Marzo

Ri e «chij» re ri kʼutbʼal che kʼo pa Mateo 25:31-36 kchʼaw chkij ri e sukʼalaj taq winaq che e kʼasal na kimik y che kekʼojiʼ kan pa ri kotzʼiʼj uwach Ulew, ri kbʼix nikʼaj chi chij chke. Rukʼ sukʼilal kkiya ri kitobʼanik chke ri e chaʼom che e kʼo na cho ri uwach Ulew kimik rech kkitzijoj ri utzij ri Dios (Mat. 24:14; 28:19, 20). Ronojel taq junabʼ, are chiʼ xa jubʼiqʼ chi kraj knaʼtasax ri ukamikal ri Jesús, ri e winaq kʼo keyebʼal pa ri kotzʼiʼj uwach Ulew, kekitoʼ ri rachalal ri Cristo. Y kkibʼan wariʼ chiʼ kekisikʼij konojel ri e winaq rech kekʼojiʼ pa ri Unaʼtabʼalil ri ukamikal ri Jesús. Sibʼalaj kekikot ri winaq kʼo keyebʼal pa ri kotzʼiʼj uwach Ulew rumal che kekunik kekitoʼ ri rachalal ri Cristo. Kkichʼobʼo che ri tobʼanik tajin kkiyaʼo jetaneʼ che ri Cristo tajin kkibʼan wi (Mat. 25:37-40). w22.01 22 párrs. 11, 12

Are chiʼ kqabʼan qe ri xubʼan ri Jesús che kilik ri winaq tajin kqesaj uwach ri Jehová, jun kʼutbʼal, ri xubʼan ri Jesús che utoqʼobʼisaxik uwach jun achi che kʼo chʼaʼk chrij, ri xubʼan che utoʼik jun ixoq che kʼo jun nimalaj yabʼil che y ri xubʼan che ukubʼsaxik kikʼuʼx ri xkam jun kachalal (Mar. 1:40, 41; 5:25-34; Juan 11:33-35). Are chiʼ kqakoj ronojel qachuqʼabʼ che ubʼanik qe ri kubʼan ri Jehová kojqebʼ más rukʼ. We kqatereneʼj ri retal raqan ri Jesús, kojutoʼo rech kbʼe ta qakʼuʼx chrij ri jastaq re wajun uwach Ulew. Pa ri kʼisbʼal chaqʼabʼ che xkʼojiʼ cho ri uwach Ulew ri Jesús xubʼij wariʼ: «In chʼakanaq puwiʼ ri uwach ulew» (Juan 16:33). ¿Jas xraj xubʼij rukʼ ri e tzij riʼ? Che kʼo ta jun jastaq re ri uwach Ulew xqʼaten che ubʼanik ri xraj xubʼano y ri xuchomaj. Xsach ta che ri rumal xpe cho ri uwach Ulew, ¿jas rumal?, rumal che rajawaxik kchʼajchʼobʼisax ri ubʼiʼ ri Jehová. We oj kqachajij ta qibʼ weneʼ are más kbʼe qakʼuʼx chrij ri jastaq re ri uwach Ulew. Are kʼu, we kqakoj ronojel ri qachuqʼabʼ che ubʼanik ri kraj ri Jehová, kojkunik kqabʼij ri e tzij xubʼij ri Jesús: «In chʼakanaq puwiʼ ri uwach ulew» (1 Juan 5:5). w21.04 3, 4 párrs. 7, 8

Ri apóstol Pablo retaʼm ri utzujunik ri Jesús ri kubʼij: «Rech konojel ri kekojon che, man ksach ta kiwach» xaneʼ kkʼojiʼ na kikʼaslemal kʼo ta ukʼisik (Juan 3:16; Rom. 6:23). Wariʼ kukʼutu che ri Pablo qas kkojon chrij ri ukamikal ri Jesús. Xuqujeʼ retaʼm che ri Jehová kukuy kimak ri kibʼanom jun nimalaj makaj we qas kkaj kkikʼex ri kikʼaslemal (Sal. 86:5). Ri Pablo qas retaʼm che kloqʼoqʼex rumal ri Dios rumal che xutaq lo ri Jesús rumal rech. Chojchoman chrij ri kʼisbʼal taq tzij che kubʼij pa Gálatas 2:20. Ri Pablo xubʼij: «Ri uKʼojol ri Dios, [...] xinuloqʼoqʼej xuqujeʼ xuya ri ukʼaslemal rumal wech». Ri Pablo xuchomaj taj che xa jubʼiqʼ kajawax rumal ri Dios, jetaneʼ che kubʼij: «Wetaʼm che ri Jehová keʼuloqʼoqʼej ri qachalal, are kʼu ri in kinraj taj». Xaneʼ xunaʼtajisaj wariʼ chke ri cristianos re Roma: «Are taq kʼa uj ajmakibʼ, ri Cristo xkam rumal qech» (Rom. 5:8). Ri uloqʼoqʼebʼal ri Dios kkʼis taj. Ri Pablo qas retaʼm che nim ri uloqʼoqʼebʼal ri Dios. Y retaʼm che ri Jehová sibʼalaj xkʼojiʼ ukochʼonik rukʼ ri utinamit Israel. w21.04 22 párrs. 8-10

Are chiʼ kqaya jun etaʼmanik re ri Biblia, chqatoʼ ri tijoxel rech kuloqʼoqʼej ri Jehová. Chqakojoʼ qatiempo rech kqakʼut chuwach ri e ubʼantajik ri Jehová. Chqakʼutuʼ chuwach che ri Jehová amaqʼel kkikotik y amaqʼel keʼutoʼ ri keloqʼoqʼen che (1 Tim. 1:11; Heb. 11:6). Chqakʼutuʼ chuwach ri kikotemal kuriqo are chiʼ kukoj pa ukʼaslemal ri kretaʼmaj y chqatoʼ rech kuchʼobʼo che xa kloqʼoqʼex rumal ri Jehová (Is. 48:17, 18). Are chiʼ kuloqʼoqʼej más ri Jehová, sibʼalaj kraj riʼ kukʼex ri ukʼaslemal. Rech ri tijoxel kkunik kubʼan uqasanjaʼ, rajawaxik riʼ kukʼex jujun jastaq pa ri ukʼaslemal. Weneʼ rajawaxik kuya kan jujun jastaq re. Weneʼ jujun tijoxelabʼ rajawaxik kkiya kan kachilaxik jujun taq winaq che kkiloqʼoqʼej ta ri Jehová. Nikʼaj chik weneʼ kkiriq kʼax rumal che ri e kachalaxik itzel kekil ri testigos rech Jehová. Ri Jesús xubʼij che we jun winaq kuya kan kʼi jastaq, kuriq na kʼi tewchibʼal y e kʼiʼalaj taq rachalaxik pa ri utinamit ri Jehová (Mar. 10:29, 30). w21.06 4 párrs. 8, 9

