Agosto

Weneʼ tajin kchʼaw chkij ri achijabʼ ri xebʼajin re chuwach ri cheʼ. Ketaʼm taj jachin ri Jesús. Ri Jesús xuya ta bʼe che ri kʼax xbʼan che xukʼiyisaj taneʼ oyowal pa ranimaʼ (1 Ped. 2:23). Rajawaxik kqabʼan qe junam rukʼ ri xubʼan ri Jesús kqakuy kimak ri e nikʼaj chik (Col. 3:13). Weneʼ e kʼo winaq itzel kojkilo —weneʼ e jun ri qafamilia— rumal che kkichʼobʼ ta ri qakojonik y ri ubʼanik ri qakʼaslemal. Weneʼ kkibʼij molom taq tzij chqij, kojkiyoqʼ chkiwach nikʼaj chik, kkibʼan kʼax che ri taq qawuj o weneʼ kkaj kojkichʼayo. Kqakʼol ta oyowal pa qanimaʼ chkij. Xaneʼ kqataʼ che ri Jehová che kujaq ri kibʼaqʼoch rech weneʼ pa jun qʼij kkichʼobʼ uwach (Mat. 5:44, 45). Weneʼ kʼax kqariq che ukuyik kimak, más na we sibʼalaj kʼax kibʼanom chqe. Are kʼu we kqaya bʼe che ri oyowal kkʼiy más pa qanimaʼ, xa oj kqabʼan kʼax che qibʼ (Sal. 37:8). Are chiʼ kqakuy umak jun winaq, xa tajin kqesaj bʼi ri itzel taq jastaq pa ri qachomanik y pa ri qanimaʼ y jeriʼ kojkikotik (Efes. 4:31, 32). w21.04 8, 9 párrs. 3, 4

Are chiʼ kelesax bʼi jun winaq pa ri congregación, sibʼalaj kebʼison riʼ ri e rachalaxik. Chojchoman chrij ri bʼis xunaʼ ri Jehová are chiʼ jujun ángeles che e kʼo nabʼe pa ri ufamilia, xkiya kan upatanixik (Jud. 6). Y, ¿jas xunaʼ riʼ areʼ chiʼ ri israelitas kʼi mul xeniman ta che? Qastzij che sibʼalaj xbʼisonik (Sal. 78:41). We sibʼalaj katbʼison at rumal che xel bʼi jun awachalaxik pa ri congregación, xaq xiw ta at, ri qaTat kʼo pa ri kaj xuqujeʼ kbʼisonik. Ri areʼ kuchʼobʼ ri kanaʼo y kutoqʼobʼisaj awach, rumal laʼ kraj kuya achuqʼabʼ y kubʼsal akʼuʼx. Are chiʼ jun ala jun ali kuya kan upatanixik ri Jehová, weneʼ ri e tat nan kkichomaj che xa kʼo xkibʼan ta che utoʼik. Jun qachalal kubʼij: «Xinchomaj che numak in. Kok ta nuwaram chaqʼabʼ». Jun qachalal ixoq che xuqujeʼ xelesax bʼi ri ral pa ri congregación, kuya ta kan uchomaxik wariʼ: «¿Jas utz ta xinbʼan chuwach? Kinchomaj che xa qas ta utz xinbʼan che ukʼiyisaxik rukʼ ri uTzij ri Jehová». w21.09 26 párrs. 1, 2, 4

E kʼi winaq kkichomaj che kojkun taj kqakʼut ri kʼo pa ri Biblia rumal che kʼo ta jun título yaʼom chqe pa jun nimalaj tijobʼal re ri Biblia. Are kʼu rajawaxik qas kkinikʼoj na ri qastzij chrij taq ri jastaq. Are riʼ ri xubʼan ri Lucas. Are chiʼ xutzʼibʼaj ri Evangelio qas xunikʼoj na «ronojel qas pa ri uchapletajik». Xraj che ri kesikʼin uwach ri uwuj, kketaʼmaj ri qastzij chrij ri Jesús (Luc. 1:1-4). Xuqujeʼ are ri xkibʼan ri judíos re ri tinamit re Berea. Ri nabʼe mul che xketaʼmaj ri utzalaj taq tzij chrij ri Jesús, utz xkibʼan che unikʼoxik ri utzij ri Dios che tzʼibʼam pa hebreo rech qas xkilo che qastzij ri xkʼut chkiwach (Hech. 17:11). Junam rukʼ wariʼ, at xuqujeʼ rajawaxik qas kanikʼoj ri qastzij chrij jun jastaq. Chawilaʼ we junam kkikʼut ri testigos rech Jehová rukʼ ri kukʼut ri Biblia. Xuqujeʼ utz riʼ we kawetaʼmaj chrij ri kibʼanom ri testigos rech Jehová pa ri kʼisbʼal taq junabʼ. We utz unikʼoxik ri jastaq kqabʼano kqaya ta bʼe riʼ che e nikʼaj chi winaq kojkisubʼu o kkibʼij molom taq tzij chqe. w21.05 3 párrs. 7, 8

¿La kʼo jun qachalal che kojkunik kqasikʼij rech kutijaʼ uwa qukʼ? Jujun taq mul pa ri junabʼ e kʼo jujun qachalal kkaj che kojkʼojiʼ kukʼ. Jun kʼutbʼal, ri e qachalal che Testigos ta ri kifamiliar, sibʼalaj kkiriq kʼax are taq chiʼ kʼo nimaqʼij. E nikʼaj chi qachalal sibʼalaj kebʼisonik are chiʼ kopan ri qʼij che xkam jun kifamiliar. Are chiʼ kqatas qatiempo rech kojkʼojiʼ kukʼ ri qachalal riʼ, tajin kqakʼutu che sibʼalaj keqaloqʼoqʼej (Filip. 2:20). Kʼo jujun rumal che e jujun qachalal kkinaʼo che xaq kitukel e kʼolik. Are kʼu ri Jehová retaʼm jas ri tajin kqanaʼo. Amaqʼel keʼukoj ri qachalal rech kuya ri tobʼanik chqe (Mat. 12:48-50). Are chiʼ keqatoʼ ri qachalal tajin kqakʼutu che kqamaltyoxij ri tobʼanik che kuya chqe. Weneʼ kqanaʼ jujun mul che xaq qatukel oj kʼolik, are kʼu chnaʼtaj chqe che ri Jehová amaqʼel kʼo qukʼ. w21.06 13 párrs. 18-20

