Julio

Rajawaxik kojux rachiʼl ri Jesús rech ri Jehová kuya ri kqataʼ che pa chʼawem. Wariʼ kraj kubʼij che xaq xiw ta utz kqabʼij «pa ubʼiʼ ri Jesús» are chiʼ kqakʼis ri qachʼawem. Rajawaxik kqachʼobʼ ri kubʼan ri Jehová che ukojik ri Jesús rech kuya ri kqataʼ che pa ri qachʼawem. Jesús xubʼij chke ri apóstoles: «Ronojel kʼut ri kitzʼonoj pa ri nubʼiʼ, in kinbʼan na» (Juan 14:13). Are Jehová ri ktatabʼenik xuqujeʼ kyaʼow ri kqataʼ che pa ri qachʼawem, are kʼu uyaʼom ri taqanik che ri uKʼojol che kubʼan ri kraj areʼ che kbʼanik. Are chiʼ majaʼ kusach ri qamak, krilo we qanimam ri e upixabʼ ri Jesús. Jun kʼutbʼal, Jesús xubʼij: «We ri ix keʼikuy ri itzelal ri e bʼanom chiwe, ri iTat ri kʼo pa ri kaj kixukuy na ix. We man keʼikuy ri winaq, xuqujeʼ ri iTat man keʼukuy ta na ri e iwetzelal ix» (Mat. 6:14, 15). ¿La qastzij che nim ubʼanik che kqakʼut utzilal chke e nikʼaj chik junam che kubʼan ri Jehová xuqujeʼ ri Jesús qukʼ? w20.04 22 párr. 6

Ri apóstol Pablo xchoman chrij ri kkaj kketaʼmaj ri winaq xuqujeʼ xtzijon chrij ri kajwataj chke. Jun kʼutbʼal, e kʼi winaq re Listra kʼo ketaʼmabʼal chrij ri Biblia y nikʼaj chik kʼo ta ketaʼm. Rumal laʼ Pablo xutzijoj jastaq chke che ketaʼm uwach, junam rukʼ ri wachinik kuya ri tikoʼn xuqujeʼ ri kikotemal kuya ri kʼaslemal. Xukoj tzij xuqujeʼ kʼutbʼal che kʼax ta uchʼobʼik. Chqakojoʼ qachuqʼabʼ che uchʼobʼik ri kkaj kketaʼmaj ri winaq pa ri qaterritorio xuqujeʼ chojtzijon chrij jastaq che kajwataj chke. ¿Jas kqabʼan che retaʼmaxik ri kraj kretaʼmaj ri winaq are chiʼ kojqebʼ rukʼ o chiʼ kojopan cho ri rachoch? Qas chqilaʼ. Weneʼ tajin kchakun pa ri abʼix, tajin kutatabʼej ri radio, tajin kusukʼumaj jun chʼichʼ o tajin kubʼan jun chi jastaq. Utz riʼ we kqamaj ri tzijonem chrij ri tajin kubʼano (Juan 4:7). Ri ratzʼyaq ri winaq kʼo kukʼut chqawach: ri utinamit, ri uchak o ri equipo deportivo che utz krilo. w20.04 11 párrs. 11, 12

Rumal jun yabʼil ansiedad ubʼiʼ, e jujun qachalal kkinaʼ xibʼin ibʼ xuqujeʼ utz ta kkilo kechoman chrij ri jastaq che kajwataj chke ronojel qʼij. Weneʼ utz ta kkilo kekʼojiʼ kukʼ kʼi winaq, are kʼu amaqʼel kebʼe pa ri e riqbʼal ibʼ, pa ri nim riqbʼal ibʼ xuqujeʼ che utzijoxik ri utzij ri Dios. We oj kʼo pa ri kʼax riʼ kqachomaj taj che xaq xiw ri oj qariqom wariʼ e kʼi junam kikʼulmam. Chnaʼtaj chqe che Jehová nim kril ri chuqʼabʼ kqakoj che upatanexik. We qachʼijom ri kʼax, kukʼutu che Jehová oj utewchim xuqujeʼ uyaʼom qachuqʼabʼ (Filip. 4:6, 7). We tajin kqapatanij ri Jehová paneʼ qariqom jun yabʼil pa ri qabʼaqil o pa ri qachomanik kojkunik kqabʼij che Jehová sibʼalaj kkikotik. Kʼi chqe qariqom jun yabʼil pa ri qabʼaqil o pa ri qachomanik are kʼu tajin kqachʼij ri kʼaxkʼolil (2 Cor. 4:16). Rukʼ ri utobʼanik ri Jehová, qonojel kqatij anim kʼa kojopan pa ri meta. w20.04 31 párrs. 20, 21

We kqil ri xubʼan ri Dios che ri uwach Ulew, qas kqil ri nimalaj unojibʼal (Heb. 3:4). Pa ri uwach Ulew kriqitaj ri jastaq che kajwataj chqe rech kʼo qakʼaslemal. Chqajunamaj ri uwach Ulew rukʼ jun barco nojinaq che winaq che tajin kbʼin pa uwiʼ ri nimalaj mar. Are kʼu, jun barco junam ta ubʼanik rukʼ ri uwach Ulew. Jun kʼutbʼal, ¿jampaʼ tiempo riʼ kekʼasiʼ ri winaq che e kʼo pa ri barco we areʼ kebʼanow ri kiʼoxígeno, ri jastaq che kkitijo xuqujeʼ ri kijoron, xuqujeʼ kkikʼaq ta ri mes pa ri mar? ¿La mat qastzij che chanim riʼ kekamik? Are kʼu pa ri uwach Ulew kʼo kʼi uwach kʼaslemal. Ri planeta kuya ri oxígeno, ri jastaq che ktijowik xuqujeʼ kuya ri joron che kajwataj chqe. Ri e jastaq riʼ che nim upatan pa ri kʼaslemal kʼo ta jumul ksach uwach. Xuqujeʼ ri mes kkʼaq ta bʼi pa ri kaj o espacio. Paneʼ jeʼ wariʼ ri uwach Ulew jeʼl na xuqujeʼ utz kekʼojiʼ winaq chuwach. ¿Jasche kqabʼij wariʼ? Jehová xubʼan ri jastaq rech kusukʼumaj ribʼ utukel. w20.05 20 párrs. 3, 4

