Mayo

Ri Jehová sibʼalaj kojuloqʼoqʼej, ¿jasche kqabʼij wariʼ? Rumal che pa ri Biblia xtzʼibʼax kan ri kajibʼ Evangelios, ri kriqitaj wi ri xubʼan kan ri Jesús pa ri ukʼaslemal. Chilaʼ kqetaʼmaj wi ri xubʼij, ri xuchomaj, ri xunaʼo y ri xubʼano. Waʼ taq kajibʼ wuj kojkitoʼo rech kojchoman chrij ri ukʼutbʼal ri Jesús. Jetaneʼ tajin kqatereneʼj ri retal raqan ri Jesús are chiʼ kqasikʼij uwach. We keqanikʼoj ri wuj riʼ, kojkunik kqetaʼmaj más uwach y qas kqatereneʼj ri retal raqan. Xaq xiw ta rajawaxik kqasikʼij ri Evangelios rech kʼo kqetaʼmaj. Rajawaxik kojchoman chrij ri kqasikʼij uwach (chajunamisaj rukʼ Josué 1:8). Chqakojoʼ ri qachomanik che rilik, utatabʼexik y unaʼik ri tajin kkʼulmatajik. Xuqujeʼ utz kqatzukuj más tobʼanik pa ri wuj che uyaʼom ri utinamit ri Jehová chqe. w21.04 4, 5 párrs. 11-13

Are chiʼ majaʼ kpe ri Jesús pa ri uwach Ulew tzʼibʼam chi kan pa ri uTzij ri Dios che ri Mesías kkʼayix pa kiqʼabʼ ri ukʼulel rukʼ 30 saq pwaq (Zac. 11:12, 13). Ri kkʼayin pa kiqʼabʼ ri ukʼulel are jun chke ri rachiʼl (Sal. 41:9). Ri Zacarías xuqujeʼ xutzʼibʼaj kan wariʼ: «Chakamisaj ri ajyuqʼ, are kʼu ri jumulaj kujabʼuj na ribʼ» (Zac. 13:7). Ri utz taq winaq xkixutuj ta kan ri Jesús xa rumal ri e jastaq riʼ, xaneʼ xkowir más ri kikojonik rumal che xkilo che xetzʼaqat ri e tzʼibʼam kan pa ri uTzij ri Dios. ¿La je kkʼulmataj kimik? Jeʼ. E kʼo jujun Testigos xkiya kan upatanixik ri Jehová, xeʼux apóstatas y kekitaqchij e nikʼaj chik rech je kkibʼano. Pa taq internet, radio, televisión y pa taq wuj kkibʼij kʼi molom taq tzij chqij. Are kʼu ri utz taq winaq kkiya ta kibʼ kesubʼik. Ketaʼm che pa ri Biblia tzʼibʼam kanoq che je kkʼulmatajik (Mat. 24:24; 2 Ped. 2:18-22). w21.05 11 párr. 12; 12, 13 párrs. 18, 19

Are kʼu kqamay ta wariʼ, rumal che ri uTzij ri Dios kubʼij che kajwataj tiempo che ri utinamit ri Dios rech nojimal chi nojimal kuchʼobʼ ri qastzij (Col. 1:9, 10). Ri Jehová nojimal uqʼalajisam ri qastzij, rumal laʼ rajawaxik kojeyenik rech kqachʼobʼ más ri qas kukʼut ri Biblia. Are chiʼ ri e qachalal che e kʼamowinaq ubʼe ri utinamit ri Jehová kkilo che kajwatajik kkʼex jun chomanik o jun jastaq, aninaq kkikʼexo. Ri e kʼamal bʼe re ri qastzij taj kojonem kkikʼex jujun jastaq pa ri kikojonem are kʼu xa rumal ri kkichomaj ri winaq e teren chkij o rech utz keʼil pa ri uwach Ulew. Are kʼu, ri testigos rech Jehová kqakʼex ri e jastaq pa ri qakojonem rumal che kqaj kojqebʼ más rukʼ ri Dios y kqaya uqʼij junam rukʼ ri xukʼut kan ri Jesús (Sant. 4:4). Are chiʼ kqakʼex jun jastaq pa ri utinamit ri Jehová, are ta rumal che kqaj kqabʼan ri kichomanik ri e winaq, xaneʼ rumal che xqachʼobʼ ri qas kukʼut ri Biblia. Nim kqil wi ri qastzij (1 Tes. 2:3, 4). w21.10 22 párr. 12

¿Jas kabʼano we kanaʼo che xaq atukel at kʼolik? Uchomaxik che ri Jehová tajin kojutoʼo (Sal. 55:22). Wariʼ kojutoʼo rech kubʼan ta kebʼ qakʼuʼx. Xuqujeʼ chatchoman chrij che ri Jehová tajin keʼutoʼ ri qachalal che kkinaʼo che xaq kitukel e kʼolik (1 Ped. 5:9, 10). Jun qachalal Hiroshi ubʼiʼ, che pa kʼi junabʼ xaq xiw ri areʼ Testigo pa ri ufamilia, kubʼij: «Ri xaq qatukel oj Testigos pa ri qafamilia, sibʼalaj kuya qachuqʼabʼ retaʼmaxik che qonojel tajin kqakoj qachuqʼabʼ che upatanexik ri Jehová». Xuqujeʼ chakowirisaj ri akojonik ronojel taq qʼij. Rajawaxik kqajaq ri qanimaʼ chuwach ri Jehová rech kqabʼij che ronojel ri kqanaʼo. Xuqujeʼ rajawaxik kqasikʼij ri uTzij ri Dios ronojel taq qʼij y kojchoman chrij ri e kʼutbʼal che kukʼut chqawach che ri Jehová amaqʼel kojraj. E jujun chi qachalal kkikʼol textos pa kijolom, junam rukʼ ri Salmo 27:10 xuqujeʼ Isaías 41:10. E nikʼaj chik utz kkibʼan bʼi che utijoxik kibʼ pa ri e riqbʼal ibʼ y kkikoj ri audios are chiʼ kkisikʼij ri Biblia. Ubʼanik wariʼ keʼutoʼ rech kkinaʼ taj che xaq kitukel e kʼolik. w21.06 9, 10 párrs. 5-8

