Mayo

Are chiʼ xilitaj ri 144,000 rumal ri Juan xuqujeʼ xeril chi «kʼiʼalaj winaq». Xaq xiw che ri ukabʼ jupuq winaq riʼ kbʼan taj keʼajilaxik. ¿Jas xubʼij ri Juan chkij wajun jupuq riʼ? Ri areʼ xubʼij: «E are waʼ ri e elinaq uloq pa ri nimalaj kʼaxkʼolil, ri kichʼajom ri katzʼyaq, xkisaqarisaj pa ri ukikʼel ri Alaj Chij» (Apoc. 7:14). Are chiʼ qʼaxinaq chi ri nimalaj kʼaxkʼolil ri «kʼiʼalaj winaq» riʼ kekʼojiʼ kan cho ri uwach Ulew y kkiriq kʼi tewchibʼal (Sal. 37:9-11, 27-29; Prov. 2:21, 22; Apoc. 7:16, 17). Paneʼ kojbʼe pa ri kaj o kojkanaj kan cho ri uwach Ulew rajawaxik che qonojel oj kʼo «pa ri foto» che kuya ubʼixik pa ri wuj re Apocalipsis capítulo 7. Are chiʼ kopan ri tiempo riʼ, qastzij riʼ che ri upatanelabʼ ri Dios sibʼalaj kekikotik rumal che are xkitoʼ uwiʼ ri uqʼatbʼal tzij ri Jehová. w22.05 16 párrs. 6, 7

We kʼo jumul achaʼom ubʼanik jun jastaq nim ubʼanik, qastzij riʼ che atom anojibʼal che ri Jehová rumal che awetaʼm che kajwataj ri utobʼanik chawe (Sant. 1:5). Ri qʼatal tzij Salomón xutzʼibʼaj wariʼ: «Chuwach apachike jun jasach chik chariqaʼ ri noʼj» (Prov. 4:7). Are kʼu ri areʼ tajin ta kchʼaw chrij apachike nojibʼal, xaneʼ are ri nojibʼal che petinaq rukʼ ri Jehová. Are kʼu, ¿la kkun ri unojibʼal ri Dios kojutoʼ chuwach ri jastaq che kqariq pa qakʼaslemal? Kkunik. Rech kqariq ri qastzij nojibʼal rajawaxik kqetaʼmaj xuqujeʼ kqabʼan ri xkikʼut kan e kebʼ achijabʼ che sibʼalaj xkʼojiʼ kinojibʼal. Nabʼe, kojchʼaw chrij ri Salomón. Ri Biblia kubʼij che «ri Dios xuya nimalaj noʼj che ri Salomón xuqujeʼ etaʼmabʼal» (1 Rey. 4:29). Y, ukabʼ, kojchʼaw chrij ri ukʼutbʼal ri Jesús, ri achi che xkʼojiʼ más unojibʼal cho ri uwach Ulew (Mat. 12:42). Jun profecía xubʼij wariʼ chrij ri Jesús: «Ri ruxlabʼal ri Ajawaxel kjeqiʼ na amaqʼel puwiʼ, kuya kʼu na unoʼj, kʼoxomanik» (Is. 11:2). w22.05 20 párrs. 1, 2

Qonojel kojkunik kqakoj qametas paneʼ nim chi qajunabʼ. Jun kʼutbʼal, are ri qachalal ixoq che kʼo 75 ujunabʼ, Beverley ubʼiʼ. Rumal jun yabʼil, ri areʼ kuchʼij ta más kbʼinik. Are kʼu sibʼalaj kraj ktobʼan che ujachik ri invitación re ri Unaʼtabʼalil ri ukamikal ri Jesús. ¿Jas xubʼano? Xchoman chrij jun jastaq che kraj kubʼano, y xkikotik are chiʼ xkun che ubʼanik. Ri xubʼano, xeʼutoʼ ri e nikʼaj chik rech xkitzijoj más ri utzij ri Dios. Wariʼ kukʼutu che ri Jehová nim kril wi ri chuqʼabʼ kkikoj ri e qachalal nim chi kijunabʼ che upatanixik paneʼ kʼo jujun taq kʼax pa ri kikʼaslemal (Sal. 71:17). Chqakojoʼ qametas che qas kojkun che ubʼanik. Chqakʼutuʼ bʼantajik che utz kril ri Jehová. Chqakojoʼ qachuqʼabʼ rech kqetaʼmaj ubʼanik kʼi jastaq che upatanixik más ri Dios y rech kojkoj más pa ri utinamit. Chqatzukuj ri kqabʼano rech keqatoʼ más ri e qachalal. We je kqabʼano, sibʼalaj kojutewchij ri Jehová y, junam rukʼ ri Timoteo, konojel kkilo che tajin kojkʼiy pa ri qakojonik (1 Tim. 4:15). w22.04 27 párrs. 18, 19

¿Y we xikoj ronojel ichuqʼabʼ tekʼuriʼ ri iwalkʼwal kubʼij che kraj taj kupatanij ri Jehová? Michomaj che utz ta xibʼan che ri ichak. Ri Jehová uyaʼom chqe qonojel —xuqujeʼ che ri iwalkʼwal— che kqachaʼ ri kqaj kqabʼano, we kqapatanij o kqapatanij taj. Kichomaj taj che ktzalij ta chi loq. Chnaʼtaj chiwe ri kʼambʼal noʼj che xukʼut ri Jesús chrij ri ala che xel bʼi cho rachoch (Luc. 15:11-19, 22-24). Wajun ala riʼ xuya kan ri utzalaj bʼe, are kʼu xtzalij loq. Tat nan, ri Jehová uyaʼom jun nimalaj sipanik chiwe che kikʼiyisaj ri iwalkʼwal pa ri qastzij kojonem (Sal. 78:4-6). Qetaʼm che wariʼ kʼax ubʼanik rumal laʼ sibʼalaj nim kqil ri chuqʼabʼ che tajin kikojo che kikʼut chrij ri Jehová chke ri iwalkʼwal. Kiya ta kan ukʼutik chke ri iwalkʼwal ri utaqanik ri Jehová (Efes. 6:4). We je wariʼ kibʼano ri Jehová kkikot riʼ iwukʼ rumal ri ichak che tajin kibʼano. w22.05 30, 31 párrs. 16-18