Satanás jetaneʼ xubʼij che Jehová xubʼij ta ri qastzij chke. Jewaʼ ri Satanás xux jun itzel, jun bʼanol tzij. Eva xsubʼik, rumal laʼ are xunimaj ri Satanás (1 Tim. 2:14). Xukubʼsaj más ukʼuʼx chrij ri Satanás chuwach ri Jehová, rukʼ wariʼ xuchaʼ ubʼanik jun kʼaxalaj jastaq pa ri ukʼaslemal: xunimaj ta ri Dios xuqujeʼ xutij uwach ri cheʼ che yaʼom ta chke, tekʼuriʼ xuya che ri Adán rech kutijo (Gén. 3:6). We ta ri Eva xubʼij wariʼ che ri Satanás: «Wetaʼm ta awach, are kʼu ri nuTat Jehová qas wetaʼm uwach. Qas kinloqʼoqʼej xuqujeʼ kinkubʼsaj nukʼuʼx chrij. Uyaʼom ronojel ri kajwataj chqe. ¿Jasche kamol tzij chrij? ¡Jat!». Qas xkikot riʼ ri Jehová we ta ri umiʼal xukʼut ri uloqʼoqʼenik xuqujeʼ ri usukʼilal rukʼ ri e tzij riʼ (Prov. 27:11). Are kʼu ri Eva xuqujeʼ Adán qas ta kkiloqʼoqʼej ri Jehová. Rumal laʼ xkitoʼ ta uwiʼ ri ubʼiʼ. w20.06 4 párrs. 10, 11

Sibʼalaj utz che kqamaltyoxij ri chak kkibʼan ri qachalal ixoqibʼ che upatanexik ri Jehová. Ketobʼan che uyakik y usukʼumaxik Ja rech Ajawbʼal y nikʼaj chik, kkitzijoj ri utzij ri Dios pa nikʼaj chi chʼabʼal y ketobʼan pa Betel. Xuqujeʼ kkiya tobʼanik chke ri qachalal che kkiriq kʼax rumal jun kaqiqʼ jabʼ o kabʼraqan, ketobʼan che uqʼaxexik ri e wuj pa nikʼaj chi chʼabʼal, e precursoras y misioneras. Are kʼu ri qachalal ixoqibʼ che e kʼulanik kkitoʼ ri kachajil rech kkibʼan ri kichak pa ri utinamit ri Jehová. Wet mat kkiya ri kitobʼanik ri qachalal ixoqibʼ riʼ, ri e achijabʼ che e «sipanik chke ri winaq», kekun ta riʼ kkibʼan ri kichak (Efes. 4:8). Ri utz taq kʼamal bʼe ketaʼm che «e kʼi ixoqibʼ» sibʼalaj kkaj kechakunik y kʼi chke utz kkibʼan che utzijoxik ri utzij ri Dios. Xuqujeʼ ketaʼm che ri e sukʼ taq qachalal ixoqibʼ che e ko pa ri kikojonik kekunik kekitoʼ ri qachalal che majaʼ más kijunabʼ chuwach ri kʼax kkiriqo (Tito 2:3-5). Wariʼ kukʼutu che rajawaxik kqamaltyoxij y keqaloqʼoqʼej ri qachalal ixoqibʼ. w20.09 23, 24 párrs. 13, 14

Jehová kusach ta ri sukʼalaj kichak ri upatanelabʼ che kiyaʼom kan upatanexik (Heb. 6:10). Ri profeta Isaías xukoj jun utzalaj kʼutbʼal che kukʼut ri kubʼan Jehová che uloqʼoqʼexik xuqujeʼ uchajixik ri utinamit. Xutzʼibʼaj: «Kpetik jachaʼ jun ajyuqʼ ri keʼuchajij ri uchij keʼuyak ri alaj taq chij, keʼuqʼaluj, keʼukʼam bʼi cho ukʼuʼx» (Is. 40:11). ¿Jas kunaʼ ri Jehová, ri nimalaj ajyuqʼ, are chiʼ jun chke ri uchij kuya kan ri congregación? Jesús xukʼut ri kunaʼ ri Jehová are chiʼ xubʼij wariʼ chke ri utijoxelabʼ: «¿Jas kichomaj? We jun winaq kʼo jun sient (100) uchij, jun chke ksach kanoq, ¿la ma ta keʼuya kan ri jumuchʼ bʼelejlajuj (99), kbʼe pa taq ri juyubʼ che utzukuxik ri jun ri xsach kanoq? Are taq kʼu kuriqaʼ, qastzij kinbʼij chiwe, are sibʼalaj kkikot na riʼ rukʼ, chkiwach ri jumuchʼ bʼelejlajuj ri man xesach taj» (Mat. 18:12, 13). w20.06 19, 20 párrs. 8, 9

Ukojik qachuqʼabʼ che upatanexik ri Jehová sibʼalaj nim ubʼanik chqawach (Sal. 27:4; 84:10). Sibʼalaj utz che jun qachalal achi kraj kchakun más pa ri utinamit ri Jehová. Are kʼu, we kyaʼ jun eqelen che, utz taj che kubʼan nim che ribʼ (Luc. 17:7-10). Ri rajawaxik kubʼano are che keʼupatanij ri nikʼaj chik rukʼ machʼachʼem (2 Cor. 12:15). Ri Biblia kchʼaw chkij winaq che xkibʼan nim che kibʼ. Jun kʼutbʼal, Diótrefes xukʼut ta machʼachʼem rumal che xraj xux «nim uqʼij» pa ri congregación (3 Juan 9). Uzías xukʼutu che kubʼan nim che ribʼ are chiʼ xubʼan jun chak che yaʼtal ta che kubʼano (2 Crón. 26:16-21). Ri Absalón qas xnaʼw che ukojik kikʼuʼx ri winaq rech kkunik kux qʼatal tzij (2 Sam. 15:2-6). Ri e bʼantajik riʼ qas kkikʼutu che ri Jehová utz ta keril ri winaq che kkibʼan nim che kibʼ (Prov. 25:27). Ri kkibʼan nim che kibʼ xuqujeʼ ri xaq xiw kechoman chrij ri kajwataj chke kkiriq ta utzilal (Prov. 16:18). w20.07 4 párrs. 7, 8

