NÜMERUS

1 Egiptupita yarquyanqampita ishkë wata pasarinqanchömi,+ ishkë kaq killa qallanqan junaqchö, israelïtakuna Sinaï jirkachö+ këkäyarqan. Tsëchömi Teyta Jehoväqa juntakäyänan carpachö*+ Moisesta kënö nirqan: 2 “Cada familiapa y cada kastapa llapan israelïtakunata* censayë,+ y llapan ollqu kaqkunata juk listaman apuntayë. 3 Qamwan Aaronmi veinti watapita masyoq llapan ollqukunata grüpupa apuntayänëki.+ Pëkunam ejercituchö sirwiyanqa.

4 Cada kastapitam juk ollquta pushayänëki. Pëkunaqa kastankunata dirigeqmi kayänan.+ 5 Kë nunakunam yanapayäshunki: Rubenpa kastankunapita, Sedeurpa tsurin Elizur;+ 6 Simeonpa kastankunapita, Zurisadäipa tsurin Selumiel;+ 7 Judäpa kastankunapita, Aminadabpa tsurin Nahson;+ 8 Isacarpa kastankunapita, Zuarpa tsurin Netanel;+ 9 Zabulonpa kastankunapita, Helonpa tsurin Eliab;+ 10 Josëpa tsurin Efrainpa+ kastankunapita, Amihudpa tsurin Elisamä, y Josëpa tsurin Manasespa kastankunapita, Pedahzurpa tsurin Gamaliel; 11 Benjaminpa kastankunapita, Guideonïpa tsurin Abidan;+ 12 Danpa kastankunapita, Amisadäipa tsurin Ahiëzer;+ 13 Aserpa kastankunapita, Ocranpa tsurin Paguiel;+ 14 Gadpa kastankunapita, Deuelpa tsurin Eliasaf,+ 15 y Neftalïpa kastankunapita, Enanpa tsurin Ahirä.+ 16 Pëkunaqa papäninkunapa kastankunachö mil ollqukunata dirigeqkunam kayan,+ y yanapayäshunëkipaqmi akrarqö”.

17 Tsënam Moiseswan Aaronqa jutipa jutipa akrashqa nunakunata qayatsiyarqan. 18 Ishkë kaq killa qallanqan junaqchömi, veinti watapita masyoq+ llapan ollqukunata qayatsiyarqan, y cada familiapa y cada kastapam apuntayarqan. 19 Tsëtaqa Moisesta Teyta Jehovä mandanqannöllam rurayarqan. Tsënömi Moisesqa Sinaï jirkachö llapan israelïtakunata censarqan.+

20 Puntataqa Israelpa mayor tsurin Rubenpa kastankunatam,+ cada familiapa y cada kastapa censayarqan. Ejercituchö sirwiyänampaqmi, veinti watapita masyoq llapan ollqukunapa jutinta apuntayarqan. 21 Rubenpa kastankunapitaqa, cuarenta y seis mil quinientus ollqukunam apuntashqa kayarqan.

22 Tsëpitanam Simeonpa kastankunata,+ cada familiapa y cada kastapa censayarqan. Ejercituchö sirwiyänampaqmi, veinti watapita masyoq llapan ollqukunapa jutinta apuntayarqan. 23 Simeonpa kastankunapitaqa, cincuenta y nuëvi mil trescientus ollqukunam apuntashqa kayarqan.

24 Tsëpitanam Gadpa kastankunata,+ cada familiapa y cada kastapa censayarqan. Ejercituchö sirwiyänampaqmi, veinti watapita masyoq llapan ollqukunapa jutinta apuntayarqan. 25 Gadpa kastankunapitaqa, cuarenta y cincu mil seiscientus cincuenta ollqukunam apuntashqa kayarqan.

26 Tsëpitanam Judäpa kastankunata,+ cada familiapa y cada kastapa censayarqan. Ejercituchö sirwiyänampaqmi, veinti watapita masyoq llapan ollqukunapa jutinta apuntayarqan. 27 Judäpa kastankunapitaqa, setenta y cuatru mil seiscientus ollqukunam apuntashqa kayarqan.

28 Tsëpitanam Isacarpa kastankunata,+ cada familiapa y cada kastapa censayarqan. Ejercituchö sirwiyänampaqmi, veinti watapita masyoq llapan ollqukunapa jutinta apuntayarqan. 29 Isacarpa kastankunapitaqa, cincuenta y cuatru mil cuatrocientus ollqukunam apuntashqa kayarqan.

30 Tsëpitanam Zabulonpa kastankunata,+ cada familiapa y cada kastapa censayarqan. Ejercituchö sirwiyänampaqmi, veinti watapita masyoq llapan ollqukunapa jutinta apuntayarqan. 31 Zabulonpa kastankunapitaqa, cincuenta y siëti mil cuatrocientus ollqukunam apuntashqa kayarqan.

32 Tsëpitanam Josëpa tsurin Efrainpa kastankunata,+ cada familiapa y cada kastapa censayarqan. Ejercituchö sirwiyänampaqmi, veinti watapita masyoq llapan ollqukunapa jutinta apuntayarqan. 33 Efrainpa kastankunapitaqa, cuarenta mil quinientus ollqukunam apuntashqa kayarqan.

34 Tsëpitanam Josëpa tsurin Manasespa kastankunata,+ cada familiapa y cada kastapa censayarqan. Ejercituchö sirwiyänampaqmi, veinti watapita masyoq llapan ollqukunapa jutinta apuntayarqan. 35 Manasespa kastankunapitaqa, treinta y dos mil doscientus ollqukunam apuntashqa kayarqan.

36 Tsëpitanam Benjaminpa kastankunata,+ cada familiapa y cada kastapa censayarqan. Ejercituchö sirwiyänampaqmi, veinti watapita masyoq llapan ollqukunapa jutinta apuntayarqan. 37 Benjaminpa kastankunapitaqa, treinta y cincu mil cuatrocientus ollqukunam apuntashqa kayarqan.

38 Tsëpitanam Danpa kastankunata,+ cada familiapa y cada kastapa censayarqan. Ejercituchö sirwiyänampaqmi, veinti watapita masyoq llapan ollqukunapa jutinta apuntayarqan. 39 Danpa kastankunapitaqa, sesenta y dos mil setecientus ollqukunam apuntashqa kayarqan.

40 Tsëpitanam Aserpa kastankunata,+ cada familiapa y cada kastapa censayarqan. Ejercituchö sirwiyänampaqmi, veinti watapita masyoq llapan ollqukunapa jutinta apuntayarqan. 41 Aserpa kastankunapitaqa, cuarenta y un mil quinientus ollqukunam apuntashqa kayarqan.

42 Tsëpitanam Neftalïpa kastankunata,+ cada familiapa y cada kastapa censayarqan. Ejercituchö sirwiyänampaqmi, veinti watapita masyoq llapan ollqukunapa jutinta apuntayarqan. 43 Neftalïpa kastankunapitaqa, cincuenta y tres mil cuatrocientus ollqukunam apuntashqa kayarqan.

44 Pëkunatam Moises, Aaron y Israelchö döci dirigeqkuna censayarqan. Pëkunaqa papäninkunapa kastankunachömi dirigeqkuna kayarqan. 45 Ejercituchö sirwiyänampaqmi, veinti watapita masyoq llapan ollqukunata unë kastankunapa jutimpa apuntayarqan. 46 Llapan apuntashqa ollqukunaqa, seiscientus tres mil quinientus cincuentam kayarqan.+

47 Peru Levïpa kastankunaqa+ manam cada kastapatsu censashqa kayarqan.+ 48 Pëkunapaqmi Teyta Jehoväqa Moisesta kënö nirqan: 49 “Israelïtakunata censarqa, ama Levïpa kastankunata censankitsu.+ 50 Levïpa kastankunataqa Diospa carpa* wayinta,+ y tsëchö llapan kaqkunata rikäyänampaqmi churanëki.+ Pëkunam Diospa carpa wayinta y tsëchö utilizäyanqankunata puritsiyänan.+ Pëkunaqa Diospa carpa wayinchömi sirwiyänan,+ y jiruroqninchömi* carpankunata armayänan.+ 51 Diospa carpa* wayinta juk läduman apayänëki kaptinqa, Levïpa kastankunallam paskayänan.+ Diospa carpa wayinta yapë armayänëki kaptimpis, pëkunallam armayänan. Pï nunapis* tsënö yanapakunan mana këkaptin Diospa carpa wayinman witirqa wanunqam o wañunqam.+

52 Cada läduchömi* kima kastakuna grüpupa+ carpankunata* armayänan, y cada israelïtam kastanta tocanqan sitiullachö carpanta armanan. 53 Levïpa kastankunaqa, Diospa carpa* wayin jiruroqninchömi* carpankunata armayänan, tsënöpa israelïtakunawan mana cölerakunäpaq.+ Levïpa kastankunaqa Diospa carpa wayintam cuidayänan”.*+

54 Israelïtakunaqa Moisesta Teyta Jehovä mandanqannöllam llapanta rurayarqan.

2 Tsëpitanam Teyta Jehoväqa Moisestawan Aaronta kënö nirqan: 2 “Israelïtakunaqa grüpunkunata tocanqan sitiuchömi carpankunata* armayänan,+ unë kastankunapa bandëran* këkanqan läduchö. Carpankunataqa carpa wayiman rikarëkaqtam armayänan.

