Noviembre

Ri Jehová kʼi kubʼan che qatoʼik. Kojutoʼo rech kqachʼijo chiʼ kbʼan jun kʼax chqe. Xuqujeʼ kojutoʼo rech knaʼtaj jujun taq textos chqe rech kqatzijoj chke ri qafamilia che kkaj kketaʼmaj. Y kojutoʼ are chiʼ ri winaq kkitatabʼej ta ri utzij chiʼ kqatzijoj chke (Jer. 20:7-9). Ri Jehová xuqujeʼ ukʼutum ri rutzilal chqe rumal che kojutijoj rech kqatzijoj ri utzij. Pa ri riqbʼal ibʼ che kbʼan chuxoʼl semana, kkʼut chqawach jas kqabʼano rech utz kqabʼan che ri tzijonem kukʼ ri winaq. Weneʼ kqaxeʼj jubʼiqʼ qibʼ are chiʼ kqamaj ubʼanik ri kʼakʼ taq jastaq che kkʼut chqawach pa ri utinamit ri Jehová. Are kʼu, we kqamaj ubʼanik ri kkʼut chqawach, kqilo che sibʼalaj utz kel ronojel chqawach kukʼ ri winaq. Xuqujeʼ kbʼix chqe pa ri e riqbʼal ibʼ y pa ri e nimaʼq taq riqbʼal ibʼ che kqakʼex ri kqabʼan che utzijoxik ri utzij ri Dios. Wariʼ kraj kubʼij che weneʼ rajawaxik kqakʼex kʼi jastaq pa ri qakʼaslemal y pa ri qachomanik. Are kʼu, we jeʼ kqabʼano kqakʼut chuwach ri Jehová che kqaj kojutewchij. w21.08 27 párrs. 5, 6

Are chiʼ ri apóstol Pablo xutzʼibʼaj bʼi ri cartas chke ri cristianos re Corinto ko xeʼuchʼabʼej bʼik. Are chiʼ xqʼax ri tiempo xutaq bʼi ri Tito kukʼ. ¡Sibʼalaj xkikotik are chiʼ xretaʼmaj ri xkichomaj chrij ri pixabʼ xutaq bʼi chke! (2 Cor. 7:6, 7). Ri e kʼamal bʼe kekunik kkesaj uwach ri Pablo are chiʼ kkitas kitiempo che kitoʼik ri e qachalal. Kkikʼut wariʼ are chiʼ matam taj keʼopan pa ri e riqbʼal ibʼ rech ketzijon kukʼ ri qachalal che uyaʼik kichuqʼabʼ. Kʼi mul xaq jujun taq minutos rajawaxik rech kkikʼut chkiwach ri qachalal che kekiloqʼoqʼej y kkiya kichuqʼabʼ (Rom. 1:12). Ri kʼamal taq bʼe che kkesaj uwach ri Pablo kkikoj ri Biblia che uyaʼik kichuqʼabʼ ri e qachalal y rech kkikʼut chkiwach che keloqʼoqʼex rumal ri Jehová. Xuqujeʼ kkibʼij chke che utz ri tajin kkibʼano. We jun kʼamal bʼe rajawaxik kuya jun pixabʼ che jun qachalal utz che pa ri uTzij ri Dios kresaj wi. Kubʼij che ri qachalal ri qas rajawaxik kubʼano, are kʼu rukʼ utz taq tzij kubʼij rumal che kraj taj kubʼan kʼax che ri qachalal (Gál. 6:1). w22.03 28, 29 párrs. 11, 12

Kimik ri Jehová kuya ri «nimalaj kuʼinem» chqe o ri chuqʼabʼ rech kqaya ta kan upatanexik. Jun chke ri tobʼanik che kuyaʼo are ri chʼawem. Pa Efesios 6:18, ri apóstol Pablo xubʼij: «Mitanabʼaʼ ri ubʼanik chʼawem rukʼ Dios». We ronojel qʼij kqabʼan qachʼawem, ri Dios kuya qachuqʼabʼ. Weneʼ jujun taq mul kqanaʼo che kqariq taj jas kqabʼij pa ri qachʼawem, are kʼu ri Jehová kubʼij chqe che utz kojtzijon rukʼ paneʼ kojkun taj kqabʼij ri kqanaʼo (Rom. 8:26, 27). Ri Jehová xuqujeʼ kukoj ri Biblia che uyaʼik qachuqʼabʼ. Kojkunik kqabʼan qe ri xubʼan ri Pablo rech kqariq qachuqʼabʼ y kubʼsal qakʼuʼx (Rom. 15:4). Are chiʼ kojchoman chrij ri kqasikʼij uwach pa ri Biblia, ri Jehová kukoj ri ruxlabʼixel rech kqachʼobʼo jas kqabʼan che ubʼanik pa ri qakʼaslemal (Heb. 4:12). w21.05 22 párrs. 8-10

Qetaʼm che nim ubʼanik keqatoʼ ri winaq rech keʼux tijoxelabʼ, are kʼu kʼo jujun taq kʼax kojkiqʼatej che ubʼanik wariʼ. Weneʼ kqachomaj che kʼo ta chi kojkunik kqabʼano rumal ri kojriqitaj wi. Jun kʼutbʼal, e kʼo qachalal nim chi kijunabʼ o e yawabʼ. Weneʼ kʼo jun tajin kukʼulmaj wariʼ, are kʼu chnaʼtaj chqe che kojkunik kqaya etaʼmanik re ri Biblia pa teléfono o pa Internet. Rumal laʼ, rajawaxik taj kojel bʼi pa ri qachoch are chiʼ kqamaj tzijonem y kqaya etaʼmanik che jun winaq. Xuqujeʼ kʼo chi jun jastaq kojkunik kqabʼano, keqatijoj ri winaq pa ri horas ri kkaj e areʼ, rumal che weneʼ kʼo ta kitiempo are chiʼ ri qachalal kkitzijoj ri utzij ri Dios. Kojkunik kqabʼij che kqaj kqaya ri etaʼmanik re ri Biblia chke paneʼ sibʼalaj aqʼabʼil o kʼa chaqʼabʼ. Jun kʼutbʼal: ri Jesús chaqʼabʼ xuya etaʼmanik che ri Nicodemo, rumal che are ri xraj ri Nicodemo (Juan 3:1, 2). w21.07 5 párrs. 10, 11