¿La kaminaq jun awachalal o awachiʼl? Chakojoʼ atiempo che usikʼixik uwach kʼutbʼal re ri Biblia kech winaq che xekʼastajisaxik rech kakowirisaj ri akojonik chrij ri kʼastajibʼal. ¿La sibʼalaj katbʼisonik rumal che xelesax bʼi jun awachalaxik pa ri congregación? Chakojoʼ achuqʼabʼ che unikʼoxik más ri Biblia rech qas kakojo che ri kʼajisabʼal wachaj kuya ri Dios, are ri más utz na. Apastaneʼ ubʼanik ri kʼaxkʼolil tajin kariqo chakowirisaj ri akojonik. Chabʼij che ri Jehová ronojel ri kʼo pa awanimaʼ. Katas ta awibʼ, xaneʼ cheʼawachilaj ri e qachalal (Prov. 18:1). Paneʼ rukʼ oqʼej, chabʼanaʼ ri jastaq che kʼo ubʼanik rukʼ ri akojonik rech kachʼij ri kʼax (Sal. 126:5, 6). Chatkʼol pa ronojel ri e riqbʼal ibʼ, chatzijoj ri utzij ri Dios y chasikʼij uwach ri Biblia. Y amaqʼel chatchoman chrij ri utz taq jastaq utzujum ri Jehová chawe. We katchoman chrij ri kubʼan ri Jehová che atoʼik, sibʼalaj kkowir ri akojonik. w21.11 23 párr. 11; 24 párr. 17

¿Jasche kejunamax ri cristianos kukʼ «chʼutiʼq»? Ri winaq che kkiya ta uqʼij ri Jehová, are más nim kekil wi ri e qʼinomabʼ y ri nim keʼil wi pa ronojel ri uwach Ulew. Are kʼu ri cristianos je ta kkibʼano, rumal laʼ nim ta keʼil wi y kʼo ta kipatan chkiwach ri winaq che kkiya ta uqʼij ri Dios (1 Cor. 1:26-29). Are kʼu sibʼalaj nim kibʼanik chuwach ri Jehová. ¿Jasche ri Jesús xchʼaw chkij ri e «chʼutiʼq»? Rumal che ri utijoxelabʼ kitom chi wariʼ che: «¿Jachin ri nim na uqʼij pa ri rajawbʼal ri Dios?» (Mat. 18:1). Y, ¿jasche xkita wariʼ che? Rumal che pa ri uqʼij ri Jesús e kʼi judíos sibʼalaj kkaj nim keʼil wi kumal konojel ri winaq. Jun achi kʼo nim retaʼmabʼal xubʼij: «Ri winaq sibʼalaj kkirayij kyaʼ kiqʼij y keʼux nim kibʼanik chkiwach ri nikʼaj chik». Ri Jesús retaʼm che ri utijoxelabʼ rajawaxik kkikoj kichuqʼabʼ che uxutuxik wajun chomanik re unimarisaxik ibʼ che utz kkil ri judíos. w21.06 20 párr. 2; 21 párrs. 6, 8; 22 párr. 9

Ri apóstol Pablo are jun utzalaj kʼutbʼal chkiwach ri e kʼamal taq bʼe. Jun kʼutbʼal, ri areʼ xuya pixabʼ chke ri e qachalal re Tesalónica are chiʼ xrilo che kajwatajik. Are kʼu pa ri ucartas nabʼe xubʼij e utz taq tzij chke ri e qachalal, rumal che rukʼ loqʼoqʼebʼal kkibʼan ri kichak che ri Dios y kichʼijom kʼi taq kʼax. Xuqujeʼ xchoman chrij ri keriqitaj wi y xubʼij chke che retaʼm ri kʼaxkʼolil tajin kkiqʼaxej y tajin kbʼan kʼax chke rumal che kkipatanij ri Dios (1 Tes. 1:3; 2 Tes. 1:4). Xuqujeʼ xubʼij chke che e jun utz kʼutbʼal chkiwach e nikʼaj chi cristianos (1 Tes. 1:8, 9). ¡Sibʼalaj xekikot riʼ are chiʼ xbʼix utz taq tzij chke! Qas xkilo che ri Pablo sibʼalaj keʼuloqʼoqʼej. Rumal laʼ, kʼax ta xkibʼan che ubʼanik ri pixabʼ che xuya bʼi ri apóstol Pablo pa ri kebʼ cartas che xutaq bʼi chke (1 Tes. 4:1, 3-5, 11; 2 Tes. 3:11, 12). w22.02 15 párr. 6

Ri Satanás keʼukoj ri e kʼamal taq bʼe re ri qastzij taj kojonem rech kkimol tzij chrij ri Jehová, che are jun itzel Dios y are ajmak che ronojel ri kʼax kʼo pa ri uwach Ulew. Y, are chiʼ kkam jun akʼal e kʼo winaq kkibʼij che xa rajawaxik jun alaj ángel che ri Dios rumal laʼ xukʼam bʼik. ¡Wariʼ are jun nimalaj molom tzij chrij ri Jehová! Are kʼu, ri oj qetaʼm ri qastzij chrij wariʼ, rumal laʼ are chiʼ jun winaq kyawajik o kkam jun rachalaxik, kqabʼij taj che are ri Dios ajmak. Qetaʼm y kqakojo che areʼ kojresaj na pa ri kʼax. Rumal laʼ, kojkunik kqabʼij chke konojel ri winaq che ri Jehová are jun Dios che kojuloqʼoqʼej. Jeriʼ ri Jehová kukʼut chuwach ri Itzel che qastzij ta ri kubʼij (Prov. 27:11). Ri Jehová are jun Dios che kutoqʼobʼisaj qawach. Rumal laʼ kbʼisonik are chiʼ kqariq kʼax, weneʼ rumal ri qakojonik, rumal jun yabʼil o rumal ri jastaq che utz taj kqabʼano rumal che oj ajmakibʼ (Sal. 22:23, 24). Rumal che kunaʼ ri qʼoxom tajin kqanaʼ oj, kraj kusach uwach ri kʼax y xa jubʼiqʼ chi kraj rech kubʼano (chajunamisaj rukʼ Éx. 3:7, 8; Is. 63:9). w21.07 9, 10 párrs. 9, 10

