Junio

Ri ajtijabʼ rajawaxik rukʼ ronojel kanimaʼ keʼok il chke ri tijoxelabʼ. Rajawaxik kkilo che kux na jun kachalal pa ri kikojonik. Ri tijoxelabʼ kʼax kkibʼan che uyaʼik kan ri e kachiʼl che kkipatanij ta ri Jehová y kʼax kkibʼan che ukʼexik ri kikʼaslemal. Ri utz taq ajtijabʼ kkitzukuj utz taq achilanik pa ri congregación chke ri tijoxelabʼ. Jeriʼ ri tijoxelabʼ kkiriq tobʼanik pa ri utinamit ri Dios che keʼutoʼ pa ri kikojonik y pa ri kikʼaslemal. Kqaj che ri tijoxelabʼ kkinaʼo che qonojel kqaj kekʼojiʼ pa ri congregación y che are jun chke ri qafamilia espiritual. We kqatoʼo rech utz krilo kkʼojiʼ pa ri utinamit ri Dios, más kʼax ta kubʼan riʼ kuya kan ri achilanik che kkito ta che uloqʼoqʼexik ri Jehová (Prov. 13:20). We ri e rachiʼl kpe koyowal che, retaʼm riʼ che kkunik kuriq utz taq rachiʼl pa ri utinamit ri Jehová (Mar. 10:29, 30; 1 Ped. 4:4). w20.10 17 párrs. 10, 11

Rajawaxik kojux rachiʼl ri Jesús rech kkʼojiʼ jun utzalaj qachilanik rukʼ ri Jehová. ¿Jasche kqabʼij wariʼ? Chqilaʼ kebʼ rumal. Nabʼe, Jesús xubʼij chke ri utijoxelabʼ: «Qas areʼ kʼu ri Tataxel kixuloqʼoqʼej, rumal rech chi iniloqʼoqʼem» (Juan 16:27). Xuqujeʼ xubʼij chke: «Man kʼo ta jun kopan rukʼ ri Tataxel, we ta ma ta wumal in» (Juan 14:6). We kqaj kojux rachiʼl ri Jehová are kʼu kqaj taj kojux rachiʼl ri Jesús xaq junam che kqaj kojok pa jun edificio are kʼu kqaj taj kojqʼax pa ri uchiʼ ja. Jesús xukoj jun kʼutbʼal che kjunamataj rukʼ wariʼ are chiʼ xubʼij: «In riʼ ri okibʼal ri keqʼax wi ri chij» (Juan 10:7). Ri ukabʼ, are che Jesús qas xukʼut ri ubʼantajik ri uTat. Xubʼij chke ri utijoxelabʼ: «Jachin ri rilom nuwach in, rilom uwach ri Tataxel» (Juan 14:9). Rumal laʼ rech kqetaʼmaj uwach ri Jehová rajawaxik kqetaʼmaj uwach ri Jesús. Are chiʼ más kqetaʼmaj uwach ri Jesús, más kqaloqʼoqʼej. Xuqujeʼ, are chiʼ más kojqebʼ rukʼ, más kqaloqʼoqʼej ri uTat Jehová. w20.04 21, 22 párrs. 5, 6

Ri e qachalal che e kʼo cho chʼat o pa jun silla de ruedas, che kʼo ta chi kichuqʼabʼ kebʼinik o kkil ta chik. ¿La kekunik kkitij anim kukʼ ri alabʼom alitomabʼ che kʼo ta kʼaxkʼolil pa ri kibʼaqil? Jeʼ kekunik. E kʼi qachalal che nim chi kijunabʼ xuqujeʼ kiriqom jun yabʼil tajin kkitij na anim pa ri kʼaslemal, are kʼu rukʼ ta kichuqʼabʼ kkibʼano rukʼ ri utobʼanik ri Jehová. Kkita ri e riqbʼal ibʼ pa teléfono o kkil pa Internet. Ketobʼan che kitzukuxik winaq che kkaj kketaʼmaj chrij ri Jehová junam rukʼ ri kifamiliares, ri e kunanelabʼ xuqujeʼ ri enfermeras. Kqaya taj che ri yabʼil o ri rijobʼik kubʼano che kojqaj pa ri qakojonik xuqujeʼ kqachomaj taj che kojkun taj kqatij anim pa ri bʼe rech ri kʼaslemal. Ri Jehová kojuloqʼoqʼej rumal che kʼo qakojonik chrij xuqujeʼ ri qabʼanom che upatanexik. Chuwach ri e jastaq riʼ, más kajwataj ri utobʼanik ri Jehová chqe, areʼ kojuya ta kan qatukel (Sal. 9:10). Xaneʼ más kqebʼ qukʼ. w20.04 29 párrs. 16, 17

¿Jas chrij kojchʼaw wi rukʼ jun winaq che kʼo chi ukojonem? Chawilaʼ jas ri utz kkito. Weneʼ xa jun Dios kkiqʼijilaj, kkikojo che ri Jesús are Kolonel qe o kkikojo che ri kʼax kʼo cho ri uwach Ulew ksach na uwach. Chojtzijon chrij ri etaʼmanik che kjunamataj rukʼ ri kikojonik rech kojkitatabʼej are chiʼ kqatzijoj ri utzij ri Dios chke. Chnaʼtaj chqe che weneʼ ri winaq kkikoj ta ronojel ri kbʼix chke pa ri kikojonem. We ya qetaʼm chi ri kojonem kebʼe wi, chqakojoʼ qachuqʼabʼ rech kqachʼobʼ ri kkikojo. Jun qachalal misionero kubʼij che e kʼo jujun winaq kekojon chrij ri trinidad are kʼu kkikoj taj che e xa jun Dios ri Tat, ri Kʼojol xuqujeʼ ri uxlabʼixel. Xuqujeʼ kubʼij: «Are chiʼ jun kretaʼmaj wariʼ kubʼano che kʼax ta kubʼan che utzukuxik jun etaʼmanik che kjunamataj rukʼ ri kkikojo». Rumal laʼ, chqakojoʼ qachuqʼabʼ rech kqil ri kkikoj ri winaq. Junam rukʼ ri apóstol Pablo, kqakoj qachuqʼabʼ «che kipatanexik konojel ri winaq» (1 Cor. 9:19-22). w20.04 10 párrs. 9, 10