Ri Jesús ni ta jumul xubʼan kebʼ ukʼuʼx are chiʼ xutzijoj ri utzij ri Dios, paneʼ ri winaq xkaj taj xkitatabʼej. ¿Jasche xubʼan ta kebʼ ukʼuʼx? Rumal che xuchʼobʼo che ri winaq rajawaxik kketaʼmaj ri uTzij ri Dios. Xuqujeʼ retaʼm che e kʼo jujun winaq kkaj taj kkitatabʼej, are kʼu chiʼ kqʼax ri tiempo kkikʼex ri kichomanik. Are ri xkʼulmataj rukʼ ri ufamilia. Rumal che ri e rachalal oxibʼ junabʼ xkaj taj xeteriʼ chrij (Juan 7:5). Are kʼu chiʼ kʼastajisam chik, xkaj xeʼux utijoxelabʼ (Hech. 1:14). Qetaʼm taj jachin kkaj keʼux testigos rech Jehová, rumal che e kʼo jujun rajawaxik tiempo chke. Xuqujeʼ ri kojkitatabʼej taj, weneʼ kkilo che sibʼalaj utz ri qakʼaslemal y sibʼalaj kojkikotik, rumal laʼ are chiʼ kqʼax ri tiempo weneʼ kkaj «kkinimarisaj [...] uqʼij ri Dios». w21.05 18 párrs. 17, 18

Are chiʼ ri Jesús xkʼojiʼ pa ri uwach Ulew, xuya kan jun chak chke ri utijoxelabʼ che kʼo kebʼ jastaq nim ubʼanik chupam. Ri areʼ xubʼij chke che kkitzijoj ri utzalaj taq tzij re ri uQʼatbʼal tzij ri Dios y xukʼut chkiwach jas kkibʼan che ubʼanik (Luc. 8:1). Xubʼij chke jas rajawaxik kkibʼano are chiʼ ri winaq utz kkita ri kbʼix chke y are chiʼ utz ta kkita (Luc. 9:2-5). Xuqujeʼ xubʼij kanoq che «kqʼalajisax ri utzalaj taq tzij chkiwach konojel nimaʼq taq tinamit» (Mat. 24:14; Hech. 1:8). Xubʼij kan chke che rajawaxik kkikʼut chkiwach ri winaq jas rajawaxik kkibʼano rech kkinimaj ronojel ri xtaqan wi. Ri Jesús xubʼij kanoq che wajun chak riʼ kbʼan na «ronojel qʼij kʼa pa ukʼistajik ri uwach Ulew» (Mat. 28:18-20). Y are chiʼ xukʼut ribʼ chuwach ri Juan pa jun visión, xubʼij che che rajawaxik konojel ri utijoxelabʼ kekitoʼ nikʼaj chi winaq rech kketaʼmaj uwach ri Jehová (Apoc. 22:17). w21.07 2, 3 párrs. 3, 4

Kimik e kʼi winaq kkibʼan apachike uwach jastaq rech kkinimarisaj kibʼ chkiwach ri e nikʼaj chik. Chojchoman chkij ri kʼutbʼal riʼ, jun achi che kʼo ukʼay weneʼ knaw che ubʼanik itzel taq jastaq rech kunimarisaj ribʼ chkiwach ri nikʼaj chik ajkʼayibʼ. Weneʼ jun etzʼanel kubʼan kʼax che jun chi etzʼanel rumal che kraj kchʼakanik. O weneʼ jun winaq che kraj kok pa jun nimalaj tijobʼal, are kʼu nabʼe kbʼan jun examen che, rech kuchʼak ri examen weneʼ xa kresaj kukʼ nikʼaj chi rachiʼl o kubʼan jastaq che utz taj rech kuchʼako. Ri cristianos qetaʼm che wariʼ utz taj, rumal che kʼo ubʼanik rukʼ «ri kirayibʼal aj winaq re mak» (Gál. 5:19-21). Are kʼu, weneʼ e kʼo jujun qachalal kkinaʼ taj tajin kkibʼan wariʼ y weneʼ tajin kekitaqchiʼj nikʼaj chik che ubʼanik. Rajawaxik knikʼox wariʼ, rumal che kubʼan kʼax che ri utzilal kʼo chkixoʼl ri qachalal. Chqanikʼoj ri kikʼutbʼal jujun upatanelabʼ ri Dios ojer che xkinimarisaj ta kibʼ chkiwach ri nikʼaj chik. w21.07 14 párrs. 1, 2

Rumal ri nim loqʼoqʼebʼal qakʼuʼx kojkunik keqatoʼ ri kebʼisonik. Kimik e kʼi qachalal rukʼ ronojel kanimaʼ kekitoʼ ri e qachalal che kiriqom kʼax y sibʼalaj kebʼisonik. Kekaj ri e kachalal y kkibʼan ronojel ri kekun che ubʼanik rech kekitoʼo (Prov. 12:25; 24:10). Jeriʼ kkibʼan ri pixabʼ che xuya ri apóstol Pablo: «Chikubʼsaj kikʼuʼx ri kubʼan kebʼ kikʼuʼx. Cheʼitoʼ ri man kʼo ta kichuqʼabʼ. Makʼistaj ikʼuʼx che kitoʼik konojel» (1 Tes. 5:14). Kʼi mul, ri más utz kqabʼan che utoʼik jun qachalal are che kqatatabʼej y kqaqʼalajisaj chuwach rukʼ ri qatzij che sibʼalaj kqaloqʼoqʼej. Ri Jehová qas krilo jas kqabʼan che kitoʼik ri alaj taq uchij. Proverbios 19:17 kubʼij: «Jun jalomal che ri mebʼaʼ jun jalomal waʼ che ri Ajawaxel, qas are kʼu ri Ajawaxel ktojow na ri kʼasaj». w21.11 10 párrs. 11, 12