We qonojel kqaya che ri Jehová ri más utz kʼo qukʼ, kkʼojiʼ jamaril y utzilal chqaxoʼl kukʼ ri e qachalal. Are riʼ ri xkibʼan ri cristianos re ri nabʼe siglo. Ri e areʼ jalajoj taq ri chak y ri eqeleʼn xkibʼano (1 Cor. 12:4, 7-11). Are kʼu ri xkibʼano xa ta rech kqʼalajinik jachin ri más nim ubʼanik o rech kechʼojinik. Xaneʼ, ri Pablo xubʼij pa ri ucarta chke ri efesios che chkijujunal kkibʼan ronojel ri kekunik kkibʼano rech «kkʼiy ri ucuerpo ri Cristo» o kkiya kichuqʼabʼ ri e kʼo pa ri congregación. Xuqujeʼ xubʼij: «Are taq kʼu ri jujun utzʼaqatil utz kechakunik, ronojel ktajin kkʼiyik ktajin ktzʼaqat pa loqʼoqʼebʼal kʼuxaj» (Efes. 4:1-3, 11, 12). Are chiʼ kkibʼan wariʼ ktobʼanik rech kʼo utzilal y jamaril pa ri congregación, wariʼ xuqujeʼ kilitaj pa taq ri congregaciones kimik. Majunamisaj awibʼ kukʼ ri e nikʼaj chik. Xaneʼ are chawilaʼ ri xubʼan ri Jesús y chakojoʼ achuqʼabʼ rech kakʼut ri e ubʼantajik. Mayaʼ kan upatanexik ri Jehová rukʼ ri jastaq che katkunik kabʼano, rumal che areʼ «man ksach ta pa ujolom ri chak ri [a]bʼanom» (Heb. 6:10). Rumal che ri areʼ nim kril wi ri chuqʼabʼ kakojo rech katqaj chuwach. w22.04 14 párrs. 15, 16

Sibʼalaj kuya kikotemal retaʼmaxik che oj ta kojchowik we ri Jehová kukuy umak jun winaq. Are kʼu, kʼo jun jastaq che oj kojchowik. ¿Jas riʼ? Are we kqakuy umak jun winaq che xubʼan jun nimalaj kʼax chqe, paneʼ kutaʼ o kutaʼ ta sachbʼal umak. Are kʼu rajawaxik kqakuy umak rech kqesaj ri oyowal pa qanimaʼ y kʼax ta chi kqanaʼ chrij wajun winaq riʼ. Are kʼu, ubʼanik wariʼ kukʼam bʼi tiempo y weneʼ kʼax ubʼanik, más na we sibʼalaj kʼax ri xubʼan chqe. Ri wuj La Atalaya 15 re septiembre 1994 kubʼij: «Ukuyik umak jun winaq, kraj ta kubʼij che utz kqil ri xubʼano. Chuwach jun cristiano, ukuyik ri mak kraj kubʼij che kqaya kan ronojel ri jastaq pa uqʼabʼ ri Jehová. Rumal che are ri Qʼatal tzij cho ronojel ri uwach Ulew y kuqʼat na tzij pa ri tiempo che kajwatajik». w22.06 9 párrs. 6, 7

Ri Jehová utzujum che pa waʼ taq qaqʼij keʼumulij na jun jupuq winaq re ronojel tinamit, chʼabʼal rech pa junamam kkiya uqʼij. Wajun jupuq winaq riʼ kbʼix «kʼiʼalaj winaq» chke (Apoc. 7:9, 10). Paneʼ pa wajun jupuq riʼ e kʼo achijabʼ, ixoqibʼ, akʼalabʼ re jalajoj taq tinamit, konojel e kʼo pa jun nimalaj familia che kkiloqʼoqʼej kibʼ y kʼo jun utz achilanik chkixoʼl (Sal. 133:1; Juan 10:16). Rukʼ kikotemal kkibʼij chke konojel ri e winaq che ri Dios kubʼan na kotzʼiʼj che ri uwach Ulew (Mat. 28:19, 20; Apoc. 14:6, 7; 22:17). We at jun chke ri kʼiʼalaj winaq, qastzij riʼ che sibʼalaj nim kawil ri kutzujuj ri Dios chawe. Ri Itzel kraj che kqakubʼsaj ta qakʼuʼx chrij ri Jehová. Y che kqachomaj che kubʼan ta ri kutzujuj. We kqaya bʼe che ri Satanás kusach uwach ri qeyebʼal, kʼo ta chi ukowil qakʼuʼx riʼ y weneʼ kqaya kan upatanixik ri Jehová. w22.06 20, 21 párrs. 2, 3