3 Judäpa kastankuna dirigiyanqan kima grüpukunaqa,* inti o rupay yarqamunan läduchömi carpankunata* grüpupa armayänan, y pëkunataqa Aminadabpa tsurin Nahsonmi+ diriginqa. 4 Judäpa kastankunapa soldädunkunachöqa, setenta y cuatru mil seiscientus ollqukunam apuntashqa kayan.+ 5 Pëkunapa juknin lädunchömi Isacarpa kastankuna carpankunata* armayänan, pëkunataqa Zuarpa tsurin Netanelmi+ diriginqa. 6 Isacarpa kastankunapa soldädunkunachöqa, cincuenta y cuatru mil cuatrocientus ollqukunam apuntashqa kayan.+ 7 Y juknin kaq lädunchönam Zabulonpa kastankuna carpankunata* armayänan, pëkunataqa Helonpa tsurin Eliabmi+ diriginqa. 8 Zabulonpa kastankunapa soldädunkunachöqa, cincuenta y siëti mil cuatrocientus ollqukunam apuntashqa kayan.+

9 Judäpa kastankuna dirigiyanqan kima grüpukunachöqa,* cientu ochenta y seis mil cuatrocientus ollqukunam apuntashqa kayan. Puntataqa pëkunam carpankunata* paskayänan.+

10 Rubenpa kastankuna dirigiyanqan kima grüpukunaqa,*+ sur kaq* läduchömi carpankunata* grüpupa armayänan, y pëkunataqa Sedeurpa tsurin Elizurmi+ diriginqa. 11 Rubenpa kastankunapa soldädunkunachöqa, cuarenta y seis mil quinientus ollqukunam apuntashqa kayan.+ 12 Pëkunapa juknin kaq lädunchömi Simeonpa kastankuna carpankunata* armayänan, pëkunataqa Zurisadäipa tsurin Selumielmi+ diriginqa. 13 Simeonpa kastankunapa soldädunkunachöqa, cincuenta y nuëvi mil trescientus ollqukunam apuntashqa kayan.+ 14 Juknin kaq lädunchönam Gadpa kastankuna carpankunata* armayänan, pëkunataqa Reuelpa tsurin Eliasafmi+ diriginqa. 15 Simeonpa kastankunapa soldädunkunachöqa, cuarenta y cincu mil seiscientus cincuenta ollqukunam apuntashqa kayan.+

16 Rubenpa kastankuna dirigiyanqan kima grüpukunachöqa,* cientu cincuenta y un mil cuatrocientus cincuenta ollqukunam apuntashqa kayan. Pëkunam Judäpa kastankuna dirigiyanqan grüpupa qepanta carpankunata* paskayänan.+

17 Carpa* wayita juk läduman apayaptikiqa,+ Levïpa kastankunaqa wakin kastakunapa chowpintam* ëwayänan.

Grüpunta tocanqan sitiuchö carpankunata armayanqannöllam, juk sitiuta ëwarnimpis grüpunta tocanqan ordenllachö ëwayänan.+

18 Efrainpa kastankuna dirigiyanqan kima grüpukunaqa,* inti o rupay jeqanan läduchömi carpankunata* grüpupa armayänan, pëkunataqa Amihudpa tsurin Elisamämi+ diriginqa. 19 Efrainpa kastankunapa soldädunkunachöqa, cuarenta mil quinientus ollqukunam apuntashqa kayan.+ 20 Pëkunapa juknin kaq lädunchömi Manasespa+ kastankuna carpankunata* armayänan, pëkunataqa Pedahzurpa tsurin Gamalielmi+ diriginqa. 21 Manasespa kastankunapa soldädunkunachöqa, treinta y dos mil doscientus ollqukunam apuntashqa kayan.+ 22 Y juknin kaq lädunchönam Benjaminpa kastankuna carpankunata* armayänan, pëkunataqa Guideonïpa tsurin Abidanmi+ diriginqa. 23 Benjaminpa kastankunapa soldädunkunachöqa, treinta y cincu mil cuatrocientus ollqukunam apuntashqa kayan.+

24 Efrainpa kastankuna dirigiyanqan kima grüpukunachöqa,* cientu öchu mil cien ollqukunam apuntashqa kayan. Pëkunaqa Rubenpa kastankuna dirigiyanqan grüpupa qepantam carpankunata* paskayänan.+

25 Danpa kastankuna dirigiyanqan kima grüpukunaqa,* norti kaq* läduchömi carpankunata* grüpupa armayänan, y pëkunataqa Amisadäipa tsurin Ahiëzermi+ diriginqa. 26 Danpa kastankunapa soldädunkunachöqa, sesenta y dos mil setecientus ollqukunam apuntashqa kayan.+ 27 Pëkunapa juknin kaq lädunchömi Aserpa kastankuna carpankunata* armayänan, pëkunataqa Ocranpa tsurin Paguielmi+ diriginqa. 28 Aserpa kastankunapa soldädunkunachöqa, cuarenta y un mil quinientus ollqukunam apuntashqa kayan.+ 29 Y juknin kaq lädunchönam Neftalïpa kastankuna carpankunata* armayänan, pëkunataqa Enanpa tsurin Ahirämi+ diriginqa. 30 Neftalïpa kastankunapa soldädunkunachöqa, cincuenta y tres mil cuatrocientus ollqukunam apuntashqa kayan.+

31 Danpa kastankuna dirigiyanqan kima grüpukunachöqa,* cientu cincuenta y siëti mil seiscientus ollqukunam apuntashqa kayan. Pëkunam ultimuta carpankunata* paskayänan.+ Tsëtaqa rurayänan kastankunata tocaptinmi”.

32 Israelchö soldädu kayänampaq apuntayanqan llapan ollqukunaqa, seiscientus tres mil quinientus cincuentam kayarqan. Pëkunataqa unë kastankunapa jutimpam apuntayarqan.+ 33 Peru Moisesta Teyta Jehovä mandashqa kaptinmi, Levïpa kastankunataqa wakin israelïtakunatanötsu+ apuntayarqan.+ 34 Israelïtakunaqa Moisesta Teyta Jehovä mandanqannöllam llapanta rurayarqan. Mëchöpis quedakuyänan kaptinqa, grüpunkunata tocanqan sitiuchömi carpankunata* armayaq,+ y carpankunata paskarpis grüpunkunata tocanqan hörachömi paskapakuyaq.+ Tsëtaqa rurayaq cada familiapa y unë kastankunapa jutimpam.

3 Sinaï jirkachö+ Teyta Jehovä Moisesta parlapanqan witsanqa, pëkunam Moisespa y Aaronpa kastankuna kayarqan. 2 Aaronpa mayor tsurinqa Nadabmi karqan, wakin tsurinkunanam Abihü,+ Eleazar+ y Itamar+ kayarqan. 3 Tsëmi Aaronpa tsurinkunapa jutinkuna karqan. Pëkunaqa sacerdöti kayänampaqmi akrashqa kayarqan y tsë carguta chaskiyarqan.+ 4 Nadabwan Abihüqa, Sinaï jirkachö këkarmi Teyta Jehovä mana mandakunqanta rurayarqan, tsëmi tsurinkuna manaraq kaptin Teyta Jehoväpa rikëninchö wanuyarqan o wañuyarqan.+ Tsënö kaptimpis, Eleazarwan+ Itamarqa+ papänin Aaronwan juntum sacerdöti kar sïguiyarqan.

5 Tsëpitanam Teyta Jehoväqa Moisesta kënö nirqan: 6 “Levïpa kastankunata+ mandë sacerdöti Aaronpa puntaman ëwar yanapayänampaq.+ 7 Pëkunaqa juntakäyänëki carpachö* trabäjunkunata cumplirmi, Aaronta y israelïta mayinkunata yanapayänan. 8 Juntakäyänëki carpachö* llapan utilizäyanqantam cuidayänan,+ y juntakäyänëki carpachö trabäjunkunata cumplirmi, israelïta mayinkunata yanapayänan.+ 9 Y Aarontawan tsurinkunata yanapayänampaqmi levïtakunata churanëki. Pëkunaqa Aaronpa cargunchö kayänampaqmi israelïtakunapita akrashqa kayashqa.+ 10 Sacerdöti kayänampaqmi Aarontawan tsurinkunata churanëki.+ Y pï nunapis mana sacerdöti këkar sagrädu sitiuman witirqa wanunanmi o wañunanmi”.+

11 Teyta Jehoväqa Moisesta kënöpis nirqanmi: 12 “Noqaqa israelïtakunapa mayor tsurinkunapa rantinmi levïtakunata akrarqö,+ tsëmi levïtakunaqa noqapaq kayanqa. 13 Israelïtakunapa mayor wamrankuna y animalninkunapa punta wawankunaqa noqapaqmi kayan.+ Pëkunataqa egipciukunapa mayor tsurinkunata y animalninkunapa punta wawankunata wanutsirmi noqapaq rakirqä.+ Tsëmi noqapaq kayanqa. Noqam Jehovä Diosnikikuna kä”.

14 Teyta Jehoväqa yapëmi Sinaï jirkachö+ Moisesta nirqan: 15 “Juk killapita masyoq Levïpa ollqu kastankunatam, cada kastapa y cada familiapa apuntanëki”.+ 16 Moisesqa Teyta Jehovä mandanqannöllam Levïpa ollqu kastankunata apuntarqan. 17 Levïpa tsurinkunam kayarqan Guerson, Cohat y Merarï.+

18 Guersonpa tsurinkunapa y familiankunapa jutinkunam karqan Libnï y Simeï.+

19 Cohatpa tsurinkunapa y familiankunapa jutinkunam karqan Amram, Izhar, Hebron y Uziel.+

20 Merarïpa tsurinkunapa y familiankunapa jutinkunam karqan Mahlï+ y Musï.+

Pëkunam cada familiapa Levïpa kastankuna kayarqan.

21 Guersonpa tsurinkunapitam libnïta+ y simeïta familiakuna kayarqan. Pëkunam Guersonpa tsurinkunapa familiankuna kayarqan. 22 Guersonpa kastankunapita juk killapita masyoq ollqukunaqa, siëti mil quinientusmi apuntashqa kayarqan.+ 23 Guersonpa kastankunaqa, inti o rupay jeqanan läduchömi, Diospa carpa* wayin qepanchö carpankunata armayaq.+ 24 Guersonpa kastakunata dirigeqqa, Laelpa tsurin Eliasafmi karqan. 25 Guersonpa kastankunaqa,+ juntakäyänan carpachömi* këkunata cuidar yanapakuyaq: Diospa carpa wayinta,+ ruripa y janapa qataraqninkunata,+ yëkunachö cortïnata,+ 26 patiuchö bayëtakunata,+ patiupa yëkunanchö bayëtata,+ bayëtakunata watayänampaq waskakunata y cargunkunachö katsiyanqan wakin cösaskunata. Tsë patiuqa Diospa carpa* wayimpa y altarpa entërumpam tumamoq.

27 Cohatpa tsurinkunapitam amramïta, izharïta, hebronïta y uzielïta familiakuna kayarqan. Pëkunam kayarqan Cohatpa kastankuna.+ 28 Cohatpa kastankunapita juk killapita masyoq ollqukunaqa, öchu mil seiscientusmi apuntashqa kayarqan. Pëkunaqa sagrädu sitiutam cuidayaq.+ 29 Cohatpa kastankunaqa, Diospa carpa* wayimpa derëcha kaq* lädunchömi carpankunata armayaq.+ 30 Cohatpa kastakunata dirigeqqa, Uzielpa tsurin Elizafanmi karqan.+ 31 Cohatpa kastankunaqa, Sagrädu Cäjata,+ mësata,+ candelabruta,+ altarkunata,+ sagrädu sitiuchö utilizäyanqan kaqkunata,+ Diospa carpa* wayin rurinchö ëwaq cortïnata+ y cargunkunachö katsiyanqan wakin cösaskunata cuidarmi yanapakuyaq.+

32 Levïpa kastankunata dirigeqqa, sacerdöti Aaronpa tsurin Eleazarmi karqan.+ Pëmi sagrädu sitiuchö trabajaqkunata cargunchö katseq.

