Mayo

Are chiʼ ri Jesús kʼa ala na, xuchaʼ kinimaxik ri utat unan. Kʼo ta jumul mat xunimaj ri kitaqanik y xuchomaj taj che kʼo más retaʼmabʼal chuwach ri José y María. Qastzij riʼ che sibʼalaj xukoj uchuqʼabʼ rech xretaʼmaj ri uchak ri ukabʼ utat rech xtobʼan che uyaʼik ri kajwataj che ri familia rumal che are ri nabʼeʼal. Qastzij riʼ che ri utat unan xkiya ubʼixik che, che ri ralaxbʼal are jun milagro y ri xkibʼij ri ángeles chrij (Luc. 2:8-19, 25-38). Are kʼu Jesús xaq xiw ta xretaʼmaj wariʼ, xaneʼ pa utukel xunikʼoj ri uTzij ri Dios. ¿Jasche qetaʼm che are jun utzalaj tijoxel re ri uTzij ri Dios? Rumal che, are chiʼ nitzʼ na, are chiʼ ri ajtijabʼ re Jerusalén «xkita ri utzij xkimayo, rumal rech chi nim ri unoʼj ri ala, retaʼm jas kubʼij chke ri ajtijabʼ are taq kkikʼot uchiʼ» (Luc. 2:46, 47). Are chiʼ ri Jesús kʼo 12 ujunabʼ xubʼan ta kebʼ ukʼuʼx che Jehová are ri uTat (Luc. 2:42, 43, 49). w20.10 29, 30 párrs. 13, 14

Ri kojonik chrij ri ukʼastajik ri Jesús sibʼalaj nim ubʼanik chkiwach ri cristianos. Are chiʼ ri Pablo xumaj chʼawem chrij ri kʼastajibʼal xubʼij ri oxibʼ jastaq riʼ: «Ri Cristo xkam kimak kech ri e qamak», che «xmuqik» y che «xkʼastaj churox qʼij, jas kubʼij ri Tzʼibʼatalik» (1 Cor. 15:3, 4). ¿Jas kukʼut chqawach che Jesús xkamik, xmuqik y xkʼastajisaxik? Ri profeta Isaías xuya ubʼixik che ri Mesías kesax na cho ri uwach ulew, kkamisax na y kmuq na pa taq kixkut itzel taq winaq. Are kʼu xubʼij chi nikʼaj jastaq: che are ktojow «kimak e kʼi winaq». ¿Jas xubʼan ri Jesús che ubʼanik wariʼ? Xuya ri ukʼaslemal pa kamikal (Is. 53:8, 9, 12; Mat. 20:28; Rom. 5:8). Rumal laʼ, are chiʼ xkamik, xmuqik y xkʼastajisaxik y wariʼ xubʼano che qas kʼo qeyebʼal che kojel na pa ri makaj y ri kamikal, y che kojkunik kqil chi jumul kiwach ri winaq che sibʼalaj keqaj che e kaminaq. w20.12 2, 3 párrs. 4-6; 5 párr. 11

Ri apóstol Pablo amaqʼel xutzijoj ri utzij ri Dios pa ri sinagogas judías. Jun kʼutbʼal re, pa Tesalónica, xtzijon kukʼ ri winaq judíos xuqujeʼ «oxibʼ qʼij kʼut re uxlanem xchoman kukʼ. Areʼ xukoj ri Tzʼibʼatalik» (Hech. 17:1, 2). Qastzij riʼ che utz xrilo xtzijon pa ri sinagoga, rumal che are judío (Hech. 26:4, 5). Ri Pablo kuchʼobʼ ri kkichomaj ri judíos rumal laʼ xuxibʼij ta ribʼ are chiʼ xutzijoj ri utzij ri Dios chke (Filip. 3:5). Ri Pablo xesax bʼi pa Tesalónica kumal ri ukʼulel xuqujeʼ qʼaxinaq chi kebʼ oxibʼ qʼij je xbʼan che pa Berea, rumal laʼ xbʼe pa Atenas. Are chiʼ xopan chilaʼ xtzijon chi jumul «kukʼ ri aj judeyibʼ xuqujeʼ nikʼaj winaq chik ri kkiqʼijilaj ri Dios» (Hech. 17:17). Are kʼu, chiʼ xutzijoj ri utzij ri Dios pa ri kʼaybʼal, xeʼuriq nikʼaj chi winaq. Ri xuriq chilaʼ e filósofos xuqujeʼ winaq che e judíos taj, rumal laʼ chkiwach ri winaq riʼ are «kʼakʼ tijonik» ri xutzijoj ri Pablo chke. Xkibʼij che: «Kqamay ri jastaq ri kabʼij chqe» (Hech. 17:18-20). w20.04 9 párrs. 5, 6

Rumal laʼ kqachomaj taj che kʼo ta chi kkʼam chqe. Chnaʼtaj chqe che qonojel jujun mul kqabʼan jastaq che utz taj, are kʼu kojqaj chuwach ri Jehová rumal ri nimalaj rutzilal y rumal ri tojbʼal mak xuya ri Jesús (Efes. 1:7; 1 Juan 4:10). Are chiʼ kajwataj qachuqʼabʼ, kojkunik kojqebʼ kukʼ ri qachalal, ri qafamilia espiritual. E areʼ e kʼo che ukubʼsaxik qakʼuʼx y qatatabʼexik are chiʼ kajwataj chqe (Prov. 12:25; 1 Tes. 5:14). Jun qachalal re Nigeria ubʼiʼ Joy, che kukoj uchuqʼabʼ chuwach ri bʼis, kubʼij: «¿Jas ta nubʼanom riʼ wet mat e kʼo ri qachalal? Are ri kkʼutuwik che Jehová qas kutatabʼej ri nuchʼawem. Xuqujeʼ kikʼutum chnuwach che rajawaxik kinya kichuqʼabʼ ri kebʼisonik». Qastzij, ri e qachalal amaqʼel taj kkilo che kojbʼisonik. Weneʼ rajawaxik oj kojmajinik y kojchʼaw rukʼ jun qachalal achi o ixoq che ko pa ri ukojonik rech kuya ri tobʼanik chqe. w20.12 23, 24 párrs. 7, 8