Ri utijoxelabʼ ri Juan el Bautista xkimayo che ri utijoxelabʼ ri Jesús kkibʼan ta ayuno. Ri Jesús xubʼij chke jasche kkibʼan taj (Mat. 9:14-17). Are kʼu ri fariseos y e nikʼaj chi winaq xkiyoqʼ ri Jesús rumal che xubʼan ta ri jastaq che xkibʼan e areʼ. Xpe koyowal are chiʼ ri Jesús xeʼukunaj yawabʼibʼ pa ri qʼij sábado (Mar. 3:1-6; Juan 9:16). Ri winaq riʼ kkinimarisaj kibʼ rumal che kkibʼij che tajin kkinimaj ri taqanik re ri qʼij sábado, are kʼu xuqujeʼ tajin kkibʼan kikʼay pa ri rachoch ri Dios. Itzel xkita are chiʼ ri Jesús xubʼij chke che utz ta ri tajin kkibʼano (Mat. 21:12, 13, 15). Y, are chiʼ ri Jesús xutzijoj ri utzij ri Dios pa ri sinagoga re Nazaret, ri winaq xpe koyowal rumal che xeʼujunamisaj kukʼ ri israelitas che xaq xiw chkij e areʼ xechoman wi y kʼo ta kikojonik (Luc. 4:16, 25-30). E kʼi xeteriʼ ta chi chrij ri Jesús rumal che xubʼan ta ri xkaj e areʼ (Mat. 11:16-19). w21.05 5, 6 párrs. 13, 14

Ri Jehová keʼukoj ri kʼutbʼal chqawach rech kqabʼan ta nimal y kqarayij ta kʼi jastaq. Are chiʼ kojchʼaw chrij ri urayixik kʼi jastaq, kojchoman riʼ chrij ri Satanás. Kʼi eqeleʼn riʼ yaʼom che are chiʼ majaʼ kubʼan Itzel che ribʼ. Are kʼu xkubʼiʼ ta ukʼuʼx rukʼ ri yaʼom che, xaneʼ xraj che areʼ ri kqʼijilaxik y are ta ri Jehová. Rumal laʼ ri Satanás kraj kqabʼan qe ri xubʼano y kojkikot ta rukʼ ri kʼo qukʼ. Ri nabʼe mul che xubʼan wariʼ are ri xubʼan che usubʼik ri Eva. Ri Jehová rukʼ loqʼoqʼebʼal uyaʼom ronojel uwach cheʼ chke, xa jun ri kekun taj kkitijo (Gén. 2:16). Are kʼu ri Satanás xubʼij molom taq tzij che ri Eva, xubʼij che che rajawaxik kutij uwach ri cheʼ ri bʼim chke che utz taj kkitijo. Ri areʼ xumaltyoxij ta ronojel ri yaʼom che; xaneʼ xurayij nikʼaj chik. Y wariʼ xubʼano che xuriq kʼax y chukʼisbʼal xmakunik y xkamik (Gén. 3:6, 19). w21.06 14 párrs. 2, 3; 17 párr. 9

Ri Dios xraj che ri Adán y Eva kekʼojiʼ kalkʼwal y kkichajij ri uwach Ulew. Wet xeniman ri Adán y ri Eva che ri Jehová, ri e areʼ y ri e kalkʼwal amaqʼel ta riʼ xekʼojiʼ pa ri ufamilia. Ri Jehová nim xeril wi ri Adán y ri Eva rumal che xuya jun utz kikʼolbʼal pa ri ufamilia. Are chiʼ ri David tajin kchʼaw chrij ri xbʼan che ubʼanik ri winaq, xubʼij wariʼ che ri Jehová: «Man are ta kʼu nim na uqʼij xbʼan la chkiwach ri taqoʼnibʼ aj kaj, xkoj la ucorona xyaʼ la juluwem che xuqujeʼ nim ilik» (Sal. 8:5). Qastzij wi che ri Dios más nim ri chuqʼabʼ, ri chomanik y ri nojibʼal xuya chke ri ángeles chkiwach ri winaq (Sal. 103:20). Are kʼu xa jubʼiqʼ kojjunamataj ta kukʼ ri ángeles. Sibʼalaj bʼisobʼal che ri Adán y ri Eva nim ta xkil wi ri kikʼolbʼal pa ri ufamilia ri Jehová. Ri xkibʼano xuya kʼi kʼaxkʼolil chke y chke ri e kalkʼwal. Are kʼu, ri Jehová ukʼexom ta ri qas xraj xubʼan pa ri utikitajik ri uwach Ulew: kraj che ri e winaq kenimanik amaqʼel keʼux ralkʼwal. w21.08 2, 3 párrs. 2-4

