Febrero

Ri Jehová qas kel ukʼuʼx chke ri upatanelabʼ. Ri Areʼ ronojel taq qʼij kʼo qukʼ. Xuqujeʼ retaʼm are chiʼ kojbʼisonik (Sal. 145:18, 19). Chqilaʼ jas xubʼan che utoʼik ri qʼaxal tzij Elías. Pa ri tiempo che xkʼojiʼ wajun qʼaxal tzij sibʼalaj xuriq kʼax. Itzel taq ukʼulel ri Jehová xkaj xkibʼan kʼax chke ri upatanelabʼ, jun chke are ri Elías che xkaj xkikamisaj (1 Rey. 19:1, 2). Ri areʼ xuchomaj che xaq utukel kʼo chi kanoq rumal laʼ sibʼalaj xbʼisonik (1 Rey. 19:10). Ri Jehová aninaq xutoʼo, xutaq bʼi jun ángel rech kuya uchuqʼabʼ y xukʼut chuwach che kʼo rukʼ y e kʼo na e kʼi israelitas che kiyaʼom ta kan upatanexik (1 Rey. 19:5, 18). Rukʼ loqʼoqʼebʼal ri Jesús xubʼij chke ri rajtijoxelabʼ che sibʼalaj e kʼi kachalaxik kkiriq pa ri kikojonik (Mar. 10:29, 30). Y ri qaTat Jehová ubʼim che kuya ri utobʼanik chke ri kkipatanij (Sal. 9:10). w21.06 8, 9 párrs. 3, 4

E kʼi winaq kimik utz ta kkil ri kqakʼut chkiwach chrij ri Biblia rumal che kuqʼalajisaj ri molom taq tzij kʼutum chkiwach. Ri kʼamal taq bʼe re ri kojonem kkikʼut chkiwach ri winaq che kebʼe pa qʼaqʼ, rumal laʼ ri winaq kkixibʼij kibʼ chkiwach. Ri kqapatanij ri Dios rukʼ loqʼoqʼebʼal kqakʼutu che qastzij ta wajun kʼutunem riʼ. Ri e kojonem kkikʼutu che kʼo kkʼasiʼ kan chqe are chiʼ kojkamik. Wet qastzij wariʼ rajawaxik ta riʼ ri kʼastajibʼal chqe. Rumal laʼ, oj kqaya ubʼixik che ri kkibʼij are ta ri kukʼut ri Biblia. Jun chi jastaq, kkikʼutu che tzʼibʼatal chqij ri kqakʼulmaj, are kʼu oj qetaʼm che ri Biblia kukʼutu che ri winaq chkijujunal kkichaʼ ri kkaj kkibʼano y we kkaj kkipatanij ri Dios. ¿Jas kkibʼan ri kʼamal taq bʼe re taq ri kojonem are chiʼ kqaqʼalajisaj ri molom taq tzij kkibʼij? Sibʼalaj kpe koyowal. Kqanimaj riʼ ri Dios we qas nim kqil ri kubʼij ri uTzij (Juan 8:45, 46). Kqabʼan ta qe ri xubʼan ri Satanás xaneʼ nim kqil ri qastzij y kqaya ta kan retaʼmaxik (Juan 8:44). Ri Dios kraj che kqabʼan qe junam rukʼ ri Jesús, rumal laʼ kubʼij chqe: «Chiwetzelaj uwach ri lawaloyil [o itzelal] chitaqej kʼu ubʼanik ri utzilal» (Rom. 12:9; Heb. 1:9). w21.05 10 párrs. 10, 11

Y we kqilo che kqabʼan nim che qibʼ y kqarayij kʼi jastaq ¿la kojkunik kqaya kan ubʼanik? Ri apóstol Pablo xubʼij che kojkunik kqaya kan ubʼanik ri jastaq che ri Satanás kukoj chqawach (2 Tim. 2:26). Masach chqe che ri Jehová más kʼo nim uchuqʼabʼ chuwach ri Satanás. We kqatzukuj ri utobʼanik, ri Areʼ kojutoʼ rech kojel pa uqʼabʼ ri Satanás. Are kʼu, ri más utz are che kqachajij qibʼ rech kojqaj ta pa uqʼabʼ ri Satanás. Wariʼ kojkunik kqabʼano rukʼ ri utobʼanik ri Jehová. Rumal laʼ ronojel qʼij chqataʼ che Jehová che kojutoʼ che rilik we tajin kqabʼan nim che qibʼ o tajin kqarayij kʼi jastaq (Sal. 139:23, 24). Mojqaj pa uqʼabʼ ri Satanás. Pa kʼi junabʼ e kʼi winaq e qajinaq pa uqʼabʼ ri Satanás. Are kʼu xa jubʼiqʼ chi tiempo kraj rech kximik tekʼuriʼ ksachisax uwach (Apoc. 20:1-3, 10). ¡Sibʼalaj kqaj kopan ri qʼij riʼ! Are kʼu, are chiʼ majaʼ kopanik, chqachajij qibʼ rech kojqaj ta pa uqʼabʼ. Chqakojoʼ qachuqʼabʼ rech kqabʼan ta nim che qibʼ y kqarayij ta kʼi jastaq. Chqanimaj wajun taqanik riʼ: «Chiqʼatej uwach ri Itzel, kanimaj kʼu na chiwach». w21.06 19 párrs. 15-17