Rech e kebʼ winaq kkʼojiʼ jun utzalaj achilanik chkixoʼl, rajawaxik amaqʼel kkachilaj kibʼ xuqujeʼ ketzijon chrij ri kkichomaj, ri kkinaʼo xuqujeʼ ri kikʼaslemal. Are kʼu, chiʼ kqachomaj che kojux rachiʼl ri Jesús, weneʼ kqachomaj che kʼax ubʼanik. Jun rumal are che kqil ta uwach ri Jesús kimik. E kʼi cristianos pa ri nabʼe siglo je xkikʼulmaj. Rumal laʼ ri apóstol Pedro xubʼij chke: «Kiloqʼoqʼej ri Jesucristo paneʼ man iwilom ta uwach, kixkojon che paneʼ man kiwil ta kimik» (1 Ped. 1:8). Qastzij, rajawaxik taj kqil na uwach ri Jesús rech kojux rachiʼl. Xuqujeʼ kojkun taj kojchʼaw rukʼ ri Jesús. Are chiʼ kqabʼan qachʼawem, xaq xiw che ri Jehová kqabʼij wi. Qastzij che ri qachʼawem kqabʼan pa ubʼiʼ ri Jesús, are kʼu rukʼ ta kojtzijon wi. Xuqujeʼ ri Jesús kraj taj che, che areʼ kqabʼan wi ri qachʼawem rumal che ri chʼawem kʼo ubʼanik rukʼ ri qʼijilanik che xaq xiw che ri Jehová kqaya wi (Mat. 4:10). Paneʼ kojkun taj kqabʼan qachʼawem che ri Jesús are kʼu kojkunik kqakʼutu che kqaloqʼoqʼej. w20.04 20 párrs. 1-3

Pa ri ojer Grecia, ri kkitij anim rajawaxik kechoman ta chrij ri kosem xuqujeʼ ri qʼoxowem. Xaq xiw kekunik kkikubʼsaj kikʼuʼx chrij ri tijonik yaʼom chke xuqujeʼ ri kichuqʼabʼ. Junam kukʼ e areʼ, oj xuqujeʼ kojtijox che utijik anim pa ri qakojonik. Are kʼu ri oj, kʼo jun qatobʼanik: kʼo qachuqʼabʼ rumal che are ri Jehová ri kyaʼowik. We kqakʼam ri utobʼanik, areʼ kutzujuj che kojutijoj xuqujeʼ kuya qachuqʼabʼ. Ri apóstol Pablo xuchʼij kʼi kʼax. Xyoqʼik xuqujeʼ xterenex rukʼ itzelal, jujun taq mul xtuqarik xuqujeʼ xuchiʼj kʼax che xubʼij: «Jetaneʼ jun kʼix pa ri nucuerpo» (2 Cor. 12:7). Are kʼu, xa ta rumal ri kʼax riʼ xuya kan ri Jehová xaneʼ xutoʼo rech xukubʼsaj más ukʼuʼx chrij ri Jehová (2 Cor. 12:9, 10). Rumal laʼ, ri Jehová amaqʼel xutoʼo. w20.04 29 párrs. 13, 14

Jun chke ri sipanik che yaʼom chqe are uyaʼik tobʼanik che Jehová xuqujeʼ ri e kʼo pa ri kaj (2 Cor. 6:1). Ri Jehová kojutoʼo are chiʼ keqatoʼ ri winaq rech keʼux tijoxelabʼ. Pablo xubʼij che ri areʼ xuqujeʼ ri nikʼaj e «rajchakibʼ ri Dios» (1 Cor. 3:9). Are chiʼ kqatzijoj ri utzij ri Dios xuqujeʼ tajin kojtobʼan rukʼ ri Jesús. Are chiʼ xubʼij chke ri e tereneʼl re che kkibʼan «tijoxelabʼ chke ri winaq pa konojel ri tinamit» xubʼij chke: «In kʼo iwukʼ ronojel qʼij» (Mat. 28:19, 20). ¿E kʼu ri ángeles? Sibʼalaj kojmaltyoxinik che ri ángeles kkikʼam qabʼe are chiʼ kqatzijoj «ri junalik tzij re kolobʼal ibʼ [...] chke ri e kʼo cho ri uwach Ulew» (Apoc. 14:6). ¿Jas jastaq tajin kbʼan kimik rumal ri tobʼanik che yaʼom chqe? Are chiʼ kqatzijoj ri utzalaj taq tzij, jetaneʼ tajin kqatik ijaʼ re ri uQʼatbʼal tzij ri Dios, jujun taq ijaʼ keqaj pa kanimaʼ ri winaq che qas kkaj kkitatabʼej xuqujeʼ kewachinik (Mat. 13:18, 23). ¿Jachin kbʼanowik che kkʼiy ri ijaʼ xuqujeʼ kwachinik? Are ri Jehová junam rukʼ ri kubʼij ri texto re kimik. w20.05 30 párrs. 14, 15

Kimik kʼi familias kijachom kibʼ. Xuqujeʼ, e kʼo familias junam ja e kʼo wi are kʼu kkibʼano che jetaneʼ ketaʼm ta kiwach. Jun consejero familiar, kubʼij: «Ri nan, ri tat y ri alkʼwalaxelabʼ kkilij ta chi kibʼ, xaq xiw chi kkilij ri kicomputadora, ri tableta, ri teléfono o ri máquina re videojuegos. Paneʼ junam ja e kʼo wi, qas ta ketaʼm kiwach». Kqaj taj kojux junam kukʼ ri e winaq kimik che kkikʼut ta chi loqʼoqʼebʼal. Rajawaxik che xaq xiw ta chke ri qafamiliares kqakʼut wi nimalaj loqʼoqʼebʼal, xaneʼ xuqujeʼ chke ri qachalal pa ri congregación (Rom. 12:10). ¿Jas ubʼanik ri loqʼoqʼebʼal che tajin kojchʼaw chrij? Pa ri chʼabʼal griego, are jun tzij che kraj kubʼij ri loqʼoqʼebʼal che kqanaʼ chke ri qafamiliares che keqil junam rukʼ utzalaj taq qachiʼl. Y are laʼ ri loqʼoqʼebʼal che rajawaxik kqanaʼ chke ri qachalal pa ri congregación, rumal che are ri qafamilia pa ri qakojonik. We kqakʼut nimalaj loqʼoqʼebʼal, kqatoʼlaʼ qibʼ qonojel rech kqaya ta kan upatanexik ri Jehová (Miq. 2:12). w21.01 20 párrs. 1, 2