Ri Daniel xuqujeʼ Juan kkiqʼalajisaj che ri kepatanin che ri Jehová xuqujeʼ che ri Jesús kekolotaj kan pa ri tiempo re kʼaxkʼolil. Rumal waʼ, kojkunik kqil ri petinaq rukʼ kubʼsal kʼuʼx. Daniel xubʼij che ri kekolotaj kanoq «tzʼibʼatal ri kibʼiʼ chupam ri wuj». ¿Jas rajawaxik kqabʼano rech ri qabʼiʼ kʼo chupam ri wuj? Rajawaxik kqakʼutu che kʼo qakojonik chrij ri Jesús, ri alaj uChij ri Dios (Juan 1:29). Rajawaxik kqajach ri qakʼaslemal che ri Dios xuqujeʼ kqabʼan qaqasanjaʼ (1 Ped. 3:21). Xuqujeʼ, rajawaxik che kqatoʼ ri uQʼatbʼal tzij ri Dios, kqakoj qachuqʼabʼ che kitoʼik nikʼaj chik rech kketaʼmaj uwach ri Jehová. Kimik are tiempo che kqakubʼsaj más qakʼuʼx chrij ri Jehová xuqujeʼ chrij ri utinamit. Are tiempo che kqatoʼ ri uQʼatbʼal tzij ri Dios. We kqabʼano, kojkolotaj kan riʼ are chiʼ ri uQʼatbʼal tzij ri Dios kusachisaj uwach ri qʼatal tzij re ri norte xuqujeʼ re ri sur. w20.05 16 párrs. 18, 19

Adán y Eva ketaʼm ri ubʼiʼ ri Jehová, xuqujeʼ ketaʼm che are yaʼowinaq ri kikʼaslemal, ri kotzʼiʼjalaj ulew che kekʼasiʼ chuwach xuqujeʼ jun utzalaj kikʼulanem (Gén. 1:26-28; 2:18). Are kʼu, ¿la xechoman chrij ronojel ri xuya ri Jehová chke? ¿La xkinimarisaj ri kiloqʼoqʼebʼal xuqujeʼ ri kimaltyoxinik che kkinaʼ che? Xqʼalajinik are chiʼ xekoj pa taqchibʼal rumal ri ukʼulel ri Dios. Satanás xukoj jun kumatz rech xubʼij wariʼ che ri Eva: «¿La ubʼim ri Dios chiwe chi man kitij ta ri kiwach ri cheʼ ri e kʼo pa ri tikonijibʼal?» (Gén. 2:16, 17; 3:1). Qas xnaʼw che ubʼanik ri pregunta. Ri ubʼim ri Dios are che kekunik kkitij uwach ronojel ri cheʼ xa jun yaʼtal taj kkitijo (Gén. 2:9). Ri Satanás xubʼij ta ri qastzij jetaneʼ xuya ubʼixik che ri Dios kuya ta ronojel chke. Weneʼ Eva xuchomaj che kʼo jun utz jastaq che ri Dios tajin ta kuya chke. w20.06 3, 4 párrs. 8, 9

E kʼo qachalal sibʼalaj kpe koyowal rumal jun kʼax xbʼan chke rumal jun chik. Ri apóstol Pablo xubʼij che weneʼ jujun mul kʼo rumal che kpe qoyowal che jun chik. Weneʼ kʼutum ta sukʼilal chqe. Are kʼu, we kqachajij ta qibʼ, kqakʼol oyowal pa qanimaʼ wariʼ kubʼano che kqaya kan ri utinamit ri Jehová. Jun qachalal re Sudamérica, ubʼiʼ Pablo, xqʼabʼax chrij che xubʼan jun itzel jastaq, rumal wariʼ, xesax ri eqelen yaʼom che. ¿Jas xubʼano? Areʼ kubʼij: «Sibʼalaj xpe woyowal rumal laʼ nojimal chi nojimal xinya kan ri congregación». Ri kibʼanom kan jun mak ojer weneʼ kkichomaj che kuyum ta ri kimak xuqujeʼ che taqal ta ri uloqʼoqʼenik ri Dios chke. Paneʼ kiyaʼom kan ubʼanik ri kimak xuqujeʼ kʼutum toqʼobʼisal wachaj chke, weneʼ kkinaʼo che taqal ta chke kekʼojiʼ pa ri utinamit ri Dios. ¿Jas kachomaj chkij ri qachalal achijabʼ e ixoqibʼ che tajin kkikʼulmaj wariʼ? w20.06 19 párrs. 6, 7

Rajawaxik kqachʼobʼ ri kubʼan kʼax chqe y kqachajij qibʼ chuwach (Heb. 5:14). Jun kʼutbʼal rajawaxik qas kqachaʼ ri etzʼanem kqabʼano. Kʼi chke ri kyaʼ pa ri televisión y ri películas kʼo inmoralidad chupam. Ri oj cristianos kqaxutuj ri etzʼanem riʼ rumal che nojimal chi nojimal kuqasaj uchuqʼabʼ ri qaloqʼoqʼebʼal che ri Jehová. Qetaʼm che ri Dios itzel kril ri inmoralidad y ri winaq che kkibʼan ri makaj riʼ rumal che kkiriq kʼax e areʼ y ri nikʼaj chik (Efes. 5:5, 6). Rajawaxik kqachʼobʼo che ri apóstatas kkimol tzij chkij ri qachalal y kkibʼij jastaq chrij ri utinamit ri Jehová rech kubʼan kebʼ qakʼuʼx chkij (1 Tim. 4:1, 7; 2 Tim. 2:16). Ri molom tzij riʼ kuqasaj uchuqʼabʼ ri qakojonik. Kqaya taj che ri molom tzij kojusubʼu, rumal che petinaq kukʼ winaq che «sachinaq kinoʼj xuqujeʼ man kʼo ta ri qastzij kukʼ» y xaq xiw kkaj che kkʼojiʼ chʼoj chqaxoʼl (1 Tim. 6:4, 5). E areʼ kkaj che kqakoj ri kkibʼij y kubʼan kebʼ qakʼuʼx chkij ri qachalal. w20.09 29 párrs. 13, 15

