Agosto

¿Jasche ri Jehová kutzʼibʼaj pa jun wuj ri kibʼiʼ ri e winaq che kkikʼut rukʼ ri kitzij che nim kkil wi? Ri kqabʼij kukʼut ri qas kʼo pa qanimaʼ. Jesús xubʼij: «Ri kʼo pa ri ranimaʼ ri winaq, are waʼ kel uloq pa uchiʼ» (Mat. 12:34). Ri Jehová kraj che ri winaq keloqʼoqʼen che kekʼasiʼ pa ri kʼakʼ uwach Ulew. Ri Jehová kril ri kqatzijoj rech qas kril na we kukʼam ri qaqʼijilanik (Sant. 1:26). E kʼi winaq che kkiloqʼoqʼej ta ri Jehová itzel taq tzij kkikojo are chiʼ kechʼawik y xaq xiw kkikʼutu che nim kkil kibʼ (2 Tim. 3:1-5). Kqaj taj kqabʼan qe ri kkibʼan e areʼ. Xaneʼ kqaj che ri Jehová qas kkikot rukʼ ri e tzij kqakojo. Are kʼu ¿la kkikot rukʼ jun winaq che utz kchʼaw pa ri e riqbʼal ibʼ y are chiʼ kutzijoj ri utzij ri Dios, are kʼu are chiʼ kʼo rukʼ ri ufamilia kʼax kubʼan che kichʼabʼexik y kukʼut ta loqʼoqʼebʼal chke? (1 Ped. 3:7). w22.04 5 párrs. 4, 5

Are kʼu ri Dios uyoʼm pa kanimaʼ che kkibʼan ri uchomanik ri areʼ, rech kkisachisaj uwach ri nimalaj Babilonia. Qastzij wi, ri Jehová kubʼan na che ri e tinamit kkikoj ri xibʼibʼal awaj che kaq rij, kraj kubʼij, ri Naciones Unidas, rech kechʼojin kukʼ ri qastzij taj kojonem y kkisachisaj kiwach (Apoc. 18:21-24). Ri kqetaʼmaj chrij. Nim ubʼanik che kqakoj qachuqʼabʼ kojkʼojiʼ pa ri «qʼijilanik» che chuwach ri Dios «qas chʼajchʼoj, ri man tzʼajtal ta[j]» (Sant. 1:27). Kqaya ta bʼe che ri Nimalaj Babilonia kubʼan kʼax che ri qakojonik rukʼ ri molom taq tzij kukʼutu, nimaqʼij che utz ta kril ri Jehová, tzʼil taq makaj y ubʼanik kichak itzel taq uxlabʼal. Y chqataqej ubʼixik chke ri e winaq waʼ taq tzij: «Chixel bʼik pa ri Babilonia». We keʼel bʼi pa ri qastzij taj kojonem, ri Dios krilo che e jun ta che ubʼanik ri mak che kubʼan ri Nimalaj Babilonia (Apoc. 18:4). w22.05 11 párr. 17; 14 párr. 18

Nan chattzijon kukʼ ri e awal chrij ri Jehová are chiʼ kawilo che kbʼanik. Chattzijon kukʼ chrij ri Jehová y chrij ri utz taq jastaq che ubʼanom pa kiwiʼ (Deut. 6:6, 7). Nim ubʼanik wariʼ are chiʼ ri akʼulaj Testigo taj rumal che weneʼ katkun taj kanikʼoj ri Biblia kukʼ ri awal cho awachoch. Ri qachalal Christine ubʼiʼ, kubʼij: «Rumal che qas ta kbʼanik kojtzijon chrij jastaq re ri qakojonik kukʼ ri e wal, kinkoj apachike hora rech kintzijon kukʼ chrij ri Jehová we kwilo che kbʼanik». Xuqujeʼ, utz chattzijon chrij ri utinamit ri Jehová y chkij ri e qachalal. Xaq matchʼachʼat chkij ri e kʼamal taq bʼe. Ri kabʼij chkij, keʼutoʼ ri e awal rech kkitaʼ tobʼanik chke are chiʼ kajwataj chke. Chattobʼanoq rech kʼo jamaril pa ri awachoch. Amaqʼel chakʼutuʼ che keʼaloqʼoqʼej ri e awal y ri awachajil. Chatchʼaw rukʼ loqʼoqʼebʼal chrij ri awachajil y nim chawilaʼ wi, y chakʼutuʼ chkiwach ri awal rech je kkibʼano. Wariʼ keʼutoʼo rech utz kkil retaʼmaxik más chrij ri Jehová (Sant. 3:18). w22.04 18 párrs. 10, 11

Maqayaʼ bʼe che ksach uwach ri loqʼoqʼebʼal che ri Jehová. Ri xuya ubʼixik ri Jesús chke ri cristianos re Éfeso kukʼutu che kʼo kʼax kichʼijom, are kʼu kiyaʼom ta kan upatanixik ri Jehová. Tekʼuriʼ, are chiʼ xqʼax ri tiempo xkiya bʼe che xsach uwach ri loqʼoqʼebʼal che xkinaʼ che ri Jehová nabʼe kanoq. Rumal riʼ, rajawaxik che kkiya chi jumul uchuqʼabʼ ri kiloqʼoqʼebʼal. We jeʼ kkibʼano, kkʼam riʼ ri kiqʼijilanik rumal ri Jehová. Kimik, ri oj xaq xiw ta kqachʼij ri kʼax, xaneʼ rajawaxik kojchoman chrij jasche kqaqʼijilaj ri Jehová. Rumal che chuwach ri Jehová más nim ubʼanik ri rumal che kqaqʼijilaj. Y areʼ kraj che kqaqʼijilaj rumal che kqaloqʼoqʼej y kojmaltyoxin che (Prov. 16:2; Mar. 12:29, 30). Rajawaxik kojkʼaskʼatik. Ri congregación re Sardis jalan chi ri jastaq che xkibʼano. Nabʼe kanoq sibʼalaj xkikoj kichuqʼabʼ che upatanexik ri Jehová, are kʼu are chiʼ xqʼax ri tiempo xkichomaj che rajawaxik ta chik kkikoj kichuqʼabʼ. Rumal laʼ ri Jesús xubʼij chke che rajawaxik kekʼaskʼatik (Apoc. 3:1-3). Are kʼu ri Jehová ksach ta pa ujolom ronojel ri qabʼanom (Heb. 6:10). w22.05 3 párrs. 6, 7