We jun equipo deportivo kʼo ta tasoj ibʼ chkixoʼl kechʼakan riʼ. Ri qanimaʼ kux junam rukʼ ri equipo riʼ we ri qachomanik, ri qarayinik xuqujeʼ ri kqanaʼo xa jun kubʼan che upatanexik ri Jehová. Chnaʼtaj chqe che Satanás kkikot riʼ we kubʼan kebʼ ri qanimaʼ. Kraj che kqariq kʼax che ubʼanik ri urayibʼal ri Jehová xuqujeʼ kqariq kʼax che uyaʼik kan ri itzel taq qarayinik. We kqaj kqapatanij ri Jehová, rajawaxik che kqabʼan rukʼ ronojel ri qanimaʼ (Mat. 22:36-38). Kqaya ta bʼe che ri Satanás kubʼan kebʼ che ri qanimaʼ. Junam rukʼ ri David chqataʼ che ri Jehová: «Chbʼanaʼ la chi ri wanimaʼ nim kril wi ri bʼiʼ la». Chqakojoʼ qachuqʼabʼ rech kqabʼan qe ri xuta ri David pa chʼawem. Chqakojoʼ qachuqʼabʼ rech ri kqachaʼ ubʼanik ronojel qʼij kuya uqʼij ri Jehová. We kqabʼano, qas yaʼtal riʼ kbʼix testigos rech Jehová chqe (Prov. 27:11). Qonojel kojkunik kqabʼij qe ri xubʼij ri profeta Miqueas: «Are kʼu ri oj amaqʼel are kqanimaj na ri Ajawaxel ri qaDios» (Miq. 4:5). w20.06 13 párrs. 17, 18

Are chiʼ ri qʼatal tzij re ri norte xuqujeʼ ri nikʼaj chik qʼatal taq tzij kkibʼan kʼax che ri utinamit ri Dios kubʼano che kpe royowal ri Dios ri kʼo ronojel ukunem xuqujeʼ kumajij ri chʼoj ubʼiʼ Armagedón (Apoc. 16:14, 16). Are chiʼ kkʼulmataj wariʼ, kopan riʼ ri qʼij che ri qʼatal tzij re ri norte ksachisax uwach, «man kʼo ta kʼu jachin jun katoʼwik» (Dan. 11:45). Xuqujeʼ je kkʼulmataj na rukʼ ri Gog re Magog ri jupuq taq tinamit che kimulim kibʼ. Ri jun chi versículo re ri profecía re Daniel kuqʼalajisaj más chrij ri kbʼan che usachisaxik uwach ri qʼatal tzij re ri norte xuqujeʼ ri ketobʼan rukʼ, xuqujeʼ kuya ubʼixik ri kubʼan che qakolik (Dan. 12:1). ¿Jas kraj kubʼij ri tzij kʼo pa ri versículo riʼ? Miguel are ri jun chi ubʼiʼ ri Qʼatal tzij, Cristo Jesús. Ri areʼ xumaj uyaʼik tobʼanik che ri utinamit ri Dios pa ri junabʼ 1914 are chiʼ xumajij ri uQʼatik tzij pa ri kaj. Pa kebʼ oxibʼ qʼij, «katakʼatobʼ na», kraj kubʼij, kusachisaj na kiwach ri ukʼulel pa ri chʼoj re Armagedón. Wariʼ are ri kʼisbʼal chʼoj, Daniel xubʼij «jun joqʼotaj re kʼaxkʼol» che, che kʼo ta jumul kʼulmatajinaq (Apoc. 6:2; 7:14). w20.05 15, 16 párrs. 15-17

José kʼo ta xkunik xubʼano rech xukʼex ri tajin kukʼulmaj are chiʼ xux esclavo, xuqujeʼ kʼo ta xkunik xubʼano are chiʼ kʼo pa cárcel. ¿Jas xubʼano rech xkʼojiʼ jun utz uchomanik? Xukoj uchuqʼabʼ rech utz xubʼan che ri chak yaʼom che. Paneʼ xuriq kʼax, amaqʼel are nabʼe xukoj ri Jehová pa ri ukʼaslemal y rumal laʼ xtewchix ronojel ri xubʼano (Gén. 39:21-23). Ri xukʼulmaj ri José kunaʼtasaj chqe che pa wajun uwach Ulew riʼ weneʼ e kʼo winaq kkaj kkibʼan kʼax chqe. Weneʼ jun chke ri e qachalal kubʼan kʼax chqe. Are kʼu, we kqilo che ri Jehová are ri toʼl qech che kojuchajij, kqaya ta riʼ che ri bʼis kubʼan kʼax chqe ni kqaya kan upatanexik (Sal. 62:6, 7; 1 Ped. 5:10). Jun chi jastaq, ri José kʼa majaʼ na ri ujunabʼ are chiʼ Jehová xubʼano che xachikʼanik. Wariʼ kukʼutu che Jehová kukubʼsaj ukʼuʼx chkij ri upatanelabʼ che kʼa e majaʼ na. Kimik, e kʼo kʼi alabʼom alitomabʼ che kjunamataj ri kikojonik rukʼ ri José, y e jujun e tzʼapim pa cárcel rumal ri kisukʼilal che ri Dios (Sal. 110:3). w20.12 16 párr. 3; 17 párrs. 5, 7

Ri apóstol Pedro xuqujeʼ Juan jetaneʼ nim ubʼanik chkiwach che xbʼan kʼax chke rumal che e utijoxelabʼ ri Jesús xuqujeʼ rumal che kkiya ubʼixik chke nikʼaj chik ri xukʼut kan chkiwach (Hech. 4:18-21; 5:27-29, 41, 42). Kʼo ta rumal che xkinaʼ kʼixbʼal ri nabʼe cristianos re ri nabʼe siglo. Ri tijoxelabʼ riʼ che kemachʼachʼik xkikʼut más utzilal chke ri winaq chkiwach ri kikʼulel. Jun kʼutbʼal, ri wuj che xkitzʼibʼaj jujun chke ri cristianos riʼ rukʼ ri utobʼanik ri Jehová tajin kuya tobʼanik chke millones winaq kimik. Xuqujeʼ ri Qʼatbʼal tzij che xkitzijoj qas kʼolik y xa pa jubʼiqʼ tiempo kuqʼat tzij pa uwiʼ ronojel ri uwach Ulew (Mat. 24:14). Ri nimalaj qʼatal tzij che xubʼan kʼax chke xsach kan uwach. Are kʼu, ri tijoxelabʼ che xeʼux sukʼ, kimik e qʼatal tzij chi pa ri kaj. Are kʼu ri kikʼulel e kaminaq chik; we kekʼastaj loq, are ri Qʼatbʼal tzij che itzel xkilo are kqʼatow tzij pa kiwiʼ (Apoc. 5:10). w20.07 15 párr. 4

