41 CAJ YACHACHICUY
108 CAJ CANCIÓN ¡Cuyacoj, cuyacoj Jehová!
Jehovapa cuyacuyninga manami imaypis ushacanchu
“ Alilata ruraq kashqanpita TAYTA DIOSTA agradëcikäriy. Kuyapäkuyninqa manami imaypis ushakantsu” (SAL. 136:1).
¿IMATATAJ YACHACUSHUN?
Bibliaga yachachimanchi Jehová alapa cuyamashganchita, cayman yarpaptinchega yanapämäshun imayca problemacuna captinpis mana laquishgala cacunanchipaj.
1, 2. Imayca nacaycunapa pasar, ¿imanotaj sienticärin waquin hermanunchicuna?
JUC BARCO lamarpa viajipa aywashgancho ilajpita wayra alapa pücamuptin chay buquita manejaj runaga, lasaj cadenata lamarpa rurinman jitapäcunan, wayra buquita mana cuyuchinanpaj.
2 Ayvecis imayca problemacunapa pasar lamarcho caycaj buquita wayra cuyuchishgannomi sienticunchi. Nacaypa pasashganchiraycu capazchi juc junaj ali caycanchi y juc junajna laquishga sienticunchi. Juc junaj ‘Jehová yanapäman y cuyaman’ nir yarpashwan pero juc junajna ‘Jehová yanapämanchu ni cuyamanpischu’ nir yarpashwanpis (Sal. 10:1; 13:1). Capazchi laquishga caycashganchi hora maygan amigunchipis cuyacuywan shacyächimanchi, chaypitana alila sienticunchi (Prov. 17:17; 25:11). Chayno captinpis capaz nircur yapay yarpachacush caycashwan, ‘Jehová yanapämanchu ni cuyamanpischu’ nir. Chauraga nacaypa pasarga, ¿imata yanapämashwan Jehová cuyamashganchita convencido caycänanchipaj?
3. Salmo 31:7 y 136:1 textucunacho, ¿imata tantiachimanchi Jehovapa cuyacuyninpita? (Fotutapis ricay).
3 Imayca problemacunapa pasaptiqui ama gongaychu ‘Jehová cuyashunqui, manami jaguishunquichu’ (leiriy Salmo 31:7; 136:1). Bibliaga tantiachimanchi Jehová Diospa “kuyapäkuyninqa manami imaypis ushakantsu”. Paylami sirvejnincunata amatar cuyan, chaymi Bibliapis nin Jehovalami ‘pasaypa kuyakuq kashganta’ (Éx. 34:6, 7; Sal. 86:5). Cay textucuna yarpächimanchi ¡Jehová cuyamashpanchimi yäracoj sirvejnincunata mana imaypis jaguimäshunchu! Jehová chayno cuyamashganchiman yarpaptinchega yanapämäshun imayca pruebacunata aguantananchipaj (Sal. 23:4).
Juc buquita shucucuy wayra mana cuyuchinanpaj chararaj anclata lamarpa rurinman jitapäcun. Chaynola nacaycunapa pasar Jehovapa cuyacuyninpita seguro caycarga juc anclanomi canga Jehovata cushish sirvinanchipaj. (3 caj parrafuta ricay).
BIBLIAGA YACHACHIMANCHI JEHOVÁ ALAPA CUYAMASHGANCHITA
4. 1) ¿Imata Bibliapita yachacushcanqui? 2) Pipis Bibliapita yachacushganman manana creinayquipaj nishuptiqui, ¿cäsupanquimanchu?