33 Merarïpa tsurinkunapitam mahlïta y musïta familiakuna kayarqan. Pëkunam Merarïpa kastankuna kayarqan.+ 34 Merarïpa kastankunapita juk killapita masyoq ollqukunaqa, seis mil doscientusmi apuntashqa kayarqan.+ 35 Merarïpa kastankunata dirigeqqa, Abihäilpa tsurin Zurielmi karqan. Pëkunaqa Diospa carpa* wayimpa izquierda kaq* lädunchömi carpankunata armayaq.+ 36 Merarïpa kastankunaqa këkunata cuidarmi yanapakuyaq: Diospa carpa* wayinchö marcukunata,+ listonkunata,+ columnata,+ täcukunata, cargunkunachö katsiyanqan wakin cösaskunata,+ 37 patiupa entëru lädunchö ëwaq listonkunata, tsëkunata jawiyänampaq täcukunata,+ estäcakunata y waskakunata.

38 Moises, Aaron y tsurinkunaqa Diospa carpa* wayin frentinchö o juntakäyänëki carpapa puntanchömi carpankunata armayaq, inti o rupay yarqamunan läduchö. Y israelïtakunapa rantinmi Diospa carpa wayinta cuidayaq. Pï nunapis* mana tsënö yanapakunan këkaptin sagrädu sitiuman witiptinqa, wanutsiyaqmi o wañutsiyaqmi.+

39 Juk killapita masyoq Levïpa kastankunapita ollqukunaqa, veintidos milmi apuntashqa kayarqan. Pëkunataqa Teyta Jehovä mandakushqa kaptinmi, Moiseswan Aaron cada kastapa apuntayarqan.

40 Tsëpitanam Teyta Jehoväqa Moisesta kënö nirqan: “Llapan israelïtakunapa juk killapita masyoq punta ollqu wamrankunata yupë,+ y juk listaman jutinkunata apuntë. 41 Israelïtakunapa punta ollqu wamrankunapa rantinmi, Levïpa kastankunata noqapaq akranëki.+ Noqam Jehovä Diosnikikuna kä. Tsënöllam israelïtakunapa punta yureq animalninkunapa rantimpis, Levïpa kastankunapa animalninkunata noqapaq akranëki”.+ 42 Moisesqa Teyta Jehovä mandanqannöllam israelïtakunapa punta wamrankunata apuntarqan. 43 Juk killapita masyoq israelïtakunapa punta ollqu wamrankunaqa, veintidos mil doscientus setenta y tresmi apuntashqa kayarqan.

44 Teyta Jehoväqa Moisesta kënöpis nirqanmi: 45 “Israelïtakunapa punta ollqu wamrankunapa rantinmi, Levïpa kastankunata noqapaq akranëki, y israelïtakunapa punta yureq animalninkunapa rantinmi, Levïpa kastankunapa animalninkunata noqapaq akranëki. Levïpa kastankunaqa noqapaqmi kayänan. Noqam Jehovä Diosnikikuna kä. 46 Levïpa kastankunapa tsurinkunapita, wakin israelïtakunapa punta ollqu wamrankuna doscientus setenta y tres masraq kayaptinmi,+ pëkunapita pagakuyänan.+ 47 Cada ünupitam cincuenta y siëti grämus plätata* pagayänan.+ Tsë plätataqa sagrädu sitiuchö këkaq pësata churëkurmi pesayänan. Tsë pësaqa döci grämusmi* pësanan.+ 48 Doscientus setenta y tres ollqu wamrankunapita israelïtakuna pagayanqan plätataqa, Aarontawan tsurinkunatam entreganëki”. 49 Y Moisesqa, doscientus setenta y tres wamrankunapita israelïtakuna pagayanqantam chaskirqan. 50 Israelïtakunapa punta wamrakunapitam, dieciseis kïlusnö* plätata Moises chaskirqan. Tsë plätataqa sagrädu sitiuchö këkaq pësakunata churëkurmi pesayarqan. 51 Moisesqa Teyta Jehovä mandanqannöllam pagayanqan plätata Aarontawan tsurinkunata entregarqan. Teyta Jehovä mandashqa kaptinmi Moisesqa tsë llapanta rurarqan.

4 Tsëpitanam Teyta Jehoväqa Moisestawan Aaronta kënö nirqan: 2 “Levïpa tsurin Cohatpa tsurinkunatam cada familiapa y cada kastapa censayänëki.+ 3 Juntakäyänëki carpachö* yanapakoqkunatam, treinta watayoqpita+ cincuenta watayoq+ kaqkunata apuntayänëki.+

4 Cohatpa tsurinkunaqa juntakäyänëki carpachömi* këta rurar yanapakuyanqa,+ y trabäjunkunaqa alläpa sagrädum kanqa. 5 Israelïtakuna juk sitiuta ëwakuyänan kaptinqa, Aaronwan tsurinkunam carpa* wayiman yëkuskir, sagrädu cuartuta mas sagrädu cuartupita rakeq cortïnawan+ Sagrädu Cäjata tsapayänan.+ 6 Tsëpa jananmanmi föcapa qaratsanta y azul bayëtata churayänan, y cäjata puritsiyänampaqmi argöllankunaman listonkunata yapë ullutsiyänan.*+

7 Noqapaq tantata churayänan mësamanmi azul bayëtata mashtayänan,+ y jananmannam plätukunata, cöpakunata, vïnu qarëta chaqayänampaq tazonkunata y järrakunata churayänan.+ Y noqapaq churayanqan tantaqa,+ tsë mësachömi imëpis këkänan. 8 Tsëkunapa jananmannam puka bayëtata mashtayänan. Y föcapa qaratsanwanmi mësata tsapayänan, y mësata puritsiyänampaqmi argöllankunaman listonkunata ullutsiyänan.*+ 9 Tsëpitanam candelabruta,+ chiwchinkunata,+ mëchata upitsiyänampaq* pinzakunata, carbon puritsikunata+ y chiwchikunapaq aceiti winaränanta azul bayëtawan tsapayänan. 10 Jananmannam föcapa qaratsanwan candelabruta y candelabruchö utilizäyanqan cösaskunata tsapayänan. Y puritsiyänampaqmi listonkunata churayänan. 11 Azul bayëtawanmi örupita altarta tsapayänan.+ Tsëpa jananmannam föcapa qaratsanta mashtayänan. Y altarta puritsiyänampaqmi argöllankunaman listonkunata ullutsiyänan.*+ 12 Tsëpitanam sagrädu sitiuchö utilizäyanqan cösaskunata+ azul bayëtawan pituyänan. Janampanam föcapa qaratsanwan pituyänan, y puritsiyänampaqmi listonkunata churayänan.

13 Altarpitam uchpata jipiyänan,+ y millwapita granäti bayëtawanmi altarta tsapayänan. 14 Tsëpa jananmanmi altarchö utilizäyanqan cösaskunata churayänan, carbon puritsikunata, largu chakiyoq trinchikunata, lampakunata, tazonkunata y altarchö llapan utilizäyanqan cösaskunata.+ Tsëkunapa jananmannam föcapa qaratsanta mashtayänan, y altarta puritsiyänampaqmi argöllankunaman listonkunata ullutsiyänan.*+

15 Israelïtakuna juk sitiuta ëwakuyänan kaptinqa, Aaronwan tsurinkunam sagrädu sitiuchö llapan utilizäyanqan cösaskunata tsapayänan.+ Tsëpitanam Cohatpa tsurinkuna tsë cösaskunata apayänampaq ëwayänan.+ Tsënö kaptimpis, mana wanuyänampaqmi sagrädu sitiuchö utilizäyanqan cösaskunataqa yatayänantsu.+ Tsëkunata rurarmi Cohatpa tsurinkunaqa juntakäyänëki carpachö* yanapakuyanqa.

16 Sacerdöti Aaronpa tsurin Eleazarmi,+ chiwchikunapaq aceiti,+ shumaq pukutaq o mushkoq inciensu+ y sagrädu aceiti mana faltanampaq, y Teyta Diospaq gränupita rurashqa qarëkunata rurayänampaq+ rikänan. Pëmi carpa* wayita y tsëchö utilizäyanqankunata, y sagrädu sitiuta y tsëchö utilizäyanqankunata rikänan”.

17 Tsëpitanam Teyta Jehoväqa Moisestawan Aaronta kënö nirqan: 18 “Ama permitiyankitsu Levïpa kastankunapita Cohatpa kastankuna wanur ushakäyänanta.+ 19 Tsëpa rantinqa, alläpa sagrädu kaqkunata yatarnin mana wanuyänampaqmi,+ Aaronwan tsurinkuna niyänan imata rurayänampaq y imata apayänampaq kaqta. 20 Pëkunaqa manam carpa* wayiman ichikllapis witiyänantsu sagrädu kaqkunata rikaq, tsëta rurarqa wanuyanqam o wañuyanqam”.+

21 Tsëpitanam Teyta Jehoväqa Moisesta kënö nirqan: 22 “Guersonpa+ tsurinkunatam cada kastapa y cada familiapa apuntanëki. 23 Juntakäyänëki carpachö* yanapakoqkunatam, treinta watayoqpita cincuenta watayoq kaqkunata apuntanëki. 24 Guersonpa tsurinkunaqa këkunatam cuidayänan y puritsiyänan:+ 25 carpa* wayipa cortïnankunata,+ juntakäyänëki carpata, qataraqninta, tsëpa jananman churayanqan föcapa qaratsankunata,+ juntakäyänëki carpapa yëkunanman churayanqan cortïnata,+ 26 patiuman churayanqan bayëtakunata,+ patiupa yëkunanman churayanqan bayëtata,+ waskakunata, herramientakunata y tsëchö utilizäyanqankunata. Tsë patiuqa carpa* wayipa y altarpa entërumpam tumamoq. Tsëmi pëkunapa trabäjunkuna kanqa. 27 Aaronwan tsurinkunam Guersonpa kastankuna rurayanqan trabäjuta,+ y imata apayänampaq kaqta rikäyänan. Qamkunam imakunata apayänampaq kaqta niyänëki. Tsëmi pëkunapa trabäjunkuna kanqa. 28 Tsëta rurarmi Guersonpa kastankunaqa juntakäyänëki carpachö* yanapakuyanqa.+ Y sacerdöti Aaronpa tsurin Itamarmi+ trabäjunkunachö diriginqa.

29 Tsënöllam Merarïpa+ tsurinkunatapis cada familiapa y cada kastapa apuntanëki. 30 Juntakäyänëki carpachö* yanapakoqkunatam, treinta watayoqpita cincuenta watayoq kaqkunata apuntanëki. 31 Pëkunaqa juntakäyänëki carpapita* kë cösaskunata aparmi yanapakuyänan:+ carpa wayipa marcunkunata,+ listonninkunata,+ columnankunata,+ tsëkunata jawiyänampaq täcukunata,+ 32 patiupa jiruroqninchö* ëwaq listonkunata,+ tsëkunata jawiyänampaq täcukunata,+ estäcakunata,+ waskankunata y tsëchö llapan utilizäyanqankunata. Qamkunam imata apayänampaq kaqta cada ünuta niyänëki. 33 Tsëta rurarmi Merarïpa+ kastankunaqa juntakäyänëki carpachö* yanapakuyanqa. Y sacerdöti Aaronpa tsurin Itamarmi trabäjunkunachö diriginqa”.+

34 Tsënam Moises, Aaron y israelïtakunata dirigeqkunaqa,+ cada familiapa y cada kastapa Cohatpa kastankunata apuntayarqan.+ 35 Y juntakäyänan carpachö* yanapakoqkunatam, treinta watayoqpita cincuenta watayoq kaqkunata apuntayarqan.+ 36 Llapan apuntashqa ollqukunaqa, dos mil setecientus cincuentam kayarqan.+ 37 Tsë llapankunam, juntakäyänan carpachö* yanapakoq Cohatpa familiankuna kayarqan. Moisesta Teyta Jehovä mandashqa kaptinmi,+ Moiseswan Aaronqa pëkunata apuntayarqan.