Ri Jehová kkikot rukʼ ri winaq che kraj kretaʼmaj chrij ri Biblia y kukʼut chkiwach e nikʼaj chik ri tajin kretaʼmaj (Prov. 23:15, 16). Sibʼalaj kkikot ri Jehová rumal ri tajin kkʼulmataj kimik. Jun kʼutbʼal, pa ri junabʼ 2020, paneʼ xpe jun nimalaj yabʼil xeya 7,705,765 etaʼmanik re ri Biblia, y xetoʼ 241,994 winaq rech xkijach ri kikʼaslemal che ri Jehová y xkibʼan kiqasanjaʼ. Y ri kʼateʼ xkibʼan kiqasanjaʼ xuqujeʼ kekunik kkimaj uyaʼik etaʼmanik re ri Biblia che jun chi winaq rech kux tijoxel (Luc. 6:40). Qastzij che ri Jehová kkikotik are chiʼ keqatoʼ ri winaq rech keʼux tijoxelabʼ. Rech ri winaq kkiloqʼoqʼej ri Jehová rajawaxik kqakoj qachuqʼabʼ che kitoʼik y ri qachuqʼabʼ are ri Jehová kyaʼowik. ¿La kojkunik kqamaj jun etaʼmanik chrij ri Biblia paneʼ xa rukʼ jun winaq? We kuyaʼ, chqabʼij chke konojel ri winaq che kqaj kqaya etaʼmanik re ri Biblia chke. Weneʼ kkibʼij chqe che kkaj. w21.07 6, 7 párrs. 14-16

Ri qʼatal tzij David are jun kʼutbʼal che utz kesax uwach kumal ri qachalal nim chi kijunabʼ rumal jun bʼantajik: ri sipanik. Ri David xusipaj kʼi jastaq rech xtobʼan che uyakik ri rachoch ri Dios (1 Crón. 22:11-16). We nim chi ri junabʼ la y kkun ta chi la che uyaʼik tobʼanik che uwokik Ja rech Ajawbʼal, we kbʼanik, kkun la kyaʼ ri tobʼanik rukʼ ri kuchuj la. Y, chtzijoj la chke ri kʼa e majaʼ na ronojel ri etaʼmam la. Ri apóstol Pablo xuqujeʼ are jun utz kʼutbʼal che sibʼalaj xsipanik. Xusikʼij bʼi ri ala Timoteo che utzijoxik utzij ri Dios pa jalajoj taq tinamit y xukʼut chuwach jas kbʼan che ubʼanik (Hech. 16:1-3). Ri Timoteo xux jun utzalaj ajtij rumal ri tijonik xyaʼ che rumal ri Pablo (1 Cor. 4:17). Y, ri Timoteo xukʼut chkiwach nikʼaj chik ri xkʼut chuwach rumal ri Pablo. w21.09 12 párrs. 14, 15

¿Jas kqetaʼmaj chrij ri kikʼutbʼal ri tijoxel Apolos y ri apóstol Pablo? Ri e kebʼ achijabʼ riʼ kʼo nim ketaʼmabʼal chrij ri uTzij ri Dios, e ajtijabʼ che qas etaʼmatal kiwach y nim keʼil wi kumal ri nikʼaj chik. Xuqujeʼ, xekitoʼ e kʼi winaq rech xeʼux tijoxelabʼ. Are kʼu kʼo ta jun chke ri achijabʼ riʼ xuchomaj che kubʼan ukʼulel che ri jun chik (Hech. 18:24). Rumal che are chiʼ elenaq chi bʼi pa ri tinamit Corinto, ri Pablo xubʼij che, che ktzalij chi bʼi jumul chilaʼ (1 Cor. 16:12). Ri Apolos utz xubʼan che ukojik ronojel ri kkun che ubʼanik: che utzijoxik ri utzij ri Dios y che uyaʼik kichuqʼabʼ ri qachalal. Xuqujeʼ kojkunik kqachomaj che ri Apolos are jun achi che kmachʼachʼik. Jun kʼutbʼal, ri uTzij ri Dios kubʼij taj che xpe royowal are chiʼ ri Áquila y ri Priscila «xkikʼut ri ubʼe ri Dios chuwach, rukʼ tzʼaqatil» (Hech. 18:24-28). Ri apóstol Pablo qas tajin kril ri chak tajin kubʼan Apolos. Are kʼu xuchomaj taj che weneʼ nim ta chi kil kumal ri nikʼaj chik rumal che ri Apolos más utz tajin kubʼan che ri chak. Pa taq ri e wuj che xutzʼibʼaj bʼi chke ri cristianos re Corinto, kojkunik kqilo che ri Pablo are jun achi che kmachʼachʼik, kuchʼobʼo che kʼo kkun ta che ubʼanik y kuya ta uwiʼ ri kubʼano (1 Cor. 3:4-6). w21.07 18, 19 párrs. 15-17

Rumal che ri Adán y ri Eva rukʼ tzʼaqat kichomanik xeniman taj, taqal chke che xeʼelesax bʼi pa ri ufamilia ri Dios. ¿Jas kʼu kkʼulmataj kukʼ ri e kalkʼwaʼl? Rumal ri uloqʼoqʼebʼal ri Jehová, xraj che ri e nimanel taq winaq kekʼojiʼ chi jumul pa ri ufamilia. ¿Jas xubʼan che ubʼanik? (Juan 3:16). Rukʼ ri ukamikal ri Jesús, e kʼo 144,000 sukʼ taq winaq kekunik keʼux chi jumul e ralkʼwal (Rom. 8:15-17; Apoc. 14:1). Xuqujeʼ, sibʼalaj e kʼi winaq tajin kkibʼan ri kraj ri Dios. Kʼo keyebʼal che qas keʼux na ufamilia are chiʼ kqʼax ri nimalaj kʼax chukʼisbʼal ri 1,000 junabʼ (Sal. 25:14; Rom. 8:20, 21). Kimik kkibʼij chi «[ki]Tat» che ri Jehová, ri Yaʼowinaq kikʼaslemal (Mat. 6:9). Xuqujeʼ, ri e winaq che kekʼastaj lo pa ri kamikal, kketaʼmaj na jas rajawaxik kkibʼano y ri winaq che kenimanik keʼux ufamilia ri Jehová. w21.08 5 párrs. 10, 11