We rukʼ ronojel qanimaʼ kqeyeʼj ri utz taq jastaq che kpe na, kojutoʼo rech kqachʼij ri nimaʼq taq kʼax pa ri qakʼaslemal. Chnaʼtaj chqe che ri Jesús xubʼij kanoq che kbʼan na kʼax chqe (Juan 15:20). Rumal laʼ, we kojchoman chrij ri tewchibʼal kuya na ri Jehová chqe kojutoʼo rech kojel ta kan pa ri bʼe che kojukʼam bʼi pa ri kʼaslemal che kʼo ta ukʼisik. Chqilampeʼ jas xubʼan ri eyebʼal che utoʼik ri Jesús rech xuya ta kan upatanexik ri Jehová paneʼ retaʼm che kkamisaxik. Pa ri qʼij re ri pentecostés re ri junabʼ 33, ri apóstol Pedro xchʼaw chrij jun profecía re taq ri Salmos che sibʼalaj utz kubʼan che ubʼixik ri jamaril y ri kubʼsal kʼuʼx che xkʼojiʼ rukʼ ri Jesús: «Kʼo na kulbʼal ukʼuʼx. Man kinya ta kʼu kan chupam ri muqbʼal, man kyaʼ ta la kʼolbʼal chi kqʼay ri ucuerpo ri sukʼalaj pataninel ech la. [...] Kinnojisaj na la che kikotemal, rumal ri kʼolem la wukʼ» (Hech. 2:25-28; Sal. 16:8-11). Ri Jesús qas retaʼm che kkʼastajisax rumal ri Dios y che ktzalij chi jumul rukʼ ri uTat pa ri kaj (Heb. 12:2, 3). w22.10 25 párrs. 4, 5

Jumul ri Santiago y ri Juan xkitaq bʼi ri kinan che ubʼixik che ri Jesús che kkaj ketʼuyiʼ rukʼ pa ri uQʼatbʼal tzij (Mat. 20:20, 21). Ri e kebʼ apóstoles riʼ xkibʼan nim che kibʼ y xkirayij kʼi taq jastaq (Prov. 16:18). Xaq xiw ta ri Santiago y ri Juan kʼo xesach wi. Xaneʼ xuqujeʼ «ri lajuj [apóstoles], are taq xkito, xpe koyowal chkij ri kebʼ kachalal kibʼ» (Mat. 20:24). Chojchomanampeʼ chrij ri chʼoj che xkʼojiʼ chkixoʼl ri apóstoles. ¿Jas xubʼan ri Jesús kukʼ? Xpe ta royowal. Xubʼij ta chke che keʼutzukuj chi nikʼaj achijabʼ che más kemachʼachʼik y che más kkiloqʼoqʼej kibʼ. Xaneʼ xeʼutoʼo rech kkichʼobʼo che utz ta ri xkibʼano, rumal che retaʼm che kʼo jun utzalaj kanimaʼ (Mateo 20:25-28). Ri Jesús amaqʼel xeʼuloqʼoqʼej ri rapóstoles paneʼ kʼi mul xesachik w23.03 28, 29 párrs. 10-13

Chatchoman chrij ronojel ri at kunaq che ubʼanik kʼa kimik riʼ. Jun kʼutbʼal, weneʼ pa kʼi junabʼ anikʼom uwach ri Biblia, y wariʼ at utoʼm rech qas kakojo che are ri uTzij ri Dios. Are kʼu ri más nim ubʼanik, are che awetaʼmam uwach y kaloqʼoqʼej ri ajchaqʼe wajun wuj riʼ. Sibʼalaj kawaj ri Jehová rumal laʼ xajach ri akʼaslemal che y xabʼan aqasanjaʼ. ¡Sibʼalaj utz ri xabʼano! Qastzij riʼ che are chiʼ majaʼ kabʼan aqasanjaʼ, xariq jujun taq jastaq che xukoj pa kʼax ri akojonik. Are kʼu, are chiʼ knimar más ri akojonik weneʼ kariq chi nikʼaj taq kʼax. Ri Satanás kraj che kaya kan uloqʼoqʼexik ri Jehová y kawachilaj ta chik (Efes. 4:14). Mayaʼ bʼe che kubʼan wariʼ chawe. ¿Jas kattoʼwik rech kaya ta kan upatanexik ri Jehová y kabʼan ri xatzujuj che are chiʼ xajach ri akʼaslemal? Rajawaxik kaya ta kan kʼiyem pa ri akojonik, kraj kubʼij, kataqej «taqenik kʼa ktzʼaqat na» ri akojonik (Heb. 6:1). w22.08 2 párrs. 1, 2

Pa ri familia, rajawaxik che konojel kkitzijoj ta jujun taq jastaq che kkʼulmataj pa ri kachoch. Jun kʼutbʼal, weneʼ jun ixoq kubʼan jun jastaq che xaq kutzeʼj uwach ri rachajil y tekʼuriʼ ri rachajil kubʼij chi chke nikʼaj chik. ¿La mat qastzij che utz taj kbʼan wariʼ? Utz taj, rumal che kraj ri rixoqil kubʼan ta kʼax riʼ che ri kunaʼo y kresaj ta ukʼixbʼal riʼ (Efes. 5:33). Ri e tat nan rajawaxik knaʼtaj chke che ri e kalkʼwal alabʼom alitomabʼ kkaj che nim keʼilik. Rumal laʼ, kekiyoqʼ taj o kkibʼij ta chke e nikʼaj chik ri utz taj kkibʼano (Col. 3:21). Y ri akʼalabʼ xuqujeʼ rajawaxik kkiya ta ubʼixik jastaq che kresaj ukʼixbʼal ri familia. We konojel kkikoj kichuqʼabʼ rech kkitzijoj ta ri kkʼulmataj pa ri familia, kkʼojiʼ utzilal riʼ chkixoʼl. w22.09 10 párr. 9

