Julio

Rumal che ri Jehová sibʼalaj kojraj, xojubʼano rech kojkunik kojchʼawik. Are kʼu wajun sipanik riʼ utz ta xbʼan che ukojik. Rumal che ri Satanás xumol tzij chuwach ri Eva, y rumal ri molom tzij che xubʼij, kimik qonojel oj ajmakibʼ (Gén. 3:1-4). Ri Adán utz ta xchʼawik are chiʼ xuqʼabʼaj ri umak chrij ri Eva y chrij ri Jehová (Gén. 3:12). Ri Caín xumol tzij chuwach ri Jehová are chiʼ kʼateʼ xukamisaj kan ri rachalal, Abel (Gén. 4:9). Kimik riʼ kʼax uriqik jun película che kbʼix ta tzʼil taq tzij chupam. Xuqujeʼ pa taq ri tijobʼal y pa taq ri chak ktataj itzel taq tzij. We kqachajij ta qibʼ che utaʼik itzel taq tzij, kqabʼij chi qe riʼ. Rumal che ri oj cristianos kqaj kojqaj chuwach ri Jehová, xaq xiw ta kqaxutuj ri itzel taq tzij, xaneʼ kqakoj qachuqʼabʼ che utz kqabʼan che ukojik ri qatzij: rech kqaya uqʼij ri Jehová. w22.04 4 párrs. 1-3

Ri Jesús utz xubʼan che rilik ri pwaq. Kʼo jujun mul xubʼan waʼim xuqujeʼ xukʼiʼanik (Luc. 19:2, 6, 7). Jumul xubʼan utzalaj vino che joron, are waʼ ri nabʼe milagro xubʼano (Juan 2:10, 11). Pa ri qʼij che xkamik rukʼaʼm bʼi jun atzʼyaq che sibʼalaj paqal rajil (Juan 19:23, 24). Are kʼu ri Jesús xuya taj che ri qʼinomal are xux más nim ubʼanik pa ri ukʼaslemal. Xubʼij che we kojok il che upatanixik ri Dios ri areʼ kuya na ri kajwataj chqe (Mat. 6:31-33). E kʼi qachalal kiriqom kʼi tewchibʼal are chiʼ kkinimaj ri pixabʼ che xuya ri Jehová chrij ri pwaq. Jun kʼutbʼal, jun qachalal che kʼulan taj Daniel ubʼiʼ. Kubʼij: «Are chiʼ in ala na xinbʼij che upatanixik ri Jehová are ri más nim ubʼanik pa ri nukʼaslemal». Rumal che xutzukuj ta qʼinomal. Xukoj ri utiempo xuqujeʼ ri kkun che ubʼanik che upatanixik ri Jehová, xchakun pa taq ri labores de socorro y pa Betel. Ri areʼ kubʼij: «Qas qʼalaj che man kʼo ta jun jastaq kjunamataj rukʼ ri tewchibʼal che uyaʼom ri upatanixik ri Jehová chwe». w22.05 21, 22 párrs. 6, 7

Jun chik che kojkunik kqabʼano rech kqakʼutu che nim kqil wi ri qastzij are che amaqʼel kqasikʼij uwach ri Biblia xuqujeʼ ri e qawuj. Apastaneʼ ri tiempo che qakʼamom bʼi che retaʼmaxik ri qastzij, kʼo kʼi jastaq che rajawaxik kqetaʼmaj. Rajawaxik kqakoj qachuqʼabʼ rech kqetaʼmaj chrij ri Biblia, rumal che sibʼalaj kuya utzilal pa ri qakʼaslemal. Qonojel taj utz kqanaʼo kqasikʼij uwach wuj, are kʼu ri Jehová kubʼij chqe che rajawaxik kqanimarisaj ri qetaʼmanik, rech jeriʼ qas kqachʼobʼ ri qastzij (Prov. 2:4-6). We kqabʼan wariʼ, kqariq utzilal riʼ. Jun qachalal ubʼiʼ Corey, kubʼij che are chiʼ kusikʼij uwach ri Biblia, xaq chrij jun versículo kchoman wi. Kubʼij: «Kinsikʼij ri notas re ri página, xuqujeʼ kintzukuj ri referencias y kinbʼan investigar. [...] Je wariʼ qas kinchʼobʼ ri kinsikʼij uwach». We kqabʼan qe junam rukʼ ri qachalal o kqabʼan taj, are kʼu ri más nim ubʼanik are che kqaya ri qatiempo y kqakoj qachuqʼabʼ rech kqasikʼij uwach ri Biblia. Y je wariʼ kqakʼutu che nim kqil wi ri qastzij (Sal. 1:1-3). w22.08 17 párr. 13; 18 párrs. 15, 16

Are chiʼ ri Jesús xkʼojiʼ cho ri uwach Ulew, xchʼaw kukʼ ri utijoxelabʼ chrij ri ubʼanom ri Jehová rech kʼo kketaʼmaj chrij. Chqilaʼ jun chke. Ri Jehová kukʼut ri uloqʼoqʼenik chke konojel ri winaq. Pa ri Sermón del Monte, ri Jesús xchʼaw chrij ri usaqil ri qʼij y ri jabʼ che e kʼi winaq weneʼ kechoman ta chrij, are kʼu sibʼalaj nim ubʼanik. Rumal che ri Jehová sibʼalaj kloqʼoqʼenik kresaj lo ri Qʼij pa kiwiʼ ri winaq chi e utz chi man e utz taj. Kuya ri jabʼ pa kiwiʼ ri winaq chi e sukʼ chi man e sukʼ taj (Mat. 5:43-45). Ri Jesús xukoj wajun kʼutbʼal rech oj xuqujeʼ keqaloqʼoqʼej ri winaq. Are chiʼ kqil jun utzalaj ubʼenbʼal qʼij y are chiʼ tajin kubʼan jun musmul jabʼ chojchoman chrij ri uloqʼoqʼenik ri Jehová. Wajun kʼutbʼal riʼ kojutoʼo rech kqatzijoj más ri utzij ri Dios chke konojel kiwach winaq. w23.03 17 párrs. 9, 10

