Abril

¿La tajin kojqʼax pa jun kʼax? Weneʼ jun qachalal pa ri congregación ubʼanom jun kʼax chqe (Sant. 3:2). O weneʼ ri e qachiʼl pa ri tijobʼal o pa ri chak kkitzeʼj qawach o kojkiyoqʼo rumal che kqapatanij ri Jehová (1 Ped. 4:3, 4). Y ¿la tajin kqariq kʼax rumal che ri e qachalaxik kkaj che kqaya kan bʼenam pa ri e riqbʼal ibʼ o kkaj che kqatzijoj ta chi ri utzij ri Dios? (Mat. 10:35, 36). We ri tajin kqakʼulmaj sibʼalaj kubʼan kʼax chqe, weneʼ kpe pa qachomanik kqaya kan upatanixik ri Jehová. Are kʼu qas qetaʼm che apastaneʼ ri kʼax kqariqo, ri Jehová kuya na qanojibʼal y qachuqʼabʼ rech kqachʼijo. Ri Jehová xubʼano che xtzʼibʼax kan pa ri Biblia ri kʼax che xkiriq ri winaq ojer y ri xkibʼan che uchʼijik. Xubʼano che xtzʼibʼax kanoq rech kʼo kqetaʼmaj chrij. Are laʼ ri xutzʼibʼaj kan ri apóstol Pablo rukʼ ri utobʼanik ri Dios. Usikʼixik kiwach ri e kʼutbʼal riʼ kkiya kubʼsal qakʼuʼx y qeyebʼal. Are kʼu, rech kqariq wariʼ xaq xiw ta kqasikʼij uwach ri Biblia. Rajawaxik kqaya bʼe che ri kqasikʼij uwach kukʼex ri qachomanik y kopan pa ri qanimaʼ. w21.03 14 párrs. 1, 2

¿E ri oj? ¿Jas kqachomaj chkij ri e winaq che kqatzijoj ri utzalaj taq tzij chke? ¿La kqachomaj che xaq e junam rukʼ ri e tikoʼn che utz chik kyak uwach? We jeʼ kqachomaj wariʼ, kqabʼan oxibʼ jastaq. Nabʼe, rajawaxik chanim kqaya ubʼixik ri utzalaj taq tzij. Junam rukʼ ri tikoʼn che xa jubʼiqʼ tiempo kʼolik rech kyak uwach, rajawaxik utz kbʼan che ukojik ri tiempo. Ukabʼ, kojkikotik che kojtobʼan che ubʼanik wajun chak riʼ. Ri Biblia kubʼij: «Konojel kekikot chwach la jachaʼ ri uqʼijol ri qʼatoj» (Is. 9:3). Xuqujeʼ, urox, kqachomaj che ri e winaq pa ri petinaq keʼux na utijoxelabʼ ri Jesús, rumal laʼ are chqabʼij ri jastaq che ri winaq kkaj kketaʼmaj. Weneʼ ri utijoxelabʼ xkichomaj che ri samaritanos kkikʼex ta ri kikʼaslemal, are kʼu Jesús jeʼ ta xuchomaj. Xaneʼ, xuchomaj che keʼux tijoxelabʼ pa ri petinaq. Rajawaxik che jelaʼ kqabʼan che kilik ri e winaq che e kʼo pa ri qaterritorio. Ri apóstol Pablo xuya kan jun utzalaj kʼutbʼal chqawach. Areʼ retaʼm jubʼiqʼ chrij ri kikojonik ri e winaq che ketatabʼenik. Kuchʼobʼ ri kajwataj chke. Xuqujeʼ, xuchomaj che pa ri petinaq keʼux na utijoxelabʼ ri Jesús. w20.04 8, 9 párrs. 3, 4

Chqakojoʼ qachuqʼabʼ che uchʼobʼik ri kunaʼ jun winaq, chanim ta kqaqʼat tzij pa uwiʼ. Xaq xiw ri Jehová qas kuchʼobʼ ri kojriqitaj wi. Rumal laʼ chqataʼ che, che kojutoʼ che rilik ri utz taq bʼantajik che areʼ kril chke ri nikʼaj chik xuqujeʼ ri kqabʼan che ukʼutik che kojok il chke. Kojkun taj kqachaʼ e jachin ri qachalal taqal chke kqakʼut wi utzilal. Konojel kkiriq kʼax, che weneʼ kjunamataj rukʼ ri xkiriq Jonás, Elías, Agar xuqujeʼ Lot. Weneʼ jujun chke xa xkitzukuj ri kʼax kkiriqo. Are kʼu, chqachomaj, ¿la kʼo ta jumul qabʼanom jastaq che uyaʼom kʼax chqe? Rumal laʼ, utz che ri Jehová kubʼij chqe che kojchoman chrij ri kkinaʼ ri nikʼaj chik (1 Ped. 3:8). Are chiʼ kqabʼan ri kubʼij chqe, kkʼojiʼ jamaril pa ri utzalaj qafamilia che kʼo cho ronojel uwach Ulew. Rumal laʼ, chqakʼutuʼ che kojok il chke ri qachalal xuqujeʼ chel qakʼuʼx chke. w20.04 18, 19 párrs. 15-17

Ri Jesús xuya ri utzalaj kʼutbʼal chrij wariʼ. Rumal laʼ kqakʼutu che kqanimaj ri Jehová are chiʼ kqakoj qachuqʼabʼ che resaxik uwach ri Jesús (Juan 8:29). Rech amaqʼel kojkʼojiʼ pa ri qastzij, rajawaxik qas kqakojo che ri Jehová are ri Dios re ri qastzij xuqujeʼ che ronojel ri kubʼij pa ri uTzij are ri qastzij. Xuqujeʼ rajawaxik che qas kqakojo che Jesús are ri Mesías tzujum. Kimik, kʼi winaq kkikoj taj che Jesús chaʼom rumal ri Dios rech kuqʼat tzij. Juan xubʼij che e kʼi kkaj kkisubʼ ri qas ta kkikoj ri qastzij chrij ri Jehová xuqujeʼ ri Jesús (2 Juan 7-11). Juan xubʼij: «¿Jachin ri bʼanal tzij? Are riʼ ri kubʼij chi ri Jesús man are ta ri Cristo» (1 Juan 2:22). Rech ri winaq kojkisubʼ taj, rajawaxik kqetaʼmaj chrij ri uTzij ri Dios. Jeʼ wariʼ qas kqetaʼmaj uwach ri Jehová xuqujeʼ ri Jesús (Juan 17:3). Rukʼ wariʼ qas kqakojo che oj kʼo pa ri qastzij. w20.07 21 párrs. 4, 5