Ri apóstol Pablo xujunamisaj ri kbʼan che utzijoxik ri utzij ri Dios rukʼ ri kbʼan che kikʼiyisaxik tikoʼn, rukʼ wariʼ xukʼutu che xaq xiw ta rajawaxik ketik ri ijaʼ. Xunaʼtajisaj wariʼ chke ri cristianos re Corinto: «Ri in xintikonijik, ri Apolos xjaʼnik [...]. Ri ix, ix utajiʼn ri Dios» (1 Cor. 3:6-9). Ri kojchakun pa ri utajiʼn ri Dios, kraj kubʼij che kojchakun rukʼ, xaq xiw ta kqatzijoj ri utzij chke ri winaq xaneʼ kqakoj qachuqʼabʼ che rilik che kkʼiy ri kikojonik. Are kʼu qas qetaʼm che are ri Dios kkʼiysan ri kikojonik. Are jun nimalaj eqelen utzijoxik utzij ri Dios y ukʼutik chkiwach ri winaq ri rajawaxik kkibʼano. Jun chak che kuya nimalaj kikotemal chqe. Ri apóstol Pablo che xeʼutoʼ e kʼi winaq re ri tinamit Tesalónica rech xeʼux tijoxelabʼ xubʼij ri e tzij riʼ: «¿Jas chrij kuʼl wi qakʼuʼx? ¿Jas ri qakikotemal? ¿Jas ri tojbʼal qe rumal ri chak ri qabʼanom? Ix riʼ [...]. Ix kʼut ri qajuluwem xuqujeʼ ri qakikotemal» (1 Tes. 2:19, 20; Hech. 17:1-4). w21.07 3 párr. 5; 7 párr. 17

Ri Jehová xraj xojqebʼ rukʼ (Juan 6:44). Chojchoman chrij jasche xraj xojqebʼ rukʼ. Are chiʼ tajin kunikʼoj ri kanimaʼ e kʼiʼalaj winaq, xril ri qanimaʼ oj che kʼo utz jastaq chupam y xrilo che kqaj kqaloqʼoqʼej (1 Crón. 28:9). ¿La mat qastzij che kukubʼsaj qakʼuʼx retaʼmaxik che ri Jehová retaʼm qawach, kuchʼobʼ ri kqanaʼo y kojraj? Ri Jehová katuloqʼoqʼej at y keʼuloqʼoqʼej ri e qachalal chkijujunal. Rech kqachʼobʼ wariʼ, ri Jesús xukoj jun kʼutbʼal. We jun ajyuqʼ e kʼo 100 uchij y ksach kan jun chke, ¿jas kubʼan riʼ? «Keʼuya kan ri jumuchʼ bʼelejlajuj (99), kbʼe pa taq ri juyubʼ che utzukuxik ri jun ri xsach kanoq». Y sibʼalaj kkikotik are chiʼ kuriqo, xa ta kpe royowal. ¿Jas kqetaʼmaj chrij wariʼ? Ri Jehová nim kojril wi chqajujunal. Ri Jesús xubʼij: «Ri iTat ri kʼo pa ri kaj man kraj taj chi ksach uwach jun chke we chʼutiʼq riʼ» (Mat. 18:12-14). w21.06 20 párrs. 1, 2

Are chiʼ kojchoman chrij ri qeyebʼal y chrij ri uloqʼoqʼebʼal ri Dios, kqaloqʼoqʼej más y kojnaqajin más che (Rom. 8:38, 39). Kubʼano che kqesaj uwach ri Jesús (1 Ped. 2:21). Chiʼ knaqajin ri qʼij che unaʼtasaxik ri ukamikal ri Jesús, kqanikʼoj ri ukʼaslemal, ri ukamikal y ri ukʼastajibʼal. Y, ri chʼabʼal che kyaʼ pa ri Unaʼtabʼalil ri ukamikal ri Jesús, kunaʼtasaj chqe che sibʼalaj kojraj (Efes. 5:2; 1 Juan 3:16). Usikʼixik y uchomaxik chrij ri xubʼan ri Jesús pa qawiʼ kojutoʼ rech ri qakʼaslemal «kjunamataj rukʼ ri ukʼaslemal ri Jesucristo» (1 Juan 2:6). Kojutoʼ rech amaqʼel kojkʼojiʼ pa ri uloqʼoqʼebʼal ri Dios (Jud. 20, 21). Are chiʼ kqakoj qachuqʼabʼ che unimaxik, che uchʼajchʼobʼisaxik ri ubʼiʼ y uyaʼik kikotemal che, amaqʼel kojkʼojiʼ pa ri uloqʼoqʼebʼal (Prov. 27:11; Mat. 6:9; 1 Juan 5:3). Are chiʼ kojkʼojiʼ pa ri Unaʼtabʼalil ri ukamikal ri Jesús kuya qachuqʼabʼ rech kqakʼut rukʼ ri qabʼantajik che kqaj amaqʼel kojux rachiʼl ri Jehová. w22.01 23 párr. 17; 25 párrs. 18, 19