Are chiʼ xyaʼ jun uchak ri apóstol Pablo rumal ri Dios, xrilo che sibʼalaj nim ubʼanik pa ri ukʼaslemal. Xaq xiw ta xutzijoj ri utzij ri Dios «chkiwach ri winaq xuqujeʼ pa taq [k]achoch» (Hech. 20:20). Xaneʼ xutzijoj pa apachike qʼij o apachike lugar. Jun kʼutbʼal, kʼo jun qʼij are chiʼ tajin kereyeʼj ri rachiʼl pa Atenas, xumaj utzijoxik ri utzij ri Dios che jun jupuq winaq che nimaʼq kibʼanik, y e kʼo jujun utz xkita ri xubʼij (Hech. 17:16, 17, 34). Xuqujeʼ are chiʼ xtzʼapix pa cárcel, xutzijoj ri utzij ri Dios chke konojel ri e kʼo chunaqaj (Hech. 28:16-24; Filip. 1:13, 14). Ri Pablo utz xubʼan che ukojik ri tiempo. Amaqʼel keʼusikʼij bʼi jujun rech junam kekitzijoj ri utzij ri Dios. Jun kʼutbʼal, pa ri nabʼe uviaje misional xusikʼij bʼi ri Juan Marcos y pa ri ukabʼ uviaje xukʼam bʼi ri Timoteo (Hech. 12:25; 16:1-4). Xukoj uchuqʼabʼ che kitijoxik ri achijabʼ riʼ rech kkibʼan taq congregaciones, keʼux utz taq kʼamal taq bʼe y e utz taq ajtijabʼ (1 Cor. 4:17). w22.03 27 párrs. 5, 6

Jujun winaq kkikoj taj che kʼo jun Bʼanol re ronojel ri jastaq, rumal che kkibʼij che xaq xiw kekojon chrij ri jastaq che kekunik kkilo. Are kʼu ri qastzij e areʼ xuqujeʼ kekojon chrij ri jastaq che keʼilitaj taj. Jun kʼutbʼal re, kkichʼobʼo che ketzaq loq we kepaqiʼ kʼa chikaj, wariʼ kbʼix ri gravedad che. Ketaʼm che qastzij ketzaq loq, paneʼ kkil ta ri gravedad. Pa ri uTzij ri Dios kqetaʼmaj che «qastzij e kʼo ri jastaq ri man keʼilitaj taj» che kʼo kibʼanik rukʼ ri qakojonik (Heb. 11:1). Rech kqetaʼmaj más chkij taq ri e jastaq che keʼilitaj taj, rajawaxik kqakoj qatiempo y qachuqʼabʼ che kinikʼoxik, are kʼu e kʼi winaq kkaj taj kkibʼan wariʼ. Rumal laʼ kkibʼij che kʼo ta Dios. Jujun científicos xekinikʼoj ri jastaq che kʼo kikʼaslemal, xkichʼobʼo che are ri Dios xbʼanow ri kajulew. E kʼo jujun winaq kkibʼij che kʼo ta jun Bʼanol re ronojel ri jastaq, rumal che pa ri nimaʼq taq tijobʼal kkʼut ta wariʼ. Are kʼu e kʼi ketaʼmam uwach ri Jehová y sibʼalaj kkiloqʼoqʼej chi kimik. Rajawaxik che oj kqakowirisaj ri qakojonik chrij ri Dios junam rukʼ ri xkibʼan e areʼ. w21.08 14 párr. 1; 15, 16 párrs. 6, 7

Junam rukʼ ri xqil kan pa ri jun kʼutunem, rech xukʼutu che ri Jehová sibʼalaj utz krilo kutoqʼobʼisaj wachaj, ri Jesús xchʼaw chrij ri kʼutbʼal re ri alkʼwalaxel che xel bʼi pa ri rachoch ri utat che «xusachalaʼ [...] ri uqʼinomal, xubʼan ronojel jas ri urayinik» (Luc. 15:13). Are chiʼ xqʼax ri tiempo xrilo che utz ta ri tajin kubʼano, xukʼex ri uchomanik y xtzalij bʼi pa ri rachoch. ¿Jas kuchomaj riʼ ri utat? Ri Jesús xubʼij: «Kʼa kʼo kʼu chi naj, xilitaj apan rumal ri utat. Ri areʼ kʼut xel ukʼuʼx che, xxikʼinik xbʼek, xuqʼaluj ri ala, xutzʼumaj». Ri tat xuyaj ta ri ukʼojol xaneʼ xutoqʼobʼisaj uwach, xukuy ri umak y xukʼulaj chi jumul pa rachoch. Ri ala xubʼan kʼi taq makaj, are kʼu rumal che qas xukʼex ri ukʼaslemal, xtoqʼobʼisax uwach rumal ri utat. Wajun tat riʼ che xutoqʼobʼisaj uwach ri ukʼojol kjunamataj rukʼ ri Jehová. Rukʼ wajun jeʼlalaj kʼutbʼal riʼ, Jesús xukʼutu che Jehová qas kukuy kimak ri winaq che kibʼanom jun nimalaj makaj we qas kkikʼex ri kikʼaslemal (Luc. 15:17-24). w21.10 8 párr. 4; 9 párr. 6

