Octubre

Ronojel ri kqabʼano y ri kqakʼutu pa ri uTzij ri Dios kqesaj wi. Paneʼ je wariʼ e kʼi winaq kkaj taj kkita ri kqakʼutu rumal che kkibʼij che nim ta ubʼanik o rumal che junam ta rukʼ ri kkichomaj e areʼ. ¿Jas kattoʼwik rech kqaj ta uchuqʼabʼ ri akojonik? Ri apóstol Pablo xubʼij wariʼ chke ri cristianos re Roma: «Rajawaxik chi jun winaq nabʼe kutatabʼej na jun tzij rech kkojonik. Ri tzij ri kutatabʼej, are ri utzij ri Cristo» (Rom. 10:17). Paneʼ sibʼalaj utz keʼilitaj ri nimaqʼij kkibʼan ri winaq are ta kkowirisan ri kojonik, xaneʼ are ri unikʼoxik ri uTzij ri Dios. Rajawaxik che ko ri akojonik y kachʼobʼ ri qas kubʼij ri Biblia, rumal che «jun [winaq] man kuyaʼ taj kqaj chuwach ri Dios» we kʼo ta ukojonik (Heb. 11:1, 6). Rumal laʼ, rech jun winaq qas kuchʼobʼo che uriqom ri qastzij chrij ri Dios rajawaxik taj kbʼan jun milagro chuwach. Unikʼoxik ri Biblia are ri ktobʼanik rech kkowir ri ukojonik jun winaq chrij ri Dios y rech kubʼan ta kebʼ ukʼuʼx. w21.05 4, 5 párrs. 11, 12

Ri apóstol Pablo xuriq kʼi kʼax, are chiʼ xchʼayik, xbʼukʼ che abʼaj y xtzʼapix pa cárcel (2 Cor. 11:23-25). Rumal laʼ jujun taq mul xubʼij che sibʼalaj kbʼisonik (Rom. 7:18, 19, 24). Xuqujeʼ, rukʼ chuqʼabʼ xutaʼ che ri Dios rech ktoʼ chuwach ri kʼax tajin kuriqo che kjunamataj rukʼ «kʼix» che kʼo pa ri ucuerpo (2 Cor. 12:7, 8). Ri Jehová xuya uchuqʼabʼ ri Pablo rech xuchʼij ri kʼax. Chojchoman chrij ri xubʼano are chiʼ tzʼapim pa Roma, rukʼ kikotemal xutzijoj ri utzij ri Dios chkiwach ri kʼamal bʼe judíos y weneʼ chke e jujun winaq che nim kibʼanik pa ri qʼatbʼal tzij (Hech. 28:17; Filip. 4:21, 22). Xuqujeʼ xutzijoj chke ri chajinelabʼ y ri winaq che xeʼopan che uchʼabʼexik (Hech. 28:30, 31; Filip. 1:13). Pa ri tiempo riʼ ri Dios xukoj ri Pablo rech xutzʼibʼaj jujun cartas che xuya utzilal pa ri kikʼaslemal ri cristianos ojer y uyaʼom utzilal chke ri cristianos kimik. w21.05 21 párrs. 4, 5

Ri qʼatal tzij Uzías re Judá, rumal che xubʼan nim che ribʼ xraj taj xutatabʼej ri xbʼix che y xubʼan ri taqal ta che kubʼano. Are jun achi che kʼo kʼi jastaq kkunik kubʼano. Rumal laʼ, xukʼam kibʼe e kʼi ajchʼojabʼ, xuyak nimaʼq taq ja y xeʼutoʼ kʼi winaq rech xkibʼan nimaʼq taq tikoʼn. «Joropaʼ kʼu qʼij ri xniman che ri Ajawaxel, ri Areʼ xupoqʼkolij» o xubʼano che utz xel ronojel chuwach (2 Crón. 26:3-7, 10). Are kʼu ri Biblia kubʼij che, «are taq kʼu ko tikil chik pa ri ajawinik, xuchaplej ubʼanik nimal, are kʼu xtzaqisan waʼ». Ri Jehová ubʼim che xaq xiw ri e kojol tabʼal toqʼobʼ yaʼtal chke kkikoj incienso pa ri rachoch. Are kʼu, ri Uzías xubʼan wariʼ rumal che xubʼan nim che ribʼ, rumal laʼ ri Jehová xukʼajisaj uwach rukʼ chuʼalaj chʼaʼk (2 Crón. 26:16-21). ¿La kkʼulmataj wariʼ qukʼ oj we kqabʼan nim che qibʼ junam rukʼ ri xubʼan ri Uzías? Kkʼulmatajik we xaq xiw kojchoman chqij chbʼil qibʼ. Masach chqe che ronojel ri kojkun che ubʼanik y ri eqeleʼn yaʼom chqe pa ri congregación are ri Dios yaʼowinaq (1 Cor. 4:7). We kqabʼan nim che qibʼ, kojukoj ta riʼ ri Jehová. w21.06 16 párrs. 7, 8

Ri Jesús retaʼm che ri utijoxelabʼ amaqʼel taj kekun che ubʼanik mayibʼal taq jastaq are chiʼ kkitzijoj ri utzij ri Dios. Xuqujeʼ oj, qetaʼm taj jampaʼ chke riʼ ri e winaq che xkitaʼ ri xkibʼij ri utijoxelabʼ ri Jesús xeʼux cristianos. Xajwatajik che ri tijoxelabʼ xekikotik, are kʼu xa ta rumal che xtatabʼex ri xkitzijoj xaneʼ rumal che ri Jehová kkikotik rumal ri chuqʼabʼ xkikoj che ubʼanik ri kichak. We kqaya ta kan utzijoxik ri utzij ri Dios, kqariq ri kʼaslemal kʼo ta ukʼisik. Are chiʼ kqakoj qachuqʼabʼ che utikik ri ijaʼ re ri qastzij pa kanimaʼ ri e winaq, xuqujeʼ tajin kqatik «ri kraj ri uxlabʼixel», rumal che tajin kqaya bʼe che ri uxlabʼixel kchakun pa qakʼaslemal. «We man kujtuqarik», ri Jehová kutzujuj jun kʼaslemal kʼo ta ukʼisik chqe, paneʼ kojkun ta che utoʼik jun winaq rech kubʼan uqasanjaʼ (Gál. 6:7-9). w21.10 26 párrs. 8, 9