Kʼo jujun familias che e bʼenaq chi pa jun chi tinamit rumal che kʼo ta chi kekʼojiʼ wi (refugiados) o weneʼ che utzukuxik kichak. Weneʼ ri alkʼwalaxelabʼ kebʼe pa tijobʼal y rajawaxik kketaʼmaj ri chʼabʼal re ri tinamit che xeʼopan wi xuqujeʼ ri e tat nan rajawaxik kketaʼmaj ri chʼabʼal rech kkiriq kichak. Are kʼu chqachomajampeʼ che kʼo jun congregación o jun grupo che kchʼaw pa ri kichʼabʼal. ¿Jas congregación rajawaxik kebʼe wi? ¿La pa ri kichʼabʼal o pa ri chʼabʼal re ri tinamit che xeʼopan wi? Are ri kʼamal bʼe re ri familia kchaʼowik jas congregación kebʼe wi. Rech kuchaʼ ubʼanik wariʼ, rajawaxik kchoman chrij ri kajwataj che ri ufamilia. Rumal che are jun jastaq che pa utukel ri winaq kuchaʼ ubʼanik, rajawaxik che nim kqil wi ri kuchaʼ ubʼanik ri kʼamal bʼe re ri familia. Kʼo ta kqabʼij chrij ri kkichaʼ ubʼanik y rukʼ loqʼoqʼebʼal chqakʼulaj ri familia pa ri congregación (Rom. 15:7). w20.08 30 párrs. 17, 18

We kqaj che ri Jehová kuya ri uchuqʼabʼ chqe, kqachomaj taj che kʼo qapatan rumal ri qachuqʼabʼ, ri qetaʼmanik, ri qacultura o ri qaqʼinomal. Wariʼ are ta ri kbʼanowik che kʼo qapatan chuwach ri Jehová. Pa ri utinamit ri Jehová kʼi chke e junam rukʼ ri xubʼij ri Pablo: «Ix kʼi taj ri kʼo inoʼj chkiwach ri winaq. Man ix kʼi taj ri kʼo itaqanik. Man ix kʼi taj ri nimaʼq kibʼanik ri inan itat» (1 Cor. 1:26). Rumal laʼ, kqaya taj che apachike jastaq kojuqʼatej che upatanexik ri Dios, xaneʼ chqilaʼ ri kubʼan ri Jehová che ukojik ri uchuqʼabʼ che qatoʼik. Jun kʼutbʼal, we kʼo jun winaq kubʼano che kubʼan kebʼ qakʼuʼx chrij ri qakojonik xuqujeʼ che kqaxibʼij qibʼ, chqataʼ ukowil qakʼuʼx che ri Dios rech kojkunik kqatoʼ uwiʼ ri qakojonik (Efes. 6:19, 20). O tajin kqakoj qachuqʼabʼ chuwach jun kʼaxalaj yabʼil, chqataʼ qachuqʼabʼ che ri Jehová rech kqaya ta kan upatanexik. Are chiʼ kqil ri utobʼanik, kkʼiy más ri qakojonik xuqujeʼ kkʼojiʼ más ukowil qakʼuʼx. w20.07 16 párr. 9

We kqaj che are nabʼe kqaya ri utinamit ri Dios, o ri uQʼatbʼal tzij, pa ri qakʼaslemal rajawaxik kqesaj uwach ri Abrahán y kqaxutuj jujun jastaq rech kojqaj chuwach ri Dios (Mar. 10:28-30; Heb. 11:8-10). Kqachomaj taj che kqariq ta kʼax pa ri qakʼaslemal. Ri ukʼutbʼal ri Abrahán kukʼut chqawach che xuqujeʼ ri kkipatanij ri Jehová kkiriq kʼax (Sant. 1:2; 1 Ped. 5:9). Kimik, más rajawaxik che are kojchoman chrij ri petinaq. Ri tajin kkʼulmataj cho ri uwach Ulew qas kukʼutu che oj kʼo chi pa ri kʼisbʼal taq qʼij. Jun chke ri tewchibʼal che kuya na ri uQʼatbʼal tzij ri Dios are che kqil na kiwach ri qachalal che e kaminaq. Tekʼuriʼ ri Jehová kutewchij na ri Abrahán rumal ri ukojonik xuqujeʼ ri upaciencia are chiʼ kukʼastajisaj na areʼ xuqujeʼ ri ufamilia cho ri uwach Ulew. ¿La katkʼojiʼ che kikʼulaxik? Katkʼojiʼ riʼ we kabʼan awe ri xubʼan ri Abrahán, che are nabʼe xukoj ri uQʼatbʼal tzij ri Dios pa ri ukʼaslemal, xsach ta uwach ri ukojonik paneʼ xuriq kʼax xuqujeʼ xreyej rukʼ kochʼonik che ri Jehová kuya ri utzujum che (Miq. 7:7). w20.08 5, 6 párrs. 13, 14; 7 párr. 17

Qetaʼm che we ri qakʼulel kojkikamisaj, Jehová kuya chi jumul ri qakʼaslemal. Qas qetaʼm che kʼo ta jastaq kkibʼano che kojkʼojiʼ ta naqaj che ri qaDios (Rom. 8:35-39). Sibʼalaj nim ri unojibʼal ri Jehová are chiʼ xuya ri eyebʼal re ri kʼastajibʼal chqe. Rukʼ wajun eyebʼal riʼ, kresaj che ri Satanás jun chke ri jastaq che más kukojo y chqe oj kuya jun kowil kʼuxaj che man ksach taj. We ri qakʼulel kkibʼij che kkaj kojkikamisaj, ¿la kqakubʼsaj qakʼuʼx che Jehová kojuwalajisaj na? Rech kqetaʼmaj wariʼ, chojchoman chrij ri preguntas riʼ: «¿La kinkʼut rukʼ ri kinbʼan ronojel taq qʼij che kinkubʼsaj nukʼuʼx chrij ri Jehová?» (Luc. 16:10). «¿La kinkʼut rukʼ ri kinbʼan pa ri nukʼaslemal che qas kinkojo che Jehová kuya ri kajwataj chwe we nabʼe kinya ri uQʼatbʼal tzij pa ri nukʼaslemal?» (Mat. 6:31-33). We jeʼ tajin kqabʼano, wajun kubʼsal kʼuʼx riʼ kojutoʼ rech kqachʼij apachike kʼax (Prov. 3:5, 6). w20.08 17, 18 párrs. 15, 16