Rajawaxik che ri e kʼulanik kkiloqʼoqʼej kibʼ xuqujeʼ nim kkil wi kibʼ (Efes. 5:33). Ri Biblia kukʼut chqawach che are utz kojchoman chrij ri kojkun che uyaʼik are ta ri kyaʼ chqe (Hech. 20:35). Rech ri e kʼulanik kkiloqʼoqʼej kibʼ xuqujeʼ nim kkil kibʼ, rajawaxik e kebʼ kemachʼachʼik. Rumal ri machʼachʼem, e kʼi kʼulaj Testigos más kekikotik. Jun kʼutbʼal, jun qachalal ubʼiʼ Steven kubʼij: «We kachiʼl kibʼ, kkitoʼ la kibʼ riʼ, más na chiʼ kʼo kʼax chkixoʼl. Are ta kkibʼij ‹¿jas ri más utz chwe in?›, xaneʼ are kkibʼij ‹¿jas ri más utz chqe?›». Ri rixoqil ubʼiʼ Stephanie, xaq junam kuchomaj. Kubʼij: «Nijun kraj che kkʼojiʼ rukʼ jun winaq che ukʼulel. Are chiʼ junam ta ri qachomanik, kqakoj qachuqʼabʼ che rilik jasche xaq ta junam. Kqabʼan qachʼawem che ri Jehová, kqatzukuj tobʼanik pa ri e qawuj tekʼuriʼ kojchʼaw chrij ri kʼax. Kqakoj qachuqʼabʼ chuwach ri kʼax are ta kojchʼojin chbʼil qibʼ». We jun chke kuchomaj taj che más nim ubʼanik chuwach ri ukʼulaj kubʼano che más kekikotik. w20.07 3, 4 párrs. 5, 6

Rajawaxik che are ta kqakubʼsaj qakʼuʼx chrij ri qachuqʼabʼ o ri kojkun che ubʼanik chiʼ kqapatanij ri Jehová. Ri apóstol Pablo xkʼojiʼ pa jun nimalaj tijobʼal, rumal che ri rajtij are ri Gamaliel, jun chke ri e kʼamal bʼe judío nim ubʼanik pa ri tiempo riʼ (Hech. 5:34; 22:3). Pa jun tiempo, xkʼojiʼ utaqanik pa ri tinamit judía (Hech. 26:4). Are kʼu ronojel wariʼ xubʼan taj che xukubʼsaj ukʼuʼx chbʼil ribʼ. Pablo xubʼan ta kebʼ ukʼuʼx che uxutuxik ri jastaq che nim ubʼanik chkiwach ri nikʼaj chik (Filip. 3:8). Are kʼu, nim xutoj wi rech xux tereneʼl re ri Cristo. Itzel xil kumal ri uwinaq (Hech. 23:12-14). Xuqujeʼ ri romanos, che uwinaq, xkichʼayo xuqujeʼ xkikoj pa cárcel (Hech. 16:19-24, 37). Xuqujeʼ xubʼisoj che kʼo jastaq kkun ta che ubʼanik (Rom. 7:21-25). Are kʼu xuya taj che ri ukʼulel xuqujeʼ ri jastaq che kkun ta che ubʼanik kuqʼatej. Xaneʼ xubʼij: «Kinkikotik are taq man kʼo ta nuchuqʼabʼ». ¿Jasche? Rumal che are chiʼ xunaʼo che kʼo ta uchuqʼabʼ xril ri utobʼanik ri Dios (2 Cor. 4:7; 12:10). w20.07 16 párrs. 7, 8

Kimik rajawaxik kbʼe qakʼuʼx che utzijoxik ri utzalaj taq tzij. Ri Jesús xuya ubʼixik che wajun chak riʼ kbʼan pa kʼi lugar y xuqujeʼ kyaʼ ta kan ubʼanik are chiʼ kaminaq chik. Are chiʼ kʼastajisam chik, Jesús xukoj ri uchuqʼabʼ rech e jujun chke ri utijoxelabʼ xkichap kʼiʼalaj kar. Chilaʼ xubʼij chke che ri utzukuxik winaq rech kketaʼmaj chrij ri Dios are ri más nim ubʼanik (Juan 21:15-17). Are chiʼ majaʼ kpaqiʼ pa ri kaj, xubʼij chke ri utijoxelabʼ che ri uTzij ri Dios xaq xiw ta pa Israel ktzijox wi (Hech. 1:6-8). Chiʼ qʼaxinaq chi ri junabʼ xukʼut chuwach ri apóstol Juan pa jun visión ri kkʼulmataj «pa ri qʼij re ri Ajawaxel». Juan xril jun jastaq che xumayo: rukʼ ri kitobʼanik ri ángeles kyaʼ ubʼixik «ri junalik tzij re kolobʼal ibʼ [...] chke konojel ri nimaʼq taq tinamit, xuqujeʼ konojel amaqʼ, konojel chʼabʼal, xuqujeʼ konojel winaq» (Apoc. 1:10; 14:6). Wariʼ kukʼutu che Jehová kraj kojtobʼan che wajun chak riʼ kʼa chiʼ kubʼij che kbʼan ta chik. w20.09 9 párr. 5