E kʼi upatanelabʼ ri Jehová kbʼan kʼax chke kimik. Jujun e kʼo pa taq tinamit jawiʼ qʼatem wi uwach ri qachak che ri Dios. Chilaʼ, xaq kʼateʼ kechap bʼi pa cárcel y kekʼam «bʼik chkiwach qʼatal taq tzij xuqujeʼ ajawinelabʼ», y wariʼ kuqʼalajisaj ri upatanixik ri Jehová chkiwach e kʼi winaq (Mat. 10:17, 18). E nikʼaj chi Testigos jalan chi wi ri kʼax kbʼan chke. Pa ri tinamit keʼel wi, weneʼ yaʼom bʼe chke kkiqʼijilaj ri Jehová, are kʼu e kʼo kachalaxik ri keqʼatenik rech kkipatanij ta chi ri Jehová (Mat. 10:32-36). Kʼi mul kkʼulmatajik che we ri e rachalaxik jun Testigo kkilo che kekun taj jas kkibʼan che uqʼatexik, kkiya kan jeriʼ. Y jujun chke ri winaq che ojer kanoq xkikoj kichuqʼabʼ che ubʼanik kʼax chke ri Testigos, kimik e qachalal chik. Rumal laʼ, chkʼol ukowil akʼuʼx we tajin kbʼan kʼax chawe kumal ri winaq. Kʼo ri utobʼanik y ri ruxlabʼixel ri Jehová awukʼ, ¡rumal riʼ kʼo ta rumal che kaxibʼij awibʼ! w22.03 16 párr. 8

Ri Biblia kubʼij che ri Jehová itzel kril «ri bʼaqʼwachaj ri kekibʼan nimal, ri aqʼaj ri bʼanal tzij, ri qʼabʼaj ri keʼukamisaj winaq ri man kʼo ta kimak» (Prov. 6:16, 17). Xuqujeʼ «ri subʼunelabʼ ta[q] winaq xuqujeʼ ri kamisanelabʼ» (Sal. 5:6). Ri bʼantajik riʼ sibʼalaj itzel kril ri Jehová, rumal laʼ xusachisaj kiwach ri winaq pa ri utiempo ri Noé che xkibʼan ri itzel taq jastaq riʼ (Gén. 6:13). Jun chi jastaq che itzel kril ri Jehová are ri xubʼij ri qʼaxal tzij Malaquías: che we jun winaq kutzukuj ri kubʼano rech kujach bʼi ri ukʼulaj. Ri Dios kukʼam ta ri kiqʼijilanik che kkibʼan wariʼ y kukʼajisaj kiwach (Mal. 2:13-16; Heb. 13:4). Ri Jehová kubʼij wariʼ chqe: «Chiwetzelaj uwach ri lawaloyil [o itzelal]» (Rom. 12:9). Ri tzij chiwetzelaj kraj kubʼij che are jun jastaq che kqaj ta chqawach. Kraj kubʼij che are jun jastaq xabʼibʼal y kqaj taj kqilo. Rajawaxik che je kqanaʼ wariʼ chrij ri jastaq che itzel kril ri Jehová. w22.03 4, 5 párrs. 11, 12

Xa jubʼiqʼ chi kraj rech ri qaTat kʼo pa ri kaj kukoj ri uQʼatbʼal tzij rech kuyaʼ kʼi tewchibʼal chqe. Ri kkeyeʼj rukʼ kikotemal che ri Jehová kuyaʼ ri utobʼanik chke, kkiriq kʼi tewchibʼal kimik y pa ri petinaq. Pa ri kʼakʼ uwach Ulew, ri oj upatanelabʼ ri Dios kʼo ta chi jumul kqariq kʼax junam rukʼ ri kqariq kimik. Kʼo ta chi itzelal y qʼoxom (Apoc. 21:4). Rajawaxik ta chik kqakoj qachuqʼabʼ che utzukuxik ri jastaq che kajwataj chqe, rumal che kekʼojiʼ na kʼi tewchibʼal (Sal. 72:16; Is. 54:13). ¡Sibʼalaj jeʼl riʼ! Kimik, ri Jehová tajin kojutijoj rech kojkʼojiʼ chuxeʼ ri uQʼatbʼal tzij pa ri petinaq. Mubʼan kebʼ qakʼuʼx y mojel kanoq, rumal che xa jubʼiqʼ chi kraj kqariq utzilal. Naqaj chi kʼo wi jun jeʼlalaj petinaq, rumal laʼ chqakojoʼ qachuqʼabʼ che reyexik ri jastaq che kubʼan na ri Jehová. w21.08 13 párrs. 17-19

Are chiʼ majaʼ naj kisikʼim wajun carta che xutaq lo ri apóstol Pablo chke, ri cristianos re Judea rajawaxik xkiya kan ri kachoch, ri kikʼay, ri kifamiliares che e cristianos taj, y xeʼanimaj bʼik rech kebʼe pa taq ri kʼachelaj (Mat. 24:16). Qastzij che pa riʼ ri qʼij rajawaxik riʼ che xkitolaʼ kibʼ. We nabʼe kanoq kibʼanom chi ri pixabʼ xuya ri Pablo chke, nim xeʼutoʼ wi riʼ are chiʼ xeʼanimaj bʼik rech xkitolaʼ kibʼ. Weneʼ ri e qachalal amaqʼel taj kkibʼij chqe jas kajwataj chke. Chakʼutuʼ che amaqʼel kawaj keʼatoʼ ri e nikʼaj chik. Qastzij riʼ che pa ri qacongregación e kʼo e qachalal achijabʼ ixoqibʼ che amaqʼel kkaj kekitoʼ ri e nikʼaj chik. Ni ta jumul kkibʼij o kkibʼano che xa jun eqaʼn kqaya chkij we kqataʼ tobʼanik chke. Xaneʼ amaqʼel e kʼo che qatoʼik y kqaj kqesaj uwach ri kibʼantajik. w22.02 23, 24 párrs. 13-15