Rajawaxik qas kqetaʼmaj ukojik ri uTzij ri Dios. Pa ri riqbʼal ibʼ kqetaʼmaj jujun jastaq che kojutoʼ che ubʼanik. Are kʼu we kqaj che ri winaq nim kkil ri qastzij kʼo pa ri Biblia, rajawaxik kqanikʼoj más ri Biblia pa qatukel. Rajawaxik kqakoj ri uTzij ri Dios rech kqakowirisaj ri qakojonik. Are kʼu xaq xiw ta kqasikʼij uwach ri Biblia. Rajawaxik kojchoman chrij ri versículos y kqatzukuj más tobʼanik pa ri qawuj rech qas kqachʼobʼ ri kubʼij y kojkun che ubʼixik chke nikʼaj chik (1 Tim. 4:13-15). Rukʼ wariʼ kojkunik keqatoʼ nikʼaj chik rukʼ ri Biblia. Xaq xiw ta kqasikʼij textos chkiwach xaneʼ keqatoʼ rech kkichʼobʼo y kkil ri tobʼanik kuya pa ri kikʼaslemal. Rumal laʼ, we amaqʼel kqanikʼoj ri Biblia kojux utz taq ajtijabʼ (2 Tim. 3:16, 17). w20.09 28 párr. 12

Ri kojtowik rech are kbʼe qakʼuʼx che utzijoxik utzij ri Dios rajawaxik knaʼtaj chqe ronojel ri ubʼanom ri Jehová che qatoʼik. Jun kʼutbʼal, kuya kʼi jastaq chqe rech kojutoʼ pa ri qakojonik: wuj che bʼanom imprimir y kʼo pa digital, grabaciones che kqatatabʼej y videos, y programas che kʼo pa JW Broadcasting. Chojchoman chrij wariʼ: pa ri qakʼolbʼal pa Internet kʼo kʼi información chupam che kʼo pa más che mil chʼabʼal (Mat. 24:45-47). Jun chi jastaq che kojutoʼ rech are kbʼe qakʼuʼx che utzijoxik ri utzalaj taq tzij are resaxik uwach ri ukʼutbʼal ri Jesús. Areʼ xuya taj che nijun jastaq xubʼano che mat xutzijoj chi ri qastzij (Juan 18:37). Xqaj ta pa uqʼabʼ ri Satanás are chiʼ xutzujuj «konojel ri ajawbʼal ri e kʼo cho ri uwach Ulew chuwach ri Jesús, rukʼ ri kijuluwem» xuqujeʼ chiʼ ri winaq xkaj xkikoj che qʼatal tzij (Mat. 4:8, 9; Juan 6:15). Are ta xutzukuj qʼinomal xuqujeʼ xuxibʼij ta ribʼ chuwach ri kʼax xbʼan che (Luc. 9:58; Juan 8:59). Are chiʼ kqariq kʼax pa ri qakojonik, chojchoman chrij ri e tzij che xubʼij ri apóstol Pablo pa ri texto re kimik. w20.09 9, 10 párrs. 6, 7

Sibʼalaj kojkikotik che pa ri congregación e kʼo kʼi qachalal ixoqibʼ che sibʼalaj kechakunik. Kkiya kicomentarios pa ri riqbʼal ibʼ, keʼel che utzijoxik ri utzij ri Dios y keʼok il chke ri e qachalal. Nikʼaj chik ketobʼan che usukʼumaxik ri Ja rech Ajawbʼal. Qastzij che xuqujeʼ kkiriq kʼax. E jujun kkichajij ri kinan kitat che nim chi kijunabʼ. E nikʼaj chik kkichʼij ri kʼax kbʼan chke kumal ri kifamiliares. Y nikʼaj chik xaq kitukel kkikʼiysaj ri e kal y kkikoj kichuqʼabʼ rech kkiya ri kajwataj chke. ¿Jasche rajawaxik kqakoj qachuqʼabʼ che kitoʼik ri e qachalal ixoqibʼ? Rumal che ri winaq re wajun uwach Ulew riʼ nim ta kekil ri ixoqibʼ. Xuqujeʼ ri Biblia kubʼij che rajawaxik keqatoʼ. Jun kʼutbʼal, ri apóstol Pablo xubʼij che ri congregación re Roma che rukʼ rutzil kanimaʼ kkikʼulaj ri Febe y kkiya ri kajwataj che (Rom. 16:1, 2). Ri Pablo, are jun chke ri winaq che nim ta xeril ri ixoqibʼ. Are kʼu chiʼ xux cristiano, xresaj uwach ri Jesús rumal laʼ xukʼut utzilal y nim xeril ri ixoqibʼ. w20.09 20 párrs. 1, 2

Rajawaxik keqatoʼ ri tijoxelabʼ rech kkaj kkitzijoj ri utzalaj taq tzij, weneʼ kojkunik kqabʼan preguntas che ri tijoxel junam rukʼ wariʼ: «¿Jas utzilal ariqom are chiʼ xamaj retaʼmaxik ri utzalaj taq tzij chrij uQʼatbʼal tzij ri Dios? ¿La kachomaj che e kʼo chi nikʼaj winaq rajawaxik kketaʼmaj? ¿Jas tobʼanik katkunik kaya chke?» (Prov. 3:27; Mat. 9:37, 38). Chnaʼtaj chqe che Jesús xubʼij che rajawaxik kqakʼut chkiwach e nikʼaj chik ri unimaxik ronojel ri e utaqanik. Pa ri e taqanik riʼ e kʼo ri e kebʼ más nim kibʼanik, ri uloqʼoqʼexik ri Dios y ri qajil qatzʼaqat (Mat. 22:37-39). Ri loqʼoqʼebʼal kutoʼ ri tijoxel rech kutzijoj ri utzij ri Dios. Qastzij che are chiʼ jujun tijoxelabʼ kkichomaj che keʼel che utzijoxik ri utzij ri Dios kkixibʼij kibʼ, are kʼu kojkunik kqabʼij chke che ri Jehová keʼutoʼ rech nojimal chi nojimal kel ri xibʼin ibʼ chke (Sal. 18:1-3; Prov. 29:25). w20.11 3 párrs. 6-8