¿La are ri testigos rech Jehová ri tinamit che qas keyaʼow uqʼij ri ubʼiʼ ri Dios? Are, chqilampeʼ jasche kqabʼij wariʼ. Kimik, e kʼi kʼamal taq bʼe re ri qastzij taj kojonem kikojom kichuqʼabʼ rech kqʼalajisax ta ri ubʼiʼ ri Dios. Kikojom ta chi pa taq ri Biblias che kibʼanom y e kitaqchim ri e winaq re ri kikojonem rech kkikoj ta wajun bʼiʼaj riʼ. Are kʼu, qʼalajinaq che xaq xiw ri testigos rech Jehová ri kkiya uqʼij ri ubʼiʼ ri Dios y nim kkil wi. Kʼo ta jun chi kojonem kejunamataj qukʼ oj, rumal che xaq xiw oj kqatzijoj ri ubʼiʼ ri Dios chke e kʼi winaq. Y sibʼalaj kqakoj qachuqʼabʼ rech kojchʼaw chrij ri ubʼantajik ri Jehová, rumal laʼ ri bʼiʼaj che kbʼix chqe are: testigos rech Jehová (Is. 43:10-12). Qajachom más che 240 millones Biblias re ri Traducción del Nuevo Mundo, ri kriqitaj wi ri ubʼiʼ ri Jehová pa taq ri versículos che ri e winaq kesam bʼi pa nikʼaj chi Biblias. Y pa más che 1,000 chʼabʼal qesam lo wuj che kriqitaj ri ubʼiʼ ri Jehová chupam. w21.10 20, 21 párrs. 9, 10

Kqaqʼijilaj ri Jehová are chiʼ keqatoʼ ri e qachalal che kʼo kajwataj chke. Ri Jehová xubʼij chke ri israelitas che keʼutewchij we kekitoʼ ri kʼo kajwataj chke (Deut. 15:10). Are chiʼ kqatoʼ jun qachalal che rajawaxik tobʼanik che, jetaneʼ jun sipanik tajin kqaya che ri Jehová (Prov. 19:17). Jun kʼutbʼal, ri cristianos re Filipos xkitaq bʼi jastaq che ri Pablo are chiʼ chapom bʼi kumal ri qʼatal taq tzij y ri areʼ xubʼij che are jun sipanik che kqaj chuwach ri Dios (Filip. 4:18). Chojchoman chkij ri e qachalal y chqataʼ wariʼ chbʼil qibʼ: «¿La kʼo jun kinkunik kintoʼo?». Ri Jehová utz krilo we kqakoj ri qatiempo, ri qachuqʼabʼ, ri kojnaw che ubʼanik y ri jastaq qe kʼolik rech keqatoʼ ri kʼo kajwataj chke. Waʼ taq jastaq kʼo ubʼanik rukʼ ri kqabʼan che uqʼijilaxik (Sant. 1:27). Rajawaxik kqakoj qatiempo y qachuqʼabʼ che uqʼijilaxik ri Jehová junam rukʼ ri kraj areʼ. Are kʼu xa ta jun eqaʼn (1 Juan 5:3). ¿Jasche kqachomaj taj che xa jun eqaʼn? Rumal che rukʼ wariʼ kqakʼutu che kqaloqʼoqʼej ri Jehová y ri e qachalal. w22.03 24 párrs. 14, 15

We kqaj kqatoqʼobʼisaj kiwach ri e qachalal, rajawaxik kojchoman chrij ri kʼax tajin kkiqʼaxej. Jun kʼutbʼal, weneʼ kʼo jun qachalal che kʼo jun nimalaj yabʼil che. Kresaj ta utzijol ri tajin kukʼulmaj, are kʼu utz we kqatzukuj ri kqabʼan che utoʼik. Kmaltyoxin riʼ we kojtobʼan che ubʼanik ri kiwa ri ufamilia o kqachʼajchʼobʼej ri upa rachoch. O chojchoman chrij jun qachalal achi che weneʼ kʼo ta chi uchak chanim. ¿La kojkunik kqataq bʼi jubʼiqʼ urajil, are kʼu kketaʼmaj ta ri e nikʼaj chik che oj xojyaʼowik? Wariʼ kutoʼo kʼa kuriq na jun uchak. We kqaj kqatoqʼobʼisaj kiwach ri e qachalal kqeyej taj che kʼa kkitaʼ na tobʼanik rech keqatoʼo. Utz che oj kojmajinik, junam rukʼ ri kubʼan ri Jehová. Ronojel taq qʼij kresaj lo ri qʼij pa qawiʼ, y ri uqʼaqʼal ri qʼij kuya utzilal chqe qonojel. ¿La mat qastzij che rukʼ wariʼ ri Jehová kukʼutu che kojraj rumal che kuya ri rajawaxik chqe? ¡Sibʼalaj utz y sibʼalaj ksipanik, rumal laʼ sibʼalaj kqaloqʼoqʼej! w21.09 22, 23 párrs. 12, 13