Jumul, ri Jesús y ri utijoxelabʼ sibʼalaj e kosinaq rumal che jun qʼij kitzijom chi ri utzij ri Dios, rumal laʼ xkitzukuj jawiʼ xeʼuxlan wi. Are kʼu e eyeʼtal chi kumal e kʼi winaq. Rumal che xel ukʼuʼx ri Jesús chke «xuchaplej kitijoxik [rukʼ] kʼi jastaq». Jesús xchoman chrij ri xkinaʼo y qas xraj xeʼutoʼo. Retaʼm che tajin kkiriq kʼax y rajawaxik kkubʼsax kikʼuʼx. Kimik xuqujeʼ e kʼo kʼi winaq kajwataj kubʼsal kʼuʼx chke, paneʼ kqilo che kekikotik. Kejunamataj kukʼ chij che e wonobʼam kanoq y kʼo ta jun kajyuqʼ kkʼamow kibʼe. Ri apóstol Pablo xubʼij che kʼo ta ri Dios kukʼ xuqujeʼ kʼo ta kubʼsal kikʼuʼx (Efes. 2:12). Are chiʼ kojchoman chkij ri winaq che kʼo ta jun kubʼsal kʼuʼx kukʼ, kqatoqʼobʼisaj kiwach, keqaloqʼoqʼej y kqaj keqatoʼo. Y ri más utz kqabʼano are che kqatzujuj jun etaʼmanik re ri Biblia chke. w21.07 5 párr. 8

Jun winaq che xaq xiw kchoman chbʼil ribʼ, kubʼan nim che ribʼ y kraj che xaq xiw areʼ kuriq utzilal. Jun winaq che itzel kril jun chik che kuriq utzilal, xaq xiw ta kurayij uwach ri ujastaq xaneʼ kraj mat kʼo rukʼ. Rumal laʼ, we itzel kqil jun chi winaq rumal che kuriq utzilal tajin kqetzelaj uwach riʼ. Ri winaq che xaq xiw kchoman chbʼil ribʼ xuqujeʼ itzel kril jun chik che kuriq utzilal, e kʼo bʼantajik rukʼ che kejunamataj rukʼ alaj taq chikop che keʼok che uquchik jun jeʼlikalaj ja che bʼanom rukʼ cheʼ, nojimal chi nojimal kkikʼiso y kyojyobʼ ri ja. Are je kukʼulmaj jun winaq che kʼo chi tiempo tajin kupatanij ri Jehová; kuriq kʼax riʼ we xaq xiw kchoman chbʼil ribʼ xuqujeʼ itzel keril ri kkiriq utzilal (Prov. 16:18). Kuya kan upatanixik ri Jehová, kuriq kʼax pa ri ukʼaslemal y kubʼan kʼax chke e nikʼaj chik. Xaq xiw ta kojchoman chbʼil qibʼ we kqanimaj ri xubʼij ri apóstol Pablo: «Kʼo jas mibʼano ri xa ta che unimarisaxik iqʼij o rech kixux ta nimaʼq ibʼanik, xaneʼ chimachʼarisaj iwibʼ chichʼobʼoʼ chi ri nikʼaj chik are nimaʼq na kiqʼij chiwach ix» (Filip. 2:3). w21.07 15, 16 párrs. 6-8

Kʼo winaq kkichomaj che ri qastzij kojonem rajawaxik kuya urespuesta ronojel ri preguntas xuqujeʼ ri kʼo ta urespuesta pa ri Biblia. ¿La qas utz che jeʼ kchomax wariʼ? Chqilaʼ ri ukʼutbʼal ri apóstol Pablo. Qastzij che areʼ xubʼij chke ri cristianos: «Chitijtobʼej ronojel». Are kʼu, areʼ retaʼm che kʼo kʼi jastaq kuchʼobʼ taj (1 Tes. 5:21). Ri areʼ xubʼij che ri «e etaʼmanik [...] man e uxinaq taj tzʼaqat» y che «kimik jetaneʼ kujkaʼy pa jun ilbʼal ibʼ ri man qas ta qʼalaj» (1 Cor. 13:9, 12). Ri Pablo retaʼm ta ronojel, oj xuqujeʼ. Are kʼu, ri nim ubʼanik are che xretaʼmaj ri qas kajwataj pa ri ukojonik chrij ri Jehová y wariʼ xutoʼ rech qas kukojo che kʼo pa ri qastzij kojonem. ¿Jas rajawaxik kqabʼano rech qas kqakojo che oj kʼo pa ri qastzij kojonem? Jun ubʼanik, are che kqajunamisaj ri xubʼan ri Jesús che uyaʼik uqʼij ri Dios rukʼ ri kqabʼan oj ri testigos rech Jehová. w21.10 18, 19 párrs. 2-4

Qachalal nim chi kijunabʼ, we yaʼom jun eqeleʼn che alaq rech kbʼan alaq más che ri Jehová o yaʼom taj, kkun alaq kbʼan kʼi jastaq che kitoʼik e nikʼaj chik. ¿Jas kbʼan alaq che ubʼanik? Kkʼex ri chomanik alaq rech kukʼam wach alaq pa ri kʼakʼ eqeleʼn y kchoman alaq chrij ri kkun alaq che ubʼanik. Ri qʼatal tzij David xuqujeʼ xuchʼobʼo che kʼo jujun jastaq kkun ta chi che ubʼanik. Rukʼ ronojel ranimaʼ xraj xuyak jun ja ri kyaʼ wi uqʼij ri Jehová. Are kʼu are chiʼ ri Jehová xubʼij che are ri Salomón kyakow ri ja rumal che kʼa ala na, ri David utz xrilo, rumal laʼ xuya ri utobʼanik che ri chak (1 Crón. 17:4; 22:5). Kʼo ta jumul xuchomaj che taqal ta che ri Salomón kubʼan wajun chak riʼ rumal che kʼa ala na y kʼo ta nim retaʼmabʼal (1 Crón. 29:1). Ri David retaʼm che utz kelik rumal ri utobʼanik ri Jehová, xa ta rumal ri kijunabʼ y ri ketaʼmabʼal ri kebʼanow ri chak. Junam rukʼ ri David, ri qachalal nim chi kijunabʼ xuqujeʼ kkiya ri kitobʼanik pa ri congregación, paneʼ junam ta chi rukʼ ri xekunik xkibʼan ojer. Y ketaʼm che ri Jehová keʼutewchiʼj ri alabʼom ri kebʼanow ri chak che xkibʼan e areʼ ojer. w21.09 9 párr. 4; 10 párrs. 5, 8