Are chiʼ kojchʼaw rukʼ ri Jehová chrij ri tijoxel y ri kajwataj che xuqujeʼ kʼo ubʼanik rukʼ utijoxik qibʼ. Chqabʼij che ri Jehová che kojutoʼ rech utz kqabʼan che ukojik ri Biblia rech kopan pa ranimaʼ ri winaq. Ksach ta chqe che ri qameta are utoʼik rech kubʼan uqasanjaʼ. Ri tijoxel rajawaxik kuta ri kubʼij ri Jehová y kchʼaw rukʼ. Kuta ri kubʼij ri Jehová are chiʼ kusikʼij ri Biblia ronojel taq qʼij (Jos. 1:8; Sal. 1:1-3). Xuqujeʼ rajawaxik kchʼaw rukʼ ri Jehová ronojel taq qʼij. Chqabʼanaʼ qachʼawem che ri Jehová rukʼ ronojel qanimaʼ are chiʼ kqamajij y chiʼ kkʼis ri etaʼmanik y chojchʼaw pa uwiʼ ri tijoxel. Jeriʼ kretaʼmaj kubʼan uchʼawem che ri Jehová rukʼ ronojel ranimaʼ y chiʼ kukʼiso kuqʼaxej pa ubʼiʼ ri Jesucristo (Mat. 6:9; Juan 15:16). We ri tijoxel ronojel taq qʼij kusikʼij uwach ri Biblia y kubʼan uchʼawem sibʼalaj kqebʼ riʼ rukʼ (Sant. 4:8). w20.10 8 párr. 8; 9 párrs. 10, 11

Ri cholajil y jamaril che xkikʼut ri cristianos re ri nabʼe siglo qas kqʼalajin kimik pa ri utinamit ri Jehová (Hech. 16:4, 5). Jun kʼutbʼal, we kojbʼe pa jun riqbʼal ibʼ pa jun chi congregación, o pa jun chi tinamit, qetaʼm riʼ ri kbʼan che unikʼoxik Ri Chajinel y ri kʼutunem che kilik. Kqanaʼ riʼ che oj kʼo pa ri qacongregación. Kriqitaj wajun junamil riʼ xaq xiw rumal ri utobʼanik ri ruxlabʼixel ri Dios (Sof. 3:9). Ri kojkunik kqabʼano. Chqachomaj wariʼ: «¿La kintobʼanik rech kʼo jamaril y junamil pa ri congregación? ¿La kinniman chke ri qachalal che kkikʼam bʼe pa ri congregación? ¿La kkikubʼsaj kikʼuʼx ri nikʼaj chik chwij, más na we kʼo weqelen pa ri congregación? ¿La qas in puntual, kinpatanin y qas kwaj kintobʼanik?» (Sant. 3:17). We kqilo che rajawaxik kojchakun chrij ri bʼantajik riʼ, chqataʼ ri ruxlabʼixel ri Jehová. Are chiʼ kqayaʼo che ri uxlabʼixel kukʼex ri qabʼantajik y ri kqabʼano, ri e qachalal más kojkiloqʼoqʼej y nim kojkilo. w20.10 23 párrs. 12, 13

Ri uTzij ri Dios kjunamataj rukʼ jun espejo (Sant. 1:23-25). Ronojel qʼij, konojel ri winaq kkil kibʼ pa jun espejo are chiʼ majaʼ keʼel bʼi cho kachoch. Rukʼ wariʼ kqasukʼumaj we kʼo jun jastaq che utz ta kqilo are chiʼ majaʼ kkil ri nikʼaj chik. Xaq junam, are chiʼ kqasikʼij ri Biblia ronojel taq qʼij, kqilo we rajawaxik kqasukʼumaj jujun jastaq pa ri qachomanik o rukʼ ri kqabʼano. E kʼi qachalal ronojel taq aqʼabʼil kkisikʼij uwach ri texto re ronojel taq qʼij are chiʼ majaʼ keʼel bʼi cho kachoch, y jeʼ wariʼ kkiyaʼo che ri kkisikʼij uwach kusukʼumaj ri kichomanik. Tekʼuriʼ, pa ri qʼij, kkikoj kichuqʼabʼ rech kkibʼan pa kikʼaslemal jun pixabʼ che kketaʼmaj pa ri uTzij ri Dios. Jun chi jastaq che rajawaxik kqabʼano are usikʼixik y uchomaxik ri kubʼij ri Biblia ronojel taq qʼij. Weneʼ kqʼalajinik che kʼax ta ubʼanik, are kʼu are jun chke ri tobʼanik más nim ubʼanik che kojutoʼ rech kojel ta pa ri nitzʼ bʼe che kojukʼam bʼi pa ri kʼaslemal. Ri Biblia kjunamataj rukʼ jun aparato re rayos X, che kojutoʼ che rilik ri kʼo chqapam. We kqaj che kqariq utzilal rumal ri pixabʼ kʼo pa ri Biblia y ri kkiya ri e kʼamal bʼe, rajawaxik kojmachʼachʼik. w20.11 18 párr. 3; 20 párr. 8

Paneʼ ri cristianos re ri nabʼe siglo kʼi mul xkiriq kʼax, are kʼu xuqujeʼ xekʼojiʼ pa tiempo re jamaril. ¿Jas xkibʼan che ukojik ri tiempo riʼ? Ri sukʼalaj taq achijabʼ xuqujeʼ ixoqibʼ riʼ xkikoj ri kitiempo che utzijoxik ri utzalaj taq tzij. Pa ri wuj Hechos kubʼij che ri congregación cristiana «ktajin kbʼin pa xeʼn ribʼ chuwach ri Ajawaxel» y, rumal che xuya ta kan utzijoxik ri utzij ri Dios, xkʼiyirik. Qas qʼalaj che Jehová xutewchij ri chuqʼabʼ xkikoj che utzijoxik ri utzij are chiʼ e kʼo pa tiempo re jamaril (Hech. 9:26-31). Ri tijoxelabʼ re ri nabʼe siglo amaqʼel xkikoj kichuqʼabʼ che utzijoxik ri utzalaj taq tzij. Jun kʼutbʼal, ri apóstol Pablo xkanaj kan pa Éfeso are chiʼ xrilo che kʼo «jun nimalaj chak» che utzijoxik ri utzalaj taq tzij y che kitoʼik ri winaq rech keʼux tijoxelabʼ (1 Cor. 16:8, 9). Xkikoj kichuqʼabʼ che «utzijoxik ri kubʼij ri Ajawaxel» (Hech. 15:30-35). Rumal wariʼ xbʼantaj ri kyaʼ ubʼixik pa ri texto re kimik. w20.09 16 párrs. 6-8