Ri Dios kukuy qamak rumal ri nim loqʼoqʼebʼal ukʼuʼx. Rumal ri nim loqʼoqʼebʼal ukʼuʼx ri Jehová kraj kukuy umak ri winaq che kuya kan ubʼanik ri umak y kukoj uchuqʼabʼ che ukʼexik ri ukʼaslemal. Pa jun salmo, ri David xubʼij waʼ taq tzij chrij ri Jehová: «Man uyoʼm ta ri tojbʼal chqe jas riʼ ri taqal chqe ri qetzelal xuqujeʼ taq ri e qamak» (Sal. 103:8-11). Rumal che ri David nabʼe kanoq xmakun pa ri ukʼaslemal retaʼm jas ri kʼax kunaʼ jun winaq pa ri retaʼmabʼal ukʼuʼx are chiʼ kmakunik. Are kʼu xuqujeʼ xretaʼmaj che ri Jehová «kkuyun[ik]». Pa jun chʼawem, ri David xuqʼalajisaj jas kbʼanow che ri Jehová che kraj kukuy qamak. Qastzij wi, ri Jehová kkuyunik rumal che junam che kubʼij pa ri texto re kimik sibʼalaj nim ri loqʼoqʼebʼal ukʼuʼx chke ri kkitaʼ toqʼobʼ che. Are chiʼ kqabʼan jun makaj, utz kubʼan chqe we kojbʼison rumal ri xqabʼano, rumal che kojutoʼ che ukʼexik ri qakʼaslemal y kqabʼan ubʼanik ri utz taj xqabʼano. w21.11 5 párrs. 11, 12

Ri Jehová kuloqʼoqʼej ri ubʼiʼ, rumal laʼ kraj che konojel nim kkil wi (Is. 42:8). Are kʼu weneʼ pa más che 6,000 junabʼ bʼim molom taq tzij chrij ri ubʼiʼ (Sal. 74:10, 18, 23). Wariʼ xumajij are chiʼ ri Itzel (ri kbʼix «molol tzij» che) xubʼij che ri Dios uyaʼom ta ronojel chke ri Adán y Eva (Gén. 3:1-5). Chilaʼ xmajix wi lo ubʼixik che ri Jehová kʼo jastaq uyaʼom ta chke ri winaq rech kkiriq kikotemal. Xaq xiw ri Jehová taqal che kuqʼat tzij pa uwiʼ ri kaj y ri uwach Ulew, y xaq xiw areʼ ri utzalaj qʼatal tzij kʼolik (Apoc. 4:11). Are kʼu ri Itzel ukojom uchuqʼabʼ che kisubʼik ri ángeles y ri e winaq. Naj ta chi kraj ri Dios kusukʼumaj ri kʼax. Rumal ri ukochʼonik ri Dios, kqʼalajinik che xaq xiw areʼ kkunik kuqʼat tzij y kuya utzilal cho ri uwach Ulew. w21.07 9 párrs. 5, 6

Qastzij riʼ che ri achi che kukʼam bʼe pa ri ufamilia kraj kuya ri kajwataj chke, kiwa, kachoch xuqujeʼ ri katzʼyaq. ¿La tajin kariq kʼax che uriqik ri pwaq? We jeʼ wariʼ, sibʼalaj kʼax riʼ ariqom. Are kʼu, paneʼ jeʼ wariʼ akʼulmam katkunik kakoj atiempo rech kakowirisaj ri akojonik. Chabʼanaʼ achʼawem che ri Jehová, chasikʼij ri xubʼij ri Jesús pa Mateo 6:25-34 y chatchoman chrij. Chatchoman chrij ri kikʼutbʼal ri winaq che Jehová e uchajim rumal che are kkikoj nabʼe pa kikʼaslemal ri uQʼatbʼal tzij (1 Cor. 15:58). Wariʼ kukowirisaj ri akojonik che ri Jehová xuqujeʼ katutoʼ at. Areʼ retaʼm ri kajwataj chawe y retaʼm jas kubʼan che uyaʼik. Are chiʼ kawil che ri Jehová katutoʼ, kkowir ri akojonik y katkunik kachʼij ri kʼax che kariq pa ri petinaq. w21.11 20 párr. 3; 21 párr. 6

Ri tojbʼal mak are jun kʼutunem che ukowirisam ri kikojonik e kʼi cristianos. Kiyaʼom ta kan utzijoxik ri utzij ri Dios paneʼ ketereneʼx rukʼ itzelal y pa ronojel kikʼaslemal kichʼijom kʼi kʼax. Chqilampeʼ ri ukʼutbʼal ri apóstol Juan. Xuya ta kan utzijoxik ri utz taq tzij chrij ri Cristo y chrij ri tojbʼal mak weneʼ pa más che 60 junabʼ. Weneʼ xa jubʼiqʼ chi kraj che 100 ri ujunabʼ are chiʼ ri romanos xkichap bʼik rech kkʼojiʼ pa ri isla re Patmos. ¿Jas umak? Areʼ xubʼij: «Rumal rech chi nutzijom ri utzij ri Dios, xuqujeʼ ri uqʼalajisaxik ri Jesús» (Apoc. 1:9). ¡Are jun utzalaj kʼutbʼal re kojonik y uchʼijik ri kʼax! Pa ri e wuj che xutzʼibʼaj ri Juan xukʼut ri uloqʼoqʼebʼal che ri Jesús y ri umaltyoxinik rumal ri tojbʼal mak. Y más che 100 mul xchʼaw chrij ri tojbʼal mak y ri utzilal kuyaʼo (1 Juan 2:2). Rukʼ wariʼ xkʼutunik che ri Juan qas xumaltyoxij ri tojbʼal mak. w21.04 17 párrs. 9, 10