4 Bibliacho yachacushcanchi Jehová alapa cuyamashganchita, chayman yarparga imayca problemacunapa pasaptinchi yanapämäshun. ¿Imataj Bibliacho yachacushcanchi? Yachacushcanchi Diospa jutin Jehová cashganta, Jesús Jehovapa churin cashganta, wanojcuna mana imatapis rurashganta y cay pacha shumaj paraíso ticrananpaj imaycamayajpis cawacunanchipaj (Sal. 83:18; Ecl. 9:5; Juan 3:16; Apoc. 21:3, 4). Chauraga, pipis Bibliapita yachacushganman manana creinayquipaj nishuptiqui, ¿cäsupanquimanchu? Manami, gam convencido caycanqui Bibliapita yachacushgayquita. Chaynolami Bibliacho yachacushgayqui Jehová cuyashushgayquita y chaypita seguro caycarga manami yarpanquichu ‘Jehová manami cuyamanchu’ nir. Cananga chaypita maslata yachacushun.
5. ¿Imatataj rurashcanqui luta yachachicuycunaman manana creinayquipaj?
5 Bibliata yachacushgayqui wichan, ¿imatataj rurashcanqui luta yachachicuycunaman manana creinayquipaj? Unay religiunniquicho yachacushgayquipita tincuchicushgayquichi Bibliapa yachachicuynincunawan. Manaraj Bibliapita yachacur gam yarpashganquichi Jesús Dioswan igual cashganta pero Bibliata shumaj yachacur y tantiarcur cuentata gocushgayqui chayno mana rasun cashganta, más bienga yachacushgayqui Jesús Diospa churin cashganta (Col. 1:15; Juan 3:18). Chauraga shongunchipita luta yachachicuycunata jorgunanchipaj manami facilchu canman (2 Cor. 10:4, 5). Pero Bibliapita rasunpa cajta yachacushgayquita seguro caycar mananami luta yachachicuycunaman creinquimanchu (Filip. 3:13).
6. ¿Imanirtaj Salmo 136 capitulucho achca cuti nin ‘Jehovapa kuyapäkuyninqa manami imaypis ushakantsu’?
6 Imayca problemacunapa pasaptiqui capaz yarpanquichi ‘Jehová manami cuyamanchu’ nir, chay hora Bibliacho yachacushganman yarpay. Jehová munargan sirvejnincuna paycunata alapa cuyashganta musyananpaj chaymi Salmo 136 capitulucho 26 cuti nin ‘Jehovapa kuyapäkuyninqa manami imaypis ushakantsu’. Bibliaga claro yachachimanchi Jehová alapa cuyamashganchita, y Diospa Palabran chayno niptin rasunpami. Chauraga Jehová mana cuyashushgayquita yarparga manami rasunchu, chayno yarparga luta yachachicuynomi caycan, chaymi ‘Jehová mana cuyamanchu’ nir ama yarpanquichu.
7. ¿Maygan textucunachotaj nimanchi Jehová alapa cuyamashganchita?
7 Bibliacho achca textuncuna nimanchi Jehová amatar cuyamashganchita. Yachacushun waquin textucunapita. Jesús discipuluncunata cayno nergan: “Qamkunaqa tsaytsika pishqupitapis masmi välipäkunki” (Mat. 10:31). Yarpay Jesús manami nerganchu ‘capazchi pishgupitapis más valinqui’ nir. Y Jehová cayno nir aunimashganchi: “Kalpaykikuna kananpaqmi imaypis yanapashayki. Alawqa kaq makïwanmi imaypis jancharäshayki” (Is. 41:10) Payga manami nerganchu ‘capazchi yanapäshayqui’ nir, Jehová yanapämänanchipaj nimaptinchi rasunpami, manami ardelächu parlan. Chauraga imayca problemacunapa pasar capazchi ‘Jehová manami cuyamanchu’ nir yarpaptiqui cay textucunaman yarpachacuy Jehová cuyashushgayquita convencido caycänayquipaj. Y Jehovata wilapay imano sienticushgayquita ali caycänayquipaj. Caycunata ruraptiqui unay cristianucunanopis ninquiman: “Tayta Dios kuyamashqantsita musyarmi payman yärakuykantsi. Tayta Diosqa kuyakuqmi kaykan” (1 Juan 4:16).a
8. ‘Jehová manami cuyamanchu’ nir yarparaycaptiquiraj, ¿imata más ruranquiman?
