Junio

Ri ixoq riʼ weneʼ kʼax xubʼan che uriqik urajil. Are kʼu xqebʼ rukʼ ri kʼolbʼal kuchuj, xuya kan alaj taq kebʼ pwaq che weneʼ nijun xilowik. Are kʼu ri Jesús retaʼm jampaʼ xuya kanoq: kebʼ leptones, nim ta ri xuya kanoq. Kkun taj kuloqʼ jun chiʼochi, che are jun alaj chikop che paqal ta rajil pa ri tiempo riʼ. Ri Jesús sibʼalaj xumay ri xrilo. Rumal laʼ xeʼusikʼij ri utijoxelabʼ rech kkilo y xubʼij chke: «We mebʼaʼalaj chuchuʼ malkaʼn riʼ are nim na ri xuya chkiwach konojel ri kiyoʼm kikuchuj». Tekʼuriʼ xubʼij chi chke: «Konojel are kiyoʼm jubʼiqʼ che ri toʼtajinaq kan kukʼ. Are kʼu we chuchuʼ malkaʼn riʼ, paneʼ kʼo rajawaxik che, xuya ronojel ri kʼo rukʼ, ronojel ri tzuqbʼal rech» (Mar. 12:43, 44). Ri alaj ixoq riʼ are chiʼ xuya kan ronojel ri kʼo rukʼ, xukʼutu che kukubʼsaj ukʼuʼx chrij ri Jehová che kchajix rumal (Sal. 26:3). w21.04 6 párrs. 17, 18

Are chiʼ ri Jesús xkʼojiʼ cho ri uwach Ulew xuya ta kan utzijoxik ri utzij ri Dios y kraj che je kqabʼan oj (Juan 4:35, 36). Are chiʼ kʼo na kukʼ ri utijoxelabʼ, e areʼ xkitzijoj ri utzij ri Dios rukʼ kikotemal (Luc. 10:1, 5-11, 17). Are kʼu chiʼ kaminaq chik, ri utijoxelabʼ qas ta xkaj chik xkitzijoj ri utzij ri Dios (Juan 16:32). Rumal laʼ, are chiʼ ri Jesús xkʼastaj pa ri kamikal xuya kichuqʼabʼ rech kkiya ta kan ubʼanik ri xeʼutaq wi. Y are chiʼ ri Jesús kʼo chiʼ pa ri kaj, ri utijoxelabʼ rukʼ kikotemal xkibʼan ri kichak, rumal laʼ ri kikʼulel xpe koyowal chkij y xkibʼij wariʼ chke. Junam rukʼ ri kubʼij ri texto re kimik. Ri Jesús xukʼam kibʼe ri cristianos pa ri nabʼe siglo che utzijoxik ri utzij ri Dios, rumal laʼ rukʼ ri utobʼanik ri Jehová e kʼiʼalaj winaq xkaj xeʼux utijoxelabʼ. Jun kʼutbʼal, pa ri junabʼ 33, e 3,000 winaq xkibʼan kiqasanjaʼ (Hech. 2:41). Sibʼalaj xekʼiyar ri utijoxelabʼ ri Jesús (Hech. 6:7). Y xubʼij kanoq che pa ri kʼisbʼal taq qʼij e kʼi winaq kkaj kketaʼmaj chrij ri Dios (Juan 14:12; Hech. 1:8). w21.05 14 párrs. 1, 2

¿La knaʼtaj chawe jas xanaʼo are chiʼ xawetaʼmaj ri qastzij chrij ri Dios? Qas awetaʼm che ri kukʼut ri Biblia kuya utzilal pa ri kikʼaslemal kimik y pa ri petinaq (Sal. 119:105). Rukʼ kikotemal xamaj ubʼixik chke ri awachiʼl y ri awachalal. Are kʼu sibʼalaj xatbʼisonik are chiʼ e kʼi xkaj taj xkitatabʼej ri xabʼij chke. Qetaʼm che e kʼo winaq kkaj taj kkitatabʼej ri kqakʼut chkiwach. Are chiʼ ri Jesús xkʼojiʼ cho ri uwach Ulew xubʼan kʼi milagros che xukʼutu che tajin ktoʼ rumal ri Jehová, are kʼu kʼi chke ri winaq xkixutuj kanoq. Jun kʼutbʼal, ri e kʼamal bʼe judíos xkilo are chiʼ ri Jesús xukʼastajisaj ri Lázaro, are kʼu xkikoj taj che are ri Mesías. Xaneʼ xkichomaj ukamisaxik areʼ y ri Lázaro (Juan 11:47, 48, 53; 12:9-11). w21.05 2 párrs. 1, 2

Rajawaxik che amaqʼel kojbʼe pa ri e riqbʼal ibʼ, rumal che kuya qachuqʼabʼ y kqetaʼmaj más kiwach ri qachalal. Cheqachilaj ri qachalal che kkiya utz kʼutbʼal chqawach paneʼ junam ta ri qajunabʼ kukʼ o jun chi wi ri kitinamit. Ri Biblia kunaʼtasaj chqe che «ri rijabʼ taq tatayibʼ kʼo kinojibʼal; ri kijunabʼ are yowinaq etaʼmanik chke» (Job 12:12). Are kʼu ri e qachalal che nim chi kijunabʼ xuqujeʼ kʼo kketaʼmaj chkij ri kʼa e majaʼ na. Ri David sibʼalaj kʼa majaʼ na chuwach ri Jonatán are kʼu xeʼux utz taq achiʼl (1 Sam. 18:1). Ri e kebʼ xkitoʼlaʼ kibʼ rech xkipatanij ri Jehová paneʼ xkiriq kʼi kʼax (1 Sam. 23:16-18). Ri qachalal Irina che xaq xiw areʼ Testigo pa ri ufamilia, kubʼij: «Ri e kʼo pa ri congregación e junam rukʼ qatat qanan, qanabʼ y qaxibʼal. Ri Jehová keʼukoj ri qachalal rech keʼux qafamilia». Ri e qachiʼl kkaj kkiya qachuqʼabʼ y kojkitoʼo, are kʼu rajawaxik kqabʼij chke jas ri kajwataj chqe. w21.06 10, 11 párrs. 9-11