Ri winaq che kenimanik kkiriq na jun nimalaj tewchibʼal: ri uloqʼoqʼexik y ri uqʼijilaxik ri Jehová pa ronojel kikʼaslemal. Ri Jesús kusachisaj na uwach ronojel kʼaxkʼolil che xkiya kan ri Adán y ri Eva are chiʼ xkaj ta chik xekʼojiʼ pa ri ufamilia ri Dios. Y ri Jehová keʼukʼasuj na e kʼiʼalaj winaq rech kekʼojiʼ pa ri kotzʼiʼjalaj uwach Ulew y keyawaj ta chik (Luc. 23:42, 43). Are chiʼ keʼux tzʼaqat taq winaq ri upatanelabʼ ri Jehová pa ri uwach Ulew, kekunik kkikʼut ri «juluwem» y ri «nim ilik» che xubʼij ri David. We at jun chkixoʼl ri e «kʼiʼalaj winaq», kʼo jun jeʼlikalaj aweyebʼal. Ri Dios sibʼalaj katraj y kraj che katkʼojiʼ pa ri ufamilia. Rumal laʼ, chakojoʼ achuqʼabʼ che ubʼanik ri kqaj chuwach. Ronojel qʼij chatchoman chrij ri utzujum chawe. Nim chawilaʼ wi che katkunik kaqʼijilaj ri loqʼalaj qaTat kʼo pa ri kaj y chakojoʼ achuqʼabʼ rech kaqʼijilaj pa ronojel akʼaslemal. w21.08 7 párrs. 18, 19

Ri qʼaxal tzij Jeremías xuqujeʼ pa kʼi taq junabʼ xutzijoj ri utzij ri Dios y ri winaq xkaj taj xkitaʼ, rumal laʼ xbʼisonik (Jer. 20:8, 9). Are kʼu xubʼan ta kebʼ ukʼuʼx. ¿Jas xyaʼow tobʼanik che rech are ta xutaʼ ri xkibʼij ri winaq y xuya ta kan utzijoxik ri utzij ri Dios? Xchoman chrij kebʼ jastaq nim ubʼanik. Nabʼe, che ri utzijoxik ri utzij ri Dios keʼutoʼ ri e winaq. ¿Jasche? Rumal che keʼutoʼ che uriqik «jun eyebʼal kʼuxaj ri kpe na» (Jer. 29:11). Y ukabʼ, xchaʼik rech kuqʼalajisaj ri ubʼiʼ ri Jehová (Jer. 15:16). Oj xuqujeʼ kojkunik kqaya ubʼixik utz taq tzij chke ri winaq che jetaneʼ e kʼo pa qʼequʼm y kqaqʼalajisaj ri ubʼiʼ ri Jehová rumal che oj uTestigos. Are chiʼ kojchoman chrij jastaq nim ubʼanik, kqaya ta kan utzijoxik ri utzij ri Dios paneʼ ri e winaq kkaj taj kojkitatabʼej. Rumal laʼ makʼistaj qakʼuʼx we kqilo che nojimal chi nojimal kkʼiy pa ri ukojonik. Kajwataj qapaciencia are chiʼ keqatoʼ ri winaq (Sant. 5:7, 8). w21.10 27 párrs. 12, 13

Apastaneʼ ri tiempo che tajin kqapatanij chi ri Jehová, rajawaxik che kqataqej ukowirisaxik y uchajixik ri qakojonik chrij. ¿Jasche? Rumal che we kqabʼan taj, kqaj uchuqʼabʼ. Chnaʼtaj chqe che ri kojonik are ukubʼsaxik qakʼuʼx chrij ri jastaq paneʼ keʼilitaj taj. Y ri jastaq kilitaj taj, aninaq ksach chqe. Rumal laʼ, ri Pablo xubʼij che we kʼo ta qakojonik are «ri mak ri kʼo chqij che qachapik». Rumal riʼ, ¿jas kojkunik kqabʼano rech kqaj ta uchuqʼabʼ ri qakojonik? (2 Tes. 1:3). Nabʼe, amaqʼel chqataʼ ri ruxlabʼixel ri Jehová. ¿Jasche? Rumal che rukʼ ri utobʼanik ri uxlabʼixel kqariq ri kojonik (Gál. 5:22, 23). We kʼo ta ri uxlabʼixel qukʼ, kojkun taj kqakowirisaj ri qakojonik chrij ri Bʼanol re ronojel ri jastaq. Ri Jehová kraj kuya ri ruxlabʼixel chqe, rumal laʼ amaqʼel chqataʼ che (Luc. 11:13). Chqabʼij wariʼ che: «Chbʼanaʼ la chqe chi kujkowir pa ri qakojonik» (Luc. 17:5). Xuqujeʼ, amaqʼel chqanikʼoj ri uTzij ri Dios (Sal. 1:2, 3). w21.08 18, 19 párrs. 16-18