Are chiʼ kojchoman chrij ri kqaj kqabʼan che upatanixik ri Jehová, kojutoʼo rech kʼo kikotemal pa ri qakʼaslemal. Are kʼu rajawaxik kojchoman chrij ri kojriqitaj wi, ri kojkun che ubʼanik rech kojkunik kqatzʼaqatisaj ri xqachomaj ubʼanik. We are kojchoman chrij ri kekunik kkibʼan ri nikʼaj chik kuqasaj qachuqʼabʼ riʼ y kojbʼisonik (Luc. 14:28). Chkijujunal ri cristianos kʼo jun kikʼolbʼal nim ubʼanik pa ri utinamit ri Jehová che kʼo jalajoj taq kibʼantajik ri e kʼo chupam. Ri Jehová xojukoj ta pa ri utinamit rumal che xrilo che más nim qabʼanik chkiwach ri nikʼaj chik, xaneʼ are xril ri kʼo pa qanimaʼ y che kqamachʼ qibʼ, y xrilo che kqaj kukʼam qabʼe pa ri qakʼaslemal. Qetaʼm che sibʼalaj kkikotik we kqabʼan ronojel ri kojkun che ubʼanik rech kqapatanij. Rumal che kqachʼij ri e kʼax y kqaj taj kqaya kan upatanixik, kqakʼutu che kʼo jun utzalaj «qanimaʼ» (Luc. 8:15). Rumal laʼ, chqayaʼ che ri Jehová ronojel ri utz taq jastaq kojkunik kqabʼano. We je kqabʼano, sibʼalaj kojkikot riʼ rumal ri kojkun oj kqabʼano y are ta kqajunamaj qibʼ kukʼ ri nikʼaj chik (Gál. 6:4). w21.07 24 párr. 15; 25 párr. 20

Jujun taq mul rajawaxik kkʼojiʼ qapaciencia chiʼ kkʼulmataj jun kʼax. Jun kʼutbʼal, are chiʼ ri e kʼamal bʼe kketaʼmaj che kʼo jun pa ri congregación xubʼan jun nimalaj mak, kkitaʼ «kinoʼj [che] ri Dios» rech junam kechoman rukʼ areʼ chrij ri xkʼulmatajik (Sant. 3:17). Ri kkaj, are che kkitoʼ ri ajmak rech kel «pa ri bʼe jawijeʼ ri sachinaq wi» (Sant. 5:19, 20). Xuqujeʼ kkikoj kichuqʼabʼ che kichajixik ri e qachalal y che ukubʼsaxik kikʼuʼx ri xkiriq kʼax (2 Cor. 1:3, 4). Y are chiʼ ri e kʼamal bʼe kkil ri rajawaxik kbʼan rukʼ ri ajmak, paneʼ kukʼam bʼi tiempo, qas kkinikʼoj na ronojel ri xkʼulmatajik. Tekʼuriʼ rajawaxik kkibʼan kichʼawem, kkikoj ri Biblia che uyaʼik pixabʼ che ri ajmak y kkikʼajisaj uwach «jas ri taqal» che (Jer. 30:11). Aninaq ta kkibʼan ri jastaq. Are chiʼ ri e kʼamal bʼe kkibʼan ri kubʼij ri Jehová, konojel ri e qachalal kkiriq utzilal. w21.08 11 párrs. 12, 13

Ri wuj re Rut kchʼaw chrij ri xukʼulmaj ri Noemí, ri Rut y jun achi, Boaz ubʼiʼ, che kuloqʼoqʼej ri Dios y che uqʼabʼ rachalaxik ri rachajil ri Noemí. Rumal che xopan jun qʼij che kʼo ta chi ktijow pa Israel, ri Noemí, ri rachajil y ri e kebʼ ral xebʼe pa Moab. Xkam ri rachajil chilaʼ. Ri e kebʼ ral xekʼuliʼk, are kʼu sibʼalaj bʼisobʼal rumal che xuqujeʼ xekam ri e areʼ (Rut 1:3-5). Ronojel ri xkʼulmatajik xubʼan che ri Noemí che xqaj pa jun nimalaj bʼis. Xubʼan chʼaqataʼq ri ranimaʼ, rumal laʼ xuchomaj che xa petinaq royowal ri Jehová chrij. Chqilampeʼ jas xubʼan che ubʼixik ri xuchomaj chrij ri Dios: «Ri Ajawaxel e utaqom kʼayilaj taq riqoj kʼax [...] ri kʼo ronojel ukuʼinem in unojisam che kʼayil». Xuqujeʼ xubʼij: «Ri Ajawaxel ri kʼo ronojel ukuʼinem in ukʼoqom xuqujeʼ in ukʼaxkʼobʼisam» (Rut 1:13, 20, 21). Ri Jehová qas kuchʼobʼo che «ri toqinik kukonorisaj ri ajnoʼj» o ri kʼax kusach uchomanik ri ajnoʼj (Ecl. 7:7). Xukoj ri Rut rech kukʼut nimalaj loqʼoqʼebʼal kʼuʼx che. Rukʼ utzilal y nimalaj loqʼoqʼebʼal, xutoʼ ri Noemí rech kbʼison ta chi más y kuriq ta kʼax ri ukojonik. w21.11 9 párr. 9; 10 párrs. 10, 13

We tajin kqakoj chi ronojel qachuqʼabʼ che upatanexik ri Jehová, ¿la kraj kubʼij che kʼo ta chi rajawaxik kqabʼano? Je taj. Rajawaxik che kqil ri kqabʼano rech kojux utz taq ajtijabʼ y utz kqabʼan che utzijoxik utzij ri Dios rech keqatoʼ ri nikʼaj chi qachalal. Kojkun che ubʼanik wariʼ we kqakoj utz chomanik, kqachʼobʼo che kʼo kojkun ta che ubʼanik y are kojchoman chrij kitoʼik ri nikʼaj chik (Prov. 11:2; Hech. 20:35). ¿Jas kqaj kqabʼano? Chqataʼ ri utobʼanik ri Jehová rech kqilo jas kojkunik kqabʼano (Prov. 16:3). Kojkun riʼ kojchoman chrij jujun taq jastaq, junam rukʼ ri precursorado auxiliar o regular, ri bʼenam pa Betel o che uwokik Ja rech Ajawbʼal. Xuqujeʼ kojkunik kqetaʼmaj jun chi chʼabʼal rech kqatzijoj ri utzij ri Dios chke kʼi winaq o kojbʼe pa jun chi tinamit ri rajawaxik wi más tobʼanik. w21.08 23 párrs. 14, 15