Ri Jesús xutzijoj jun kʼutbʼal chrij jun qʼatal tzij y jun chke ri upataninel. Ri qʼatal tzij xusach umak ri upataninel rech kutoj ta chi ri ukʼas che, rumal che sibʼalaj nim ri ukʼas. Are kʼu wajun pataninel riʼ xukuy ta umak jun rach pataninel rumal jubʼiqʼ kʼasaj. Kʼisbʼal re, ri qʼatal tzij xutzʼapij ri itzel pataninel pa cárcel rumal che xutoqʼobʼisaj ta uwach ri rach pataninel. Ri xubʼan ri pataninel xaq xiw ta xubʼan kʼax che areʼ, xaneʼ xubʼan kʼax chke ri e nikʼaj chik. Xutoqʼobʼisaj ta uwach ri rach pataninel y «xukoj [...] pa cheʼ kʼa kutoj na ri ukʼas». Xuqujeʼ ri nikʼaj chi rach taq pataninelabʼ utz ta xkil ri xubʼano. Ri Jesús xubʼij: «Ri e rach taq pataninelabʼ, are taq xkil ri xbʼantajik, sibʼalaj xebʼisonik» o xpe koyowal (Mat. 18:30, 31). Xaq junam kkʼulmataj qukʼ oj, ronojel ri kqabʼano kʼo kubʼan chke ri e nikʼaj chik. We jun winaq kubʼan jun kʼax chqe y kqasach ta umak. ¿Jas kkʼulmatajik? Kqaya bʼis che ri qachalal, rumal che weneʼ krilo che xaq kqabʼan chi qapalaj che o kqaj ta chik kqil uwach. Xuqujeʼ weneʼ ri e qachalal utz ta kkinaʼo che kʼo chʼoj chqaxoʼl rukʼ jun chi qachalal. w21.06 22 párrs. 11, 12

Are ri Dios xojbʼanowik y xuya ri taq ubʼantajik chqe, are kʼu ri Satanás amaqʼel kraj che kqabʼan ri itzelal. Pa taq ri uqʼij ri Noé, ri Jehová «kʼax kʼu xunaʼ pa ri ranimaʼ chi xubʼan ri winaq» (Gén. 6:5, 6, 11). ¿La kʼextajinaq ri jastaq pa ri uwach Ulew? Kʼextajinaq taj. Ri Itzel utz krilo che ri winaq kkibʼan tzʼil taq makaj achijabʼ kukʼ ixoqibʼ, ixoqibʼ kukʼ ixoqibʼ o achijabʼ kukʼ achijabʼ (Efes. 4:18, 19). Y sibʼalaj kkikotik are chiʼ jun testigo rech Jehová kmakunik. Chuxeʼ ri uqʼatbʼal tzij ri Satanás, ri winaq che kʼo taqanik pa kiqʼabʼ xa tajin kkibʼan kʼax che ri kajil kitzʼaqat xuqujeʼ tajin kkibʼan kʼax che ri uwach Ulew y chke ri chikop y are ta wariʼ ri kraj ri Jehová (Ecl. 8:9; Gén. 1:28). Rumal ri kʼax tajin kkibʼan ri winaq che ri uwach Ulew weneʼ más che jun millón chke ri e chikop y ri e cheʼ ksach na kiwach pa kebʼ oxibʼ junabʼ. w21.07 12 párrs. 13, 14

Are kʼu kʼo jujun upatanelabʼ ri Dios sibʼalaj kebʼisonik rumal che kʼo jun jastaq che utz taj xkibʼan ojer kanoq. Ri kichomanik kubʼij chke che ri Jehová kukuy ta wi kimak paneʼ sibʼalaj kkikoj kichuqʼabʼ che usukʼumaxik ri xkibʼano. We je tajin kanaʼ at, nim katutoʼ wi riʼ kachomaj che ri Jehová sibʼalaj kraj kukʼut ri nim loqʼoqʼebʼal ukʼuʼx chawe. Rumal che «ri ukikʼel ri uKʼojol, ri are ri Jesucristo, keresaj na konojel ri qamak» (1 Juan 1:7). We kojbʼisonik rumal che qabʼanom jun mak, we nim o nim taj, chnaʼtaj chqe che ri Jehová kraj kukuy kimak ri winaq che kkiya kan ubʼanik ri makaj. Chqilampeʼ jas xubʼan ri salmista David che ukʼutik che ri nim loqʼoqʼebʼal kʼuʼx kʼo ubʼanik rukʼ ri ukuyik makaj. Xutzʼibʼaj: «Sibʼalaj kʼo na ri unimal loqʼoqʼebʼal ukʼuʼx chke ri nim keʼilowik, jachaʼ ri unimal ri kaj puwiʼ ri uwach ulew. Ri qamak unajtajisam chqe, jachaʼ unajtajisam ri elebʼal qʼij rukʼ ri uqajebʼal qʼij» (Sal. 103:11, 12). w21.11 5, 6 párrs. 12, 13

Ri cristianos rajawaxik nim kekil wi ri kixoqil (1 Ped. 3:7). Wariʼ kraj kubʼij che sibʼalaj utz kkibʼan che kichajixik y nim kkil wi ri kkibʼano. ¿Jas kkibʼan che ubʼanik wariʼ? Kkikʼut chuwach che nim kkil wi y kkibʼij ta che, che kubʼan jun jastaq ri kkun ta che ubʼanik xuqujeʼ kkijunamaj ta kukʼ nikʼaj chi ixoqibʼ. ¿Jas kkʼulmatajik we jun achi kujunamaj ri rixoqil kukʼ nikʼaj chi ixoqibʼ? Chqilampeʼ ri xukʼulmaj jun qachalal Rosa ubʼiʼ. Amaqʼel kjunamax kukʼ nikʼaj chi ixoqibʼ rumal ri rachajil che Testigo taj. Rumal che ri rachajil kubʼij kʼax taq tzij che, ri qachalal kunaʼo che kʼo ta upatan xuqujeʼ kuchomaj che kʼo ta jun winaq qas kloqʼoqʼenik. Ri areʼ kubʼij: «Rajawaxik che amaqʼel knaʼtajisax chwe che ri Jehová nim kinril wi». Wariʼ junam ta rukʼ ri kkibʼan ri cristianos, e areʼ nim kekil wi ri kixoqil rumal che ketaʼm che we je kkibʼano tajin kkichajij ri kachilanik rukʼ ri kixoqil y rukʼ ri Jehová. Ri achijabʼ che nim kekil wi ri kixoqil, utz kechʼaw chkij, kkibʼij chke che kekaj y kkibʼij chke che utz ri tajin kkibʼano. w21.07 22 párrs. 7, 8