Ri e qachalal nim chi kijunabʼ kʼo kʼi jastaq kekunik kkibʼano. Paneʼ kʼo ta chi kichuqʼabʼ are kʼu kʼo nim ketaʼmabʼal. Ri Jehová pa kʼi jastaq kkunik keʼukoj wi. Jun kʼutbʼal, pa ri uTzij ri Dios kqariq kʼutbʼal kech e sukʼ taq winaq che xkipatanij ri Jehová pa ronojel kikʼaslemal. Jun chke are ri Moisés, paneʼ 80 chi ujunabʼ xux qʼaxal tzij re ri Dios y kʼamal bʼe re ri utinamit, Israel. Ri jun chik are ri Daniel, weneʼ más che 90 ujunabʼ are kʼu xuya ta kan upatanixik ri Jehová. Xuqujeʼ ri apóstol Juan kʼo chi más che 90 ujunabʼ are chiʼ xutzʼibʼaj ri wuj Apocalipsis. Qas ta kʼi jastaq xtzʼibʼax kan pa ri Biblia chrij jun achi «Simeón ubʼiʼ [...] sukʼ, nimanel che ri Dios», are kʼu xsachan ta pa ujolom ri Jehová, rumal laʼ xkunik xril ri Jesús are chiʼ kʼa neʼ na y xubʼij jujun taq tzij che kbʼantaj rukʼ ri Jesús y ri unan are chiʼ kqʼax ri tiempo (Luc. 2:22, 25-35). w21.09 3, 4 párrs. 5-7

Ri e tat nan utz taj we kkijunamaj jun kalkʼwaʼl rukʼ jun chi kalkʼwaʼl y kkibʼij chke che kkibʼan jastaq che kekun ta che ubʼanik. Rumal che wariʼ kubʼano che ri alkʼwalaxelabʼ kebʼisonik y kkiriq kʼax (Efes. 6:4). Jun qachalal, Sachiko ubʼiʼ, kubʼij: «Ri nunan kraj che kwesaj 100 puntos pa ronojel ri kbʼan pa ri tijobʼal, are jun jastaq che sibʼalaj kʼax ubʼanik. Wariʼ kʼo xuya kan pa ri nukʼaslemal, rumal che paneʼ ojer chik in elenaq pa ri tijobʼal kʼa kinchomaj na che ri kinbʼano nim ta kril ri Jehová». Ri qʼatal tzij David xubʼij: «Kbʼe ta wanimaʼ chkij nimaʼq taq jastaq ri mat kʼo kejunamataj [...] wi». Rumal che xunimarisaj ta ribʼ y xuchʼobʼo che kʼo kkun ta che ubʼanik, xubʼij: «Mawi kʼo ta kinbʼisoj» (Sal. 131:2). Wariʼ kukʼut chkiwach ri e tat nan che kekunik kkimachʼ kibʼ y kkichʼobʼo che kʼo kekun ta che ubʼanik, xuqujeʼ kekunik kkibʼan wariʼ kukʼ ri e kalkʼwaʼl. Are chiʼ kekitoʼ ri kalkʼwaʼl che rilik ri kkaj kkibʼano, rajawaxik kechoman chrij ri kekunik y ri kekun taj kkibʼano. w21.07 21, 22 párrs. 5, 6

Rajawaxik knaʼtaj chqe che ri Jehová uyaʼom bʼe chqe rech kqachaʼ jas kqabʼan pa qakʼaslemal chqajujunal. E kʼo qachalal xkiriq kʼax are chiʼ kʼa e nitzʼ na, are kʼu xkichaʼ upatanixik ri Jehová y kimik kiyaʼom ta kanoq. E nikʼaj chik xekʼiysax kumal ri kitat kinan pa ri utinamit ri Jehová, are kʼu are chiʼ xenimarik xeʼel bʼi pa ri congregación. Wariʼ kukʼutu, che chqajujunal kqachaʼ we kqapatanij ri Jehová o kqapatanij taj (Jos. 24:15). Rumal laʼ, tat nan, we ri e iwalkʼwal kkiya kan upatanixik ri Jehová, michomaj che imak ix. Jujun taq mul, are ri tat o ri nan kuya kan upatanixik ri Jehová, weneʼ xuqujeʼ kuya kan ri ufamilia (Sal. 27:10). Wariʼ kuya nimalaj bʼis chke ri alkʼwalaxelabʼ. Alabʼom alitomabʼ, we jun chke ri itat inan xelesax bʼi pa ri congregación, oj kqachʼobʼ ri tajin kinaʼo. Y chnaʼtaj chiwe che ri Jehová kunaʼ ri tajin kinaʼo. Ri areʼ kixraj y sibʼalaj kkikotik rumal che iyaʼom ta kan upatanixik. Xuqujeʼ chnaʼtaj chiwe che ix kixkun taj kichaʼ ri kkaj kkibʼan pa ri kikʼaslemal. w21.09 27 párrs. 5-7

Kojkunik kqabʼij che jun winaq che xelesax bʼi pa ri congregación, kjunamataj rukʼ jun chij yawabʼ che keʼutʼiq ri e nikʼaj chi chij. Ri areʼ yawabʼ pa ri ukojonik (Sant. 5:14). Are chiʼ utz ta chi ri qakojonik, kjunamataj rukʼ jun yabʼil che kutʼiq ribʼ o kqʼax che jun chik. Rumal laʼ rajawaxik che jujun taq mul ktas ri ajmak che ri congregación. Wariʼ kukʼutu che ri Ajawaxel sibʼalaj keraj ri e sukʼ taq qachalal re ri congregación y kubʼano che ri ajmak kukʼex ri ukʼaslemal. Paneʼ xelesax bʼi ri ajmak, kkunik kbʼe pa ronojel ri e riqbʼal ibʼ rech jumul chik kukowirisaj ri ukojonik chrij ri Jehová. Xuqujeʼ kkunik keʼusikʼij ri qawuj y kril ri JW Broadcasting^®. Y, are chiʼ ri e kʼamal bʼe re ri congregación kkilo che tajin kukʼex ri ukʼaslemal, jujun taq mul kekunik kkiya jujun taq pixabʼ che rech kkitoʼo rech kux chi jumul testigo rech Jehová. w21.10 10 párrs. 9, 11