Ri Jehová uyaʼom bʼe chqe kqachaʼ jas ri kqaj. Rukʼ wariʼ, kojkunik kqachaʼ jas kqabʼan pa ri qakʼaslemal. Ri qaDios che sibʼalaj kojuloqʼoqʼej kkikotik are chiʼ krilo che kqaj kqapatanij (Sal. 84:11; Prov. 27:11). Pa jalajoj jastaq re ri qakʼaslemal kojkunik utz kqabʼan che uchaʼik ri kqaj. Ri Jesús amaqʼel are xchoman chrij ri rajawaxik chke ri nikʼaj chik, oj xuqujeʼ kojkunik kqesaj uwach. Jumul, ri Jesús y ri rapóstoles sibʼalaj e kosinaq, rumal laʼ xkitzukuj jun kʼolbʼal che ktzʼinowik rech keʼuxlanik. Are kʼu, xekun taj xeʼuxlanik rumal che sibʼalaj e kʼi winaq xeʼopanik jawiʼ e kʼo wi rech kkitatabʼej ri kukʼut ri Jesús. Ri areʼ xpe ta royowal, xaneʼ xutoqʼobʼisaj kiwach konojel y «xuchaplej kitijoxik chke kʼi jastaq» (Mar. 6:30-34). Are chiʼ kqakoj ri qatiempo, ri qachuqʼabʼ junam rukʼ ri xubʼan ri Jesús rech keqatoʼ ri e nikʼaj chik, tajin kqaya uqʼij ri qaTat kʼo pa ri kaj (Mat. 5:14-16). w21.08 3 párrs. 7, 8

Ri Jehová utz krilo che jalajoj ri kibʼantajik ri winaq. Wariʼ kqʼalajinik rumal che jalajoj ubʼanom che kibʼanik ri jastaq. Kʼo ta e kebʼ winaq che xaq junam ri kibʼantajik, rumal laʼ ri Jehová kojujunamaj ta kukʼ ri nikʼaj chik. Ri areʼ are kril ri kʼo pa qanimaʼ (1 Sam. 16:7). Xuqujeʼ kril ri kojkunik kqabʼano, ri kojkun taj y ri xqabʼan ojer pa ri qakʼaslemal. Rumal laʼ, kojutaq ta che ubʼanik jun jastaq che kojkun ta che. Rajawaxik kqabʼan qe ri kubʼan areʼ che qilik. We je kqabʼano, tajin kqakʼutu che kʼo «utzalaj chomanik» qukʼ y kqachomaj taj che sibʼalaj nim qabʼanik ni kqachomaj che kʼo ta qapatan (Rom. 12:3). Qastzij wi che utz kqesaj uwach jun qachalal che sibʼalaj knaw che utzijoxik ri utzij ri Dios (Heb. 13:7). We je kqabʼano, kojux utz taq ajtijabʼ riʼ (Filip. 3:17). Are kʼu resaxik uwach ri kubʼan jun qachalal junam ta rukʼ we xa kqachomaj jachin más utz kubʼan che jun jastaq y jachin ri utz taj. w21.07 20 párrs. 1, 2

We qas kqil ri kibʼanik ri e chikop, ri e tikoʼn y ri e chʼumil, kkowir ri qakojonik chrij ri Bʼanol re ronojel wariʼ (Sal. 19:1). We kqakoj qachuqʼabʼ che kinikʼoxik wariʼ, qas kqachʼobʼo che are ri Jehová ri Bʼanol re ronojel ri jastaq. Are chiʼ kqanikʼoj ri jastaq che kʼo pa ri kajulew, kqetaʼmaj chrij ri e ubʼantajik ri Dios (Rom. 1:20). Jun kʼutbʼal, ri Qʼij xaq xiw ta kuya ri saqil y ri qʼaqʼil che kajwatajik rech kʼo kʼaslemal pa ri uwach Ulew, xaneʼ xuqujeʼ kukʼaq rayos ri sibʼalaj kʼatan y wariʼ kubʼan kʼax chqe ri oj winaq. ¿La kʼo kojtoʼw chuwach wariʼ? Ri uwach Ulew chʼuqʼutal rij rumal jun gas che kbʼix ozono che, wariʼ kuya ta bʼe che ri rayos re ri Qʼij kubʼan kʼax chke ri jastaq che kʼo kikʼaslemal. Are chiʼ knimar ri uchuqʼabʼ ri rayos, xuqujeʼ knimar ri uchuqʼabʼ ri ozono. ¿La mat qastzij che wariʼ kukʼutu che kʼo jun Bʼanol re ronojel ri jastaq che kʼo nim unojibʼal y uloqʼoqʼebʼal? w21.08 17 párrs. 9, 10

Are chiʼ jun winaq kubʼan uqasanjaʼ, rajawaxik amaqʼel kqaloqʼoqʼej y nim kqil wi (1 Juan 4:20). Jun kʼutbʼal, we kʼo jun jastaq xuchaʼ ubʼanik, chqakubʼsaj qakʼuʼx chrij, maqakʼaqalaʼ tzij chrij y maqachomaj che xaq xiw kchoman chbʼil ribʼ. Xaneʼ, nim chqilaʼ wi y chqachomaj che are más nim ubʼanik chqawach (Rom. 12:10; Filip. 2:3). Chqatoqʼobʼisaj kiwach y chqakʼutuʼ utzilal chke konojel winaq. We kqaj kojkʼojiʼ pa ronojel qakʼaslemal pa ri ufamilia ri Dios, rajawaxik kqabʼan ri kukʼut ri Biblia. Jun kʼutbʼal, ri Jesús xukʼut kanoq che rajawaxik kqatoqʼobʼisaj kiwach y kqakʼut utzilal chke konojel winaq, xuqujeʼ ri e qakʼulel (Luc. 6:32-36). Weneʼ kqachomaj che kʼax ubʼanik wariʼ. We jeriʼ, rajawaxik kojchoman junam rukʼ ri Jesús y kqabʼan qe ri xubʼan areʼ. Are chiʼ rukʼ ronojel qanimaʼ kqanimaj ri kubʼij ri Jehová y kqesaj uwach ri Jesús, tajin kqakʼut chuwach ri qaTat kʼo pa ri kaj che kqaj kojkʼojiʼ pa ronojel qakʼaslemal pa ri ufamilia. w21.08 6 párrs. 14, 15