Ri Jehová sibʼalaj utz kunaʼ ukʼutik ri nim loqʼoqʼebʼal kʼuʼx (Os. 6:6). Ri qaDios xukoj ri qʼaxal tzij Miqueas che ubʼixik chqe che rajawaxik kqabʼan ri sukʼilal o kqakʼut nim loqʼoqʼebʼal kʼuʼx (Miq. 6:8). Rech kojkunik kqabʼan ri xubʼij, rajawaxik kqetaʼmaj jas riʼ ri nim loqʼoqʼebʼal kʼuʼx. Ri tzij nim loqʼoqʼebʼal kʼuʼx o «amor leal» kriqitaj weneʼ 230 mul pa La Biblia. Traducción del Nuevo Mundo. Y ¿jas riʼ ri nim loqʼoqʼebʼal kʼuʼx? Ri glosario re wajun Biblia riʼ kubʼij: «Kchʼaw chrij ri loqʼoqʼebʼal kunaʼ jun winaq rumal che kuchʼobʼo che rajawaxik kloqʼoqʼenik, rumal che kʼo ukojonik, rumal che kuchʼobʼo che kbʼan taj kuya kan ri winaq ri kuloqʼoqʼej y rumal che qas bʼenaq ranimaʼ rukʼ. Kʼi mul are qas kʼo ubʼanik rukʼ ri loqʼoqʼebʼal kunaʼ ri Dios chke ri winaq, are kʼu xuqujeʼ kchʼaw chrij ri uloqʼoqʼebʼal jun winaq che jun chi winaq». Ri Jehová are ri qas kʼutuwinaq wajun loqʼoqʼebʼal riʼ. Rumal bʼaʼ riʼ ri qʼatal tzij David xubʼij wariʼ rukʼ kikotemal: «Are kʼu ri loqʼoqʼebʼal kʼuʼx la, Ajawaxel, kopan kʼa chikaj [...]. ¡Sibʼalaj mayibʼal ri loqʼoqʼebʼal kʼuʼx la, nuDios! Ri winaq kkitzukuj uchʼuqik kibʼ chuxeʼ ri xikʼ la» (Sal. 36:5, 7). ¿E kʼu ri oj? ¿La sibʼalaj nim kqil wi ri nim loqʼoqʼebʼal ukʼuʼx ri Dios junam rukʼ ri xubʼan ri David? w21.11 2 párrs. 1, 2; 3 párr. 4

Ri Jehová kʼo jun ufamilia ri keqʼijilan che. Chkixoʼl wariʼ kʼo ri Jesús, ri «kʼo nabʼe chuwach ronojel ri bʼanom», xuqujeʼ e kʼo kʼi ángeles (Col. 1:15; Sal. 103:20). Are chiʼ ri Jesús xkʼojiʼ pa ri uwach Ulew, xukʼutu che ri e sukʼ taq winaq kekunik kkibʼij kiTat che ri Jehová. Jumul are chiʼ tajin ktzijon kukʼ ri utijoxelabʼ, xubʼij wariʼ chkiwach: «NuTat, xuqujeʼ iTat» (Juan 20:17). Xuqujeʼ, are chiʼ kqajach ri qakʼaslemal che ri Jehová y kqabʼan qaqasanjaʼ, kojkʼojiʼ pa jun nimalaj familia (Mar. 10:29, 30). Ri Jehová are jun Tat kloqʼoqʼenik. Rumal laʼ, ri Jesús kraj che kqil ri Jehová junam rukʼ jun Tat che kojkunik kqakubʼsaj qakʼuʼx chrij y che xaq xiw ta ktaqanik. Are chiʼ xukʼut chkiwach ri utijoxelabʼ jas kkibʼan che ubʼanik kichʼawem, xumaj rukʼ ri tzij riʼ: «QaTat». Xkun ta riʼ ri Jesús xubʼij che are kqakoj ri e tzij «ri kʼo ronojel ukuʼinem», «ri xbʼanow ronojel» o «ri Ajawinel chbʼe qʼij saq», rumal che are waʼ ri e ubʼantajik y tzʼibʼam kan pa ri Biblia (Gén. 49:25; Is. 40:28; 1 Tim. 1:17). Are kʼu, are xukoj ri tzij «Tat» rumal che wariʼ kʼo ubʼanik rukʼ ri kqanaʼo. w21.09 20 párrs. 1, 3

Ri qʼatal tzij Manasés xjunamataj rukʼ ri Acab, rumal che xuta ta ri xbʼix che rumal ri Jehová. Chukʼisbʼal «ri Ajawaxel xeʼukʼam uloq ri e kinimal taq ri rajchʼojabʼ ri ajawinel re Asiria» rech xechʼojin rukʼ ri tinamit Judá. «Xkichap ri Manasés kukʼ taq xekabʼal, xkiyut kʼu kukʼ taq tiqom qʼan chʼichʼ xkikʼam kʼu bʼik pa Babilonia». Are chiʼ xkʼojiʼ chilaʼ xchoman chrij ri xubʼano. «Xumachʼirisaj kʼu ribʼ rukʼ ronojel ranimaʼ chuwach ri kiDios ri e nabʼe taq umam». Xuqujeʼ kʼo jun chi jastaq che xubʼano. «Xutzʼonoj elebʼal kʼuʼx che ri Ajawaxel» y xuya ta kan ubʼanik «chʼawem rukʼ Dios» (2 Crón. 33:10-12). Are chiʼ xqʼax ri tiempo, ri Jehová xutzalij uwach ri uchʼawem ri Manasés. Xrilo che ukʼexom chi ri uchomanik y xqʼalajin pa ri chʼawem xubʼano. Ri Jehová xutoqʼobʼisaj uwach rumal ri toqʼobʼ xuta che y xukoj chi jumul pa ri uqʼatbʼal tzij. Ri Manasés xukoj uchuqʼabʼ che ukʼutik che qastzij wi xraj xukʼex ronojel ri xubʼano. w21.10 4 párrs. 10, 11