Kimik, kʼo chi nikʼaj jastaq che kqabʼan pa ri qaqʼijilanik che ri Dios ri kjunamataj rukʼ ri xkibʼan ri cristianos re ri nabʼe siglo. Jun kʼutbʼal, ri bʼanom che kikojik ri solinelabʼ re circuito, ri kʼamal taq bʼe y ri tobʼanelabʼ pa ri utinamit ri Jehová kimik, xaq junam rukʼ ri xbʼan pa ri congregación cristiana pa ri nabʼe siglo (Filip. 1:1; Tito 1:5). Xuqujeʼ kqachomaj che nim ubʼanik ri kʼulanem, utz taj kqʼoyiʼ jun achi rukʼ jun ixoq we e kʼulan taj, nim kqil wi ri kikʼ y keqachajij ri e qachalal chkiwach ri e winaq che kemakunik y kkikʼex ta ri kikʼaslemal (Hech. 15:28, 29; 1 Cor. 5:11-13; 6:9, 10; Heb. 13:4). Ri Biblia qas kuqʼalajisaj che xa «jun kojonik» kʼolik ri qas kqaj chuwach ri Dios (Efes. 4:4-6). Are jun nimalaj eqelen kʼolem pa ri utinamit ri Dios y retaʼmaxik ri qastzij chrij ri Jehová y chrij ri kraj kubʼano. Rumal laʼ, mojel kan pa ri qastzij kojonem. w21.10 22, 23 párrs. 15-17

Ri qʼatal tzij Jehosafat xopan chuwach jun kʼax. Ri areʼ, ri ufamilia y konojel ri e winaq xkilo che xeʼopan ri ajchʼojabʼ re Ammón, Moab y ri e aj kʼachelaj re Seír che ubʼanik kʼax chke (2 Crón. 20:1, 2). ¿Jas xubʼan ri Jehosafat? Xutaʼ tobʼanik y uchuqʼabʼ che ri Jehová. Ri uchʼawem, che kriqitaj pa 2 Crónicas 20:5-12, kukʼutu che sibʼalaj kukubʼsaj ukʼuʼx chrij ri loqʼalaj uTat kʼo pa ri kaj. Ri Jehová xukoj jun levita, Jahaziel ubʼiʼ, che utzalixik uwach ri uchʼawem ri Jehosafat. Xniman ri Jehosafat rumal che xukubʼsaj ronojel ukʼuʼx chrij ri uDios. Are chiʼ ri qʼatal tzij rachiʼl bʼi ronojel ri tinamit xeʼel bʼi che kikʼulaxik ri e kikʼulel, xeʼunabʼejsaj ta bʼi ri e rajchʼojabʼ che kʼo nim kichuqʼabʼ, xaneʼ are xeʼunabʼejsaj jujun taq achijabʼ che tajin kebʼixonik. Xekichʼak ri e kikʼulel junam rukʼ ri xubʼij ri Jehová (2 Crón. 20:18-23). w21.11 15, 16 párrs. 6, 7

Are chiʼ kojqʼax pa kʼax qas qetaʼm che ri Jehová kojutoʼo rech kqaya ta kan upatanixik (2 Cor. 4:7-9). Qas qetaʼm che ri Jehová kuya ta kan ukʼutik ri nim loqʼoqʼebʼal ukʼuʼx chqe, rumal che junam rukʼ ri xubʼij ri xtzʼibʼan jun salmo, «ri Ajawaxel amaqʼel keʼuchajij ri nim kil wi kumal xuqujeʼ ri kuʼl kikʼuʼx chrij ri loqʼoqʼebʼal ukʼuʼx» (Sal. 33:18-22). Are chiʼ majaʼ kqamaj upatanixik ri Jehová, tajin kojuloqʼoqʼej chik junam rukʼ ri kubʼan che kiloqʼoqʼexik konojel ri winaq. Are kʼu, are chiʼ xqamaj uqʼijilaxik, xumaj ukʼutik ri nim loqʼoqʼebʼal ukʼuʼx chqe. Are ri nim loqʼoqʼebʼal ukʼuʼx kbʼanowik che kraj kojuchajij. Amaqʼel kkʼojiʼ na chqanaqaj y kubʼan na ri kraj kuya chqe. Kraj che kqariq utzilal pa ri qakʼaslemal (Sal. 46:1, 2, 7). Rumal laʼ, apachike taneʼ ri kʼax kqariqo, ri Jehová kuya na qachuqʼabʼ rech kqaya ta kan upatanixik. w21.11 7 párrs. 17, 18

Qonojel qetaʼm uwach jun winaq che usachom ta ri kʼax xbʼan che weneʼ rumal jun rachiʼl pa ri chak, pa ri tijobʼal o jun ufamilia, paneʼ qʼaxinaq chi kʼi junabʼ. Chnaʼtaj chqe che ri 10 rachalal ri José xkibʼan kʼax che, rumal che xkikʼol oyowal chrij (Gén. 37:2-8, 25-28). Are kʼu ri José xutzalij ta ukʼaxel ri kʼax xbʼan che. Are chiʼ xeʼuriq chi jumul, paneʼ kʼo taqanik pa uqʼabʼ xkun ta riʼ xubʼan kʼax chke, are kʼu je ta xubʼano, xaneʼ xutoqʼobʼisaj kiwach. Areʼ xukʼol ta oyowal chkij, xaneʼ xubʼano ri xtzʼibʼax pa Levítico 19:18 are chiʼ xqʼax ri tiempo (Gén. 50:19-21). Ri cristiano che kraj kqaj chuwach ri Dios rajawaxik kubʼan re ri xubʼan ri José y kukoj uchuqʼabʼ rech kukʼol ta oyowal pa ranimaʼ y kutzalij ta uwach ri kʼax kbʼan che. Ri Jesús kubʼij che rajawaxik kqakuy kimak ri winaq che kkibʼan kʼax chqe (Mat. 6:9, 12). Xuqujeʼ ri apóstol Pablo xuya wajun pixabʼ riʼ chke ri cristianos: «Loqʼalaj taq wachalal, mitoj ukʼaxel ri etzelal» (Rom. 12:19). w21.12 11 párrs. 13, 14

