Zacarías
Jutsa rurayta kacharinanpaq Tayta Dios nishqan
1 Rey Darío juk wata pusaq killana mandaq kaykänan witsanmi* noqa profëta Zacaríasta* TAYTA DIOS parlapämarqan. Noqa kaykä Berequíaspa tsurin y Iddupa wilkanmi.
2 Tayta Diosmi kayno nimarqan: “Unay Israel runakuna fiyupami rabyanätsimarqan. 3 Kananqa Israel mayikikunata kayno ninki: ‘Lapanta mandaq TAYTA DIOSMI kayno nin: ¡Noqaman kutipäkamuy! Kutipäkamuptikiqa yapaymi yanapashaykipaq.* 4 Unay ayluykikunano chukru shonqu ama kapäkuytsu. Paykunataqa unay profëtakunawanmi wilakatsirqä jutsa rurayta kacharir noqaman kutipäkamunanpaq. Tsayno niykaptïpis manami wiyakärimashqatsu. Noqa TAYTA DIOSMI tsayno nï.
5 “ ‘Tsay ayluykikunapis y profëtakunapis ushakashqanami. 6 Sirvimaqnï profëtakunawan wilakatsishqänölami lapanpis pasashqa. Wilakatsishqäno castigaptïmi jutsankunata kacharir kayno nipäkurqan: “Castigamänantsipaq nishqannölami lapanta mandaq TAYTA DIOSQA mana wiyakushqantsipita castigamashqantsi” ’ ”.
7 Rey Darío mandaq kashqan kimsa watata cumplinanpaq juk killa pishiykaptinmi ishkay chunka chusku (24) junaqcho noqa profëta Zacaríasta TAYTA DIOS yapay parlapämarqan. Tsayqa karqan Sebat killami.*
8 Juk tsakaymi revelacioncho rikarqä puka cawallun muntashqa runata. Tsay runaqa atska arrayán yörakuna kashqan raqrachömi kaykarqan. Qepanchömi karkaykarqan puka, bäyu y yoraq cawallun muntashqa runakuna.*
9 Tsay hörami juk *ángel noqawan parlaykarqan. Paytami kayno tapurqä: “Tayta, ¿pï runakunataq cawallun muntashqa runakuna karkaykan?”
Tapuptïmi kayno nimarqan: “Kanan wilashayki pï kashqantapis”.
10 Tsaymi arrayán kashqancho kaykaq runa kayno nimarqan: “Paykunaqa karkaykan intëru kay patsata rikapakunanpaq TAYTA DIOS kachamushqanmi”.
11 Arrayán yörakunacho kaykaq runaqa TAYTA DIOSPA angilninmi karqan. Tsaymi cawallun muntashqa kaykaqkuna tsay angilta kayno nipäkurqan: “Maytsaypapis purirmi rikapäkushqä runakuna jawka kawarkaykaqta”.
12 Tsawraqa TAYTA DIOSPA angilnin kayno nirqan: “Lapanta mandaq TAYTA DIOS, qanchis chunka (70) watana pasaykaptinpis* ¿jinalaku rabyashqa kaykanki Jerusalén y Judá runakunapita?”
13 Tsayno niptinmi noqawan parlaykaq angilta TAYTA DIOS ali shimilanpa parlaparqan. 14 Tsawraqa tsay ángel kayno wilakunäpaq nimarqan: “Lapanta mandaq TAYTA DIOS kaynömi nin: ‘Jerusalénta y *Sión jirkanta pasaypami kuyä. 15 Tsaymi atacaq nación runakuna jawka kawaykaqta rikar pasaypa rabyaykä. Israel runakunata castigananpaq kachapaykuptïmi paykunaqa aläpana nakatsipäkushqa. 16 Tsaymi noqa TAYTA DIOS kayno nï: Kananqa Jerusalénta kuyapäshaqnami. Yapaymi wayïta y Jerusalén markatapis sharkatsipäkunqa. Noqa lapanta mandaq TAYTA DIOSMI tsayno nï’ ”.
17 Tsaynöpis tsay ángel kayno nimarqan: “Mastapis kayno wilakuy: ‘Lapanta mandaq TAYTA DIOS kaynömi nin: Noqami bendicionnïta churashaq Judá markakunacho imaykapis atska kananpaq. Sión jirkancho taq runakunatapis kuyapäshaqmi. Noqapa kananpaqmi Jerusalén markata yapay shuntashaq’ ”.
Chusku waqrakunata y chusku herrërukunata revelacioncho rikashqan
18 (2.1) Tsaypitanami revelacioncho rikarqä chusku waqrakunata. 19 (2.2) Tsawraqa noqawan parlaykaq *angilta kayno tapurqä: “Tsay waqrakuna ¿imataq kaykan?”
Tsawraqa kayno nimarqan: “Tsay waqrakunaqa kaykan Judá runakunata, Israel runakunata y Jerusalén runakunata maytsaypapis qarquq nacionkunami”.
20 (2.3) Tsaypitanami TAYTA DIOS rikatsimarqan chusku herrërukunata. 21 (2.4) Tsawraqa angilta tapurqä: “¿Imapaqtaq kay herrërukuna shamushqa?”
Tsawraqa kayno nimarqan: “Paykuna shamushqa waqrakunata ushakätsinanpaqmi. Tsay waqrakunaqa karkaykan Judá nación runakunata wakpa kaypa matsipa matsir qarquq nación runakunami. Qarquptinmi Judá runakunaqa pasaypa penqaytukushqa rikakärirqan”.