¿Jas ri xumay ri apóstol Juan? Ri ixoq che tʼuyul bʼi chrij jun chke ri e xibʼibʼal awaj. Kbʼixik che are jun «ajmakalaj ixoq», y «Nimalaj Babilonia» kbʼix che ri ubʼiʼ. Y «ri ajawinelabʼ aj uwach ulew xemakun rukʼ» (Apoc. 17:1-5). ¿Jachin riʼ ri «Nimalaj Babilonia»? Wajun ixoq tajin ta kchʼaw chkij ri políticos rumal che Apocalipsis kubʼij che kmakun kukʼ ri e kʼamal taq bʼe re ri qʼatbʼal taq tzij re ri uwach Ulew (Apoc. 18:9). Kraj ktaqan pa kiwiʼ konojel ri e qʼatal taq tzij rumal che Apocalipsis kubʼij che tʼuyul bʼi pa uwiʼ ri xibʼibʼal awaj. Xuqujeʼ tajin ta kchʼaw chkij ri e nimaʼq taq kʼayij che kukoj ri Satanás pa ri uwach Ulew, rumal che are chiʼ Apocalipsis kchʼaw chrij wariʼ, kubʼij «ri ajkʼayibʼ re ri uwach Ulew» chke (Apoc. 18:11, 15, 16). Pa ri ojer tinamit Babilonia chilaʼ xekʼiy wi lo kʼi qastzij taj kojonem. Rumal laʼ kqabʼij che ri Nimalaj Babilonia kchʼaw chkij konojel ri e qastzij taj kojonem che e kʼo pa ronojel uwach Ulew (Apoc. 17:5, 18). w22.05 11 párrs. 14-16

Ri e tat nan weneʼ kʼo jujun taq mul kkichomaj we ri e kalkʼwal kkichaʼ upatanexik ri Jehová. Konojel ri e tat nan ketaʼm che ri e kalkʼwal kkiriq kʼax. Xuqujeʼ, e kʼi nan kkiriq kʼax che kikʼiyisaxik ri e kal rumal che kʼo ta kachajil o Testigo taj. Wariʼ kukʼutu che, paneʼ ri tat nan e kebʼ e Testigos o xa jun chke rajawaxik che kekitijoj ri akʼalabʼ rech kkaj rukʼ ronojel kanimaʼ kkipatanij ri Jehová. Are kʼu maxeʼj awibʼ, ri Jehová kʼo che atoʼik. Cheʼakojoʼ ri e chakubʼal uyaʼom ri utinamit ri Jehová rech kanikʼoj ri Biblia kukʼ ri e awal. Chattzijon kukʼ e nikʼaj chi tat nan rech kataʼ chke jas kkibʼan e areʼ che ukojik ri chakubʼal pa ri kiqʼijilanik re ri familia (Prov. 11:14). Xuqujeʼ, chataʼ tobʼanik che ri Jehová rech katkunik kattzijon kukʼ ri e awal rech kawetaʼmaj jas ri qas kkichomaj y kkinaʼo (Prov. 20:5). w22.04 17 párrs. 4, 7; 18 párr. 9

Jun chi jastaq che kojutoʼo rech knimar más ri qaloqʼoqʼenik che ri Jehová, are retaʼmaxik uwach ri uKʼojol, rumal che ri areʼ rukʼ tzʼaqatil kresaj uwach ri ubʼantajik ri uTat (Heb. 1:3). Y kojkunik kqetaʼmaj más uwach ri Jesús are chiʼ kqasikʼij ri kajibʼ Evangelios. ¿La kasikʼij ri Biblia ronojel taq qʼij? We je taj, katkunik kamajij chanim riʼ. Are chiʼ kasikʼij ri xubʼan ri Jesús y ri xubʼij, chawilaʼ ri qas ubʼantajik. Ri areʼ xuya tobʼanik y xkʼojiʼ naqaj chke ri e winaq, xuqujeʼ xeʼuqʼaluj ri alaj taq akʼalabʼ (Mar. 10:13-16). Ri areʼ xubʼano che ri utijoxelabʼ utz xkinaʼo xekʼojiʼ rukʼ, rumal laʼ ri e tijoxelabʼ xkibʼij ronojel che ri kkinaʼo (Mat. 16:22). Ri Jesús xukʼut wajun bʼantajik riʼ rumal che je kubʼan ri uTat che kʼo pa ri kaj. Ri Jehová kuya utiempo chke nikʼaj chik. Rumal laʼ kojkunik kqabʼan qachʼawem che y kqabʼij ronojel che ri kqanaʼo. Y qas qetaʼm che ri areʼ kuchomaj ta nikʼaj chi jastaq chqij. Ri areʼ kojraj y kel ukʼuʼx chqe qonojel (1 Ped. 5:7). w22.08 3 párrs. 4, 5

Rumal che are ri Jehová xojbʼanowik, qas retaʼm qawach. ¡Wariʼ sibʼalaj nim ubʼanik! (Sal. 139:15-17). Ri areʼ retaʼm che oj ajmakibʼ y rumal laʼ retaʼm ronojel ri qakʼulmam pa qakʼaslemal. ¿Jas kubʼan ri Jehová rukʼ ronojel ri retaʼmam chqij? Kubʼano che kutoqʼobʼisaj qawach (Sal. 78:39; Sal. 103:13, 14). Ri Jehová ukʼutum che qas kraj kukuy ri qamak. Ri areʼ retaʼm che rumal ri xubʼan ri Adán, qonojel oj ajmakibʼ y rumal laʼ kojkamik (Rom. 5:12). Rumal laʼ kʼo ta kojkunik kqabʼano rech kqesaj qibʼ pa uqʼabʼ ri makaj y kojkun taj kqatoʼ jun chi winaq chuwach (Sal. 49:7-9). Are kʼu ri Dios xutoqʼobʼisaj qawach y rumal laʼ xubʼan jun jastaq. Pa Juan 3:16, kubʼij che xuya ri Jesucristo, ri uKʼojol, rech xkam rumal qech (Mat. 20:28; Rom. 5:19). w22.06 3 párrs. 5, 6