38 Tsënöllam Guersonpa+ tsurinkunatapis cada familiapa y cada kastapa apuntayarqan. 39 Juntakäyänan carpachö* yanapakoqkunatam, treinta watayoqpita cincuenta watayoq kaqkunata apuntayarqan. 40 Cada familiapa y cada kastapa apuntayanqan llapan ollqukunaqa, dos mil seiscientus treintam kayarqan.+ 41 Tsë llapankunam, juntakäyänan carpachö* yanapakoq Guersonpa familiankuna kayarqan. Teyta Jehovä mandakushqa kaptinmi, Moiseswan Aaronqa pëkunata apuntayarqan.+

42 Tsënöllam Merarïpa tsurinkunatapis cada familiapa y cada kastapa apuntayarqan. 43 Y juntakäyänan carpachö* yanapakoqkunatam, treinta watayoqpita cincuenta watayoq kaqkunata apuntayarqan.+ 44 Cada familiapa apuntayanqan llapan ollqukunaqa, tres mil doscientusmi kayarqan.+ 45 Tsë llapankunam, juntakäyänan carpachö* yanapakoq Merarïpa familiankuna kayarqan. Moisesta Teyta Jehovä mandashqa kaptinmi, Moiseswan Aaronqa pëkunata apuntayarqan.+

46 Moises, Aaron y israelïtakunata dirigeqkunaqa, cada familiapa y cada kastapam Levïpa kastankunata apuntayarqan. 47 Juntakäyänan carpachö* trabäjukunata rurayänampaq y tsëchö utilizäyanqankunata puritsiyänampaqmi, treinta watayoqpita cincuenta watayoq kaqkunata apuntayarqan.+ 48 Llapan apuntashqa ollqukunaqa, öchu mil quinientus ochentam kayarqan.+ 49 Pëkunataqa Moisesta Teyta Jehovä mandashqa kaptinmi, imata rurayänampaq kaqta y imata apayänampaq kaqta rikëkur apuntayarqan. Moisesta Teyta Jehovä mandanqannöllam tsë llapanta rurayarqan.

5 Tsëpitanam Teyta Jehoväqa kënö nir Moisesta yapë parlaparqan: 2 “Israelïtakunata mandë leprayoq kaqkunata,+ ishpakunampita esquy* yarquywan këkaqkunata+ y wanushqata yatarnin rikënïpaq mana limpiu këkaqkunata+ campamentupita qarquyänampaq. 3 Këkanqä campamentuchö kawaqkuna rikënïpaq limpiu kayänampaqmi,+ warmi o ollqu kayaptimpis campamentupita qarquyänëki”.+ 4 Tsëmi israelïtakunaqa, mana limpiu këkaqkunata campamentupita qarquyarqan. Moisesta Teyta Jehovä mandanqannöllam tsë llapanta rurayarqan.

5 Tsëpitanam Teyta Jehoväqa Moisesta kënö nirqan: 6 “Israelïtakunatam këta ninëki: ‘Warmipis o ollqupis Teyta Jehovä llapan mandakunqampa contran jutsata* rurarqa, culpayoqmi kayanki.+ 7 Rurayanqëki jutsatam* willakuyänëki,+ nuna mayikikunatam mana allita rurayanqëkipita pagayänëki, y tsëmanmi cada chunka kïlu plätata pagayanqëkipita ishkë kïlu plätata yapayänëki.+ 8 Peru tsë nuna wanushqa kaptinqa, y pagayänëkipaq kaqta chaskiyänampaq familiankuna mana kaptinqa, tsë pagayänëkipaq kaqtam Teyta Jehoväpaq apayänëki, tsëqa sacerdötipaqmi kanqa. Jutsata* rurayanqëkipitam carnëruta apayänëki, y tsë carnëruta sacerdöti rupatsiptinmi, jutsëkikunapita perdonashqa kayanki.+

9 Teyta Diospaq apayanqëki sagrädu qarëkunaqa,+ sacerdötipaqmi kanqa.+ 10 Cada israelïta apanqan sagrädu qarëqa, sacerdötipaqmi kanqa. Imatapis sacerdötipaq apayanqëkiqa pëpaqmi kanqa’”.

11 Teyta Jehoväqa Moisesta kënöpis nirqanmi: 12 “Israelïtakunatam këta ninëki: ‘Këtam rurayänëki pï warmipis qowanta o runanta* engañar 13 jukwan oqllanakuptin,+ tsëta ruranqampita Teyta Diospa rikënimpaq mana limpiu kaptin, tsë ruranqanta qowan o runan* mana musyaptin y pillapis mana rikashqa o tarishqa kaptin. 14 Warmin Teyta Diospa rikënimpaq limpiu kaptin o mana limpiu kaptimpis, qowan o runan* celösu tikrar y warmin engañanqanta maliciarqa, 15 warminta y warmimpa qarënintam sacerdötiman apanan. Tsë qarëqa juk kïlunö* alli aqashqa cebäda harinam kanan. Tsë qarëmanqa manam ni aceitita ni yuraq inciensuta winanantsu. Tsë gränupita rurashqa qarëqa warminta cëlarnin apanqan qarëmi kanqa, y warmin ruranqan jutsata* Teyta Dios yarpänampaqmi kanqa.

16 Sacerdötiqa Teyta Jehoväpa rikëninman witinampaqmi tsë warmita mandanan.+ 17 Tsëpitanam sacerdötiqa mitu mankaman limpiu yakuta winanan, y tsë yakumanmi Diospa carpa* wayinchö allpata ichikllata winanan. 18 Tsëpitanam sacerdötiqa Teyta Jehoväpa rikëninman pushëkur, tsë warmipa aqtsanta paskanan, y cëlarnin qowan o runan* apanqan gränupita rurashqa qarëtam tsë warmipa makinman churanan.+ Tsë qarëqa, tsë nunapa warmin ruranqan jutsata* Teyta Dios yarpänampaqmi kanqa. Y sacerdötiqa maldicionyoq asqaq o ayaq yakutam makinchö katsinan.+

19 Tsëpitanam sacerdötiqa warmita manaraq juratsir kënö ninan: “Casäda këkar* pï nunawampis mana oqllanakushqa kaptiki,+ y Teyta Diospa rikënimpaq limpiu kaptikiqa, manam kë yaku apamunqan maldicion imanashunkitsu. 20 Peru casäda këkar pï nunawampis oqllanakushqa kaptikiqa,+ maldicionmi qamman chämunqa”. 21 Tsëpitanam sacerdötiqa tsë warmita jurëkatsir kënö ninan: “Mana allita rurashqa kaptikiqa, Teyta Jehovämi permitinqa wamrëki mana kananta,* pachëki jakananta* y pitapis maldicirnin o imatapis jurarnin jutikipaq parlayänanta. Awmi Teyta Jehovämi tsëtaqa permitinqa. 22 Kë maldicionyoq yaku aqishnikiman* charqa, pachëkitam jakatsinqa, y manam wamrayoq këta puëdinkitsu”. Tsënam warmiqa, “¡tsënö kallätsun! ¡Tsënö kallätsun!”* ninan.

23 Tsëpitanam sacerdötiqa tsë maldicionkunata libruman qellqanan, y tsë qellqanqantam maldicionyoq yakuwan awinan.* 24 Y warmitam maldicionyoq yakuta upunampaq mandanan. Tsë yaku pachanman chaptinmi, tsë warmiqa alläpa sufrinqa. 25 Tsëpitanam sacerdötiqa, qowan o runan* cëlarnin apanqan gränupita rurashqa qarëta+ warmipa makimpita chaskïkur qepaman y puntaman Teyta Jehoväpa rikëninchö kuyutsinan, tsëpitanam altarman apanan. 26 Y sacerdötiqa tsë gränupita rurashqa qarëta aptarkurmi altarchö rupatsinan.+ Tsëqa, tsë nunapa qarëninta Teyta Diosnintsik imëpis yarpänampaqmi kanqa. Tsëpitanam tsë warmiqa yakuta upunan. 27 Tsë warmi Teyta Diospa rikënimpaq mana limpiu kaptin y qowanta o runanta* engañashqa kaptinqa, maldicionyoq yakuta upuskirmi alläpa sufrinqa, pachanmi jakanqa y manam wamrayoq këta puëdinqatsu. Y pitapis maldicirmi tsë warmipa jutimpaq parlayanqa. 28 Peru tsë warmi Teyta Diospa rikënimpaq limpiu kaptinqa, manam castigayanqatsu y wamrayoq këtam puëdinqa.

29 Teyta Diosnintsik mandakunqannömi rurayänëki juk nuna warminta cëlaptin,+ casäda warmi Teyta Diospa rikënimpaq mana allita ruraptin, 30 o warmin engañanqanta juk nuna maliciaptin. Tsëqa, tsë nunam Teyta Jehoväpa rikëninman warminta apanan, y sacerdötinam Teyta Dios mandakunqannö ruranan. 31 Qowanqa o runanqa* manam imapitapis culpayoqtsu kanqa, peru warmin jutsata* rurashqa kaptinqa castigayänanmi’”.

6 Tsëpitanam Teyta Jehoväqa Moisesta kënö nirqan: 2 “Israelïtakunatam këta ninëki: ‘Pï ollqupis o warmipis Teyta Jehovällata sirwinampaq änikurqa,*+ 3 manam vïnuta ni ima machatsikoqta upunantsu. Y manam pochqoq vïnuta ni wakin pochqoq machatsikoqkunata upunantsu.+ Y manam imatapis üvaspita rurayanqanta upunantsu, y manam üvasta ni päsaskunata mikunantsu. 4 Teyta Diosllata sirwinqan witsanqa, manam imatapis üvaspita rurayanqanta mikunantsu, y manam verdi üvasta ni üvaspa qarantapis mikunantsu.

5 Teyta Diosllata sirwinqan tiempuqa, manam aqtsanta rutukunantsu. Teyta Jehovällata sirwinampaq änikunqanta cumplinqanyaqmi aqtsanta rutukunantsu.+ Tsëta rurarmi Teyta Diosllata sirwinampaq akrashqa kanqanta rikätsikunqa. 6 Teyta Jehovällata sirwinqan witsanqa, manam ni pipa ayanman* witinantsu. 7 Teyta Diospa rikëninchö limpiu kanampaqmi, papänimpa, mamänimpa, wawqimpa ni panimpa ayanta yatanantsu.+ Aqtsanmi Teyta Diosllata sirwinampaq änikunqanta rikätsikunqa.