¿Jas rajawaxik kqabʼan kimik rech oj ko chuwach ri kʼax che kpe na? Rajawaxik kojkikot rukʼ ri kʼo qukʼ y kojkikotik rumal che oj rachiʼl ri Jehová. We más kqetaʼmaj uwach ri qaDios kojutoʼ rech kqakubʼsaj qakʼuʼx chrij che qas kojutoʼ na are chiʼ ri Gog re Magog kpe che ubʼanik kʼax chqe. Ri e tzij re ri texto re kimik kkikʼutu che ri David xukubʼsaj ukʼuʼx chrij ri Jehová. Amaqʼel xutzukuj ri utobʼanik ri Dios y kʼo ta jumul xyaʼ kanoq. Are chiʼ kʼa ala na xchʼojin rukʼ ri nimalaj Goliat y xubʼij wariʼ che: «Kamik katujach na ri Ajawaxel pa nuqʼabʼ» (1 Sam. 17:46). Are chiʼ xqʼax ri tiempo, kʼi mul xa jubʼiqʼ xraj xkamisax rumal ri qʼatal tzij Saúl, are kʼu «ri Ajawaxel kyoʼw ri tobʼanik che ri David» (1 Sam. 18:12). Qas retaʼm che ktoʼ rumal ri Jehová rumal che qas rilom chik che toʼom rumal. Are waʼ ri kojtoʼw na oj chuwach ri kʼax che kqariq na. w22.01 6 párrs. 14, 15

Ri Jehová nojimal chi nojimal kubʼan ri jastaq. Kubʼan wariʼ rumal che kukʼutu che areʼ nim ubʼanik y rumal che kraj kkiriq utzilal ri e nikʼaj chik. Jun kʼutbʼal, chqilampeʼ ri xubʼano are chiʼ xubʼan ri uwach Ulew. Ri Biblia kubʼij che are «xyoʼw ubʼixik joropaʼ [k]etanik» xeʼuya ri «utakʼalibʼal» y xukoj «ri abʼaj ri tʼuyul wi ronojel» (Job 38:5, 6). Xuqujeʼ xukoj utiempo rech xchoman chrij ri xubʼano (Gén. 1:10, 12). ¿La kojkunik kojchoman chrij ri kikotemal xkinaʼ ri ángeles are chiʼ xkilo che ri Jehová tajin kubʼan chkijujunal ri jastaq? Sibʼalaj xekikot riʼ, rumal che ri Biblia kchʼaw chrij ri «kikikotemal ri e pataninel [...] aj kaj». ¿Jas kqetaʼmaj chrij wariʼ? Paneʼ ri Jehová xukoj kʼi junabʼ che ubʼanik ri uwach Ulew, ri e chʼumil y ri jastaq che kʼo kikʼaslemal, are chiʼ xril ronojel ri ubʼanom xubʼij: «Sibʼalaj utz xelik» (Gén. 1:31). w21.08 9 párrs. 6, 7

Pa ri kʼambʼal noʼj che xukʼut ri Jesús xchʼaw chrij jun achi che xbʼe pa jun viaje. Ri achi xuya kan jujun talentos chke taq ri e rajchak rech kechakun chrij. Jobʼ talentos xuya kan che jun ajchak, kebʼ xuya kan che jun chik y jun xuya kan che ri urox ajchak, are kʼu xril ri kekun che ubʼanik. Ri e nabʼe taq kebʼ ajchakibʼ sibʼalaj xechakunik y xkichʼak más pwaq chrij ri urajil ri kajaw. Are kʼu ri urox ajchak, kʼo ta xubʼan rukʼ ri talento che xyaʼ kan che. Rumal laʼ xesax bʼi pa ri uchak rumal ri rajaw. Ri ukabʼ ajchak junam ri uchomanik rukʼ ri nabʼe ajchak, rumal che xchakun chrij ri pwaq che xyaʼ kan che rumal ri rajaw. Rumal ri xubʼano, xuchʼak chi kebʼ talentos. Ri rajaw sibʼalaj xkikotik y xuya chi más chak che. w21.08 21 párr. 7; 22 párrs. 9, 10

Ri Jehová sibʼalaj nim ri ukochʼonik pa we kʼisbʼal taq qʼij riʼ, rumal che kraj taj che kʼo jun winaq ksachisax uwach (2 Ped. 3:9). Uyaʼom tiempo chke konojel rech kkikʼex ri kikʼaslemal. Are kʼu kopan na ri qʼij che kkʼis ri ukochʼonik. Ri winaq che kkikʼex ta kikʼaslemal pa ri tiempo che uyaʼom na ri Jehová, kkiriq na kʼax junam rukʼ ri faraón pa ri utiempo ri Moisés. Ri Jehová xubʼij che: «In in kuʼinaq ta riʼ che ukʼutik ri nukuʼinem chawach rukʼ jun yabʼil ri kamisanel, ri at xuqujeʼ ri atinamit sachtajinaq ta chi iwach riʼ cho ri uwach ulew; kʼa at nukʼasbʼam kʼut rech kawil ri nukuʼinem xuqujeʼ rech kinkʼut wibʼ cho ronojel ri uwach ulew» (Éx. 9:15, 16). Kʼisbʼal re, konojel ri tinamit kketaʼmaj na che xaq xiw ri Jehová are ri qastzij Dios (Ezeq. 38:23). Ri yikopem re ri texto rech kimik kchʼaw chrij ri usachisaxik kiwach ri winaq che kejunamataj rukʼ ri faraón y kkaj taj kqʼat tzij pa kiwiʼ rumal ri Jehová. w21.09 18, 19 párrs. 17, 18