Are chiʼ xmakun ri Adán, xutzukuj ri ukamikal y ri kikamikal ri e ralkʼwal. Kimik tajin kqariq na kʼax rumal che xniman taj. Are kʼu kʼo jun utzalaj qeyebʼal rumal che ri Dios xukʼastajisaj ri uKʼojol. Ri apóstol Pablo xubʼij: «Rumal jun winaq [Jesús]. Kekʼastaj na ri kaminaqibʼ. Jeʼ kʼu riʼ jachaʼ konojel kekam na rukʼ ri Adán, jeʼ kʼu riʼ xuqujeʼ konojel kkiriq na ri kʼaslemal rukʼ ri Cristo» (1 Cor. 15:22). ¿Jachin chkij xchʼaw wi ri Pablo are chiʼ xubʼij che «konojel kekam na rukʼ ri Adán»? Xchʼaw chqij ri oj ralkʼwal ri Adán, che qechebʼem kan ri makaj y tzʼaqat ta ri qachomanik, y qʼatom tzij pa qawiʼ rech kojkamik (Rom. 5:12). Adán kʼo ta chkixoʼl ri «kkiriq na ri kʼaslemal». Areʼ kkun taj kuriq ri utzilal che kuya ri tojbʼal mak che xuya ri Cristo, rumal che rukʼ tzʼaqat uchomanik y ukʼaslemal xunimaj ta ri Dios. Ri qʼatoj tzij che xbʼan pa uwiʼ ri Adán junam rukʼ ri qʼatoj tzij che kubʼan na «ri Rijaʼl winaq» pa kiwiʼ ri winaq che e junam rukʼ «kʼisikʼ», kraj kubʼij, ri «junalik kʼajisabʼal wach» (Mat. 25:31-33, 46; Heb. 5:9). w20.12 5 párrs. 13, 14

We kya ta jun eqelen chqe, chqachomaj ri kikʼutbʼal ri sukʼ taq ángeles. Jumul, Jehová xubʼij chke ri ángeles che kkibʼij ri kkichomaj chrij ri kbʼan che usubʼik ri itzelalaj qʼatal tzij Acab. E kʼi xkibʼij ri xkichomaj, are kʼu xa jun utz xuta ri Jehová y xubʼij che ri ángel che utz kel ri xubʼij (1 Rey. 22:19-22). ¿La xebʼison ri nikʼaj chi ángeles? ¿La xkichomaj: «Mat neʼ xinbʼij ri xinchomaj»? Kʼo ta kkʼutuwik che jeʼ xkibʼij. Ri ángeles qas kemachʼachʼik y kkaj che are ri Jehová kyaʼ uqʼij (Juec. 13:16-18; Apoc. 19:10). Chqachʼobʼoʼ che ri nimalaj eqelen yaʼom chqe are che oj testigos rech Jehová y kqatzijoj ri utzalaj tzij re ri uQʼatbʼal tzij ri Dios. Ri eqelen kyaʼ chqe xaq keqʼaxik. Ri kbʼanowik che nim qabʼanik chuwach ri Jehová are ukʼutik machʼachʼem y uchʼobʼik ri kojkun ta che ubʼanik. Rumal laʼ chqataʼ che ri Jehová che kojutoʼ rech amaqʼel kqakʼut ri e bʼantajik riʼ. Chojchoman chrij konojel ri utzalaj taq kʼutbʼal ke ri upatanelabʼ ri Dios che kubʼij ri Biblia che xemachʼachʼik y xkichʼobʼo che kʼo kekun ta che ubʼanik, y rukʼ ronojel qanimaʼ chqayaʼ tobʼanik chke ri qachalal (1 Ped. 5:5). w20.12 26 párrs. 16, 17

Ri toʼbʼal jolomaj re ri kolobʼal ibʼ are ri eyebʼal uyaʼom ri Jehová chqe, paneʼ kojkamik kojkʼastaj na y kojutewchij na (1 Tes. 5:8; 1 Tim. 4:10; Tito 1:1, 2). Ri qeyebʼal re kolobʼal ibʼ kuchajij ri qachomanik. Kojutoʼo rech qas kojchoman chrij ri utzujum ri Jehová y kqakoj utz chomanik che rilik ri kʼax kqariqo. ¿La kqakoj ri tobʼal jolomaj re ri kolobʼal ibʼ? Kqakoj qachuqʼabʼ rech junam ri qachomanik rukʼ ri Jehová. Jun kʼutbʼal, are ta kqakubʼa qakʼuʼx «chrij ri qʼinomal ri man qastzij taj chi kʼolik», xaneʼ are kqakuʼbʼa qakʼuʼx «chrij ri kʼaslik Dios» (Sal. 26:2; 104:34; 1 Tim. 6:17). Ri chʼichʼ re chʼoʼj re ri uxlabʼixel are ri uTzij ri Dios, ri Biblia. Wajun chʼichʼ re chʼoʼj kʼo uchuqʼabʼ che uqʼalajisaxik ri e subʼunik y che kesaxik ri winaq chuwach ri molom taq tzij y pa ri e jastaq kbʼanik che utz ta kril ri Dios (2 Cor. 10:4, 5; 2 Tim. 3:16, 17; Heb. 4:12). Chqetaʼmaj ukojik are chiʼ kqabʼan ri qetaʼmanik pa qatukel y ri tijonik kuya ri utinamit ri Jehová chqe (2 Tim. 2:15). w21.03 27 párr. 4; 29 párrs. 10, 11

