaptinqa.
51 Jerusalén markächo jipashkuna nakapäkushqanta rikaptïmi shonqüpis pasaypa nanan.
Tsade
52 Achäquita mana ashipaykaptïmi chikimaqnïkuna qatikachämashqa.
Pishquta tsariqnömi prësu tsariyta munamashqa.
53 Kawaykaqtami pözuman jitarpamashqa.
Nirkurmi jatun läja rumiwan tsapashqa.
54 Yaku ultakarkamaptinmi yarparqä wanunäpaqna kashqanta.*
Qof
55 TAYTA DIOS, pözucho winarashpämi jutikita joqarir qamta manakushqä.*
56 Manakamushqäta mayamashqankimi.
Ruwakamushqäta imaypis mayamankimi.
57 Qayakamuptï shamurmi kayno nimashqanki: “Ama mantsakuytsu”.
Resh
58 Tayta Dios, qammi ima desgraciapitapis tsapämashqanki.
Wanuypitapis qammi salvamashqanki.
59 Rikaykankimi imano nakatsimashqantapis.
¡Nakatsimaqkunata castigaykulay!
60 Venganzata ashishqanta y conträ imano sharkushqanta rikashqankimi.
Sin/Shin
61 TAYTA DIOS, mayashqankimi conträkuna imano ashlimashqanta y atacapäkamänanpaq wilanakushqantapis.
62 Wasäta rimaykälarmi conträkunaqa qoyarkunpis.
63 Imachöpis asikunalanpaqmi jutïta joqarkärin.
Lapan nishqantapis shumaq mayaykulay.
Tav
64 TAYTA DIOS, paykunataqa jutsata rurashqanman tupu castigaykulay.
65 Mana tantiyakunanpaq upatakätsishpayki maldicionaykulay.
66 TAYTA DIOS, rabyakushpayki kay patsapita paykunata elqaykatsilay.