¿La katbʼisonik rumal che xesax bʼi jun awachalaxik pa ri congregación? Are kʼu, ¿jas kabʼano we jun qachalal kubʼij jujun taq tzij che xa kubʼan más kʼax chawe? Rumal che xa oj winaq, kqeyeʼj taj che amaqʼel kbʼix ri e tzij más taqalik chqe (Sant. 3:2). Qonojel xa oj ajmakibʼ, rumal laʼ kamay taj we kʼo jujun kkiriq taj jas kkibʼij chawe o kkibʼij jujun tzij che xa kubʼan más kʼax chawe. Chnaʼtaj ri utzij ri apóstol Pablo chawe: «Chisachalaʼ imak chbʼil taq iwibʼ we kʼo jun kʼo royowal» (Col. 3:13). Maqayaʼ kan kitoʼik ri e sukʼ taq qachalal. Rajawaxik che keqaloqʼoqʼej y kqaya kichuqʼabʼ (Heb. 10:24, 25). Jujun taq mul, e kʼo qachalal kilom che kechʼabʼex ta chi kumal e nikʼaj chi qachalal, jetaneʼ che e areʼ xuqujeʼ xeʼelesax bʼi pa ri congregación. ¡Maqabʼan qe oj wariʼ! Ri alabʼom alitomabʼ che elesam bʼi ri kitat o ri kinan pa ri congregación sibʼalaj rajawaxik kqaya kichuqʼabʼ. w21.09 29 párrs. 13, 14; 30 párr. 16

Are chiʼ jun ala jun ali ktzijon rukʼ jun qachalal nim chi ujunabʼ, e kebʼ kkiyalaʼ kichuqʼabʼ (Rom. 1:12). Ri kʼa majaʼ na qas krilo che ri Jehová keʼuchajij ri e sukʼ taq upatanelabʼ. Y ri nim chi ujunabʼ kunaʼo che sibʼalaj kajawaxik y kkikotik are chiʼ kutzijoj ri tobʼanik yaʼom che rumal ri Jehová. Are chiʼ krijobʼ jun winaq kkʼis ri uchuqʼabʼ y ri ujeʼlikal. Are kʼu ri más nim ubʼanik chuwach ri Jehová are ri kisukʼilal ri upatanelabʼ (1 Tes. 1:2, 3). ¿Jasche? Rumal che pa kʼi junabʼ kiyaʼom bʼe rech kkʼam kibʼe rumal. We kqetaʼmaj más kiwach ri e loqʼalaj taq qachalal nim chi kijunabʼ y we kqetaʼmaj más jastaq chrij ri kikʼutbʼal, sibʼalaj nim keqil wi. Are kʼu, rech kkowir ri kikojonik ri e qachalal xaq xiw ta rajawaxik che ri alabʼom alitomabʼ nim kekil wi ri nim chi kijunabʼ, xaneʼ xuqujeʼ ri nim chi kijunabʼ rajawaxik nim kekil wi ri kʼa e majaʼ na. w21.09 7 párrs. 15-18

Rajawaxik maqaqʼat tzij pa kiwiʼ ri e nikʼaj chik, chqakojoʼ qachuqʼabʼ rech kqatoqʼobʼisaj kiwach junam rukʼ ri kubʼan ri qaDios che «xel ukʼuʼx chqe» (Ef. 2:4). Ri toqʼobʼisabʼal wachaj are ta jun jastaq che xaq xiw kqanaʼo; xaneʼ kojutaq che ubʼanik nikʼaj chi jastaq chke ri e nikʼaj chik. Rumal laʼ, kojkunik kojchoman chrij ri kqabʼan che kitoʼik ri qafamilia, ri e qachalal y ri e winaq che kqatzijoj ri utzij ri Dios chke. Qas kʼi ri kojkunik kqabʼan che utoqʼobʼisaxik kiwach. ¿La kʼo jun qetaʼm che kajwataj kubʼsal ukʼuʼx? Weneʼ kojkunik kqakʼam bʼi jun jastaq rech kutijo o jun chi kqabʼan che utoʼik. ¿La kʼo jun pa ri congregación che kʼa majaʼ naj xux chi jumul testigo rech Jehová che kajwataj kubʼsal ukʼuʼx o jun rachiʼl? ¿La kojkunik kqatzijoj ri utz taq jastaq kʼo pa ri Biblia che jun chi winaq? (Job 29:12, 13; Rom. 10:14, 15; Sant. 1:27). We qas kqilo jas ri kkʼulmataj chqanaqaj, kojkunik kqatoqʼobʼisaj kiwach e kʼi chke ri winaq. We kqakʼut wajun bʼantajik riʼ, kqakikotisaj ri qaTat kʼo pa ri kaj, ri Dios che «sibʼalaj xel ukʼuʼx chqe». w21.10 13 párrs. 20-22

Pa Salmo 23, ri David xuya ubʼixik jujun taq jastaq che sibʼalaj nim ubʼanik: are ri Jehová tajin ktewchinik rumal che are ri rAjyuqʼ. Are ri Jehová kkʼamow ubʼe «pa sukʼalaj taq bʼe» y ni ta jumul kwonobʼax kan rumal pa ri utz y pa ri kʼax taq jastaq kuqʼaxej. Ri David kuchʼobʼo che paneʼ yaʼom ri ukʼaslemal pa «rax taq echaʼ», kraj kubʼij jun utz kʼaslemal, are kʼu kʼo jujun taq kʼax kuqʼaxej. Weneʼ jujun taq mul xunaʼo che jetaneʼ kʼo pa jun «siwan ri sibʼalaj qʼequʼm» o che kʼo ta jun ktoʼw chuwach ri kʼax, y che e kʼo ukʼulel. Are kʼu rumal che are ri Jehová ri rAjyuqʼ, ri David xubʼij: «Man kinxeʼj ta wi wibʼ». ¿Jasche ri David xubʼij che amaqʼel kuriq «ronojel uwach utzil»? Rumal che pa ri ukojonik kʼo ronojel ri kajwataj che. Ri areʼ xkikot taj xa rumal ri jastaq kʼo rukʼ. Xaneʼ are xkikot rukʼ ri jastaq che xyaʼ che rumal ri Jehová. Ri más nim ubʼanik chuwach ri David are che kuriq ri utewchibʼal ri Jehová y che kchajix rumal. Ri utzij ri David kukʼut chqawach che rajawaxik kkʼojiʼ jun utz qachomanik chrij ri jastaq qech. w22.01 3, 4 párrs. 5-7

