Septiembre

We utz kojchʼawik, ri e nikʼaj chik kkilo jachin «ri kqʼijilan che ri Dios xuqujeʼ ri man kqʼijilan ta che» (Mal. 3:18). Rukʼ wariʼ, qas kqʼalajinik che ri oj kqapatanij ri Jehová. Chqilaʼ ri xukʼulmaj jun qachalal Kimberly ubʼiʼ. Are chiʼ junam xkibʼan jun chak rukʼ jun rachiʼl re ri tijobʼal, ri rachiʼl qas xrilo che ri al Kimberly kjunamataj ta kukʼ ri e nikʼaj chi rachiʼl. Kʼax ta kchʼaw chkij ri e nikʼaj chik, amaqʼel kukʼut utzilal y kubʼij ta itzel taq tzij. Ri rachiʼl xraj xretaʼmaj jasche junam ta kukʼ ri e nikʼaj chik rumal laʼ, are chiʼ xqʼax ri qʼij xumaj retaʼmaxik chrij ri Biblia. ¡Qas kkikot ri Jehová are chiʼ e nikʼaj chi winaq kkaj kketaʼmaj ri qastzij rumal che utz kojchʼawik! Qonojel kqaj che rukʼ ri kojchʼawik kqaya uqʼij ri Jehová. w22.04 5, 6 párrs. 5-7

Ri Jesús xeresaj siete itzel taq uxlabʼal pa ri ubʼaqil ri María Magdalena. Rech xukʼutu che sibʼalaj kmaltyoxinik, xteriʼ chrij ri Jesús y xukoj ronojel ri kʼo rukʼ che utoʼik (Luc. 8:1-3). Paneʼ ri María sibʼalaj xumaltyoxij ri xbʼan che rumal ri Jesús, are kʼu weneʼ xuchʼobʼ taj che ri Jesús kuya na ri ukʼaslemal pa kiwiʼ ri winaq rech apachin taneʼ ri kkojon chrij kuriq jun kʼaslemal kʼo ta ukʼisik (Juan 3:16). Ri María qas xukʼutu che sibʼalaj xumaltyoxij ri xbʼan che. Rumal che xuya ta kan ri Jesús are chiʼ xekebʼam chi chuwach ri cheʼ (Juan 19:25). Y, are chiʼ muqum chi ri Jesús, ri María y e kebʼ rachiʼl xkikʼam bʼi kʼokʼalaj kunabʼal rech xekikojo che ri ucuerpo (Mar. 16:1, 2). Ri María are jun chke ri winaq che xril uwach ri Jesús are chiʼ kʼastajinaq chik y xtzijon rukʼ (Juan 20:11-18). w23.01 27 párr. 4

Kqachomaj taj che qabʼanom chi ronojel che upatanexik ri Jehová. Paneʼ kimik kojkun ta chik kqabʼan ronojel ri kojkun che ubʼanik ojer, are kʼu rajawaxik «amaqʼel [koj]ok il che ri uchak ri Ajawaxel» rumal che naqaj chi kʼo wi ri kʼisbʼal (1 Cor. 15:58; Mat. 24:13; Mar. 13:33). Chqaqʼijilaj ri Jehová rukʼ kikotemal y rukʼ ronojel qanimaʼ. Ri Jesús xutaq bʼi jujun taq tzij chke ri cristianos re Laodicea, xubʼij chke che kʼo jujun jastaq utz taj tajin kkibʼano. Xeʼujunamaj rukʼ «saqliʼ», rumal che qas ta rukʼ chi ronojel kanimaʼ tajin kkiya uqʼij ri Jehová y kʼo ta kubʼij kikʼuʼx che usukʼumaxik ri keriqitaj wi. Xbʼix wariʼ chke: «[Ix] kʼoqotajinaq, toqʼobʼ kʼu [i]wach». Rumal riʼ, rajawaxik kkikoj chi jumul kichuqʼabʼ rech rukʼ ronojel kanimaʼ kkiqʼijilaj ri Jehová (Apoc. 3:16, 17, 19). ¿Jas kqetaʼmaj chrij ri xkikʼulmaj? We nim ta chi kqil ri jastaq re ri qakojonik, rajawaxik kqakoj chi jumul qachuqʼabʼ rech kqil ri kqabʼan che usukʼumaxik (Apoc. 3:18). Rajawaxik kqaya ta bʼe che ri qʼinomal o utzukuxik kʼi jastaq kusach ri qachomanik. Kqaj che are más nim ubʼanik ri jastaq re ri qakojonik chqawach. w22.05 3, 4 párrs. 7, 8

Ri Jehová kʼi chi junabʼ utzʼibʼam ri kibʼiʼ ri e winaq pa jun wuj che sibʼalaj nim ubʼanik. Xumaj rukʼ ri Abel, ri nabʼe testigo (Luc. 11:50, 51). Y chilaʼ, ri Jehová xumaj utzʼibʼaxik ri kibʼiʼ ri e winaq pa wajun wuj riʼ, sibʼalaj kʼi bʼiʼaj kʼo chi chupam. Kʼi bʼiʼaj kojom che wajun wuj riʼ pa ri Biblia: «Jun wuj, ri kenaʼtax wi», «ri wuj re ri kʼaslemal» y ri rollo re ri kʼaslemal (Mal. 3:16; Apoc. 3:5; 17:8). Pa wajun wuj riʼ che sibʼalaj nim ubʼanik tzʼibʼam kibʼiʼ konojel ri winaq che nim kkil ri Jehová y kkiya uqʼij. Ri e winaq riʼ che tzʼibʼam kibʼiʼ pa ri wuj, kʼo keyebʼal che jun kʼaslemal che kʼo ta ukʼisik pa ri uwach Ulew o pa ri kaj. Ktzʼibʼax ri qabʼiʼ pa wajun wuj riʼ we kʼo jun utzalaj qachilanik rukʼ ri Jehová y kojkojon chrij ri ukamikal ri uKʼojol, Jesucristo (Juan 3:16, 36). ¿La mat qastzij che qonojel kqaj che ktzʼibʼax ri qabʼiʼ pa ri wuj riʼ? w22.09 14 párrs. 1, 2