Pa ri e kʼisbʼal taq junabʼ kanoq, bʼanom jun chke ri taq congregaciones y circuitos. We kbʼix chqe che kojqʼax pa jun chi congregación weneʼ kʼax kqabʼan che unimaxik rumal che kqaj taj keqaya kan ri qafamilia y ri e qachiʼl. ¿La kubʼij ri Jehová chke ri e kʼamal taq bʼe jawchiʼ rajawaxik kebʼe wi jujun chke ri e publicadores? Kubʼij taj. Y rumal wariʼ kʼax kqariq che ubʼanik ri kkibʼij ri e kʼamal taq bʼe chqe. Are kʼu ri Jehová kukubʼsaj ukʼuʼx chrij ri kkibʼan ri e kʼamal taq bʼe y rajawaxik che je kqabʼan oj. ¿Jasche rajawaxik kqabʼan ri kkibʼij ri e kʼamal taq bʼe chqe paneʼ qas ta kqaj kqabʼano? Rumal che are chiʼ kqabʼano, kqaya utzilal pa ri congregación. Xuqujeʼ pa ri congregación kkʼojiʼ jamaril rumal che kojmachʼachʼik y kqabʼan ri kkibʼij ri e kʼamal taq bʼe chqe (Heb. 13:17). Y ri más nim ubʼanik, are che kqakʼut chuwach ri Jehová che kqakubʼsaj qakʼuʼx chrij areʼ, rumal che areʼ e uchaʼom ri e kʼamal taq bʼe rech kojkichajij (Hech. 20:28). w22.02 4, 5 párrs. 9, 10

We abʼanom chi aqasanjaʼ, katkun riʼ katchoman chrij jas rajawaxik kabʼano rech más utz kabʼan che uyaʼik chʼabʼal. ¿Jasche? Rumal che we katijoj awibʼ che usikʼixik ri wuj, uqʼalajisaxik jun kʼutunem, kuya nim tobʼanik chke konojel ri kattatabʼenik (1 Tim. 4:15). Utz we katchoman chrij unikʼoxik y ubʼanik pa akʼaslemal ronojel ri kawetaʼmaj pa ri e kʼutunem re ri wuj Chojux utz taq sikʼil uwach wuj xuqujeʼ ajtijabʼ. Cheʼanikʼoj ri kʼutunem chkijujunal y chatijoj awibʼ pa ri awachoch, tekʼuriʼ chabʼanaʼ ri xawetaʼmaj are chiʼ kaya jun chʼabʼal. Chataʼ jujun pixabʼ che ri consejero auxiliar o chke nikʼaj chi kʼamal bʼe «ri kkitzijoj ri utzij ri Dios xuqujeʼ ri ketijonik» (1 Tim. 5:17). Xaq xiw ta katchoman chrij jas kabʼan che ukojik jun kʼutunem re ri folleto, xaneʼ chayaʼ kichuqʼabʼ konojel ri tajin kattatabʼenik rech kkowir ri kikojonik y kkibʼan pa kikʼaslemal ri kketaʼmaj. We je kabʼano, ri at xuqujeʼ ri kattatabʼenik sibʼalaj kixkikotik. w21.08 24 párr. 17

We kqachʼobʼo che ri e nikʼaj chik más nim kibʼanik chqawach, kojchʼojin ta riʼ are chiʼ kqilo che más kekunik o más kenaʼw che ubʼanik jun jastaq, xaneʼ kojkikot rumal ri jastaq kkibʼano. Qastzij wi che kojkikot kukʼ e areʼ rumal che tajin kkikoj ri kekunik kkibʼan che uqʼijilaxik ri Jehová. Wariʼ kuya nimalaj utzilal y jamaril chkixoʼl konojel ri qachalal. ¿Jas kojtoʼwik rech itzel ta keqil ri nikʼaj chik che kkiriq utzilal? Kqachʼobʼo che kʼo jastaq kojkun ta che ubʼanik. We je kqachomaj, kqachʼobʼ riʼ che kojkun ta che ubʼanik ronojel ri kenaʼw ri nikʼaj che ubʼanik. Xuqujeʼ kqachʼobʼo che kʼo kʼi jastaq kqetaʼmaj chkij. Jun kʼutbʼal, we jun qachalal sibʼalaj utz kubʼan che uyaʼik chʼabʼal pa ri congregación, kojkunik kqataʼ che jas kubʼan che utijoxik ribʼ. We jun qachalal ixoq sibʼalaj utz kubʼan che ri rikil, kojkunik kqataʼ che jas kubʼan che ubʼanik. w21.07 16 párrs. 8, 9

Pa ri wuj re Números kqasikʼij che ri Jehová xukamisaj jun israelita rumal che tajin kumulij siʼ pa sábado. Are kʼu pa ri ukabʼ wuj re Samuel kqasikʼij che, are chiʼ xqʼax ri tiempo, ri Jehová xukuy umak ri David paneʼ xubʼan tzʼil taq makaj y xkamisanik (Núm. 15:32, 35; 2 Sam. 12:9, 13). Weneʼ kqachomaj: «¿Jasche ri Jehová xukuy ri nimaʼq taq umak ri David y are kʼu xukamisaj ri achi che xusikʼ siʼ pa sábado?». Ri Biblia kchʼaw ta chrij ronojel ri xkʼulmatajik. Jun kʼutbʼal, qetaʼm che ri David xuta kuybʼal mak che ri Jehová rumal ri jastaq che xubʼano (Sal. 51:2-4). Are kʼu, ¿jas ubʼanik ri achi che xniman ta che ri taqanik re ri sábado? ¿La qas xuta kuybʼal mak che ri Jehová rumal ri xubʼano? ¿La are nabʼe mul waʼ xniman ta che ri Jehová? ¿La kʼo xbʼin che che utz ta ri tajin kubʼano y xuta ta chʼabʼexik? Ri Biblia kʼo ta kubʼij chrij wariʼ. Are kʼu qas qetaʼm che ri Jehová «sukʼ pa taq ri e ubʼe» (Sal. 145:17). w22.02 2, 3 párrs. 3, 4