Pa kʼi taq junabʼ e kʼi upatanelabʼ ri Dios kitzijom ri utzij ri Dios chke e kʼi winaq che kkaj taj kkitatabʼej. Jun kʼutbʼal re, ri Noé xux «tzijol re ri sukʼil» weneʼ pa kʼi taq junabʼ (2 Ped. 2:5). Qastzij riʼ che ri Noé xraj che ri winaq kkitatabʼej ri kutzijoj, are kʼu ri Jehová xubʼij taj che kkʼulmataj wariʼ. Xaneʼ are chiʼ xubʼij che ri Noé jas kubʼan che ubʼanik ri nimalaj jukubʼ, xubʼij che: «Keʼok na ri e akʼojol pa ri jukubʼ, ri awixoqil, ri e awalibʼ xuqujeʼ ri at» (Gén. 6:18). Y, rumal ri unimal ri jukubʼ weneʼ ri Noé xuchʼobʼo che e kʼi ta winaq kkitatabʼej ri utzij ri Dios (Gén. 6:15). Y je xkʼulmatajik. Kʼo ta jun winaq pa ri uqʼij che xutatabʼej ri utzij ri Dios (Gén. 7:7). ¿La xuchomaj ri Jehová che ri Noé utz ta xubʼan che ri uchak? Xuchomaj taj. Chuwach ri Jehová utz xel ri uchak ri Noé rumal che xubʼan ronojel ri xbʼix che (Gén. 6:22). w21.10 26 párrs. 10, 11

¿Jas xunaʼ riʼ ri Rut are chiʼ xuta ri xubʼij ri Noemí? Chqachomajampeʼ, ukojom ronojel uchuqʼabʼ che utoʼik ri Noemí: oqʼinaq rukʼ, ukubʼsam ukʼuʼx y kʼi taq qʼij bʼinaq rukʼ. Tekʼuriʼ are waʼ ri e tzij tajin kubʼij ri Noemí chke ri uvecinas: «E tolon [ri nuqʼabʼ] rumal rech chi are waʼ ri urayinik ri Ajawaxel». Paneʼ ri Rut terenik rech kuya tobʼanik che ri Noemí, jetaneʼ ktataj pa ri utzij ri Noemí che nim ta kril wi ri tobʼanik yaʼom che rumal ri Rut. Qastzij wi riʼ che ri Rut kʼax xunaʼo are chiʼ xuta ri xubʼij ri Noemí. Are kʼu xuwonobʼaʼ ta kanoq (Rut 1:3-18). Weneʼ jun qachalal ixoq che uriqom kʼax kubʼij tzij che kubʼan kʼax chqe, paneʼ sibʼalaj qakojom qachuqʼabʼ che utoʼik. Are kʼu kqachomaj taj che xa royowal chqe. Kqaya ta kan utukel y kqataʼ che ri Jehová rech kojutoʼ che uriqik ri kqabʼan che ukubʼsaxik ukʼuʼx (Prov. 17:17). Weneʼ kqilo che jun qachalal ixoq kajwataj tobʼanik che, are kʼu kraj taj ktoʼik. Ri nim loqʼoqʼebʼal qakʼuʼx kojutoʼo rech kqaya ta kan utukel (Gál. 6:2). w21.11 11 párrs. 17-19

Pa ri Biblia, ri e tzij tastalik y tastalikil kchʼaw chrij jun winaq che chʼajchʼoj pa ri ukʼaslemal y pa ri ukojonik. Waʼ taq tzij riʼ xuqujeʼ kukʼutu che jun winaq o jun jastaq tasom che upatanexik ri Dios. Pa nikʼaj chi tzij, wariʼ kraj kubʼij che kojux tastalik taq winaq we oj chʼajchʼoj pa qakʼaslemal, we kqaya uqʼij ri Jehová junam rukʼ ri kraj areʼ y we kʼo jun utz qachilanik rukʼ. Sibʼalaj nim ubʼanik are chiʼ kojchoman chrij, che paneʼ xa oj ajmakibʼ kojkunik kojux rachiʼl ri Jehová, paneʼ sibʼalaj tastalik. Ri Jehová sibʼalaj chʼajchʼoj pa ronojel ri ubʼantajik. Are waʼ ri xkibʼij jujun ángeles che kbʼix serafines chke, ri e kʼo chunaqaj ri tem re uQʼatbʼal tzij ri Jehová. Xkibʼij: «Tastalik, tastalik, tastal ri Ajawaxel ri kʼo ronojel ukuʼinem» (Is. 6:3). Qastzij che rech kʼo jun utz kachilanik rukʼ ri Dios, e areʼ rajawaxik keʼux tastalik y qetaʼm che qastzij wi e tastal e areʼ. w21.12 3 párrs. 4, 5

Wariʼ nim ubʼanik chke ri alabʼom alitomabʼ. Weneʼ pa ri tijobʼal o jun kifamilia che Testigo taj kubʼij chke che kebʼe pa nimaʼq taq tijobʼal rech kkʼojiʼ jun utzalaj kicarrera y rukʼ wariʼ kʼo kirajil. Wariʼ kukʼam bʼi nim tiempo chkiwach. Are kʼu ri kitat kinan y ri e qachalal re ri congregación kkibʼij chke che kkijach ri kikʼaslemal che ri Jehová y kkipatanij. ¿Jas ktoʼw ri ala ri ali che kuloqʼoqʼej ri Jehová rech utz kubʼan che uchaʼik ri kraj kubʼano? Kkunik kusikʼij uwach ri kubʼij Efesios 5:15-17. Are chiʼ chomanaq chi chrij ri xusikʼij, kkunik kutaʼ wariʼ chbʼil ribʼ: «¿Jas riʼ ‹ri urayibʼal ri Ajawaxel› chwe in? ¿La kqaj chuwach ri kinchaʼ ubʼanik? Y, ri kinchaʼ ubʼanik ¿la kinutoʼ rech utz kinbʼan che ukojik ri tiempo?». Chnaʼtaj chqe che «itzel taq qʼij uj kʼolik» y ri jastaq che e kʼo pa uqʼabʼ ri Itzel xa jubʼiqʼ chi kraj ksachisax uwach. w22.01 27 párr. 5