We kqaj taj kojux jun tzaqibʼal pa kibʼe ri qachalal che tajin kkitij anim, rajawaxik che xaq xiw ta kqabʼan ri kqaj oj (Rom. 14:19-21; 1 Cor. 8:9, 13). Ri tijik anim che kubʼan jun cristiano junam ta rukʼ ri qas utijik anim che kubʼan jun winaq. Rumal che ri kkitij anim kkikoj kichuqʼabʼ che rilik jachin kchʼakanik. Kechoman ta chkij ri nikʼaj chik. Rumal laʼ kkikoj kichuqʼabʼ rech kenabʼej chkiwach ri nikʼaj chik. Are kʼu ri oj cristianos, jeʼ ta kqabʼan kukʼ ri qachalal (Gál. 5:26; 6:4). Ri kqaj are che keqatoʼ konojel rech junam kojopan pa ri meta xuqujeʼ kqariq ri sipanik re ri kʼaslemal. Rumal laʼ, kqakoj qachuqʼabʼ che unimaxik ri pixabʼ che xaq xiw ta kqatzukuj ri kqaj oj, «xaneʼ xuqujeʼ ri utz na chke ri juleʼ chik» (Filip. 2:4). Rumal ri loqʼoqʼebʼal, Jehová kutzujuj che konojel ri kkikʼis utijik anim kkiriq ri sipanik re ri kʼaslemal che kʼo ta ukʼisik, paneʼ pa ri kaj o cho ri uwach Ulew. w20.04 28 párr. 10; 29 párr. 12

Millones cristianos kekʼasiʼ kan pa ri nimalaj kʼax y kekʼojiʼ pa ri kʼakʼ uwach Ulew. Ri achijabʼ ixoqibʼ riʼ kkil na jun chi chʼakanik pa uwiʼ ri kamikal: ri kikʼastajibʼal ri miles de millones winaq che xekam ojer. ¡Are jun tiempo re nimalaj kikotemal! (Hech. 24:15). Y konojel ri keʼux sukʼ che ri Jehová xuqujeʼ kechʼakan na pa uwiʼ ri kamikal che xkechbʼej rumal ri Adán y kekunik kkiriq ri kʼaslemal che kʼo ta ukʼisik. Qonojel ri cristianos re kimik sibʼalaj kqamaltyoxij ri e tzij che xubʼij ri Pablo chke ri cristianos re Corinto chrij ri kʼastajibʼal. Kʼo kʼi utz taq rumal che kqanimaj ri pixabʼ che xuya ri Pablo che rajawaxik amaqʼel kojok il «che ri uchak ri Ajawaxel» (1 Cor. 15:58). We qas kqabʼan ri kubʼij ri Dios y kqakoj qachuqʼabʼ che upatanexik, kqariq na nimalaj utzilal che kojkun taj kqachomaj kimik. Y kqil na che ronojel ri xqabʼan che upatanexik ri Jehová xaq ta loqʼ xqabʼano. w20.12 13 párrs. 16, 17

Ri profecías che kʼo pa Ezequiel 38:10-23; Daniel 2:43-45; 11:44–12:1 xuqujeʼ Apocalipsis 16:13-16, 21 kechʼaw chrij jastaq che kejunamatajik: ri tiempo xuqujeʼ ri e jastaq che kebʼantaj na. We qastzij wariʼ, are waʼ ri jastaq kekʼulmataj na. Pa jun tiempo are chiʼ umajim chi ri nimalaj kʼaxkʼolil, «ri ajawinelabʼ re ronojel ri uwach Ulew» kkimulij na kibʼ (Apoc. 16:13, 14). Ri Biblia kubʼij Gog re ri «ulew Magog» che wajun jupuq qʼatal taq tzij riʼ (Ezeq. 38:2). Ri jupuq qʼatal taq tzij riʼ kkaj kkibʼan kʼax che ri utinamit ri Dios xuqujeʼ kkisachisaj uwach. Ri kkʼulmataj pa wajun tiempo riʼ, ri apóstol Juan xrilo che ktzaq lo nimaʼq taq saqbʼach pa kiwiʼ ri ukʼulel ri Dios. Ri e saqbʼach riʼ weneʼ kchʼaw chrij ri tzij re qʼatoj tzij che kkitzijoj na ri upatanelabʼ ri Jehová ri e tzij riʼ kubʼano che Gog re Magog kubʼan na kʼax che ri utinamit ri Dios rech kusachisaj uwach (Apoc. 16:21). w20.05 15 párrs. 13, 14

Ri ruxlabʼal ri Dios are jun sipanik che rajawaxik nim kqil wi. Más nim kqil wi ri uchuqʼabʼ ri Dios we kojchoman chrij ri tajin kubʼan kimik. Are chiʼ Jesús majaʼ kpaqiʼ pa ri kaj, xubʼij chke ri utijoxelabʼ: «Are taq kʼu chpe ri Ruxlabʼal ri Dios pa iwiʼ, kikʼam na kuinem kixel kʼu na bʼik che uyaʼik qʼalajisanik chwij, [...] cho ronojel ri uwach Ulew» (Hech. 1:8). Rukʼ ri utobʼanik ri ruxlabʼal ri Dios más che ocho millones y medio winaq re jalajoj taq tinamit xeʼux upatanelabʼ ri Jehová. Kʼo jun jeʼlalaj qabʼantajik xuqujeʼ kʼo jamaril chqaxoʼl, rumal che ri ruxlabʼixel ri Dios kojutoʼo rech kkʼojiʼ jun utzalaj qabʼantajik, junam rukʼ ri loqʼoqʼebʼal, ri kikotemal, ri jamaril, ri paciencia, ri amabilidad, ri utzilal, ri kojonik, ri apacibilidad xuqujeʼ ri autocontrol (uqʼatexik ibʼ). Ri e bʼantajik riʼ are «ri uwachinik ri uxlabʼixel» (Gál. 5:22, 23). Qastzij che ri uxlabʼixel are jun sipanik sibʼalaj nim ubʼanik. w20.05 28 párr. 10; 29 párr. 13