Ri Jehová xtzijon rukʼ ri Job y xubʼij che ri nimalaj unojibʼal y che rukʼ loqʼoqʼebʼal keʼuchajij ronojel ri jastaq che ubʼanom. Xchʼaw chkij kʼi mayibʼalalaj taq awaj (Job 38:1, 2; 39:9, 13, 19, 27; 40:15; 41:1, 2). Xuqujeʼ ri Jehová xukoj ri Elihú rech xuya uchuqʼabʼ ri Job y xukubʼsaj ukʼuʼx. Wajun utzalaj ala riʼ xunaʼtajisaj che ri Job che ri Dios amaqʼel keʼutewchij ri winaq che kkichʼij ri kʼax. Are kʼu ri Jehová xuqujeʼ xukoj ri Elihú rech xuya utzalaj taq pixabʼ che ri Job. Rukʼ utzalaj taq tzij ri Elihú xutoʼ ri Job rech kuchʼobʼo jasche tajin kuriq kʼax, rumal che xunaʼtajisaj che che ri Jehová más kʼo na uchuqʼabʼ chkiwach ri e winaq. Ri Jehová xuqujeʼ xutaq ri Job che ubʼanik jun jastaq: kubʼan uchʼawem pa kiwiʼ ri oxibʼ rachiʼl che xemakunik (Job 42:8-10). Y kimik riʼ, ¿jas kubʼan ri Jehová che qatoʼik rech kqachʼij ri kʼax che kqariqo? Qastzij wi che ri Jehová ktzijon ta qukʼ junam rukʼ ri xubʼan rukʼ ri Job. Are kʼu kimik kukoj ri Biblia rech ktzijon qukʼ (Rom. 15:4). w22.08 11 párrs. 10, 11

Pa ri congregación re Roma, xekʼojiʼ cristianos judíos y re nikʼaj chi tinamit. Rajawaxik ta chik knimax ri Taqanik che xyaʼ che ri Moisés, ri e areʼ kekun chik kkitij jujun jastaq (Mar. 7:19). Kʼo jujun cristianos judíos kʼo ta kubʼij kikʼuʼx are chiʼ kkitij jujun taq jastaq, are kʼu e kʼo nikʼaj chik utz ta xkilo. Y wariʼ xubʼano che xkʼojiʼ tasoj ibʼ pa ri congregación. Rumal laʼ, ri apóstol Pablo xubʼij chke jasche sibʼalaj nim ubʼanik che kkʼojiʼ jamaril chkixoʼl. Xeʼutoʼ ri cristianos che uchʼobʼik che ri chʼoj kubʼan kʼax chke e areʼ y chke ri qachalal pa ri congregación (Rom. 14:19, 20). Ri Pablo xubʼij che kukʼex ri uchomanik rech umak ta rech ri areʼ ketzaq e nikʼaj chik (1 Cor. 9:19-22). Junam rukʼ ri Pablo, ri oj xuqujeʼ kojkunik kqaya kichuqʼabʼ e nikʼaj chik y kojtobʼanik rech kʼo ta chʼoj pa ri congregación are chiʼ jun qachalal utz ta kril jun jastaq. w22.08 22 párr. 7

¿La mat qastzij che are chiʼ kʼo jun qameta kqakoj qachuqʼabʼ rech kojkunik kqabʼano? Junam rukʼ wariʼ, kqakoj qachuqʼabʼ rech kqanimaj ri utaqanik ri Dios. Ri Jehová kojutoʼ che ubʼanik wariʼ y nojimal chi nojimal kojkun che ubʼanik (Sal. 84:5, 7). Ri Jehová kunaʼtajisaj chqe rukʼ loqʼoqʼebʼal che ronojel ri utaqanik xa ta jun eqaʼn (1 Juan 5:3). Xaneʼ, kojuchajij y wariʼ kajwataj chqe ronojel taq qʼij. Chojchoman chrij jun chakubʼal re chʼoj che xubʼij ri apóstol Pablo (Efes. 6:14-18). Ri areʼ xubʼij: «Chikojoʼ ri sukʼil, je jas jun ajchʼoj kukoj chʼichʼ cho uwo ukʼuʼx», ¿jas xraj xubʼij? Che kqabʼan ri utaqanik ri Jehová pa ri qakʼaslemal. Junam rukʼ jun tobʼal uwo kʼuxaj che kuchajij ri animaʼ, ri utaqanik ri Jehová xuqujeʼ kuchajij ri qanimaʼ, kraj kubʼij, ri qabʼantajik. Rumal laʼ, sibʼalaj nim ubʼanik che kqakoj wajun tobʼal uwo kʼuxaj ronojel taq qʼij (Prov. 4:23). w22.08 29 párrs. 13, 14

Pa kʼi junabʼ, ri Biblia ukʼamon kibʼe ri upatanelabʼ ri Dios. ¿Jasche? Ri Jehová xubʼij che kqʼaxex uwach ri utzij pa nikʼaj chi wuj rech ksach ta uwach. Y ri winaq che xebʼanow wariʼ utz xkibʼan che ubʼanik. Jun achi che kʼo nim retaʼmabʼal xubʼij wariʼ chrij ri Escrituras Hebreas: «Xaq xiw ri Biblia qas tzʼaqat bʼanom che uqʼaxexik pa nikʼaj chi wuj». Rumal laʼ qas qetaʼm che ri Biblia kqasikʼij kimik are ri uchomanik ri Dios y che kʼextajinaq taj. «Ronojel utzalaj sipanik, ronojel tzʼaqatalaj sipanik chikaj kpe wi». Y ri Biblia are jun nimalaj sipanik che yaʼom chqe (Sant. 1:17). Junam rukʼ jun awachiʼl che kuya jun sipanik chawe che utz kawilo, kukʼutu che qas retaʼm awach. Are je ubʼanik ri Biblia, are chiʼ kqasikʼij uwach kqilo che ri Jehová retaʼm qawach y retaʼm ri kajwataj chqe. w23.02 2, 3 párrs. 3, 4