Ri ufamilia ri Abrahán xuriq kʼi kʼax. Ri loqʼalaj rixoqil, Sara, kkun taj kkʼojiʼ ral. Kʼi taq junabʼ xkichʼij wariʼ. Chiʼ xqʼax ri tiempo, ri Sara xuya ri rajikʼ Agar che rixoqil ri Abrahán. Rukʼ wariʼ Agar xuya jun kalkʼwal ri Sara y Abrahán. Are kʼu, chiʼ Agar xux yawabʼ ixoq itzel xril ri Sara. Sibʼalaj xnimar ri kʼax rumal laʼ Sara xresaj bʼi ri Agar (Gén. 16:1-6). Chiʼ xqʼax ri tiempo, Sara xux yawabʼ ixoq xuya jun ralkʼwal ri rachajil, Isaac xkikoj che ubʼiʼ. Abrahán keraj ri kebʼ ukʼojol, Ismael xuqujeʼ Isaac. Are kʼu, Ismael utz ta xubʼan che rilik ri Isaac, rumal laʼ ri Abrahán xresaj bʼi ri Ismael xuqujeʼ Agar (Gén. 21:9-14). Chiʼ qʼaxinaq chi ri junabʼ, Jehová xubʼij che ri Abrahán che kuya ri Isaac che tabʼal toqʼobʼ (Gén. 22:1, 2; Heb. 11:17-19). Pa we kebʼ mul riʼ, Abrahán xukubʼsaj ukʼuʼx chrij ri Jehová che kubʼan na ri xutzujuj chkij ri ralkʼwal. w20.08 4 párrs. 9, 10

Chqachomaj ri kikotemal che kkinaʼ ri kekʼastaj loq rumal che kʼo chi jun kʼakʼ kikʼaslemal y are chiʼ kkinimaj ri sukʼalaj taq utaqanik ri Dios. Ri kkinimaj ri Dios «kkʼojiʼ na kikʼaslemal», are kʼu ri kkinimaj taj kyaʼ ta bʼe chke che kekʼojiʼ pa ri kotzʼiʼjalaj uwach Ulew rech kʼo jamaril (Is. 65:20; Juan 5:28, 29). Pa ri uQʼatbʼal tzij ri Dios, konojel ri upatanelabʼ qas kkil na ri tzujunik kubʼij pa Proverbios 10:22: «Ri utewchibʼal ri Ajawaxel qʼinomal waʼ man kʼo ta kʼu qʼoxomal keʼukʼam uloq pa re wi». Rukʼ ri utobʼanik ri ruxlabʼixel ri Jehová, kojux qʼinom pa ri qakojonik, kraj kubʼij, kojux más junam rukʼ ri Cristo rumal che nojimal chi nojimal kojux tzʼaqat taq winaq (Juan 13:15-17; Efes. 4:23). Ronojel qʼij kojux más utz taq winaq xuqujeʼ ri qacuerpo kux más utz. ¡Sibʼalaj kojkikot riʼ! (Job 33:25). w20.08 17 párrs. 11, 12

Rajawaxik knaʼtaj chqe che jujun cristianos e kʼulan taj rumal che are laʼ kichaʼom ubʼanik. Nikʼaj chik kkaj kekʼulik, are kʼu kiriqom ta ri winaq che qas utz chke. Nikʼaj chik weneʼ xa xkam ri kikʼulaj. Apastaneʼ ri rumal, kqataʼ ta chke jasche e kʼulan taj y kqabʼij ta chke che keqatoʼ che utzukuxik jun kikʼulaj. Qastzij, weneʼ jujun kkitaʼ tobʼanik chqe. Are kʼu, we kkitaʼ taj, chojchoman chrij ri kkinaʼo we kqabʼij chke (1 Tim. 5:13). Ri e qachalal che e kʼulan taj, utz kkilo che kqaqʼat ta tzij pa kiwiʼ, xaneʼ nim keqil wi rumal ri utz taq kibʼantajik. Kqabʼisoj ta kiwach. Xaneʼ nim chqilaʼ wi ri kisukʼilal. We jeʼ kqabʼano, kkichomaj ta riʼ che jetaneʼ tajin kqabʼij chke: «Man at rajawaxik ta chwe» (1 Cor. 12:21). Xaneʼ, kkilo che keqaloqʼoqʼej y nim kqil wi ri kilugar pa ri congregación. w20.08 29 párrs. 10, 14

Chiʼ qʼaxinaq chi ri tiempo, Jesús xukʼut ribʼ chuwach ri apóstol Pablo (1 Cor. 15:8). Pablo, ri kbʼix Saulo che, are chiʼ bʼenaq pa ri bʼe re Damasco xuta ri uchʼabʼal ri Jesús kʼastajinaq chik y xril pa jun visión pa ri kaj (Hech. 9:3-5). Ri xukʼulmaj are jun chi etal che qas xkʼastajisax ri Jesús (Hech. 26:12-15). E jujun winaq weneʼ sibʼalaj xkimay ri xuqʼalajisaj ri Pablo rumal che nabʼe sibʼalaj xeʼutereneʼj ri cristianos rukʼ itzelal. Are chiʼ xukojo che xkʼastajisax ri Jesús, xukoj uchuqʼabʼ che kitoʼik nikʼaj chi winaq rech kkikojo che qastzij xkʼastaj ri Jesús. Are chiʼ xuya ubʼixik chrij ri ukʼastajibʼal ri Jesús, xchʼayik, xtzʼapix pa cárcel y kʼi mul xyojyobʼ ri barco che xbʼe wi (1 Cor. 15:9-11; 2 Cor. 11:23-27). Qas xukojo che xkʼastaj ri Jesús rumal laʼ xuya ri ukʼaslemal pa kamikal che utzijoxik. ¿La mat qastzij che retaʼmaxik ronojel ri xqilo kubʼano che kojkojon chrij ri ukʼastajibʼal ri Jesús? Y ¿la mat qastzij che kukowirisaj ri qakojonik chrij ri kʼastajibʼal? w20.12 3 párrs. 8-10