We kqakubʼsaj qakʼuʼx chrij ri Jehová y kqaya ronojel che, ri areʼ kubʼij che sibʼalaj kojutewchij na. Pa ri Biblia keriqitaj kʼutbʼal kech winaq che xkikoj kichuqʼabʼ che upatanixik más ri Jehová. Kʼi mul, nabʼe rajawaxik kʼo xkibʼano rech xetewchixik. Jun kʼutbʼal, ri Dios xutewchiʼj ri Abrahán rumal che are nabʼe xuya kan ri rachoch «paneʼ man retaʼm ta kʼut jawijeʼ kbʼe wi» (Heb. 11:8). Ri Jacob xuqujeʼ xtewchixik, are kʼu nabʼe rajawaxik xukoj uchuqʼabʼ rukʼ jun ángel (Gén. 32:24-30). Y, rech ri israelitas xyaʼtaj ri Tzujum Ulew chke, rajawaxik che nabʼe ri e kojol tabʼal toqʼobʼ rukʼ kowil kʼuʼx xeʼok pa ri nimalaj jaʼ re ri Jordán (Jos. 3:14-16). Xuqujeʼ kojkunik kqetaʼmaj kʼi jastaq chkij ri Testigos re ri qaqʼij che kinimarisam ri kichak che upatanixik ri Jehová y kikubʼsam kikʼuʼx chrij pa jalajoj taq kʼax. w21.08 29, 30 párrs. 12-14

Qachalal nim chi kijunabʼ, rukʼ ri etaʼmabʼal alaq qas kchʼobʼ alaq ri xbʼan ojer che ubʼanik taq ri jastaq pa ri utinamit ri Jehová, are kʼu xuqujeʼ kchʼobʼ alaq che rajawaxik kkʼex jujun jastaq we kajwatajik. Y we kʼo jujun che alaq ri kʼateʼ xkibʼan kiqasanjaʼ xuqujeʼ kkun alaq che uyaʼik tobʼanik chke ri e nikʼaj chik. Ri kʼa e majaʼ na sibʼalaj utz kkita riʼ we ktzijoj alaq chke ri kʼulmatajinaq pa ri kʼaslemal alaq. We amaqʼel kyaʼ ri etaʼmabʼal kʼo ukʼ alaq chke e areʼ, sibʼalaj ktewchiʼx na alaq rumal ri Jehová (Luc. 6:38). We ri e qachalal nim chi kijunabʼ keqebʼ kukʼ ri kʼa e majaʼ na, kkitoʼlaʼ kibʼ (Rom. 1:12). Chkijujunal kʼo utz taq jastaq kukʼ. Ri nim chi kijunabʼ kʼo nim ketaʼmabʼal rumal ri kikʼulmam pa ronojel kikʼaslemal. Y ri kʼa e majaʼ na kʼo nim kichuqʼabʼ. Are chiʼ junam kechakun ri kʼa e majaʼ na kukʼ ri nim chi kijunabʼ, knimar ri achilanik chkixoʼl, kkiya uqʼij ri qaTat kʼo pa ri kaj y e jun nimalaj tewchibʼal pa ri congregación. w21.09 8 párr. 3; 13 párrs. 17, 18

¿Jasche ri judíos xkaj taj xeteriʼ chrij ri Jesús? Rumal che ri Jesús chuwach jun cheʼ xkamisax wi y wariʼ xaq xiw chke ri elaqʼomabʼ y ri itzel taq winaq kbʼan wi. Rumal laʼ xkikoj taj che are ri Mesías (Deut. 21:22, 23). Ri judíos che xkixutuj ri Jesús xkaj taj xkichʼobʼo che xa molom tzij xbʼan chrij y che xa itzel xilik. Y qas ta utz xbʼan che uqʼatik tzij pa uwiʼ, rumal che xaq kʼateʼ xkimulij kibʼ ri e kʼamal taq bʼe (Luc. 22:54; Juan 18:24). Ri qʼatal taq tzij are ta xkilo we qastzij ri xbʼix chrij ri Jesús xaneʼ «xekitzukuj winaq che ubʼixik bʼanoj tzij chrij [...], rech kkamisaxik». (Mat. 26:59; Mar. 14:55-64). Y are chiʼ ri Jesús xkʼastajisax pa ri kamikal rumal ri Jehová, ri qʼatal taq tzij nim pwaq xkiya chke ri chajinelabʼ re ri muqbʼal rech kkibʼij ta ri qas xkʼulmatajik (Mat. 28:11-15). w21.05 11 párrs. 12, 13

Ri Jehová kkun riʼ che usachisaxik uwach ronojel ri itzelal kʼo pa ri uwach Ulew. Are kʼu, rumal che nim ri ukochʼonik uyaʼom kʼi utzilal chqe. Ri oj kalkʼwaʼl kan ri Adán y Eva oj ajmakibʼ xojalaxik. Are kʼu ri Jehová sibʼalaj kojraj y kok il chqe xuqujeʼ kubʼij chqe che kusachisaj na ri itzelal (1 Juan 4:19). Y uchaʼom chi ri qʼij are chiʼ keresaj ronojel ri ralkʼwaʼl pa ri kʼaxkʼolil. ¿La mat kuya qachuqʼabʼ wariʼ rech kqabʼan qe ri kubʼan areʼ che uchʼijik ri kʼax paneʼ rajawaxik nim tiempo? Ri Jehová are ri más utzalaj kʼutbʼal chqawach rech kqachʼij ri kʼax. Y ri Jesús utz xubʼan che resaxik uwach. Are chiʼ xkʼojiʼ cho ri uwach Ulew rumal qech xuchʼij ri yoqʼonik, ri kʼax xbʼan che, xtzeʼx uwach y xkamisax chuwach jun cheʼ (Heb. 12:2, 3). Are kʼu, ¿jas xtoʼwik rech xuchʼij ri e kʼax riʼ? Are ri ukʼutbʼal ri uTat. Xuqujeʼ kojutoʼ oj rech kqachʼij ri kʼax. w21.07 12, 13 párrs. 15-17