Ri winaq che kumachʼ ribʼ kukoj ta uchuqʼabʼ che ubʼanik jastaq che kkun taj kubʼano, rukʼ wariʼ qas kkikotik y utz kubʼan che ri uchak. Ri winaq che retaʼm che kʼo jastaq kkun taj kubʼano, kjunamataj rukʼ jun winaq che tajin kubʼinisaj jun chʼichʼ cho jun bʼe paqal chuwach jun juyubʼ, rech kkunik kpaqik rajawaxik nojimal kbʼek. Are je kubʼan ri winaq ri kuchʼobʼo che kʼo kkun ta che ubʼanik, kʼo eqeleʼn kubʼan ta chik rumal che kʼo ta chi uchuqʼabʼ y keʼutoʼ ri e nikʼaj chik (Filip. 4:5). Chqilaʼ ri ukʼutbʼal ri Barzilái, are chiʼ 80 ujunabʼ xsikʼix rumal ri qʼatal tzij David rech kkʼojiʼ rukʼ pa ri qʼatbʼal tzij. Wajun achi riʼ retaʼm che kʼo jujun jastaq kkun ta chi che ubʼanik, rumal laʼ xraj taj. Retaʼm che are utz kbʼe ri Kimham che ukʼexwach rumal che kʼa ala na (2 Sam. 19:35-37). Junam rukʼ ri xubʼan ri Barzilái, e kʼo qachalal nim chi kijunabʼ sibʼalaj kekikotik che e kʼo alabʼom che kekunik kkibʼan ri chak pa ri utinamit ri Jehová. w21.09 10 párrs. 6, 7

Jujun chqe kʼax kqabʼan che rilik ri Jehová junam rukʼ jun Tat kloqʼoqʼenik, weneʼ rumal che xqariq kʼax are chiʼ kʼa oj nitzʼ na. Sibʼalaj kukubʼsaj qakʼuʼx retaʼmaxik che areʼ kuchʼobʼ ri kqanaʼo y kraj kkʼojiʼ naqaj chqe. Rumal laʼ ri uTzij kubʼij wariʼ chqe: «Chixqebʼ rukʼ ri Dios, ri areʼ xuqujeʼ kqebʼ na iwukʼ» (Sant. 4:8). Ri Jehová sibʼalaj kojraj y kubʼij chqe che kraj kux qaTat. Ri Jesús kkunik kojutoʼ rech kojqebʼ más rukʼ ri Jehová. Rumal che ri areʼ qas retaʼm uwach ronojel ri ubʼantajik ri Jehová. Rumal laʼ xubʼij: «Jachin ri rilom nuwach in, rilom uwach ri Tataxel» (Juan 14:9). Ri Jesús junam rukʼ jun qachalal nabʼeʼal chqawach, kojutoʼ che unimaxik ri qaTat rech kojqaj chuwach. Xuqujeʼ ronojel ri xubʼano are chiʼ xkʼojiʼ pa ri uwach Ulew kukʼut chqawach che ri Jehová are jun Tat kloqʼoqʼenik. w21.09 21 párrs. 4, 5

Ri oj pa junamam kqapatanij ri qastzijalaj Dios Jehová. Ri areʼ uyaʼom ri nimalaj eqeleʼn chke ri e kʼamal taq bʼe rech kkilij ri congregación. Rumal laʼ, are chiʼ jun qachalal kmakun chuwach ri Jehová, ri e kʼamal taq bʼe kkitzukuj tobʼanik pa ri Biblia, rech kkibʼij la kkʼojiʼ na pa ri congregación o kel bʼik. Rech kkibʼan wariʼ, rajawaxik kkilo we wajun winaq riʼ qas kuya kan ubʼanik ri makaj che xubʼano. Rajawaxik kkil na waʼ nikʼaj jastaq riʼ: paneʼ ri winaq kubʼij che qas kraj ta chik kubʼan ri makaj, ¿la qastzij itzel kril wi ri xubʼano? ¿La qastzij kubʼan ta chi ri umak? We are kumal ri e rachiʼl xmakunik, ¿la qas kuya kan kachilaxik? Ri e kʼamal taq bʼe kkibʼan kichʼawem che ri Jehová are chiʼ kkinikʼoj ri xubʼan jun winaq, kechoman chrij ri jastaq che kubʼij ri Biblia che rajawaxik kubʼan ri xmakunik xuqujeʼ rajawaxik kkil ri kubʼan ri winaq pa ri ukʼaslemal che kukʼutu che qas kraj kukʼex ri ukʼaslemal. Tekʼuriʼ kkilo la rajawaxik kelesax bʼi wajun winaq riʼ pa ri congregación o kkanaj kanoq. Jujun chke weneʼ rajawaxik kelesax bʼi pa ri congregación rumal ri mak che xkibʼano (1 Cor. 5:11-13). w22.02 5 párrs. 11, 12

Paneʼ kʼi junabʼ chik qabʼanom qaqasanjaʼ o kʼateʼ xqabʼano, rajawaxik che qonojel kqakoj qachuqʼabʼ che ukʼutik bʼantajik che utz kril ri Jehová. Rech kojkunik kqabʼano, rajawaxik che kqachajij ri qachomanik. ¿Jasche? Rumal che ri kqachomaj kʼo ubʼanik rukʼ ri jastaq kqabʼano. We amaqʼel kojchoman chrij jastaq che utz ta kril ri Dios, wariʼ kubʼano che kqabʼij y kqabʼan jastaq che utz ta krilo (Efes. 4:17-19). Are kʼu we are kojchoman chrij utz taq jastaq, qastzij riʼ che wariʼ kojutoʼ rech kqabʼij y kqabʼan jastaq che utz kril ri qaTat, Jehová (Gál. 5:16). Kojkun taj che mat kʼo itzel taq jastaq kok pa ri qachomanik. Are kʼu oj kojchaʼowik we kqabʼano o kqabʼan taj. Are chiʼ majaʼ kqabʼan qaqasanjaʼ, rajawaxik che kqabʼij taj y kqabʼan ta jastaq che utz ta kril ri Jehová. Wariʼ are ri nabʼe jastaq y ri más nim ubʼanik che kqabʼano rech kqaya kan ri ojer kʼaslemal. Are kʼu, rech qas kqaya kikotemal che ri Jehová, xuqujeʼ rajawaxik kqakʼut «ri kʼakʼ [qa]kʼaslemal». w22.03 8 párrs. 1, 2