Paneʼ ri apóstol Juan qʼatem che ubʼanik kʼi jastaq rumal che xchʼaw chrij ri Jesús, ri areʼ xukʼutu che kchoman chkij ri e nikʼaj chik. Jun kʼutbʼal, xutzʼibʼaj ri xqʼalajisax chuwach rumal ri Dios y xutaq bʼi chke ri congregaciones rech kketaʼmaj «ri xa kol man kekʼulmatajoq» (Apoc. 1:1). Are chiʼ qʼaxinaq chi ri tiempo, chiʼ xyaʼ bʼe che xel lo pa ri isla, xutzʼibʼaj ri xubʼan ri Jesús. Xuqujeʼ xutzʼibʼaj oxibʼ cartas chke ri rachalal rech xuya kichuqʼabʼ. Katkunik kawesaj uwach ri xubʼan ri Juan. Kojkunik kqakʼutu che keqaloqʼoqʼej ri winaq rukʼ ri kqachaʼ ubʼanik pa ri qakʼaslemal. Ri Satanás kraj kukoj ri jastaq che kʼo pa uqʼabʼ che qasubʼik rech kqakoj ronojel ri qatiempo y ri qachuqʼabʼ che utzukuxik qʼinomal y ketaʼmax qawach kumal kʼi winaq. Are kʼu, pa ronojel uwach Ulew e kʼo cristianos che kkikoj nim tiempo che utzijoxik utzij ri Dios y che kitoʼik e kʼi winaq rech keqebʼ rukʼ ri Jehová. w21.01 10 párrs. 9, 10

Jonatán xkun ta riʼ xchʼojin rukʼ ri David rumal che are ri ukʼojol ri qʼatal tzij y che taqal che kyaʼ kan ri qʼatbʼal tzij pa uqʼabʼ (1 Sam. 20:31). Are kʼu, Jonatán jeʼ ta xubʼano, xaneʼ xumachʼ ribʼ y xux sukʼ che ri Jehová, rumal laʼ rukʼ ronojel ranimaʼ xuya ri utobʼanik che ri Jehová che are xuchaʼ ri David che qʼatal tzij. Xuqujeʼ xux sukʼ che ri David, paneʼ sibʼalaj xuyak royowal ri Saúl (1 Sam. 20:32-34). Rumal ri nimalaj uloqʼoqʼebʼal ri Jonatán che ri David xubʼan ta ukʼulel che. Jonatán are jun ajchʼoj che kʼo nim uchuqʼabʼ y knaʼw che ukʼaqik ri flechas. Kbʼixik che areʼ y ri utat más «¡e kʼo na ri kirapinik chkiwach ri kot!» o xik y más «¡kʼo na ri kichuqʼabʼ chkiwach ri koj!» (2 Sam. 1:22, 23). Rumal laʼ ri Jonatán kkunik kubʼan nim che ribʼ rumal che kʼi mul chʼakanaq pa ri e chʼoj. Are kʼu xubʼan taj, xuqujeʼ xpe ta royowal are chiʼ David xchʼakan pa ri e chʼoj. Xaneʼ are nim xril wi ri ukowil ukʼuʼx y ri ukubʼsal ukʼuʼx chrij ri Jehová. Ri xubʼan ri Jonatán are che xuloqʼoqʼej ri David are chiʼ xukamisaj ri Goliat. w21.01 21 párr. 6; 22 párrs. 8, 9

Qonojel ri cristianos oj kʼo pa uqʼabʼ ri utaqanik ri Jesucristo, che are jun tzʼaqatalaj kʼamal bʼe. Are kʼu, chiʼ jun ixoq cristiana kkʼuliʼk kkanaj pa uqʼabʼ ri utaqanik jun achi che ajmak, y kʼi taq mul kʼax ubʼanik wariʼ. Rumal laʼ, are chiʼ jun qachalal ixoq tajin kuchomaj we kkʼuliʼk o kkʼuliʼ ta rukʼ jun qachalal, utz kubʼan ri preguntas riʼ: «¿Jasche kinbʼij che wajun qachalal riʼ kux jun utz kʼamal bʼe pa ri familia? ¿La más nim kril upatanexik ri Jehová? We jeʼ taj, ¿jasche kinbʼij che kux jun utz kʼamal bʼe pa ri familia che krilij ri qakojonik are chiʼ oj kʼulan chik?». Xuqujeʼ utz kubʼan ri preguntas riʼ: «¿Jas bʼantajik rajawaxik kinkʼut in pa ri kʼulanem? ¿La kʼo nupaciencia xuqujeʼ la kinsipanik? ¿Jas ubʼanik ri wachilanik rukʼ ri Jehová?» (Ecl. 4:9, 12). Ri ixoq kuriq kikotemal pa ri ukʼulanem we utz kubʼan che uchaʼik ri jastaq are chiʼ majaʼ kkʼuliʼk. E millones qachalal ixoqibʼ kkiya jun utzalaj kʼutbʼal rumal che keniman chke ri kachajil. w21.02 8 párrs. 1, 2

Pa ri kʼisbʼal taq junabʼ, e kʼi publicadores tajin kketaʼmaj jun kʼakʼ chʼabʼal rech kkinimarisaj ri kichak che ri Dios y kikʼexom ri kicongregación rech keqʼax pa jun chik jachiʼ kajwataj wi utzijoxik ri utzij ri Dios. Wariʼ are jun jastaq che pa utukel ri winaq kuchaʼo. Paneʼ kukʼam bʼi kʼi junabʼ rech kekunik kketaʼmaj ri kʼakʼ chʼabʼal, are kʼu sibʼalaj nim tobʼanik kkiya pa ri congregación. Rukʼ ri utz taq kibʼantajik y ri ketaʼmabʼal, kkiya kichuqʼabʼ ri qachalal. ¿La mat qastzij che nim kqil wi ri chuqʼabʼ kkikojo? ¿La utz che ri e kʼamal bʼe kkiya ta eqelen che jun qachalal rech kux kʼamal bʼe o siervo ministerial xa rumal che kʼa majaʼ qas kkunik kchʼaw pa ri chʼabʼal re ri congregación? Utz taj. Rajawaxik che are chiʼ kilik we kyaʼ jun eqelen che ri qachalal are rumal che tajin kubʼan ri kubʼij ri Biblia che rajawaxik kkibʼan ri e kʼamal bʼe y ri siervos ministeriales, are ta rumal che qas retaʼm kchʼaw pa ri chʼabʼal (1 Tim. 3:1-10, 12, 13; Tito 1:5-9). w20.08 30 párrs. 15, 16

