10. YARACUYPAJ CANQUIMAN

¿CAYGA IMA NINANTAJ?

Pipis yaracuypaj captinga, parlashgantami cumplin y imaypis rasun cajta parlan. Chaymi taytancuna, amiguncuna y patrunninpis payman yaracamun.

¿IMANIRTAJ CHAYTA RURANQUIMAN?

Yaracuypaj runa captiquiga, manana pipis contrulashunquinachu, imaypis ali cajta ruranayquipaj yarpapäcunga.

Juc jipash nin: “Taytayquicuna gamman yaracamunanpäga may chaycho captiquipis ali portacunquiman, manami paycunalawan caycarmi alita ruranquiman”.

BIBLIAGA NIN: “Yachachishänölla alli cawashayquita ricashushpayquimi runacuna tantiyanga Tayta Diosninchi munashanno cawaycashayquita” (1 Timoteo 4:15, Tayta Diosninchi Isquirbichishan).

¿IMATARAJ RURANQUIMAN?

Gatejnin caj yachachicuycuna yanapäshunqui taytayquicuna gamman yaracamunanpaj.

Rasun cajta parlay. Lulacuptiquiga, manana pipis gamman yaracamunganachu. Pero pantarcuptiquipis, honrado cashpayqui rasun cajta niptiquiga, waquincuna gamman yaracamunga.

Juc mozo nin: “Öraga convienishuptiquiraj rasun cajta wilanqui, pero pantashgayquipita pengaycho quedacunayquipaj cashganta musyarpis rasun cajta wilaptiquiga más alimi, waquincuna gamman masraj yaracamunga”.

BIBLIAGA NIN: “Nogacunapis pay [o Dios] munashannömi cawayta munä” (Hebreos 13:18, TDI).

Ruranayquipaj cajta cumpliy. Trabajadurcunata contrataj runacuna nipäcun “pipis aruyta munaptinga, ruraynincunawan cumplinman o cumplido canman”. Cananlapita cumplido captiquiga, yanapäshunquimi ali runa canayquipaj.

Juc jipash nin: “Taytäcunaga quiquiläpita imatapis ruranäpaj munan, manami munanchu paycuna yarpächimänantaraj, chayno captinga masraj nogaman yaracamun”.

BIBLIAGA NIN: “Nogaga musyämi nishäpita masta ruranayquipaj cashantapis” (Filemón 21, TDI).

Pacienciacoj canquiman. Pipis jucla mana winanchu, sinoga tiempurämi pasan. Chaymi ama shuyaraychu taytayquicuna gamman rasla yaracamunanpaj, chayga canga ichic ichiclapami.

Brandon jutiyoj mozo nin: “Taytayquicuna y waquin runacunapis gammanga manami jucla yaracamungachu, pero imaypis rurayniquicunata cumpliptiquiga, paycuna gamman walca walcalapa yaracamunga”.

BIBLIAGA NIN: “Imapitapis pacienciakäriy” (Colosenses 3:12).