¿La kachʼobʼ ri kikotemal kuya ri kʼastajibʼal are chiʼ kuqʼat tzij ri Cristo pa ri Mil Junabʼ? Qonojel kqaj kqil kiwach ri e qachalal o ri e qachiʼl che e kaminaq. Ri Jehová xuqujeʼ kraj che kopan ri qʼij riʼ (Job 14:15). Chojchoman chkij ri kʼiʼalaj winaq che kekʼastaj na lo pa ronojel ri uwach Ulew. «Ri winaq ri xkibʼan ri utz» che kʼo ri kibʼiʼ pa ri wuj re kʼaslemal, «kekʼastaj na rech kkʼojiʼ na kikʼaslemal» (Hech. 24:15; Juan 5:29). Weneʼ are ri e qachalaxik ri nabʼe kekʼastaj loq. Xuqujeʼ, «ri xkibʼan etzelal», ri xekun taj xketaʼmaj uwach ri Jehová y xkipatanij taj, «kekʼastaj na che kʼoqotajem [qʼatoj tzij]». Konojel ri kekʼastaj na loq kʼo kʼi kketaʼmaj na (Is. 26:9; 61:11). Rumal laʼ, rajawaxik kyaʼ na jun nimalaj tijonik (Is. 11:10). w22.09 20 párrs. 1, 2

Ri Jehová ukʼutum che kʼo utaqanik pa kiwiʼ e jupuq qʼatal taq tzij. Xchʼojin pa kiwiʼ ri israelitas y xeʼutoʼo rech xkichʼak kan nimalaj ulew re ri Tzujum Ulew (Jos. 11:4-6, 20; 12:1, 7, 24). Ri Jehová kʼi mul ukʼutum che are ri aj chikaj. Are chiʼ ri Nabucodonosor, qʼatal tzij re Babilonia, xubʼan nim che ribʼ rumal ri uchuqʼabʼ y ri unimal ri uqʼatbʼal tzij, xchʼujarisax rumal ri Dios. Are chiʼ xul pa saq ri uchomanik, ri Nabucodonosor xuya uqʼij ri Nimalaj qʼatal tzij y xuchʼobʼo che kkʼis ta ri taqanik kʼo pa uqʼabʼ ri Jehová. Xuqujeʼ xubʼij che kʼo ta jun kkunik kuqʼatej uwach ri kraj kubʼano (Dan. 4:30, 33-35). Ri tzʼibʼanel re jun salmo xubʼij: «Utz rech ri tinimit ri are uDios ri Ajawaxel, ri tinimit ri uchaʼom rech kux rech» (Sal. 33:12). ¡Sibʼalaj utz che are ri Jehová kqaqʼijilaj oj! w22.10 15, 16 párrs. 13-15

Retaʼmaxik che kʼi profecías re ri Biblia e bʼantajinaq chik, kukubʼsaj qakʼuʼx che ronojel ri kubʼij qas kebʼantaj na. Rumal laʼ, junam kqanaʼ rukʼ jun tzʼibʼanel re jun salmo che xubʼij wariʼ che ri Jehová: «Rukʼ nimalaj rayinik weyeʼm chi kinkol la; ¡nuyoʼm kʼut ri weyebʼal nukʼuʼx chrij ri tzij la!» (Sal. 119:81). Ri Jehová sibʼalaj kojraj, rumal laʼ ubʼim kan pa ri Biblia che kʼo «jun eyebʼal kʼuxaj» pa ri petinaq (Jer. 29:11). Ri qeyebʼal pa ri petinaq kʼo ubʼanik rukʼ ri utzujum ri Jehová chqe, are ta ri kkibʼan ri winaq. Rumal laʼ, chqanikʼoj ri profecías re ri Biblia rech kqakubʼsaj más qakʼuʼx chrij ri kubʼij ri uTzij ri Dios. Ri jun chi rumal che kqakubʼsaj qakʼuʼx chrij ri Biblia are che keʼutoʼ ri winaq che keniman che ri kubʼij (Sal. 119:66, 138). Jun kʼutbʼal, e kʼo kʼulaj che xa jubʼiqʼ xraj xkijach kibʼ are kʼu rumal che xkinimaj ri kubʼij ri Biblia, kimik sibʼalaj kekikot chik. Y ri e kalkʼwal kkinaʼ ri kiloqʼoqʼebʼal ri kitat kinan y kʼo ta kkixeʼj wi kibʼ (Efes. 5:22-29). w23.01 5 párrs. 12, 13

¿La oj chomanaq chrij ri ubʼanom ri Dios che utzʼaqatisaxik ri utzujum chqe? Jun kʼutbʼal, ri Jesús xubʼij che ri uTat kuya ri jastaq che kqatijo y ri kajwataj chqe ronojel taq qʼij (Mat. 6:32, 33). Xuqujeʼ xubʼij che ri Jehová kuya ri ruxlabʼixel chqe we kqataʼ che (Luc. 11:13). Ri Jehová ubʼanom chi ri utzujum chqe. Y weneʼ knaʼtaj chi nikʼaj jastaq chqe che uyaʼom chi chqe junam rukʼ ri qamak che kukuyu, ri kubʼsal kʼuʼx che kuya chqe y ri kajwataj chqe pa ri qakojonik (Mat. 6:14; 24:45; 2 Cor. 1:3). We kojchoman chrij ri ubʼanom chi ri Dios pa ri qakʼaslemal, qas rukʼ ronojel qanimaʼ riʼ kqeyej ri utzujum. Qas qetaʼm che ri Jehová kubʼan ronojel ri tajin kutzujuj chqe. Junam rukʼ ri xubʼij jun salmista: «Sibʼalaj utz rech [...] ri keyen che ri Ajawaxel ri uDios. [...] Ri areʼ amaqʼel ujeqebʼam ri utzij» (Sal. 146:5, 6). w22.10 27 párr. 15; 28 párr. 17