8 Teyta Diosllata sirwinqan witsanqa, Teyta Jehoväpaqmi rakishqa kanqa. 9 Peru pï nunapis lädunchö illaqpita wanuptinqa,+ akrashqa kanqanta rikätsikoq aqtsanmi Teyta Diospa rikënimpaq limpiunatsu kanqa. Y limpiuna kanqanta sacerdöti ninqan junaqmi, llapan aqtsanta rutukunan.+ Tsëtaqa qanchis kaq junaqmi ruranan. 10 Puwaq kaq junaqnam, sacerdötita entreganampaq juntakänantsik carpaman* ishkë kullkushta o ishkë llullu palumata apanan. 11 Juk kaq kullkush o palumaqa jutsampita* perdonashqa kanampaqmi kanqa, y juknin kaqnam ushakanqanyaq rupatsina qarëpaq kanqa. Sacerdöti tsëkunata rupatsiptinmi, wanushqa nunapa culpanrëkur jutsaman chanqampita perdonashqa kanqa.+ Tsënöpam Teyta Diospa rikënimpaq limpiuna kanqa. 12 Yapëmi Teyta Jehovällata sirwinampaq änikunan, y culpayoq kanqampitam juk watayoq mallwa carnëruta sacerdötiman apanan. Teyta Diospa rikënimpaq mana limpiu kaptinmi, puntata Teyta Diosta sirwinqampis välinqatsu.

13 Teyta Diosnintsik kë mandakunqannömi, Teyta Diosllata sirwiyänampaq änikoqkunawan rurayänëki: Teyta Diosllata sirwiyänampaq änikuyanqan tiempu cumpliriptinqa,+ juntakäyänëki carpapa* yëkunanmanmi ëwayänan. 14 Y tsëman ëwarmi kë qarëkunata Teyta Jehoväpaq apanan. Ushakanqanyaq rupatsina qarëpaqmi juk watayoq sänu mallwa carnëruta apanan,+ jutsampita* perdonashqa kanampaqnam juk watayoq sänu china üshata apanan,+ y Teyta Dioswan amïgu kanqanta rikätsikurmi juk sänu carnëruta apanan.+ 15 Y canastachömi aceitiwan pichushqa levadürannaq roscakunata y aceitiwan llushishqa levadürannaq gallëtakunata apanan. Tsënöllam gränupita rurashqa qarëta*+ y vïnu qarëtapis apanan.+ 16 Entregariptinnam sacerdötiqa tsë llapanta Teyta Jehoväpa rikëninman apanan. Y jutsampita* perdonashqa kanampaq apanqan qarëta y ushakanqanyaq rupatsiyänampaq apanqan qarëtam rupatsinan. 17 Tsëpitanam Teyta Jehoväwan amïgu kanqanta rikätsikur apanqan carnëruta y canastachö apanqan aceitiwan pichushqa levadürannaq roscakunata, gränupita rurashqa qarëta+ y vïnu qarëta Teyta Diospaq sacerdöti rupatsinan.

18 Tsëpitanam Teyta Diosllata sirwinampaq änikoqqa, juntakänantsik carpapa* yëkunanchö llapan aqtsanta rutukunan,*+ y rutukunqan aqtsantam Teyta Dioswan amïgu kanqanta rikätsikur apanqan qarë rupëkanqan ninaman jitanan. 19 Y tsë nuna aqtsanta rutukuriptinnam,+ sacerdötiqa carnërupa rikranta,* canastapita juk levadürannaq roscata y aceitiwan llushishqa levadürannaq gallëtata, Teyta Diosllata sirwinampaq änikoq nunapa makinman churanan. 20 Tsëpitanam sacerdötiqa, tsë qarëkunata puntaman y qepaman Teyta Jehoväpa rikëninchö kuyutsinan.+ Carnërupa rikran, pëchun y chankanqa sacerdötipaqmi kanqa.+ Tsëpitaqa Teyta Diosllata sirwinampaq änikoq nunaqa vïnuta upuyta puëdinqanam.

21 Teyta Diosllata sirwinampaq änikunqanta cumpliskir,+ pï nunapis Jehovä mandakunqan qarëkunapita masta apëta munar, y tsëta rurëta puëdirqa, Teyta Diosllata sirwinampaq änikushqa karmi tsë änikunqanta cumplinan’”.

22 Tsëpitanam Teyta Jehoväqa Moisesta nirqan: 23 “Aarontawan tsurinkunatam këta ninëki: ‘Kënö nirmi israelïtakunata bendiciyänëki:+

24 “Jehovä Diosnintsik bendicïkuyäshuy+ y cuidëkuyäshuy.

25 Jehovä Diosnintsik alli rikëkuyäshuy+ y imëpis llakipëkuyäshuy.*

26 Jehovä Diosnintsik qamkunawan alli këkutsun, y yamë kawakuyänëkipaq yanapëkuyäshuy”’.+

27 Y pëkunaqa jutïchömi israelïtakunata bendiciyänan,+ tsënöpa pëkunata bendicinäpaq”.+

7 Diospa carpa* wayinta armar ushaskirmi,+ Moisesqa Teyta Diosta sirwiyänampaq rakishqa kanampaq tsë carpa wayiman, carpa wayichö kaqkunaman, altarman, y tsëchö utilizäyanqankunapa+ jananman aceitita pillchitsir* Teyta Diospaq rakirqan.+ Tsëta rurariptinnam,+ 2 Israelchö familiankunata dirigeqkuna+ Teyta Diospaq qarëkunata apayarqan. Pëkunam israelïtakunata censarnin yanapakushqa kayarqan. 3 Qatashqa joqta carrëtakunata y döci törukunatam Teyta Jehoväpaq apayarqan. Cada dirigeqmi juk töruta aparqan, y cada ishkë dirigeqmi juk carrëtata apayarqan. Tsë llapantaqa Diospa carpa* wayinmanmi apayarqan. 4 Teyta Jehoväqa Moisesta kënömi nirqan: 5 “Tsë llapan apayämunqanta chaski. Tsëkunaqa juntakäyänëki carpachö* utilizäyänampaqmi kanqa. Y trabäjunkunata rurarnin utilizäyänampaqmi wanayanqanmannö* Levïpa kastankunata rakipänëki”.

6 Tsënam Moisesqa apayanqan carrëtakunata y törukunata chaskirqan, y Levïpa kastankunatam rakiparqan. 7 Guersonpa tsurinkuna trabäjunkunata rurarnin utilizäyänampaqmi, ishkë carrëtakunata y chusku törukunata entregarqan.+ 8 Merarïpa tsurinkunatanam, trabäjunkunata rurarnin utilizäyänampaq, chusku carrëtakunata y puwaq törukunata entregarqan. Pëkunataqa sacerdöti Aaronpa tsurin Itamarmi dirigeq.+ 9 Peru Cohatpa tsurinkunataqa manam imatapis entregarqantsu.+ Pëkunaqa sagrädu sitiuchö utilizäyanqan cösaskunata matankankunachö aparmi yanapakuyaq.+

10 Altarta inaguräyänampaqmi israelïtakunata dirigeqkunaqa Teyta Diospaq qarëkunata apayarqan.+ Y tsë dirigeqkuna altarpa puntaman qarëkunata apayanqan junaqmi 11 Teyta Jehoväqa Moisesta nirqan: “Israelïtakunata dirigeqkunaqa, cada junaqmi altar inagurashqa kanampaq qarëkunata turnuypa apayämunan”.

12 Aminadabpa tsurin Nahsonmi+ qallanan junaqqa qarëkunata aparqan. Pëqa Judäpa kastankunata dirigeqmi karqan. 13 Nahsonqa plätapita plätuta y plätapita tazontam aparqan. Tsë plätuqa mil cuatrocientus ochenta y dos grämusmi* lasarqan, y tazonnam setecientus noventa y öchu grämus lasarqan. Tsëkunataqa sagrädu sitiuchö këkaq pësakunata churëkurmi pesayarqan.+ Tsë plätuchö y tsë tazonchöqa, gränupita rurashqa qarëpaqmi aceitiwan pichushqa alli aqashqa harina junta karqan.+ 14 Y örupita cöpatam* aparqan, tsëqa cientu catorci grämusmi lasarqan. Y tsë cöpachöqa inciensum junta karqan. 15 Tsënöllam juk mallwa töruta, juk carnëruta y juk watayoq üshatapis ushakanqanyaq rupatsina qarëpaq aparqan.+ 16 Mallwa chïvutanam* jutsampita* perdonashqa kanampaq Teyta Diospaq aparqan.+ 17 Y Teyta Dioswan amïgu kanqanta rikätsikurmi+ ishkë törukunata, pitsqa carnërukunata, pitsqa chïvukunata* y juk watayoq pitsqa üshakunata aparqan. Tsë llapanmi Aminadabpa tsurin Nahson apanqan qarënin karqan.+

18 Ishkë kaq junaqqa, Zuarpa tsurin Netanelmi+ qarëkunata aparqan. Pëqa Isacarpa kastankunapa dirigeqninmi karqan. 19 Netanelpis plätapita plätuta y plätapita tazontam aparqan. Tsë plätuqa mil cuatrocientus ochenta y dos grämusmi lasarqan, y tazonnam setecientus noventa y öchu grämus lasarqan. Tsëkunataqa sagrädu sitiuchö këkaq pësakunata churëkurmi pesayarqan.+ Tsë plätuchö y tsë tazonchöqa, gränupita rurashqa qarëpaqmi aceitiwan pichushqa alli aqashqa harina junta karqan.+ 20 Y örupita cöpatam aparqan, tsëqa cientu catorci grämusmi lasarqan. Tsë cöpachöqa inciensum junta karqan. 21 Tsënöllam juk mallwa töruta, juk carnëruta y juk watayoq üshatapis ushakanqanyaq rupatsina qarëpaq aparqan.+ 22 Mallwa chïvutanam* jutsampita* perdonashqa kanampaq Teyta Diospaq aparqan.+ 23 Y Teyta Dioswan amïgu kanqanta rikätsikurmi+ ishkë törukunata, pitsqa carnërukunata, pitsqa chïvukunata* y juk watayoq pitsqa üshakunata aparqan. Tsë llapanmi Zuarpa tsurin Netanel apanqan qarënin karqan.