Ri Jehová are kraj che ri upatanelabʼ nim kekil wi ri winaq che tzʼaqat ta kaqan kiqʼabʼ, ri moyabʼ, ri kkita taj o ri kiriqom jun chi kʼax. Jun kʼutbʼal, xubʼij chke ri israelitas che kkibʼij ta itzel taq tzij che jun winaq che kuta taj. ¡Ubʼanik wariʼ sibʼalaj itzel! Rumal che ri winaq kuta taj, kkun ta riʼ kʼo kubʼano rech kutoʼ ribʼ. Pa Levítico 19:14 kqetaʼmaj che ri Dios xubʼij chke ri israelitas che makiyaʼ «jun tzaqibʼal pa ubʼe ri moy». Jun wuj kubʼij wariʼ: «Ri winaq pa ri ojer Oriente Medio, amaqʼel kkibʼan kʼax chke ri tzʼaqat ta kaqan kiqʼabʼ, ri moyabʼ, ri kkita taj o ri kiriqom jun chi kʼax». Weneʼ kʼo jun winaq kuya jun jastaq pa ubʼe ri moy rech kuriq kʼax o rech ktzeʼn chrij. ¡Sibʼalaj awas wariʼ! Rukʼ ri taqanik che kʼo pa Levítico 19:14, ri Jehová xeʼutoʼ ri israelitas rech kel kikʼuʼx chke ri tzʼaqat ta kaqan kiqʼabʼ, ri moyabʼ, ri kkita taj o ri kiriqom jun chi kʼax. w21.12 8, 9 párrs. 3, 4

Ri Jacob sibʼalaj xuxeʼj ribʼ rumal che xuchomaj che weneʼ ri rachalal ukʼolom na oyowal pa ranimaʼ chrij, are kʼu xubʼan uchʼawem che ri Jehová. Tekʼuriʼ, xutaq bʼi kʼi jastaq che ri Esaú (Gén. 32:9-15). Y are chiʼ xkiriq kibʼ are ri Jacob xmajin ubʼanik ri jastaq rech xukʼut chuwach ri Esaú che nim kril wi. Xumej ribʼ chuwach ri Esaú xa ta jumul ni kamul, xaneʼ siete mul. Rumal che ri Jacob kumachʼ ribʼ y nim keril wi ri winaq xraj xeʼutzir chi rukʼ ri rachalal (Gén. 33:3, 4). Kojkunik kqetaʼmaj jun jastaq nim ubʼanik chrij ri xubʼan ri Jacob are chiʼ kʼa majaʼ kuriq ri rachalal y ri xubʼano are chiʼ xuriqo. Ri nabʼe xubʼano are che rukʼ machʼachʼem xutaʼ ri utobʼanik ri Jehová. Tekʼuriʼ xubʼan ronojel ri xubʼij pa ri uchʼawem rech kekikotik are chiʼ kuriq ri Esaú. Y are chiʼ xkiriq kibʼ xok ta che ubʼixik che are ri Esaú ajmak. Ri xraj are che keʼutzir rukʼ ri rachalal. ¿Jas kqabʼan che resaxik uwach? (Mat. 5:23, 24). w21.12 25 párrs. 11, 12

Rumal che oj ajmakibʼ, jujun taq mul ri qanimaʼ y ri qachomanik kubʼan chqe che kʼo ta qapatan y che taqal ta chqe kojloqʼoqʼexik (1 Juan 3:19). Rumal laʼ, weneʼ kqachomaj che ri ukamikal ri Jesús kkun taj kutoj ri qamak. Are chiʼ kqanaʼo o kqachomaj ri jastaq riʼ, chnaʼtaj chqe che más «kʼo na ri Dios chuwach ri qanimaʼ, retaʼm kʼu ronojel». Paneʼ kqanaʼo che ri qaTat pa ri kaj kojraj taj o kukuy ta qamak, ri qastzij are che sibʼalaj kojuloqʼoqʼej y kraj kukuy qamak. Rajawaxik kqakoj pa qanimaʼ y kqachʼobʼo che qas kojraj. Rech kqabʼan wariʼ, rajawaxik kqanikʼoj ri uTzij ronojel taq qʼij, kqabʼan qachʼawem rukʼ y kojkʼojiʼ kukʼ ri qachalal ronojel tiempo. ¿Jasche nim kibʼanik wariʼ? Rumal che kqetaʼmaj chrij ri e utz taq ubʼantajik ri Jehová y kqachʼobʼo che sibʼalaj kojraj. We kojchoman chrij ri kqetaʼmaj pa ri Biblia kujaq más ri qachomanik y kojkunik keqasukʼumaj ri jastaq pa ri qachomanik y pa ri qanimaʼ (2 Tim. 3:16). w21.04 23, 24 párrs. 12, 13

We kqaj kkowir ri qakojonik xaq xiw ta rajawaxik kʼo kqetaʼmaj. Rajawaxik kojchoman chrij ri tajin kqetaʼmaj. Chojchoman chrij ri xtzʼibʼan ri Salmo 77. Sibʼalaj kbʼisonik rumal che xuchomaj che ri areʼ y ri israelitas weneʼ xa keqaj ta chi chuwach ri Jehová. Sibʼalaj kbʼisonik, rumal riʼ kok ta chi uwaram (versículos 2-8). ¿Jas xubʼano? Xubʼij wariʼ che ri Jehová: «Kinchoman chrij ronojel ri [a]bʼanom» (versículo 12). Qastzij che ri areʼ retaʼm ri xubʼan ri Jehová pa uwiʼ ri utinamit ojer kanoq. Are kʼu xutaʼ wariʼ chbʼil ribʼ: «¿La xa lo xsach ri rutzil ri Dios pa ujolom? ¿La xa lo sibʼalaj oyowarinaq, chi man kel ta chi ukʼuʼx chqe?» (versículo 9). Ri xtzʼibʼan wajun salmo xchoman chrij ri utz taq jastaq ri xubʼan ri Jehová y ri ubʼanom che utoqʼobʼisaxik uwach ri utinamit ojer kanoq (versículo 11). Rukʼ wariʼ, qas xuchʼobʼo che kewonobʼax ta kan rumal ri Jehová (versículo 15). w22.01 30, 31 párrs. 17, 18