E kʼi winaq kkichomaj che xaq xiw kekikotik we utz kiwach, kʼo kirajil y kekikot pa ri kifamilia. Are kʼu ri kikotemal che xchʼaw wi ri Santiago are jun bʼantajik che kuya ri ruxlabʼixel ri Dios chqe y kʼo ta ubʼanik rukʼ ri kkʼulmataj pa ri qakʼaslemal (Gál. 5:22). Retaʼmaxik che kojqaj chuwach ri Jehová y resaxik uwach ri ukʼutbʼal ri Jesús sibʼalaj kuya kikotemal chqe ri oj cristianos (Luc. 6:22, 23; Col. 1:10, 11). Junam rukʼ jun qʼaqʼ che kʼo pa jun farol, chʼuqutal chuwach ri jabʼ y ri tew, ri kikotemal je ubʼanom pa ri qanimaʼ. Ksach ta uwach we kʼo ta pwaq o utz ta qawach. Y ksach ta uwach we ktzeʼx qawach o kbʼan kʼax chqe rumal ri qafamilia o nikʼaj chi winaq. Ri uchuqʼabʼ ri qakikotemal kqaj taj, xaneʼ kkʼiy más are chiʼ jun qakʼulel kukoj uchuqʼabʼ che usachik uwach. Ri kʼax che kqariq pa ri qakojonik kukʼutu che qas oj utijoxelabʼ ri Cristo (Mat. 10:22; 24:9; Juan 15:20). Rumal laʼ, ri Santiago xubʼij ri e tzij che kʼo pa texto re kimik. w21.02 28 párr. 6

Are chiʼ kasikʼij jun relato pa ri Biblia che kukʼut chawach che ri kyaʼow qachuqʼabʼ are che kqakubʼsaj qakʼuʼx chrij ri Jehová are ta kojel chʼuʼj chuwach ri jastaq. Chakojoʼ achuqʼabʼ che ukʼolik pa ajolom jujun versículos che utz kawilo. Weneʼ utz che ko kasikʼij o katzʼibʼaj kan pa jun wuj y kanikʼoj pa jun chi qʼij. Jehová xutaq ri Josué rech kusikʼij ri wuj re ri Taqanik y kchoman chrij chi pa qʼij chi chaqʼabʼ rech utz kel pa ri ukʼaslemal. Usikʼixik uwach ri Taqanik riʼ kutoʼo rech kuxibʼij ta ribʼ chuwach apachike kʼax che kukʼulmaj (Jos. 1:8, 9). Pa ri Biblia, kqariq kʼi chomanik che kojkitoʼ chuwach ri kʼax che kkibʼano che kojel chʼuʼj o kqaxibʼij qibʼ (Sal. 27:1-3; Prov. 3:25, 26). Ri kqetaʼmaj pa ri e riqbʼal ibʼ, ri comentarios che kkiya ri qachalal y ri utz taq tzijonem kukʼ kuya utzilal chqe (Heb. 10:24, 25). Xuqujeʼ sibʼalaj kuya qachuqʼabʼ are chiʼ kqajaq ri qanimaʼ chuwach jun loqʼalaj qachiʼl pa ri congregación. w21.01 6 párrs. 15, 16

Are chiʼ xabʼan aqasanjaʼ, xakʼutu che kʼo nim akojonik y xakubʼsaj akʼuʼx chrij. Y ri Jehová xujaq ri uqʼabʼ che akʼulaxik pa ri ufamilia. ¡Sibʼalaj nim ubʼanik wariʼ! Ri kattoʼw kimik are che amaqʼel kakubʼsaj akʼuʼx chrij ri Jehová. Weneʼ kʼax ta ukʼutik che kakubʼsaj akʼuʼx chrij ri Jehová are chiʼ kachaʼ ubʼanik jastaq che nim ubʼanik pa ri akʼaslemal. Are kʼu rajawaxik che jeʼ kabʼan pa ronojel ri kachaʼ ubʼanik, are chiʼ kachaʼ ri etzʼanem o ri chak y ri kawaj kabʼan pa ri akʼaslemal. Are ta kakubʼsaj akʼuʼx chrij ri awetaʼmabʼal, xaneʼ are chatzukuj ri nojibʼal che kʼo pa ri Biblia che katutoʼ chuwach ri katriqitaj wi y chabʼanaʼ pa ri akʼaslemal (Prov. 3:5, 6). Jeriʼ kkikot ri Jehová awumal y ri qachalal nim katkilo. Qastzij, junam qukʼ qonojel, at xuqujeʼ at ajmak y weneʼ jujun taq mul kabʼan jastaq che utz taj. Are kʼu, kaya ta bʼe che wariʼ katuqʼatej rech kabʼan más nim che ri achak che ri Jehová. w21.03 6 párrs. 14, 15

¿La itzel kkil ri qafamilia che kqapatanij ri Jehová? O ¿la oj kʼo pa jun tinamit che qʼatem uwach jujun jastaq o ronojel ri kʼo ubʼanik rukʼ ri qaqʼijilanik che ri Jehová? We jeriʼ tajin kqakʼulmaj, kuya qachuqʼabʼ riʼ ri kubʼij 2 Timoteo 1:12-16 y 4:6-11, 17-22. Ri apóstol Pablo xutzʼibʼaj ri e tzij riʼ are chiʼ kʼo pa cárcel. Are chiʼ majaʼ kqasikʼij ri versículos riʼ, chqabʼij che ri Jehová ri kʼax tajin kqakʼulmaj y ri kqanaʼo. Chqabʼij che ri qas kajwataj chqe. Tekʼuriʼ, chqataʼ che ri Jehová che kojutoʼo rech kqariq ri pixabʼ che kajwataj chqe pa ri kʼutbʼal che kchʼaw chrij ri kʼax che xuriq ri Pablo. Jehová ubʼim chi che ri Pablo che koqotax rukʼ itzelal rumal che xux cristiano (Hech. 21:11-13). ¿Jas xubʼan ri Jehová che utoʼik ri Pablo? Xuya ri xutaʼ che y xuya uchuqʼabʼ. Xuqujeʼ xubʼij che ri Pablo che qas kuriq ri tewchibʼal che sibʼalaj xukoj uchuqʼabʼ che uriqik y xeʼukoj ri sukʼalaj taq rachiʼl che uyaʼik tobʼanik che. w21.03 17, 18 párrs. 14, 15, 19