Weneʼ qeyem jun jastaq taqom lo chqe che sibʼalaj kajwataj chqe, are kʼu kqilo che sibʼalaj tajin kbʼeytajik. ¿Jas kqanaʼo we kqetaʼmaj che xa kʼo jun jastaq nim ubʼanik tajin kbʼanik rumal laʼ majaʼ kul ri qeyem? We kqetaʼmaj che jeriʼ, qastzij riʼ che kqaj kqeyej na. Pa Proverbios 13:11 kqetaʼmaj che nim ubʼanik kʼo qakochʼonik. Chilaʼ kubʼij wariʼ: «Ri qʼinomal ri xaq kʼatetal xkʼiyik kbʼe pa rij; are kʼu ri xaq nojimal kmulixik, kukʼiyirisaj». ¿Jas pixabʼ kqetaʼmaj chupam wariʼ? Rajawaxik kkʼojiʼ qakochʼonik, nojimal chi nojimal kqabʼan ri jastaq. Proverbios 4:18 kubʼij che «ri kibʼe ri sukʼalaj taq winaq junam rukʼ ri usaqaribʼal jun kʼakʼ qʼij: ri kbʼe ukʼiyik kʼa kjuluw na pa ronojel ri ujuluwem». Waʼ taq tzij kukʼut chqawach che ri Jehová nojimal chi nojimal kukʼut chkiwach ri upatanelabʼ ri jastaq kraj kubʼano. Xuqujeʼ, kukʼutu che kukʼam bʼi tiempo are chiʼ jun cristiano kkʼiy pa ri ukojonik. w21.08 8 párrs. 1, 3, 4

Ri kʼisbʼal re ri itzelal naqaj chi kʼo wi y sibʼalaj kʼi chak rajawaxik kqabʼano (Mat. 24:14; Luc. 10:2; 1 Ped. 5:2). Qonojel kqaj kqapatanij más ri Jehová. E kʼi chke ri qachalal tajin kkinimarisaj ri kichak che ri Jehová, y e jujun kkaj keʼux precursores, nikʼaj chik kkaj kepatanin pa Betel o kebʼe che uwokik kʼolbʼal ri kyaʼ wi uqʼij ri Jehová. Xuqujeʼ e kʼi qachalal tajin kkikoj kichuqʼabʼ rech keʼux tobʼanelabʼ o e kʼamal bʼe pa ri congregación (1 Tim. 3:1, 8). Qastzij wi che ri Jehová sibʼalaj kkikotik are chiʼ ri e qachalal kkikoj ronojel kichuqʼabʼ che upatanexik (Sal. 110:3). ¿La ubʼanom kebʼ qakʼuʼx rumal che oj kunaq taj qabʼanom ri kqaj kqabʼano? We jeriʼ, chqabʼij che ri Jehová ronojel ri kqanaʼo (Sal. 37:5-7). Chqataʼ qanojibʼal chke ri e qachalal kʼo nim ketaʼmabʼal y chqabʼanaʼ ri kkibʼij chqe. We kqabʼan wariʼ, weneʼ kojkun che ubʼanik ri qachomam ubʼanik. w21.08 20 párr. 1; 21 párr. 4

Ri Ana ri qʼaxal tzij re ri Dios kʼo chi 84 ujunabʼ are kʼu «mawi jubʼiqʼ kel bʼik chupam ri rachoch Dios» o amaqʼel kopan chilaʼ. Xtewchix ri usukʼilal rumal ri Jehová y xkunik xril ri Jesús are chiʼ kʼa neʼ na (Luc. 2:36-38). Pa taq ri qaqʼij, e kʼi qachalal nim chi kijunabʼ e jun utzalaj kʼutbʼal chkiwach ri alabʼom alitomabʼ. Sibʼalaj utz we kqatas qatiempo rech kqataʼ chke ri kikotemal kinaʼom pa ri utinamit ri Jehová y keqatatabʼej are chiʼ kechʼawik. Ri qachalal nim chi kijunabʼ sibʼalaj nim kibʼanik pa ri utinamit ri Jehová. Kilom jas ubʼanom ri Jehová che utewchixik ri utinamit xuqujeʼ che kitewchixik e areʼ. Nim ketaʼmam chrij ri jastaq che utz taj xkibʼan ojer. Rumal laʼ nim chqilaʼ wi ri kinojibʼal y chqakojoʼ pa qakʼaslemal ri kkikʼut chqawach (Prov. 18:4). We kqatas qatiempo che retaʼmaxik más kiwach, kkowir ri qakojonik. w21.09 3 párr. 4; 4 párrs. 7, 8; 5 párrs. 11, 13

Rumal che ri Isaías xubʼij kanoq che wariʼ are «ri utzalaj taq kiqʼobʼibʼal» o kileche «ri nimaʼq taq tinimit» (Is. 60:5, 16). Rukʼ ri jalajoj taq jastaq kekunik kkibʼan ri achijabʼ ixoqibʼ ri keʼok pa ri utinamit ri Jehová, tajin ktzijox ri utzij ri Dios pa 240 nimaʼq taq tinamit y tajin kebʼan wuj pa más che 1,000 chʼabʼal. Pa ri kʼisbʼal taq qʼij riʼ, ri yikopem bʼanom chke konojel taq ri tinamit tajin kubʼano che ri e winaq rajawaxik kkichaʼ jachin chrij kkikubʼsaj wi kikʼuʼx: we chrij ri uQʼatbʼal tzij ri Dios o chkij ri e qʼatbʼal tzij re ri uwach ulew. Paneʼ ri upatanelabʼ ri Dios kkibʼan ri kkibʼij ri e qʼatal taq tzij, are kʼu kkinim ta kibʼ pa política (Rom. 13:1-7). Ketaʼm che xaq xiw ri uQʼatbʼal tzij ri Dios kkunik kresaj ronojel ri kʼax cho ri uwach Ulew y wajun Qʼatbʼal tzij riʼ aj uwach Ulew taj (Juan 18:36, 37). w21.09 17, 18 párrs. 13, 14