8 Caycunata rurarpis ‘Jehová manami cuyamanchu’ nir yarparaycaptiquiraj, ¿imata más ruranquiman? Imano sienticushgayquiman ama yarparäcuychu sinoga Biblia yachachishganman yarpay. Biblia yachachimanchi Jehová amatar cuyamashganchita y Bibliaga rasunpa cajta yachachimanchi. Chauraga ‘quevä Jehová cuyamangachu’ nir yarpaptinchi lutanta yarpashwan y Jehová mana cuyacoj cashganta yarpashwanpis (1 Juan 4:8).
JEHOVÁ CUYAMASHGANCHIMAN YARPANANCHI
9, 10. Juan 16:26, 27 textupita, ¿imata yachacunchi? (Fotutapis ricay).
9 Jehová cuyamashganchipita seguro caycänanchipaj Jesús nishganman yarpänanchi, pay discipuluncunata nergan: ‘Gamcunata quiquin Tayta Dios cuyashunqui’ (leiriy Juan 16:26, 27, TDI). ¿Jesús discipuluncunata cayta nergan ali sienticärinanpaj? Manami. Cay textucunacho parlargan Jehovata mañacunanpaj.
10 Jesús discipuluncunata manami yachacherganchu payta mañacunanpaj sinoga paypa jutincho taytanta mañacunanpaj (Juan 16:23, 24). Chaypitaga discipuluncuna claro tantianan cargan. Paycuna Jesuswan purir shumaj reguirgan y cuyashgantapis ricargan. Capazchi paycuna yarpanman cargan ‘Jesusta mañacuptinchi paymi wiyamäshun y mañacushganchita Taytanta wilapanga’ nir, pero yarpashganga lutanta yarpanman cargan. Chaymi Jesús mañacushganpita parlar discipuluncunata nergan: ‘Gamcunata quiquin Tayta Dios cuyashunqui’ nir. Aumi, Biblia nishganno noganchitapis Jehová alapa cuyamashpanchi mañacuyninchita wiyan. Y Bibliata yachacur Jesusta reguishcanchi y cuyar galaycushcanchi (Juan 14:21). Pero naupa tiempo Jesuspa discipuluncunano noganchipis Jehová cuyamashganchita y wiyamashganchita seguro caycar paylata mañacunanchi (1 Juan 5:14).
Gamtaga “quiquin Tayta Dios cuyashunqui”, mana manchacur payta mañacuy. (9 y 10 caj parrafucunata ricay).b
IMANIRTAJ JEHOVÁ CUYAMASHGANCHIPITA DUDASHWAN
11. ¿Imanirtaj Satanás cushicun Jehová mana cuyamashganchipita yarpaptinchi?
11 Bibliaga nin “diabluqa mikanashqa leonnömi” caycashganta, payga munaycan Jehová mana cuyamashganchita yarpänanchipaj (1 Ped. 5:8). Jehová alapa cuyamashpanchi wamranta noganchiraycu wanunanpaj cachamuptinpis Satanás yarpachimashwan ‘manami merecëchu nogapaj Jesús wanushganta’ nir (Heb. 2:9). ¿Imanirtaj chayno yarpänanchita Satanás munan? Satanás Jehovapa favorninta ogrargan, paytaga Jehová manana cuyannachu. Chaymi payga cushicun Jehová mana cuyamashganchita yarpaptinchi y imayca problemacunapa pasar payta sirviyta jaguiriptinchi. Pero Satanás nishganga manami rasunchu, noganchita Jehová alapa cuyamanchi (Efes. 6:11). Chayta musyar yanapämanchi Diabluta mana cäsucunanchipaj (Sant. 4:7).
12, 13. Juchayoj cashganchiraycu, ¿imanotaj sienticushwan?