Kʼo kʼi kkʼutuwik che qas kqakojo che ri kaminaq kifamiliar o kachiʼl kkichʼobʼ na kiwach chiʼ kekʼastaj loq. Jun kʼutbʼal, rumal ri kʼastajibʼal che kubʼij ri Biblia, kukʼutu che weneʼ ri winaq che kekʼastaj loq ukʼexom ta ri kikaʼybʼal, ri kechʼawik y ri kichomanik. Xuqujeʼ, chnaʼtaj chqe che ri Jesús xubʼij che ri kamikal kjunamataj rukʼ ri waram y ri uwalajisaxik jun winaq pa ri kamikal kjunamataj rukʼ ukʼasuxik jun winaq che waram (Mat. 9:18, 24; Juan 11:11-13). Are chiʼ ri winaq kekʼastaj che waram, ri kekaʼyik, ri kipuqul y ri kichomanik kkʼextaj taj, xaq junam rukʼ are chiʼ xewarik. Chojchoman chrij ri xukʼulmaj ri Lázaro. Are chiʼ ri Jesús xukʼasuj, kaminaq chi kajibʼ qʼij, rumal laʼ tajin kqʼayik. Are kʼu ri e ranabʼ chanim xkichʼobʼ uwach, y qastzij riʼ che areʼ xuqujeʼ xuchʼobʼ kiwach (Juan 11:38-44; 12:1, 2). w20.08 14 párr. 3; 16 párr. 8

Ri Dios junam keril wi ri e chaʼom kebʼe pa ri kaj y ri kekʼojiʼ cho ri uwach Ulew. Junam kubʼan che kiloqʼoqʼexik ri e kebʼ jupuq. Kqabʼij wariʼ, rumal che junam xubʼan che kesaxik pa ri kamikal rukʼ ri tojbʼal mak xuya ri Jesús, ri loqʼalaj uKʼojol. Ri kejunamataj ta wi ri e kebʼ jupuq riʼ are che jalajoj ri keyebʼal, are kʼu rajawaxik konojel keʼux sukʼ che ri Dios y ri Cristo (Sal. 31:23). Y ksach ta chqe che ri Dios junam kubʼan che uyaʼik ri ruxlabʼixel pa kiwiʼ konojel ri upatanelabʼ. Y kkunik kuya ri ruxlabʼixel che kajwataj chke ri upatanelabʼ chkijujunal, apastaneʼ ri keyebʼal. Ri Jehová uyaʼom jun jeʼlikalaj eyebʼal chke ri upatanelabʼ chkijujunal (Jer. 29:11). Ri Unaʼtabʼalil ri ukamikal ri Cristo kuya bʼe chqe qonojel rech nim kqil wi ri Dios y ri Cristo rumal ri kibʼanom pa qawiʼ rech kkʼojiʼ qakʼaslemal kʼo ta ukʼisik. Qastzij wi, chkiwach ri qastzij cristianos ri Unaʼtabʼalil ri ukamikal ri Jesús are ri riqbʼal ibʼ más nim ubʼanik ronojel taq junabʼ. w21.01 18 párr. 16; 19 párr. 19

Ri keʼopan pa ri Unaʼtabʼalil ri ukamikal ri Jesús kkiriq na ri kʼaslemal che kʼo ta ukʼisik pa ri uwach Ulew. Tekʼuriʼ, ¿jasche keʼopanik? Xaq junam rukʼ are chiʼ ri winaq kebʼe pa ri ukʼulanem jun kachiʼl. Keʼopanik rumal che kkaj kkikʼutu che kkiloqʼoqʼej y kkitoʼ ri kekʼulik. Xaq junam, ri winaq che kbʼix nikʼaj chi chij chke keʼopan pa ri Unaʼtabʼalil ri ukamikal ri Jesús rumal che kkaj kkikʼut ri kiloqʼoqʼebʼal y ri kitobʼanik che ri Cristo y chke ri kebʼe pa ri kaj. Xuqujeʼ, rukʼ wariʼ kkikʼutu che kkimaltyoxij ri tojbʼal mak che xuya ri Jesús, ri kbʼanowik che kkiriq ri kʼaslemal che kʼo ta ukʼisik cho ri uwach Ulew. ¿La kʼo chi jun rumal nim ubʼanik che kekʼojiʼ ri kʼiʼalaj winaq pa ri Unaʼtabʼalil ri ukamikal ri Jesús? Kʼolik. Rumal che keniman che ri utaqanik ri Jesús. Are chiʼ ri Jesús xumaj kan ubʼanik wajun riqbʼal ibʼ kukʼ ri sukʼ taq rapóstoles, xubʼij chke: «Chibʼanaʼ waʼ che naʼtabʼal we» (1 Cor. 11:23-26). Rumal laʼ ri jupuq winaq che kbʼix nikʼaj chi chij chke, kʼateʼ kkiya kan ubʼanik ri Unaʼtabʼalil ri ukamikal ri Jesús are chiʼ konojel ri e chaʼom e kʼo chi pa ri kaj. w21.01 17, 18 párrs. 13, 14