Ronojel qʼij, ri qaTat kutoqʼobʼisaj qawach (Sal. 103:10-14). Xuqujeʼ ri Jesús je xubʼano, paneʼ e ajmakibʼ ri utijoxelabʼ, amaqʼel xutoqʼobʼisaj kiwach y xukuy kimak. Xuya ribʼ pa kamikal rech kkuyutaj ri qamak (1 Juan 2:1, 2). Are chiʼ rukʼ ronojel qanimaʼ kqakuy kimak ri e qachalal, knimar ri qaloqʼoqʼebʼal chke (Efes. 4:32). Qastzij wi che jujun taq mul kʼax kqariq che ukuyik makaj, are kʼu rajawaxik kqakoj qachuqʼabʼ che ubʼanik. Jun qachalal ixoq kubʼij che sibʼalaj xtoʼ rumal ri kʼutunem «Perdónense liberalmente unos a otros» re ri wuj La Atalaya. Ri areʼ kubʼij: «Wajun kʼutunem kubʼij che we kqakuy umak jun chik kraj taj kubʼij che xa utz kqil ri kʼax kbʼan chqe. Xaneʼ kojutoʼ che resaxik ri kʼax pa qanimaʼ y kuya jamaril chqaxoʼl». Are chiʼ kqakuy kimak ri e qachalal rukʼ ronojel qanimaʼ, kqakʼutu che sibʼalaj keqaj y tajin kqesaj uwach ri qaTat Jehová. w21.09 23, 24 párrs. 15, 16

Ri Jesús nim xril wi ri qastzij, kraj kubʼij, ri qas ubʼeyal kbʼix chrij ri Dios y ri kraj kubʼano. Qas xubʼan pa ukʼaslemal ri kukʼut ri utzij ri Dios y xuqʼalajisaj chkiwach ri e nikʼaj chik (Juan 18:37). Ri qastzij utijoxelabʼ ri Jesús xuqujeʼ nim xkil wi ri qastzij (Juan 4:23). Rumal laʼ, ri apóstol Pedro xubʼij che ri cristianismo are «ri bʼe re ri qastzij» (2 Ped. 2:2). Ri cristianos re ri nabʼe siglo sibʼalaj nim xkil ri qastzij, rumal laʼ xkixutuj ri chomanik re taq ri kojonem, ri kinaqʼatisabʼal ri winaq y ri chomanik che kjunamataj ta rukʼ ri qastzij (Col. 2:8). Xaq junam, ri qastzij cristianos pa taq ri qaqʼij kkikoj kichuqʼabʼ rech «k[e]bʼin jik pa ri qastzij» (3 Juan 3, 4). ¿Jas kkibʼan che ubʼanik wariʼ? Qas kkilo che ronojel ri jastaq kekojon chrij y ri kkibʼan pa kikʼaslemal are ri kubʼij ri uTzij ri Jehová. Ri testigos rech Jehová kkibʼij taj che ketaʼm ronojel ri kukʼut ri Biblia. Jujun taq mul, weneʼ utz ta kibʼanom che uqʼalajisaxik jun kʼutunem re ri Biblia o che uyaʼik pa cholajil ri jastaq che kbʼan pa ri congregación. Are chiʼ qas kkichʼobʼ ri kraj kubʼij jun kʼutunem re ri Biblia, kikʼexom ri kajwatajik. w21.10 21, 22 párrs. 11, 12

Ojer kanoq, ri murallas che kojom chrij jun tinamit keʼuchajij ri winaq chkiwach ri kikʼulel. Ri nim loqʼoqʼebʼal ukʼuʼx ri Jehová junam rukʼ jun muralla che kojuchajij chuwach apachike kʼax pa ri qakojonik. Xuqujeʼ kukoj ri nim loqʼoqʼebʼal ukʼuʼx rech kojqebʼ rukʼ (Jer. 31:3). Ri salmista David xukoj jun chi kʼutbʼal che ukʼutik jas kubʼan ri Dios che uchajixik ri utinamit. Xutzʼibʼaj wariʼ: «NuDios, ¡lal kʼut [...] ri chʼuqubʼal wibʼ! lal ri Dios ri kinloqʼoqʼe[nik]». Xuqujeʼ xubʼij: «Areʼ ri jikalaj wachiʼl, ri nukʼolbʼal ri kinchʼuq wi wibʼ, ri kʼubʼal wibʼ ri naj elinaq chikaj, ri nutoronel; are nuketekik chʼichʼ, rukʼ areʼ kinchʼuq wi wibʼ» (Sal. 59:17; 144:2). ¿Jasche ri David xubʼij che ri nim loqʼoqʼebʼal ukʼuʼx ri Dios junam rukʼ jun chʼuqbʼal ibʼ o jun kʼubʼal ibʼ ri naj elenaq chikaj? Rumal che apawijeʼ taneʼ oj kʼo wi, we kqaya ta kan upatanixik ri Jehová, amaqʼel kojutoʼ na rech kqachajij ri qachilanik rukʼ. w21.11 6 párrs. 14, 15

Jumul are chiʼ ri Jesús xuqujeʼ ri utijoxelabʼ e bʼenaq pa jun barco, xpe jun nimalaj kaqiqʼ jabʼ. Rukʼ ri xkiriqo Jesús xubʼij chke che kajwataj más kikojonik (Mat. 8:23-26). Sibʼalaj nim ri kaqiqʼ jabʼ che ri joron xok pa ri barco, are kʼu ri Jesús kaminaq che waram. Sibʼalaj xkixibʼij kibʼ ri utijoxelabʼ ri Jesús rumal laʼ aninaq xkikʼasuj rech keʼutoʼ. Rukʼ utz taq tzij ri Jesús xubʼij chke: «¿Jasche kixeʼj iwibʼ, ri ix xa jubʼiqʼ ri ikojonik?». ¿La tajin kariq jun nimalaj kʼax pa ri akʼaslemal? Weneʼ tajin kariq kʼax rumal ri xubʼan kan jun kabʼraqan, jun kaqiqʼ jabʼ o weneʼ rumal jun yabʼil, rumal laʼ awetaʼm ta chik jas kabʼano. Weneʼ sibʼalaj katbʼisonik, are kʼu kaya taj che wariʼ kubʼano che kakubʼsaj ta chi akʼuʼx chrij ri Jehová. Chabʼij che ri Jehová ronojel ri kanaʼo, chatchoman chrij ri ubʼanom che atoʼik nabʼe kanoq rech kkowir ri akojonik (Sal. 77:11). Chakojoʼ che Jehová kʼo ta jumul katuya kanoq. w21.11 22 párrs. 7, 10