Chqachomaj wariʼ: «¿La kinkoj nuchuqʼabʼ kinbʼe pa ronojel ri riqbʼal ibʼ?». Chilaʼ kqariq wi qachuqʼabʼ rech kqaya ta kan upatanexik ri Jehová y kqariq ri kikotemal che kuya kachilaxik ri qachalal (Mat. 11:28). Xuqujeʼ utz kqachomaj wariʼ: «¿La amaqʼel kinnikʼoj ri Biblia?». We oj kʼo kukʼ ri qafamilia, ¿la ronojel semanas kqabʼan ri qaqʼijilanik pa ri familia? O we qatukel, ¿la kqatas qatiempo che unikʼoxik ri Biblia junam ri kkibʼan ri familias? ¿La kqakoj qachuqʼabʼ che utzijoxik y ukʼutik chrij ri Dios chkiwach nikʼaj chik? ¿Jasche rajawaxik kojchoman chrij ri preguntas riʼ? Ri Biblia kubʼij che Jehová kril ri kʼo pa ri qachomanik y pa ri qanimaʼ. Rumal laʼ rajawaxik che oj je kqabʼano (1 Crón. 28:9). We kqilo che rajawaxik kqakʼex ri qametas, ri kqabʼano o ri kqachomaj, chqataʼ tobʼanik che ri Jehová. Kimik are ri tiempo che kqetaʼmaj ri kqabʼan chuwach ri kʼax che kpe na. w20.09 19 párrs. 19, 20

Jumul, Jesús xukoj kebʼ kʼutbʼal che kukʼut ri rajawaxik kubʼan jun rech kux utijoxel. Xchʼaw chrij jun winaq che kraj kuyak jun takʼatikalaj ja y jun qʼatal tzij che kchʼojin rukʼ jun qʼatal tzij chik. Ri kuyak ri takʼatikalaj ja xubʼij che nabʼe «ktʼuyiʼ na che rajilaxik joropaʼ ri kusach na» y ri qʼatal tzij nabʼe ktʼuyiʼ na rech krilo we ri rajchʼojabʼ kekunik kechʼakanik (Luc. 14:27-32). Jesús retaʼm che ri winaq che kraj kux utijoxel rajawaxik kuchomaj na rukʼ nojimal ri rajawaxik kubʼano. Rech ri winaq kkunik kubʼan ri xubʼij ri Jesús, rajawaxik kqaya uchuqʼabʼ rech ronojel taq semanas kutijoj ribʼ chrij ri Biblia. Rajawaxik che ri ajtij kutijoj ribʼ che uyaʼik ri etaʼmanik. Chojchoman chrij ri kriqitaj wi ri tijoxel y ri kqabʼan che ukʼutik ri kʼutunem rech qas kuchʼobʼo y kukoj pa ri ukʼaslemal (Neh. 8:8; Prov. 15:28a). w20.10 7 párr. 5; 8 párr. 7

Jesús xubʼij che rajawaxik kqakʼut chkiwach ri winaq ri xukʼut kanoq. Are kʼu, rajawaxik kqachʼobʼo che Jesús xaq xiw ta xubʼij: «Chikʼutuʼ chkiwach ronojel ri nukʼutum chiwach». Xaneʼ, xubʼij: «Chikʼutuʼ chkiwach unimaxik ronojel ri nukʼutum chiwach». We kqaj kqabʼan wariʼ, rajawaxik kqakʼut chuwach ri tijoxel ri kubʼano y ri kubʼan che ubʼanik. ¿Jas kqabʼan che utoʼik jun winaq rech kunimaj ri taqanik xuya kan ri Cristo? Are chiʼ kqaya tijonik re ri Biblia che jun winaq, kqakʼut chuwach ri kraj ri Dios kqabʼano. Are kʼu xaq xiw ta wariʼ. Rajawaxik kqakʼut chuwach rech kubʼan pa ri ukʼaslemal ri tajin kretaʼmaj (Juan 14:15; 1 Juan 2:3). Rukʼ ri kqabʼano kqakʼut chuwach ri kubʼan che unimaxik ri upixabʼ ri Dios pa ri tijobʼal, pa ri chak o ri uchaʼik ri etzʼanem. Y are chiʼ kqabʼan qachʼawem rukʼ ri tijoxel, kojkunik kqataʼ che ri Jehová che kuya ri ruxlabʼixel pa uwiʼ rech kkʼam ubʼe rumal (Juan 16:13). w20.11 2, 3 párrs. 3-5

Ri utijoxelabʼ ri Jesús xkiriq kʼax. Jun kʼutbʼal, e kʼo ta kʼi wuj re ri uTzij ri Dios kukʼ y kʼo ta tobʼanik rech kkichʼobʼ ri kubʼij junam rukʼ ri kʼo kimik. Y kkitzijoj ri utzij ri Dios chke winaq che kechʼaw chi pa nikʼaj chʼabʼal. Paneʼ kʼo ri kʼax riʼ ri tijoxelabʼ xekunik xkitzijoj ri utzij ri Dios: are chiʼ qʼaxinaq chi jujun décadas, xbʼan kunik xtzijox ri utzalaj taq tzij «pa taq ronojel kʼolbʼal cho ri uwach Ulew» (Col. 1:6, 23). Kimik, Jehová tajin kukʼam ubʼe y tajin kuya uchuqʼabʼ ri utinamit. Wariʼ kriqitaj pa ri uTzij ri Dios. Chilaʼ kuya wi ubʼixik ri xubʼan ri Jesús che utzijoxik ri utzalaj taq tzij y ri taqanik che xuya kan chke ri utijoxelabʼ chrij wariʼ (Mat. 28:19, 20). Jehová nim keril konojel ri winaq rumal laʼ xubʼij che ri utzalaj taq tzij kyaʼ ubʼixik «chke konojel ri nimaʼq taq tinamit, xuqujeʼ konojel amaqʼ, konojel chʼabʼal, xuqujeʼ konojel winaq» (Apoc. 14:6, 7). Are kraj che konojel winaq kketaʼmaj chrij ri kubʼan na ri uQʼatbʼal tzij. w20.10 21 párrs. 6-8