Ri Jehová kutoqʼobʼisaj kiwach ri ketoqʼobʼisan wachaj, xuqʼalajisaj wariʼ pa ri uqʼij ri Job. Wajun sukʼalaj upataninel ri Dios xuriq kʼi taq kʼax, rumal ri kʼaxalaj taq tzij che xkibʼij ri oxibʼ achijabʼ che: Elifaz, Bildad y Zofar. Ri Jehová xubʼij che ri Job che kubʼan uchʼawem pa kiwiʼ. Y are chiʼ xubʼano, ri Jehová xutewchij (Job 42:8-10). Kqariq kʼax we kqakʼol oyowal pa qanimaʼ. Ukʼolik oyowal chrij jun winaq kjunamataj rukʼ jun eqaʼn y ri Jehová kraj taj che kqariq kʼax (Efes. 4:31, 32). Rumal laʼ kubʼij wariʼ: «Chayaʼ kan ri oyowal» (Sal. 37:8). Kqariq utzilal we kqabʼan wajun pixabʼ riʼ, rumal che ri oyowal kuya yabʼil (Prov. 14:30). We kqakʼol oyowal chrij jun winaq jetaneʼ tajin kqatij veneno, oj kqariq kʼax. Rumal laʼ, we kqasach kimak ri e nikʼaj chik kqariq utzilal. Kqanaʼ jamaril y kojkunik kqaya uqʼij ri Jehová. w22.06 10 párrs. 9, 10

Ri qeyebʼal ri oj cristianos kjunamataj rukʼ jun tobʼal jolomaj che kuchajij ri qachomanik chuwach ri itzel taq jastaq y kojutoʼo rech are ta kbʼe qakʼuʼx chrij ri jastaq rech kimik, y che kubʼan kʼax che ri qachilanik rukʼ ri Jehová (1 Cor. 15:33, 34). Ri qeyebʼal xuqujeʼ kojutoʼo rech kqachomaj taj che kʼo ta upatan ri chuqʼabʼ kqakojo rech kqakikotisaj ri Jehová. Chnaʼtaj chqe che ri Elifaz, jun chke ri e qastzij taj e rachiʼl ri Job, xubʼij wariʼ che: «Man kʼo ta winaq ri sibʼalaj ta chʼajchʼoj». Tekʼuriʼ xubʼij: «Mawi kʼu ne ri e taqoʼn aj kaj yaʼtal ta chke chi kkubʼax ta kʼuxaj chkij, mawi ne ri kaj chʼajchʼoj ta chkiwach ri ubʼaqʼwach» (Job 15:14, 15). ¡Wariʼ xa jun nimalaj molom tzij! Chnaʼtaj chqe che are ri Satanás ri kraj kqachomaj wariʼ. Retaʼm che we amaqʼel kqachomaj che kʼo ta qapatan, kqaj uchuqʼabʼ ri qeyebʼal. Rumal laʼ, mubʼan kebʼ qakʼuʼx chrij ri kubʼij ri Jehová chqe, kraj che qonojel ri upatanelabʼ kqariq ri kʼaslemal kʼo ta ukʼisik y kojutoʼ che uriqik (1 Tim. 2:3, 4). w22.10 25, 26 párrs. 8-10

Ri Satanás xraj che ri Job kuchomaj che tajin kuriq kʼax rumal che xyaʼ kan rumal ri Jehová. Y rumal wariʼ, are chiʼ ri e 10 ralkʼwal tajin kewaʼik, ri Itzel xukoj jun kaqiqʼ rech xtzaq ri ja chkij (Job 1:18, 19). Xuqujeʼ xubʼano che xqaj lo qʼaqʼ pa ri kaj y xeʼukamisaj ronojel ri uchij ri Job xuqujeʼ ri rajchakibʼ (Job 1:16). Qas qʼalaj che ri kaqiqʼ y ri qʼaqʼ man xaq ta kʼateʼ xpetik. Rumal laʼ ri Job xuchomaj che are ri Jehová xtaqow loq, xuqujeʼ xuchomaj che xuriq waʼ taq kʼax riʼ weneʼ xa rumal che xubʼan jun jastaq che utz ta xril ri Jehová. Paneʼ xuriq kʼax, ri Job xuxutuj ta kan ri Jehová. Ri areʼ retaʼm che ri Jehová pa kʼi taq junabʼ xuya utzalaj taq jastaq che y junam rukʼ ri ubʼanom che ukʼamik ri utz jastaq, xuchʼobʼo che rajawaxik je kubʼan che ukʼamik ri kʼaxkʼolil. Are kʼu xubʼij: «¡Tewchital bʼaʼ ri ubʼiʼ ri Ajawaxel!» (Job 1:20, 21). w22.06 21 párr. 7

Are waʼ ri xubʼij ri Jesús chke ri utijoxelabʼ (Juan 17:14). Qas qilom che tzʼaqatinaq jun chʼaqap che wajun profecía riʼ, más na pa ri kʼisbʼal 100 junabʼ. ¿Jasche kqabʼij? Pa ri 1914 ri Jesús xux Qʼatal tzij y xresaj lo ri Satanás pa ri kaj. Rumal laʼ ri Satanás tajin kubʼan kʼi kʼax pa ri uwach Ulew y xa jubʼiqʼ chik kraj ksachisax uwach (Apoc. 12:9, 12). Are kʼu xaq ta tʼuyul che reyexik jampaʼ ksachisax uwach. Xaneʼ tajin kubʼan kʼi kʼax che ri utinamit ri Jehová (Apoc. 12:13, 17). Xuqujeʼ rumal laʼ ri e winaq más itzel chik kkil ri upatanelabʼ ri Jehová. Are kʼu kqaxibʼij ta qibʼ che ri Satanás y ri e teren chrij. Xaneʼ kqabʼij qe junam rukʼ ri xubʼij ri apóstol Pablo: «We kʼo ri Dios qukʼ, ¿jachin ta ri kujkʼulelanik?» (Rom. 8:31). Kojkunik kqakubʼsaj qakʼuʼx chrij ri Jehová. w22.07 18 párrs. 14, 15