¿La tzʼaqatinaq pa taq ri qaqʼij ri profecía chrij ri kbʼan che usukʼumaxik ri qastzij qʼijilanik? Jeʼ, umajim lo pa ri 1919, sibʼalaj e kʼi winaq e elenaq lo pa ri Nimalaj Babilonia, ri jupuq kojonem che qastzij ta ri kkikʼutu. Kojonel e okisam pa jun kʼolbʼal más utz na chuwach ri Tzujum Ulew: pa ri jeʼl taq jastaq re ri utinamit ri Jehová (paraíso espiritual) (Is. 51:3; 66:8). Xumaj lo pa ri 1919, ri e chaʼom kebʼe pa ri kaj kiriqom utzilal rumal ri jeʼl taq jastaq re ri utinamit ri Jehová. Rukʼ ri tiempo, ri cristianos che kʼo keyebʼal pa ri uwach Ulew, ri kbʼix nikʼaj chi chij chke, xuqujeʼ kiriqom ri utzilal y ri tewchibʼal re ri jeʼl taq jastaq re ri utinamit ri Jehová (Juan 10:16; Is. 25:6; 65:13). Rumal che kʼo upatanelabʼ ri Jehová pa ronojel ri uwach Ulew, ri jeʼl taq jastaq re ri utinamit xuqujeʼ kriqitaj pa ronojel ri uwach Ulew. Rumal laʼ, apastaneʼ ri tinamit oj kʼo wi pa ri uwach Ulew, kojkunik kqariq ri utzilal re ri jeʼl taq jastaq re ri utinamit ri Jehová are chiʼ rukʼ ronojel qanimaʼ kqaya qatobʼanik che ri qastzij qʼijilanik. w22.11 11, 12 párrs. 12-15

¿La kʼax kqabʼan che uchʼobʼik che ri Jehová are «junalik Dios» o kkam ta wi? (Is. 40:28). Xaq xiw ta at kanaʼ wariʼ. Ri Elihú xubʼij wariʼ chrij ri Dios: «Mawi kojkuʼinik keqajilaj taq ri e ujunabʼ» (Job 36:26). Are kʼu, we kqachʼobʼ ta rij jun jastaq, kraj ta kubʼij che qastzij taj kʼolik. Jun kʼutbʼal, weneʼ qas ta kqachʼobʼo jas ubʼanik kchakun ri luz. Are kʼu wariʼ kraj ta kubʼij che kʼo ta ri luz. Xaq junam rukʼ, we kqachʼobʼ taj jasche ri Jehová kʼo ta xkʼiy wi uloq y kʼo ta kekʼis wi. Kraj taj kubʼij che mat kʼo ukʼaslemal kʼo ta ukʼisik y che mat qastzij ri kubʼij ri Biblia chrij (Rom. 11:33-36). Xuqujeʼ, areʼ kʼolinaq chik are chiʼ majaʼ kbʼan ri kajulew che kʼo ri Qʼij y nikʼaj chi chʼumil chupam (Jer. 51:15). w22.12 2, 3 párrs. 3, 4

Weneʼ jujun taq mul kbʼix chqe che kqabʼan qachʼawem chkiwach e nikʼaj chi winaq. Jun kʼutbʼal, jun qachalal ixoq are chiʼ kbʼe che uyaʼik jun etaʼmanik re ri Biblia weneʼ kubʼij che ri rachiʼl che kubʼan jun chʼawem are chiʼ kkiya ri etaʼmanik. Weneʼ ri rachiʼl ri qachalal qas ta retaʼm uwach ri tijoxel y weneʼ rumal wariʼ are kraj kubʼan ri kʼisbʼal chʼawem. Je wariʼ kkunik kubʼij jujun jastaq che kʼo ubʼanik rukʼ ri rajawaxik che ri tijoxel. ¿Y we kbʼix che jun qachalal che kubʼan jun chʼawem chiʼ majaʼ keʼel che utzijoxik ri utzij ri Dios o pa jun riqbʼal ibʼ re congregación? Ri e qachalal che kyaʼ wajun eqeleʼn chke rajawaxik kechoman chrij ri rumal che kbʼan wajun riqbʼal ibʼ. Kbʼan ta ri e chʼawem rech kyaʼ pixabʼ chke ri qachalal o che uyaʼik anuncios. Pa kʼi chke ri e qariqbʼal ibʼ riʼ xa cinco minutos kyaʼik rech kbʼixox ri bʼixonem y kbʼan ri chʼawem. Rumal laʼ ri qachalal che kbʼanow ri chʼawem rajawaxik taj kukoj «kʼiʼalaj taq tzij», más na are chiʼ kumajij ri riqbʼal ibʼ (Mat. 6:7). w22.07 24 párrs. 17, 18

Ri Jesús xubʼij kanoq che pa ri kʼisbʼal taq qʼij kpe nimaʼq taq «yabʼil pa jalajoj taq kʼolbʼal» (Luc. 21:11). Retaʼmaxik wariʼ kuya jamaril chqe. ¿Jasche kuyaʼ? Rumal che qetaʼm chik che kpe na ri kʼaxkʼolil riʼ. Chqilampeʼ che ri xuya kan ubʼixik ri Jesús qas tajin kkʼulmataj kimik. Rumal laʼ kqanimaj wajun pixabʼ che xuya kan chqe ri oj kʼo pa ri kʼisbʼal taq qʼij. Xubʼij: «Chiwilaʼ iwibʼ mixsachik». Jun nimalaj yabʼil kuya kʼaxkʼolil pa ri qakʼaslemal. Are kʼu kqaya taj che wariʼ kubʼan chqe che kqanikʼoj ta chi ri Biblia o kojbʼe ta chi pa ri e riqbʼal ibʼ. Pa ri e qawuj y pa taq ri videos kqariq kʼutbʼal ke qachalal che xuqujeʼ tajin kkikʼulmaj kʼax, are kʼu kiyaʼom ta kan upatanexik ri Jehová. w22.12 17 párrs. 4, 6