Are chiʼ jun awachalaxik kuya kan upatanixik ri Jehová, nim ubʼanik che kanimarisaj ri awachilanik rukʼ ri Jehová xuqujeʼ ri kech ri afamilia. ¿Jas kabʼan che ubʼanik? Chasikʼij uwach ri uTzij ri Dios ronojel taq qʼij y chatchoman chrij, xuqujeʼ amaqʼel chatkʼol pa ri e riqbʼal ibʼ. Chojchoman chrij ri ukʼutbʼal ri al Joanna. Ri utat y ri ratz xkiya kan upatanixik ri Jehová. Ri al Joanna kubʼij: «Kinbʼison taj are chiʼ kinsikʼij uwach ri xkikʼulmaj ri Abigaíl, ri Ester, ri Job, ri José y ri Jesús. Ri utz taq kikʼutbʼal kinkitoʼ che uchomaxik utz taq jastaq». Are chiʼ sibʼalaj katbʼisonik, mayaʼ kan ubʼanik achʼawem che ri Jehová. Chataʼ toqʼobʼ che ri loqʼalaj qaDios rech katutoʼ che rilik ri jastaq junam rukʼ ri kubʼan areʼ che rilik, kuya anoʼj y rech kukʼut chawach jas rajawaxik kabʼano (Sal. 32:6-8). Rumal che xa oj winaq, weneʼ kariq taj jas kabʼan che ubʼixik ronojel ri kanaʼo. Are kʼu ri Jehová kuchʼobʼ ronojel ri kanaʼo. Ri areʼ kraj kabʼij ronojel che (Éx. 34:6; Sal. 62:7). w21.09 28 párrs. 9, 10

Are chiʼ xqʼax ri Pascua pa ri junabʼ 32, ri apóstoles Pedro, Santiago y Juan xkil jun visión nim ubʼanik. Pa jun nimalaj juyubʼ, weneʼ chunaqaj ri juyubʼ Hermón, ri Jesús xkʼextaj ri uwachbʼal. Ri Biblia kubʼij: «Xjuluw ri upalaj je jas ri qʼij, ri ratzʼyaq xeʼux saqloloj je jas ri saqil» (Mat. 17:1-4). Ri apóstoles xkita ri uchʼabʼal ri Dios, xubʼij: «Are loqʼalaj nuKʼojol waʼ, ri kqaj chnuwach. Chitatabʼej bʼaʼ ri utzij». Rukʼ ri xkibʼan pa ri kikʼaslemal, waʼ taq oxibʼ apóstoles riʼ xkikʼutu che qas xkitatabʼej ri xubʼij ri Jesús chke, oj xuqujeʼ kqaj kqabʼan qe. Sibʼalaj kqamaltyoxij che ri Jehová che rukʼ loqʼoqʼebʼal kukoj ri Jesús che ukʼamik qabʼe, che are ri «ujolom ri komon kojonelabʼ» (Efes. 5:23). Junam rukʼ ri xkibʼan ri apóstoles Pedro, Santiago y Juan, chqata bʼaʼ ri kubʼij ri Jesús. We kqabʼano kqariq kʼi tewchibʼal kimik y sibʼalaj kojkikot na chbʼe qʼij saq. w21.12 22 párr. 1; 27 párr. 19

Jun cristiano re Corinto qajinaq pa inmoralidad sexual rukʼ ri rixoqil ri utat. Ri apóstol Pablo, xubʼij ta chke ri congregación re Corinto che kkikamisaj wajun achi riʼ; are kʼu xubʼij che kesax bʼi pa ri congregación. Ri xubʼan wajun achi riʼ tajin kubʼan kʼax chke nikʼaj qachalal re ri congregación. Rumal che jujun chke kkibʼij che ri xubʼano are ta jun nimalaj makaj (1 Cor. 5:1, 2, 13). Are chiʼ xqʼax ri tiempo, ri Pablo xretaʼmaj che ri achi riʼ xukʼex ri ukʼaslemal. Ri Pablo xubʼij chke ri e kʼamal bʼe: «Chisachaʼ umak, chikubʼisaj ukʼuʼx». Xuqujeʼ xubʼij chke jasche rajawaxik jeʼ kkibʼano: «Rech man kkʼaxkʼobʼ ta rumal ri nimalaj bʼis». Ri Pablo xutoqʼobʼisaj uwach wajun achi riʼ rumal che xukʼex ri ukʼaslemal. Ri apóstol kraj taj che ri ajmak mat kutzukuj chi tobʼanik pa ri congregación rumal che sibʼalaj kbʼisonik (2 Cor. 2:5-8, 11). Junam rukʼ ri kubʼan ri Jehová, ri e kʼamal bʼe xuqujeʼ kkinaʼ toqʼobʼisabʼal wachaj. Are chiʼ kkilo che rajawaxik kkʼajisax uwach jun winaq, kkikʼajisaj uwach, are kʼu we kkilo che rajawaxik ktoqʼobʼisax uwach xuqujeʼ kkitoqʼobʼisaj uwach. We kkikʼajisaj ta uwach ri ajmak, tajin ta kkitoqʼobʼisaj uwach riʼ, xaq tajin kkiya bʼe che rech kutaqej ubʼanik ri umak. w21.10 11, 12 párrs. 12-15