Ri wuj re Apocalipsis kchʼaw chrij jun «nimalaj dragón kaq rij» (Apoc. 12:3). Wajun dragón kchʼojin kukʼ ri Jesús y ri ángeles che e teren chrij (Apoc. 12:7-9). Y xaq xiw ta wariʼ kubʼano, xaneʼ kubʼan kʼax che ri utinamit ri Dios y kuya taqanik pa kiqʼabʼ ri e qʼatbʼal taq tzij re ri uwach Ulew che kejunamataj kukʼ xibʼibʼal taq awaj (Apoc. 12:17; 13:4). ¿Jachin riʼ ri dragón? Are «ri ojer kumatz, are ri itzel ri Satanás» (Apoc. 12:9; 20:2). Are waʼ ri kʼamowinaq kibʼe ri e ukʼulel ri Jehová. ¿Jas kukʼulmaj na ri dragón? Apocalipsis 20:1-3 kubʼij che jun ángel kkʼaqow na bʼi ri Satanás pa jun qʼequʼmalaj jul y wariʼ kjunamataj rukʼ jun cárcel ri ktzʼapix wi. 1,000 junabʼ kkʼojiʼ na chilaʼ «rech man keʼusubʼ ta chik ri nimaʼq taq tinamit» kʼa kkʼis na ri tiempo re ri Mil Junabʼ. Y chukʼisbʼal, ri Satanás y ri e itzel taq uxlabʼal che e teren chrij kekʼaq bʼi «pa ri cho re qʼaqʼ xuqujeʼ azufre». Wariʼ kraj kubʼij che ksachisax kiwach chilaʼ. ¡Sibʼalaj kuya kikotemal riʼ are chiʼ kʼo ta chi ri Satanás y ri e itzel taq uxlabʼal! w22.05 14 párrs. 19, 20

Ri Jesús xuqujeʼ sibʼalaj xchakunik. Are chiʼ kʼa ala na, xux ajanel (Mar. 6:3). Qastzij riʼ che ri utat unan sibʼalaj xekikotik rumal che xtobʼan che uyaʼik ri kajwataj che ri ufamilia. Rumal che are jun tzʼaqatalaj achi qas utz xel ri uchak, y qastzij riʼ che qas e kʼi xeloqʼow ri jastaq che xubʼano. Ri Jesús sibʼalaj kkikot rumal ri uchak. Are kʼu xuya taj che ri chak kresaj ri tiempo che kukoj che unimarisaxik ri ukojonik (Juan 7:15). Are chiʼ xupatanij ri Jehová pa tiempo completo xubʼij wariʼ: «Mixok il che uriqik ri wa ri ksach uwach, xaneʼ che uriqik ri wa ri kjeqiʼk ri kuya junalik kʼaslemal» (Juan 6:27). Y pa ri Sermón del Monte xubʼij: «Chimulij iqʼinomal pa ri kaj» (Mat. 6:20). Ri nojibʼal che kuya ri Jehová chqe kojutoʼo rech utz kqabʼan che rilik ri chak. Paneʼ ri oj cristianos sibʼalaj kojchakunik y kqabʼan «utzalaj taq chak». w22.05 22 párrs. 9, 10

Ri Eunice xuya jun utz kʼutbʼal chuwach ri Timoteo. Qastzij riʼ che xrilo che ri kubʼan ri unan are rumal ri nim uloqʼoqʼebʼal che ri Jehová. Xuqujeʼ xril riʼ che upatanexik ri Jehová xuya kikotemal che ri unan. Xaq junam rukʼ, e kʼi nan e kunaq che kitoʼik ri e kachalaxik paneʼ «kʼo ta jas [k]kibʼij [...] chke, xaneʼ rumal ri [k]kibʼan[o]» (1 Ped. 3:1, 2). Ri at xuqujeʼ katkunik kabʼan wariʼ. ¿Jas kabʼan che ubʼanik? Are chayaʼ pa nabʼe lugar ri awachilanik rukʼ ri Jehová (Deut. 6:5, 6). Junam rukʼ ri kkibʼan e kʼi nan, qastzij riʼ che at kʼo kʼi jastaq kabʼan taj rech are qas kaya ri kajwataj chke ri e awal, ri kiwa, ri katzʼyaq y nikʼaj chi jastaq. Jun kʼutbʼal, weneʼ qas ta kʼo atiempo, kʼo ta arajil, qas ta katuxlanik y kabʼan chi nikʼaj jastaq rech kaya ri rajawaxik chke ri e awal. Are kʼu utz taj we kachajij ta ri awachilanik rukʼ ri Jehová rumal che latzʼ awach. Chatasaʼ atiempo rech kabʼan achʼawem atukel, kanikʼoj uwach ri Biblia y rech katbʼe pa ri e riqbʼal ibʼ. Jeriʼ, katkunik kabʼan más nim che ri awachilanik rukʼ ri Jehová y kaya jun utz kʼutbʼal chkiwach ri afamilia y e nikʼaj chi winaq. w22.04 16 párr. 1; 19 párrs. 12, 13