Ri loqʼoqʼebʼal kkʼut rukʼ ri kbʼanik, rukʼ ta ri kbʼixik (chajunamisaj rukʼ Santiago 2:17, 26). Jun kʼutbʼal, Jehová kojuloqʼoqʼej (1 Juan 4:19). Y kukʼut ri uloqʼoqʼebʼal chqe rukʼ utzalaj taq tzij che kʼo pa ri Biblia (Sal. 25:10; Rom. 8:38, 39). Are kʼu, xaq xiw ta kukʼut ri uloqʼoqʼebʼal rukʼ ri kubʼij, xaneʼ rukʼ ri kubʼano. Jehová xraj che ri loqʼalaj uKʼojol xuriq kʼax y xkam rumal qech (Juan 3:16). Rumal laʼ qas qetaʼm che kojuloqʼoqʼej. Kqakʼutu che kqaloqʼoqʼej ri Jehová y ri Jesús are chiʼ keqanimaj (Juan 14:15; 1 Juan 5:3). Ri Jesús xuya kan ri taqanik che kqaloqʼoqʼej qibʼ (Juan 13:34, 35). Rumal laʼ rajawaxik che xaq xiw ta kqabʼij chke ri e qachalal che keqaloqʼoqʼej, xaneʼ kqakʼut rukʼ ri kqabʼano (1 Juan 3:18). w21.01 9 párr. 6; 10 párr. 8

Ri keyebʼal ri cristianos che e chaʼom rumal ri uxlabʼixel are che amaqʼel kekʼojiʼ rukʼ ri Jesús xuqujeʼ kkiqʼat tzij rukʼ. Kkil uwach, ketzijon rukʼ xuqujeʼ kkiqʼaxej tiempo rukʼ (Juan 14:2, 3). Ri kekʼojiʼ cho ri uwach Ulew xuqujeʼ kkil ri uloqʼoqʼebʼal xuqujeʼ ri utobʼanik ri Jesús. Paneʼ kkil ta uwach, ri kachilanik rukʼ ri Jesús kubʼan más ko xuqujeʼ kkiriq ri utzilal che kuya na ri Jehová xuqujeʼ ri Jesús chke (Is. 9:6, 7). Are chiʼ kojux rachiʼl ri Jesús, kqariq kʼi taq tewchibʼal. Jun kʼutbʼal, kimik kqil ri uloqʼoqʼebʼal xuqujeʼ ri utobʼanik. Xuqujeʼ, kojkunik kqariq na ri kʼaslemal che kʼo ta ukʼisik. Ri más nim ubʼanik, are che ri qachilanik rukʼ ri Jesús kubʼano che kqariq ri rachilanik ri winaq más nim ubʼanik: ri uTat, Jehová. Are jun nimalaj tewchibʼal che kojux rachiʼl ri Jesús. w20.04 25 párrs. 15, 16

Ri apóstol Pablo xutzʼibʼaj ri ucarta chke ri cristianos re Corinto, che e chaʼom y che kekʼastajisax pa ri kaj. E areʼ «e tastal pa ri Cristo Jesús» y «e sikʼim rech keʼux tastalikalaj taq winaq». Pablo xuqujeʼ xchʼaw chkij «ri xekojon che ri Cristo ri xekamik» (1 Cor. 1:2; 15:18; 2 Cor. 5:17). Y pa jun chke ri cartas che xutzʼibʼaj rukʼ ri utobʼanik ri ruxlabʼixel ri Dios, xubʼij: «We kʼu oj junam chik rukʼ ri Cristo pa ri ukamikal, jeriʼ xuqujeʼ oj junam rukʼ pa ri ukʼastajibʼal» (Rom. 6:3-5). Jesús xkʼastaj pa uxlabʼal y xbʼe pa ri kaj. Are laʼ ri kkiriq na konojel «ri xekojon che ri Cristo», kraj kubʼij, konojel ri e chaʼom. Pablo xutzʼibʼaj che ri Cristo are ri «nabʼe wachinik chkixoʼl ri kaminaqibʼ» che xkʼastajik (1 Cor. 15:20). Ri Jesús are ri nabʼe winaq che xkʼastajisax pa uxlabʼal y xyaʼ ri kʼaslemal kʼo ta ukʼisik che. w20.12 5, 6 párrs. 15, 16

Kimik, ri cristianos che kʼo keyebʼal pa ri kaj are chiʼ kekamik aninaq kekʼastajik kebʼe pa ri kaj. ¿Jasche kqabʼij wariʼ? Rumal ri xuya kan ubʼixik ri apóstol Pablo pa 1 Corintios 15:51, 52. Are chiʼ kekʼastajik, ri e rachalal Cristo riʼ kkiriq ri qastzij kikotemal. Ri Biblia kuqʼalajisaj jas kekibʼanaʼ ri cristianos pa ri kaj che «pa jun aninaqil, pa jun jaqow bʼaqʼwachaj» kekʼastajik. Jesús kubʼij chke ri e chaʼom: «Apachin ri kchʼakanik, xuqujeʼ ri keʼutaqej na kibʼanik ri nuchak kʼa pa ri kʼistajik, kinya na utaqanik pa kiwiʼ ri nimaʼq taq tinamit, jas ri nuTat uyoʼm taqanik pa nuqʼabʼ, ktaqan kʼu na pa kiwiʼ ri nimaʼq taq tinamit rukʼ bʼaraʼ re rax chʼichʼ, keʼukʼajij na jetaneʼ e laq re ulew» (Apoc. 2:26, 27). w20.12 12 párrs. 14, 15