Abrahán sibʼalaj nim ri ukojonik chrij ri utzujunik ri Dios che jetaneʼ tajin kril ri Chaʼom o Mesías che kux na ri Qʼatal tzij. Rumal laʼ, Jesús xubʼij wariʼ chke ri judíos: «Ri Abrahán ri imam sibʼalaj xkikotik chiʼ kril na ri nuqʼij. Xril kʼut, xkikotik» (Juan 8:56). Wariʼ kukʼutu che Abrahán qas retaʼm che ri rijaʼlil ketobʼan na pa ri uQʼatbʼal tzij ri Dios xuqujeʼ che qas kraj kreyej na che ktzʼaqat ri utzujum ri Jehová. ¿Jas xubʼan Abrahán che ukʼutik che reyem «ri tinamit» —o Qʼatbʼal tzij— bʼanom rumal ri Dios? Nabʼe, xaq xiw ta pa jun lugar xkʼojiʼ wi, xutoʼ ta uwiʼ jun qʼatbʼal tzij aj uwach Ulew. Xuqujeʼ, xubʼan ta jun uqʼatbʼal tzij areʼ. Xaneʼ, amaqʼel xunimaj ri Jehová y xreyej che areʼ kubʼan na ri xutzujuj. Jeriʼ xukʼut ri nimalaj ukojonik chrij ri Dios. w20.08 3 párrs. 4, 5

Jehová kutzujuj che, chiʼ ri Cristo kuqʼat tzij kʼo ta chi jun winaq kubʼij: «In yawabʼ» (Is. 33:24). Rumal laʼ, are chiʼ ri Dios keʼuwalajisaj ri kaminaqibʼ kuya jun utzalaj kicuerpo y keyawaj ta chik. Are kʼu, aninaq taj keʼux tzʼaqat. Rumal che we tzʼaqat chi ri kikʼaslemal, kchʼobʼotaj ta chi kiwach riʼ kumal ri kifamilias. Wariʼ kukʼutu, che nojimal chi nojimal ri winaq kkiriq ri tzʼaqatalaj kʼaslemal pa ri tiempo re ri Mil Junabʼ che kuQʼat tzij ri Cristo. Are chiʼ kkʼis ri tiempo re ri mil junabʼ, ri Jesús kutzelej ri Qʼatbʼal tzij che ri uTat. Rumal ri qʼatbʼal tzij re mil junabʼ ktzʼaqatisax ronojel ri xraj ri Jehová chke ri winaq che kkiriq na ri tzʼaqatalaj kʼaslemal (1 Cor. 15:24-28; Apoc. 20:1-3). Chqachomaj ri kqanaʼo are chiʼ kqil kiwach ri qachiʼl o qafamiliar chiʼ kekʼastaj loq. ¿La kojtzeʼnik? ¿La are kojoqʼ rukʼ kikotemal? ¿La rumal ri nimalaj kikotemal kojbʼixon che ri Jehová? Ri qas kqakojo are che kqanaʼ jun nimalaj loqʼoqʼebʼal riʼ che ri loqʼalaj qaTat Jehová y ri uKʼojol rumal che xkiya ri kʼastajibʼal. w20.08 16, 17 párrs. 9, 10

Ri apóstol Pablo, xubʼij chke ri cristianos che kekunik kekʼuliʼ taj rech kkipatanij más ri Jehová (1 Cor. 7:7-9). Qastzij wi, Pablo xubʼij taj che mat nim kibʼanik ri e kʼulan taj. Xaneʼ, xuchaʼ ri ala Timoteo, che kʼulan taj, rech xuya eqeleʼn che, che nim kibʼanik (Filip. 2:19-22). Rumal laʼ, utz taj kqachomaj che jun qachalal más kkun che ubʼanik ri jastaq xa rumal che kʼulanik o kʼulan taj (1 Cor. 7:32-35, 38). Jesús y Pablo xkibʼij taj che rajawaxik kkʼuliʼ jun winaq o kkʼuliʼ taj. Rumal laʼ, ¿jas kqabʼij chkij ri winaq e kʼulanik y ri e kʼulan taj? Ri wuj La Atalaya 1 re octubre 2012 xubʼij wariʼ: «Ri qastzij, are che we jun winaq kkʼulik o kkʼuliʼ taj, ri kebʼ jastaq are utewchibʼal ri Dios. [...] Kraj ta kubʼij che chuwach ri Jehová mat kkikotik o che are jun kʼixbʼal we ri winaq kʼulan taj». Rajawaxik nim kqil wi ri kilugar ri e kʼulan taj pa ri congregación. w20.08 28 párrs. 8, 9

Pa jujun taq tinamit, ri winaq utz kkita ri utzalaj taq tzij rech ri uQʼatbʼal tzij ri Dios. Are laʼ ri kajwataj chke. Pa nikʼaj chi lugares ri winaq kkaj taj kketaʼmaj chrij ri Dios o chrij ri Biblia. Apastaneʼ ri kkibʼij o ri kkibʼan ri winaq pa ri qaterritorio, Jehová kraj che kqatzijoj na ri utzalaj taq tzij kʼa chiʼ kubʼij che kbʼan ta chik. Are chiʼ kopan ri tiempo che ktzijox ta chi ri utzalaj taq tzij «kʼateʼ riʼ, kpe ri kʼisbʼal» (Mat. 24:14). Jesús xuya kan ubʼixik ri kkʼulmataj pa ri kʼisbʼal taq qʼij y ri kibʼantajik ri winaq. Xuqujeʼ xubʼij che ri jastaq riʼ kubʼano che ri utijoxelabʼ are ta chi kbʼe kikʼuʼx che utzijoxik ri utzij ri Dios. Rumal laʼ, xubʼij chke: «Chixkʼaskʼat bʼaʼ» (Mat. 24:42). Kimik, ri winaq kejunamataj kukʼ ri winaq che xekʼojiʼ pa ri utiempo ri Noé che xkitatabʼej ta ri utzij ri Dios (Mat. 24:37-39; 2 Ped. 2:5). Rumal laʼ, kqaj che are kbʼe qakʼuʼx chrij ri chak uyaʼom ri Jehová chqe. w20.09 8 párrs. 1, 2, 4