Ri Priscila y ri Áquila, rajawaxik xeʼel bʼi pa ri tinamit, kkitzukuj chi na jun kʼakʼ kachoch y jun kʼolbʼal rech kkikʼayij likʼom taq ja. Are chiʼ xeʼopan pa Corinto, ri Priscila y ri Áquila xkitoʼ ri apóstol Pablo che kitoʼik konojel ri e kʼo pa ri congregación. Are chiʼ xqʼax ri tiempo, xebʼe pa nikʼaj chi tinamit rech xekiya kitobʼanik che utzijoxik utzij ri Dios (Hech. 18:18-21; Rom. 16:3-5). ¡Sibʼalaj xlatzʼobʼ kiwach riʼ, are kʼu sibʼalaj xekikotik! Kimik, ri e kʼulanik kekunik kkibʼan ke ri xkibʼan ri Priscila y ri Áquila, are qas kkilij ri jastaq re ri Jehová. Are más utz che e kebʼ winaq kechʼaw chrij ri kimetas are chiʼ kʼateʼ tajin kkichʼabʼej kibʼ. We kkibʼan wariʼ, kʼax ta chi kkiriq riʼ che ubʼanik are chiʼ e kʼulan chik y ri ruxlabʼixel ri Dios más kuya tobʼanik chke (Ecl. 4:12). w21.11 17 párrs. 11, 12

Wariʼ kukʼutu che rajawaxik kqanimaj ri taqanik che nim keqil wi ri qanan qatat. Chnaʼtaj chqe che ri taqanik che kʼo pa Levítico 19:3 che rajawaxik nim keqil wi ri qatat qanan xbʼixik are chiʼ bʼim chi ri tzij riʼ: «Chixux tastalik, ri in kʼut ri Ajawaxel ri iDios, in tastalik» (Lev. 19:2). Chqajujunal ri oj cristianos rajawaxik kqachomaj wariʼ: «¿La tajin kinnimaj ri taqanik che nim kinwil wi ri nutat nunan?». We rukʼ wariʼ kqilo che qabʼanom taj, chqakojoʼ qachuqʼabʼ rech kqabʼano. Qastzij che kojkun taj kqakʼex ri qabʼanom kanoq, are kʼu rajawaxik kqabʼan más jastaq chke e areʼ. Weneʼ rajawaxik che kqaya más qatiempo chke. ¿La kojkunik keqatoʼ más rukʼ ri kajwataj chke pa ri kikʼaslemal, pa ri kikojonik y pa ri kichomanik? We kqabʼano, tajin kojniman riʼ che ri taqanik che kʼo pa Levítico 19:3. w21.12 4, 5 párrs. 10-12

Ri qʼatal tzij David xubʼan nimaʼq taq makaj. Jun kʼutbʼal re, xmakun rukʼ ri Bat-Seba xuqujeʼ xukamisaj ri rachajil (2 Sam. 11:2-4, 14, 15, 24). Rukʼ wariʼ, xubʼan kʼax chbʼil ribʼ xuqujeʼ chke ri ufamilia y chke ri nikʼaj chi rixoqil (2 Sam. 12:10, 11). Jumul chik xukʼutu che xukubʼsaj ta ukʼuʼx chrij ri Jehová are chiʼ xtaqan che kajilaxik ri ajchʼojabʼ israelitas. ¿Jas xkʼulmataj rumal wariʼ? Che 70,000 israelitas xekam rumal jun yabʼil (2 Sam. 24:1-4, 10-15). ¿La xqaqʼat ta tzij riʼ puwiʼ ri David? O ¿la xqabʼij ta riʼ che taqal ta che kkuy ri umak? Ri Jehová je ta xuchomaj. Xaneʼ are xchoman chrij che ri David xpatanin che pa ronojel ri ukʼaslemal y qas xraj xuya kan ubʼanik ri umak. Rumal laʼ xukuy umak. Y retaʼm che sibʼalaj kloqʼoqʼex rumal ri David. ¿La mat qastzij che sibʼalaj kqamaltyoxij che ri Jehová are kril ri utz taq jastaq che kqabʼano? (1 Rey. 9:4; 1 Crón. 29:10, 17). w21.12 19 párrs. 11-13

Ri Jesús xel ukʼuʼx chke ri winaq che tzʼaqat ta kaqan kiqʼabʼ, ri moyabʼ, ri kkita taj o ri kiriqom jun chi kʼax. Chojchoman chrij ri xubʼij che ri Juan el Bautista: «Ri moyabʼ kekaʼyik, ri chʼokojibʼ kebʼinik, ri kʼo chʼaʼk chkij kejosqʼitajik. Ri man ketan taj, kjaqtaj ri kixikin, ri kaminaqibʼ kekʼastajisaxik». Y are chiʼ xkil ri milagros che xubʼan ri Jesús, «konojel ri winaq [...] xkinimarisaj uqʼij ri Dios» (Luc. 7:20-22). Ri oj cristianos kqabʼan qe ri xubʼan ri Jesús, kqakʼut loqʼoqʼebʼal, kel qakʼuʼx y kkʼojiʼ qapaciencia kukʼ ri winaq che tzʼaqat ta kaqan kiqʼabʼ, ri moyabʼ, ri kkita taj o ri kiriqom jun chi kʼax. Qastzij che ri Jehová uyaʼom ta chuqʼabʼ chqe rech kqabʼan milagros. Are kʼu, kojkunik kqaya ri qatobʼanik chke ri qas e moyabʼ y ri chʼuqutal kichomanik pa ri kikojonik, are chiʼ kqabʼij chke che xa jubʼiqʼ chi kraj che ri uwach Ulew kux kotzʼiʼj ri uwach, keyawaj ta chik y kʼo ta chi kʼax kkiriq che uqʼijilaxik ri Dios (Luc. 4:18). Waʼ utzalaj taq tzij riʼ tajin kubʼano che e kʼi winaq kkaj kkiya uqʼij ri Dios. w21.12 9 párr. 5

