Isaías
Judá runakuna jutsasapa kashqan
1 Kaychömi qelqaraykan Judá nacioncho y capitalnin Jerusaléncho taykaq runakunapaq Amozpa tsurin Isaíasta Tayta Dios revelashqan. Tsaykunata Tayta Dios revelarqan Judá nacioncho Uzías,* Jotam,* Acaz* y Ezequías* rey kashqan witsanmi.
2 Jana patsapis, kay patsapis, mayapäkuy.
TAYTA DIOSMI kayno nin:
“Awkisyashqanyaqmi wamräkunata kuyar ashmashqä.
Awkisyarkurnami conträ rikakushqa.
3 Törupis ämunta reqinmi.
Bürrupis maycho ämun qarashqanta musyanmi.
Kuyashqä Israel runakunami itsanqa ashmashqätapis mana tantiyakärintsu”.*
4 ¡Wawalaw jutsasapa runakuna, imanöraq kanki!
Qamkunaqa jutsalatami rurarkaykanki.
Jutsa ruraylatami taytaykipis yachatsipäkushunki.
Lutan ruraq runakuna karmi TAYTA DIOSTA mana cäsukärinkitsu.
Israel runakunapa *santu Diosnintami rabyatsishqanki.
5 ¿Imanirtaq mas castigashunaykita munarkaykanki?
¿Imanirtaq kananyaqpis mana cäsukuq karkaykanki?
Tsayjina castigaptïmi umayki rachishqa kaptin juiciuykipis mana kantsu.
6 Chaki puntaykipita uma pukshuykiyaq pasaypa rachishqalami karkaykanki.
Intëru cuerpuykipis qerilanami, qoyuylami y esquywan jakashqami kaykan.
Manami pipis jampishushqankitsu ima jachalawanpis ni emplastuta churapäshushqankitsu.
Nanaykäshushqayki pasananpaq aceitilatapis manami winapäshushqankitsu.*
7 Nacionnikipis chunyaqmi rikakushqa.
Markaykikunatapis rupatsirmi ushashqa.
Rikarpaykaptikimi murushqaykitapis jäpa runakuna apakärin.
Juk lädu nacionpita shamurmi imaykaykikunatapis tarishqan kaqta ushakätsin.
8 *Siónqa üva chakracho y melón chakracho tsuklanömi rikakushqa.
Soldädukuna jiruruypa tsapashqa markano kaptinmi pïninpis yanapananpaq mana kantsu.
9 Lapanta mandaq TAYTA DIOS juk ishkaylatapis kawaykaqta mana kachamaptintsiqa Sodomano y Gomorranömi* ushakashwan karqan.
Jutsa rurayta kacharinanpaq nishqan
10 Sodoma autoridäno kaqkuna,
TAYTA DIOS nishqanta kanan mayapäkuy.
Gomorra runakunano kaqkuna,
Tayta Diosnintsi yachatsishushqaykita cäsukäriy.*
11 TAYTA DIOSMI kayno nin:
“¿Imapaqnataq tsaytsika sacrificiukunata *altarcho rupatsinki?
Carnikunata sacrificiupaq rupatsiptiki ajayashqanami kaykä.
Uywakunapa wiranta altarcho rupatsiptiki ajayashqanami kaykä.
Manami munätsu törukunapa, uyshakunapa ni chïvukunapa yawarninta jichar sacrificiupaq rupatsishqaykita.
12 ¿Imapaqnataq nawpämanpis shapäkamunki?
¿Pitaq nishushqanki templu patiutapis qanratar shapäkamunaykipaq?
13 Tsaki mikuy ofrendakunatapis ¿imapaqnataq apapäkamunki?
Apamuptikipis manakaqlapaqmi kanqa.
Inciensuwan qoshtatsishqaykipis melanätsimanmi.
Lulu killa fiestata rurashqaykipis,
jamay junaqcho jamashqaykipis
y wata wata juntakaykur fiestakunata rurapäkushqaykipis
jutsata ruraptikiqa manami gustamantsu.
14 Lulu killa fiestata rurashqaykitapis y wata wata fiestakunata rurashqaykitapis pasaypanami ajayashqä.
Tsaykunata rikaytapis manami munänatsu.*
15 Makikita joqarkur manakärimaptikipis juk lädupami tikrakurishaq.
Yaparir yaparir manakärimaptikipis manami wiyashaykitsu.