Satanás «sibʼalaj kʼo royowal», utz taj kqachomaj che kkun taj kubʼan kʼax chqe (Apoc. 12:12). Naj ta chi kraj kuriq na kʼax ri kikojonik ri cristianos. Xa jubʼiqʼ chi kraj «kpe na nimalaj kʼaxkʼolil». Ri Biblia kubʼij che, «ri man ilom ta uloq qas are taq xtikiritaj uloq ri uwach ulew kʼa kimik, mawi kkʼulmax chi na» (Mat. 24:21). Pa ri tiempo riʼ, weneʼ ri qafamiliares kkibʼan kikʼulel chqe y weneʼ kqʼatex uwach ri qachak che ri Dios (Mat. 10:35, 36). Chojchoman chrij wariʼ: «¿La kinux junam rukʼ ri Asá y kinkubʼsaj nukʼuʼx chrij ri Jehová che kinutoʼ na y kinuchajij na?» (2 Crón. 14:11). Jehová kraj che kqetaʼmaj ri kqabʼan chuwach ri kʼax che kpe na, rumal laʼ tajin kuya uchuqʼabʼ ri qakojonik. Tajin kukoj ri «jikalaj pataninel, utz uchomanik che uyaʼik ri tzuqbʼal qech pa ri kiqʼijol» che kojutoʼo rech oj ko pa ri qakojonik (Mat. 24:45). Are kʼu ri rajawaxik kqabʼan oj are che kqakowirisaj más ri qakojonik chrij ri Jehová (Heb. 10:38, 39). w20.09 18 párrs. 16-18

Are chiʼ kʼo ubʼanik rukʼ ri kraj ri Jehová, weneʼ kukoj ri ruxlabʼixel rech ri kʼo taqanik pa kiqʼabʼ kkibʼan ri kraj areʼ. Ri winaq kekunik kkibʼan bʼi ubʼe jun nimaʼ rech kbʼe jawiʼ kkaj wi e areʼ. Junam rukʼ wariʼ, Jehová kkunik kukoj ri ruxlabʼixel rech kukʼex ri kichomanik ri qʼatal taq tzij rech kkibʼan ri kraj areʼ. Rukʼ wariʼ ri winaq riʼ kkichaʼ ubʼanik jastaq che kuya utzilal chke ri upatanelabʼ ri Dios (chajunamisaj rukʼ Esd. 7:21, 25, 26). ¿Jas rajawaxik kqabʼan oj? Kojkunik kqabʼan «chʼawem rukʼ Dios pa kiwiʼ ri e qʼatal taq tzij y konojel ri kʼo taqanik pakiqʼabʼ» are chiʼ kkichaʼ ubʼanik jastaq che kubʼan kʼax che ri qachak che ri Dios (1 Tim. 2:1, 2; Neh. 1:11). Junam che xkibʼan ri cristianos re ri nabʼe siglo, kqabʼan qachʼawem pa kiwiʼ ri e qachalal che e kʼo pa ri cárcel (Hechos 12:5; Heb. 13:3). w20.11 15 párrs. 13, 14

We oj xojyaʼow ri etaʼmanik re ri Biblia che ri winaq che kubʼan uqasanjaʼ más kojkikot riʼ (1 Tes. 2:19, 20). Ri tijoxelabʼ che kʼateʼ xkibʼan kiqasanjaʼ kejunamataj rukʼ jun «wuj» che xaq xiw ta utz kchʼaw chrij ri xyaʼow etaʼmanik che xaneʼ xuqujeʼ chkij konojel ri e kʼo pa ri congregación (2 Cor. 3:1-3). Sibʼalaj kojkikotik che pa ri kajibʼ junabʼ kanoq kyaʼ etaʼmanik chrij ri Biblia chke 10.000.000 winaq pa ronojel ri uwach Ulew. Y pa ri tiempo riʼ pa ronojel junabʼ kkibʼan kiqasanjaʼ más che 280.000 winaq. Junam che kqilo, e kʼo na kʼi millones tijoxelabʼ che kekunik kkibʼan kiqasanjaʼ. ¿Jas kqabʼan che kitoʼik? Jehová sibʼalaj kʼo upaciencia rumal laʼ uyaʼom na tiempo chke ri winaq rech keʼux tijoxelabʼ re ri Cristo. Ri tiempo tajin kkʼisik, rumal laʼ rajawaxik kqakoj qachuqʼabʼ che kitoʼik konojel rech aninaq kekʼiy pa ri kikojonik y kkibʼan kiqasanjaʼ (1 Cor. 7:29a; 1 Ped. 4:7). w20.10 6 párrs. 1, 2

Ri qʼatal tzij Saúl xunimaj ta ri Jehová. Are chiʼ ri profeta Samuel xupixbʼej, xuya ta chi ribʼ pa ri umak. Xaneʼ xaq xutzukuj ri xubʼij rech kkʼajisax ta uwach rumal ri xubʼano y xuqʼabʼaj chkij nikʼaj chik (1 Sam. 15:13-24). Are ta ri nabʼe mul che jeʼ kubʼan wariʼ ri Saúl (1 Sam. 13:10-14). Sibʼalaj bʼisobʼal, che xuyaʼo xkʼiy ri nimal pa ranimaʼ. Rumal che xukʼex ta ri uchomanik, xpixbʼexik y xxutux rumal ri Jehová. Rech kʼo kqetaʼmaj chrij ri xukʼulmaj ri Saúl, utz kojchoman chrij ri preguntas riʼ: «¿La xaq kintzukuj ri kinbʼij rech kinnimaj ta ri e pixabʼ che kinsikʼij pa ri Biblia? ¿La kinchomaj che nim ta ubʼanik ri kinkʼulmaj we kinniman taj? ¿La kinqʼabʼaj chkij nikʼaj chik ri kinbʼano?». We tajin kqabʼan ri kkibʼij ri preguntas, rajawaxik kqakʼex ri qachomanik y ri qabʼantajik. We kqakʼex taj, kkʼiy riʼ ri nimal pa qanimaʼ y Jehová kraj ta chi riʼ kux qachiʼl. w20.11 20 párrs. 4, 5