Ri qʼatal tzij David are jun achi che kuloqʼoqʼej «ri upixabʼ ri Ajawaxel» (Sal. 1:1-3). David retaʼm che Jehová keʼukol ri kemachʼachʼik y keraj ta ri kkibʼan nimal. Rumal laʼ xuyaʼo che ri uTaqanik ri Dios xukʼex ri uchomanik. Xutzʼibʼaj: «Kinya uqʼij ri Ajawaxel rumal chi areʼ kʼamal nubʼe, kupixbʼej ri wanimaʼ chaqʼabʼ» (Sal. 16:7). We kojmachʼachʼik, kqayaʼo che ri Biblia kukʼex ri qachomanik che utz taj rech kqabʼan ta jun itzel jastaq. Ri uTzij ri Dios kjunamataj rukʼ jun chʼabʼal che kubʼij chqe: «Jewaʼ kʼo wi ri bʼe, are chitaqej waʼ». Kubʼij chqe are chiʼ tajin kojel pa ri bʼe, o tajin kojbʼe pa ri umoxqʼabʼ o uwikiqʼabʼ (Is. 30:21). Unimaxik ri Jehová kuya kʼi utzilal chqe (Is. 48:17). Jun kʼutbʼal, kqesaj ta qakʼixbʼal rumal che kojpixbʼexik. Y kojqebʼ más rukʼ ri Jehová rumal che kqilo che kojril junam rukʼ jun loqʼalaj ralkʼwal (Heb. 12:7). w20.11 20 párrs. 6, 7

Wajun chomanik riʼ xubʼano che jeʼ xkichomaj ri cristianos re Corinto (1 Cor. 15:12). Weneʼ e nikʼaj chik xkichomaj che ri kʼastajibʼal xa jun etal. Xkichomaj che are chiʼ majaʼ keʼux cristianos, jetaneʼ e kaminaq rumal che e ajmakibʼ na; are kʼu, chiʼ keʼux cristianos, kkuyutaj ri kimak y jetaneʼ che kekʼastajik. Apastaneʼ ri rumal, we kekojon ta chrij ri kʼastajibʼal, kʼo ta upatan riʼ ri kikojonik. We ri Dios xukʼastajisaj ta ri Jesús, kuyutajinaq ta riʼ ri kimak e areʼ. Rumal laʼ ri winaq che kkikoj taj che kʼo kʼastajibʼal kekun taj kkʼojiʼ jun keyebʼal (1 Cor. 15:13-19; Heb. 9:12, 14). Ri apóstol Pablo qas xril rukʼ ubʼaqʼwach che ri Cristo «kʼastajinaq chik chkixoʼl ri kaminaqibʼ». Paneʼ e kʼo winaq e kʼastajinaq chi nabʼe chuwach ri Jesús are kʼu ri ukʼastajibʼal areʼ más utz na, rumal che ri xekʼastaj nabʼe chuwach xekam chi jumul. Pablo xuqujeʼ xubʼij che ri Jesús are ri «nabʼe wachinik chkixoʼl ri kaminaqibʼ ri kekʼastaj na». Kraj kubʼij che are ri nabʼe winaq xkʼastajisax pa uxlabʼal y are ri nabʼe xbʼe pa ri kaj (1 Cor. 15:20; Hech. 26:23; 1 Ped. 3:18, 22). w20.12 5 párrs. 11, 12

Pa ri nabʼe siglo, ri jupuq ajkʼamal bʼe re Jerusalén ojer, xechakun pa junamil rech kʼo cholajil y jamaril pa ri utinamit ri Dios (Hech. 2:42). Jun kʼutbʼal, pa taq ri junabʼ 49 xkʼulmataj jun jastaq rumal ri circuncisión, are kʼu ri jupuq ajkʼamal bʼe xkinikʼoj wariʼ rukʼ ri utobʼanik ri uxlabʼixel. We ta ri congregación xkitos kibʼ, xkʼulmataj ta kʼax riʼ che utzijoxik ri utzij ri Dios. Paneʼ ri apóstoles y ri e kʼamal bʼe judíos, are ta xkibʼan ri kʼutum chkiwach o ri kinaqʼatisabʼal. Xaneʼ are xkitzukuj ri kubʼij ri Biblia y ri utobʼanik ri ruxlabʼal ri Dios (Hech. 15:1, 2, 5-20, 28). Ri xkʼulmatajik are che Jehová xutewchij ri xkichaʼ ubʼanik, rumal laʼ xkʼojiʼ jamaril y junamil pa ri congregación y xyaʼ ta kan utzijoxik ri utzij ri Dios (Hech. 15:30, 31; 16:5). Kimik, ri upatanelabʼ ri Jehová kikojom kichuqʼabʼ rech kʼo cholajil y jamaril pa ri utinamit ri Dios. w20.10 22, 23 párrs. 11, 12

Weneʼ kqaj che kyaʼ jun eqeleʼn chqe. Are kʼu kʼo kʼi rumal che weneʼ kyaʼ ta chqe, weneʼ rumal ri qajunabʼ, jun yabʼil o nikʼaj chi jastaq. Pa jastaq junam rukʼ wariʼ, ri ukʼutbʼal ri David sibʼalaj kojutoʼo. Ri uchomam are che kuyak ri rachoch ri Dios; are kʼu chiʼ xretaʼmaj che are ta areʼ chaʼom che wajun chak, xuya ronojel ri utobʼanik che ri winaq chaʼom rumal ri Dios. Xuqujeʼ xuya kʼi oro y plata. ¡Are jun utzalaj kʼutbʼal xuya chqawach! (2 Sam. 7:12, 13; 1 Crón. 29:3-5). Pa ri tinamit re Francia jun qachalal Hugues ubʼiʼ xkun ta chik xux kʼamal bʼe rumal che xyawajik. Kkun ta chik kubʼan jastaq che kʼax ta ubʼanik pa ri rachoch. Areʼ xutzʼibʼaj: «Nabʼe sibʼalaj xinbʼisonik y xinnaʼo che kʼo ta chi nupatan. Are chiʼ xqʼax ri tiempo xinchʼobʼo che kʼo jastaq kinkun taj kinbʼano. Kwaj kinux junam rukʼ ri Gedeón y ri 300 achijabʼ che xekos taj: paneʼ in kosinaq, kinkoj na nuchuqʼabʼ» (Juec. 8:4). w20.12 25 párrs. 14, 15