Ri e kʼamal bʼe kekun taj kketaʼmaj we jun winaq che ubʼanom jun nimalaj makaj qas kraj kukʼex ri ukʼaslemal. ¿Jasche? Rumal che e areʼ kekun taj kkil ri kʼo pa ranimaʼ jun winaq, rumal laʼ rajawaxik qas kkil na we jun winaq qastzij ukʼexom chi ri ukʼaslemal xuqujeʼ we qas itzel kril chi ri xubʼano. Rajawaxik che ri e kʼamal bʼe qas kkil na we ri ajmak qas xukʼex ri uchomanik, ri kubʼano y ri kunaʼo. Weneʼ kajwataj kʼi tiempo rech kukʼutu che qas xukʼex ri ubʼantajik. ¿Jas kubʼan jun winaq che esam bʼi pa ri congregación rech kukʼutu che qas kraj kukʼex ri ukʼaslemal? Rajawaxik che amaqʼel kbʼe pa ri e riqbʼal ibʼ, kubʼan ri uchʼawem y kusikʼij uwach ri Biblia. Xuqujeʼ rajawaxik kuchajij ribʼ chuwach ri e jastaq che kubʼano che kmakun chi jumul. We kukoj uchuqʼabʼ che usukʼumaxik ri rachilanik rukʼ ri Jehová, qastzij riʼ che ksach umak rumal. Xuqujeʼ rukʼ ri kitobʼanik ri e kʼamal bʼe kkunik ktzalij chi jumul pa ri congregación. w21.10 6 párrs. 16-18

Ri Jesús xaq xiw ri Jehová xuya uqʼij, are chiʼ kʼo pa ri kaj xuqujeʼ are chiʼ kʼo pa ri uwach Ulew (Luc. 4:8). Y xukʼut chkiwach ri utijoxelabʼ che je kkibʼano. Ri areʼ xuqujeʼ ri utijoxelabʼ kʼo ta jumul xkikoj wachbʼal che uyaʼik uqʼij ri Dios. Rumal che ri Dios are jun uxlabʼal, kʼo ta jun jastaq che kkibʼan ri winaq kkunik kukʼut ri qas nim ubʼanik (Is. 46:5). ¿La utz che kyaʼ kiqʼij ri e tyox ri kbʼix santo chke? O ¿la utz che kbʼan chʼawem chkiwach? Pa ri ukabʼ che ri Diez Mandamientos che xuya ri Jehová, xubʼij ri e tzij re ri texto rech kimik. Ri kkaj kkibʼan ri kubʼij ri Dios, qas kkibʼan ri e taqanik xuyaʼo. Ri winaq che kʼo ketaʼmabʼal kkibʼij che ri cristianos re ri nabʼe siglo xaq xiw xkiya uqʼij ri Dios. Kimik, ri testigos rech Jehová are kqesaj kiwach ri cristianos re ri nabʼe siglo. w21.10 19, 20 párrs. 5, 6

Ri Jesús xubʼij kan chke ri cristianos re ri nabʼe siglo che keʼel bʼi pa Judea are chiʼ Jerusalén ksutix «rij kumal ajchʼojabʼ» (Luc. 21:20-24). Are chiʼ kkʼulmataj wariʼ rajawaxik keʼanimaj bʼi pa taq ri juyubʼ. We kkibʼano kekolotaj riʼ, are kʼu rajawaxik kkiya kan kʼi taq jastaq kech. Ri wuj La Atalaya xuya ubʼixik wariʼ: «Xkiya kan ri kachoch, ri kulew y xaq xiw xkikʼam bʼi ri qas kajwataj chke. Xkikubʼsaj kikʼuʼx che ri Jehová keʼutoʼo, ri más nim ubʼanik chkiwach are uyaʼik uqʼij ri Jehová chuwach apachike jastaq». Xuqujeʼ kubʼij: «Pa jubʼiqʼ tiempo kqakʼut na jachike ri más nim ubʼanik chqawach. We are más nim ubʼanik ri jastaq qe o are ri kolotajem kuya ri Jehová chke ri ketobʼan rukʼ. Weneʼ kʼax ubʼanik, are kʼu rajawaxik kqatijoj apan qibʼ chuwach ri e jastaq riʼ». w22.01 4 párrs. 7, 8

Are chiʼ kʼateʼ xeʼel lo ri israelitas pa Egipto, ri Jehová xubʼij ri ubʼiʼ y ri e ubʼantajik che ri Moisés. Xubʼij wariʼ: «¡Ri Ajawaxel! ¡Ri Ajawaxel! ¡Dios junalik, xuqujeʼ toqʼobʼisal wachaj, kochʼonel xuqujeʼ nim pa loqʼoqʼebʼal kʼuxaj xuqujeʼ qastzij! Ri kkanaj jik pa ri loqʼoqʼebʼal ukʼuʼx pa kiwiʼ kʼi mil taq ijaʼlil, xuqujeʼ kusach mak che ri bʼanoj etzelal, ri kʼulelanik xuqujeʼ ri makaj» (Éx. 34:6, 7). Rukʼ waʼ ri jeʼlikalaj taq tzij, ri Jehová xukʼutu che kʼo ta kjunamataj wi ri nim loqʼoqʼebʼal ukʼuʼx. Chqilampeʼ jasche. Ri Jehová xaq xiw ta xubʼij che kʼo loqʼoqʼebʼal ukʼuʼx, xaneʼ che «nim pa loqʼoqʼebʼal kʼuxaj». Wajun bʼantajik riʼ kriqitaj pa nikʼaj chi textos re ri Biblia (Núm. 14:18; Neh. 9:17; 13:22; Sal. 86:15; 103:8; Joel 2:13; Jon. 4:2). Pa ronojel xaq xiw kchʼaw chrij ri Jehová, chrij ta nijun winaq. ¿La mat qastzij che nim ubʼanik che ri Jehová sibʼalaj kchʼaw chrij ri nim loqʼoqʼebʼal ukʼuʼx? w21.11 2, 3 párrs. 3, 4