Ri Salomón xubʼij che ri kikotemal che kuya ri chak chqe «kpe rukʼ ri Dios» (Ecl. 5:18, 19). Are kʼu man xaq xiw ta xubʼij. Xaneʼ qas xchakunik, xubʼan kʼi taq ja, xutik ri ulew, xutik kotzʼiʼj xuqujeʼ xuyak nimaʼq taq tinamit (1 Rey. 9:19; Ecl. 2:4-6). Sibʼalaj xok il che ubʼanik ri uchak. Y xkikot rumal wariʼ, are kʼu retaʼm che xaq xiw ta ri chak kuya kikotemal, rumal laʼ xupatanij ri Jehová. Jun kʼutbʼal, xuyak jun templo jawiʼ kqʼijilax wi ri Jehová y wajun chak riʼ siete junabʼ xuchʼijo (1 Rey. 6:38; 9:1). Paneʼ xubʼan kʼi taq chak pa ri ukʼaslemal, areʼ xrilo che ri kojonik are más nim na ubʼanik. Rumal laʼ xutzʼibʼaj: «Ronojel bʼitajinaq chik. Nim bʼaʼ chawilaʼ wi ri Dios cheʼatzʼaqatisaj taq kibʼanik ri e utaqomal» (Ecl. 12:13). w22.05 22 párr. 8

Pa ri Biblia kʼo kʼutbʼal chkij kʼi taq winaq che ri Jehová qas xraj xukuy kimak. Weneʼ kpe pa ijolom ri xukʼulmaj ri Manasés. Che are jun achi che xubʼan itzelalaj taq jastaq chuwach ri Jehová. Xeʼuqʼijilaj e tyox, xeʼuporoj ri e ralkʼwal che uyaʼik tabʼal toqʼobʼ chkiwach. Xuqujeʼ xunim jun tyox pa rachoch ri Jehová, che are jun chʼajchʼoj lugar. Rumal laʼ ri Biblia kubʼij wariʼ chrij: «Sibʼalaj e itzel taq ri e ubʼanoj chuwach ri Ajawaxel, ri xukʼis retzelaxik ribʼ chuwach» (2 Crón. 33:2-7). Ri Manasés xukʼex ri ubʼantajik, y ri Jehová xukuy ri umak (2 Crón. 33:12, 13). Jun chi winaq che je xubʼano are ri David, ri areʼ xubʼan nimaʼq taq mak, xmakun rukʼ ri Bat-Seba y xukamisaj ri rachajil. Are kʼu, chiʼ ri David xuchʼobʼo che xmakun chuwach ri Jehová y xukʼex ri ubʼantajik, ri Jehová qas xukuy ri umak (2 Sam. 12:9, 10, 13, 14). Rukʼ wariʼ kojkunik kqabʼij che ri Jehová qas kraj kukuy ri qamak. w22.06 3 párr. 7

Amaqʼel rajawaxik kqakoj na qachuqʼabʼ rech qas kqeyej ri utzujum ri Dios. Are kʼu, weneʼ jujun taq mul kkʼis ri qapaciencia che reyexik. Tekʼuriʼ ri Jehová kʼo ta ukʼisik y junam ta kubʼan che rilik ri tiempo rukʼ ri kqabʼan oj che rilik (2 Ped. 3:8, 9). Ri areʼ más utz kubʼan na che ubʼanik ri uchomam, are kʼu, weneʼ kubʼan ta pa ri tiempo che oj qachomam che kubʼano. ¿Jas kojtowik rech knimar ri qeyebʼal y kkʼojiʼ qapaciencia kʼa kopan na ri qʼij che ri Dios kubʼan na ronojel ri utzujum chqe? (Sant. 5:7). Chojkʼol chunaqaj ri Jehová, rumal che are kbʼinik che qas kubʼan ri kutzujuj. Pa ri Biblia kjunamisax ri eyebʼal rukʼ ri kojonik che qastzij kʼo ri Jehová y che «kuya tojbʼal ke ri winaq ri kkitzukuj ri areʼ» (Heb. 11:1, 6). We más kojqebʼ rukʼ ri Jehová, más kqakubʼsaj qakʼuʼx che ri areʼ kubʼan na ri utzujum chqe. Y jeriʼ kqaj ta uchuqʼabʼ ri qeyebʼal. Chqabʼanaʼ qachʼawem che ri Jehová y chqasikʼij uwach ri uTzij. Qastzij che kqil ta uwach ri Jehová, are kʼu kojkunik kojux rachiʼl. Kojkunik kojtzijon rukʼ are chiʼ kqabʼan qachʼawem che, rumal che qas qetaʼm che kojutatabʼej (Jer. 29:11, 12). w22.10 26, 27 párrs. 11-13

Chojchoman chrij wariʼ. Ri Job tʼuyul pa ri chaj, y kjilow pa ri qʼoxom chi pa qʼij chi chaqʼabʼ (Job 2:8). Ri e rachiʼl kkiya ta kan ukʼaqik tzij chrij y kkitzukukej ri kkibʼano rech kkibʼan kʼax che. Rumal ri kʼi kʼaxkʼolil xuriqo y che xekam ri e ralkʼwal, ri Job xunaʼ jun nimalaj bʼis. Are kʼu nabʼe kʼo ta xubʼij (Job 2:13). Rumal wariʼ weneʼ ri e rachiʼl xkichomaj che ri Job tajin kuchomaj che kuya kan upatanixik ri Jehová, are kʼu are ta laʼ ri xkʼulmatajik. Weneʼ ri Job xkaʼy chke ri achijabʼ y xubʼij chke: «Joropaʼ qʼij kinkʼasiʼk, kintaqej na ubʼixik chi man kʼo ta numak» (Job 27:5). Paneʼ ri Job uriqom kʼi taq kʼax y kʼo ta chi uchuqʼabʼ, ¿jasche xkunik xubʼij waʼ taq tzij riʼ? Rumal che retaʼm che paneʼ tajin kuriq kʼax kyaʼ ta wi kan rumal ri loqʼalaj uDios. Xuqujeʼ retaʼm che ktoʼ rumal y che we kkamik kkʼasux chi na jumul (Job 14:13-15). w22.06 22 párr. 9