Ri Jacob sibʼalaj kraj ri José (Gén. 37:3, 4). Y konojel ri e nikʼaj chi ralkʼwal xkil wariʼ, rumal laʼ xkimaj retzelaxik uwach ri José. Xuriq jun qʼij xkikʼayij bʼi chke jujun taq madianitas che bʼenam kij pa Egipto, jun tinamit che sibʼalaj naj kʼo wi. Y are chiʼ xeʼopan pa Egipto, ri madianitas xkikʼayij kan che ri Potifar, jun kinimal ri chajinelabʼ re ri faraón. Xaq kʼateʼ xkʼextaj ri ukʼaslemal ri José, nabʼe kanoq sibʼalaj kloqʼoqʼex rumal ri utat, are kʼu xaq kʼateʼ xa jun loqʼom pataninel chi pa Egipto (Gén. 39:1). Jujun taq mul kqariq kʼax junam rukʼ ri kkiriq konojel ri winaq (1 Cor. 10:13). O weneʼ ktzeʼx qawach, itzel kojilik o kbʼan chi jun kʼax chqe xa rumal che oj cristianos (2 Tim. 3:12). Apastaneʼ ri kʼax kqariqo, ri Jehová kojutoʼ rech utz kel ronojel chqawach. w23.01 14, 15 párrs. 3, 4

Weneʼ jujun taq mul rajawaxik kojchʼaw rukʼ jun qachalal che xubʼan jun kʼax chqe. Are kʼu, are chiʼ majaʼ kojchʼaw rukʼ, utz che kojchoman chrij wariʼ: «¿La qas wetaʼm ronojel ri xkʼulmatajik?» (Prov. 18:13). «¿La xa ta chubʼanik xubʼano?» (Ecl. 7:20). «¿La kʼo jumul jeʼ wariʼ xinbʼan in ojer kanoq?» (Ecl. 7:21, 22). «¿La ksukʼumataj ri kʼax we kinchʼaw rukʼ o xa knimataj más?». We kojchoman chrij ri preguntas riʼ are chiʼ majaʼ kojchʼawik, weneʼ kojutoʼo rech kqasach kan ri xkʼulmatajik y kqakʼut loqʼoqʼenik. Are chiʼ keqaloqʼoqʼej ri qachalal paneʼ kkibʼan jun kʼax chqe. Rukʼ wariʼ ri e winaq kkilo che oj ri oj qastzij cristianos y weneʼ kkaj kkiqʼijilaj ri Dios che kloqʼoqʼenik. Rumal laʼ, chqakojoʼ qachuqʼabʼ che ukʼutik ri loqʼoqʼebʼal che rajawaxik kukʼut jun qastzij cristiano. w23.03 31 párrs. 18, 19

Ri Biblia kukʼut ri uloqʼoqʼebʼal ri ajchaqʼe. Are kʼu rumal che kojraj, xaq xiw uyaʼom pa ri Biblia ri kajwataj chqe (Juan 21:25). Ri Jehová kukʼutu che kojraj are chiʼ utz kubʼan che qachʼabʼexik. Xuqujeʼ kuchololej ta kʼi taqanik chqe chrij ri rajawaxik kqabʼan pa qakʼaslemal, xaneʼ keʼukoj kikʼutbʼal ri upatanelabʼ, profecías y pixabʼ rech utz kqachaʼ pa ri qakʼaslemal. Je waʼ kubʼan ri Biblia che qatoʼik rech kqaloqʼoqʼej ri Dios y kqanimaj rukʼ ronojel qanimaʼ. Ri Biblia kukʼutu che ri Jehová qas kok il chqe rumal che kchʼaw chkij winaq che xkiriq kʼax junam qukʼ oj. Rumal laʼ, kojkunik kqajunamisaj qibʼ kukʼ (Sant. 5:17). Are chiʼ kqil ri xubʼan che kilik ri winaq ojer, kqetaʼmaj che ri areʼ «kutoqʼobʼisaj kiwach ri winaq, kel ukʼuʼx chke» (Sant. 5:11). w23.02 6 párrs. 13-15

Ri ukʼisbʼal wuj re ri Biblia kumaj rukʼ ri e tzij riʼ: «Are waʼ ri qʼalajisanik re ri Jesucristo ri xuya ri Dios che, rech kuqʼalajisaj chkiwach ri e pataninel taq rech ri xakol man kekʼulmatajoq» (Apoc. 1:1). Rumal laʼ, qonojel kqaj kqetaʼmaj ri tajin kkʼulmataj cho ri uwach Ulew rech kqilo jas tajin kbʼan che utzʼaqatisaxik ri profecías. Y utz kqilo kojtzijon kukʼ ri qachalal chrij wariʼ. Are kʼu rajawaxik kqachajij qibʼ are chiʼ kojtzijon chrij ri profecías rech ri Biblia. ¿Jasche? Rumal che weneʼ kqabʼij jun jastaq chke ri qachalal che kukʼex ri kichomanik. Jun kʼutbʼal, weneʼ kqato che ri qʼatal taq tzij kkibʼij che kkesaj ri chʼoj cho ri uwach Ulew rech kqariq jamaril. Rumal laʼ, weneʼ kqachomaj che tajin chi kbʼan ri kubʼij pa 1 Tesalonicenses 5:3, are kʼu ri más nim ubʼanik are che kqil ri uyaʼom lo ubʼixik ri utinamit ri Jehová. Rumal che we are kojtzijon chrij ri ubʼim ri utinamit ri Jehová, tajin kojtobʼanik rech junam ri qachomanik kukʼ ri e qachalal (1 Cor. 1:10; 4:6). w23.02 16 párrs. 4, 5