¿Jas tiempo ri Santiago xux jun utzalaj utijoxel ri Jesús? Are chiʼ kʼastajinaq chi ri Jesús, «xukʼut ribʼ chuwach ri Santiago, xuqujeʼ xukʼut ribʼ chkiwach konojel ri taqomxenlabʼ» (1 Cor. 15:7). Ri xkʼulmatajik, xukʼex kan ri ukʼaslemal ri Santiago. Kʼo kukʼ ri apóstoles are chiʼ xkimulij kibʼ pa uwiʼ jun ja pa Jerusalén rech kqaj lo ri uxlabʼixel pa kiwiʼ (Hech. 1:13, 14). Are chiʼ xqʼax ri tiempo, ri Santiago xuqujeʼ xux jun chke ri xekʼojiʼ pa ri Jupuq Ajkʼamal bʼe cho ronojel uwach Ulew re ri nabʼe siglo (Hech. 15:6, 13-22; Gál. 2:9). Y, chuwach kan ri junabʼ 62, xutzʼibʼaj jun carta chke ri cristianos e chaʼom kebʼe pa ri kaj. Ri carta xutzʼibʼaj kuya utzilal chqe qonojel kimik, paneʼ jalan ri qeyebʼal we pa ri kaj o cho ri uwach Ulew (Sant. 1:1). Jun historiador re ri nabʼe siglo, Josefo ubʼiʼ, kubʼij che xtaq ukamisaxik ri Santiago rumal ri kinimal kojol tabʼal toqʼobʼ judío Anán. Ri Santiago xuya ta kan upatanixik ri Jehová kʼa pa ri ukamikal. w22.01 8 párr. 3; 9 párr. 5

Ri kqetaʼmaj pa ri texto re kimik. Rajawaxik kqachʼobʼo che ri Jehová ronojel tiempo taj kojuchajij chuwach ri kʼax. Junam rukʼ ri Jesús rajawaxik kqakʼutu che kqaya ta kan ri Jehová paneʼ kojkamisaxik (Mat. 16:24, 25). Are kʼu qetaʼm che ri Dios kuya taj che kqariq jun kʼax che mat ne kqachʼijo (1 Cor. 10:13). Jun chi jastaq kqetaʼmaj are che junam rukʼ ri Jesús, weneʼ kbʼan jun kʼax chqe are kʼu kʼo ta qamak (1 Ped. 2:19, 20). Ri e winaq itzel kojkilo xa rumal che kqabʼan ri kraj ri Dios y kqatzijoj ri utzij (Juan 17:14; 1 Ped. 4:15, 16). Ri Jesús xuchʼobʼo jasche ri Jehová xuya bʼe che kuriq kʼax. Are kʼu kʼo jujun upatanelabʼ ri Jehová je ta xkibʼano, rumal che xkitaʼ jasche xkiriq kʼax (Hab. 1:3). Rumal che ri Jehová kutoqʼobʼisaj wachaj y nim ukochʼonik, xuchʼobʼo che xa ta rumal che kʼo ta kikojonik xaneʼ xkaj xkubʼsax kikʼuʼx rumal (2 Cor. 1:3, 4). w21.04 11 párrs. 9, 10

Ri Jehová kukʼam ri qʼijilanik che tajin kqaya che we rukʼ ronojel qanimaʼ kqabʼano y nim kqil wi. Rumal che kqaloqʼoqʼej ri Jehová y qetaʼm che qas taqal che kqaqʼijilaj, kqaj che utz uqʼijilaxik kqabʼano. Kqaya uqʼij ri Jehová are chiʼ kqabʼan qachʼawem. Ri uTzij ri Dios kujunamaj ri chʼawem rukʼ ri kʼokʼalaj incienso che kbʼanik y che kkoj pa ri tabernáculo, y are chiʼ xqʼax ri tiempo, pa ri templo xkoj wi. Ri incienso sibʼalaj utz kunaʼ ri Dios. Junam rukʼ wariʼ, we rukʼ ronojel qanimaʼ kqabʼan qachʼawem che, «rukʼ kikotemal» kojutatabʼej paneʼ kʼi ta tzij kqabʼij (Prov. 15:8; Deut. 33:10). Ri Jehová kraj che rukʼ loqʼoqʼebʼal y maltyoxinik kojtzijon rukʼ. Y ri areʼ kraj che kqabʼij che ri kqarayij, ri kqabʼisoj y ri kqeyeʼj. Rumal laʼ, are chiʼ kabʼan achʼawem chatchoman na chrij ri kabʼij che ri Jehová, jeriʼ kaya che ri qaTat kʼo pa ri kaj jun «kʼokʼalaj» incienso. w22.03 20 párr. 2; 21 párr. 7