Ri Bʼanol re ri kaj y ri uwach Ulew uyaʼom jun nimalaj eqeleʼn chqe: che kojkunik kojtzijon rukʼ. Chojchoman chrij ri kraj kubʼij wariʼ. Kojkunik kqabʼij che ri Jehová ronojel ri kʼo pa qanimaʼ, pa apachike lugar, hora, chʼabʼal. Kojkunik kojtzijon rukʼ ri loqʼalaj qaTat che kʼo pa ri kaj, paneʼ oj kʼo pa jun chʼat re jun hospital o pa cárcel oj kʼo wi, ri areʼ kojutatabʼej. ¿La mat qastzij che sibʼalaj nim kqil wi wariʼ? Ri qʼatal tzij David xril ri chʼawem junam rukʼ jun nimalaj eqeleʼn. Pa jun bʼixonem xubʼij wariʼ che ri Jehová: «Ri nuchʼawem ukʼ la je chuxoq jachaʼ ri kʼokʼalaj qʼol chwach la» (Sal. 141:1, 2). Pa taq uqʼij ri David xkoj jun incienso che uyaʼik uqʼij ri Jehová, che xaq xiw ri e kojol tabʼal toqʼobʼ ketaʼm jas kyaʼ rukʼ (Éx. 30:34, 35). Rumal laʼ, are chiʼ ri David xchʼaw chrij incienso, xraj xubʼij che rajawaxik kchoman na chrij jas kubʼij che ri uTat kʼo pa ri kaj. Ri oj xuqujeʼ kqaj je kqabʼano, rumal che kqaj che ri qachʼawem kqaj chuwach ri Jehová. w22.07 20 párrs. 1, 2; 21 párr. 4

Chqayaʼ che are ri Jehová ktojow ukʼaxel ri kʼax. Ri Jehová uyaʼom ta bʼe che kqatzalij uwach ri kʼax che kbʼan chqe (Rom. 12:20, 21). Rumal che oj ajmakibʼ qetaʼm ta ronojel ri jastaq che kkʼulmatajik, kojkun taj kqaqʼat tzij pa kiwiʼ e nikʼaj chik (Heb. 4:13). Xuqujeʼ ri kqanaʼo jujun taq mul kojusubʼu rech qas ta utz kqabʼan che rilik jun jastaq. Santiago xutzʼibʼaj wariʼ: «Are kʼu ri winaq ri koyowarik man are ta kubʼan ri kqaj chuwach ri Dios» (Sant. 1:20). Qas qetaʼm che ri Jehová utz kubʼan na che uqʼatik tzij pa kiwiʼ ri winaq. Are chiʼ kqakuy kimak ri xkibʼan kʼax chqe, kqakʼutu che kqakubʼsaj qakʼuʼx che utz kubʼan ri Jehová che uqʼatik tzij. We kqaya pa uqʼabʼ ri Jehová ronojel ri kʼax che kqariqo, kqakʼutu che qas kqakojo che ri areʼ kresaj na ronojel ri kʼax che ubʼanom ri makaj chqe. Pa ri kʼakʼ uwach Ulew ri Dios kresaj na ronojel uwach kʼax y «man knaʼtax ta chi na» (Is. 65:17). w22.06 10, 11 párrs. 11, 12

Rumal laʼ, ri kkibʼan che retzelaxik qawach kukʼutu che tajin kqabʼan ri xubʼan ri Jesús y che kojqaj chuwach ri Jehová (Mat. 5:11, 12). Are ri Itzel ri ajmak che ronojel ri kʼax che kbʼan chqe kumal ri winaq, are kʼu, kʼo ta uchuqʼabʼ chuwach ri Jesús. Rukʼ ri utobʼanik ri Cristo, ri winaq re ronojel ri uwach Ulew tajin kketaʼmaj ri jastaq che kubʼan na ri uQʼatbʼal tzij ri Dios. Jun chi kʼax kʼo chqawach are che ri winaq kechʼaw pa jalajoj chʼabʼal. Are kʼu pa ri visión che xukʼut ri Jesús chuwach ri apóstol Juan, xuqʼalajisaj che paneʼ kʼo kʼi chʼabʼal pa ri uwach Ulew konojel ri winaq kketaʼmaj ri utz taq jastaq che kyaʼ ubʼixik (Ap. 14:6, 7). ¿Jas qabʼanom rech konojel ri winaq re kʼi chʼabʼal kketaʼmaj ri utz taq tzij? Qayaʼom ri e qawuj che kchʼaw chrij ri Biblia pa jw.org, pa más che 1,000 chʼabʼal. Xuqujeʼ, ri Jupuq Ajkʼamal bʼe cho ronojel uwach Ulew xuya bʼe che xqʼaxex pa más che 700 chʼabʼal ri wuj che qas tajin kqakoj kimik che uyaʼik etaʼmanik re ri Biblia, ri wuj ¡Jun kʼaslemal che kʼo ta ukʼisik! w22.07 9 párrs. 6, 7