Are chiʼ ri Pablo xubʼij «nabʼe wachinik» che ri Jesús xraj xubʼij che e kʼo chi nikʼaj winaq kewalajisaxik rech kebʼe pa ri kaj (1 Cor. 15:18). Chiʼ kqʼax ri tiempo, konojel «ri xekojon che ri Cristo» —chkixoʼl e kʼo ri apóstoles— kewalajisax pa ri kaj, junam rukʼ ri Jesús. Are chiʼ ri Pablo xutzʼibʼaj ri ucarta chke ri cristianos re Corinto, kʼo ta jun chke «ri xekojon che ri Cristo» kʼastajinaq chik rech kbʼe pa ri kaj. Xaneʼ xuya ubʼixik che wariʼ kkʼulmataj na are chiʼ kqʼax ri tiempo. Xubʼij: «Kekʼastaj kʼu chkijujunal pa ri kicholajil: Ri Cristo are nabʼe wachinik chkixoʼl, kʼateʼ riʼ kekʼastaj na ri e rech ri Cristo are taq ri areʼ kpetik» (1 Cor. 15:23; 1 Tes. 4:15, 16). Junam rukʼ ri kqilo, ri apóstoles y nikʼaj chi cristianos e chaʼom rajawaxik kkeyeʼj na ri kikʼastajibʼal rech kebʼe pa ri kaj kʼa pa ri upetibʼal ri Cristo y kekʼojiʼ «junam rukʼ pa ri ukʼastajibʼal». Kimik oj kʼo chi pa ri tiempo re «ri upetik» ri Cristo che xyaʼ kan ubʼixik ojer. w20.12 5 párr. 12; 6 párrs. 16, 17

Ri apóstol Pablo tajin kchʼaw chkij ri kekʼastaj pa ri kaj, kraj kubʼij, rukʼ «jun cuerpo aj uxlabʼal» (1 Cor. 15:43, 44). Are chiʼ ri Jesús xkʼojiʼ cho ri uwach Ulew, xkʼojiʼ ucuerpo junam kukʼ ri winaq. Are kʼu, chiʼ xkʼastajisax pa ri kamikal xux «jun uxlabʼal ri kuya kʼaslemal» y xtzalij bʼi pa ri kaj. Junam kkʼulmataj kukʼ ri e chaʼom kebʼe pa ri kaj, are chiʼ kekʼastajisaxik keʼux uxlabʼal. Pablo xuya ubʼixik: «Kimik jeʼ qabʼanik jas ri nabʼe achi re ulew, kʼateʼ kʼu riʼ jeʼ kojpe na jas ri achi ajchikaj» (1 Cor. 15:45-49). Chnaʼtaj chqe che are chiʼ xkʼastaj ri Jesús are jun uxlabʼal. Are chiʼ ri Pablo ya kubʼij ri más nim ubʼanik, xubʼij jasche: «Ri cuerpo re tiʼj, re kikʼ, man kkun ta che rechbʼexik ri rajawibʼal ri Dios» (1 Cor. 15:50). Ri apóstoles y ri nikʼaj chi e chaʼom xuqujeʼ kebʼe ta pa ri kaj rukʼ jun cuerpo re tiʼj y re kikʼ, che kqʼayik. w20.12 10, 11 párrs. 10-12

Dios xeʼukoj jujun utijoxelabʼ ri Jesús re ri nabʼe siglo rech xkitzʼibʼaj ri kʼo ubʼanik rukʼ ri kʼastajibʼal pa ri kaj. Ri apóstol Juan xubʼij: «Kimik oj ralkʼwal chik ri Dios. Kʼa majaʼ kʼu kkʼutunik jas ri kojux na. Qetaʼm kʼut chi are taq kkʼutun ri Jesucristo, kojux na junam rukʼ ri areʼ» (1 Juan 3:2). Rumal laʼ ri e chaʼom kebʼe pa ri kaj ketaʼm taj jas ubʼanik riʼ ri kʼaslemal pa ri kaj y jas ubʼanik riʼ ri cuerpo espiritual. Ri ketaʼm are che chiʼ kekʼastaj bʼik kebʼe pa ri kaj kkil na uwach ri Jehová. Ri Biblia xaq jujun jastaq kuya ubʼixik chrij ri kʼastajibʼal pa ri kaj. Kubʼij che ri e chaʼom kekʼojiʼ rukʼ ri Cristo are chiʼ kusachisaj kiwach «konojel ri e kʼo pa kiwiʼ nikʼaj chik, konojel ri kʼo kitaqanik xuqujeʼ konojel ri kʼo kikuʼinem», chkixoʼl wariʼ kʼo «ri kʼisbʼal kʼulel ri kamikal». Kʼisbʼal re, ri Jesús y ri keqʼatow tzij rukʼ kkiya kibʼ y kekiya ronojel ri jastaq chuxeʼ ri utaqanik ri Jehová (1 Cor. 15:24-28). ¡Are jun tiempo re kikotemal! w20.12 8 párr. 2

¿Jas kkʼulmataj kukʼ ri sukʼ taq cristianos che kebʼe ta pa ri kaj rukʼ ri Cristo? Xuqujeʼ e areʼ kʼo jun kʼastajibʼal chke. Qetaʼm wariʼ rumal che ri Biblia kubʼij che ri apóstol Pablo y e nikʼaj chik «kekʼastaj pa ri nabʼe kʼastajibʼal» rech kebʼe pa ri kaj (Apoc. 20:6). ¿La mat qastzij che wariʼ kukʼutu che kʼo chi jun kʼastajibʼal? Wariʼ kʼo ubʼanik rukʼ ri xubʼij ri Job che kukʼulmaj na pa ri petinaq (Job 14:15). «Ri e rech ri Cristo» e kʼo chi rukʼ ri Jesús pa ri kaj are chiʼ kusachisaj kiwach «konojel ri e kʼo pa kiwiʼ nikʼaj chik, konojel ri kʼo kitaqanik xuqujeʼ konojel ri kʼo kikunem». Xuqujeʼ «ri kʼisbʼal kʼulel ri kusach na uwach, are ri kamikal». Rukʼ wariʼ, kqilo che ri kekʼastaj pa ri kaj kekam ta chik (1 Cor. 15:24-26). Ri kʼo keyebʼal cho ri uwach Ulew kekunik kkibʼij junam rukʼ ri xubʼij ri Pablo pa ri texto re kimik. Rumal che kʼo ta jun winaq lawalo o sukʼ taj kbʼe pa ri kaj, ri e tzij riʼ kchʼaw chkij ri winaq che kekʼastaj na cho ri uwach Ulew. w20.12 6, 7 párrs. 18, 19