Rumal che ri Jehová are ri Nimalaj Qʼatal tzij, kqabʼisoj taj jas kbʼan che uqʼatik tzij pa kiwiʼ ri e nikʼaj chik. Ri areʼ utz kubʼan che uqʼatik tzij. ¡Wariʼ sibʼalaj kuya kikotemal chqe! (Rom. 14:10-12). Qas qetaʼm che ri Jehová kuqʼat tzij pa kiwiʼ ri winaq junam rukʼ ri kubʼij ri uTzij chrij ri utz y ri utz taj (Gén. 18:25). Ri areʼ kubʼan ta jun jastaq che kubʼan kʼax chke ri e nikʼaj chik. Pa uqʼabʼ ri Jehová kʼo wi resaxik ronojel ri kʼax che uyaʼom ri makaj chqe. ¡Sibʼalaj kqaj che ya kopan ri qʼij riʼ! Ri areʼ kresaj na ronojel ri bʼis y ri yabʼil pa ri qabʼaqil (Sal. 72:12-14; Apoc. 21:3, 4). Ronojel waʼ jastaq riʼ knaʼtaj ta chi chqe. Rumal laʼ, chqakojoʼ qachuqʼabʼ che resaxik uwach ri Jehová, are chiʼ kqakuy kimak ri e nikʼaj chik. w22.06 13 párrs. 18, 19

Jun utzalaj qʼatal tzij rajawaxik che retaʼm ronojel ri e taqanik che kkoj che uqʼatik tzij. Rajawaxik ketaʼmaxik jachike ri utz y ri utz taj. Jun chi jastaq che rajawaxik kubʼan jun qʼatal tzij are che qas retaʼm ronojel ri xkʼulmatajik are chiʼ majaʼ kuqʼat tzij. Ri Jehová je ubʼanik y kʼo ta kjunamataj rukʼ. Ri Jehová kjunamataj ta rukʼ jun qʼatal tzij che xa winaq. Ri areʼ retaʼm ronojel chrij jun jastaq che kkʼulmatajik (Gén. 18:20, 21; Sal. 90:8). Kuqʼat ta tzij xa rumal ri kuta o krilo. Retaʼm che ri winaq kkibʼan jujun jastaq rumal che are ri kesam chrij ri kitat kinan, ri xekʼiy wi, ri winaq e kʼo kukʼ, ri kichomanik y ri kkinaʼo. Rukʼ wariʼ kqachʼobʼo che ri Jehová qas retaʼm ri kʼo pa qanimaʼ, retaʼm ri rumal che kqabʼan jun jastaq y ri kqaj kqabʼano. Kʼo ta jun jastaq che mat retaʼm areʼ (Heb. 4:13). Ri Jehová qas retaʼm qawach rumal laʼ kukuy qamak. w22.06 4 párrs. 8, 9

Utz we kojchoman chrij ri jastaq che xukoj ri Satanás rech xubʼan kʼax che ri Job, rumal che kejunamataj rukʼ ri kukoj kimik rech kubʼan kʼax chqe. Ri Satanás xraj xubʼij che qastzij ta ri loqʼoqʼebʼal kqanaʼ che ri Jehová, y che are chiʼ kqariq jun kʼax kqaya kan upatanixik. Xuqujeʼ kubʼij che kojraj ta ri Jehová y che nim ta kril ronojel ri chak che kqabʼano. Are kʼu we qonojel kqakubʼsaj qakʼuʼx chrij ri Jehová, ri Satanás kkun taj kojusubʼu rumal che qetaʼm chi ri jastaq kukojo rech kubʼan kʼax chqe. Are chiʼ kqariq kʼaxkʼolil, rajawaxik kqilo jas kqasukʼumaj pa ri qakʼaslemal. Ri kʼax che xuriq ri Job xutoʼo rech xusukʼumaj jujun taq jastaq pa ri ukʼaslemal. Jun kʼutbʼal, xrilo che rajawaxik kumachʼ más ribʼ (Job 42:3). Rumal laʼ, oj xuqujeʼ kojkunik kqilo jas rajawaxik kqakʼex che ri qabʼantajik are chiʼ kqariq kʼax. Are chiʼ kqilo che kʼo jun qabʼantajik che utz taj, kʼo kojkunik kqabʼan che usukʼumaxik. w22.06 23 párrs. 13, 14

Ri Jehová kubʼij chqe che kʼo che qatoʼik. Jun kʼutbʼal, are chiʼ majaʼ kubʼij: «Ix ri ix qʼalajisanelabʼ chwij», xubʼij wariʼ: «We rajawaxik katqʼax pa ri jaʼ, ri in kinkʼojiʼ na awukʼ, we rajawaxik katqʼax pa taq ri nimaʼ man katjiqʼ ta na, we rajawaxik katokʼow pa ri qʼaqʼ, man katkʼat ta na, ri raqʼ ri qʼaqʼ man kenikow ta na chawij» (Is. 43:2). Jujun taq mul are chiʼ kqatzijoj ri utzij ri Dios, kqariq kʼax che e junam rukʼ nimaʼq taq jaʼ o qʼaqʼ. Are kʼu, rukʼ ri utobʼanik ri Jehová, kqaya ta kan utzijoxik ri utzij (Is. 41:13). Más e kʼi ri winaq kkaj taj kkitatabʼej ri utzij ri Dios. Are kʼu qetaʼm che kraj taj kubʼij che xa utz ta kqabʼan che ri qachak. Kuya kubʼsal qakʼuʼx y qachuqʼabʼ retaʼmaxik che ri Jehová kkikot qukʼ we kqaya ta kan utzijoxik ri utzij. Ri apóstol Pablo xubʼij: «Chkijujunal kʼut kkikʼam na ri tojbʼal ke, jas ri chak ri kibʼanom» (1 Cor. 3:8; 4:1, 2). w22.11 4 párrs. 5, 6