12 Satanás Jehová mana cuyamashganchita yarpänanchipaj munaptinpis, quiquinchimi juchayoj carga Jehová cuyamashganchita dudashwan (Sal. 51:5; Rom. 5:12). ¿Imanir? Juchayoj cashganchiraycu Jehovapita carupacushcanchi, jina shongunchi, yarpayninchi y cuerpunchipis däñashga caycan, chaymi ayvecis mana alicunata yarpar mana ali sienticunchi.
13 Chayga pasamashwan juchata ruraptinchi o yurishganchipita pantaj runa cashganchiman yarparaptinchi. Chay hora capaz pasaypa laquicushwan, yarpachacushwan, pengacushwan o culpayojpis sienticushwan (Rom. 8:20, 21). Cayman yarpäshun: juc carrupa jucnin llantan bajash captin manami shumajchu purin. Chaynolami juchayoj cashganchiraycu ayvecis Jehová munashganta cumpliyta puedinchichu chaymi dudashwan Jehová cuyamashganchita. Gampis chayno yarpaptiqui, ama gongaychu, Taytalanchi Jehová lapanpaj munayniyoj carpis cuyajnincunata y mandamientuncunata cumplejcunataga imaypis cuyan (Neh. 1:5).
14. ¿Imanirtaj noganchiraycu Jesús wanushganman yarpänanchi? (Romanos 5:8; “Juchayoj carpis cuidacuy mana alita mana yarparänayquipaj” nishgan recuadrutapis ricay).
14 Juchayoj cashganchiraycu imayca alicunata ruraptinchipis manami merecinchichu Jehová cuyamänanchipaj. Chayno captinpis pay alapami cuyamanchi, hasta cuyashgan wamranta cachamurgan noganchipaj wanur juchanchipita libramänanchipaj. Chauraga ‘noga Jehovapa cuyayninta manami merecëchu’ nir yarpaptinchi ama gongashwanchu Jehová cuyamashpanchi imaycata rurashganta (1 Juan 4:10). Chay horapis yarpänanchi Jesús manami juchaynaj runacunapaj wanushganta, sinoga juchasapa runacunapämi (leiriy Romanos 5:8). Chauraga juchayoj cashganchiraycu Jehová mana cuyamashganchita yarpaptinchipis, cayman yarpäshun: Jehová alpalapita cashganchita musyar manami shuyaranchu ali cajcunalata rurananchipaj. Caycunata shumaj tantiar masraj calpachacushun Jehovapa cuyacuyninpita mana dudananchipaj (Rom. 7:24, 25).
JEHOVATA MANA JAGUIYPA SIRVISHUN
15, 16. Jehovata mana jaguiypa sirviptinchi, ¿imapita seguro caycanchi? (2 Samuel 22:26).
15 Imayca problemacunapa pasaptinchipis, Jehovaman yäracur payta cäsucunanchi (Deut. 30:19, 20). Y payta mana jaguiypa sirviptinchi paypis manami cacharimäshunchu (leiriy 2 Samuel 22:26).
16 Yachacushganchino imayca problemacunapa pasaptinchi manami gongashwanchu Jehová alapa cuyamashganchita, payga imaypis listumi caycanga yanapämänanchipaj. Chauraga Jehová mana cuyamashganchita yarpaptinchi manami laquish o yarpachacular cacushunchu, chaypa trucan imaypis yarpäshun Bibliacho yachacushganchita Jehová alapa cuyamashganchita. Aumi, Biblia nishganno lapan shongunchiwan yäracunchi Jehovapa cuyacuyninga manami imaypis ushacanchu.
159 CAJ CANCIÓN Taytalanchi Jehovata alabashun
a Jehová alapa cuyamashganchita cay textucunachopis wilamanchi Deuteronomio 31:8, Salmo 94:14 y Isaías 49:15.
b FOTUCUNAPA WILACUYNIN: Juc hermano Jehovata mañacuycan gueshyaj warminta shumaj cuidananpaj, guellayninta shumaj utilizananpaj y wamrantapis Jehovapita shumaj yachachinanpaj.