Pa ri Armagedón pa qaqʼabʼ ta oj kʼo wi uchaʼik jachin kuriq ri kʼaslemal kʼo ta ukʼisik y jachin kuriq taj (Mat. 25:34, 41, 46). ¿La kqakubʼsaj qakʼuʼx riʼ chrij ri Jehová rumal che utz ta kqil ri xuchaʼ ubʼanik? Rajawaxik che kimik kqakubʼsaj qakʼuʼx chrij ri Jehová rech je kqabʼan waʼ pa ri petinaq. Chojchomanampeʼ chrij ri kqanaʼo are chiʼ oj kʼo chi pa ri kʼakʼ uwach Ulew. Chilaʼ kʼo ta chi ri kojonem che kukʼut ta ri qastzij xuqujeʼ ri e jastaq che e kʼo kimik pa wajun uwach Ulew y ri e qʼatal taq tzij che xa kkibʼan kʼax chke ri e winaq. Knaʼtaj ta chi chqe che kojyawajik, kojrijobʼik y kojkamik. Mil junabʼ kʼo ta chi kekunik kkibʼan ri Satanás xuqujeʼ ri e demonios. Ronojel ri kʼax ri ubʼanom ri Itzel y ri demonios ksach na uwach (Apoc. 20:2, 3). ¡Sibʼalaj kojkikot riʼ che retaʼmaxik che xqakubʼsaj qakʼuʼx chrij ri Jehová! w22.02 6, 7 párrs. 16, 17

Ri Jesús xukoj uchuqʼabʼ rech xkʼojiʼ jamaril chkixoʼl ri e nikʼaj chik y xuya pixabʼ chke ri e nikʼaj chik rech kkisukʼumaj ri kʼax kʼo chkixoʼl. Xubʼij chke ri rajawaxik kkibʼano rech keʼutzir kukʼ ri kachalal we kkaj che keqaj chuwach ri Dios (Mat. 5:23, 24). Y amaqʼel xubʼij chke ri apóstoles che kemachʼachʼik y kkichomaj taj jachin más nim ubʼanik (Luc. 9:46-48; 22:24-27). Rech kʼo jamaril xaq xiw ta kqabʼan ta chʼoj, rajawaxik oj kojtow sachbʼal mak paneʼ oj taj xojbʼanow ri kʼax y kqabʼij chke ri e nikʼaj chik che je kkibʼano we kʼo chʼoj chkixoʼl (Filip. 4:2, 3; Sant. 3:17, 18). Kojkunik kojchoman chrij wariʼ: «¿Jas kwaj kinya kanoq rech kkʼojiʼ jamaril chqaxoʼl kukʼ ri e nikʼaj chik? ¿La kinkʼol oyowal pa wanimaʼ we jun qachalal kubʼan kʼax chwe? ¿La kweyeʼj na che are ri jun chi winaq kutaʼ sachbʼal mak chwe rech ksukʼumataj ri jastaq? ¿O in kintaʼ sachbʼal numak paneʼ in taj xinbʼanow ri kʼax?». w22.03 10 párrs. 10, 11

Ojer kanoq, ri Biblia xuya kan ubʼixik che ri utinamit ri Jehová rukʼ rutzil kanimaʼ kkiya kitobʼanik rech kkesaj uwach ri uKʼojol (Sal. 110:3). Kimik riʼ, tajin ktzʼaqatisax wajun profecía. Ronojel taq junabʼ rukʼ rutzil kanimaʼ ri upatanelabʼ ri Dios kʼi taq horas kiyaʼom che utzijoxik ri utzij ri Dios y kʼo ta rajil kkitaʼ che wajun chak riʼ. Xuqujeʼ kkiya ri kitiempo rech kekitoʼ ri e qachalal pa ri kikojonik y pa nikʼaj chi jastaq che kajwataj chke. Ri kʼamal taq bʼe y ri siervos ministeriales kkikoj kʼi horas che utijoxik kibʼ rech kkiya chʼabʼal, y kekisolij ri qachalal rech kkiya kichuqʼabʼ. Ri loqʼoqʼebʼal che kkinaʼ che ri Jehová y ri kajil kitzʼaqat kubʼano che kkibʼan wariʼ (Mat. 22:37-39). Ri Jesús are más xrilij ri kajwataj chke ri e nikʼaj chik chuwach ri rech areʼ. Y ri oj cristianos kqakoj qachuqʼabʼ rech kqesaj uwach rech kqariq kʼi utzilal (Rom. 15:1-3). w22.02 20 párrs. 1, 2

Kʼi chke ri israelitas kechakun chrij ubʼanik tikoʼn y ri ajchakibʼ ketojik are chiʼ kkʼis ri qʼij. We ktoj ta ri ajchak pa ri qʼij riʼ, kʼo ta riʼ ri urajil rech kuya ri kajwataj chke ri ufamilia pa ri qʼij riʼ. Ri Jehová xubʼij: «Rumal chi mebʼaʼ kajwataj kʼu ri pwaq che uloqʼik ri kutijo» (Deut. 24:14, 15; Mat. 20:8). Kimik, kʼi chke ri winaq ketoj taj ronojel taq qʼij, xaneʼ kamul pa jun ikʼ o jumul. Paneʼ je wariʼ, nim na ubʼanik ri pixabʼ che kʼo pa Levítico 19:13. E kʼi winaq che e kʼo kajchakibʼ nim ta kekitoj ri kechakun kukʼ. Rumal che ketaʼm che waʼ taq ajchakibʼ riʼ kajwataj ri chak chke paneʼ nim ta ketoj wi. Ri e winaq jewaʼ kibʼanik che e kʼo kajchakibʼ jetaneʼ tajin kkanaj kan «jun aqʼabʼ [k]ukʼ ri tojbʼal re ri [k]ajchak». We jun cristiano e kʼo rajchakibʼ, rajawaxik qas kchoman chrij wariʼ. w21.12 10 párrs. 9, 10