Ri Santiago xukoj ri uTzij ri Dios are chiʼ xeʼutijoj ri winaq. Xukoj che kitoʼik rech kkichʼobʼo che ri Jehová amaqʼel keʼutewchiʼj ri winaq we kkiya ta kan upatanixik junam rukʼ ri xubʼan ri Job. Are chiʼ xchʼaw chrij wariʼ xukoj ta tzij y chomanik che sibʼalaj kʼax kichʼobʼik. Rukʼ ri xubʼano, xukʼutu che xraj che are ri Jehová kyaʼ uqʼij. Ri kqetaʼmaj: Cheqatijoj ri winaq rukʼ tzij y chomanik che kʼax ta kichʼobʼik y chqakojoʼ ri uTzij ri Dios. Ri kqaj are taj che kqakʼut chkiwach ri e winaq chi nim ri qetaʼmabʼal, xaneʼ are kqakʼut ri nimalaj retaʼmabʼal ri Jehová chkiwach y che kel ukʼuʼx chke (Rom. 11:33). Kojkun che ubʼanik we amaqʼel kqakoj ri uTzij ri Dios. Jun kʼutbʼal, we kʼo rajawaxik kkikʼex pa ri kikʼaslemal, kqabʼij ta chke ri kqabʼan oj wet oj oj kʼo pa kilugar, xaneʼ rajawaxik kqakʼut chkiwach che kechoman chrij ri kikʼutbʼal ri winaq che kubʼij pa ri Biblia y ri kuchomaj ri Jehová y ri kunaʼo. Rukʼ wariʼ, kkaj kkikʼex ri kikʼaslemal rumal che kkaj keqaj chuwach ri Jehová y xa ta chqawach oj. w22.01 11 párrs. 9, 10

Ri Dios xaq xiw ta kubʼij chqe che kqabʼan ta kʼax chke ri e nikʼaj chik. Wariʼ sibʼalaj nim ubʼanik che jun cristiano che kraj kqaj chuwach ri Dios. Chuwach ri Jesús sibʼalaj nim ubʼanik ri taqanik che kʼo pa Levítico 19:18. Jumul, jun fariseo xutaʼ che: «¿Jachike ri nimalaj taqomal pa ri pixabʼ?». Ri Jesús xubʼij che ri fariseo che «ri nim na xuqujeʼ nabʼe chke ri taqomal» are uloqʼoqʼexik ri Jehová rukʼ ronojel ri qanimaʼ, ri qakʼaslemal y ri qachomanik. Tekʼuriʼ xubʼij ri e tzij che esam pa Levítico 19:18 che kubʼij: «Ri ukabʼ xa junam rukʼ waʼ: ‹Chaloqʼoqʼej ri awajil atzʼaqat je jas ri uloqʼoqʼexik awibʼ chbʼil awibʼ›» (Mat. 22:35-40). Kʼo kʼi kojkunik kqabʼano rech kqakʼut loqʼoqʼenik chke ri qajil qatzʼaqat. Jun ukʼutik che keqaloqʼoqʼej ri qajil qatzʼaqat are ubʼanik ri pixabʼ che kʼo pa Levítico 19:18: «Mayaʼ rajil ukʼaxel ri kʼax ri kubʼan ri awajil atzʼaqat chawe, mawi kʼax manaʼ che». w21.12 10, 11 párrs. 11-13

Ri Jesús «xukʼam che ri uqʼabʼ» y xutoʼ ri apóstol Pedro. Chojchomanampeʼ chrij, are chiʼ ri Pedro qas xril ri Jesús xkunik xbʼin pa uwiʼ ri joron paneʼ sibʼalaj ksilabʼ ri mar rumal ri kaqiqʼ; are kʼu, are chiʼ xril ri kaqiqʼ jabʼ, xubʼan kebʼ ukʼuʼx y xuxiʼj ribʼ, y aninaq xjusjubʼ bʼi pa ri joron (Mat. 14:24-31). Ri xukʼulmaj ri Pedro kʼo jun jastaq nim ubʼanik kukʼut chqawach. Are chiʼ xel bʼi pa ri barca y xumaj bʼinem pa uwiʼ ri joron xuchomaj taj che kuchomaj chi nikʼaj jastaq y kjusus bʼi pa ri jaʼ. Ri xraj xubʼano are che kopan kʼa rukʼ ri Jesús, are kʼu xkun ta che ubʼanik rumal che xumaj rilik ri nimalaj kaqiqʼ jabʼ. Qastzij che oj kojbʼin ta pa uwiʼ joron, are kʼu kʼo jalajoj taq kʼax kqariq pa ri qakojonik. We are ta chi kqakubʼsaj qakʼuʼx chrij ri Jehová y ri utzujum chqe, kqariq kʼax pa ri qakojonik. Apastaneʼ ri kʼax kqariqo che kjunamataj rukʼ nimaʼq taq kaqiqʼ jabʼ, amaqʼel chqakubʼsaj qakʼuʼx chrij ri Jehová y chrij ri kubʼan che qatoʼik. w21.12 17, 18 párrs. 6, 7

Pa ri qaqʼijilanik kʼo ri chʼawem, unikʼoxik uwach ri Biblia y uchomaxik rij ri kqetaʼmaj. Are chiʼ kqabʼan qachʼawem, tajin kojtzijon rukʼ ri qaTat kʼo pa ri kaj ri sibʼalaj kojuloqʼoqʼej. Are chiʼ kqanikʼoj uwach le Biblia, tajin kkʼojiʼ «ri retaʼmaxik uwach ri Dios» qukʼ, ri winaq más nim unoʼj pa ri kajulew (Prov. 2:1-5). Y, are chiʼ kqachomaj rij ri kqetaʼmaj chrij ri Jehová, tajin kojchoman chrij ri jeʼlalaj taq ubʼantajik, ri kraj kubʼan pa qawiʼ oj y pa kiwiʼ konojel ri e winaq. ¿La kʼo lo jun chi jastaq kojkunik kqabʼano rech más utz kqabʼan che ukojik ri tiempo? Kʼo taj. Qastzij che kʼo kʼi jastaq kqabʼano, are kʼu, ¿jas kojtoʼwik rech qas utz kqabʼan che ukojik ri tiempo? We kbʼanik, chqatzukuj jun lugar ri xaq qatukel kojkʼojiʼ wi. Chojchoman chrij ri xubʼan ri Jesús. Are chiʼ xumaj utzijoxik ri utzij ri Dios, 40 qʼij xkʼojiʼ pa ri desierto (Luc. 4:1, 2). Chilaʼ xkunik xubʼan uchʼawem y xchoman chrij ri rajawaxik kubʼano rech kqaj chuwach ri uTat. Qastzij wi che ri xubʼan pa ri desierto xutoʼ chuwach taq ri kʼax che xuriqo. w22.01 27, 28 párrs. 7, 8