Pa ri chaqʼabʼ re ri 14 re nisán re ri junabʼ 33, ri Jesús xbʼe pa ri jardín re Getsemaní y chilaʼ xujaq wi ri ranimaʼ chuwach ri Jehová (Luc. 22:39-44). Pa riʼ ri tiempo, «xuraq uchiʼ [...]. Xubʼan bʼochiʼnik xuqujeʼ tzʼononik che ri Dios» (Heb. 5:7). ¿Jas xutaʼ pa ri uchʼawem? Xutaʼ uchuqʼabʼ che ri Jehová rech kuya ta kan upatanexik y kubʼan ri kqaj chuwach. Ri Jehová xutatabʼej ri xubʼij ri uKʼojol che y xutaq lo jun ángel rech xuya uchuqʼabʼ. Ri Jesús qas xuchʼobʼo che yaʼom ri nimalaj eqelen che chi kunimarisaj uqʼij y kutoʼ uwiʼ ri ubʼiʼ ri uTat. Ri Jehová qas xutatabʼej ronojel ri uchʼawem ri uKʼojol. ¿Jasche? Rumal che ri más nim ubʼanik che ri Jesús are che kuya ta kan upatanexik ri uTat y kutoʼ uwiʼ ri ubʼiʼ. Junam rukʼ, we ri más nim ubʼanik chqawach oj are che kqaya ta kan upatanexik ri Jehová, ri areʼ kutzalij uwach ri kqataʼ che pa ri qachʼawem (Sal. 145:18). w22.01 18 párrs. 15-17

E kʼi winaq utz ta kojkilo rumal che kqanim ta qibʼ pa política. Kkibʼij che rajawaxik kqabʼan votar are chiʼ kechaʼ ri e qʼatal taq tzij. Are kʼu oj qas kqachʼobʼo che we kqaya qatobʼanik che uchaʼik jun winaq rech kux qʼatal tzij pa qawiʼ, xa tajin kqaxutuj kan riʼ ri Jehová (1 Sam. 8:4-7). Weneʼ are kkaj che kqayak nimaʼq taq hospitales, tijobʼal o nikʼaj chi jastaq rech keʼutoʼ ri winaq. Utz ta kojkilo rumal che are kqatzijoj ri kubʼan na ri Dios y are ta kojchoman chrij usukʼumaxik ri kʼax che kʼo pa ri uwach Ulew. ¿Jas kattoʼwik rech kqaj ta uchuqʼabʼ ri akojonik? (Mat. 7:21-23). Chnaʼtaj chawe che ri más nim ubʼanik are ri chak che xojutaq wi kan ri Jesús. Kanim ta awibʼ pa ri política y nikʼaj chi jastaq re ri uwach ulew. Ri oj testigos rech Jehová keqaj ri winaq y kel qakʼuʼx chke rumal che kkiriq kʼax, are kʼu qetaʼm che ri más nim ubʼanik are che kqakʼut chkiwach ri tewchibʼal che kuya na ri uQʼatbʼal tzij ri Dios pa ri petinaq y keqatoʼo rech keʼux rachiʼl ri Jehová. w21.05 7 párrs. 19, 20

Paneʼ e kʼi chke ri qʼatal taq tzij kkibʼij che kkiya uqʼij ri Dios, are kʼu kkaj che e areʼ kkiqʼat tzij pa uwiʼ ri uwach Ulew. Wariʼ kjunamataj rukʼ ri xkʼulmataj pa ri nabʼe siglo, kkaj taj keteriʼ chrij ri Jesús che are ri Qʼatal tzij kojom rumal ri Jehová y kkibʼan kʼax chke ri cristianos (Hech. 4:25-28). ¿Jas kubʼan ri Jehová? Salmo 2:10-12 kubʼij: «Ajawinelabʼ xuqujeʼ qʼatal taq tzij re ri uwach ulew, chichʼobʼoʼ waʼ, ¡Chitijoj iwibʼ che we tijonik riʼ! Chiqʼijilaj ri Ajawaxel rukʼ kikotemal, xuqujeʼ nim chiwilaʼ wi; chimejaʼ iwibʼ chuwach rukʼ bʼirbʼitem, mayaktaj ne royowal kixekam kʼu neʼ ri ix chupam ri bʼe, aninaq kʼut kyaktaj ri royowal. ¡Utz kech ri kkitzukuj uchʼuqik kibʼ rukʼ ri Dios!». Ri Jehová sibʼalaj utz y uyaʼom na bʼe chke ri ukʼulel rech kkikʼex ri kichomanik y kkiya kibʼ chuxeʼ ri uQʼatbʼal tzij. Are kʼu, xa jubʼiqʼ chi ri tiempo kʼolik (Is. 61:2). Sibʼalaj rajawaxik che ri winaq kketaʼmaj ri qas kukʼut ri Biblia y kkichaʼ upatanixik ri Jehová. w21.09 15, 16 párrs. 8, 9

Ri Pablo xubʼij che kojkikot rukʼ ri kʼo qukʼ (Filip. 4:12). Ri más nim ubʼanik are ri qachilanik rukʼ ri Dios are ta ri jastaq qech (Hab. 3:17, 18). Chqilampeʼ ri xubʼij ri Moisés chke ri israelitas are chiʼ e kʼo chi 40 junabʼ pa ri chaqiʼj ulew: «Ri Ajawaxel ri iDios ix utewichiʼm pa ronojel ri ibʼanom, kawinaq junabʼ kʼut kʼolinaq iwukʼ. [...] Man kʼo ta kʼu xajwataj chiwe» (Deut. 2:7). Pa ronojel ri 40 junabʼ riʼ, ri Jehová xeʼutzuq ri israelitas rukʼ maná. Y xqʼelobʼ ta ri katzʼyaq che kikojom loq are chiʼ xeʼel lo pa Egipto (Deut. 8:3, 4). Ri Jehová kkikotik, we kojkikot rukʼ ri kʼo qukʼ, nim kqil ri kuya chqe y kojmaltyoxin che. w22.01 5 párrs. 10, 11