Jun chi kʼutbʼal che utz kkesaj uwach ri e kʼulaj are ri kech ri apóstol Pedro y ri rixoqil. Are chiʼ qʼaxinaq chi seis ikʼ o jun junabʼ che ri apóstol Pedro retaʼmam chi uwach ri Jesús, kʼo jun jastaq nim ubʼanik rajawaxik xuchaʼ pa ri ukʼaslemal. Rumal che ajchapal kar, are chiʼ xbʼix che rumal ri Jesús che kteriʼ chrij rech kupatanij más ri Jehová, rajawaxik riʼ xchoman chrij ri kajwataj che ri ufamilia (Luc. 5:1-11). Xraj xteriʼ bʼi chrij ri Jesús che utzijoxik utzij ri Dios. Y qetaʼm, che qas xtoʼ rumal ri rixoqil. Ri Biblia kubʼij che jun tiempo, xteriʼ ri rixoqil chrij are chiʼ kʼastajinaq chi ri Jesús (1 Cor. 9:5). Ri Pedro xkunik xeʼupixbʼej ri e kʼulanik, rumal che xtoʼ rumal ri rixoqil (1 Ped. 3:1-7). Qas qʼalaj che ri Pedro y ri rixoqil xkikubʼsaj kikʼuʼx che ri Jehová kuya na ri rajawaxik chke we are qas kkilij ri uQʼatbʼal tzij ri Dios pa kikʼaslemal (Mat. 6:31-34). w21.11 18 párr. 14

Ri apóstol Pablo xeʼuloqʼoqʼej ri cristianos, rumal laʼ xkos ta che kitoʼik (Hech. 20:31). Rumal riʼ sibʼalaj xajawax kumal. Jun kʼutbʼal, kʼo jun qʼij are chiʼ ri e kʼamal bʼe re Éfeso xketaʼmaj che kkil ta chi uwach, «konojel kʼut sibʼalaj xeʼoqʼik» (Hech. 20:37). Junam rukʼ wariʼ, ri e kʼamal taq bʼe kimik kekiloqʼoqʼej ri kachalal, paneʼ sibʼalaj e kosinaq kkiya ri kitobʼanik chke (Filip. 2:16, 17). Are kʼu kʼo jujun taq mul rajawaxik kkikoj kichuqʼabʼ chuwach jujun taq jastaq. ¿Jas ketowik? Ri e kʼamal taq bʼe che kʼo kʼi kkibʼano utz che kechoman chrij ri ukʼutbʼal ri Pablo. Ri areʼ, are ta jun tzʼaqatalaj achi; xaneʼ kʼi mul xukoj uchuqʼabʼ rech kubʼan ri utz (Rom. 7:18-20). Paneʼ xajwatajik xukoj uchuqʼabʼ chuwach kʼi taq kʼax, xubʼan ta kebʼ ukʼuʼx y xuya ta bʼe che ri xuriqo xresaj ri ukikotemal. We ri e kʼamal taq bʼe kkesaj uwach ri Pablo, kkipatanij ri Jehová rukʼ kikotemal paneʼ kkiriq kʼax. w22.03 26 párrs. 1, 2

Pa Levítico 19:3 kubʼij che rajawaxik nim kil wi ri qʼij sábado. Rumal che ri oj cristianos oj kʼo ta chi chuxeʼ ri Taqanik xyaʼ che ri Moisés, rajawaxik ta chik kqanimaj ri taqanik rech ri qʼij sábado. Are kʼu kqetaʼmaj kʼi taq jastaq chrij ri kkibʼan ri israelitas pa ri qʼij riʼ y ri tewchibʼal kyaʼ chke rumal che kenimanik. Pa ri qʼij sábado keʼuxlan che ronojel ri kichak y are kkiqʼijilaj ri Jehová. Rumal laʼ ri Jesús kbʼe pa taq ri sinagogas y kusikʼij uwach ri uTzij ri Dios (Éx. 31:12-15; Luc. 4:16-18). Ri taqanik che kʼo pa Levítico 19:3 che kubʼij che rajawaxik nim kil wi ri sábados, kukʼut chqawach che rajawaxik kqesaj qatiempo ronojel qʼij rech kqabʼan ri jastaq re ri qakojonik. ¿La rajawaxik kqakʼex jujun taq jastaq pa ri qakʼaslemal rech kqabʼan wariʼ? We kqaya qatiempo rech kqanikʼoj ri jastaq re ri qakojonik, ri qachilanik rukʼ ri Jehová kubʼan más ko. Y wariʼ are jun jastaq che sibʼalaj nim ubʼanik rech kojux tastalikalaj taq winaq. w21.12 5 párr. 13

Ri Jesús xerachilaj kʼi kiwach taq winaq y xwaʼ kukʼ ri e qʼinomabʼ, are kʼu xuqujeʼ xkʼojiʼ kukʼ ri e mebʼaʼ y ri keʼajawax taj. Xuqujeʼ xutoqʼobʼisaj kiwach ri ajmakibʼ. Kʼo jujun winaq che nim kkibʼan che kibʼ chkiwach nikʼaj chik utz ta xkil ri xubʼan ri Jesús. Xkitaʼ wariʼ chke ri utijoxelabʼ ri Jesús: «¿Jasche kixwaʼik, kixukʼiʼan kukʼ toqil taq alkabʼal xuqujeʼ kukʼ ajmakibʼ?». Ri Jesús xubʼij chke ri kubʼij ri texto re kimik (Luc. 5:29-31). Are chiʼ majaʼ kpe ri Mesías cho ri uwach Ulew, ri profeta Isaías xutzʼibʼaj kan chrij che kkʼulax ta kumal ri winaq. Xubʼij: «Ri winaq kketzelaj uwach xuqujeʼ kkixutuj. Are jun achi kʼisnaq pa ri qʼoxomal, ri naqʼatal che uriqik kʼax. Jachaʼ jun ri man taqal ta ukaʼyexik, xqetzelaj uwach, man xujok ta il che» (Is. 53:3). Ri tzʼibʼam kan pa wajun profecía are che ri Jesús kajawax ta kumal ri winaq, rumal laʼ ri judíos xkimay ta riʼ are chiʼ xkilo che xetzelax uwach. w21.05 8, 9 párrs. 3, 4