Qamkunami runakuna wanunanpaqpis jutsayuq karkaykanki.
16 “¡Lushuk lushuk kanaykipaq armakäriy!
¡Lutan ruraykunata kachapäkuyna!
Mana alikunata ama rurapäkuynatsu.
17 Tsaypa trukanqa alitana rurapäkuy.
Demandukunata shumaq juzgapäkuy.
Nakaqkunata yanapay.
Waktsakuna quejakushqanta shumaq arreglapäkuy.
Viüdakunatapis yanapay”.*
18 TAYTA DIOSMI kayno nin:
“Jutsata rurashqaykita perdonanäpaq kanan parlashun.
Jutsaykikuna pukano kaptinpis rajunöraqmi yoraq kankipaq.
Granätiman tinishqano kaptinpis yoraq milwanöraqmi kankipaq.
19 Nishqäta cäsukurqa chakraykicho mikuy wayuqtapis alinnin kaqtami mikupäkunkipaq.
20 Mana cäsukuq kashpaykimi itsanqa guërracho espädawan wanupäkunkipaq”.
TAYTA DIOSMI tsayno nin.
Jerusalénta Tayta Dios juzgananpaq nishqan
21 Jerusalén marka, Diosta cäsukuq kaykarqa ¿imanöpataq *wayrapakuq warmino rikakushqanki?
Wayrapakuq warmi atska runawan kakushqannömi qampis atska dioskunata sirvishqanki.*
Nawpataqa leynïkunata cäsukur pïmaytapis yanaparmi kawarqayki.
Kananqa wanutsikuqmanmi tikrashqanki.
22 Ali qellayno kashqa karpis kananqa mana väliq qellaynömi kaykanki.
Ali vïnuno kashqa karpis kananqa yakun yapashqa vïnunömi kaykanki.
23 Autoridänikikunapis Tayta Diosta manami cäsukärintsu.
Suwakuqkunata jananparmi sobornuta chaskipakun.
Ima demandulatapis arreglananpaqmi cobrapäkun.
Waktsakunata manami respitatsintsu.
Viüdakuna demandakuptinpis manami cäsupäkuntsu.
24 Tsaymi lapanta mandaq TAYTA DIOS kayno nin:
“Aläpanami rabyatsimashqanki.
Mana cäsukamaq kaqtaqa lapaykitami castigashayki.
Conträ sharkuq kaqtaqa lapaykitami ushakätsishayki.
25 Makïtaqa lapaykimi apapäkunkipaq.
Qanra kashqaykitapis lijyawan maylaqnömi maylashayki.
Limpiu kanaykipaq lapan qanraykitami jorqushaq.
26 “Tsaymi unay jueznikikuna ali kashqanno kananpis ali jueznikikuna kanqa.
Tantiyatsishuqnikikunapis unay kashqannömi kananpis ali kanqa.
Jerusalénpaq kaynömi nipäkunqa:
‘Jerusalénchöqa ali ruraq runakunami karkaykan.
Tsaychöqa Tayta Dios munashqannömi kawarkaykan’ ”.*
27 Promitishqannölami *Sión runakunata* Tayta Dios salvanqa.
Jutsa rurashqanta kacharir cäsukuptinqa paykunata manami ushakätsinqanatsu.
28 Mana cäsukuqkuna y jutsata ruraqkunami itsanqa wanupäkunqa.
TAYTA DIOSTA mana cäsukuqkunaqa lapanmi ushakanqa.
29 Jerusalén runakuna, encina yörakuna sikincho y huertakunachöpis ïdulukunata adorashqaykipitami penqakärinkipaq.
Kuyashqayki ïdulukunata adorapäkushqaykipitami penqakur pukayashqa uysurankipaq.
30 Tayta Dios castigashuptiki qarwashtaykaq encina yörano y yakunpita tsakiykaq huertanömi kankipaq.
31 Tsaki oqshata nina ushashqannömi kalpayuq runatapis Tayta Dios ushakätsinqa.
Nina imatapis rupar ushashqannömi lapan rurashqantawan tsay runata ushakätsinqa.