Are kʼu, weneʼ kqachomaj: «¿Jas kinbʼan che retaʼmaxik che Jehová qas ukuyum chi ri numak?». Pa nikʼaj chi tzij, are chiʼ kqachomaj wariʼ tajin kqaya urespuesta ri pregunta. ¿Jasche kqabʼij? Qʼaxinaq chiʼ kʼi décadas, La Atalaya xubʼij wariʼ: «Jun chi jastaq che kkʼulmatajik weneʼ amaqʼel kojqaj pa ri makaj y weneʼ are chiʼ majaʼ oj Testigos kʼo jujun qabʼantajik che utz taj y weneʼ oj kuninaq taj qakʼexom». Y kubʼij: «Kubʼan ta kebʼ akʼuʼx, kachomaj taj che ri makaj xabʼano kkuy ta chik. Rumal che are laʼ ri kraj ri Satanás che kachomaj. Are chiʼ kabʼisoj ri xabʼano y kpe awoyowal awukʼ kukʼutu che at itzel winaq taj y Jehová kkunik kukuy ri amak. Amaqʼel rukʼ machʼachʼem y rukʼ ronojel awanimaʼ chataʼ che ri Jehová che kukuy amak, katux chʼajchʼoj y katutoʼo». Are chiʼ ri apóstol Pablo majaʼ kux cristiano xubʼan itzel taq jastaq. Knaʼtaj che ri xubʼano (1 Tim. 1:12-15). Are kʼu xuchʼobʼo che ri tojbʼal mak are jun sipanik xuya ri Dios che. Wariʼ xubʼano che xchoman ta chi más chrij ri umak y are xchoman más chrij upatanexik ri Jehová. w20.11 27 párr. 14; 29 párr. 17

Satanás xaq xiw ta kukoj tzʼil taq wachbʼal, xaneʼ kukoj nikʼaj chi jastaq rech kojmakunik. ¿Jas kqabʼan chuwach wariʼ? Weneʼ kqachomaj: «Kinesax ta bʼi pa ri congregación we kinbʼan wariʼ, rumal che are ta jun nimalaj mak». Utz ta wajun chomanik riʼ. Utz che kqabʼan ri preguntas riʼ: «¿La tajin kukoj ri Satanás wajun taqchibʼal riʼ rech kubʼan kebʼ ri wanimaʼ? We are kinbʼan ri nurayinik che utz taj, ¿la kintzʼilobʼisaj ri ubʼiʼ ri Jehová? ¿La kinuqebʼsaj más wariʼ rukʼ ri Dios, o kinunajtajisaj che?». Chojchoman chrij ri preguntas riʼ. Chqataʼ qanojibʼal che ri Jehová rech are chiʼ kojchoman chrij ri preguntas riʼ qas kqil ri kʼo pa qanimaʼ. We kqabʼan wariʼ qas kojuchajij. Kojutoʼo rech kqaxutuj ri taqchibʼal, junam rukʼ ri Jesús are chiʼ xubʼij: «¡Jat, Satanás!» (Mat. 4:10). Chnaʼtaj chqe, che jun animaʼ ubʼanom kebʼ qas ta kʼo upatan. w20.06 12, 13 párrs. 16, 17

Ri oj upatanelabʼ ri Jehová kojmachʼachʼik xuqujeʼ kqanimaj ri e utaqanik, rumal che kqachʼobʼo che areʼ retaʼm ri qas utz chqe (Efes. 4:22-24). Ri machʼachʼem kubʼano che are kqabʼan ri urayibʼal ri Jehová are ta ri qe oj xuqujeʼ kqachomaj che ri nikʼaj chik más nim na kibʼanik chqawach oj. We kqabʼan wariʼ, kkʼojiʼ jun utz qachilanik rukʼ ri Jehová xuqujeʼ kukʼ ri qachalal (Filip. 2:3). We kqachajij ta qibʼ kqesaj uwach riʼ ri kibʼantajik ri winaq che kkibʼan nim che kibʼ xuqujeʼ xaq xiw kkichomaj ri kajwataj chke. E jujun cristianos re ri nabʼe siglo xuqujeʼ xkiriq wajun kʼax riʼ, rumal laʼ ri apóstol Pablo xuya wajun pixabʼ riʼ che ri congregación re Roma: «Rumal kʼu ri toqʼobʼ ri yoʼm chwe, kinbʼij chiwe chijujunal, kʼo jun muchomaj chi nim ubʼanik, xaneʼ xaq jas ri taqal che». We kqilo, Pablo xubʼij che rajawaxik kkʼojiʼ jun utz qachomanik chqij. Ri machʼachʼem kojutoʼo rech kqachomaj taj che más nim qabʼanik o che kʼo ta qapatan y kojutoʼo rech xaq xiw ta kojchoman chqij oj. w20.07 2 párrs. 1, 2

Chqanaʼtasaj ri xkʼulmataj pa taq ri uqʼij ri Asá. Ri jamaril che xkʼojiʼ pa ri tinamit re Judá xkʼisik, rumal che jun millón ajchʼojabʼ re Etiopía xeʼopan che ubʼanik kʼax chke. Ri kkʼamow kibʼe are Zérah, xuchomaj che kkunik kuchʼak ri Judá. Are kʼu Asá xukubʼsaj ukʼuʼx chrij ri Jehová. Rumal laʼ xubʼij che: «¡Chujtoʼ la, Ajawaxel xuqujeʼ qaDios, qakubʼan ya qakʼuʼx chij la, pa ri bʼiʼ kʼu la uj petinaq chkij we ajchʼojabʼ riʼ!» (2 Crón. 14:11). Paneʼ ri ajchʼojabʼ re Etiopía más e kʼi chuwach ri kajchʼojabʼ ri Judá, Asá retaʼm che ri Jehová kkunik kutoʼ ri utinamit. Y jelaʼ xkʼulmatajik. Ri ajchʼojabʼ re Etiopía xechʼakan taj (2 Crón. 14:8-13). Paneʼ qetaʼm taj jas kkikʼulmaj pa kijujunal ri rajpatanelabʼ ri Dios, ri qetaʼm are che ri jamaril che weneʼ kʼo kimik kkʼis na. Chnaʼtaj chqe che Jesús xubʼij kanoq che «konojel ri winaq» itzel kekil ri utijoxelabʼ (Mat. 24:9). w20.09 17, 18 párrs. 14-16