Ali ala rajawaxik kachaʼ jachin kapatanij. Rajawaxik kachʼobʼo jachin ri Jehová, jas ri urayibʼal y jas kabʼan che ubʼanik ri urayibʼal (Rom. 12:2). Xaq jeriʼ katkunik kachaʼ ubʼanik ri más nim ubʼanik pa ri akʼaslemal: upatanexik ri Jehová (Jos. 24:15). We kasikʼij y kanikʼoj ri Biblia amaqʼel, ri aloqʼoqʼenik y ri akojonik chrij ri Jehová kubʼan más ko. Chakojoʼ ri akʼaslemal che ubʼanik ri urayibʼal ri Jehová. Ri e winaq che kkipatanij ta ri Jehová kkibʼij che kariq kikotemal we are kabʼan ri kawaj. Are kʼu ri qastzij are che ri kkikoj ri kikʼaslemal che utzukuxik qʼinomal xa kkibʼan «kʼiʼalaj kʼax chbʼil kibʼ» (1 Tim. 6:9, 10). Are kʼu, we kata ri kubʼij ri Jehová y kachaʼ ubʼanik nabʼe ri urayibʼal «ronojel ri kabʼano utz kel na» (Jos. 1:8). w20.10 30, 31 párrs. 17, 18

Pa ri nabʼe siglo. Ri xuya ubʼixik ri Jesús xuya keyebʼal ri winaq. Xubʼij chke ri utijoxelabʼ che kkitzijoj ri utzij ri Dios che areʼ xumaj kan ubʼanik y kkiya ubʼixik kʼa «pa taq ri tinamit ri sibʼalaj naj e kʼo wi cho ronojel ri uwach Ulew» (Hech. 1:8). Qastzij che kekun taj kkibʼan wajun chak riʼ xaq kitukel. Kajwataj ri utobʼanik «ri ruxlabʼal ri Dios» che xutzujuj kan ri Jesús chke (Juan 14:26; Zac. 4:6). Pa ri Pentecostés re ri junabʼ 33 xyaʼ ri uxlabʼixel pa kiwiʼ ri utijoxelabʼ ri Jesús. Rukʼ ri utobʼanik ri uxlabʼixel, chanim xkimaj utzijoxik ri utzalaj taq tzij y xa pa jubʼiqʼ tiempo miles winaq utz xkita ri utzalaj taq tzij (Hech. 2:41; 4:4). Y, are chiʼ xpe ri kʼax, xkixibʼij ta kibʼ. Xaneʼ xkitaʼ utobʼanik ri Dios y xkibʼan kichʼawem che: «Yaʼ la chke ri e pataninel taq ech la chi kkikoj kichuqʼabʼ che ubʼixik ri tzij la, ma ta kkʼixeʼj kibʼ». Rumal laʼ, ri Dios xuya ri ruxlabʼixel pa kiwiʼ y e areʼ «xkikoj kʼu kichuqʼabʼ che utzijoxik ri utzij ri Dios» (Hech. 4:18-20, 29, 31). w20.10 21 párrs. 4, 5

Rech kʼo qakojonik chrij ri kʼastajibʼal rajawaxik nabʼe kqakojo che qastzij xkʼastaj ri Jesús. ¿Jasche qas qetaʼm che xkʼastajisax rumal ri Jehová? E kʼi winaq xeʼilowik che xkʼastajisax ri Jesús (1 Cor. 15:5-7). Ri apóstol Pablo xubʼij che ri nabʼe xilowik are ri Cefas, kraj kubʼij, ri apóstol Pedro. Jun jupuq tijoxelabʼ xuqujeʼ xkibʼij che Pedro xril ri Jesús are chiʼ walajisam chik (Luc. 24:33, 34). Xuqujeʼ, ri apóstoles xkibʼij che xkʼastajisax ri Jesús. «Kʼateʼ riʼ xukʼut chi ribʼ chkiwach nikʼaj qachalal chik ri e kʼo na chuwach jobʼ cientos», weneʼ are chiʼ xkiriq kibʼ pa Galilea che kubʼij pa Mateo 28:16-20. Xuqujeʼ «xukʼut ribʼ chuwach ri Santiago», ri rachalal, pa ri tiempo riʼ ukojom taj che ri Jesús are ri Mesías (Juan 7:5). Are kʼu, are chiʼ xrilo che kʼastajisam chik, xkojon chrij. Nim ubʼanik che are chiʼ ri Pablo xutzʼibʼaj wajun carta —chunaqaj ri junabʼ 55—, kʼi chke ri xeʼilow ri Jesús are chiʼ walajisam chik kʼa e kʼasal na. Rumal laʼ ri qas ta kekojon chrij ri kʼastajibʼal kekun riʼ kkita chke. w20.12 3 párrs. 5, 7, 8

Chqatzukuj ri utobʼanik ri Jehová. Are chiʼ oj yawabʼ kʼax ukʼutik kikotemal, más na we are jun yabʼil che kkunataj taj. Qastzij, kimik ri Jehová kubʼan ta jun milagro rech kojukunaj, are kʼu kukubʼsaj qakʼuʼx y kuya qachuqʼabʼ rech kqachʼij ri kʼax (Sal. 94:19). ¿Jas kubʼan che qatoʼik? Weneʼ keʼukoj qachalal che kojkitoʼ che uloqʼik kan jujun jastaq qech o kojkitoʼ che ri jastaq qe pa ri qachoch. Xuqujeʼ kkunik keʼukoj ri qachalal rech kkibʼan kichʼawem qukʼ. Xuqujeʼ kkunik kubʼano che knaʼtaj ri e tzij chqe che kukubʼsaj qakʼuʼx che kʼo pa ri uTzij, junam rukʼ ri utzalaj kʼaslemal che kqariq na cho ri uwach Ulew che kʼo ta chi yabʼil ni kʼaxkʼolil (Rom. 15:4). Weneʼ rumal jun yabʼil o rumal che nim chi kijunabʼ, kekun ta chik kkibʼan más che upatanixik ri Dios, y wariʼ kubʼano che sibʼalaj kebʼisonik. Paneʼ jeriʼ, e kʼi kkitzukuj ri kkibʼan che utzijoxik utzij ri Dios. Jun qachalal Laurel ubʼiʼ xkʼojiʼ 37 junabʼ pa jun máquina kbʼix pulmón de acero che. Xuqujeʼ, xuriq cáncer y xbʼan chi nikʼaj operaciones che, y xel lo nikʼaj chi yabʼil che ri utzʼumal che kekunataj taj. Paneʼ sibʼalaj kʼax xriqitaj wi, xuya ta kan utzijoxik utzij ri Dios. Xutzijoj utzij ri Dios chke ri enfermeros y ri ketobʼan kukʼ are chiʼ keʼopan cho rachoch. Xeʼutoʼ 17 winaq rech xeʼux testigos rech Jehová. w20.12 24 párr. 9; 25 párr. 12