24 Kima kaq junaqqa, Helonpa tsurin Eliabmi+ qarëkunata aparqan. Pëqa Zabulonpa kastankunapa dirigeqninmi karqan. 25 Eliabpis plätapita plätuta y plätapita tazontam aparqan. Tsë plätuqa mil cuatrocientus ochenta y dos grämusmi lasarqan, y tazonnam setecientus noventa y öchu grämus lasarqan. Tsëkunataqa sagrädu sitiuchö këkaq pësakunata churëkurmi pesayarqan.+ Tsë plätuchö y tsë tazonchöqa, gränupita rurashqa qarëpaqmi aceitiwan pichushqa alli aqashqa harina junta karqan.+ 26 Y örupita cöpatam aparqan, tsëqa cientu catorci grämusmi lasarqan. Tsë cöpachöqa inciensum junta karqan. 27 Tsënöllam juk mallwa töruta, juk carnëruta y juk watayoq üshatapis ushakanqanyaq rupatsina qarëpaq aparqan.+ 28 Mallwa chïvutanam* jutsampita* perdonashqa kanampaq Teyta Diospaq aparqan.+ 29 Y Teyta Dioswan amïgu kanqanta rikätsikurmi+ ishkë törukunata, pitsqa carnërukunata, pitsqa chïvukunata* y juk watayoq pitsqa üshakunata aparqan. Tsë llapanmi Helonpa tsurin Eliab+ apanqan qarënin karqan.

30 Chusku kaq junaqqa, Sedeurpa tsurin Elizurmi+ qarëkunata aparqan. Pëqa Rubenpa kastankunapa dirigeqninmi karqan. 31 Elizurpis plätapita plätuta y plätapita tazontam aparqan. Tsë plätuqa mil cuatrocientus ochenta y dos grämusmi lasarqan, y tazonnam setecientus noventa y öchu grämus lasarqan. Tsëkunataqa sagrädu sitiuchö këkaq pësakunata churëkurmi pesayarqan.+ Tsë plätuchö y tsë tazonchöqa, gränupita rurashqa qarëpaqmi aceitiwan pichushqa alli aqashqa harina junta karqan.+ 32 Y örupita cöpatam aparqan, tsëqa cientu catorci grämusmi lasarqan. Tsë cöpachöqa inciensum junta karqan. 33 Tsënöllam juk mallwa töruta, juk carnëruta y juk watayoq üshatapis ushakanqanyaq rupatsina qarëpaq aparqan.+ 34 Mallwa chïvutanam* jutsampita* perdonashqa kanampaq Teyta Diospaq aparqan.+ 35 Y Teyta Dioswan amïgu kanqanta rikätsikurmi+ ishkë törukunata, pitsqa carnërukunata, pitsqa chïvukunata* y juk watayoq pitsqa üshakunata aparqan. Tsë llapanmi Sedeurpa tsurin Elizur+ apanqan qarënin karqan.

36 Pitsqa kaq junaqqa, Zurisadäipa tsurin Selumielmi+ qarëkunata aparqan. Pëqa Simeonpa kastankunapa dirigeqninmi karqan. 37 Selumielpis plätapita plätuta y plätapita tazontam aparqan. Tsë plätuqa mil cuatrocientus ochenta y dos grämusmi lasarqan, y tazonnam setecientus noventa y öchu grämus lasarqan. Tsëkunataqa sagrädu sitiuchö këkaq pësakunata churëkurmi pesayarqan.+ Tsë plätuchö y tsë tazonchöqa, gränupita rurashqa qarëpaqmi aceitiwan pichushqa alli aqashqa harina junta karqan.+ 38 Y örupita cöpatam aparqan, tsëqa cientu catorci grämusmi lasarqan. Tsë cöpachöqa inciensum junta karqan. 39 Tsënöllam juk mallwa töruta, juk carnëruta y juk watayoq üshatapis ushakanqanyaq rupatsina qarëpaq aparqan.+ 40 Mallwa chïvutanam* jutsampita* perdonashqa kanampaq Teyta Diospaq aparqan.+ 41 Y Teyta Dioswan amïgu kanqanta rikätsikurmi+ ishkë törukunata, pitsqa carnërukunata, pitsqa chïvukunata* y juk watayoq pitsqa üshakunata aparqan. Tsë llapanmi Zurisadäipa tsurin Selumiel+ apanqan qarënin karqan.

42 Joqta kaq junaqqa, Deuelpa tsurin Eliasafmi+ qarëkunata aparqan. Pëqa Gadpa kastankunapa dirigeqninmi karqan. 43 Eliasafpis plätapita plätuta y plätapita tazontam aparqan. Tsë plätuqa mil cuatrocientus ochenta y dos grämusmi lasarqan, y tazonnam setecientus noventa y öchu grämus lasarqan. Tsëkunataqa sagrädu sitiuchö këkaq pësakunata churëkurmi pesayarqan.+ Tsë plätuchö y tsë tazonchöqa, gränupita rurashqa qarëpaqmi aceitiwan pichushqa alli aqashqa harina junta karqan.+ 44 Y örupita cöpatam aparqan, tsëqa cientu catorci grämusmi lasarqan. Tsë cöpachöqa inciensum junta karqan. 45 Tsënöllam juk mallwa töruta, juk carnëruta y juk watayoq üshatapis ushakanqanyaq rupatsina qarëpaq aparqan.+ 46 Mallwa chïvutanam* jutsampita* perdonashqa kanampaq Teyta Diospaq aparqan.+ 47 Y Teyta Dioswan amïgu kanqanta rikätsikurmi+ ishkë törukunata, pitsqa carnërukunata, pitsqa chïvukunata* y juk watayoq pitsqa üshakunata aparqan. Tsë llapanmi Deuelpa tsurin Eliasaf+ apanqan qarënin karqan.

48 Qanchis kaq junaqqa, Amihudpa tsurin Elisamämi+ qarëkunata aparqan. Pëqa Efrainpa kastankunapa dirigeqninmi karqan. 49 Elisamäpis plätapita plätuta y plätapita tazontam aparqan. Tsë plätuqa mil cuatrocientus ochenta y dos grämusmi lasarqan, y tazonnam setecientus noventa y öchu grämus lasarqan. Tsëkunataqa sagrädu sitiuchö këkaq pësakunata churëkurmi pesayarqan.+ Tsë plätuchö y tsë tazonchöqa, gränupita rurashqa qarëpaqmi aceitiwan pichushqa alli aqashqa harina junta karqan.+ 50 Y örupita cöpatam aparqan, tsëqa cientu catorci grämusmi lasarqan. Tsë cöpachöqa inciensum junta karqan. 51 Tsënöllam juk mallwa töruta, juk carnëruta y juk watayoq üshatapis ushakanqanyaq rupatsina qarëpaq aparqan.+ 52 Mallwa chïvutanam* jutsampita* perdonashqa kanampaq Teyta Diospaq aparqan.+ 53 Y Teyta Dioswan amïgu kanqanta rikätsikurmi+ ishkë törukunata, pitsqa carnërukunata, pitsqa chïvukunata* y juk watayoq pitsqa üshakunata aparqan. Tsë llapanmi Amihudpa tsurin Elisamä+ apanqan qarënin karqan.

54 Puwaq kaq junaqqa, Pedahzurpa tsurin Gamalielmi+ qarëkunata aparqan. Pëqa Manasespa kastankunapa dirigeqninmi karqan. 55 Gamalielpis plätapita plätuta y plätapita tazontam aparqan. Tsë plätuqa mil cuatrocientus ochenta y dos grämusmi lasarqan, y tazonnam setecientus noventa y öchu grämus lasarqan. Tsëkunataqa sagrädu sitiuchö këkaq pësakunata churëkurmi pesayarqan.+ Tsë plätuchö y tsë tazonchöqa, gränupita rurashqa qarëpaqmi aceitiwan pichushqa alli aqashqa harina junta karqan.+ 56 Y örupita cöpatam aparqan, tsëqa cientu catorci grämusmi lasarqan. Tsë cöpachöqa inciensum junta karqan. 57 Tsënöllam juk mallwa töruta, juk carnëruta y juk watayoq üshatapis ushakanqanyaq rupatsina qarëpaq aparqan.+ 58 Mallwa chïvutanam* jutsampita* perdonashqa kanampaq Teyta Diospaq aparqan.+ 59 Y Teyta Dioswan amïgu kanqanta rikatsikurmi+ ishkë törukunata, pitsqa carnërukunata, pitsqa chïvukunata* y juk watayoq pitsqa üshakunata aparqan. Tsë llapanmi Pedahzurpa tsurin Gamaliel+ apanqan qarënin karqan.

60 Isqun kaq junaqqa, Guideonïpa tsurin Abidanmi+ qarëkunata aparqan. Pëqa Benjaminpa kastankunapa dirigeqninmi karqan.+ 61 Abidanpis plätapita plätuta y plätapita tazontam aparqan. Tsë plätuqa mil cuatrocientus ochenta y dos grämusmi lasarqan, y tazonnam setecientus noventa y öchu grämus lasarqan. Tsëkunataqa sagrädu sitiuchö këkaq pësakunata churëkurmi pesayarqan.+ Tsë plätuchö y tsë tazonchöqa, gränupita rurashqa qarëpaqmi aceitiwan pichushqa alli aqashqa harina junta karqan.+ 62 Y örupita cöpatam aparqan, tsëqa cientu catorci grämusmi lasarqan. Tsë cöpachöqa inciensum junta karqan. 63 Tsënöllam juk mallwa töruta, juk carnëruta y juk watayoq üshatapis ushakanqanyaq rupatsina qarëpaq aparqan.+ 64 Mallwa chïvutanam* jutsampita* perdonashqa kanampaq Teyta Diospaq aparqan.+ 65 Y Teyta Dioswan amïgu kanqanta rikätsikurmi+ ishkë törukunata, pitsqa carnërukunata, pitsqa chïvukunata* y juk watayoq pitsqa üshakunata aparqan. Tsë llapanmi Guideonïpa tsurin Abidan+ apanqan qarënin karqan.

66 Chunka kaq junaqqa, Amisadäipa tsurin Ahiëzermi+ qarëkunata aparqan. Pëqa Danpa kastankunapa dirigeqninmi karqan. 67 Ahiëzerpis plätapita plätuta y plätapita tazontam aparqan. Tsë plätuqa mil cuatrocientus ochenta y dos grämusmi lasarqan, y tazonnam setecientus noventa y öchu grämus lasarqan. Tsëkunataqa sagrädu sitiuchö këkaq pësakunata churëkurmi pesayarqan.+ Tsë plätuchö y tsë tazonchöqa, gränupita rurashqa qarëpaqmi aceitiwan pichushqa alli aqashqa harina junta karqan.+ 68 Y örupita cöpatam aparqan, tsëqa cientu catorci grämusmi lasarqan. Tsë cöpachöqa inciensum junta karqan. 69 Tsënöllam juk mallwa töruta, juk carnëruta y juk watayoq üshatapis ushakanqanyaq rupatsina qarëpaq aparqan.+ 70 Mallwa chïvutanam* jutsampita* perdonashqa kanampaq Teyta Diospaq aparqan.+ 71 Y Teyta Dioswan amïgu kanqanta rikätsikurmi+ ishkë törukunata, pitsqa carnërukunata, pitsqa chïvukunata* y juk watayoq pitsqa üshakunata aparqan. Tsë llapanmi Amisadäipa tsurin Ahiëzer+ apanqan qarënin karqan.