Ri kʼax kqariqo are chiʼ kqasok qibʼ xaq junam rukʼ ri kʼax che kkibʼan ri winaq chqe: kʼo jujun nimaʼq y kʼo jujun e nitzʼaq. Jun kʼutbʼal, weneʼ kqasok ri uwiʼ qaqʼabʼ are kʼu are chiʼ kqʼax ri qʼij ksachan kan chqe. Tekʼuriʼ, we nim xojsokotajik, weneʼ kojbʼe rukʼ jun ajkun rech kutʼiso y kupiso. We xaq amaqʼel kqachapo weneʼ kqabʼano che más knimatajik. Xaq junam, weneʼ jun qachiʼl kubʼij o kubʼan jun jastaq che kʼax kbʼe chqe, are kʼu aninaq kqakuy umak. Are kʼu, sibʼalaj bʼisobʼal rumal che e jujun che bʼanom jun kʼax chke, xaq are kkichomaj wi ri kʼax bʼanom chke, jetaneʼ xaq are kkichap ri sokotajik, y wariʼ kubʼano che kitukel kkibʼan kʼax che kibʼ. Qastzij riʼ che are más utz che kbʼan ri pixabʼ che kʼo pa ri texto re kimik. w21.12 12 párr. 15

Chqachomajampeʼ che jun kʼamal bʼe tajin krilo che utz ta ri ratzʼyaq jun qachalal kukojo. Utz che kutaʼ wariʼ chbʼil ribʼ: «¿La kʼo jun taqanik re ri Biblia kubʼij che rajawaxik kinya ri pixabʼ che?». Rumal che kraj taj kubʼan ri jastaq pa rech wi, utz che kuta ri kuchomaj jun chi kʼamal bʼe chrij ri qachalal o ri kuchomaj jun chi qachalal re ri congregación che nim ukojonik. Kekunik junam kkilo jas xubʼij ri Pablo chrij ri kbʼan che ukojik ri atzʼyaq rech kkilo jas rajawaxik kkibʼano (1 Tim. 2:9, 10). Ri Pablo xuchololej ta uyaʼik taqanik che ubʼixik jas ri utz kbʼanik y jas ri utz taj. Xaneʼ, xaq xiw xuya pixabʼ rech qas kqilo jas kqabʼan che utzukuxik ri atzʼyaq kqakojo, y che utz kkaʼyik. Ri Pablo retaʼm che ri cristianos kekunik kkichaʼ jas atzʼyaq kkikojo, are kʼu rajawaxik qas kechoman chrij ri kubʼij ri Biblia. Are kʼu ri e kʼamal taq bʼe rajawaxik qas kkinikʼoj na we qas ukojom uchomanik che uchaʼik ri atzʼyaq kukojo y utz kkaʼyik. Rajawaxik knaʼtaj chqe che e kebʼ qachalal che ko ri kikojonik jalan ri jastaq kekunik kkichaʼ. Rumal laʼ we jalan ri kkichaʼ ubʼanik, kraj ta kubʼij che utz ta ri jun y ri jun are utz. Rumal laʼ kqabʼij ta chke ri e nikʼaj chik che utz ta tajin kkibʼano xa rumal che are ta ri kqachomaj oj che utz. w22.02 16 párrs. 9, 10

Kʼo kʼi rumal che kqakʼut nim loqʼoqʼebʼal kʼuʼx chbʼil taq qibʼ. Kqariq jujun chke waʼ taq rumal pa ri proverbios re ri Biblia: «Mawi jubʼiqʼ matzaq kan ri loqʼoqʼebʼal kʼuxaj xuqujeʼ ri qastzij [...] kariq kʼu na ri toqʼobʼ xuqujeʼ ri nimarisabʼal aqʼij rumal ri Dios xuqujeʼ kumal ri winaq»; «ri kel ukʼuʼx che jun chik kubʼan utzil chbʼil ribʼ» y «ri kutzukuj chi kux kolom, xuqujeʼ aj loqʼoqʼebʼal kʼuʼx, kuriq kʼaslemal» (Prov. 3:3, 4; 11:17; 21:21). Waʼ taq proverbios kkikʼut oxibʼ rumal che rajawaxik kqakʼut nim loqʼoqʼebʼal kʼuʼx. Ri nabʼe, are che kojqaj chuwach ri Dios. Ri ukabʼ, are che kqabʼan utzil chbʼil qibʼ. Jun kʼutbʼal, kojutoʼo rech e kʼo utz taq qachiʼl. Y ri urox, we kqakʼut nim loqʼoqʼebʼal kʼuʼx, kojtewchiʼx pa ri petinaq, rukʼ ri kʼaslemal che kʼo ta ukʼisik. Qastzij che kʼo rumal kqanimaj wajun taqanik re ri Jehová: «Cheʼibʼanaʼ ri utzil xuqujeʼ chel taq ikʼuʼx chixoʼl». w21.11 8 párrs. 1, 2

We xawilo che kʼo rajawaxik kasukʼumaj pa ri akojonik are chiʼ xariq jun kʼax ojer o kimik, katbʼison taj. Chayaʼ bʼe che, rech katutoʼ che ukowirisaxik más ri akojonik. Chabʼanaʼ achʼawem rukʼ ronojel awanimaʼ che ri Jehová, más na are chiʼ tajin kaqʼaxej jun kʼax. Chayaʼ bʼe che ri Jehová keʼukoj ri afamilia o ri e qachalal che atoʼik. We kaya bʼe che ri Jehová katutoʼ chuwach taq ri e kʼax kimik, knimar ri akojonik y kakubʼsaj akʼuʼx che katutoʼ na pa ronojel ri e kʼax pa ri petinaq. Ri Jesús xchʼaw chrij jujun jastaq che rajawaxik kkisukʼumaj ri utijoxelabʼ pa ri kikojonik, are kʼu qas xukubʼsaj ukʼuʼx che ri Jehová keʼutoʼ pa ronojel ri kʼax che kkiriqo (Juan 14:1; 16:33). Xuqujeʼ, qas xuchʼobʼo che kʼo e kʼiʼalaj winaq kekunik kkiqʼaxej ri nimalaj kʼaxkʼolil rumal ri kikojonik (Apoc. 7:9, 14). ¿La katkʼojiʼ at chkixoʼl riʼ ri e kʼiʼalaj winaq? Katkun riʼ katkʼojiʼ chkixoʼl we kakowirisaj ri akojonik (Heb. 10:39). w21.11 25 párrs. 18, 19