Ri Jesús xel ukʼuʼx chke ri winaq. Ri apóstol Mateo xubʼij: «Are taq ri Jesús xeril ri kʼiʼalaj winaq, xel ukʼuʼx chke, rumal rech chi kkiriq kʼax e je jas ri chij ri man kʼo ta kajyuqʼ, e jabʼuninaq» (Mat. 9:36). Y, ¿jas kubʼan ri Jehová che kilik ri winaq? Are chiʼ ri Jesús tajin kchʼaw chrij ri uTat, xubʼij ri e tzij riʼ: «Ri iTat [...] man kraj taj chi ksach uwach jun chke we chʼutiʼq riʼ» (Mat. 18:14). ¡Kojkikotik rumal che ri Jehová sibʼalaj kojraj! Chiʼ kqetaʼmaj más uwach ri Jesús más knimar ri qaloqʼoqʼebʼal che ri Jehová. Kʼo jun chi jastaq che katkunik kabʼano rech knimar más ri aloqʼoqʼenik che ri Jehová y katkʼiy pa ri akojonik. ¿Jas riʼ? Are kachilaxik ri e qachalal pa ri congregación che e ko pa ri kikojonik. Chawilaʼ che ri e qachalal riʼ amaqʼel kekikotik, kkichomaj taj che utz ta ri xkibʼano are chiʼ xkichaʼ upatanexik ri Jehová. Chabʼij chke che kkibʼij chawe jujun taq jastaq che kikʼulmam pa ri kikʼaslemal. Y are chiʼ kachaʼ jun jastaq che sibʼalaj nim ubʼanik, chattzijon kukʼ rech kkiya jujun taq pixabʼ chawe. Rumal laʼ ri Biblia kubʼij: «Ri utoʼtajik kriqtaj kumal ri e kʼi yaʼl taq noʼj». w22.08 3 párrs. 6, 7

Qonojel kqariq kʼax. Are kʼu xaq ta qatukel oj kʼolik. Rumal che, junam rukʼ ri kubʼan jun tat che kuloqʼoqʼej ri ralkʼwal, ri Jehová amaqʼel kok il chqe. Xuqujeʼ kʼo qukʼ, kraj kojutatabʼej are chiʼ kqataʼ tobʼanik che y kojutoʼo (Is. 43:2). Qas qetaʼm che kojkunik kqachʼij apachike uwach kʼax rumal che ri Jehová kuya ronojel ri kajwataj chqe: ri chʼawem, ri Biblia, ri e wuj, ri audios, ri videos y ri e qachalal che sibʼalaj kojkiloqʼoqʼej. Sibʼalaj kqamaltyoxij che ri qaTat che kʼo pa ri kaj kok il chqe. Junam rukʼ ri kubʼij Salmo 33:21: «Ri qanimaʼ kkikot rukʼ ri Ajawaxel». Ri Jehová amaqʼel kojuchajij, ¿jas rajawaxik kqabʼano rech kqamaltyoxij che? Kqakʼam ri tobʼanik che kuya chqe. Rajawaxik kqakoj qachuqʼabʼ rech ri Jehová kuya ta kan qachajixik, rajawaxik amaqʼel kqanimaj y kqabʼan ri utz krilo. We kqabʼan wariʼ, ri areʼ amaqʼel kok il chqe. w22.08 13 párrs. 15, 16

Pa taq ri qaqʼij, e kʼi winaq ketaʼm ta chik jachin chrij kkikubʼsaj wi kikʼuʼx. E kʼi nim kekil wi ri e qʼatal taq tzij, ri científicos y ri kʼo nimaʼq taq kʼayij pa kiqʼabʼ, are kʼu kubʼan kebʼ kikʼuʼx chrij ri kkibʼij. Xaq uwiʼ chik, kkikubʼsaj ta kikʼuʼx chkij ri e kʼamal taq bʼe re taq ri iglesias cristianas, rumal laʼ kkikubʼsaj ta kikʼuʼx chrij ri Biblia. Ri kqapatanij ri Jehová qas qetaʼm che ri areʼ are ri «Dios aj qastzij» y amaqʼel kraj kqariq utzilal (Sal. 31:5; Is. 48:17). Qas kojkunik kqakubʼsaj qakʼuʼx chrij ri kubʼij ri Biblia. Junam kqachomaj rukʼ ri xuchomaj jun nikʼol rech ri Biblia che xubʼij: «Qastzij wi ronojel ri ubʼim ri Dios, amaqʼel qas kbʼantajik. Ri utinamit ri Dios kkikubʼsaj kikʼuʼx chrij ri kubʼij ri Biblia, rumal che kkikubʼsaj kikʼuʼx chrij ri ajchaqʼe». w23.01 2 párrs. 1, 2

Kqaya kichuqʼabʼ ri e qachalal are chiʼ keqatoʼo rech knimar más ri kikojonik chrij ri Jehová. E jujun kkiriq kʼax rumal che keyoqʼ kumal ri e Testigos taj. E nikʼaj chik kiriqom yabʼil o kiriqom jun chi kʼax pa ri kikʼaslemal. Y e kʼo chi nikʼaj pa kʼi junabʼ keyeʼm che kpe ri ukʼisbʼalil ri kʼaxkʼolil. Ronojel ri e jastaq riʼ kubʼano che ri e qachalal kqaj uchuqʼabʼ ri kikojonik. Are waʼ ri xkiriq ri cristianos re ri nabʼe siglo che xuqujeʼ xkiriq kʼax. Ri apóstol Pablo xukoj ri uTzij ri Dios rech xeʼutoʼ ri cristianos che ukowirisaxik ri kikojonik. Jun kʼutbʼal, weneʼ ri cristianos judíos ketaʼm taj jas kkibʼij chke ri kifamilia are chiʼ kbʼix chke che ri judaísmo are más nim na ubʼanik chuwach ri cristianismo. Qastzij riʼ che ri carta che xutaq bʼi ri Pablo chke ri hebreos sibʼalaj xeʼutoʼo (Heb. 1:5, 6; 2:2, 3; 9:24, 25). w22.08 23, 24 párrs. 12-14