72 Onci kaq junaqqa, Ocranpa tsurin Paguielmi+ qarëkunata aparqan. Pëqa Aserpa kastankunapa dirigeqninmi karqan. 73 Paguielpis plätapita plätuta y plätapita tazontam aparqan. Tsë plätuqa mil cuatrocientus ochenta y dos grämusmi lasarqan, y tazonnam setecientus noventa y öchu grämus lasarqan. Tsëkunataqa sagrädu sitiuchö këkaq pësakunata churëkurmi pesayarqan.+ Tsë plätuchö y tsë tazonchöqa, gränupita rurashqa qarëpaqmi aceitiwan pichushqa alli aqashqa harina junta karqan.+ 74 Y örupita cöpatam aparqan, tsëqa cientu catorci grämusmi lasarqan. Tsë cöpachöqa inciensum junta karqan. 75 Tsënöllam juk mallwa töruta, juk carnëruta y juk watayoq üshatapis ushakanqanyaq rupatsina qarëpaq aparqan.+ 76 Mallwa chïvutanam* jutsampita* perdonashqa kanampaq Teyta Diospaq aparqan.+ 77 Y Teyta Dioswan amïgu kanqanta rikätsikurmi+ ishkë törukunata, pitsqa carnërukunata, pitsqa chïvukunata* y juk watayoq pitsqa üshakunata aparqan. Tsë llapanmi Ocranpa tsurin Paguiel+ apanqan qarënin karqan.

78 Döci kaq junaqqa, Enanpa tsurin Ahirämi+ qarëkunata aparqan. Pëqa Neftalïpa kastankunapa dirigeqninmi karqan. 79 Ahiräpis plätapita plätuta y plätapita tazontam aparqan. Tsë plätuqa mil cuatrocientus ochenta y dos grämusmi lasarqan, y tazonnam setecientus noventa y öchu grämus lasarqan. Tsëkunataqa sagrädu sitiuchö këkaq pësakunata churëkurmi pesayarqan.+ Tsë plätuchö y tsë tazonchöqa, gränupita rurashqa qarëpaqmi aceitiwan pichushqa alli aqashqa harina junta karqan.+ 80 Y örupita cöpatam aparqan, tsëqa cientu catorci grämusmi lasarqan. Tsë cöpachöqa inciensum junta karqan. 81 Tsënöllam juk mallwa töruta, juk carnëruta y juk watayoq üshatapis ushakanqanyaq rupatsina qarëpaq aparqan.+ 82 Mallwa chïvutanam* jutsampita* perdonashqa kanampaq Teyta Diospaq aparqan.+ 83 Y Teyta Dioswan amïgu kanqanta rikätsikurmi+ ishkë törukunata, pitsqa carnërukunata, pitsqa chïvukunata* y juk watayoq pitsqa üshakunata aparqan. Tsë llapanmi Enanpa tsurin Ahirä+ apanqan qarënin karqan.

84 Altarta inaguräyanqan junaqmi israelïtakunata dirigeqkunaqa,+ kë qarëkunata apayarqan: plätapita döci plätukunata, plätapita döci tazonkunata y örupita döci cöpakunata.+ 85 Cada plätuqa mil cuatrocientus ochenta y dos grämusmi lasarqan, y cada tazonnam setecientus noventa y öchu grämus lasarqan. Llapan plätukuna y tazonkunaqa, veintisiëti mil trescientus sesenta grämusmi lasarqan. Tsëkunataqa sagrädu sitiuchö këkaq pësakunata churëkurmi pesayarqan.+ 86 Cada cöpaqa cientu catorci grämusmi lasarqan. Llapan cöpakunaqa mil trescientus sesenta y öchu grämusmi lasarqan. Tsëkunataqa sagrädu sitiuchö këkaq pësakunata churëkurmi pesayarqan. Tsë cöpakunachö apayanqan inciensuqa cientu catorci grämusmi lasarqan. 87 Ushakanqanyaq rupatsina qarëpaqqa, döci törukunata, döci carnërukunata, juk watayoq döci üshakunata y gränupita rurashqa qarëkunatam apayarqan. Y jutsata* rurayanqampita qarëpaqnam döci mallwa chïvukunata* apayarqan. 88 Y Teyta Dioswan amïgu kayanqanta rikätsikurmi veinticuatru törukunata, sesenta carnërukunata, sesenta chïvukunata* y juk watayoq sesenta üshakunata apayarqan. Tsë llapan qarëkunatam altarta inaguräyanqan+ junaq apayarqan.+

89 Juntakäyänan carpaman* Teyta Dioswan parlaq Moises yëkuptinqa,+ Sagrädu Cäjapa tsapananchö këkaq ishkë querubinkuna+ këkanqampitam Teyta Diosqa Moisesta imëpis parlapaq.+

8 Tsëpitanam Teyta Jehoväqa Moisesta nirqan: 2 “Aarontam kënö ninëki: ‘Chiwchikunata tsaritsiptikiqa, qanchis chiwchikunam candelabrupa frentinman atsikyänan’”.+ 3 Aaronqa Moisesta Teyta Jehovä mandanqannöllam, candelabrupa+ frentinman aktsinampaq chiwchikunata tsaritsirqan. 4 Tsë candelabrutaqa Moisesta Teyta Jehovä rikätsinqantanöllam+ örupita rurayarqan, y chowpichö* ëwaq maestrampita wëtankunayaqmi+ martilluwan y cincelwan rurayarqan.

5 Teyta Jehoväqa Moisesta kënöpis nirqanmi: 6 “Israelïtakunapita Levïpa kastankunata rakïkurmi rikënïpaq limpiuyätsinëki.+ 7 Tsëpaqqa jutsapita* limpiuyätsikoq yakutam janankunaman pillchitsinëki.* Tsëpitanam entëru cuerpunchö shaprankunata* rutukuyänan, y röpankunatam taqshayänan. Tsëta rurarmi rikënïpaq limpiuna kayanqa.+ 8 Tsëpitanam juk mallwa töruta apayämunan,+ y aceitiwan pichushqa alli aqashqa harinatam gränupita rurashqa qarëpaq apayämunan,+ y qamnam juk mallwa töruta jutsankunapita* perdonashqa kayänampaq qarëpaq apamunëki.+ 9 Levïpa llapan kastankunatam juntakäyanqëki carpa* puntanman qayatsinëki, y llapan israelïtakunatapis tsëmanmi qayatsinëki.+ 10 Levïpa kastankunata noqa Jehoväpa rikënïman qayatsiptikiqa, llapan israelïtakunam pëkunapa peqankunaman o umankunaman makinkunata churayänan.+ 11 Aaronmi Levïpa kastankunata noqa Jehoväpa rikënïchö puntaman y qepaman kuyukuyänampaq mandanan,+ tsënöpam pëkunaqa israelïtakuna apayämunqan qarënö kayanqa, y noqa Jehovätam sirwiyämanqa.+

12 Levïpa kastankunaqa törukunapa peqankunamanmi o umankunamanmi makinkunata churayänan.+ Juknin töruqa jutsankunapita* perdonashqa kayänampaq qarëpaqmi kanqa, y juknin kaqnam ushakanqanyaq rupatsina qarëpaq kanqa. Tsëkunata noqa Jehoväpaq rupatsimuptikim, Levïpa kastankunaqa jutsata rurayanqampita perdonashqa kayanqa.+ 13 Aaronpa y tsurinkunapa puntanman ëwayänampaqmi, Levïpa kastankunata mandanëki. Y noqa Jehoväpa rikënïchö puntaman y qepaman kuyukuyänampaqmi mandanëki. 14 Israelïtakunapitam Levïpa kastankunata rakinëki.+ Pëkunaqa noqapaqmi kayanqa. 15 Tsënöpam Levïpa kastankunaqa puntaman y qepaman kuyutsishqa qarënö kayanqa, y rikënïpaqmi limpiuna kayanqa. Tsëpitaqa juntakäyanqëki carpachömi* sirwiyämanqa. 16 Levïpa ollqu kastankunaqa israelïtakunapitam noqapaq akrashqa kayashqa. Pëkunataqa israelïtakunapa punta wamrankunapa rantinmi noqapaq akrarqö.+ 17 Israelïtakunapa mayor wamrankuna y animalninkunapa punta wawankunaqa noqapaqmi kayan.+ Pëkunataqa egipciukunapa mayor tsurinkunata y animalninkunapa punta wawankunata wanutsirmi, noqapaq rakirqä.+ 18 Israelïtakunapa mayor wamrankunapa rantinmi, Levïpa kastankuna noqapaq kayanqa. 19 Levïpa kastankunaqa, Aaronta y tsurinkunatam yanapayänan. Tsënöllam israelïtakunapa rantin juntakäyanqëki carpachö* trabajayänan,+ y israelïtakuna jutsata* rurayanqampita perdonashqa kayänampaqmi sacerdötikunata yanapayanqa. Tsënöpa sagrädu sitiuman witirnin israelïtakuna mana castigashqa kayänampaq”.+

20 Tsënam Moises, Aaron y israelïtakunaqa, Moisesta Teyta Jehovä mandanqannölla Levïpa kastankunawan rurayarqan. 21 Tsënömi Levïpa kastankunaqa Teyta Diospa rikënimpaq limpiuna kayarqan, y röpankunatam taqshayarqan.+ Tsëpitanam Aaronqa Teyta Jehoväpa rikëninchö puntaman y qepaman kuyukuyänampaq mandarqan.+ Teyta Diospa rikënimpaq limpiu kayänampaq y jutsata* rurayanqampita perdonashqa kayänampaqmi, Teyta Diospaq qarëta rupatsirqan.+ 22 Tsëpitanam Levïpa kastankunaqa juntakäyänan carpaman* trabajaq yëkuyarqan. Pëkunaqa Aaronpa y tsurinkunapa cargunchömi kayarqan. Levïpa kastankunapaq Moisesta Teyta Jehovä mandanqannöllam, tsë llapanta rurayarqan.

23 Tsëpitanam Teyta Jehoväqa Moisesta kënö nirqan: 24 “Veinticincu watapita masyoq Levïpa ollqu kastankunaqa, juntakäyanqëki carpachömi* yanapakuyanqa, 25 peru cincuenta watapita masyoq ollqukunaqa, manam juntakäyanqëki carpachö* yanapakuyanqanatsu. 26 Juntakäyänëki carpachö* trabajaq kastankunataqa yanapëta puëdiyanqam, peru kikin carpachöqa manam yanapakuyta puëdiyanqanatsu. Kë mandakunqänömi Levïpa kastankunawan y trabäjunkunawan ruranëki”.+

9 Israelïtakuna Egiptupita yarquyanqampita ishkë wata pasanqanchömi, punta kaq killa qallanan junaqchö, Moisesta Sinaï jirkachö+ Teyta Jehovä kënö nirqan: 2 “Pascua Fiestata+ mandakunqä junaqchö+ rurayänampaqmi israelïtakunaqa alistakuyänan. 3 Kë killachö catorci junaq tardim* tsëtaqa mandakunqänö y imanö rurayänëkipaq kaqta ninqänö rurayänan”.+

4 Tsëmi Moisesqa Pascua Fiestapaq alistapakuyänampaq israelïtakunata nirqan. 5 Y israelïtakunaqa, qallanan killa catorci junaq tardim,* Pascua Fiestapaq Sinaï jirkachö alistapakuyarqan. Tsëtaqa Moisesta Teyta Jehovä mandanqannöllam rurayarqan.