Pa ri e wuj re ri Biblia che xutzʼibʼaj Juan, kchʼaw más chrij ri loqʼoqʼebʼal chkiwach ri e oxibʼ chi Evangelios. Ri xutzʼibʼaj kukʼutu che rajawaxik ri cristiano kubʼan ri jastaq rumal loqʼoqʼebʼal (1 Juan 4:10, 11). Are jun jastaq che xajwataj tiempo che ri Juan rech xretaʼmaj ukʼutik. Are chiʼ ri Juan kʼa ala na, amaqʼel taj xubʼan ri jastaq rukʼ loqʼoqʼebʼal. Jun kʼutbʼal, jumul are chiʼ ri Jesús y ri utijoxelabʼ e bʼenaq pa Jerusalén, tajin keʼokʼow pa jun alaj tinamit re Samaria, ri winaq utz ta xkibʼan che kikʼulaxik. Juan xutaʼ che ri Dios che kutaq lo qʼaqʼ pa kiwiʼ ri e winaq y ksachisax kiwach (Luc. 9:52-56). Pa jun chi mul, areʼ y Santiago ri rachalal xkibʼij che ri kinan che kubʼij che ri Jesús che kuya jun nim kikʼolbʼal pa ri uQʼatbʼal tzij. Are chiʼ ri nikʼaj chi apóstoles xketaʼmaj, sibʼalaj xpe koyowal (Mat. 20:20, 21, 24). Paneʼ ri Juan xubʼan ri jastaq riʼ, xloqʼoqʼex rumal ri Jesús (Juan 21:7). w21.01 8, 9 párrs. 3, 4

Are chiʼ ri Jehová kuchaʼ ubʼanik jun jastaq kchoman chrij ri utzilal kuya chke ri nikʼaj chik. Jun kʼutbʼal, xuya ta ri kʼaslemal, rumal che kuriq utzil areʼ, xaneʼ rech kqanaʼ oj ri kikotemal che kuya ri kʼaslemal. Kʼo ta nijun xtaqchinik rech xutaq lo ri uKʼojol che utojik ri qamak. Areʼ xuya ri uKʼojol rech kojutoʼo. Jesús xuqujeʼ xuchaʼ ubʼanik jastaq rech xeʼutoʼ ri nikʼaj chik. Jun kʼutbʼal, are chiʼ sibʼalaj kosinaq, are ta xuchaʼ ubʼanik uxlanem xaneʼ are xukʼut ri utzij ri Dios chkiwach ri winaq (Mar. 6:31-34). Jun utzalaj kʼamal bʼe pa ri familia retaʼm che kʼo jun jastaq nim ubʼanik kubʼano, ¿jas riʼ? Uchaʼik ri jastaq che kuya utzilal pa ri ufamilia, y qas utz kubʼan che rilik wariʼ. Kukoj uchuqʼabʼ rech xaq ta kuchaʼ ubʼanik jastaq che kʼo ta upatan xuqujeʼ kubʼan taj are chiʼ petinaq royowal o kkikotik. Xaneʼ kuyaʼo che kkʼam ubʼe rumal ri Jehová rech utz ri kuchaʼ ubʼanik, jeriʼ are kchoman chrij ri utzilal kkiriq ri nikʼaj chik y chrij ta ri kuriq areʼ (Prov. 2:6, 7; Filip. 2:4). We jun achajil kukoj uchuqʼabʼ che resaxik uwach ri Jehová y Jesús, qas utz riʼ kubʼan che ukʼamik ubʼe ri ufamilia. w21.02 7 párrs. 19-21

Are chiʼ ri qʼatal tzij Asá kʼa majaʼ na, xmachʼachʼik y xukʼut ri ukowil ukʼuʼx. Jun kʼutbʼal, are chiʼ xkam ri utat, xumaj kan uqʼatik tzij y xtaqan che usachisaxik kiwach ri dioses. Xuqujeʼ, «xutaqchiʼj kʼut ri Judá chi chutzukuj ri Ajawaxel, ri kiDios ri e kimam, xuqujeʼ chi chkitzʼaqatisaj kibʼanik ri Pixabʼ xuqujeʼ taq ri taqomal» (2 Crón. 14:1-7). Y are chiʼ ri Zérah ri aj Etiopía e rukʼam lo jun millón ajchʼojabʼ che ubʼanik chʼoj chrij ri Judá, ri Asá xukoj unoʼj y xutaʼ tobʼanik che ri Jehová. Jewaʼ xubʼan che utaʼik toqʼobʼ che: «Ajawaxel, che la man kʼo ta ujalbʼem ribʼ ri utoʼik ri kʼo uchuqʼabʼ xuqujeʼ ri tuqaʼr. Rumal riʼ, ¡chujtoʼ la, Ajawaxel xuqujeʼ qaDios, qakubʼam ya qakʼuʼx chij la!». Ri e jeʼlalaj taq utzij ri Asá, xkikʼutu che qas kukojo che ri Jehová kkunik keʼutoʼo. Asá xukubʼsaj ukʼuʼx chrij ri uTat kʼo pa ri kaj, y ri Jehová «xuya [...] ri chʼakanik che ri Asá xuqujeʼ che ri Judá pa kiwiʼ ri aj Etiopía» (2 Crón. 14:8-12). Qastzij riʼ, che are jun nimalaj kʼax ubʼanik chʼoj kukʼ jun millón ajchʼojabʼ. Are kʼu ri Asá xukubʼsaj ukʼuʼx chrij ri Jehová, y rumal riʼ utz xel ri xubʼano. w21.03 5 párrs. 12, 13