Pa wajun uwach Ulew riʼ che kʼo pa uqʼabʼ ri Satanás, e kʼi winaq kkikubʼsaj ta kikʼuʼx chkij nikʼaj chik. Kʼi taq mul bʼanom kʼax chke rumal ri kkichaʼ ubʼanik ri kʼo nimaʼq taq kikʼay, ri qʼatal taq tzij y ri e kʼamal taq bʼe ke ri e kojonem. Xuqujeʼ kbʼan wariʼ chke kumal ri e kachiʼl, ri e kikʼulja y ri e kachalaxik. Qetaʼm che kkʼulmataj wariʼ. Rumal che ri Biblia kubʼij che «pa ri kʼisbʼal taq qʼijol» ri e winaq kuya taj kkubʼsax kʼuʼx chkij, kkimol tzij chkij ri kajil kitzʼaqat y kekijach ri e kachiʼl pa kiqʼabʼ ri kikʼulel. Kkibʼan ke jas ri kubʼan ri Satanás, rumal che areʼ taqal ta che kkubʼsax kʼuʼx chrij (2 Tim. 3:1-4; 2 Cor. 4:4). Are kʼu ri oj qastzij cristianos qetaʼm che kojkunik kqakubʼsaj ronojel qakʼuʼx chrij ri Jehová. Qas qetaʼm che ri areʼ qas kojuloqʼoqʼej y kʼo ta jumul keʼuya kan ri e rachiʼl (Sal. 9:10). Xuqujeʼ kojkunik kqakubʼsaj qakʼuʼx chrij ri Jesucristo rumal che xuya ri ukʼaslemal rumal qech (1 Ped. 3:18). Qas qilom che kojkunik kqakubʼsaj qakʼuʼx chrij ri Biblia (2 Tim. 3:16, 17). w22.09 2 párrs. 1, 2

Ri qastzij kikotemal xa ta jun tiempo kqanaʼo, xaneʼ kqanaʼ pa ronojel ri qakʼaslemal. Are chiʼ ri Jesús xuya jun chʼabʼal pa jun juyubʼ, xukʼutu jas kbʼan che uriqik. Xubʼij: «Utz ke ri kkichʼobʼo chi kajwataj ri Dios chke» (Mat. 5:3). Ri areʼ retaʼm che ri Dios xojubʼano rech kqaj kqetaʼmaj uwach y kqaqʼijilaj. Chrij wariʼ kchʼaw wi ri Biblia are chiʼ kubʼij chi «kajwataj ri Dios» chqe. Y rumal che ri Jehová are jun Dios kkikotik, ri kojpatanin che xuqujeʼ kojkunik kojkikotik (1 Tim. 1:11). ¿La kʼateʼ kojkikotik are chiʼ utz kojriqitaj wi? Kʼateʼ taj. Are chiʼ ri Jesús xuya ri chʼabʼal pa ri juyubʼ xubʼij che «ri keʼoqʼik» o ri kebʼisonik kekunik kekikotik. Y xubʼij che ri kbʼan kʼax chke «rumal ubʼanik ri utaqanik ri Dios» xuqujeʼ kekunik kekikotik (Mat. 5:4, 10, 11). Ri Jesús xubʼij che kqariq ta ri kikotemal xa rumal we utz ri kojriqitaj wi, xaneʼ are rumal che we kqilij ri kajwataj chqe pa ri qakojonik y kojqebʼ rukʼ ri Dios (Sant. 4:8). w22.10 6 párrs. 1-3

Ri utz chomanik are ktoʼw jun cristiano rech kuchʼobʼo che kʼo tiempo che utz kchʼawik y kʼo tiempo utz taj kchʼawik (Ecl. 3:7). Pa jujun taq tinamit kbʼixik che «ri plata are ubʼixik kʼi tzij y ri oro are utzʼapixik uchiʼ jun winaq». Ri kraj kubʼij are che jujun taq mul are utz kojchʼaw taj. Chqilampeʼ ri ukʼutbʼal jun kʼamal bʼe che amaqʼel ktaʼ tobʼanik che rech kril jastaq pa taq ri congregaciones che kʼax ubʼanik. Jun chi kʼamal bʼe kubʼij wariʼ chrij: «Amaqʼel kuchajij ribʼ chrij ri kubʼij y kuya ta ubʼixik jastaq che tajin kkʼulmataj pa nikʼaj chi congregaciones». Rumal ri utz ubʼantajik ri qachalal riʼ, nim kil wi kumal ri nikʼaj chi kʼamal bʼe pa ri ucongregación, rumal che qas ketaʼm che kuya ta ubʼixik jastaq che yaʼtal taj kketaʼmaj ri nikʼaj chik. Ri ubʼixik ri qastzij kutoʼ jun cristiano rech kkubʼsax kʼuʼx chrij. Are chiʼ jun winaq amaqʼel kubʼij ri qastzij, más kkubʼsax kʼuʼx chrij (Efes. 4:25; Heb. 13:18). w22.09 12 párrs. 14, 15

E kʼi kkibʼano che kkita taj are chiʼ ri qastzij nojibʼal kuraq uchiʼ «xoʼl taq ri ja» (Prov. 1:20). Ri Biblia kubʼij che kʼo oxibʼ kiwach winaq che kkixutuj ri qastzij nojibʼal: «ri man kʼo ta [k]etamanik», ri kkitzeʼj uwach ronojel o ri kketzʼabʼej uwach ronojel y «ri man kʼo ta [k]inoʼj» (Prov. 1:22-25). «Ri man kʼo ta [k]etamanik» are ri kkikoj ronojel ri kbʼix chke rech kesubʼik (Prov. 14:15). Qastzij che sibʼalaj e kʼi winaq e subʼum kumal ri kʼamal taq kibʼe pa ri kikojonem y kumal ri políticos. E jujun sibʼalaj kebʼisonik are chiʼ kketaʼmaj che xa e subʼum. Are kʼu ri keya ubʼixik pa Proverbios 1:22 paneʼ kketaʼmaj che xa kesubʼik kkitaqej kʼolem chilaʼ (Jer. 5:31). Kkaj taj kketaʼmaj chrij ri Biblia y kkibʼan ta ri taqanik che kʼo chupam. ¿La mat qastzij che ri oj kqaj taj kqesaj kiwach ri winaq che kʼo ta kkaj kketaʼmaj? (Prov. 1:32; 27:12). w22.10 19 párrs. 5-7