Are ri pixabʼ che kuya jun kʼamal bʼe o jun chi qachalal che ko ukojonik chiʼ krilo che kʼo jun jastaq rajawaxik kqakʼexo. We kʼo jun kuya jun pixabʼ chqe rukʼ ri Biblia, kukʼutu che sibʼalaj kojraj. Rumal laʼ chqakʼamaʼ ri pixabʼ che kuyaʼo. Ri qastzij are che, más kʼax kqabʼan che ukʼamik ri pixabʼ we qas chqe kbʼix wi. ¿Jasche? Qonojel qetaʼm che oj ajmakibʼ. Are kʼu are chiʼ jun winaq kubʼij chqe ri utz taj che tajin kqabʼano, más kʼax kqabʼan che ukʼamik ri pixabʼ (Ecl. 7:9). Weneʼ kqatzukuj ri kqabʼij, kqachomaj che weneʼ xa kojqaj ta chuwach ri winaq che xuya ri pixabʼ chqe o che kqabʼij che utz ta xubʼan che ubʼixik chqe. O weneʼ kqachomaj: «¡Ri areʼ xuqujeʼ kmakunik! Taqal ta che che kubʼij jun pixabʼ chwe». Xuqujeʼ we utz ta kqata ri kbʼix chqe, weneʼ kubʼano che kqata taj o che kojtzijon rukʼ jun chi winaq rech kubʼij chqe ri kqaj oj. w22.02 8, 9 párrs. 2-4

Pa ri kʼakʼ uwach Ulew, ¿la kʼo jastaq kubʼano che kqakubʼsaj ta chi qakʼuʼx chrij ri jastaq che kubʼan na ri Jehová? Chojchomanampeʼ chrij ri xkʼulmataj kukʼ ri israelitas are chiʼ xeʼesax bʼi pa Egipto. Jujun chke xkichʼaʼo che pa ri desierto xaq xiw chi ri maná kkitijo (Núm. 11:4-6; 21:5). ¿La je kqabʼan na oj are chiʼ qʼaxinaq chi ri nimalaj kʼaxkʼolil? Qetaʼm taj jampaʼ tiempo kojchakun na rech nojimal chi nojimal kux jun kotzʼiʼj ri uwach Ulew. Weneʼ nabʼe rajawaxik sibʼalaj kojchakun na y rumal wariʼ kqilo che kʼax wajun kʼaslemal riʼ. ¿La kojchʼachʼat riʼ chrij ri Jehová rumal ri kuya chqe? We kimik kqakʼut maltyoxinik che ri Jehová rumal ri jastaq che kuya chqe, qastzij riʼ che pa ri petinaq xuqujeʼ kqakʼut maltyoxinik. w22.02 7 párrs. 18, 19

Ri e tzij «jun aj judey» y «iwukʼ» che kubʼij pa ri profecía che kʼo pa Zacarías 8:23 kchʼaw chkij ri e chaʼom che kebʼe pa ri kaj ri e kʼasal na (Rom. 2:28, 29). Ri tzij «lajuj winaq ri e kech juleʼ nimaʼq taq tinimit» kchʼaw chkij ri winaq che kekanaj kan cho ri uwach Ulew. Tekʼuriʼ are chiʼ kubʼij che kkichap na «jun aj judey che ri ratzʼyaq» kraj kubʼij che kkiya ri kitobʼanik chke ri e chaʼom che kebʼe pa ri kaj y pa junamam kkiqʼijilaj ri Jehová. Y tzʼaqatinaq wajun profecía che kuya ubʼixik pa Ezequiel 37:15-19, 24, 25, rumal che ri Jehová ubʼanom che ri kʼo keyebʼal pa ri kaj y ri kʼo keyebʼal cho ri uwach Ulew junam kechakunik. Wajun profecía riʼ kchʼaw chkij kebʼ cheʼ. Ri «cheʼ re Judá» are ri e winaq che kebʼe pa ri kaj (pa ri tribu riʼ xechaʼ wi ri xeʼux qʼatal tzij pa Israel). Y ri «cheʼ re Efraín» are ri e winaq che kekʼojiʼ kan cho ri uwach Ulew. Ri Jehová xa jun cheʼ kubʼan na chke, kraj kubʼij che junam kkiqʼijilaj ri Jehová chuxeʼ ri uQʼatbʼal tzij ri Cristo Jesús (Juan 10:16). w22.01 22 párrs. 9, 10

Ri Jesús xchʼaw chkij ri winaq che kkiya pwaq chke ri e mebʼaʼ xa rumal che kkaj keʼilitajik. Waʼ taq jastaq riʼ kqʼalajinik che utz, are kʼu utz ta kril ri Jehová (Mat. 6:2-4). Xaq xiw kojkunik kojux utz taq winaq are chiʼ kqabʼan utz taq jastaq rukʼ ronojel qanimaʼ y xa ta kʼo kqaj. Rajawaxik kqataʼ wariʼ chbʼil qibʼ: «¿La amaqʼel kinbʼan ri utzilal y xaq xiw ta kinbʼij? ¿Jasche kinbʼan utz taq jastaq?». Ri Jehová are jun Dios che kchakun chrij ri kubʼij y ri ruxlabʼixel xuqujeʼ kʼo tajin kubʼano (Gén. 1:2). Wariʼ kraj kubʼij che ri ruxlabʼixel ri Dios kubʼano che kqakʼut utz taq bʼantajik. Jun kʼutbʼal, ri tijoxel Santiago xutzʼibʼaj: «Kaminaq ri kojonik ri man e rachilam ta chak» (Sant. 2:26). Wariʼ xuqujeʼ junam rukʼ ri kqabʼan che ukʼutik ri bʼantajik che kojutoʼ ri ruxlabʼixel ri Dios che ukʼutik. Are chiʼ kqakʼut ri utz taq bʼantajik kqakʼutu che kʼo ri ruxlabʼixel ri Dios pa qawiʼ. w22.03 11, 12 párrs. 14-16