Kimik, oj kqeyeʼj taj kpe jun ángel che qachajixik. Are kʼu ri qas qetaʼm are che kʼo ta jun upatanel ri Jehová kuriq jun kʼax che mat kkʼis chik. Pa ri petinaq qas kqakʼut na we kqakubʼsaj qakʼuʼx che ri Jehová kojuchajij. Are chiʼ kpe chqij ri Gog re Magog, jun jupuq qʼatal taq tzij re kʼi tinamit, weneʼ kqachomaj che chilaʼ xkʼis wi kan tzij pa qawiʼ. Rumal laʼ are chiʼ kopan ri qʼij riʼ, rajawaxik qas kqakojo che ri Jehová kojutoʼ na. Ri winaq kkichomaj na che kʼo ta kojtoʼwik jetaneʼ oj chij che kʼo ta kkʼamow qabʼe (Ezeq. 38:10-12). Kkichomaj na che kojkun taj kqatoʼ qibʼ, rumal che kʼo ta chakubʼal re chʼoj qukʼ. Kekun taj kkilo ri kqil oj rumal ri qakojonik: kʼiʼalaj ángeles che kisutim qij rech kojkitoʼ. Ri winaq kekun taj kkil wariʼ rumal che kʼo ta kikojonik, rumal laʼ qas kkimay na are chiʼ ri kʼiʼalaj ángeles kepe che qatoʼik (Apoc. 19:11, 14, 15). w22.01 6 párrs. 12, 13

We nim keʼil wi ri qachalal rumal ri Jehová, xuqujeʼ oj rajawaxik nim keqil wi. Rajawaxik rukʼ ronojel qanimaʼ keqachajij y keqatoʼ ri qachalal. We kqetaʼmaj che xqabʼan kʼax che jun qachalal rajawaxik che xaq ta kqaya kan jeriʼ y kqabʼij taj che xa más chʼin o más kuya uwiʼ ri kubʼano. ¿Jasche weneʼ jujun aninaq kubʼan kʼax chke ri kqabʼij o ri kqabʼano? Weneʼ rumal ri xbʼan che kikʼiyisaxik o weneʼ kʼo jujun kʼateʼ xeʼok pa ri utinamit ri Jehová rumal laʼ kʼa majaʼ kkichʼobʼo che qonojel xa oj ajmakibʼ. Apastaneʼ ri kbʼanowik che aninaq kubʼan kʼax che jun qachalal ri kqabʼij o ri kqabʼano, rajawaxik kqata kuybʼal qamak che rech kkʼojiʼ jamaril chqaxoʼl. Are kʼu, xuqujeʼ ri winaq che xa rukʼ jun nitzʼ jastaq aninaq kpe royowal, rajawaxik kuchʼobʼo che utz ta wajun bʼantajik riʼ. Nim ubʼanik kretaʼmaj che qonojel rajawaxik xa kqakuyulaʼ qamak y kqabʼan utzilal chbʼil taq qibʼ. w21.06 21 párr. 7

Ri Jesús kuchʼobʼ ronojel ri kanaʼo. Are chiʼ kojbʼisonik sibʼalaj utz kqilo che kʼo jun qachiʼl che kuchʼobʼ ri kqanaʼo, más na we qʼaxinaq chupam ri kʼax che tajin kqariqo. Ri Jesús are jun qachiʼl che kuchʼobʼ ronojel ri kqanaʼo. Retaʼm are chiʼ kʼo ta qachuqʼabʼ y kajwataj tobʼanik chqe. Xuqujeʼ retaʼm ri qabʼantajik y kuya na ri tobʼanik «pa ri qʼij ri rajawaxik na chqe» (Heb. 4:15, 16). Ri Jesús xukʼam ri tobʼanik che xuya jun ángel che pa ri jardín re Getsemaní. Oj xuqujeʼ rajawaxik kqakʼam ri tobʼanik kuya ri Jehová chqe, weneʼ kukoj jun wuj, jun video, jun chʼabʼal, jun kʼamal bʼe o jun qachiʼl che ko pa ri ukojonik rech kuya qachuqʼabʼ (Luc. 22:39-44). Ri Jehová kuya ri ujamaril chawe. ¿Jas kubʼan ri Jehová che qatoʼik? Are chiʼ kqabʼan qachʼawem kqanaʼ «ri ujamaril ri Dios, ri nim na chuwach ronojel noʼj» (Filip. 4:6, 7). w22.01 18, 19 párrs. 17-19

Ri Jehová amaqʼel kubʼan ri utz. Are kʼu rumal che e uchaʼom achijabʼ rech kkiya ri taqanik chqe, weneʼ kʼax kqabʼan che ukubʼsaxik qakʼuʼx chkij. Weneʼ kqachomaj: «¿La are tajin kkibʼan ri kraj ri Jehová o xa are tajin kkibʼan ri kkichomaj e areʼ?». Are waʼ ri qastzij: kojkun taj kqabʼij che kqakubʼsaj qakʼuʼx chrij ri Jehová, we kqabʼan ta ri kkibʼij ri achijabʼ e ukojom pa ri utinamit. Kimik ri Jehová keʼukoj «ri jikalaj pataninel, utz uchomanik» rech kukʼam kibʼe ri upatanelabʼ che e kʼo cho ri uwach Ulew (Mat. 24:45). Junam rukʼ ri jikalaj pataninel re ri nabʼe siglo, kimik wajun jikalaj pataninel riʼ kukʼam kibʼe konojel ri e kʼamal taq bʼe re ri congregación cho ronojel uwach Ulew rech kkikʼam qabʼe. Pa ri congregaciones ri e kʼamal taq bʼe kkilo che kbʼan ri xyaʼ ubʼixik chke. We kqabʼan ri kkibʼij ri jikalaj pataninel chqe xuqujeʼ ri kkibʼij ri e kʼamal taq bʼe, kqakʼutu che qas kqakubʼsaj qakʼuʼx chrij ri kubʼij ri Jehová chqe. w22.02 4 párrs. 7, 8