Kʼo ta nijun utz krilo kyoqʼik. Are kʼu we sibʼalaj kojbʼisonik are chiʼ kojyoqʼ kumal ri qakʼulel, kqariq kʼax (Prov. 24:10). Rumal laʼ, ¿jas kqabʼan che rilik ri kʼax kkibʼan ri winaq chqe? Junam rukʼ ri Pablo che xubʼij «are taq kinyoqʼik» kinkikotik, utz che kqesaj uwach. ¿Jasche? Rumal che ri yoqʼonik kkibʼan ri winaq xuqujeʼ che kkaj taj kqapatanij ri Dios are jun etal che qas oj utijoxelabʼ ri Cristo (1 Ped. 4:14). Jesús xubʼij che ri utijoxelabʼ kkiriq na kʼax (Juan 15:18-20). Are laʼ ri xkʼulmataj pa ri nabʼe siglo. Jun kʼutbʼal, ri winaq che xux junam kichomanik kukʼ ri winaq griegos, xkichomaj che ri cristianos kʼo ta ketaʼmabʼal xuqujeʼ nim ta kibʼanik. Xuqujeʼ ri judíos xkichomaj che «xaq e winaq ri man kʼo ta kitijom wi kibʼ kemayijinik», junam che xkibʼij chke ri apóstol Pedro xuqujeʼ Juan (Hech. 4:13). E kʼi kkichomaj che ri cristianos kʼo ta kichuqʼabʼ, rumal che kkinim ta kibʼ pa política xuqujeʼ pa chʼoj, itzel keʼil kumal ri winaq. ¿La xkiya ri nabʼe taq cristianos che ri xkibʼij ri winaq chkij xeʼuqʼatej rech kkipatanij ri Jehová? Xkiya taj. w20.07 14, 15 párrs. 3, 4

Ri apóstol Juan sibʼalaj xeʼuloqʼoqʼej ri rachalal xuqujeʼ xraj xeʼutoʼ pa ri kikojonik. Ri xunaʼo qas xqʼalajin pa ri pixabʼ che kʼo pa ri oxibʼ cartas che xutzʼibʼaj rukʼ ri utobʼanik ri Jehová. Sibʼalaj kuya qachuqʼabʼ che ri achijabʼ xuqujeʼ ixoqibʼ che kebʼe pa ri kaj che uqʼatik tzij rukʼ ri Cristo (1 Juan 2:27). Qas chojchoman chrij ri pixabʼ che xuyaʼo. Chqakojoʼ qachuqʼabʼ rech amaqʼel kojkʼojiʼ pa ri qastzij xuqujeʼ chqanimaj ri Jehová pa ronojel ri kqabʼano. Chqetaʼmaj chrij ri uTzij xuqujeʼ chqakubʼsaj qakʼuʼx chrij. Chqakowirisaj ri qakojonik chrij ri Jesús. Chqaxutuj ri kichomanik ri winaq xuqujeʼ ri kkibʼij ri apóstatas. Chqakojoʼ qachuqʼabʼ rech kebʼ ta qapalaj xuqujeʼ kojqaj ta pa ri makaj. Chqabʼanaʼ pa qakʼaslemal ri utz taq upixabʼ ri Jehová. Xuqujeʼ keqatoʼ ri qachalal rech kux ko ri kikojonik are chiʼ kqakuy ri kimak xuqujeʼ keqatoʼ ri kajwataj tobʼanik chke. Wariʼ kojutoʼ rech apastaneʼ ri jastaq kqaqʼaxej, amaqʼel kojkʼojiʼ pa ri qastzij. w20.07 24, 25 párrs. 15-17

Rukʼ loqʼoqʼebʼal, ri Jehová kuya jun lugar pa ri congregación chke ri sukʼalaj taq upatanelabʼ pa kijujunal. Paneʼ jalajoj ri kojkun che ubʼanik, qonojel nim qabʼanik y qonojel rajawaxik kqatoʼ la qibʼ. Ri apóstol Pablo xubʼij che are chiʼ kqil jun upatanel ri Jehová utz taj kqachomaj: «Man at rajawaxik ta chwe» (1 Cor. 12:21). Rech kʼo jamaril pa ri congregación, rajawaxik che nim kqil wi qibʼ y kojtobʼan chbʼil qibʼ (Efes. 4:16). Are chiʼ kʼo utzilal, kubʼan más ko ri kikojonik ri qachalal y kkinaʼo che keloqʼoqʼexik. Konojel ri e kʼamal bʼe kechaʼ rumal ri ruxlabʼixel ri Jehová, are kʼu pa kijujunal kʼo utz taq kibʼantajik y kʼo jastaq che qas kekun che ubʼanik (1 Cor. 12:17). Weneʼ e kʼo jujun che kʼateʼ xyaʼ wajun eqelen riʼ chke y kʼo ta más ketaʼmabʼal, nikʼaj chik weneʼ qas ta kʼo kekun chik kkibʼano rumal ri kijunabʼ o rumal che e yawabʼ. Are kʼu nijun kʼamal bʼe kril ri rachiʼl y kuchomaj: «Man at rajawaxik ta chwe». Rajawaxik che are kkibʼan ri pixabʼ xuya ri Pablo che kʼo pa Romanos 12:10. w20.08 26 párrs. 1, 2; 27 párr. 4