Ri Jesús qas xretaʼmaj che pa ri kʼisbʼal taq qʼij e kʼi ri kkiya ri kitobʼanik. Retaʼm che ketzʼaqat waʼ taq tzij riʼ: «Ri tinamit la kjach na pa qʼabʼ la chupam ri qʼij re ri chʼakanik la» (Sal. 110:3). We tajin katzijoj ri utzalaj taq jastaq che kubʼan na ri uQʼatbʼal tzij ri Dios, tajin kaya atobʼanik che ri Jesús y ri jikalaj pataninel, y tajin kattobʼanik rech ktzʼaqat wajun profecía. Qastzij che tajin ktzijox ri utzij ri Dios, are kʼu kʼo jujun taq kʼax che kojkiqʼatej. Jun kʼax che kqariqo are ri kʼax che kkibʼan ri winaq chqe. Ri apóstatas, ri e qʼatal taq tzij y ri e kʼamal taq bʼe re taq ri kojonem kkibʼan molom taq tzij chrij ri chak che tajin kqabʼano. We ri e qachalaxik, ri e winaq che qetaʼm kiwach y ri e qachiʼl pa ri chak kkikoj ri kbʼixik, weneʼ kkaj che kqaya kan upatanexik ri Jehová y kqatzijoj ta chi ri utzij. Pa jujun nimaʼq taq tinamit, ri e qakʼulel kojkixibʼij, kkibʼan kʼax chqe, kojkichap bʼik y kojkitzʼapij pa cárcel. w22.07 8 párr. 1; 9 párrs. 5, 6

Rech utz kqabʼan che ukojik ri tobʼanik che kuya ri Jehová chqe pa ri uTzij, ri areʼ kraj che amaqʼel kqasikʼij uwach ri Biblia y kojchoman chrij. We kqakoj pa ri qakʼaslemal ri kqetaʼmaj, ri qakojonik y ri qachilanik rukʼ ri Dios más knimarik. Y wariʼ kuya qachuqʼabʼ rech kqachʼij apachike uwach kʼax. Xuqujeʼ we kqakubʼsaj qakʼuʼx chrij ri uTzij ri Dios, ri Jehová kuya ri ruxlabʼixel rech kojutoʼo y rukʼ «ri nimalaj kuʼinem» kqachʼij ri kʼax (2 Cor. 4:7-10). Rukʼ ri utobʼanik ri Jehová, «ri jikalaj pataninel, utz uchomanik» kuya kʼi taq wuj, videos y bʼixonem rech kubʼan ko ri qakojonik y rech amaqʼel kojkʼaskʼatik (Mat. 24:45). Ri Jehová ukʼutum chkiwach ri upatanelabʼ che kkiloqʼoqʼej kibʼ y kkikubʼsalaʼ kikʼuʼx are chiʼ kkiriq kʼax (2 Cor. 1:3, 4; 1 Tes. 4:9). Konojel ri e qachalal, kkaj kojkitoʼo rech kqaya ta kan upatanexik ri Jehová are chiʼ kqariq kʼax. w22.08 12 párrs. 12-14

Are chiʼ kqabʼij chke ri e qachalal ri jeʼlalaj taq kibʼantajik che kqilo, kojtobʼanik rech kkaj kibʼ y kkʼojiʼ jun utzalaj achilanik chkixoʼl. Weneʼ jujun taq mul ri e qachalal che ko ri kikojonik junam ta ri kichomanik chrij jujun taq jastaq kukʼ e nikʼaj chik o kechʼojinik. Are laʼ ri xkʼulmataj chkixoʼl ri apóstol Pablo y ri Bernabé, che paneʼ xkʼojiʼ jun utzalaj achilanik chkixoʼl, xechʼojin chrij jun jastaq rumal che jun chke kraj che kteriʼ bʼi ri Marcos chkij y ri jun chik kraj taj. ¿Y jas xkʼulmataj chkixoʼl are chiʼ xechʼojinik? Ri Biblia kubʼij: «Nim kʼut ri kʼulelanibʼ xwalij chkixoʼl chi xkitas kibʼ ri jun che ri jun chik» (Hech. 15:37-39). Are kʼu ri Pablo, ri Bernabé y ri Marcos xeʼutzir chik. Are chiʼ xqʼax ri tiempo ri Pablo utz xchʼaw chkij ri Bernabé y ri Marcos (1 Cor. 9:6; Col. 4:10). Oj xuqujeʼ rajawaxik je kqabʼano are chiʼ junam ta ri qachomanik kukʼ nikʼaj chi qachalal pa ri congregación y are chqilaʼ ri utzalaj taq kibʼantajik. Je wariʼ kkʼojiʼ jamaril y utzalaj achilanik chqaxoʼl. w22.08 23 párrs. 10, 11

Paneʼ kqakoj qachuqʼabʼ che unimaxik ri utaqanik ri Jehová, are kʼu rajawaxik kqaqʼat ta tzij pa kiwiʼ nikʼaj chik. Chnaʼtaj chqe che ri Jehová are ri «nimalaj qʼatal tzij pa uwiʼ ronojel ri uwach ulew» (Gén. 18:25). Uyaʼom ta chqe che kqaqʼat tzij pa kiwiʼ nikʼaj chik. Chqilaʼ ri ukʼutbʼal ri José, ri José are jun ala che sibʼalaj sukʼ. Ri areʼ xuqʼat ta tzij pa kiwiʼ nikʼaj chik, paneʼ xbʼan kʼax che. Ri e rachalal xkibʼan kʼax che y xkikʼayij bʼik junam rukʼ jun pataninel y xkibʼij che ri kitat che xa xkamik. Qʼaxinaq chi jubʼiqʼ tiempo, ri José xuriq ribʼ kukʼ ri rachalal. Ri areʼ kʼo chi taqanik pa uqʼabʼ y kkun riʼ kuqʼat tzij pa kiwiʼ ri e rachalal rumal ri kʼax che xkibʼan che. Y are waʼ ri xkichomaj ri areʼ che kbʼan chke, are kʼu sibʼalaj xebʼisonik y xkitzalij kibʼ che ri kimak. Rumal laʼ ri José xubʼij chke: «Mixeʼj iwibʼ. Man kinkun taj kinkoj ta wibʼ che ukʼexwach ri Dios» (Gén. 37:18-20, 27, 28, 31-35; 50:15-21). Sibʼalaj xumachʼ ribʼ ri José y xuchomaj che xaq xiw ri Jehová kkunik kuqʼat tzij. w22.08 30 párrs. 18, 19