Chunaqaj ri junabʼ 56. E kʼi winaq xkijururej bʼi ri Pablo chrij ri templo re Jerusalén y xkaj xkikamisaj. Chukabʼ qʼij, are chiʼ xkʼam bʼi chuwach ri Sanedrín, xa jubʼiqʼ xraj che ri ukʼulel xkikamisaj (Hech. 21:30-32; 22:30; 23:6-10). Are chiʼ tajin kukʼulmaj wariʼ, weneʼ ri Pablo xuchomaj: «¿Kʼa jampaʼ tiempo kinchʼij na wajun kʼax riʼ?». Qas qʼalaj che kajwataj tobʼanik che. ¿Jas xbʼan che utoʼik ri Pablo? Ri chaqʼabʼ chiʼ kʼo chi pa ri cárcel, ri Jesús xukʼut ribʼ chuwach y xubʼij che: «Chajikibʼaʼ akʼuʼx, Pablo. Jas ri xabʼan pa Jerusalén xinaqʼalajisaj chkiwach ri winaq, jeriʼ rajawaxik xuqujeʼ chi kinaqʼalajisaj na pa Roma» (Hech. 23:11). Are laʼ ri tzij che kajwataj che ri Pablo. Ri Jesús xubʼij che ri Pablo che utz ri xubʼano are chiʼ xtzijon chrij pa Jerusalén y xutzujuj che kʼo ta kukʼulmaj pa ri bʼe are chiʼ kbʼe pa Roma, che chilaʼ xuqujeʼ kutzijoj wi ri utzij ri Dios. Are chiʼ xbʼix ri tzujunik riʼ che, qastzij riʼ che xuya uchuqʼabʼ y xunaʼo che sibʼalaj chajitalik junam rukʼ jun alaj neʼ che qʼalum rumal ri utat. w20.11 12 párrs. 1, 3; 13 párr. 4

Ri qeyebʼal chrij ri uQʼatbʼal tzij ri Dios xaq junam rukʼ jun ancla che ko takʼal pa ri qanimaʼ, paneʼ kqariq kʼax y kojbʼisonik. Chatchoman chrij ri kubʼan na ri Jehová pa ri petinaq ¿jas kubʼan na? Kusach na uwach ri chomanik che kkibʼan kʼax chqe (Is. 65:17). Chatchoman chrij ri kʼakʼ uwach Ulew, ri kkʼojiʼ wi jamaril y kkʼulmataj ta chi itzel taq jastaq (Miq. 4:4). Jun chi jastaq che kuya tobʼanik chawe rech amaqʼel katchoman chrij ri aweyebʼal are che katzijoj chke nikʼaj chik. Rumal laʼ, chakojoʼ achuqʼabʼ che utzijoxik ri utzij ri Dios y che kitoʼik ri winaq rech keʼux Testigos. We jeʼ kabʼano, katkunik kawetaʼmaj chi qastzij kʼo ri kulbʼal akʼuʼx rumal che xakoj achuqʼabʼ kʼa pa ri kʼisbʼal (Heb. 6:11). Rumal che más tajin knaqajin ri kʼisbʼal ke ri itzel taq winaq, kqariq na más kʼax y bʼis, y weneʼ sibʼalaj kojel na chʼuʼj rumal ri e jastaq. Ri kojtoʼw chuwach ri kʼax y che kojel ta chʼuʼj chkiwach are che kqakubʼsaj qakʼuʼx chrij ri Jehová, chrij ta ri kojkun oj che ubʼanik. Chqakʼutuʼ rukʼ ri kqabʼano che kqakoj ri tzujunik ubʼanom ri Jehová, kubʼij: «Pa ri jororemal, pa ri jikibʼan kʼuxaj kʼo wi ri ichuqʼabʼ» (Is. 30:15). w21.01 7 párrs. 17, 18

Pa Santiago 5:11 kqilo che kjunamisax ri nimalaj uloqʼoqʼebʼal ri Jehová rukʼ jun chi ubʼantajik che utz kqilo: ri toqʼobʼisal wachaj (Éx. 34:6). Ri kubʼan ri Jehová che ukʼutik wajun bʼantajik are che kukuy ri qamak (Sal. 51:1). Are kʼu, chiʼ ri Biblia kubʼij che kutoqʼobʼisaj wachaj, xaq xiw ta kchʼaw chrij che kukuy makaj. Ri toqʼobʼisal wachaj xuqujeʼ are jun bʼantajik che kunaʼ jun winaq y wariʼ kubʼano che kraj kutoʼ jun chik che tajin kuriq kʼax. Ri Biblia kubʼij che más nim na ri kunaʼ ri Jehová che qatoʼik chuwach ri kunaʼ jun nan che ri ral (Is. 49:15). Are chiʼ kqariq kʼax, ri utoqʼobʼisal wachaj ri Jehová kubʼan che, che kraj kojutoʼo (Sal. 37:39; 1 Cor. 10:13). Oj kojkunik kqesaj uwach ri utoqʼobʼisal wachaj are chiʼ kqakuy kimak ri qachalal y kqakʼol ta oyowal pa qanimaʼ are chiʼ kkibʼan jun jastaq che kubʼan kʼax chqe (Efes. 4:32). Are kʼu ri más nim ubʼanik are che keqatoʼ pa ri e kʼax kkiriqo. Je wariʼ tajin kqesaj uwach ri Jehová, che nim ri uloqʼoqʼebʼal (Efes. 5:1). w21.01 21 párr. 5