Achajilaxelabʼ, pa iqʼabʼ ix kʼo wi ri eqelen rech kichajij ri ifamilia y kikoj ichuqʼabʼ che kitoʼik rech kkiriq ta kʼax. Rumal laʼ, are chiʼ kʼo kʼaxkʼolil, weneʼ kichomaj che xaq itukel kixkunik kisukʼumaj, are kʼu mikubʼsaj ikʼuʼx chbʼil iwibʼ. Xaneʼ, chibʼanaʼ ichʼawem che ri Jehová y chitaʼ ri utobʼanik. Xuqujeʼ rukʼ ronojel iwanimaʼ chibʼanaʼ ichʼawem rukʼ ri iwixoqil. Chisikʼij ri Biblia, chinikʼoj ri e qawuj y chibʼanaʼ pa ikʼaslemal ri kiwetaʼmaj. Weneʼ e kʼo jujun winaq utz ta kkilo che are kikoj ri pixabʼ re ri Biblia are chiʼ kichaʼ ubʼanik jun jastaq. Weneʼ kkibʼij che ri más kuya tobʼanik che ri ifamilia are che kʼo irajil o kʼi jastaq iwech. Are kʼu chnaʼtaj chiwe ri xubʼan ri qʼatal tzij Jehosafat xukubʼsaj ukʼuʼx chrij ri Jehová y xukʼut rukʼ ri xubʼan pa ukʼaslemal (2 Crón. 20:1-30). Ri Jehová xuwonobʼaʼ ta kan wajun sukʼalaj achi riʼ xuqujeʼ kixuwonobʼaʼ ta kan ix (Sal. 37:28; Heb. 13:5). w21.11 15 párr 6; 16 párr. 8

Rumal che ri Jehová xojubʼan junam rukʼ areʼ, utz ta kqilo are chiʼ utz ta kbʼan che uqʼatik tzij puwiʼ jun winaq (Gén. 1:26). Are kʼu rumal che oj ajmakibʼ, utz ta kqabʼan che uqʼatik tzij puwiʼ jun winaq paneʼ kqachomaj che qetaʼm ronojel ri xkʼulmatajik. Chnaʼtaj chqe ri xkʼulmataj rukʼ ri Jonás. Ri areʼ sibʼalaj xpe royowal chrij ri Jehová rumal che xutoqʼobʼisaj kiwach ri e winaq re Nínive (Jon. 3:10–4:1). Are kʼu, rumal che ri Jehová xukuy kimak, xekʼasiʼ más che 120,000 ninivitas. Kʼisbʼal re, are ri Jonás utz ta xubʼan che uqʼatik tzij pa kiwiʼ ri ninivitas, are ta ri Jehová. Rajawaxik ta na kubʼij ri Jehová chqe ronojel ri kubʼano. Qastzij riʼ che ojer kanoq ri Jehová xuya bʼe che e jujun taq upatanelabʼ kkibʼij ri kkichomaj chrij ri xuchaʼ ubʼanik (Gén. 18:25; Jon. 4:2, 3). Y, jujun taq mul, xuya ubʼixik jasche xuchaʼ ubʼanik ri xubʼano (Jon. 4:10, 11). Are kʼu rajawaxik taj che areʼ kuta chqe ri kqachomaj chrij ri xubʼano o ri kubʼan na (Is. 40:13, 14; 55:9). w22.02 3, 4 párrs. 5, 6

Rech kojux junam rukʼ ri «sibʼalaj akʼal na», rajawaxik kqachomaj che ri nikʼaj chik más nim kibʼanik chqawach (Filip. 2:3). We jewaʼ ri qachomanik, kqabʼan ta kʼax riʼ chke ri nikʼaj chik. Konojel ri qachalal más nim kibʼanik chqawach. ¿Jasche? Rumal che kʼo jun jastaq kekun che ubʼanik ri kojkun ta oj che. Wariʼ qas kqʼalajinik are chiʼ kojchoman chrij ri utz taq jastaq kkibʼano. Rajawaxik kqabʼan ri xubʼij ri apóstol Pablo chke ri cristianos re ri tinamit Corinto: «¿Jachin ta nim katilowik o jas ri kʼo awukʼ ri ma ta yoʼm chawe? We yoʼm chawe, ¿jasche kanimarisaj awibʼ jetaneʼ ri xa at ta xatriqowik?» (1 Cor. 4:7). Rumal laʼ, chqakojoʼ qachuqʼabʼ rech oj ta kyaʼ qaqʼij o kqachomaj taj che más nim qabʼanik chkiwach ri nikʼaj chik. We kʼo jun qachalal sibʼalaj utz kubʼan che uyaʼik ri chʼabʼal o jun qachalal ixoq kumaj uyaʼik kʼi etaʼmanik, rajawaxik che are ri Jehová kyaʼ uqʼij. w21.06 22 párrs. 9, 10

E kʼi testigos rech Jehová kʼax kkibʼan che kiriqik ri winaq cho kachoch, rumal che pa ri tinamit ri kkitzijoj wi ri utzij ri Dios e kʼo nimaʼq taq ja che sutim rij y e kʼo chajinelabʼ chuchiʼ, rumal laʼ kekun taj keʼok bʼik. Pa nikʼaj chi tinamit ri qachalal kekiriq ta ri winaq o kkitzijoj ri utzij ri Dios ri qas ta e kʼo wi winaq. Weneʼ nim kkibʼinibʼej rech kekitzukuj ri winaq, are kʼu chiʼ keʼopanik kʼo ta nijun kkiriqo. We tajin kqakʼulmaj wariʼ, makʼistaj qakʼuʼx che utzijoxik ri utzij ri Dios. Chqakʼexaʼ ri hora. Keqariq kʼi winaq riʼ we keqatzukuj are chiʼ más keriqitaj cho ri kachoch. Paneʼ ri winaq latzʼ kiwach pa ri kichak o pa nikʼaj chi jastaq, kʼo ta jun chke mat ktzalij lo cho ri rachoch. Rumal laʼ e kʼi qachalal kkitzijoj ri utzij ri Dios bʼenaqʼij o chaqʼabʼ rech kekiriq más ri winaq. Xuqujeʼ weneʼ pa ri hora riʼ ri e winaq keʼuxlanik y más kkaj ketzijonik. w21.05 15 párrs. 5, 7