¿La awetaʼm che ri Jehová kkunik katukojo rech kutzalij uwach ri uchʼawem jun qachalal? Qonojel kojkunik kojtobʼanik; kʼamal taq bʼe, tobʼanelabʼ, precursores, alabʼom alitomabʼ, ixoqibʼ achijabʼ y ri nim chi kijunabʼ. Are chiʼ jun qachalal kutaʼ tobʼanik che ri Jehová, kʼi mul ktzalix uwach ri uchʼawem are chiʼ ktoʼ kumal ri e kʼamal bʼe y nikʼaj chi qachalal rech kkubʼsax ukʼuʼx (Col. 4:11). Are jun nimalaj tewchibʼal che kojkunik kqabʼan ri kraj ri Jehová y keqatoʼ ri qachalal. Kojkunik kqabʼan wariʼ are chiʼ kpe nimaʼq taq yabʼil, xaq kʼateʼ kkʼulmataj jun kʼax o are chiʼ kqʼatex uwach ri qachak che ri Dios. Weneʼ sibʼalaj kqaj keqatoʼ ri e nikʼaj chik, are kʼu ri qachalaxik oj xuqujeʼ tajin kkiriq kʼax. Paneʼ jeriʼ, kqaj keqatoʼ ri e qachalal, wariʼ kuya kikotemal che ri Jehová (Prov. 19:17). w22.12 22 párrs. 1, 2

Ri loqʼoqʼebʼal are ri kojtoʼwik rech kkubʼsax kʼuʼx chqij. Ri Jesús xubʼij che ri e kebʼ taqanik más nim kibʼanik are uloqʼoqʼexik ri Jehová y kiloqʼoqʼexik ri e qajil qatzʼaqat (Mat. 22:37-39). Rumal che kqaloqʼoqʼej ri Jehová, kqaj che kojux junam rukʼ, rumal che kojkunik kqakubʼsaj qakʼuʼx chrij. Jun kʼutbʼal, ri loqʼoqʼebʼal chke ri e qachalal kojutoʼo rech kqabʼij ta chke e nikʼaj chik ri qetaʼm chkij. Maqayaʼ ubʼixik jastaq chkij che kubʼan kʼax chke o kresaj kikʼixbʼal. Ri machʼachʼem kojutoʼo rech kkubʼsax kʼuʼx chqij. Ri cristiano che kmachʼachʼik aninaq ta kuya ubʼixik jun jastaq rech kukʼutu che are nabʼe xetaʼmanik (Filip. 2:3). Xuqujeʼ kubʼij taj che retaʼm jastaq che kkun taj kuya ubʼixik. Jun chi jastaq che kqabʼano rech kqakʼutu che kojmachʼachʼik, are che are ta kqabʼij ri kqachomaj oj chrij jun jastaq che kuya ta ubʼixik pa ri Biblia ni pa ri e qawuj. w22.09 12 párrs. 12, 13

Ri ángel xuya chi ubʼixik jun jastaq chrij ri kʼisbʼal taq qʼij. Xubʼij: «Ri itzel taq winaq kkitaqej na kibʼanik taq etzelal, man kkichʼobʼ ta kʼut ri kkʼulmatajik» (Dan. 12:10). Kimik are ri tiempo che kqakʼutu che oj kʼo ta chkixoʼl ri itzel taq winaq (Mal. 3:16-18). Ri Jehová tajin keʼumulij ri keʼux na utinamit o ri e rech areʼ. ¿La mat qastzij che kqaj kojkʼojiʼ chkixoʼl ri e winaq riʼ? Kimik oj kʼo pa ri tiempo che tajin kkʼulmataj jastaq nim ubʼanik. Y naj ta chi kraj kkʼulmataj chi na nikʼaj che más mayibʼal rilik. Tajin knaqajin ri qʼij che ksachisax uwach ronojel ri itzelal. Are chiʼ kbʼantaj wariʼ, kqil na ri kubʼan ri Jehová che ubʼanik ri xutzujuj che ri Daniel, kubʼij: Pa «ri kʼisbʼal taq qʼij katwalij na che ukʼamik ri tojbʼal awech» (Dan. 12:13). ¿La tajin karayij chik che kopan ri tiempo che ri Daniel, y ri e awachalaxik, kekʼastaj lo pa ri kʼakʼ uwach Ulew? We jeʼ, chakojoʼ achuqʼabʼ rech kaya ta kan upatanexik ri Jehová y rech jeriʼ ri abʼiʼ ktzʼibʼax rukʼ tinta pa ri wuj re kʼaslemal. w22.09 24 párr. 17; 25 párrs. 19, 20

Xuya uchuqʼabʼ riʼ ri e tzij. Xnaʼtaj riʼ che che are ri e tzij riʼ xubʼij ri Jehová che ri Moisés y che ri Isaías are chiʼ xeʼux qʼaxal utzij (Éx. 3:10; Is. 6:8). Ri Ezequiel xuqujeʼ retaʼm che ri Jehová xeʼutoʼ ri e qʼaxal taq tzij riʼ che ubʼanik chak che kʼax ubʼanik. Rumal laʼ, are chiʼ ri Dios kamul xubʼij «katintaq bʼik» che ri Ezequiel, ri areʼ xretaʼmaj che ktoʼ rumal. Xuqujeʼ kʼi mul kriqitaj ri e tzij riʼ pa ri wuj re Ezequiel: «Xinuchʼabʼej kʼut ri Ajawaxel» (Ezeq. 14:2). Y kʼi mul kriqitaj ri e tzij: «Ri Ajawaxel xinuchʼabʼej» (Ezeq. 6:1). Rumal laʼ, ri Ezequiel qas retaʼm che are ri Jehová taqowinaq bʼik. Xuqujeʼ, rumal che kojol tabʼal toqʼobʼ ri utat, xukʼut riʼ chuwach che ri Jehová amaqʼel keʼutoʼ ri e qʼaxal taq utzij. Jun kʼutbʼal, ri Jehová xubʼij wariʼ chke ri Isaac, Jacob y Jeremías: «In in kʼo awukʼ» (Gén. 26:24; 28:15; Jer. 1:8). w22.11 2 párr. 3