¿Jasche kaloqʼoqʼej ri Jesucristo? Ri Jesús xukʼut ri qastzij, ri machʼachʼem y ri sukʼilal. Rumal laʼ, we ri at nim kawil wi ri qastzij y ri sukʼilal xuqujeʼ nim chawilaʼ wi ri Jesús. Chatchoman chrij ri kowil kʼuxaj xukʼut ri Jesús are chiʼ xutoʼ uwiʼ ri qastzij y ri sukʼilal (Juan 18:37). Are kʼu ¿jas xubʼan che ukʼutik ri machʼachʼem? Ri Jesús xukʼut rukʼ ri xubʼano y rukʼ ri xubʼij che kmachʼachʼik. Rumal che xraj taj che areʼ knimarisax uqʼij xaneʼ are ri uTat (Mar. 10:17, 18; Juan 5:19). ¿Jas kachomaj chrij ri machʼachʼem che xukʼut ri Jesús? ¿La mat qastzij che nim kawil wi y kawaj kabʼan awe junam rukʼ? Qastzij riʼ che kawaj. Are kʼu ¿jasche sibʼalaj kmachʼachʼ ri Jesús? Rumal che are xresaj uwach ri uTat che sibʼalaj kmachʼachʼik (Sal. 18:35; Heb. 1:3). ¿La mat qastzij che wariʼ katutoʼ rech katqebʼ más rukʼ ri Jesús? w23.03 3, 4 párrs. 6, 7

Ri Biblia kchʼaw chkij e kebʼ jupuq winaq che kewalajisax na y che kyaʼ jun kikʼaslemal che kʼo ta ukʼisik cho ri uwach Ulew: ri «e utz» y ri «e lawalo» o ri e utz taj. Ri «e utz» winaq are ri xkipatanij ri Jehová pa ronojel ri kikʼaslemal are chiʼ majaʼ kekamik. Y ri «e lawalo» are ri e winaq che xkipatanij taj. Rumal che ri e kebʼ jupuq riʼ kewalajisax na, ¿la kraj kubʼij riʼ che tzʼibʼam chi ri kibʼiʼ pa ri wuj re kʼaslemal? Are chiʼ majaʼ kekamik, ri «e utz» winaq tzʼibʼam chi ri kibʼiʼ pa ri wuj re kʼaslemal. ¿La xchup ri kibʼiʼ pa ri wuj re kʼaslemal are chiʼ xekamik? Xchup taj, rumal che kʼa e kʼo na pa ri uchomanik ri Jehová. «Ri areʼ kʼut man are ta kiDios kaminaqibʼ, xaneʼ are kiDios ri e kʼaskʼoj. Konojel kʼut e kʼaskʼoj che areʼ» (Luc. 20:38). Wariʼ kraj kubʼij che are chiʼ ri e utz taq winaq kewalajisax cho ri uwach Ulew tzʼibʼam na ri kibʼiʼ pa ri wuj re kʼaslemal. Are kʼu xa che lápiz tzʼibʼam wi, chojchoʼq taneʼ che (Luc. 14:14). w22.09 16 párrs. 9, 10

Ri xraj ri Jehová are che ri nabʼe winaq kkikot rukʼ ronojel ri xubʼano. Rumal laʼ, xuya ri Adán pa jun kotzʼiʼjalaj ulew rech kuqʼatuj, kutik uwach y kuchajij (Gén. 2:8, 9). Chixchoman chrij ri xunaʼ ri Adán are chiʼ xrilo che xekʼiy ri xutiko y are chiʼ ri qʼayes y ri e cheʼ xekotzʼiʼjanik. Uchajixik ri kotzʼiʼjalaj Edén sibʼalaj nim ubʼanik. Xuqujeʼ ri Jehová xubʼij che ri Adán che kukoj kibʼiʼ konojel ri chikop (Gén. 2:19, 20). Ri Jehová kkunik kubʼan ronojel wariʼ are kʼu xuya che ri Adán che kubʼano rumal che nim xril wi. Xril na riʼ ri Adán ri kibʼantajik ri chikop tekʼuriʼ xukoj kibʼiʼ. Jun utzalaj chak xyaʼ che rumal che rukʼ wariʼ xrilo che ri Jehová sibʼalaj nim unojibʼal y sibʼalaj mayibʼal ri jastaq xubʼano. w23.03 15 párr. 3

Rumal che wajun potencia riʼ are ri raqan ri wachbʼal, ri potencia mundial re Reino Unido y Estados Unidos, are ri kʼisbʼal che xuya ubʼixik ri Biblia (Dan. 2:31-33). Wariʼ kraj kubʼij che kʼo ta chi jun potencia chrij wariʼ. Rumal laʼ, ri areʼ xuqujeʼ konojel ri qʼatbʼal taq tzij ke ri winaq ksachisax na kiwach rumal ri uQʼatbʼal tzij ri Dios pa ri Armagedón (Apoc. 16:13, 14, 16; 19:19, 20). ¿Jas tobʼanik kuya wajun profecía riʼ chqe? Ri profecía che kʼo pa Daniel kuya ubʼixik nikʼaj chi jastaq che kkʼulmataj pa ri kʼisbʼal taq qʼij. 2,500 junabʼ kanoq ubʼim che are chiʼ ksachisax uwach ri Babilonia, kekʼojiʼ chik kajibʼ potencias mundiales che kkibʼan kʼax che ri utinamit ri Dios. Xuqujeʼ xubʼij che ri potencia bʼanom kumal ri Reino Unido y Estados Unidos are ri kʼisbʼal potencia. Wariʼ kukubʼsaj qakʼuʼx y kuya qeyebʼal, rumal che ri uQʼatbʼal tzij ri Dios naj ta chik kraj kusachisaj kiwach konojel ri kiqʼatbʼal tzij ri e winaq. w22.07 4 párr. 9; 5 párrs. 11, 12