Weneʼ kʼo jun winaq kuchomaj che rech kqanimaj wajun taqanik riʼ, xaq xiw rajawaxik qas kqilo che kqachap ta jun jastaq che qech taj. Are kʼu, weneʼ kril taj che pa nikʼaj chi jastaq kubʼan elaqʼ. We jun ajkʼay kukoj pajbʼal o etabʼal che tzʼaqat taj rech keʼusubʼ ri keloqʼoman rukʼ, qastzij riʼ che tajin kubʼan elaqʼ chkij. Ri capítulo 19 re Levítico kujunamisaj ri elaqʼanik rukʼ are chiʼ jun winaq kubʼij ta ri qastzij are chiʼ tajin kkʼayinik, kubʼij: «Makoj ri toqinik che ri awajil atzʼaqat». Rumal laʼ, we jun kubʼij ta ri qastzij pa ri uchak o are chiʼ tajin kkʼayinik, tajin kelaqʼan riʼ. Pa ri uwajxaq taqanik che kʼo pa ri Diez Mandamientos kubʼij che utz taj che jun winaq kelaqʼanik, are kʼu ri kubʼij pa Levítico kuya más ubʼixik jas rajawaxik kqabʼano rech kqabʼan pa qakʼaslemal wajun taqanik riʼ. Sibʼalaj utz we junam ri qachomanik rukʼ ri Jehová chrij ri bʼanoj tzij y ri elaqʼanik. Chojchoman chrij wariʼ: «Rumal ri kubʼij Levítico 19:11-13, ¿la rajawaxik kʼo kinkʼexo are chiʼ kinbʼan nukʼay o kinchakunik?». w21.12 9, 10 párrs. 6-8

Are chiʼ chqajujunal kqabʼan qachʼawem che ri Jehová, chnaʼtaj chqe jampaʼ mul oj makunaq chuwach pa ri qʼij y chqata kuybʼal qamak che. Xuqujeʼ we sibʼalaj nim ri mak qabʼanom chqata tobʼanik chke ri kʼamal bʼe rech kojkitoʼo. Ri e areʼ kojkitatabʼej riʼ y kkikoj ri Biblia che ubʼixik chqe jas rajawaxik kqabʼano. Xuqujeʼ kkibʼan chʼawem riʼ pa qawiʼ rech ri Jehová kukuy qamak rumal ri tojbʼal mak xuya ri Jesús (Sant. 5:14-16). Chojchoman chrij ri tojbʼal mak. Weneʼ xuqujeʼ oj kqʼutut ri qanimaʼ rumal ronojel ri kʼax xuriq ri Jesús. Rumal laʼ, are chiʼ sibʼalaj kojchoman chrij ri xuriqo, sibʼalaj kqaloqʼoqʼej xuqujeʼ ri uTat. Y ronojel taq junabʼ knimar ri qamaltyoxinik rumal ri tojbʼal mak xuya ri Jesús are chiʼ kojkʼojiʼ pa ri unaʼtabʼalil ri ukamikal y keqasikʼij nikʼaj chi winaq rech keʼopan qukʼ. Are jun nimalaj eqeleʼn uyaʼom ri Jehová chqe rech kqakʼut chkiwach e nikʼaj chi winaq ri xubʼan ri uKʼojol. w21.04 18, 19 párrs. 13-16

Chojchomanampeʼ chrij ri xubʼano are chiʼ e kʼi winaq xebʼe che rilik chunaqaj jun juyubʼ. Ri Jesús jun aqʼabʼ xubʼan uchʼawem, weneʼ rumal wariʼ sibʼalaj kosinaq. Are kʼu, are chiʼ xeril ri winaq che e mebʼaʼ y e yawabʼ xutoqʼobʼisaj kiwach. Xaq xiw ta xeʼukunaj y xeʼutoʼo, xaneʼ xuqujeʼ xuya chke ri jeʼlalaj chʼabʼal: ri Sermón del Monte (Luc. 6:12-20). Ri Jesús xuya utiempo che kitoʼik ri e nikʼaj chik. Chojchomanampeʼ chrij wariʼ: ri Jesús kʼateʼ xretaʼmaj che xkamisax ri Juan el Bautista. Ri Biblia kubʼij: «Xetaʼmataj kʼut rumal ri Jesús ri xkʼulmatajik, xel bʼik chilaʼ pa jun jukubʼ man kʼo ta jun xnabʼenik, xbʼe pa ri chaqiʼj uwo saq pa utukel wi» (Mat. 14:10-13). Are kʼu sibʼalaj e kʼi e winaq keyem chi pa ri lugar che kraj kopan wi (Mar. 6:31-34). Xuchomaj ta na we keʼutoʼo, xaneʼ xrilo che rajawaxik kubʼsal kʼuʼx chke (Luc. 9:10, 11). w22.02 21 párrs. 4, 6

Rumal laʼ, ¿jas rajawaxik kqabʼano we kqanaʼo che xqabʼan kʼax che jun chi qachalal? Kqabʼan qachʼawem che ri Jehová y kqabʼij che che kutewchij ri chuqʼabʼ kqakojo rech kojutzir rukʼ ri qachalal. Xuqujeʼ rajawaxik kqanikʼoj jas ubʼanik ri qachomanik y ri qabʼantajik. Jun kʼutbʼal, kojkunik kojchoman chrij waʼ taq preguntas: «¿La kwaj rukʼ machʼachʼem kintaʼ kuybʼal numak che ri jun chik rech kojutzir rukʼ? ¿Jas kkinaʼ riʼ ri Jehová y ri Jesús we kinkoj nuchuqʼabʼ rech kojutzir rukʼ ri wachalal?». Ri kqabʼan che utzalixik uwach waʼ taq preguntas kojutoʼo rech kqatatabʼej ri kubʼij ri Jesús y rukʼ machʼachʼem kojqebʼ rukʼ ri qachalal rech kojutzirik. Xaq junam rukʼ, we kqaj kkʼojiʼ utzilal chqaxoʼl rukʼ jun qachalal, rajawaxik kqamachʼ qibʼ (Efes. 4:2, 3). We qabʼanom chi wariʼ, utz riʼ che kojqebʼ rukʼ ri qachalal, rech kqilo jas kqabʼan che usukʼumaxik ri xqabʼano. Chnaʼtaj chqe che ri utzilal kkʼojiʼ chqaxoʼl rukʼ ri qachalal, más nim ubʼanik chuwach ri uriqik jachin ajmak (1 Cor. 6:7). w21.12 26 párrs. 13-16