Kimik qas tajin kqilo che tajin kebʼantaj ri xetzʼibʼax kan pa ri Biblia ojer: e winaq «kech juleʼ nimaʼq taq tinamit chik» tajin kketaʼmaj ri qastzij chrij ri Dios (Zac. 8:23; Sof. 3:9). Más che 8 millones winaq re 240 tinamit y territorios e kʼo pa ri utinamit ri Jehová. ¡Y ronojel junabʼ e miles kkibʼan kiqasanjaʼ! Are kʼu ri kikʼiyal ri kkibʼan kiqasanjaʼ are ta ri más nim ubʼanik, xaneʼ are ri utz taq bʼantajik che tajin kkikʼutu, che ri Biblia kubʼij «ri kʼakʼ [...]kʼaslemal» che (Col. 3:8-10). E kʼi chke kemakun ta chi kukʼ achijabʼ ixoqibʼ, kechʼojin taj y kekamisan ta chik, keyoqʼon ta chke e nikʼaj chi winaq rumal ri kitinamit, ri kibʼantajik o jun chi jastaq y kebʼe ta pa taq chʼoj re ri kitinamit. Tajin kbʼantaj ri xtzʼibʼax kan pa Isaías 2:4: «Mawi k[e]tijox ta chi che ubʼanik chʼoj». Rumal che kqakoj qachuqʼabʼ rech kqakʼut ri kʼakʼ kʼaslemal, keqatoʼ ri winaq rech keʼok pa ri utinamit ri Dios y kqakʼutu che are ri Jesús tajin kkʼamow qabʼe (Juan 13:35). Y kʼo ta jun jastaq che xaq utukel kkʼulmatajik, xaneʼ are ri Jesús tajin kojtoʼwik. w22.07 9 párrs. 7, 8

Are chiʼ kqabʼan qachʼawem che ri Jehová rajawaxik kqakʼut rukʼ ri qatzij che nim kqilo. Chojchoman chrij ri mayibʼalalaj visiones che xkil Isaías, Ezequiel, Daniel y Juan. Xkil ri Jehová junam rukʼ jun nimalaj Qʼatal tzij. Ri Isaías xril ri Jehová «tʼuyul pa jun tem re ajawinel ri sibʼalaj naj elinaq chikaj» (Is. 6:1-3). Ri Ezequiel xrilo che tʼuyul pa jun carro chikaj y «kʼo kʼu jun utun chrij. Ri kjunamataj rukʼ ri raxkiʼaqʼabʼ» (Ezeq. 1:26-28). Ri Daniel xril jun «Nim Winaq» saq ratzʼyaq y tʼuyul pa jun tem che knikow qʼaqʼ chrij (Dan. 7:9, 10). Y ri Juan xril ri Jehová che tʼuyul pa jun tem che sutim rij rukʼ «jun raxkiʼaqʼabʼ ri kjuluwik jachaʼ jun jeʼlalaj rax abʼaj esmeralda» (Apoc. 4:2-4). Uchomaxik rij ri ujuluwem o ri uchuqʼabʼ ri Jehová kunaʼtasaj chqe che nim kqil wi are chiʼ kqabʼan qachʼawem che y kqaya uqʼij. w22.07 20 párr. 3

Alabʼom alitomabʼ, ri Satanás kraj che kojkʼiy ta pa ri qakojonik. Jun chke ri jastaq che kukojo are ri kebʼlan kʼuxaj. Ri areʼ kraj che kqakubʼsaj ta chi qakʼuʼx chrij ri kukʼut ri Biblia. Jun kʼutbʼal, weneʼ kopan na jun qʼij che kata jun winaq che kchʼaw chrij ri evolución, jun kʼutunem che kukʼut ta ri qastzij chrij ri Jehová. Weneʼ nabʼe qas ta xatchoman chrij wariʼ. Are kʼu, rumal che at ala o ali chik, weneʼ ri e awajtijoxelabʼ kkikʼut chawach pa clase. Ri kkibʼij weneʼ kubʼan chawe che kubʼan kebʼ akʼuʼx y kachomaj che weneʼ kʼo ta jun Dios che xbʼanow ronojel ri jastaq. Are kʼu, chnaʼtaj chawe che weneʼ ri e winaq riʼ qas ta kinikʼom rij ri kkibʼij. Chnaʼtaj chawe ri kubʼij Proverbios 18:17: «Ri kutoʼ ribʼ nabʼe jetaneʼ ri qastzij ri kubʼij, kʼa kopan na ri kakʼulelanik ri kubʼij na chi man je taj». ¿Jas kqetaʼmaj pa wajun texto riʼ? Che kqakoj ta ronojel ri kyaʼ ubʼixik pa ri tijobʼal, xaneʼ kqamaj unikʼoxik ri kubʼij ri uTzij ri Dios y katzukuj más información pa taq ri e qawuj. w22.08 2 párr. 2; 4 párr. 8

Kqaj kqachʼobʼ ri kubʼij pa ri uTzij ri Dios rech kqabʼan pa ri qakʼaslemal. Chnaʼtaj chqe ri xubʼij ri Jesús che «jun ajtij rech ri pixabʼ» (Luc. 10:25-29). Ri achi kraj kretaʼmaj jas kubʼano rech kuriq ri kʼaslemal che kʼo ta ukʼisik, are kʼu ri Jesús xukoj ri uTzij ri Dios che utoʼik. Xutaʼ wariʼ che: «¿Jas ri tzʼibʼatal pa ri pixabʼ? ¿Jas ri kasikʼij uwach?». Ri achi xubʼij che rajawaxik kqaloqʼoqʼej ri Dios y ri qajil qatzʼaqat, utz ri respuesta xuyaʼo rumal che pa ri uTzij ri Dios xresaj wi (Lev. 19:18; Deut. 6:5). Tekʼuriʼ xutaʼ wariʼ che ri Jesús: «¿Jachin riʼ ri wajil nutzʼaqat?». Wariʼ xukʼutu che xuchʼobʼ ta ri kubʼij ri uTzij ri Dios. Rumal che retaʼm taj jas kubʼan che ubʼanik pa ri ukʼaslemal. Chqabʼanaʼ qachʼawem che ri Jehová. Rumal che kojkun taj kqachʼobʼ ri uTzij we kʼo ta ri utobʼanik qukʼ, rumal laʼ chqataʼ ri ruxlabʼixel rech are kojchoman chrij ri kqasikʼij uwach. w23.02 9 párrs. 4, 5