Paneʼ ri Adán y ri Eva xemakunik y kumal e areʼ xqechbʼej ri kamikal, are kʼu ri Jehová ukʼexom ta ri kraj kubʼan pa kiwiʼ ri winaq (Is. 55:11). Ri areʼ kraj che ri utz taq winaq kkiriq jun kʼaslemal che kʼo ta ukʼisik. Rumal ri ubʼim y ri ubʼanom. Ri Jehová ubʼim che keʼuwalajisaj na ri e winaq che e kaminaq y kuya ri kʼaslemal kʼo ta ukʼisik chke (Hech. 24:15; Tito 1:1, 2). Ri Job xretaʼmaj che ri Jehová sibʼalaj kraj kuwalajisaj pa ri kamikal (Job 14:14, 15). Ri qʼaxal tzij Daniel xretaʼmaj che ri Jehová keʼukʼasuj na ri winaq pa ri kamikal y kuya jun kʼaslemal kʼo ta ukʼisik chke (Sal. 37:29; Dan. 12:2, 13). Ri judíos che xekʼojiʼ pa ri utiempo ri Jesús xuqujeʼ xketaʼmaj che ri Jehová kkunik kuya «ri junalik kʼaslemal» chke ri sukʼalaj taq upatanelabʼ (Luc. 10:25; 18:18). Ri Jesús kʼi mul xchʼaw chrij wajun tzujunik riʼ y ri areʼ xwalajisax chkixoʼl ri e kaminaqibʼ rumal ri uTat (Mat. 19:29; 22:31, 32; Luc. 18:30; Juan 11:25). w22.12 4, 5 párrs. 8, 9

Ri Jehová kubʼij chqe che kojqebʼ rukʼ (Sant. 4:8). Kraj che kux qaDios, qaTat y qachiʼl. Kuta ri qachʼawem y kojutoʼ are chiʼ kqariq kʼax. Xuqujeʼ kukoj ri utinamit che qatijoxik y che qachajixik. Kojqebʼ rukʼ ri Jehová are chiʼ kqabʼan qachʼawem, kqasikʼij ri uTzij y kojchoman chrij. Wariʼ kojutoʼo rech kqaloqʼoqʼej y kojmaltyoxin che. Kqaj che rukʼ ronojel qanimaʼ kqanimaj y kqaya uqʼij rumal che qas taqal che (Apoc. 4:11). Are chiʼ más kqetaʼmaj uwach, más kqakubʼsaj qakʼuʼx chrij areʼ y chrij ri utinamit che ukojom che qachajixik. Ri Itzel kukoj uchuqʼabʼ rech kqakubʼsaj ta chi qakʼuʼx chrij ri Jehová y chrij ri utinamit. Are kʼu kojkunik kojchʼakan pa uwiʼ ri Itzel. We kʼo jun koʼalaj qakojonik y kqakubʼsaj qakʼuʼx chrij ri Jehová, kqaya ta kan upatanixik riʼ y kojel ta kan riʼ pa ri utinamit (Sal. 31:13, 14). w22.11 14 párrs. 1-3

E kʼi qastzij cristianos kiriqom kʼax pa ri kikʼaslemal rumal che kkiloqʼoqʼej ri Jehová, ri Nimalaj Qʼatal tzij. Qas kkaj kkipatanij ri Jehová rukʼ jun chʼajchʼoj kikʼaslemal junam kukʼ ri oxibʼ hebreos che xekam ta pa ri qʼaqʼ rumal che amaqʼel xeniman che ri aj chikaj. Ri salmista David xuchʼobʼo che nim ubʼanik kriqitaj ta makaj pa ri qakʼaslemal chuwach ri Dios. Xutzʼibʼaj: «Ajawaxel, lal kqʼat la tzij pa kiwiʼ ri nimaʼq taq tinimit: qʼataʼ la tzij pa nuwiʼ jachaʼ chi in tzʼaqat pa ronojel; qʼataʼ la tzij pa nuwiʼ jachaʼ chi man kʼo ta numak» (Sal. 7:8). Xuqujeʼ xubʼij: «Chinuchʼuqu ri nutzʼaqatikil pa ronojel xuqujeʼ chi man kʼo ta numak» (Sal. 25:21). Ri más kuya kikotemal chqe pa qakʼaslemal are che kojmakun ta chuwach ri Jehová. We je kqabʼano, kqanaʼ ri xutzʼibʼaj ri salmista: «Utz kech ri man kʼo ta makaj pa ri kikʼaslemal, kiterenem kʼut ri utijonik ri Ajawaxel» (Sal. 119:1). w22.10 17 párrs. 18, 19

Qastzij riʼ che ri tzijonem más xumay ri Job are ri xubʼan rukʼ ri Jehová chuwach ri ubʼanom kukʼ nikʼaj chi winaq. Ri Jehová xubʼij che ri Job che kchoman chrij ri jastaq ubʼanom. Rukʼ wariʼ xretaʼmaj che ri Jehová kʼo nim unojibʼal y che keʼuchajij ri upatanelabʼ. Jun kʼutbʼal, ri Job xrilo che we ri Jehová kuya ri kajwataj chke ri chikop xuqujeʼ kkunik kuya ri rajawaxik chke ri winaq (Job 38:39-41; 39:1, 5, 13-16). Are chiʼ ri Job xchoman chrij ri ubʼanom ri Jehová xretaʼmaj kʼi ubʼantajik. Ri oj xuqujeʼ kojkunik kqil ronojel ri ubʼanom ri Dios rech kqetaʼmaj más uwach. Are kʼu, weneʼ jujun mul kʼax ubʼanik wariʼ. ¿Jasche? Rumal che we oj kʼo pa jun nimalaj tinamit, kojkun taj kqil ri jeʼlalaj taq jastaq ubʼanom ri Dios. Y we oj kʼo pa jun alaj aldea weneʼ kʼo ta qatiempo che rilik. Rumal laʼ, rajawaxik kqatas qatiempo che rilik ronojel ri jastaq ubʼanom ri Dios. w23.03 15 párrs. 1, 2