Ri utinamit ri Jehová kuya pixabʼ chqe rumal che kojuchajij. Amaqʼel kbʼix chqe che we kqakʼex ri qanúmero re teléfono o ri lugar che kojel wi, rajawaxik kqaya ubʼixik chke ri kʼamal taq bʼe. Weneʼ ri utinamit ri Jehová kubʼij chqe che rajawaxik kojel ta bʼi pa ri qachoch o kojbʼe pa jun chi lugar, o jas kqabʼano rech kojbʼe che ukʼamik jujun jastaq che kkiya ri e qachalal. Xuqujeʼ weneʼ kubʼij chqe jampaʼ y jas kqabʼan che kitoʼik ri e nikʼaj chik. We kojniman ta che ri kbʼix chqe, kqariq kʼax riʼ y keqaya pa kʼax riʼ ri e kʼamal taq bʼe che kkikoj kichuqʼabʼ che qachajixik (Heb. 13:17). Rumal jun kabʼraqan, jun nimalaj jabʼ, e kʼi qachalal e elenaq bʼi pa ri kitinamit. Ri e areʼ kkikoj kichuqʼabʼ rech kukʼam kiwach pa ri lugar che keʼopan wi y rech aninaq kkimaj chi ubʼanik ri jastaq re ri kikojonik. «Kkitzijoj ri utzij ri Dios» junam rukʼ ri xkibʼan ri nabʼe taq cristianos are chiʼ xebʼe pa nikʼaj chi tinamit rumal che xbʼan kʼax chke kumal ri winaq (Hech. 8:4). Ri utzijoxik ri utzij ri Dios kojutoʼo rech kojchoman chrij ri kuya na ri uQʼatbʼal tzij pa ri petinaq y are ta kojchoman chrij ri kʼax kqariq kimik. Jeriʼ kojkikotik y kqanaʼ jamaril. w22.12 19 párrs. 12, 13

Ri Jehová nim kojril wi chqajujunal. Are chiʼ ri Jesús xeʼutaq bʼi ri utijoxelabʼ che utzijoxik ri utzij ri Dios, xchʼaw chkij ri e chiʼochi (gorriones) rech kkixibʼij ta kibʼ chuwach ri kʼax che kkiriqo (Mat. 10:29-31). Pa riʼ ri tiempo paqal ta kajil ri alaj taq chiʼochi. Are kʼu ri Jesús xubʼij chke ri utijoxelabʼ: «Mawi kʼu jun chke ktzaq pa ulew, we ta ma ta are ri urayibʼal ri iTat». Xuqujeʼ xubʼij: «Ri ix kʼo na iwajil chkiwach kʼi chiʼochi». Rukʼ wariʼ xunaʼtasaj chke che nim kibʼanik chuwach ri Jehová. Y xeʼutoʼ rech kkixeʼj ta kibʼ chuwach ri kʼax kbʼan chke. Qas xnaʼtaj riʼ chke ri xubʼij kan ri Jesús are chiʼ kkil ri alaj taq chiʼochi. Rumal laʼ, are chiʼ keʼawil ri alaj taq chikop che kerapanik chnaʼtaj chawe che nim katril wi ri Jehová rumal che más nim na abʼanik «chkiwach [ri] chiʼochi». Rukʼ ri utobʼanik ri Dios ri at katkunik kachʼij ri kʼax kbʼan chawe. w23.03 18 párr. 12

Weneʼ kqariq kʼax rumal che ri qachalaxik itzel kojkilo o rumal che kʼo ta chi qachak. Are chiʼ naj tiempo kojqʼax pa jun kʼax, weneʼ kqachomaj che kkʼis ta wi y weneʼ kkʼistaj qakʼuʼx chuwach. Ri Satanás kukoj wariʼ rech kubʼan kebʼ qakʼuʼx chrij ri uloqʼoqʼebʼal ri Jehová. Kraj che kqachomaj che are ri Jehová y ri utinamit e ajmakibʼ che ri kʼax kqariqo. Are je xkikʼulmaj jujun chke ri israelitas che xekʼojiʼ pa Egipto. Nabʼe, xkichʼobʼo che are ri Jehová e chaʼowinaq ri Moisés y ri Aarón rech kekesaj lo pa ri kʼaxkʼolil (Éx. 4:29-31). Are kʼu, are chiʼ xbʼan más kʼax chke rumal ri faraón, xkibʼij che umak kech ri Moisés y ri Aarón ri xkikʼulmaj. (Éx. 5:19, 20). ¡Qas bʼisobʼal che xkichomaj che are ri Moisés y ri Aarón e ajmakibʼ! We kʼi chi tiempo tajin kachʼij jun kʼax, chajaqaʼ ri awanimaʼ chuwach ri Jehová y amaqʼel chataʼ tobʼanik che. w22.11 15 párrs. 5, 6

Ri Jehová are yaʼowinaq ri kʼaslemal, rumal laʼ kkunik kutzalij chi jumul chke ri kaminaqibʼ. Xukoj ri qʼaxal tzij Elías rech xukʼasuj ri ral jun malkaʼn ixoq re Sarepta (1 Rey. 17:21-23). Are chiʼ xqʼax ri tiempo, xukoj chi ri qʼaxal tzij Eliseo rech xukʼasuj ri ral jun ixoq re Sunem (2 Rey. 4:18-20, 34-37). Waʼ taq kʼastajibʼal riʼ kukʼutu che ri Jehová kʼo uchuqʼabʼ che utzalixik chi jumul ri kikʼaslemal ri e kaminaq. Y are chiʼ ri Jesús xkʼojiʼ cho ri uwach Ulew xukʼutu che are ri Jehová, ri uTat, yaʼowinaq uchuqʼabʼ (Juan 11:23-25, 43, 44). Kimik ri Jesús yaʼom chi «ronojel taqanik» pa uqʼabʼ pa ri kaj y pa ri uwach Ulew. Rumal laʼ kkunik keʼukʼastajisaj «konojel ri kaminaqibʼ» y kekam ta chik (Mat. 28:18; Juan 5:26-29). w22.12 5 párr. 10