«¿Jas xabʼan che retaʼmaxik ri qastzij?». Weneʼ kʼi mul qatzalim uwach wajun pregunta che bʼanom chqe. Más na are chiʼ kawetaʼmaj chi kiwach e nikʼaj qachalal. Sibʼalaj utz kqato are chiʼ kqetaʼmaj jas xkibʼan ri qachiʼl che retaʼmaxik uwach ri Jehová y xkiloqʼoqʼej. Xuqujeʼ kqaj kqabʼij chke ri rumal che sibʼalaj nim ubʼanik ri qastzij chqawach (Rom. 1:11). Ri tzijonem riʼ sibʼalaj kuya qachuqʼabʼ rumal che oj testigos rech Jehová. Xuqujeʼ kubʼan chqe che oj «jeqel pa ri qastzij», kraj kubʼij, che kqakikotemaj más ri Jehová y jeriʼ kojutewchij. Kʼo kʼi rumal che nim kqil wi ri qastzij. Ri más nim ubʼanik are che kqaloqʼoqʼej ri Jehová, rumal che rukʼ petinaq wi ri qastzij. Rumal ri uTzij, ri Biblia, qetaʼmam che are ri Dios ri kʼo nimalaj uchuqʼabʼ y che are xbʼanow ri kajulew. Y más na, rumal che are ri qaTat che sibʼalaj kojuloqʼoqʼej y kok il chqe (1 Ped. 5:7). w22.08 14 párrs. 1, 3

Ri apóstol Pablo xubʼij chke ri cristianos che kkiya ta kan ukʼutik loqʼoqʼebʼal rukʼ ubʼanik «utzalaj taq chak» (Heb. 10:24). Ri areʼ xaq xiw ta xeʼutoʼ ri cristianos rukʼ ri e tzij che xubʼij chke, xaneʼ xuqujeʼ xukʼutu. Jun kʼutbʼal, are chiʼ ri cristianos re Judea xkiriq wiʼjal, ri Pablo xrilo jas xubʼano rech xeʼutoʼo (Hech. 11:27-30). Paneʼ sibʼalaj latzʼ uwach che utzijoxik ri utzij ri Dios y che kitijoxik ri winaq, ri areʼ amaqʼel xutzukuj jas xubʼano rech xeʼutoʼ ri cristianos che kʼo kajwataj chke. Je wariʼ xukʼut chkiwach ri cristianos che amaqʼel kʼo ri Jehová che kitoʼik. Kimik xuqujeʼ oj kojkunik keqatoʼ ri e qachalal are chiʼ kqaya ri qatiempo, ri qachuqʼabʼ y ri qatobʼanik pa ri labores de socorro y are chiʼ amaqʼel kqaya qakuchuj pa ri obra mundial. Je wariʼ keqatoʼ ri e qachalal rech kkikubʼsaj kikʼuʼx che kewonobʼax ta kan rumal ri Jehová. w22.08 24 párr. 14

Pa ri Biblia xetzʼibʼax kan kʼi profecías che are chiʼ xqʼax kʼi junabʼ xetzʼaqatik. Kqabʼij wariʼ rumal ri bʼantajinaq pa ri uwach Ulew. Y kqamay taj, rumal che are ri Jehová ajchaqʼe ri kʼo chupam ri Biblia. Chojchoman chrij ri xbʼan che uchʼakik ri nimalaj tinamit Babilonia. Pa ri siglo octavo chuwach ri qaqʼij, ri Jehová xukoj ri qʼaxal tzij Isaías che ubʼixik ri kbʼan che uchʼakik ri nimalaj tinamit Babilonia rumal ri Ciro (Is. 44:27–45:2). Xuqujeʼ xuya kan ubʼixik che ksachisax uwach ri tinamit Babilonia y kkʼojiʼ ta chi jun winaq chuwach (Is. 13:19, 20). Ri jeʼlalaj tinamit ojer, kimik xaq jun mulaj abʼaj chik. w23.01 4 párr. 10

Ri Jehová uyaʼom chqe che kojkʼojiʼ pa ri utinamit. Y rumal wariʼ, kqariq kʼi taq tewchibʼal (Mar. 10:29, 30). Pa ronojel ri uwach Ulew e kʼo qachalal che xuqujeʼ kkikoj kichuqʼabʼ che uloqʼoqʼexik ri Jehová y keniman che. Paneʼ junam ta ri qachʼabʼal, ri qanaqʼatisabʼal y ri qatzʼyaq, are kʼu keqaloqʼoqʼej are chiʼ kqachʼobʼ kiwach. Utz kqilo che junam kqaqʼijilaj ri Jehová kukʼ y kʼo utz achilanik chqaxoʼl (Sal. 133:1). Jujun taq mul, ri e qachalal kojkitoʼ chuwach ri kʼax che kqariqo (Rom. 15:1; Gál. 6:2). Xuqujeʼ kojkitoʼo rech kqaya ta kan upatanexik ri Jehová y rech oj ko pa ri qakojonik (Heb. 10:23-25). Sibʼalaj bʼisobʼal riʼ wet mat e kʼo ri e qachalal che qatoʼik chkiwach ri e qakʼulel: ri Satanás y ri itzel taq winaq che e kʼo pa uqʼabʼ. w22.09 2, 3 párrs. 3, 4