Jehová kukoj ri utinamit kʼo cho ri uwach Ulew rech kukʼam qabʼe pa ri bʼe che kojukʼam bʼi pa ri kʼaslemal. Qastzij che, are chiʼ ri utinamit kresaj lo jun kʼakʼ etaʼmanik chrij jun kʼutunem re ri Biblia o kuya jun pixabʼ chqe, qastzij riʼ che chanim kqanimaj. Are kʼu ¿jas kqabʼano are chiʼ kukʼex jujun jastaq che kʼo kubʼan pa ri qakʼaslemal? Jun kʼutbʼal, weneʼ kkʼayix kan ri Ja rech Ajawbʼal che kojbʼe wi, ¿jas kqabʼano? Ri kojtowik rech amaqʼel kojkikotik are unaʼtasaxik che tajin kojchakun che ri Jehová y che areʼ tajin kukʼam ubʼe ri utinamit (2 Cor. 6:1). Ri qʼatal tzij David xuya jun utz kʼutbʼal chqawach are chiʼ xtobʼan rukʼ pwaq che uyakik ri templo. Xubʼij: «¿In jachinoq xuqujeʼ jachin ri nutinamit chi yaʼtal chke chi keqachiʼj kʼi taq jastaq che la? Qastzij ronojel kpe ukʼ la xuwi kqaya ri qakʼamom che la» (1 Crón. 29:14). Are chiʼ kqaya qakuchuj, tajin kqaya che ri Jehová ri usipam chqe. Ri Jehová nim kril ri tiempo, ri chuqʼabʼ y ri qarajil che kqakoj che ri chak che areʼ kraj kqabʼano (2 Cor. 9:7). w20.11 22, 23 párrs. 14-16

Ri oj testigos rech Jehová kqabʼij taj che utz kel ri qachak rumal ri kikʼiyal ri winaq che keqatoʼ rech kketaʼmaj uwach ri Dios (Luc. 8:11-15). We kqaya ta kan ukʼutik y utzijoxik ri utzalaj taq tzij chke ri winaq, ri Jehová kkikot qukʼ rumal ri qachak. ¿Jasche? Rumal che tajin kqanimaj areʼ xuqujeʼ ri uKʼojol (Mar. 13:10; Hech. 5:28, 29). Kʼo jun rumal che rajawaxik kqatzijoj ri utzij ri Dios pa ri tiempo riʼ: are che xa jubʼiqʼ chi tiempo kʼolik rech ksachisax uwach ri itzelal y rech kekolotaj ri winaq. Kachomaj taj che kʼateʼ kattobʼan che wajun chak riʼ nim ubʼanik kʼa chiʼ katkunik. Are ri tiempo che katzijoj ri utzij ri Dios, kanimarisaj ri awetaʼmabʼal chrij ri Biblia, kkʼojiʼ ukowil akʼuʼx y ubʼanik ri jastaq che achomam. Chattobʼan kukʼ ri más che ocho millones Testigos che e kʼo pa ronojel ri uwach Ulew, jeriʼ kanaʼo che «ri ukikotemal ri Ajawaxel are kyaʼow qachuqʼabʼ» (Neh. 8:10; Luc. 5:10). Chakojoʼ achuqʼabʼ che ubʼanik wajun chak riʼ kʼa chiʼ Jehová kubʼij che kbʼan ta chik. w20.09 7 párrs. 18-20

Rajawaxik kqachajij ri qachomanik y ri kqanaʼ chrij ri jastaq rech ksach ta qakʼuʼx. «Kiloqʼoqʼexik ri qʼinomal» kusachisaj ri qaloqʼoqʼenik che ri Jehová, chrij ri uTzij y ri ubʼixik chke nikʼaj chik (Mat. 13:22). We kqaj kqachajij ri jastaq che uyaʼom ri Jehová chqe, rajawaxik aninaq kqil ri kqabʼan chuwach jun kʼax. Are chqachomaj jas kqabʼano chiʼ tajin kqakoj ri Internet, kqil jun película o jun programa pa ri televisión xaq kʼateʼ kqʼalajin ri kkibʼij ri apóstatas o jun tzʼil wachbʼal o chʼoj. We qachomam ri kqabʼano, aninaq riʼ kqachʼobʼ ri kqabʼano rech kqachajij qibʼ chuwach ri kubʼan kʼax che ri qakojonik jeriʼ oj chʼajchʼoj chuwach ri Jehová (Sal. 101:3; 1 Tim. 4:12). Ri cristianos rajawaxik kqachajij ri jastaq nim ubʼanik che uyaʼom ri Jehová chqe: ri qastzij kʼo pa ri Biblia y ri eqelen re ukʼutik chkiwach ri nikʼaj chik. We kqabʼan wariʼ, kkʼojiʼ jun chʼajchʼoj retaʼmabʼal qakʼuʼx, jun utzalaj qakʼaslemal y ri kikotemal kqanaʼ che kitoʼik ri nikʼaj chik rech kketaʼmaj uwach ri Jehová. w20.09 30 párrs. 16-19

We qabʼanom chi qaqasanjaʼ, kraj kubʼij che qakʼutum chi chkiwach konojel che kʼo qakojonik chrij ri Jehová y che qas kqaj kqapatanij kukʼ ri e kʼo pa ri utinamit. Ri kubʼan ri Jehová che ukʼamik ubʼe ri utinamit kimik kukʼut ri ubʼantajik, ri urayibʼal y ri e utaqomal. Chqilaʼ oxibʼ bʼantajik che kukʼut ri Jehová pa ri utinamit. Nabʼe, «ri Dios man jalan ta keril wi taq ri winaq» (Hech. 10:34). Rumal ri uloqʼoqʼenik ri Jehová xuya ri uKʼojol rech kutoj ri qamak (Juan 3:16; 1 Tim. 2:6). Rech kʼi winaq kkiriq utzilal rumal ri tojbʼal mak, Jehová kukoj ri upatanelabʼ rech kkitzijoj ri utzalaj taq tzij chke ri kkaj kkitatabʼej. Ukabʼ, Jehová are jun Dios re cholajil y re jamaril (1 Cor. 14:33, 40). Rumal laʼ kraj che ri utinamit kkipatanij rukʼ cholajil y rukʼ jamaril. Urox, Jehová are «ri awajtij» (Is. 30:20, 21). Rumal laʼ, ri utinamit, kukoj uchuqʼabʼ che ukʼutik ri uTzij pa ri congregación y chuchiʼ taq ja. w20.10 20 párrs. 1-3