Ri Jesús xbʼisonik rumal che retaʼm che más e kʼi chke ri judíos kkaj taj kkitatabʼej ri utz taq jastaq re ri uQʼatbʼal tzij ri Dios. Rumal riʼ ri Jerusalén kuriq na kʼax y ri judíos che kekolotaj kanoq kekʼam bʼi pa jun chi tinamit (Luc. 21:20-24). Sibʼalaj bʼisobʼal, rumal che junam rukʼ ri xubʼij ri Jesús e kʼi chke ri judíos xkaj taj xeteriʼ chrij. ¿Jas kkibʼan ri winaq re ri atinamit are chiʼ katzijoj ri e jastaq re ri uQʼatbʼal tzij ri Dios chke? Paneʼ kakoj achuqʼabʼ che utzijoxik ri utzij ri Dios chke are kʼu kkaj taj katkitatabʼej, ¿jas kawetaʼmaj chrij ri xubʼan ri Jesús che xoqʼik? Ri Jehová keʼuloqʼoqʼej ri winaq. Are chiʼ ri Jesús xoqʼik, kunaʼtasaj chqe che ri Jehová sibʼalaj kel ukʼuʼx chke ri winaq. «Kraj taj chi kʼo jun ksach uwach, xaneʼ are kraj chi konojel kkikʼex na kikʼuʼx» (2 Ped. 3:9). Oj kqakʼutu che keqaloqʼoqʼej ri qajil qatzʼaqat are chiʼ kqakoj qachuqʼabʼ che utzijoxik ri utzij ri Dios chke rech kopan pa kanimaʼ (Mat. 22:39). w22.01 16 párrs. 10-12

Kkowir ri qakojonik are chiʼ kojchoman chrij ri jastaq ubʼanom ri Jehová che utoʼik ronojel ri utinamit y ri ubʼanom che qatoʼik chqajujunal. Ri más nim ubʼanik are che knimar más ri qaloqʼoqʼenik che ri Jehová. Wariʼ are ri utzilal más nim ubʼanik. ¿Jasche? Rumal che ri loqʼoqʼebʼal kojutoʼ che unimaxik ri Jehová, kqabʼan jastaq che utz krilo y kojutoʼo rech kqachʼij apachike uwach kʼax (Mat. 22:37-39; 1 Cor. 13:4, 7; 1 Juan 5:3). Ri rachilaxik ri loqʼalaj qaDios Jehová, más nim ubʼanik chuwach apachike uwach jastaq (Sal. 63:1-7). Jumul chik, chnaʼtaj chqe che pa ri qaqʼijilanik kʼo ri chʼawem, unikʼoxik uwach ri Biblia y uchomaxik rij ri kqetaʼmaj. Chqesaj uwach ri Jesús, chqatasaʼ qatiempo y chqatzukuj jun lugar rech kojkʼojiʼ qatukel rukʼ ri Jehová. Maqayaʼ bʼe che nikʼaj chi jastaq kkesaj ri qatiempo. Y, we kʼo jun jastaq kojkun taj kqesaj pa qajolom are chiʼ tajin kqanikʼoj ri Biblia o pa ri riqbʼal ibʼ, chqataʼ tobʼanik che ri Jehová rech qas are kojchoman chrij ri tajin kqabʼano o ri tajin kbʼixik. We utz kqabʼan che ukojik ri tiempo, kojutewchij na ri Jehová rukʼ jun kʼaslemal maj ukʼisik pa ri kotzʼiʼj uwach Ulew (Mar. 4:24). w22.01 31 párrs. 18-20

Ri qachomanik kʼo ubʼanik rukʼ ri kqabʼano. Rumal laʼ, ri Jesús xubʼij che kqaxutuj ri kojukʼam bʼi che ubʼanik jun nimalaj mak (Mat. 5:21, 22, 28, 29). ¿La mat qastzij che kqaj kkikot ri qaTat Jehová qukʼ? Rumal laʼ, rajawaxik aninaq kqaxutuj apachike uwach itzel chomanik. Ri Jesús xubʼij: «Ri kel uloq pa ri uchiʼ ri winaq, pa ri ranimaʼ kel wi uloq» (Mat. 15:18). Jeʼ, ri kqabʼij kukʼut ri qabʼantajik. Chachomaj wariʼ: «¿La amaqʼel kinbʼij ri qastzij paneʼ kinriq kʼax rumal? We in kʼulanik, ¿la kinchajij wibʼ rech kinbʼij ta tzij o kinbʼan ta jastaq che kukʼutu che xa utz kwil jun chi winaq? ¿La kinchʼaw ta chrij tzʼilalaj taq jastaq? Are chiʼ kʼo kyakow woyowal, ¿la aninaq kinbʼilaʼ tzij che utzalixik uwach?». Chatasaʼ atiempo che uchomaxik waʼ we preguntas riʼ. We kawesaj bʼi ri itzel taq tzij, ri ubʼanik molom tzij o ri tzʼil taq tzij, kʼax ta kariq che resaxik bʼi ri ojer akʼaslemal. w22.03 5 párrs. 12-14

Ri winaq che kumachʼ ribʼ che utaʼik pixabʼ chke ri e nikʼaj chik, más aninaq kkʼiy pa ri ukojonik. Rumal laʼ chqataʼ pixabʼ chke ri e nikʼaj chik. ¿Jampaʼ rajawaxik kqataʼ pixabʼ chke ri e nikʼaj chik pa ri congregación? Chqilaʼ jujun kʼutbʼal. 1) Jun qachalal ixoq kutaʼ che jun publicadora che más kʼo retaʼmabʼal che kbʼe rukʼ che uyaʼik jun etaʼmanik re ri Biblia y kuta che jas rajawaxik kukʼexo. 2) Jun qachalal ixoq kraj kuloqʼ jujun upantalones, rumal laʼ kutaʼ pixabʼ che jun qachalal che ko pa ri ukojonik rech kuta che jas kuchomaj chrij ri pantalones che kuloqʼo. 3) Jun qachalal achi kuya ri nabʼe uchʼabʼal pa ri congregación, kubʼij che jun chi qachalal che kʼo más retaʼmabʼal rech kutatabʼej chiʼ kuya ri uchʼabʼal y kuya jujun taq pixabʼ che. Xuqujeʼ ri e qachalal che kʼi chi junabʼ kimajim uyaʼik chʼabʼal pa ri congregación utz che kkita pixabʼ chke e nikʼaj chi qachalal y kkibʼan ri kbʼix chke (Prov. 19:20). w22.02 13 párrs. 15-17