Ri Jesús xubʼij che are chiʼ majaʼ kpe ri kʼisbʼal kubʼan na «nimaʼq taq kabʼraqan» y nikʼaj chi nimaʼq taq kʼaxkʼolil (Luc. 21:11). Xuqujeʼ xubʼij che más knimataj na ri itzelal, ri elaqʼ, ri kamisanik y ri chʼoj (Mat. 24:12). Ri Jesús xubʼij taj che ri e kʼax riʼ xaq xiw kkiriq ri kkipatanij ta ri Jehová. Rumal laʼ, e kʼi upatanelabʼ ri Dios kiriqom nimaʼq taq kʼax rumal ri nimaʼq taq jabʼ, kabʼraqan y nikʼaj chi kʼax (Is. 57:1; 2 Cor. 11:25). Weneʼ ri Jehová kubʼan ta jun milagro rech kojuchajij chuwach ri kʼax che kqariqo, are kʼu kuya ronojel ri kajwataj chqe rech ksach ta qakʼuʼx y kqanaʼ jamaril. We qetaʼm chik jas kqabʼano, ktobʼanik rech kqaxibʼij ta qibʼ chuwach. ¿La kraj kubʼij wariʼ che xa kqakubʼsaj ta qakʼuʼx chrij ri Jehová? Je taj. Xaneʼ rukʼ wariʼ kqakʼutu che qas kqakojo che kojutoʼ na. ¿Jasche? Rumal che ri Biblia ubʼim chqe che rajawaxik kqil ri kqabʼan chuwach jun kʼax are chiʼ majaʼ kpetik. w22.12 18 párrs. 9, 10

Are chiʼ ri José tzʼapim pa cheʼ, ri qʼatal tzij xubʼan kebʼ rachikʼ che sibʼalaj xusach ukʼuʼx. Y are taq xretaʼmaj che ri José kkunik kuya ubʼixik ri kraj kubʼij, xutaq usikʼixik. Rumal che ri José tajin ktoʼ rumal ri Jehová, xaq xiw ta xubʼij ri kel kubʼij ri rachikʼ ri faraón, xaneʼ xubʼij che xuqujeʼ jas rajawaxik kubʼano. Rumal laʼ, sibʼalaj xmayin ri qʼatal tzij. Y are chiʼ xrilo che tajin ktoʼ ri José rumal ri Jehová, xukoj che ilol re ronojel ri jastaq che kkitij ri egipcios (Gén. 41:38, 41-44). Are taq qʼaxinaq chi kebʼ oxibʼ junabʼ, xpe jun nimalaj numik pa ri tinamit Egipto che xuqujeʼ xubʼan kʼax chke nikʼaj chi tinamit junam rukʼ Canaán, ri e kʼo wi ri ufamilia ri José. Rumal che nim chi ri utaqanik ri José pa Egipto xkunik xeʼutoʼ ri ufamilia y jeriʼ are chiʼ xqʼax ri tiempo xeʼux ratiʼt umam kan ri Mesías. Qas qʼalaj che are ri Jehová xbʼanowik che utz xel ronojel chuwach ri José. Ri itzelal che xkibʼan ri rachalal ri José che, xukoj ri Jehová rech xbʼantaj ri kraj. w23.01 17 párrs. 11, 12

¿Jas kraj kubʼij ri e tzij riʼ? Che rajawaxik kqachajij qibʼ chuwach apachike jastaq che kubʼan kʼax che ri qachilanik rukʼ ri Jehová, rech je wariʼ kuya ta kan qaloqʼoqʼexik (Prov. 22:3; Jud. 20, 21). Ri apóstol Pablo xubʼij chke ri cristianos che rajawaxik kkichajij kibʼ. Jun kʼutbʼal, xubʼij wariʼ chke ri cristianos re Éfeso: «Qas chiwilaʼ na jas ri kibʼano. Mibʼan iwe jas ri man kʼo ta kinoʼj, xaneʼ chibʼanaʼ iwe jas ri kʼo kinoʼj» (Efes. 5:15, 16). Ri Satanás kutzukuj ri kubʼano rech kuqasaj uchuqʼabʼ ri qakojonik. Rumal laʼ, ri Biblia kubʼij chqe che rajawaxik kqachʼobʼo «jas ri urayibʼal ri Dios» rech kqakochʼ ronojel ri kʼax che kuya pa qabʼe (Efes. 5:17). Rech utz kqabʼan che uchaʼik ri kqabʼano rajawaxik kqachʼobʼo «jas ri urayibʼal ri Dios». ¿Jas kqabʼan che uchʼobʼik ri kqaj chuwach? Rajawaxik kqanikʼoj y kojchoman chrij ri kqasikʼij uwach pa ri Biblia. We qetaʼm chik jas ri kraj ri Dios che kqabʼano y kqakoj qachuqʼabʼ rech kqariq «ri chomanik re ri Cristo», kʼax ta kqabʼan riʼ che uchaʼik ri kqaj kqabʼano paneʼ kʼo ta jun taqanik re ri Biblia che kchʼaw chrij (1 Cor. 2:14-16). w23.02 16, 17 párrs. 7-9