Are chiʼ xkitatabʼej ta ri qʼaxal tzij, jetaneʼ are ri Jehová xkixutuj. Qastzij riʼ che ri texto re kimik xuya uchuqʼabʼ ri Ezequiel rumal che paneʼ xxutux kumal ri winaq, kraj taj kubʼij che xa utz ta kubʼan che ri uchak. Xuqujeʼ, ri Jehová xubʼij che che are chiʼ ktzʼaqat ri xuya ubʼixik, ri judíos qas «kketaʼmaj kʼu na chi kʼo jun qʼaxal tzij chkixoʼl» (Ezeq. 2:5; 33:33). Qastzij riʼ che wariʼ xuya uchuqʼabʼ ri Ezequiel rech xuya ta kan utzijoxik ri utzij ri Dios. Oj xuqujeʼ kuya qachuqʼabʼ retaʼmaxik che are ri Jehová oj taqowinaq. Are jun nimalaj tewchibʼal che oj utestigos (Is. 43:10). Junam rukʼ ri xubʼij ri Jehová che ri Ezequiel: «Maxeʼj awibʼ» (Ezeq. 2:6). Chqe oj kubʼij wariʼ: «Chichajij bʼaʼ animaʼ». ¿Jasche rajawaxik kqaxeʼj ta qibʼ chkiwach ri e qakʼulel? Rumal che junam rukʼ ri Ezequiel, are ri Jehová oj taqowinaq oj y kuya ri utobʼanik chqe (Is. 44:8). w22.11 3, 4 párrs. 4, 5

Kimik sibʼalaj nim kqil ri kichak ri kʼamal taq bʼe y ri e tobʼanelabʼ. Qas kqilo che ri e qachalal riʼ kojkichajij, rumal laʼ qas kqamaltyoxij che ri Jehová. Are kʼu ¿jas rajawaxik kqabʼan oj rech kkubʼsax kʼuʼx chqij? Keqaj ri e qachalal y kqaj keqatoʼo are chiʼ kkiriq kʼax. Are kʼu rajawaxik kqachajij qibʼ y kqanim ta qibʼ pa ri kikʼaslemal. Pa ri congregación cristiana re ri nabʼe siglo xekʼojiʼ e winaq che aninaq kkitzijoj chke nikʼaj chik ri xbʼix chke, kkinim kibʼ pa kikʼaslemal e nikʼaj chik y kechʼaw chrij jastaq che yaʼtal taj kbʼixik (1 Tim. 5:13). Qastzij riʼ che kqaj taj kqabʼan qe junam kukʼ. Chqachomajampeʼ che jun qachalal kuya ubʼixik jun jastaq chqe che kraj taj kketaʼmaj e nikʼaj chik. Jun kʼutbʼal, jun qachalal ixoq kubʼij chqe che xuriq jun yabʼil o tajin kuqʼaxej chi jun kʼax, are kʼu kubʼij chqe che xaq xiw chqe oj kubʼij wi. Rajawaxik kʼo ta jun che kqatzijoj wi. w22.09 10 párrs. 7, 8

Xaq xiw ta rajawaxik kqakʼutu che utz tajin kqabʼan che jujun taq jastaq, xaneʼ rajawaxik kqanikʼoj ri qabʼantajik rech kqabʼan ri ktaqan wi ri Jehová. Xa ta jumul kqabʼano, xaneʼ rajawaxik amaqʼel kqabʼano. Are chiʼ oj tzʼaqat taq winaq chik kqabʼan riʼ ronojel ri kqaj chuwach ri Jehová. Are kʼu, kimik rajawaxik kqakoj na qachuqʼabʼ chuwach ri makaj. Chqilampeʼ che ri xubʼij ri apóstol Pablo pa Romanos 12:2 kukʼutu che ri kqabʼan che ukʼexik ri qachomanik kʼo ubʼanik rukʼ ri ubʼanik ri kqaj chuwach ri Jehová. Rajawaxik kqilo che ri kqachaʼ ubʼanik pa ri qakʼaslemal kqaj chuwach ri Jehová y are ta kqabʼan ri kkibʼan ri winaq. w23.01 8, 9 párrs. 3, 4

Ri ukʼutbʼal ri José kukʼut jun jastaq nim ubʼanik chqawach. ¿La kresaj ri Jehová apachike uwach kʼax kqariqo? Are chiʼ kqariq jun kʼax ¿la are ri Jehová kbʼanowik rech kqariq utzilal are chiʼ kqʼax ri tiempo? Are ta waʼ ri kukʼut ri Biblia (Ecl. 8:9; 9:11). Are kʼu, qas qetaʼm che are chiʼ kojqʼax pa kʼax, ri Jehová kril ronojel ri kqakʼulmaj y kutatabʼej ri qachʼawem (Sal. 34:15; Is. 59:1). Xuqujeʼ, kojutoʼ che uchʼijik ri kʼax. ¿Jas kubʼan che qatoʼik? Kʼi mul, ri kubʼan ri Jehová are che kuya qachuqʼabʼ pa ri qʼij che qas rajawaxik chqe (2 Cor. 1:3, 4). ¿La knaʼtaj jumul chqe jas xubʼan ri Jehová che ukubʼsaxik qakʼuʼx are chiʼ xojqʼax pa jun kʼax? Kʼi taq mul kʼateʼ kqilo che ri Jehová xojutoʼo are chiʼ qaqʼaxem chi jun kʼax. w23.01 17, 18 párrs. 13-15