¿La je kkʼulmataj kimik? Jeʼ. E kʼi winaq utz ta kkilo che kqabʼan ta ri nimaqʼij junam rukʼ ri cumpleaños y ri Navidad. ¿Jasche kqabʼan taj? Rumal che are ta ri kukʼut ri Biblia. E nikʼaj chik itzel kojkilo rumal che kqabʼixoj ta ri himno nacional, kqayak ta qaqʼabʼ chuwach ri bandera y nikʼaj chi jastaq, y kqabʼan ta ri nimaqʼij che kʼo ubʼanik kukʼ taq ri kaminaqibʼ rumal che are ta ri kukʼut ri Biblia. Weneʼ ri winaq kkibʼij che utz ri tajin kkibʼano, are kʼu kqaj ta chuwach ri Dios. Rumal laʼ, we are kkaj kkibʼan ri xa kichomanik winaq y are ta kkibʼan ri kubʼij ri Biblia utz ta keʼil riʼ rumal ri Jehová (Mar. 7:8, 9). ¿Jas kattoʼwik rech kqaj ta uchuqʼabʼ ri akojonik? Cheʼaloqʼoqʼej ri utaqanik y ri uchomanik ri Dios (Sal. 119:97, 113, 163-165). We qas kawaj ri Jehová kaxutuj apachike jastaq riʼ che utz ta krilo. Are más nim kawil wi riʼ ri uloqʼoqʼexik ri Jehová. w21.05 6 párrs. 15, 16

¿Jas kqabʼan che ukojik ri pixabʼ che xuya ri apóstol Pablo? Rech kkowir ri akojonik rajawaxik kanikʼoj ri Biblia ronojel qʼij, kabʼan achʼawem y katkʼaskʼat che utzijoxik ri utzij ri Dios (2 Tim. 4:4). We ko ri akojonik, kaxiʼj ta awibʼ riʼ are chiʼ kbʼix molom taq tzij chqij ri oj testigos rech Jehová (Is. 28:16). ¿La kʼo jun jastaq kattoʼwik? Kʼolik. Ri aloqʼoqʼebʼal che ri Jehová, che ri uTzij y chke ri qachalal, katutoʼ chkiwach ri winaq ri xkiya kan ri Jehová. Pa ri uqʼij ri Jesús e kʼi xekojon ta chrij y xkixutuj kanoq. Are kʼu e kʼo nikʼaj chik xeteriʼ chrij, jun chke are jun achi re ri Sanedrín xuqujeʼ e kʼi «kojol tabʼal toqʼobʼ» (Hech. 6:7; Mat. 27:57-60; Mar. 15:43). Kimik sibʼalaj e kʼi winaq tajin kkiterenej ri Jesús. ¿Jasche? Rumal che ketaʼm ri kukʼut ri Biblia y kkibʼan pa ri kikʼaslemal. Ri uTzij ri Dios kubʼij: «Ri keloqʼoqʼen ri tijonik la, kkiriq nimalaj jamaril, man kʼo ta kʼu kbʼanowik chi ketzaqik» (Sal. 119:165). w21.05 13 párrs. 20, 21

Ri apóstol Pablo retaʼm che ronojel ri xkunik xubʼano are ri Dios xyaʼow uchuqʼabʼ che ubʼanik. Rumal ri utobʼanik ri uxlabʼixel, ri Pablo xubʼan ri uchak che ri Dios paneʼ xuriq kʼi kʼax. Ri Timoteo xuqujeʼ xajwataj ri utobʼanik ri Dios che. Jun kʼutbʼal, xbʼe rukʼ ri Pablo che utzijoxik ri utzij ri Dios pa jalajoj taq tinamit. Xuqujeʼ xtaq bʼi rumal ri Pablo che kisolixik y uyaʼik kichuqʼabʼ ri congregaciones (1 Cor. 4:17). Weneʼ ri Timoteo xunaʼo che sibʼalaj kʼi ri chak xyaʼ che, rumal laʼ ri Pablo xubʼij wariʼ che: «Mayaʼ chke ri winaq chi kketzelaj awach xa rumal rech chi at akʼal achi na» (1 Tim. 4:12). Jun chi kʼax che xuriq ri Timoteo are che amaqʼel kyawajik (1 Tim. 5:23). Are kʼu retaʼm che are ri Jehová kyaʼow uchuqʼabʼ rech kuya ta kan utzijoxik ri utzalaj taq tzij y kitoʼik ri qachalal (2 Tim. 1:7). w21.05 21 párrs. 6, 7

Ri keyaʼow pixabʼ rajawaxik kkibʼan ri kubʼij Santiago 1:19. Ri Santiago xutzʼibʼaj wariʼ: «Chijujunal chanim chitatabʼej ri utzij ri jun chik, chixbʼeytaj che tzijonik, chixbʼeytaj che oyowal». Rajawaxik che we jun kʼamal bʼe kuya pixabʼ che jun qachalal, kuchomaj taj che retaʼm ronojel chrij. Proverbios 18:13 kunaʼtasaj wariʼ chqe: «Jun konil xuqujeʼ jun kʼixbʼal utzelexik uwach ri tzij kʼa majoʼq chtatabʼexoq». Ri más utz che kubʼan jun kʼamal bʼe are che kutaʼ che ri qachalal jas tajin kukʼulmaj y rajawaxik kutatabʼej. Kkunik kuta che, «¿jas at bʼenaq?», «¿jas kanaʼo?», «¿la kʼo kawaj katintoʼ wi?». We ri e kʼamal bʼe qas keʼok il che ri tajin kkiqʼaxej ri e qachalal, qas kekun riʼ che kitoʼik y kkiya kichuqʼabʼ. Rech qas utz kel chqawach are chiʼ kqaya pixabʼ chke ri e qachalal, xaq xiw ta rajawaxik kqasikʼij textos chkiwach y kqaya pixabʼ chke. Ri e qachalal kajwataj chke che kojok il chke, kqachʼobʼ ri kkinaʼo y keqatoʼo. w22.02 17 párrs. 14, 15