¿Kʼa chi jampaʼ taq kachʼajchʼobʼej at ri upa awachoch? Qas xajosqʼij riʼ are chiʼ xatopan chupam. Are kʼu ¿jas kkʼulmataj rukʼ we kajosqʼij ta chik? Sibʼalaj ktzʼilobʼ riʼ rumal che aninaq kumulij ribʼ ri ulew y ri tzʼil chupam. Rumal laʼ, rajawaxik amaqʼel kjosqʼix ri upa ja rech utz kkaʼyik. Are je rajawaxik kqabʼan rukʼ ri qachomanik y ri qabʼantajik. Qastzij riʼ che je xqabʼano are chiʼ majaʼ kqabʼan qaqasanjaʼ. Xqakoj qachuqʼabʼ riʼ che ukʼexik ri qakʼaslemal rech «konojel ri jastaq ri e tzʼil ri e kʼo pa ri qacuerpo xuqujeʼ pa ri qanimaʼ» xqesaj bʼik (2 Cor. 7:1). Are kʼu, kimik rajawaxik kqanimaj waʼ taq tzij re ri apóstol Pablo: «Ri ix rajawaxik kkʼojiʼ jun kʼakʼ ichomanik» (Efes. 4:23). Ri itzelal y ri tzʼil taq jastaq che kʼo pa wajun uwach Ulew aninaq kumulij ribʼ pa ri qachomanik y pa ri qanimaʼ. Rech kqakʼulmaj ta wariʼ y rech amaqʼel kojqaj chuwach ri Jehová, rajawaxik amaqʼel kqanikʼoj jas ubʼanik ri qachomanik, ri qabʼantajik y ri qarayinik. w23.01 8 párrs. 1, 2

¿La kʼo jumul at chomanaq chrij ri xubʼan ri Jesús che uyaʼik tijonik chke ri winaq? Are chiʼ ri Jesús xubʼan ri uqasanjaʼ y xchaʼ rumal ri ruxlabʼixel ri Dios, weneʼ xnaʼtaj che ri xubʼan pa ri kaj are chiʼ majaʼ kpe cho ri uwach Ulew. Ri areʼ amaqʼel xukoj ri uTzij ri Dios are chiʼ xtzijon kukʼ ri winaq paneʼ kʼo ta re, are kʼu ukʼolom kan pa ri ujolom. Qas xqʼalajin wariʼ rukʼ ri xubʼij are chiʼ bʼantajinaq chi ri uqasanjaʼ y are chiʼ xa jubʼiqʼ chi kraj kkamik (Deut. 8:3; Sal. 31:5; Luc. 4:4; 23:46). Y amaqʼel pa ri uTzij ri Dios xresaj wi ri xukʼutu are chiʼ xutzijoj ri utzij ri Dios pa oxibʼ junabʼ rukʼ nikʼaj (Mat. 5:17, 18, 21, 22, 27, 28; Luc. 4:16-20). Are chiʼ majaʼ kumajij ri uchak ri Jesús cho ri uwach Ulew, amaqʼel xutatabʼej ri uTzij ri Dios are chiʼ e nikʼaj chi winaq xkisikʼij y xechʼaw chrij. Y qas xuta riʼ ri xkitzijobʼej ri José y ri María chrij ri uTzij ri Dios (Deut. 6:6, 7). Xuqujeʼ are chiʼ ronojel taq sábados xbʼe pa ri sinagoga rukʼ ri ufamilia rech xekitatabʼej (Luc. 4:16). w23.02 8 párrs. 1, 2

Kʼo kʼi rumal che kqaloqʼoqʼej ri Jehová. Ri at awetaʼm chik che rukʼ ri areʼ petinaq wi ri «ukʼiyibʼal jaʼ re kʼaslemal» y che are kyaʼow «ronojel utzalaj sipanik, ronojel tzʼaqatalaj sipanik» (Sal. 36:9; Sant. 1:17). Are ri Jehová yaʼowinaq chawe ronojel ri ariqom rumal che sibʼalaj ksipanik y sibʼalaj katraj. Ri Jehová xuya jun nimalaj sipanik chqe are chiʼ xuya bʼe xkam ri uKʼojol rumal qech. ¿Jasche kqabʼij? Chojchoman chrij ri nimalaj loqʼoqʼebʼal che kʼo chkixoʼl ri Jehová rukʼ ri uKʼojol. Rumal laʼ, ri Jesús xubʼij: «Kinuloqʼoqʼej ri Tataxel» y «ri in kinloqʼoqʼej ri Tataxel» (Juan 10:17; 14:31). Rumal che ri Jesús xkʼojiʼ kʼiʼalaj junabʼ rukʼ ri uTat, más xkʼiy ri loqʼoqʼebʼal chkixoʼl (Prov. 8:22, 23, 30). Are kʼu, chojchoman chrij ri nimalaj kʼaxkʼolil che xunaʼ ri Jehová are chiʼ xuya bʼe che xuriq kʼax ri uKʼojol y xkamik. Are kʼu rumal che sibʼalaj katuloqʼoqʼej xuya bʼe che xkam ri uKʼojol rech kariq ri kʼaslemal kʼo ta ukʼisik (Juan 3:16; Gál. 2:20). Rumal laʼ, sibʼalaj kqaloqʼoqʼej ri Jehová. w23.03 4, 5 párrs. 11-13

Rajawaxik kqaxutuj ri kkikʼut ri apóstatas. Ri Jesús xuya pixabʼ chke ri cristianos re Pérgamo che tajin kkijach kibʼ y kkitas kan kibʼ chrij ri congregación (Apoc. 2:14-16). Are kʼu, xubʼij utz taq tzij chke ri cristianos re Tiatira rumal che xkixutuj ri «jastaq re ri Satanás» y che tajin kkibʼan ri kraj ri Jehová (Apoc. 2:24-26). Ri cristianos che kʼo ta kichuqʼabʼ pa ri kikojonik y che xesubʼik, rajawaxik kkisukʼumaj ri tajin kkikʼulmaj. Xaq junam rukʼ, oj rajawaxik kqaxutuj ri e kʼutunem che junam ta rukʼ ri kuchomaj ri Jehová. Weneʼ ri apóstatas kkibʼano che «jetaneʼ [...] kʼo ri nimanik che ri Dios kukʼ», are kʼu «kkiqʼalajisaj ta kʼu ri uchuqʼabʼ» (2 Timoteo 3:5). We sibʼalaj utz kqabʼan che unikʼoxik ri uTzij ri Dios, kojkisubʼ ta rukʼ ri molom taq tzij che kkibʼij (2 Tim. 3:14-17; Jud. 3, 4). We kʼo jun jastaq che utz ta tajin kqabʼano, aninaq chqayaʼ kan ubʼanik (Apoc. 2:5, 16; 3:3, 16). w22.05 4 párr. 9; 5 párr. 11