Qas kqachomaj na ri kqabʼano are chiʼ kqakoj ri redes sociales. We kqachajij ta qibʼ, weneʼ kqabʼij jastaq pa ri redes sociales che yaʼtal ta chqe kqaya ubʼixik. We kqabʼan wariʼ kojkun ta chik kqatzalij qibʼ y kqabʼan kʼax chke nikʼaj chik. Ri ujikʼik ibʼ xuqujeʼ kojutoʼo rech qas kqachomaj na ri kqabʼij chke ri qakʼulel are chiʼ kkitaʼ jastaq chqe chkij ri e qachalal. Weneʼ kkʼulmataj wariʼ pa ri tinamit che qʼatem wi uwach ri qachak are chiʼ ri policías kkikʼot qachiʼ. Ri kojtoʼwik are chiʼ kqakʼulmaj wariʼ are wajun pixabʼ: «Kinkoj jun jikʼabʼal upachiʼaj pa nuchiʼ» (Sal. 39:1). Kqaj che ri qafamiliares, ri e qachiʼl, ri e qachalal pa ri congregación o jun chi winaq kkikubʼsaj kikʼuʼx chqij. Rumal laʼ rech kojkunik kqabʼan wariʼ rajawaxik kqajikʼ qibʼ che ri qatzij. w22.09 13 párr. 16

Rech qas kojkikotik rajawaxik kqatzuq qibʼ pa ri qakojonik. Rumal laʼ, ri Jesús xubʼij: «Man xuwi ta rumal ri wa kkʼasiʼ ri winaq, xaneʼ rumal ronojel tzij ri keʼel uloq chuchiʼ ri Dios» (Mat. 4:4). Rumal laʼ, ronojel qʼij chqasikʼij ri uTzij ri Dios, ri Biblia. Rumal che ri Jehová kojraj, kubʼij chqe pa ri Biblia jas rajawaxik kqabʼano rech kqariq ri qastzij kikotemal. Jun kʼutbʼal, kukʼut chqawach jasche xuya ri qakʼaslemal, jas kqabʼano rech kojux rachiʼl y jas kqabʼano rech kusach ri qamak. Xuqujeʼ kuya ubʼixik chqe ri utzalaj kʼaslemal che kuya na chqe (Jer. 29:11). Are chiʼ kqetaʼmaj wariʼ pa ri Biblia kukikotisaj ri qanimaʼ. Rumal laʼ, we sibʼalaj kojbʼison rumal ri kʼax che kqariqo, chqasikʼij ri uTzij ri Jehová y chojchoman chrij. w22.10 7 párrs. 4-6

Rumal laʼ, ri Biblia kubʼij chqe che kqesaj ta kiwach ri winaq che kʼo ta kkaj kketaʼmaj. Kqariq nojibʼal are chiʼ kqabʼan pa qakʼaslemal ri pixabʼ re ri Biblia. Nojimal chi nojimal kqil na che ri pixabʼ kuya ri Biblia kojutoʼ rech utz kqabʼan che uchaʼik jun jastaq y kqariq ta kʼax. Utz we kqanikʼoj ri tajin kqabʼano rech kqilo we utz tajin kqabʼan che ri jastaq. Jun kʼutbʼal, we naj tiempo chik majim uyaʼik etaʼmanik re ri Biblia chawe y tajin katbʼe chi pa ri e riqbʼal ibʼ, are kʼu majaʼ kajach ri akʼaslemal che ri Jehová y majaʼ kabʼan aqasanjaʼ, utz che katchoman chrij jasche abʼanom taj. O we abʼanom chi aqasanjaʼ, ¿jas kkʼutuwik che más tajin chi katzijoj ri utzij ri Dios y keʼatijoj ri winaq? Are chiʼ kachaʼ ubʼanik jun jastaq, ¿la kakoj ri e pixabʼ re ri Biblia? ¿La nim keʼawil wi ri e winaq junam rukʼ ri xubʼan ri Jesús? We kqilo che kʼo rajawaxik kqasukʼumaj, chqatatabʼej ri kubʼij ri Jehová chqe, rumal che «kuya kʼu retaʼmanik ri man kʼo ta retaʼmanik» (Sal. 19:7). w22.10 20 párr. 8

Ri Ezequiel xril ri nimalaj uchuqʼabʼ ri ruxlabʼixel ri Dios. Pa jun visión xril ri uxlabʼixel re ri Dios keʼusilabʼisaj uxlabʼal nim kichuqʼabʼ y e nimaʼq taq ketet re jun carro pa ri kaj (Ezeq. 1:21). Ri Ezequiel kubʼij chqe ri xunaʼo: «Are taq xinwilo, xinmej wibʼ chuwach». Sibʼalaj xumay ri xrilo, rumal laʼ xroqiʼ pa ri ulew (Ezeq. 1:28). Weneʼ are taq xchoman chrij ri xril pa ri visión, xukubʼsaj más ukʼuʼx che kkunik kutzijoj ri utzij ri Dios rukʼ ri utobʼanik ri uxlabʼixel. Ri Jehová xubʼij wariʼ che ri Ezequiel: «At, winaq, chattakʼaloq, kintzijon kʼut awukʼ». Wajun taqanik y ri ruxlabʼixel ri Dios xuya uchuqʼabʼ rech xwalij chi jumul. (Ezeq. 2:1, 2). Pa ronojel ri tiempo che xutzijoj ri utzij ri Dios xkʼojiʼ «ri uqʼabʼ» ri Jehová pa uwiʼ, kraj kubʼij ri ruxlabʼixel (Ezeq. 3:22; 8:1; 33:22; 37:1; 40:1). w22.11 4 párrs. 7, 8