¡Sibʼalaj kojkikotik rumal che oj testigos rech Jehová! Kuya kikotemal chqe are chiʼ kqatoʼ jun winaq che kraj «kkʼojiʼ junalik [u]kʼaslemal», rumal laʼ kux testigo rech Jehová (Hech. 13:48). Kqanaʼ junam rukʼ ri Jesús che «sibʼalaj xkikot [...] rumal ri ruxlabʼal ri Dios» are chiʼ ri utijoxelabʼ xetzalij lo che utzijoxik ri utzij ri Dios y xkibʼij che ri utz taq jastaq xkikʼulmaj (Luc. 10:1, 17, 21). Ri apóstol Pablo xuya wajun pixabʼ che ri Timoteo: «Chawilaʼ awibʼ, xuqujeʼ chawilij ri atijonik, mayaʼ kanoq». Xuqujeʼ xutzʼaqatisaj ubʼixik: «We kabʼan kʼu waʼ, kakol na awibʼ, xuqujeʼ keʼakol ri katkitatabʼej» (1 Tim. 4:16). Waʼ taq tzij kukʼut chqawach che nim ubʼanik ri chak tajin kqabʼano, rumal che kʼo ubʼanik rukʼ ri kikʼaslemal ri e winaq. Kqilij jas ubʼanik ri qabʼantajik rumal che ri uQʼatbʼal tzij ri Dios kuqʼat tzij pa qawiʼ. Amaqʼel kqaj kqaya uqʼij ri Jehová rumal ri qabʼantajik y rukʼ wariʼ qas kqakojo che kojkojon chrij ri utzalaj taq jastaq che kqaya ubʼixik chke ri e winaq (Filip. 1:27). Xuqujeʼ, qas kqil ri kqabʼan che kitijoxik ri winaq, rumal laʼ kqatijoj qibʼ y kqataʼ tobʼanik che ri Jehová. w21.10 24 párrs. 1, 2

Ri kʼakʼ kʼaslemal, are ri chomanik y ri bʼantajik che kukʼut ri ubʼantajik ri Jehová. ¿Y jas kqabʼan che ukʼutik? Kqakʼutu are chiʼ kqaya bʼe che ri ruxlabʼixel ri Dios kukʼam qabʼe pa ri qachomanik, pa ri kqabʼano y pa ri kqanaʼo. Jun kʼutbʼal, we jun winaq ratzʼyaqim ri «kʼakʼ [...]kʼaslemal», kuloqʼoqʼej riʼ ri Jehová y ri upatanelabʼ (Mat. 22:36-39). Xuqujeʼ kkikotik paneʼ kuriq kʼax pa ri ukʼaslemal (Sant. 1:2-4). Kunaʼ jamaril (Mat. 5:9). Kʼo upaciencia y utz kukʼ ri e nikʼaj chik (Col. 3:12, 13). Kuloqʼoqʼej ri utz taq jastaq y are kubʼan pa ri ukʼaslemal (Luc. 6:35). Rukʼ ri kubʼano kukʼutu che kʼo jun nimalaj ukojonik chrij ri uTat che kʼo pa ri kaj (Sant. 2:18). Chanim ta kpe royowal (Tito 3:2). Y kukoj uchuqʼabʼ rech ktzaq ta pa makaj (1 Cor. 9:25, 27). Rech kqakʼut ri kʼakʼ kʼaslemal, rajawaxik che kqakʼut ri e bʼantajik che kubʼij pa Gálatas 5:22, 23 xuqujeʼ ri e kʼo pa nikʼaj chi textos. w22.03 8, 9 párrs. 3, 4

Ri e kʼamal bʼe kkesaj uwach ri apóstol Pablo are chiʼ utz kkibʼan che ukojik ri tiempo y pa apachike lugar kkitzijoj wi ri utzij ri Dios (Efes. 6:14, 15). Junam rukʼ ri xubʼan ri Pablo, kekunik kkikoj ri kitiempo are chiʼ tajin kkitzijoj ri utzij ri Dios rech kekitijoj ri e nikʼaj chik, jun kʼutbʼal, ri siervos ministeriales (1 Ped. 5:1, 2). Are kʼu ri e kʼamal taq bʼe rajawaxik kkitas kitiempo rech kkitzijoj ri utzij ri Dios y xaq xiw ta kkikoj che nikʼaj chi eqeleʼn. We kkaj junam kkibʼan che rilixik ri nikʼaj chi eqeleʼn rukʼ ri utzijoxik ri utzij ri Dios (Mat. 28:19, 20). Kʼo jujun taq mul riʼ rajawaxik kkikʼam ta jun chi eqeleʼn che ktzujux chke. Utz che kkibʼan kichʼawem rech kkilo we rajawaxik kkikʼam jujun eqeleʼn rech kkiya ta kan rilixik ri jastaq che nim kibʼanik, junam rukʼ ri qʼijilanik pa ri familia, utzijoxik ri utzij ri Dios o kitijoxik ri kalkʼwal rech xuqujeʼ je kkibʼano. Are kʼu rajawaxik kketaʼmaj che ri Jehová kuchʼobʼo we kekun taj kkikʼamo. w22.03 27 párrs. 4, 7; 28 párr. 8

