Rasunpa cuyashga ricacärergan

YOMARA tiyargan Marcelo y Hiber turincunawan Guatemala naciunpa juc marcancho. Yomara jipashga Biblia estudiayta galaycurgan Jehovapa testiguncunawan y ishcay turincunapis. Ichanga paycunaga quimsanmi gapra cargan, brailletapis leiyta yacharganchu, chaymi librutawan Bibliataga yachachejninraj leipaj.

Reuniunman aywananpäpis sasarämi cargan, Jehovata aduranapaj wasi caruchoraj cashganraycur quiquilancuna aywayta puedipäcojchu, chaymi hermanucuna trucanacuyparaj reuniunman apapäcoj. Chay reuniuncunacho quimsan comentayta munapäcuptin hermanunchicuna yanapargan comentariuncunata umachicurcunanpaj.

Mayo quilla 2019 watacho Jehovapa testiguncuna reuniun rurayta galaycärergan paycunapa marcalancho. Y juc matrimonio precursorcuna chay marcaman aywashga cargan yanapacärinanpaj, paycuna mayraj calpachacärishga Yomara turincunatawan yanapänanpaj braille nishgancho leinanpaj y escribinanpäpis. Braille nishganta mana yacharpis chay matrimoniuga mayraj calpachacärergan bibliotecaman aywaycur yachacärinanpaj braille nishganpita.

Walca quillacunala pasariptin Yomara turincunawan braille nishgancho leiyta puedipäcurgan y chayraycur Jehovalata sirviyta munapäcurgan.a Cananga Yomara, Marcelo, Hiver quimsancuna precursor regularno yanapacärin, y Marceluga siervo ministerialno yanapacuycan. Semanacho achca horacunami predicapäcun y imano Diosta sirvishganta ricaycurga, noganchipis chaynola rurayta munanchi.

Paycunaga alapami agradecicärin congregaciuncho hermanunchicuna imano cuyacuywan yanapacärishganpita. Yomara nin: “Hermanucuna reguimashganchipitami shongupita cuyamashganchita ricargä”. Marcelupis cayta nin: “Congregaciunchoga cuyacoj ali amigucunatami tarishcanchi y entero munducho hermanunchicunaga cuyanacushganchiraycurmi juc castanola ricacunchi”. Yomara y ishcay turincuna pasaypami ricayta munayculan cay Pacha imano cuyaylapaj ticraptin (Sal. 37:10, 11; Is. 35:5).