Pa ri e tzij riʼ ri qʼaxal tzij Isaías kukʼutu che ri Jehová are jun ajtij che teren chkij ri tijoxelabʼ, krilo jawiʼ kebʼin wi y kubʼij chke jawiʼ rajawaxik kebʼe wi. ¿Jas kqabʼan kimik che utatabʼexik ri uchʼabʼal ri Dios che kchʼaw lo chqij? Kqatatabʼej are chiʼ kqasikʼij uwach ri Biblia, ojer kanoq xetzʼibʼax kan ri utzij ri Dios chupam. Are chiʼ kqasikʼij uwach jetaneʼ kqatatabʼej ri uchʼabʼal ri Jehová kchʼaw lo chqij, rumal che ojer xtzʼibʼax kanoq (Is. 51:4). ¿Jas rajawaxik kqabʼano rech qas kqaya qibʼ kukʼam qabʼe ri Jehová? Ri Isaías kubʼij kebʼ jastaq. Nabʼe kubʼij «Jewaʼ kʼo wi ri bʼe», y ukabʼ, «Are chitaqej waʼ». Rumal laʼ, xaq xiw ta rajawaxik kqetaʼmaj «ri bʼe», xaneʼ xuqujeʼ rajawaxik kqataqej bʼinem chupam. Rumal ri uTzij ri Jehová y ri kubʼan ri utinamit che uqʼalajisaxik chqawach, kqetaʼmaj ri kraj ri Jehová che kqabʼano y jas ri kqabʼan che ubʼanik ri kukʼut chqawach. Rajawaxik kqabʼan we kebʼ jastaq riʼ rech kqachʼij ri kʼax rukʼ kikotemal che upatanexik ri Jehová. Jeriʼ, kqakubʼsaj qakʼuʼx chrij che qas kojutewchij na. w22.11 11 párrs. 10, 11

Are chiʼ xaq e jujun chi ri apóstoles e kʼolik, xkimaj okem e qastzij taj cristianos pa ri congregación (Mat. 13:24-27, 37-39). Xkimaj ubʼixik «jechʼalaj taq jastaq, rech ri e kojonelabʼ, keteriʼ kʼu bʼik chkij» (Hech. 20:30). Jun chke ri «jechʼalaj taq jastaq» che xkikʼutu, are che ri Jesús xa ta «jumul xyaʼ che tabʼal toqʼobʼ che resaxik ri kimak ri e kʼi». Ri kkibʼij junam ta rukʼ ri kukʼut ri Biblia, rumal che kkikʼutu che ri Cristo rajawaxik kyaʼ kʼi mul che tabʼal toqʼobʼ o kʼi mul kkamik (Heb. 9:27, 28). Kimik e kʼi kojonelabʼ kkichomaj che are chiʼ kkibʼan ri kiriqbʼal ibʼ, ri kaxlanwa are ri ucuerpo ri Cristo y ri vino are ri ukikʼel. Are taq kkitijo, kkichomaj che tajin kkam chi jumul ri Jesús che utojik ri kimak. Y e kʼo chi nikʼaj che xaq jujun mul kkibʼano, are kʼu qas ta kkichʼobʼo che nim ubʼanik wariʼ. w23.01 21 párr. 5

Pa ri Mil Junabʼ che kuqʼat tzij ri Jesús, keʼukʼastajisaj na ri kaminaqibʼ y keʼutoʼ na ri winaq rech kkiriq ri tzʼaqatalaj kʼaslemal. Ri e winaq che xeniman che ri Jehová «kkechbʼej na ri ulew kejeqiʼ kʼu na chuwach chbʼe qʼij saq» (Sal. 37:10, 11, 29). Sibʼalaj kuya kikotemal riʼ are chiʼ kopan ri qʼij che ri Dios kubʼan wariʼ: «Ri kʼisbʼal kʼulel ri kusach na uwach, are ri kamikal» (1 Cor. 15:26). Ri qeyebʼal re jun kʼaslemal che kʼo ta ukʼisik qas pa ri uTzij ri Dios qesam wi. Wajun eyebʼal kojutoʼo rech kqaya ta kan upatanexik ri Jehová pa ri kʼisbʼal taq qʼij che oj kʼo wi. Are kʼu we kqaj kojqaj chuwach ri Jehová, rajawaxik che kqaya ta kan upatanexik ri areʼ y kqabʼan ri xubʼan ri Jesús, xaq xiw ta rumal che kqaj kqariq ri kʼaslemal, xaneʼ rumal che qas keqaloqʼoqʼej (2 Cor. 5:14, 15). Wajun loqʼoqʼebʼal kojutoʼo rech kqesaj kiwach y kqatzijoj chke ri winaq ri kubʼan na ri Jehová (Rom. 10:13-15). We kqakoj qachuqʼabʼ rech xaq xiw ta kojchoman chbʼil qibʼ oj y kel qakʼuʼx chke ri nikʼaj chik, kux qachiʼl ri Jehová pa ronojel ri qakʼaslemal w22.12 6, 7 párrs. 15, 16