¿Jasche xubʼij ri Jesús che kchaqij uchiʼ? Rumal che sibʼalaj nim ri qʼoxom tajin kunaʼo, qas qʼalaj che rajawaxik tobʼanik che, rumal laʼ xubʼij che kchaqij uchiʼ. Are chiʼ Jesús xubʼij ri xunaʼo xa ta rumal che xuchomaj che kʼo ta uchuqʼabʼ chuwach ri kʼax, rumal laʼ rajawaxik kojchoman junam rukʼ ri Jesús. Weneʼ kqachomaj che utz taj we kqabʼij chke nikʼaj chik ri kajwataj chqe, are kʼu we kajwataj tobʼanik chqe chqataʼ chke ri qachalal. Jun kʼutbʼal, weneʼ oj yawabʼ, nim chi qajunabʼ y kajwataj tobʼanik chqe che uloqʼik nikʼaj jastaq qe o chiʼ kojbʼe rukʼ ri kunanel chqataʼ tobʼanik che jun utz qachiʼl. We kojbʼisonik weneʼ utz kojchʼaw rukʼ jun kʼamal bʼe re ri congregación o jun qachalal che ko pa ri ukojonik rech kukubʼsaj qakʼuʼx (Prov. 12:25). Chnaʼtaj chqe che ri e qachalal kojkaj y kkaj kojkitoʼ «pa taq kʼu ri qʼijol re riqoj kʼax» (Prov. 17:17). Are kʼu kkil ta ri kʼo pa qanimaʼ, rumal laʼ rajawaxik kqataʼ ri tobʼanik chke. w21.04 11, 12 párrs. 11, 12

Kʼi chqe, kqariq kʼax are chiʼ kkʼextaj jujun jastaq pa ri qakʼaslemal. E kʼo jujun che nim tiempo chi e kʼo pa jun eqelen, xaq kʼateʼ kbʼix chke che kkʼextaj ri keqelen. E nikʼaj chik kiyaʼom kan ri keqelen weneʼ rumal che nim chi ri kijunabʼ. Kojbʼisonik are chiʼ kqakʼulmaj wariʼ. Ri kojtoʼwik rech kojbʼison taj are chiʼ kʼo kkʼextaj pa ri qakʼaslemal, are che kqil ri jastaq junam rukʼ ri kubʼan ri Jehová che rilik. Ri areʼ tajin kubʼan jastaq kimik che nim ubʼanik, y yaʼom ri nimalaj eqeleʼn chqe oj che kojtobʼan rukʼ (1 Cor. 3:9). Ri uloqʼoqʼebʼal ri Jehová chqe kkʼextaj taj. Rumal laʼ we at jun chke ri xkʼex ri keqelen rumal che kʼo xkʼextaj pa ri utinamit ri Jehová, xaq ta are katchoman chrij jasche xkʼexik. Xaq ta are katchoman chrij ri «qʼijol ri okʼowinaq», xaneʼ chataʼ tobʼanik che ri Dios rech utz katchoman chrij ri xkʼextajik (Ecl. 7:10). Rajawaxik kqakoj utz chomanik rech kojkikot rukʼ ri kchaʼ ubʼanik y kqaya ta kan ri Jehová paneʼ kʼo kkʼextaj pa ri qakʼaslemal. w22.03 17 párrs. 11, 12

¿Jachin chke kukʼut wi ri nim loqʼoqʼebʼal ukʼuʼx ri Jehová? Ri Biblia kukʼutu che kojkunik keqaloqʼoqʼej kʼi jastaq, junam rukʼ «ri kʼajisabʼal wachaj», «ri etaʼmanik», ri vino y ri aceite, y ri «noʼj», wariʼ xaq e jujun kʼutbʼal (Prov. 12:1; 21:17; 29:3). Are kʼu ri nim loqʼoqʼebʼal kʼuʼx kʼo ta jumul kkʼut chke xaq e jastaq; xaq xiw kbʼan ukʼutik chke ri winaq. ¿La kraj kubʼij wariʼ che ri Jehová kukʼut ri nim loqʼoqʼebʼal ukʼuʼx che apachike winaq? Je taj, xaq xiw kukʼut ri nim loqʼoqʼebʼal ukʼuʼx chke ri kʼo jun utz kachilanik rukʼ. Ri qaDios kuya ta kan kiloqʼoqʼexik ri rachiʼl. Kʼo jeʼlikalaj taq jastaq kraj kuya chke y keʼuwonobʼaʼ ta kanoq. Ri Jehová ukʼutum ri uloqʼoqʼebʼal chke konojel ri winaq. Ri Jesús xubʼij wariʼ che jun achi, Nicodemo ubʼiʼ: «Chiʼ kqil wi chi ri Dios sibʼalaj keʼuloqʼoqʼej ri winaq cho ri uwach Ulew [kraj kubʼij, konojel ri winaq], xuya kʼut ri uKʼojol, ri xa jun kʼolik, rech konojel ri kekojon che, man ksach ta kiwach, xaneʼ kkʼojiʼ na junalik kikʼaslemal» (Juan 3:1, 16; Mat. 5:44, 45). w21.11 2 párr. 3; 3 párrs. 6, 7

Ri kʼaslemal pa wajun uwach Ulew riʼ sibʼalaj kʼax y weneʼ pa ri petinaq kqariq na más kʼaxkʼolil (Mat. 24:21). ¿La mat qastzij che kqaj kopan ri qʼij che knaʼtaj ta chi wariʼ chqe? Kʼo ta chi jumul kenaʼtaxik rumal che ksach na kiwach (Is. 65:16, 17). Rumal laʼ rajawaxik kqabʼan ko che ri qakojonik rech kqachʼij apachike uwach kʼax. ¿Jasche rajawaxik? Ri Jesús xubʼij: «We ko kixtakʼiʼk, kixkolotaj na» (Luc. 21:19). Ri kojtoʼwik rech kqachʼij ri kʼax are resaxik uwach ri kkibʼan e nikʼaj chik rech kkichʼij kʼi taq kʼax junam rukʼ ri tajin kqaqʼaxej oj. ¿Jachin ri más utz kqesaj uwach rech kqachʼij ri kʼax? Are ri Jehová. Weneʼ kqamayo, are kʼu chojchoman chrij wariʼ. Pa wajun uwach Ulew amaqʼel kʼo sibʼalaj kʼax, rumal che pa uqʼabʼ ri Itzel kʼo wi. Ri Jehová kkunik wet kraj kukʼisilaʼ tzij pa uwiʼ ri itzelal, are kʼu kʼa reyem na ri qʼij are chiʼ kubʼano (Rom. 9:22). Rech kopan riʼ ri qʼij, kʼa uchʼijom na ri kʼax. w21.07 8 párrs. 2-4