¿Jas kunaʼ ri Jehová are chiʼ kchoman chkij ri upatanelabʼ che e kaminaq? Kraj kril chi jumul kiwach (Job 14:15). ¿La kubʼisoj riʼ ri Abrahán, ri rachiʼl? (Sant. 2:23). ¿E kʼu ri Moisés che xtzijon rukʼ «chwinaqil»? (Éx. 33:11). ¡Y sibʼalaj kraj kuta chi jumul ri David y ri e nikʼaj chi tzʼibʼanelabʼ re ri salmos rech kkibʼixoj ri jeʼlik taq bʼix re qʼijilanik che! (Sal. 104:33). Paneʼ ri e utz taq rachiʼl e warinaq pa ri kamikal, ri areʼ kesach ta pa ujolom (Is. 49:15). Ri Jehová retaʼm ronojel ri kibʼantajik. Kopan na ri qʼij che keʼukʼastajisaj y jumul chik kutatabʼej ri kichʼawem y kkikot rukʼ ri qʼijilanik kkiya che. ¿La mat qastzij che wariʼ kukubʼsaj qakʼuʼx ri kʼo jun qachalaxik kaminaq? Are chiʼ xumaj ri itzelal pa ri kotzʼiʼjalaj Edén, ri Jehová retaʼm che knimataj na ri kʼax. Utz ta kril ri itzelal, ri kʼax kbʼan chke nikʼaj chik y ri chʼoj che kʼo kimik. w21.07 10 párr. 11; 12 párr. 12

We kojloqʼoqʼenik, kqakʼutu che kqamaltyoxij ri tojbʼal mak xuya ri Jesús, rumal che pa qawiʼ qonojel xuya wi. We ri areʼ xraj xutoj ri kimak ri qachalal, are rumal che sibʼalaj keʼuloqʼoqʼej (1 Juan 3:16-18). Ri kqabʼan che kilik are kkʼutuwik we keqaloqʼoqʼej (Efes. 4:29, 31–5:2). Keqatoʼo are chiʼ e yawabʼ o tajin kkiriq jun kʼax, junam rukʼ jun kabʼraqan jun kaqiqʼ jabʼ o jun chi kʼax. Are kʼu, ¿jas kqabʼano are chiʼ jun qachalal weneʼ kubʼano o kubʼij jun jastaq che kubʼan kʼax chqe? ¿La kqakʼol oyowal pa qanimaʼ? (Lev. 19:18). We jeriʼ, chqanimaj waʼ taq tzij riʼ: «Chisachalaʼ imak chbʼil taq iwibʼ we kʼo jun kʼo royowal chrij ri jun chik. Jas ri Ajawaxel xusach ri imak ix, je chibʼanaʼ ix xuqujeʼ» (Col. 3:13). Are chiʼ kqakuy kimak ri qachalal, kqakʼutu che kqamaltyoxij ri tojbʼal mak xuya ri Jehová. w21.04 18 párrs. 12, 13

Ronojel ri chak kqabʼano utz kelik rumal ri utobʼanik ri Jehová. Are chiʼ kyaʼ más eqeleʼn chqe pa ri congregación, kojkunik keqatoʼ más ri qachalal rech kkʼojiʼ nim jamaril y utzilal chqaxoʼl, junam rukʼ ri xkibʼan Apolos y ri apóstol Pablo. Ri e kʼamal bʼe re ri congregación y ri siervos ministeriales ketobʼanik rech kʼo jamaril chkixoʼl ri qachalal are chiʼ pa ri uTzij ri Dios kkesaj wi ri pixabʼ kkiya chke y kkaj taj che e areʼ nim keʼil wi, xaneʼ are kkikʼut chkiwach ri qachalal che are rajawaxik kkesaj uwach ri Jesús. ¡Sibʼalaj kojkikotik che jeriʼ ri kibʼantajik ri qachalal! (1 Cor. 4:6, 7). Are ri Dios yaʼowinaq chqe ronojel ri kojkunik kqabʼano o ri kojnaw che ubʼanik. Weneʼ kqanaʼo che ri tajin kqabʼano nim ta ubʼanik. Are kʼu ri nitzʼ taq jastaq che kqabʼano, kejunamataj kukʼ ri bʼatzʼ ri kojom che utʼisel jun atzʼyaq, qas ta kilitajik are kʼu sibʼalaj nim upatan. Rumal laʼ, chqakojoʼ qachuqʼabʼ rech kqesaj pa qanimaʼ ronojel ri kuyak chʼoj chkixoʼl ri qachalal y chqayaʼ tobʼanik chke rech kkiloqʼoqʼej kibʼ y kʼo utzilal chkixoʼl konojel (Efes. 4:3). w21.07 19 párrs. 18, 19