Are chiʼ kqʼatex ri qachak che ri Dios kojuqʼatej che ubʼanik jastaq che kojutoʼ che uriqik jamaril. Are chiʼ kqariq wariʼ, weneʼ kqabʼisoj jas kqakʼulmaj na pa ri petinaq. Kʼo ta kubʼano kojbʼisonik. Are kʼu rajawaxik kqachajij qibʼ rech kqaj ta uchuqʼabʼ ri qakojonik, junam rukʼ ri xubʼij ri Jesús chke ri utijoxelabʼ (Juan 16:1, 2). Qastzij che ri Jesús xubʼij che ri e winaq kkibʼan na kʼax chke ri utijoxelabʼ, are kʼu xuqujeʼ xubʼij che kojkunik kojux sukʼ (Juan 15:20; 16:33). Are chiʼ qʼatem uwach ri qachak che ri Dios, weneʼ ri sucursal o ri kʼamal taq bʼe re ri qacongregación kkiya pixabʼ chqe rech kqariq ta kʼax, rech kqariq ri kajwataj chqe pa ri qakojonik y rech kqabʼan ronojel ri kʼo pa qaqʼabʼ che utzijoxik ri utzij ri Dios. Rumal laʼ, chojnimanoq (Sant. 3:17). Y xaq maqatzijoj jastaq che kʼo ubʼanik kukʼ ri e qachalal chke ri winaq che yaʼtal taj kketaʼmaj (Ecl. 3:7). w22.12 20, 21 párrs. 14-16

Ri Jesús xubʼij kan chke ri utijoxelabʼ che kukʼam kibʼe are chiʼ kkitzijoj ri utzij ri Dios pa ronojel ri uwach Ulew. Rumal ri utinamit ri Jehová, kimik ri Jesús tajin kojutijoj rech kqetaʼmaj ri kqabʼan che utzijoxik ri utzij ri Dios xuqujeʼ uyaʼom ri chakubʼal che kajwataj chqe (Mat. 28:18-20). Ri rajawaxik kqabʼano are che kqaya ta kan utzijoxik ri utzij ri Dios rech kojkʼaskʼatik kʼa are chiʼ kopan ri tiempo che ri Jehová kusachisaj uwach ri itzelal. We kqabʼan ri kubʼij pa Hebreos 6:11, 12, kojutoʼ rech kqakubʼsaj qakʼuʼx chrij ri utzujum ri Jehová chqe. Ri Jehová uchʼikom chi jun fecha rech kusachisaj uwach ri itzelal che kʼo pa ri uwach Ulew. Y are chiʼ kopan ri qʼij riʼ ketzʼaqat ronojel ri profecías che e kʼo pa ri Biblia. Paneʼ kqachomaj che tajin kbʼeyetaj ri uqʼij ri Jehová, are kʼu qas qetaʼm che «kopan kʼu na [pa] ri qʼijol ri rajawaxik» (Hab. 2:3). Rumal laʼ, kqaj kqabʼan ri kubʼij Miqueas 7:7: «Kineyem na che ri Ajawaxel; kinkoj na ri weyebʼal kʼuxaj chrij ri Dios ri nuKolonel». w23.02 19 párrs. 15, 16

Are chiʼ jun winaq kraj kpaqiʼ pa uwiʼ jun juyubʼ, ktakʼiʼ jubʼiqʼ y kril ri jeʼl taq jastaq. Junam rukʼ, oj rajawaxik jujun taq mul kojchoman chrij ri oj utoʼm wi ri Jehová rech kqachʼij jun kʼax. Are chiʼ kkʼis ri qʼij, utz che kojchoman chrij wariʼ: «¿Jas jun tewchibʼal xuya ri Jehová chwe kimik? Y, paneʼ xaq kʼo wi ri kʼax pa ri nukʼaslemal, ¿jas ubʼanom che nutoʼik rech kinchʼijo?». Ronojel taq qʼij chojchoman chrij ri ubʼanom ri Jehová che qatoʼik. Kʼo ta kubʼano che kqataʼ che ri Jehová che kojresaj chuwach jun kʼax (Filip. 4:6). Are kʼu, ksach ta chqe che kimik xuqujeʼ kojkunik kqariq tewchibʼal rumal che ri Jehová kojutoʼ y kuya qachuqʼabʼ che uchʼijik ri kʼax. Rumal laʼ, nim chqilaʼ ri kubʼan che qatoʼik. We kqabʼan wariʼ qas kqil rukʼ ri qabʼaqʼwach che ri Jehová kojutoʼ (Gén. 41:51, 52). w23.01 19 párrs. 17, 18

Chojchoman chrij wariʼ: «¿La kinkʼut rukʼ ri kinchaʼ ubʼanik pa ri nukʼaslemal che kinchʼobʼo che naqaj chi kʼo wi ri kʼisbʼal? ¿La kinkʼutu che are más nim kwil upatanexik ri Jehová chuwach ri chak o bʼenam pa nimaʼq taq tijobʼal? ¿La kinkubʼsaj nukʼuʼx che ri areʼ kuya na ri kajwataj chwe in y che ri nufamilia?». Sibʼalaj kkikot ri Jehová are chiʼ krilo che kqakoj qachuqʼabʼ che ubʼanik ri kqaj chuwach (Mat. 6:25-27, 33; Filip. 4:12, 13). Rajawaxik che amaqʼel kqanikʼoj ri qachomanik rech kqasukʼumaj we kʼo rajawaxik kqakʼexo. Rumal laʼ, ri Pablo xubʼij wariʼ chke ri cristianos re Corinto: «Chinikʼoj ri iwanimaʼ ix, che rilik we ix ko pa ri kojonik. Chikʼambʼejej iwibʼ ix» (2 Cor. 13:5). Rumal laʼ, rajawaxik ronojel taq qʼij kqasikʼij ri Biblia rech kqakʼex ri qachomanik, junam kojchoman rukʼ ri Dios y kqabʼan ri utz krilo (1 Cor. 2:14-16). w23.01 9 párrs. 5, 6