Jun kʼamal bʼe pa ri familia rajawaxik kukoj utz chomanik. Rajawaxik che kukoj ta nim tiempo pa ri uchak, rumal che we je kubʼano krilij ta chi riʼ ri kajwataj che ri kikojonik y ri kkinaʼ ri e kʼo pa ri ufamilia. Jehová kojutijoj y kojupixbʼej rumal che kraj che kqariq utzil pa ri qakʼaslemal (Heb. 12:7-9). Ri Jesús junam rukʼ ri uTat, xeʼutijoj y xeʼupixbʼej rukʼ nimalaj loqʼoqʼebʼal ri xkʼojiʼ utaqanik pa kiwiʼ (Juan 15:14, 15). Xuqujeʼ ko xeʼupixbʼej are kʼu rukʼ loqʼoqʼebʼal xubʼano (Mat. 20:24-28). Retaʼm che oj ajmakibʼ y jujun mul kqabʼan jastaq che utz taj (Mat. 26:41). Ri kʼamal bʼe pa ri familia che kresaj uwach ri Jehová y ri Jesús ksach ta che, che ri rixoqil y ri e ralkʼwal xa e ajmakibʼ, rumal laʼ aninaq ta kpe royowal kukʼ (Col. 3:19). Xaneʼ, kubʼan ri pixabʼ che kʼo pa Gálatas 6:1 y «rukʼ uchʼuchʼujil [r]animaʼ» keʼupixbʼej, ksach ta che, che areʼ xuqujeʼ ajmak. Junam rukʼ ri Jesús, retaʼm che ri más nim ubʼanik are che kuya jun utz kʼutbʼal chkiwach rukʼ ri kubʼano. w21.02 6, 7 párrs. 16-18

Rumal ri ukamikal ri Jesús, Jehová xutoj ri kimak konojel ri e kʼo pa ri congregación y ri winaq che kekojon chrij wajun tojbʼal mak (Mar. 10:45; Hech. 20:28; 1 Cor. 15:21, 22). Rumal che ri Cristo xkam rumal qech, taqal che, che are xkoj che kʼamal bʼe pa uwiʼ ri congregación rumal ri Jehová. Rumal laʼ, ri Jesús kʼo taqanik pa uqʼabʼ che ubʼixik ri rajawaxik kkibʼan ri winaq, ri familias y ronojel ri congregación, y rech krilo che qas kbʼan ri kubʼij (Gál. 6:2). Are kʼu areʼ xaq xiw ta kuya taqanik chqe: kojutzuqu y kojuchajij pa qajujunal (Efes. 5:29). Ri e qachalal ixoqibʼ kkikʼutu che nim kkil wi ri utaqanik ri Cristo are chiʼ keniman chke ri achijabʼ che e ukojom rech kkichajij ri e kʼo pa ri congregación. Ri e qachalal achijabʼ kkikʼutu che kkichʼobʼ ri kraj kubʼij ukojik ri taqanik yaʼom pa kiqʼabʼ are chiʼ nim kekil wi ri e qachalal ixoqibʼ. Are chiʼ qonojel ri oj kʼo pa ri congregación kqachʼobʼo y nim kqil wi ri taqanik uyaʼom ri Jehová, kʼo jamaril pa ri congregación. Y, ri más nim ubʼanik, are che kqaya uqʼij ri loqʼalaj qaDios Jehová che kʼo pa ri kaj. w21.02 18, 19 párrs. 14-17

Chqanikʼoj jun chi kʼax che xukʼulmaj ri David. Jumul, areʼ y ri rajchʼojabʼ kowam kibʼ chuwach ri Saúl, xekiya kan ri kifamilias rech xebʼe pa jun chʼoj. Are chiʼ e kʼo pa ri chʼoj, jujun taq kikʼulel xekibʼana kʼax chke ri e kʼo kan pa ri kachoch y xekikʼam bʼi ri kifamilias. Xkun ta riʼ ri David xuchomaj che kkunik keʼutzalij lo ri kifamilias rumal che are jun ajchʼoj nim retaʼmabʼal. Are kʼu, are xutzukuj ri utobʼanik ri Jehová. Xubʼan ri pregunta che ri Jehová: «¿La kinbʼe che kiterneʼxik ri juqʼat elaqʼomabʼ riʼ?». Ri Jehová xubʼij che, che kbʼek y che qas utz kel ri kubʼano (1 Sam. 30:7-10). ¿Jas katkunik kawetaʼmaj chrij wariʼ? Chataʼ anoʼj are chiʼ majaʼ kachaʼ ubʼanik jun jastaq. Chatchʼaw kukʼ ri atat anan o kukʼ kʼamal taq bʼe che kʼo nim ketaʼmabʼal. E areʼ kekunik kkiya anojibʼal. Are ri Jehová e kojowinaq ri kʼamal taq bʼe y kukubʼsaj ukʼuʼx chkij, rumal laʼ at xuqujeʼ katkunik kakubʼsaj akʼuʼx chkij. E «sipanik» uyaʼom che ri congregación (Efes. 4:8). We kabʼan awe ri kkibʼan pa ri kikojonik y qas kaya axikin che ri nojibʼal che kkiya chawe, katkunik kachaʼ utz taq jastaq pa ri akʼaslemal. w21.03 4, 5 párrs. 10, 11

Ri Jesús xubʼij che we kqabʼan ta pa ri qakʼaslemal ri kqetaʼmaj, kojjunamataj rukʼ jun achi che kuyak ri rachoch pa uwiʼ ri sanyabʼ. Sibʼalaj kchakunik are kʼu kʼo ta kupatanij ri kubʼano. ¿Jasche? Rumal che are chiʼ kubʼan kaqiqʼ jabʼ y knimar uwach ri jaʼ ri rachoch ri achi ktzaqik (Mat. 7:24-27). Xaq junam rukʼ, we kqabʼan ta pa qakʼaslemal ri kqetaʼmaj, kʼo ta kupatanij riʼ ri chuqʼabʼ qakojom. Are chiʼ kqariq kʼax o kojoqotax rukʼ itzelal, kʼo ta uchuqʼabʼ riʼ ri qakojonik. Rumal laʼ, we kqanikʼoj ri Biblia y kqakoj pa ri qakʼaslemal ri kqetaʼmaj, kojkunik kqachaʼ ubʼanik utz jastaq pa ri qakʼaslemal, kojkʼojiʼ más pa jamaril y kkowir más ri qakojonik (Is. 48:17, 18). Rech rukʼ sukʼilal kqaqʼaxej ri kʼax, rajawaxik rukʼ ronojel qanimaʼ kqabʼan qachʼawem che ri Jehová y utz unikʼoxik ri Biblia kqabʼan ronojel qʼij. Rajawaxik ksach ta chqe che ri jastaq más nim ubʼanik kqabʼano, are uyaʼik uqʼij ri Jehová. Qas qetaʼm che areʼ kojuya ta kan qatukel y kʼo ta jun jastaq kbʼanowik che mat kojraj chik (Heb 13:5, 6). w21.03 15 párr. 6; 18 párr. 20