Ri Biblia kuya ubʼixik kʼi kʼutbʼal ke winaq che xkikʼut nimalaj loqʼoqʼebʼal. Chqilaʼ ri kikʼutbʼal Jonatán y David. Ri Biblia kubʼij che «ri Jonatán sibʼalaj xbʼe ranimaʼ rukʼ ri David, sibʼalaj nim ri uloqʼal chuwach jetaneʼ ri areʼ chbʼil ribʼ» (1 Sam. 18:1). Ri Jehová are xuchaʼ ri David rech kux qʼatal tzij pa ukʼaxel ri Saúl, ri utat ri Jonatán. Ri Saúl utz ta xrilo y sibʼalaj xqʼaqʼar che royowal, rumal laʼ xraj xukamisaj ri David. Are kʼu ri Jonatán xutoʼ ta ri utat rech kukamisaj ri David. Jonatán y David xkibʼij che amaqʼel keʼux achiʼl y kkitoʼlaʼ kibʼ (1 Sam. 20:42). Nim kqil riʼ ri kachilanik ri Jonatán y ri David we kojchoman chrij nikʼaj chi jastaq, ¿jas riʼ? Jun kʼutbʼal, 30 junabʼ nabʼeʼal ri Jonatán chuwach ri David. Paneʼ Jonatán kʼo chi nim retaʼmabʼal y kʼo ta kjunamataj wi rukʼ ri David, kʼo ta jumul xuchomaj che David nim ta ubʼanik o che kʼo ta upatan. w21.01 21, 22 párrs. 6, 7

Ri Jesús xutzujuj chke ri utijoxelabʼ che kkiriq kikotemal. Are kʼu xubʼij chke che xuqujeʼ kkiriq kʼax (Mat. 10:22, 23; Luc. 6:20-23). Kuya kikotemal chqe che oj utijoxelabʼ ri Cristo. Paneʼ jeriʼ, weneʼ kʼo jujun mul kojbʼisonik are chiʼ kojchoman chrij ri kʼax kbʼan chqe rumal ri qafamilia, kumal ri qʼatal taq tzij, ri e qachiʼl pa ri tijobʼal o pa ri chak rumal che kqaj taj kqabʼan ri jastaq che utz ta kril ri Jehová. Ri qastzij, kʼo ta jun winaq kkikotik are chiʼ kbʼan kʼax che. Are kʼu, ri uTzij ri Dios kubʼij chqe che kqanaʼ kikotemal are chiʼ kqariq kʼax. Jun kʼutbʼal, Santiago xutzʼibʼaj che rajawaxik kojkikotik paneʼ kqariq kʼi kʼax (Sant. 1:2, 12). Y Jesús xubʼij che rajawaxik kojkikotik are chiʼ kojtereneʼx rukʼ itzelal (Mat. 5:11). Jehová xukoj Santiago rech xutzʼibʼaj jun pixabʼ chke ri cristianos che keʼutoʼo rech kekikotik paneʼ keqʼax pa kʼax. w21.02 26 párrs. 1, 2; 27 párr. 5

Pa taq uqʼij ri Timoteo, e jujun cristianos nim ta xkilo xechakun rukʼ ri Dios. Jujun chke are Demas, Figelo, Hermógenes, Himeneo, Alejandro y Fileto (1 Tim. 1:19, 20; 2 Tim. 2:16-18; 4:10). Pa jun tiempo konojel ri winaq riʼ xeʼux ko pa ri kikojonik, are kʼu nim ta chi xkil ri qas nim ubʼanik. ¿Jas jastaq kukoj ri Satanás rech nim ta chi kqil ri uyaʼom Jehová chqe? Chqilaʼ jujun. Kukoj ri etzʼanem y ri kyaʼ pa ri medio de comunicación rech kukʼex ri qachomanik y ri kqabʼano rech kqaya kan ri qastzij. Xuqujeʼ keʼukoj ri winaq rech kojkitaqchiʼj o kkibʼan kʼax chqe rech kqaxibʼij qibʼ y kqaya kan utzijoxik utzij ri Dios. Xuqujeʼ kojusubʼu rech kqatatabʼej «ri xaq kbʼix che chi utzalaj noʼj» kech ri apóstatas y rech kqaya kan ri qastzij. We kqachajij ta qibʼ, nojimal chi nojimal kqaya kan riʼ ri qastzij (1 Tim. 6:21). w20.09 27 párrs. 6-8

¿La kʼo jun qachiʼl o jun qafamiliar xubʼan jun kʼax chqe rumal laʼ kqakubʼsaj ta chi qakʼuʼx chrij? We kʼolik, utz riʼ che kqanikʼoj ri xubʼan ri Absalón, ri ukʼojol ri qʼatal tzij David (2 Sam. 15:5-14, 31; 18:6-14). Are chiʼ majaʼ kqasikʼij uwach ri bʼantajik, chqabʼij che ri Jehová ri qas kqanaʼo rumal ri kʼax che xbʼan chqe (Sal. 6:6-8). Chanim riʼ, chqakojompeʼ ri qachomanik che uchʼobʼik ri xunaʼ ri David. Sibʼalaj kuloqʼoqʼej ri Absalón y kukubʼsaj ukʼuʼx chrij ri Ahitofel. Paneʼ jeriʼ, ri e kebʼ xkibʼan kʼax che. Xkiya bʼis che ri ranimaʼ y xkaj xkikamisaj. Xkun ta riʼ ri David xuchomaj che ri nikʼaj chi rachiʼl e jun rukʼ ri Absalón y kuya kan ukubʼsaxik ukʼuʼx chkij. Xkun ta riʼ xaq xiw xchoman chrij ri kunaʼo y utukel kel bʼi pa ri tinamit. O, rumal che ubʼanom kebʼ ukʼuʼx, xuchomaj ta riʼ che kʼo ta chi kkun che ubʼanik. Ri xubʼano are xutaʼ ri utobʼanik ri Jehová. Xuqujeʼ xutaʼ ri kitobʼanik ri rachiʼl. Y, are chiʼ xuchaʼ ubʼanik jun jastaq, qas xubʼano y xaq ta xukʼexelaʼ ri qʼij che ubʼanik. Paneʼ sibʼalaj kʼax xunaʼ pa ranimaʼ, xukʼut taj che xaq royowal chke ri nikʼaj chik o mat neʼ xukubʼsaj chi ukʼuʼx chrij ri Jehová y chkij ri rachiʼl. w21.03 15 párrs. 7, 8; 17 párrs. 10, 11