Ri Jehová kojuloqʼoqʼej junam rukʼ ri xubʼan che uloqʼoqʼexik ri uKʼojol are chiʼ xkʼojiʼ pa ri uwach Ulew (Juan 5:20). Xuya ronojel ri xajwataj che, ri ratzʼyaq, ri uwa, xrilij ri kunaʼo y ri jastaq re ri ukojonik. Rukʼ ronojel ranimaʼ xukʼutu che kuloqʼoqʼej y che kqaj chuwach (Mat. 3:16, 17). Ri Jesús kʼo ta jumul xunaʼo che xaq utukel kʼolik, rumal che retaʼm che amaqʼel ktoʼ rumal ri uTat kʼo pa ri kaj. Junam rukʼ ri Jesús, qonojel qanaʼom ri kubʼan Jehová che qaloqʼoqʼexik. Chojchoman chrij wariʼ: Jehová xojuya pa ri ufamilia che kojkiloqʼoqʼej, kkiya nimalaj kikotemal chqe y kojkitoʼ pa ronojel uwach kʼax (Juan 6:44). Xuqujeʼ ronojel tiempo kuya ri rajawaxik chqe pa ri qakojonik. Y kuya ri qawa ronojel taq qʼij (Mat. 6:31, 32). Are chiʼ kojchoman chrij ri kubʼan ri Jehová che qaloqʼoqʼexik, sibʼalaj knimar ri qaloqʼoqʼebʼal che. w21.09 22 párrs. 8, 9

¿Jas ubʼanik ri akʼaslemal are chiʼ majaʼ kawetaʼmaj chrij ri Biblia kukʼ ri testigos rech Jehová? Kʼi chqe kqaj taj kojchoman chi chrij ri ojer qakʼaslemal. Rumal che ojer kanoq, ri qabʼantajik y ri kqachomaj kukʼutu che kjunamataj rukʼ ri kkibʼan ri winaq che kkiya ta uqʼij ri Dios. We jeriʼ ri qakʼaslemal ojer, kʼo ta qeyebʼal riʼ y kʼo ta riʼ «ri Dios pa [q]animaʼ» (Efes. 2:12). Are kʼu chiʼ xamaj retaʼmaxik ri kukʼut ri Biblia, xawetaʼmaj che kʼo jun qaTat pa ri kaj che kojuloqʼoqʼej. Xachʼobʼo che we kawaj katqaj chuwach ri Jehová y katkʼojiʼ pa ri ufamilia, rajawaxik kakʼex kʼi jastaq che ri kabʼano y ri kachomaj. Xuqujeʼ xachʼobʼo che rajawaxik nim kawil wi ri e utaqanik ri Dios (Efes. 5:3-5). Rumal che ri Jehová are Yaʼowinaq ri qakʼaslemal y are ri qaTat kʼo pa ri kaj, taqal che kubʼij chqe jas rajawaxik kqabʼan ri oj kʼo pa ri ufamilia. Y ri kkaj kkibʼan kiqasanjaʼ kubʼij wariʼ chke: «[Ch]iwesa[j] kʼu bʼik ri ojer ikʼaslemal xuqujeʼ ri jastaq ri xibʼan nabʼe kanoq». w22.03 2 párrs. 1-3

Ri kʼo keyebʼal cho ri uwach Ulew sibʼalaj kekikotik chiʼ kekʼojiʼ pa ri Unaʼtabʼalil ri ukamikal ri Jesús y chiʼ kechoman chrij ri keyebʼal. Rukʼ kikotemal kkitatabʼej ri chʼabʼal che kyaʼ pa ri Unaʼtabʼalil ri ukamikal ri Jesús, rumal che are kchʼaw chrij ri kkibʼan na ri Cristo y ri 144,000 che uqʼatik tzij pa kiwiʼ ri winaq pa Mil Junabʼ. Ri e 144,000 kkitoʼ ri Jesús rech kkibʼan kotzʼiʼj che ri uwach Ulew y rech ri winaq kkiriq ri tzʼaqatalaj kʼaslemal. Sibʼalaj kekikot riʼ ri winaq are chiʼ kechoman chrij ri qʼij che ktzʼaqatisax ri kubʼij pa Isaías 35:5, 6; 65:21-23 y Apocalipsis 21:3, 4. Kkowir ri keyebʼal y kkiya ta kan upatanixik ri Jehová are chiʼ kechoman apan chrij ri qʼij che kkiriq na kibʼ pa ri kʼakʼ uwach Ulew kukʼ ri kachalal o kachiʼl che e kaminaq (Mat. 24:13; Gál. 6:9). w22.01 21 párrs. 5-7

¿Jas riʼ ri tojbʼal mak? Are ri tojbʼal xuya ri Jesús rech xtzalix chi jumul ri xutzaq kan ri Adán (1 Cor. 15:22). ¿Jasche rajawaxik wariʼ chqe oj? Rumal che pa ri uTzij ri Dios, ri taqanik xyaʼik are che «kyaʼ kʼaslemal che ukʼexwach kʼaslemal» (Éx. 21:23, 24). Ri Adán xutzaq kan ri tzʼaqatalaj kʼaslemal. Rumal laʼ, rech kbʼantaj wajun taqanik xuya ri Dios rajawaxik kkam ri Jesús (Rom. 5:17). Rukʼ wariʼ, ri Jesús kux ri «Tataxel kkam taj» chkiwach ri winaq ri kekojon chrij (Is. 9:6; Rom. 3:23, 24). Ri Jesús xraj xuya ri ukʼaslemal pa kamikal rumal che sibʼalaj kuloqʼoqʼej ri uTat y kojuloqʼoqʼej oj (Juan 14:31; 15:13). Are ri uloqʼoqʼebʼal xtoʼwik rech xuya ta kan ri Jehová y xuchʼij ri kʼax kʼa pa ri kamikal. Rumal ri xubʼano, kbʼantaj na ri kraj ri Jehová kubʼan kukʼ ri winaq y rukʼ ri uwach Ulew. w21.04 14 párrs. 2, 3