E jujun cristianos aninaq ta kkibʼan pa kikʼaslemal ri pixabʼ re ri uTzij ri Dios (Sant. 1:22). E nikʼaj chik are más nim kekil wi ri qʼinomabʼ taq winaq (Sant. 2:1-3). Y e kʼo jujun kkichomaj ta na ri kkibʼij (Sant. 3:8-10). We cristianos riʼ kʼo jujun jastaq utz taj tajin kkibʼano, are kʼu ri Santiago xuchomaj taj che kkun ta chik keʼutoʼo. Rukʼ utzilal xubʼij chke ri rajawaxik kkibʼano y xubʼij chke ri cristianos che uriqom kʼax ri kikojonik che kkitzukuj ri kitobʼanik ri e kʼamal taq bʼe (Sant. 5:13, 14). Ri kqetaʼmaj: Chqilaʼ ri qas tajin kkʼulmataj kukʼ ri e qachalal y cheqatoʼ. E kʼi winaq ri kkimaj retaʼmaxik ri kukʼut ri Biblia, weneʼ qas ta aninaq kkibʼanalaʼ pa kikʼaslemal ri kketaʼmaj (Sant. 4:1-4). Weneʼ rajawaxik nim tiempo rech kkikʼex ri kibʼantajik y keʼux cristianos. Oj rajawaxik kqabʼij che ri tajin kretaʼmaj chrij ri Biblia jas rajawaxik kukʼex pa ukʼaslemal. Are kʼu xuqujeʼ chqayaʼ ri tobʼanik che; chqakubʼsaj qakʼuʼx che ri Jehová keʼukʼam lo ri machʼalik taq winaq pa ri utinamit y keʼutoʼo rech kkikʼex ri kikʼaslemal (Sant. 4:10). w22.01 11 párrs. 11, 12

Qonojel ri oj cristianos kqaj che kqatoqʼobʼisaj kiwach ri e nikʼaj chik junam rukʼ ri kubʼan ri Jehová. ¿Jasche? Jun rumal are che ri Jehová kutatabʼej ta ri kichʼawem ri winaq che kkitoqʼobʼisaj ta wachaj. Sibʼalaj kqachajij qibʼ chuwach wariʼ, rumal che kqaj taj che ri Jehová kutatabʼej ta ri qachʼawem. Kqaj kqatatabʼej «ri ubʼochiʼnik ri mebʼaʼ», wariʼ kraj kubʼij che amaqʼel kqaj kqatatabʼej ri cristiano che tajin kuriq kʼax. Xuqujeʼ nim ubʼanik chqawach ri kubʼij pa ri Biblia: «Ri jun ri man elinaq ta ukʼuʼx chke nikʼaj chik, ri Dios man kel ta ukʼuʼx che ri areʼ are taq kuqʼat na tzij puwiʼ» (Sant. 2:13). We kojmachʼachʼik y kqachʼobʼo che kajwatajik ktoqʼobʼisax qawach, wariʼ kubʼano che oj kqaj kqatoqʼobʼisaj kiwach ri e nikʼaj chik. Más na kqaj kqakʼut wariʼ, are chiʼ jun winaq che ubʼanom jun nimalaj makaj ktzalij lo pa ri congregación. Ri e kʼutbʼal kech ri winaq re ri Biblia, ri xkʼojiʼ kinojibʼal y xkitoqʼobʼisaj wachaj, kojkitoʼo rech keqatoʼo y kqatoqʼobʼisaj kiwach ri e nikʼaj chik. w21.10 12 párrs. 16, 17

Pa ri kʼisbʼal chaqʼabʼ re ri ukʼaslemal ri Jesús pa ri uwach Ulew, xutzukuj jun lugar ri xaq utukel kkʼojiʼ wi y xubʼan uchʼawem che ri Jehová: pa ri jardín re Getsemaní. Chilaʼ xuya jun pixabʼ nim ubʼanik chrij ri chʼawem chke ri utijoxelabʼ. Are chiʼ xeʼopan pa ri jardín re Getsemaní, weneʼ más nikʼaj aqʼabʼ chik, sibʼalaj matam chi chke konojel. Ri Jesús xubʼij chke ri rapóstoles che kewar taj, tekʼuriʼ xbʼe che ubʼanik uchʼawem (Mat. 26:37-39). Are chiʼ xtzalij loq, e warinaq konojel. Rumal riʼ xubʼij chi wariʼ chke: «Chixkʼaskʼatoq, chibʼanaʼ chʼawem rukʼ Dios» (Mat. 26:40, 41). Ri areʼ retaʼm che sibʼalaj e kosinaq, rumal laʼ xutoqʼobʼisaj kiwach y xubʼij chke che «ri [k]icuerpo man kʼo ta uchuqʼabʼ». Paneʼ jeriʼ ubʼanom chik, kamul xbʼe chi na che ubʼanik uchʼawem y are chiʼ xtzalij loq xuqujeʼ xeʼuriqo tajin ta kkibʼan kichʼawem, xaneʼ e roqoroj che waram (Mat. 26:42-45). w22.01 28 párrs. 10, 11