We knaʼtaj chqe are chiʼ xqamaj retaʼmaxik chrij ri Biblia, weneʼ xqaxeʼj qibʼ are chiʼ xojchoman chrij che kojux testigos rech Jehová y che kojbʼe che utzijoxik ri utzij ri Dios. O weneʼ xuya xibʼin ibʼ chqe che kojux kikʼulel ri e qachalaxik o ri e qachiʼl. Kojkunik kqatoʼ ri tijoxel are chiʼ kunaʼ wariʼ. Ri Jesús xubʼij che kʼo jujun winaq kkixeʼj kibʼ. Are kʼu xuqujeʼ xuya kichuqʼabʼ ri utijoxelabʼ rech kkiya ta bʼe che apachike jastaq kuqʼatej kiwach che upatanixik ri Jehová (Mat. 10:16, 17, 27). Nojimal chi nojimal chqakʼutuʼ chuwach ri tijoxel re ri Biblia che kutzijoj chke nikʼaj chik ri tajin kretaʼmaj. Xkixeʼj kibʼ riʼ ri utijoxelabʼ ri Jesús are chiʼ xetaq bʼi che utzijoxik ri utzij ri Dios. Are kʼu ri Jesús xukʼut chkiwach jachin chke kkitzijoj wi ri utzij ri Dios y jas kkibʼij (Mat. 10:5-7). ¿Jas kqabʼano rech kqesaj uwach ri Jesús? Chqabʼij che ri tijoxel jachin kukʼ kumaj wi ubʼixik ri retaʼm. Jun kʼutbʼal, chqata che we kuchʼobʼ uwach jun winaq che kajwataj tobʼanik che. Tekʼuriʼ chqakʼutuʼ chuwach jas kubʼan che ukʼutik ri kubʼij jun versículo. w21.06 6 párrs. 15, 16

«Xa pa kebʼ oxibʼ minutos ri nimaʼq taq kʼayij y ri nimaʼq taq ja xewuluwubʼik». «E kʼi winaq kkiraqaqej kichiʼ y kixiʼm kibʼ [...]. E kʼi kkibʼij che xa kebʼ oxibʼ minutos xubʼan ri kabʼraqan, are kʼu in xinnaʼo che ktaniʼ ta chik». Jeriʼ xkibʼij ri xekʼasiʼ kanoq are chiʼ xubʼan jun nimalaj kabʼraqan pa Nepal pa ri 2015. Are kʼu, kimik qonojel qas tajin kqil jun chi jastaq che tajin kuyikopisaj ronojel kiwach taq tinamit pa ronojel uwach Ulew. Are waʼ ri utzij ri Jehová xuya kan ubʼixik ri qʼaxal tzij Ageo: «Xa pa kebʼ oxibʼ qʼij kenbʼanaʼ na chi keyikop ri kaj xuqujeʼ ri ulew» (Ageo 2:6). Are chiʼ kubʼan jun kabʼraqan xaq xiw kubʼan kʼax, rumal che kusach uwach kʼi jastaq, are kʼu ri yikopem che xchʼaw ri Ageo chrij kuya nimalaj utzilal. Are ri Jehová xbʼin wariʼ: «Kenbʼanaʼ na chi keʼeyikop konojel ri nimaʼq taq tinamit kekikʼam kʼu na uloq taq ri kiqʼinomal, knoj kʼu na ri wachoch che juluwem». w21.09 14 párrs. 1-3

¿Jas kbʼanowik che kʼo utzalaj achilanik chkixoʼl e kebʼ winaq? Ri kbʼanowik are che ketzijon rukʼ ronojel kanimaʼ y ronojel qʼij, wariʼ xuqujeʼ kkʼulmataj rukʼ ri Jehová. Are chiʼ kqabʼij che ri kqanaʼo, ri kqachomaj y ri kqabʼisoj tajin kqakʼutu che kqakubʼsaj qakʼuʼx chrij y kqachʼobʼo che kojraj (Sal. 94:17-19; 1 Juan 5:14, 15). Keqachilaj ri qachalal. Ri e qachalal are jun sipanik uyaʼom ri Jehová chqe (Sant. 1:17). Ri qaTat kʼo pa ri kaj kukʼutu che sibʼalaj kel ukʼuʼx chqe, rumal laʼ e uyaʼom ri qachalal rech kojkitoʼ pa ronojel ri kqakʼulmaj (Prov. 17:17). Pa ri carta che xutzʼibʼaj bʼi ri Pablo chke ri colosenses xubʼij che kʼo jujun cristianos xkiya tobʼanik che y xubʼij che e areʼ «xkikubʼsaj» ukʼuʼx (Col. 4:10, 11). Xuqujeʼ ri Jesús xajwataj uchuqʼabʼ y xmaltyoxin rumal ri tobʼanik xyaʼ che kumal ri rachiʼl y ri ángeles (Luc. 22:43). Are chiʼ kqabʼij ri tajin kqakʼulmaj che jun qachalal ko ukojonik xa ta rumal che kʼo ta qakojonik xaneʼ are jun nimalaj tobʼanik chqe. w21.04 24, 25 párrs. 14-16

Are kʼu, ¿jas kqabʼano we jun qachalal kubʼan jun jastaq che kubʼan kʼax chqe? Rajawaxik kqakoj qachuqʼabʼ rech kʼo utzilal chqaxoʼl qonojel. Chqabʼanaʼ qachʼawem che ri Jehová, chqabʼij che ronojel ri kqanaʼo y ri kqachomaj. Chqataʼ che ri Jehová che kutewchij ri qachalal che xubʼan jun kʼax chqe y chqilaʼ ri utz taq ubʼantajik junam rukʼ ri kubʼan ri Jehová che rilik (Luc. 6:28). We kʼax kqariq che ukuyik umak, chqilaʼ jas kqabʼano rech kojtzijon rukʼ. Amaqʼel are utz kojchoman chrij che xa ta chubʼanik xubʼan chqe (Mat. 5:23, 24). Are kʼu, ¿jas kqabʼano we kraj taj kqasukʼumaj ri chʼoj? Ri Biblia kubʼij: «Chisachalaʼ imak chbʼil taq iwibʼ». Kqachomaj taj che ri qachalal are jun itzelalaj winaq (Col. 3:13). Xuqujeʼ ri más nim ubʼanik, maqakʼol oyowal pa qanimaʼ rech kuriq ta kʼax ri qachilanik rukʼ ri Jehová. Maqayaʼ bʼe che nijun jastaq kubʼan kʼax che ri qachilanik kukʼ ri qachalal. Jeriʼ kqakʼutu che are sibʼalaj kqaloqʼoqʼej ri Jehová chuwach apachike jastaq (Sal. 119:165). w21.06 23 párr. 15