Qastzij riʼ che ri oj cristianos kqabʼan kʼi taq jastaq pa ri qakojonik y utz taq chak. Are kʼu, ri apóstol Pedro xuqʼalajisaj chi jun jastaq. Are chiʼ majaʼ kubʼij che rajawaxik kojux tastalikalaj taq winaq, xubʼij: «Chikojoʼ ichuqʼabʼ che ri chomanik» (1 Ped. 1:13). ¿Jas xraj xubʼij? Areʼ xubʼij che ri cristianos che e chaʼom kebʼe pa ri kaj kkitzijoj pa ronojel ri uwach Ulew ronojel uwach utzalaj taq jastaq ri kubʼan ri Dios (1 Ped. 2:9). Kimik, qonojel ri oj cristianos kqabʼan wajun chak riʼ, che sibʼalaj kuya utzilal chke ri winaq. Wariʼ are jun chak che nim ubʼanik che kkibʼan ri cristianos che kkitzijoj ri utzij ri Dios chke ri winaq rukʼ kikotemal (Mar. 13:10). Rumal laʼ, chqakojoʼ qachuqʼabʼ rech kqabʼan pa ri qakʼaslemal. Rukʼ wariʼ kqakʼutu che kqaloqʼoqʼej ri Dios xuqujeʼ ri qajil qatzʼaqat y che kqaj kojux tastalikalaj taq winaq pa ronojel ri kqabʼano. w21.12 13 párr. 18

Ri apóstol Pablo amaqʼel utz xril ri kibʼantajik ri cristianos. Areʼ xuchʼobʼo we umak ta ri winaq xubʼan jun jastaq o xa qas itzel winaq wi. Xeʼuloqʼoqʼej ri qachalal y are xchoman chrij ri utz taq kibʼantajik. We krilo che kʼo jun kuriq kʼax che ubʼanik ri utz, kuchʼobʼo che kʼo utz jastaq pa ranimaʼ y xa rajawaxik jubʼiqʼ tobʼanik che rech kkunik kubʼano. Chqilampeʼ ri xubʼan Pablo che kitoʼik e kebʼ qachalal ixoqibʼ pa ri congregación re Filipos (Filip. 4:1-3). Ri xkʼulmatajik are che ri Evodia y ri Síntique xkiyoj uwach o xechʼojinik rumal jujun taq kibʼantajik. Ri Pablo xubʼan ta kʼax chke ni xeʼuyajajej. Xaneʼ are xchoman chrij ri utz kibʼantajik y ri utz taq jastaq kibʼanom pa ri kikojonik. Retaʼm che keloqʼoqʼex rumal ri Jehová. Rumal che xuchʼobʼo che kekunik kkibʼan utz jastaq, xubʼij chke che keʼutzir chi jumul. Ri xubʼan che kilik ri e qachalal xubʼano che amaqʼel xekikotik y xkʼojiʼ utz rachilanik kukʼ ri e kʼo pa ri congregación. w22.03 30 párrs. 16-18

Ri jamaril kuya ri Jehová, kuya utzilal pa ri qanimaʼ y kojutoʼo rech rukʼ saqil kojchomanik. Are waʼ ri xunaʼ jun qachalal ixoq Luz ubʼiʼ. Ri areʼ kubʼij: «Are chiʼ kinnaʼo che xaq nutukel in kʼolik, kinchomaj che ri Jehová kinraj taj. Are kʼu are chiʼ jeriʼ kinnaʼo, aninaq kinbʼij che ri Jehová ri kinchomaj. Are chiʼ kinbʼan nuchʼawem kinbʼison ta chik». Junam rukʼ ri xqil chrij ri xukʼulmaj ri qachalal Luz, ri chʼawem kojutoʼo rech kqanaʼ jamaril (Filip. 4:6, 7). Kqakubʼsaj qakʼuʼx che ri Jehová y ri Jesús kojkitoʼ na are chiʼ kkam jun qachalaxik oj. Xuqujeʼ kojutoʼo rech kqakʼutu che kel qakʼuʼx chke ri winaq are chiʼ kqatzijoj ri utzij ri Dios chke, rumal che ri Jehová y ri Jesús e jun utzalaj kʼutbʼal re wajun bʼantajik riʼ. Y ri roqʼej ri Jesús kukubʼsaj qakʼuʼx rumal che are jun kʼutbʼal che ri Jehová y ri areʼ kkichʼobʼo are chiʼ kʼo ta qachuqʼabʼ y kkaj kojkitoʼ pa taq ri kʼaxkʼolil. Kopan na ri qʼij are chiʼ ri Jehová kubʼan waʼ jun utzalaj jastaq riʼ: «Kusuʼ na ronojel ri uwaʼl kiwach ri e oqʼinaq» (Apoc. 21:4). w22.01 15 párr. 7; 19 párrs. 19, 20

Chqilaʼ che ri Jesús xubʼij che kʼo kebʼ okibʼal y chkijujunal kekʼaman bʼi pa jalajoj taq bʼe, jun «nim [u]wach» y ri jun chik «latzʼ [...] uwach» (Mat. 7:14). Xa kebʼ bʼe kʼolik. Chqajujunal kqachaʼo jachike bʼe kojbʼe wi. Are ri jastaq más nim ubʼanik kqachaʼo rumal che kʼo ubʼanik rukʼ ri kʼaslemal che kʼo ta ukʼisik. Más e kʼi ri kebʼe pa ri bʼe che «nim [u]wach» rumal che kʼax ta okem chupam. Kʼi kekanaj kan chilaʼ, rumal che kkilo che más e kʼi je kkibʼano. Ketaʼm taj che are ri Satanás, ri Itzel, kraj che kkichaʼ wajun bʼe riʼ che keʼukʼam bʼi pa ri kamikal (1 Cor. 6:9, 10; 1 Juan 5:19). Ri jun bʼe «nim [u]wach», junam ta rukʼ ri jun chi bʼe che «latzʼ [...] uwach», rumal che ri Jesús xubʼij che kʼi ta winaq keʼok pa ri bʼe «latzʼ [...] uwach». ¿Jasche? Pa ri versículo 15, ri Jesús xubʼij che rajawaxik kqachajij qibʼ chkiwach ri kkijaluj kibʼ che e qʼaxal utzij ri Dios (Mat. 7:15). w21.12 22, 23 párrs. 3-5