Ri xibʼibʼal awaj riʼ kjunamataj rukʼ ri xibʼibʼal awaj che kʼo siete ujolom, are kʼu wajun awaj kaq ri rij. Apocalipsis kubʼij che are «ri uwachbʼal ri [...] xibʼibʼal awaj», xuqujeʼ kubʼij che are jun «uwajxaq ajawinel» (Ap. 13:14, 15; 17:3, 8). Kbʼixik che wajun «ajawinel» xumaj uqʼatik tzij tekʼuriʼ xsach uwach, are chiʼ xqʼax ri tiempo xkʼiy chi jumul. Wariʼ qas kjunamataj rukʼ ri xkʼulmataj rukʼ ri Organización de las Naciones Unidas (ONU), che kechakun chrij uqʼatik tzij pa ronojel ri uwach Ulew. Are chiʼ qas xumaj loq xbʼix Sociedad de las Naciones che. Tekʼuriʼ xsach uwach are chiʼ xbʼan ri Segunda Guerra Mundial. Y are chiʼ xqʼax ri tiempo xwalij chi jumul, y are ri ONU che kʼo kimik. Rukʼ ri kkiya ubʼixik ri e qʼatal taq tzij che kejunamataj kukʼ e xibʼibʼal taq awaj, kekitaqchij ri e winaq rech kkibʼan kikʼulel che ri Jehová y ri utinamit. Pa nikʼaj chi tzij, tajin kekimulij «ri ajawinelabʼ re ronojel ri uwach ulew» pa ri Armagedón, «ri chʼoj re ri nimalaj uqʼij ri Dios ri kʼo ronojel ukunem» (Apoc. 16:13, 14, 16). w22.05 10 párrs. 10, 11

Are chiʼ xqʼax ri tiempo ri Jesús utukel xumaj usikʼixik ri uTzij ri Dios. Ri utzilal xuya che are che xaq xiw ta xkʼojiʼ retaʼmabʼal xaneʼ nim xrilo y xubʼan pa ri ukʼaslemal. Jun kʼutbʼal re are ri xukʼulmaj pa ri templo are chiʼ kʼo 12 ujunabʼ. Ri ajtijabʼ re ri pixabʼ sibʼalaj «xkimayo, rumal rech chi nim ri unoʼj ri ala» (Luc. 2:46, 47, 52). We ronojel qʼij kqasikʼij ri uTzij ri Dios kojutoʼ che uchʼobʼik ri kubʼij y kqakʼutu che nim kqil wi. Are kʼu, ¿jas kqabʼano rech qas kqachʼobʼ ri kubʼij ri uTzij ri Dios y kqabʼan pa ri qakʼaslemal? Chqilaʼ ri xubʼij ri Jesús chke ri fariseos, ri saduceos y ri escribas. Paneʼ ri ajkʼamal taq bʼe riʼ kisikʼim uwach ri uTzij ri Dios, are kʼu qas ta kkichʼobʼo. Rumal laʼ, ri Jesús xchʼaw chrij oxibʼ jastaq che rajawaxik kkibʼano are kʼu xkibʼan taj. Chqilampeʼ ri oxibʼ jastaq che xubʼij ri Jesús y che kojutoʼ kimik: ri nabʼe, qas chqachʼobʼoʼ ri kqasikʼij uwach. Ri ukabʼ, chqatzukuj jeʼlalaj taq pixabʼ. Ri urox, chqayaʼ bʼe che ri uTzij ri Dios kojutoʼ pa ri qakʼaslemal. w23.02 8, 9 párrs. 2, 3

Rajawaxik kqaxutuj ri e jastaq riʼ: ri utzujuxik ibʼ che jun winaq (coquetear), ri qʼabʼarik, utijik kʼi jastaq, ubʼixik itzel taq tzij, ubʼanik etzʼanem che kʼo chʼoj o kamisanik chupam y rilik tzʼil taq wachbʼal (Sal. 101:3). Ri Itzel kutzukuj kubʼano rech kubʼan kʼax che ri qachilanik rukʼ ri Jehová (1 Ped. 5:8). We kqachajij ta qibʼ, ri Satanás kkunik kukoj pa qanimaʼ y pa qachomanik itzel taq bʼantajik, junam rukʼ ri ubʼanik nimal, elaqʼ, molom tzij, titikil (kʼax kqanaʼ che jun chik), oyowal y urayixik jastaq ke e nikʼaj chik (Gál. 5:19-21). Are kʼu we aninaq taj kqesaj ri e itzel taq bʼantajik, nojimal nojimal kubʼan kʼax, junam rukʼ ri kubʼan jun itzel qʼayes che ri tikoʼn (Sant. 1:14, 15). Jun kʼax che qas ta kqʼalajinik: ri itzel taq achilanik. Weneʼ are chiʼ kqʼax ri tiempo xaq kqatatabʼej chi ri kubʼij y junam chi ri qachomanik rukʼ (1 Cor. 15:33). We kqachajij qibʼ, kojkʼojiʼ ta riʼ kukʼ winaq che keniman ta che ri Jehová (Luc. 21:34; 2 Cor. 6:15). Xuqujeʼ kqachʼobʼ riʼ jas jastaq kubʼan kʼax chqe y kqaxutuj. w23.02 16 párr. 7; 17 párrs. 10, 11

Rumal che más tajin kawetaʼmaj uwach ri Jehová, más tajin knimar ri aloqʼoqʼenik che y kawaj che ksach ta uwach ri awachilanik rukʼ, xaneʼ kkʼiy más. Ri areʼ kraj che kakikotemaj ri ranimaʼ (Prov. 23:15, 16). Y katkunik kakikotemaj rukʼ ri kabʼij y ri kabʼano. Rukʼ ri kachaʼ ubʼanik pa ri akʼaslemal kakʼutu we qas kaloqʼoqʼej ri Jehová (1 Juan 5:3). Xuqujeʼ sibʼalaj katkikot riʼ we kajach ri akʼaslemal che. ¿Jas kabʼan che ukʼutik che kaloqʼoqʼej ri Jehová? Nabʼe, rajawaxik kabʼan jun chʼawem nim ubʼanik che, kabʼij che che kawaj kajach ri akʼaslemal che (Sal. 40:8). Tekʼuriʼ kabʼan ri aqasanjaʼ rech kakʼutu che ajachom chi ri akʼaslemal che. Pa riʼ ri qʼij kkʼextaj ri akʼaslemal. Rumal che are ta chi kabʼan ri kawaj at xaneʼ are ri kraj ri Jehová (Rom. 14:8; 1 Ped. 4:1, 2). Xuqujeʼ ubʼanik aqasanjaʼ kuya nim kikotemal chawe. w23.03 5, 6 párrs. 14, 15