At katkunik kkʼojiʼ aweyebʼal che kekʼastaj na lo ri e winaq che sibʼalaj kawaj. Ri rumal che xoqʼ ri Jesús xukʼutu che xraj xukubʼsaj kikʼuʼx ri e rachiʼl, wariʼ kukʼut chqawach che rukʼ ronojel ranimaʼ kraj keʼukʼasuj ri kaminaqibʼ (Juan 11:35). Katkunik kaya kichuqʼabʼ ri kebʼisonik rumal che xkam jun kachalaxik. Ri Jesús xaq xiw ta xoqʼ kukʼ ri Marta y ri María, xaneʼ xuqujeʼ xeʼutatabʼej y xukubʼsaj kikʼuʼx (Juan 11:25-27). Oj xuqujeʼ kojkunik keqatoʼo y kqakubʼsaj kikʼuʼx ri kaminaq jun kachalaxik. Ri qachalal Dan, jun kʼamal bʼe pa Australia, kubʼij: «Are chiʼ xkam ri wixoqil, xajwataj tobʼanik chwe. E kebʼ oxibʼ kʼulaj xkiya tobʼanik chwe rumal che xekʼojiʼ wukʼ are chiʼ xinbʼisonik y xinoqʼik. Y are chiʼ xinnaʼo che kʼo ta nuchuqʼabʼ xuqujeʼ xinkitoʼ che ubʼanik jujun taq nuchak, junam rukʼ uchʼajik ri nuchʼichʼ, bʼenam pa loqʼoj y ubʼanik ri nurikil. Y amaqʼel xkibʼan kichʼawem wukʼ. Xwilo che qastzij e wachiʼl y e wachalal pa taq ri ‹qʼijol re riqoj kʼax›» (Prov. 17:17). w22.01 16 párrs. 8, 9

Ri Jehová kraj kqariq utzilal pa ri qakʼaslemal (Prov. 4:20-22). Ri areʼ kukʼutu che kojraj are chiʼ kuya pixabʼ chqe rukʼ ri uTzij, pa ri e qawuj o rumal jun qachalal che ko ri ukojonik (Heb. 12:9, 10). Are chqata ri kbʼix chqe, man are ta ri kbʼan che ubʼixik. Weneʼ jujun mul kqachomaj che ri xyaʼow ri pixabʼ chqe man utz ta xubʼan che ubʼixik. Qastzij che ri kyaʼow ri pixabʼ rajawaxik qas kchoman na chrij ri kubʼij rech kʼax ta kbʼan che ukʼamik ri pixabʼ che kuyaʼo (Gál. 6:1). Are kʼu we chqe oj kyaʼ wi ri pixabʼ, rajawaxik kqatatabʼej ri kbʼixik. Paneʼ kqachomaj che utz ta xbʼan che ubʼixik chqe. Chojchoman chrij wariʼ: «Paneʼ utz ta xinta ri xubʼij ri winaq chwe, ¿la qastzij ri xubʼij? ¿La kinkoj nuchuqʼabʼ rech are ta kwil ri xubʼan che ubʼixik chwe y are kinta ri xubʼij?». Rajawaxik che are kojchoman chrij ri utzilal kqariqo are chiʼ kyaʼ jun pixabʼ chqe. w22.02 12 párrs. 13, 14

Ri Jehová retaʼm che aninaq taj kojkunik kqaya kan ri itzel chomanik y ri naqʼatisabʼal che utz taj (Sal. 103:13, 14). Rukʼ ri Biblia, ri ruxlabʼixel ri Jehová y ri utinamit kuya ri qanojibʼal y ri qachuqʼabʼ rech kojkunik kqakʼex ri qakʼaslemal. Chakojoʼ ri Biblia rech kawilo jas rajawaxik kakʼex pa ri akʼaslemal. Ri uTzij ri Dios kjunamataj rukʼ jun espejo, katutoʼ che unikʼoxik ri achomanik, ri katchʼawik y ri kabʼano (Sant. 1:22-25). Xuqujeʼ ri Jehová amaqʼel kʼo che atoʼik. Xaq xiw ri areʼ kkun che atoʼik, rumal che retaʼm ri kʼo pa awanimaʼ (Prov. 14:10; 15:11). Rumal laʼ, chanaqʼatisaj awibʼ rech ronojel taq qʼij kabʼan achʼawem y kanikʼoj ri uTzij ri Jehová. Qas chachʼobʼoʼ che kinimaxik ri utaqanik ri Jehová, are ri más utz na. Ronojel ri kubʼij ri Jehová kuya utzilal chqe. Ri keniman che ri utaqanik keʼutoʼ rech kkaj kibʼ e areʼ y kekikot pa ri kikʼaslemal (Sal. 19:8-11). w22.03 4 párrs. 8-10

Kqaqʼijilaj ri Jehová are chiʼ keqachajij y kojtobʼan che uwokik ja che kyaʼ wi uqʼij. Ri Biblia kubʼij che sibʼalaj nim ubʼanik ronojel ri chak che xbʼan che ri tabernáculo y ri jastaq che xkoj che (Éx. 36:1, 4). Rumal laʼ kimik, are chiʼ kojtobʼan che uyakik Ja rech Ajawbʼal y nikʼaj chi ja jawiʼ kyaʼ wi uqʼij ri Dios, are jun qʼijilanik che tajin kqaya che ri Jehová. E kʼi qachalal kkikoj kʼi kitiempo che ubʼanik wajun chak riʼ. Sibʼalaj nim kqilo ri kkibʼan che utoʼik ri utinamit ri Jehová. Are kʼu ri qachalal che ketobʼan che ubʼanik wajun chak xuqujeʼ kkitas kitiempo che utzijoxik ri utzij ri Dios. Jujun chke xuqujeʼ kkaj keʼux precursores. Ri e kʼamal taq bʼe kkikʼutu che ketobʼan che uyakik ri Ja rech Ajawbʼal, are chiʼ kkiya bʼe chke ri e qachalal che ketobʼan pa waʼ taq chak riʼ rech keʼux precursores we kekunik. We kʼo qetaʼmabʼal che uyakik taq ja o kʼo taj, qonojel kojtobʼan che uchʼajchʼobʼexik waʼ taq kʼolbʼal riʼ. w22.03 22 párrs. 11, 12