6 Tsënö kaptimpis, wakin ollqukunaqa ayata yatashqa karmi Teyta Diospa rikënimpaq limpiutsu kayarqan,+ tsëmi Pascua Fiestapaq alistapakuyta puëdiyaqtsu. Tsëmi Moisesman y Aaronman ëwar+ 7 kënö niyarqan: “Ayata yatashqa karmi Teyta Diospa rikënimpaq limpiutsu këkäyä, tsëqa, ¿imatataq rurayäman israelïta mayintsikkunawan juntu Teyta Jehoväpa rikëninman qarënïkunata apayänäpaq?”.+ 8 Tsënam Moisesqa pëkunata nirqan: “Këllachö shuyëkäyämë, Teyta Jehoväta tapuramushaq mä imatash qamkunapaq nimanqa”.+

9 Teyta Jehoväqa Moisesta kënömi nirqan: 10 “Israelïtakunatam këta ninëki: ‘Qamkuna o tsëpita yureq kastëkikunaqa, ayata yatarnin Teyta Diospa rikënimpaq mana limpiu tikrashqa karpis+ o juk markata ëwashqa karpis, Teyta Jehoväpaqmi Pascua Fiestata rurayänëki. 11 Tsëtaqa ishkë kaq killa+ catorci junaq tardim* rurayänëki. Tsë junaqmi üsha ëtsata, levadürannaq tantata y chawa verdürakunata mikuyänëki.+ 12 Waränin junaqpaqqa+ manam imatapis sobratsiyänëkitsu, y manam tsë üshapa tullunkunata pakiyänëkitsu.+ Tsë llapantaqa Pascua Fiestapaq Teyta Diosnintsik mandakunqannömi rurayänëki. 13 Peru pï nunapis Teyta Diospa rikëninchö limpiu këkar, y mana viajashqa këkar Pascua Fiestapaq mana alistapakuptinqa wanutsiyänëkim o wañutsiyänëkim.+ Teyta Jehovä mandakunqan junaqchö qarënin mana apaptinqa, jutsata* ruranqampitam castigayänëki.

14 Qamkunawan kawaq forastërukunapis, Teyta Jehovä mandakunqannö+ y imanö rurayänëkipaq kaqta ninqannömi Pascua Fiestapaq alistapakuyänan.+ Qamkuna y forastërukunapis, Teyta Diosnintsik mandakunqannömi rurayänëki’”.+

15 Diospa carpa wayinta armar ushayanqan junaqqa,+ pukutë urämurmi carpa* wayita tsaparkurqan, peru paqaspaqa ninanö rawrëkaq o lunyëkaq pukutëmi patsa waranqanyaq carpa wayi jananchö karqan.+ 16 Y tsënömi imëpis karqan: junaqpaqa pukutëmi Diospa carpa* wayin jananchö këkaq, y paqaspanam ninanö rawrëkaq o lunyëkaq pukutë këkaq.+ 17 Tsë pukutë ëwar qallaptinqa, llapan israelïtakunam pukutë qepanta ëwayaq.+ Y pukutë mana kuyukuptinqa, tsë sitiuchömi carpankunata* armayaq.+ 18 Israelïtakunaqa Teyta Jehovä mandakuptinmi mëtapis ëwayaq, y Teyta Jehovä mandakuptinmi mëchöpis quedakuyaq.+ Diospa carpa* wayin jananchö pukutë kaptinqa, këkäyanqanllachömi quedakuyaq. 19 Diospa carpa* wayin jananchö pukutë atska junaqpa mana kuyukuptinqa, Teyta Jehoväta cäsukurmi israelïtakunaqa këkäyanqanllachö quedakuyaq.+ 20 Höraqa Diospa carpa* wayin jananchö pukutëqa atska junaqpam kuyukoqtsu. Israelïtakunaqa Teyta Jehovä mandakuptinmi mëchöpis quedakuyaq, y Teyta Jehovä mandakuptinmi mëtapis ëwayaq. 21 Höraqa juk paqasllam tsë pukutëqa juk sitiuchö quedakoq. Patsa waräriptin pukutë ëwar qallëkuptinqa, israelïtakunapis pukutë qepantam ëwayaq. Paqaspa o junaqpapis pukutë ëwar qallëkuptinqa, israelïtakunapis pukutë qepantam ëwayaq.+ 22 Diospa carpa* wayin jananchö pukutë ishkë junaqpa, juk killapa o mas tiempupa quedakuptimpis, israelïtakunaqa këkäyanqanllachömi quedakuyaq, manam mëtapis ëwayaqtsu. Peru pukutë ëwar qallëkuptinqa, israelïtakunapis pukutë qepantam ëwayaq. 23 Teyta Jehovä mandakuptinmi mëchöpis quedakuyaq, y Teyta Jehovä mandakuptinmi mëtapis ëwayaq. Moisesta Teyta Jehovä mandanqannöllam, israelïtakunaqa Teyta Jehovä llapan mandakunqanta rurayarqan.

10 Tsëpitanam Teyta Jehoväqa Moisesta kënö nirqan: 2 “Cincelwan y martilluwanmi plätapita ishkë trompëtakunata ruratsinëki.+ Tsë trompëtakunata tocarmi israelïtakunata qayatsinëki o carpankunata* paskayänampaq mandanëki. 3 Ishkan trompëtata tocayaptinqa, llapan israelïtakunam juntakäyanqëki carpapa* yëkunaman shayämunan.+ 4 Y juk kaq trompëtallata tocayaptinqa, mil israelïtakunata dirigeqkunallam qamwan juntakäyänan.+

5 Kutin kutin trompëtata tocayaptinqa, inti o rupay yarqamunan läduchö këkaq kastakunam carpankunata* paskaskir ëwakuyänan.+ 6 Ishkë kutipa kutin kutin trompëtata tocayaptinqa, derëcha* läduchö këkaq kastakunam carpankunata* paskaskir ëwakuyänan.+ Tsënöllam wakin kastakuna ëwakuyänampaqpis, trompëtakunata kutin kutin tocayänan.

7 Israelïtakunata qayatsirqa, ishkan trompëtatam tocatsinëki,+ tsënö kaptimpis manam kutin kutinqa tocatsinëkitsu. 8 Tsë trompëtakunataqa Aaronpa tsurin sacerdötikunallam tocayänan.+ Qamkuna y tsëpita yureq kastëkikunapis, kë mandakunqänömi rurayänëki.

9 Chikiyäshoqniki nacionkuna qamkunawan pelyaq shayämuptinqa, guërraman ëwayänëkipaqnömi trompëtakunata tocayänëki.+ Tsëta rurayaptikim noqa Jehovä Diosnikikuna qamkunata yarpäyashqëki, y chikiyäshoqnikikunata venciyänëkipaqmi yanapayashqëki.

10 Tsënöllam fiesta kaptin,+ killa qallaptin, ushakanqanyaq rupatsina qarëkunata rupatsiyaptin+ y Teyta Dioswan amïgu kayanqanta rikätsikur+ apayanqan qarëkunata rupatsiyaptimpis, trompëtakunata tocayänan. Tsëqa qamkunata imëpis yarpänäpaqmi kanqa. Noqam Jehovä Diosnikikuna kä”.+

11 Israelïtakuna Egiptupita yarquyanqampita ishkë wata pasarinqanchömi, ishkë kaq killachö veinti junaq,+ Diospa carpa* wayin jananchö pukutë shärirqan. Tsë carpa wayi rurinchömi+ Sagrädu Cäja churaraq. 12 Tsëmi israelïtakunaqa Teyta Dios mandakunqannölla Sinaï jirkapita ëwakuyarqan.+ Y pukutëqa Paran niyanqan tsunyaq sitiuchömi quedakurqan.+ 13 Kë kutillaran israelïtakunaqa, Moisesta Teyta Jehovä mandanqannölla ëwakuyarqan.+

14 Puntataqa Judäpa kastankuna dirigiyanqan grüpukunam* ëwakuyarqan. Pëkunataqa Aminadabpa tsurin Nahsonmi+ dirigirqan. 15 Isacarpa+ kastankunataqa, Zuarpa tsurin Netanelmi dirigirqan. 16 Zabulonpa+ kastankunatanam Helonpa tsurin Eliab dirigirqan.

17 Pëkunapa qepantanam Guersonpa+ y Merarïpa+ tsurinkuna ëwayarqan. Pëkunaqa Diospa carpa* wayinta paskariyaptinmi,+ tsëkunata apayarqan.

18 Tsëpitanam Rubenpa kastankuna dirigiyanqan grüpukuna* ëwakuyarqan. Pëkunataqa Sedeurpa tsurin Elizurmi+ dirigirqan. 19 Simeonpa+ kastankunataqa, Zurisadäipa tsurin Selumielmi dirigirqan. 20 Gadpa+ kastankunatanam, Reuelpa tsurin Eliasaf dirigirqan.

21 Pëkunapa qepantanam, sagrädu sitiuchö utilizäyanqankunata aparnin Cohatpa kastankuna ëwayarqan.+ Pëkuna chäyänampaqqa, Diospa carpa* wayinqa armashqanam kanan karqan.

22 Tsëpitanam Efrainpa kastankuna dirigiyanqan grüpukuna* ëwakuyarqan. Pëkunataqa Amihudpa tsurin Elisamämi+ dirigirqan. 23 Manasespa kastankunataqa, Pedahzurpa tsurin Gamalielmi+ dirigirqan. 24 Y Benjaminpa+ kastankunatanam, Guideonïpa tsurin Abidan dirigirqan.

25 Tsëpitanam Danpa kastankuna dirigiyanqan grüpukuna* ëwakuyarqan. Pëkunataqa Amisadäipa tsurin Ahiëzermi+ dirigirqan. Pëkunaqa wakin grüpukunapa qepantam ëwayarqan. 26 Aserpa+ kastankunataqa, Ocranpa tsurin Paguielmi dirigirqan. 27 Y Neftalïpa+ kastankunatanam, Enanpa tsurin Ahirä dirigirqan. 28 Tsënömi israelïtakunaqa mëta ëwarpis grüpu grüpu yarquyaq.+

29 Madianïta Reuelpa*+ tsurin Hobabmi Moisespa cuñädun karqan, pëtam Moisesqa nirqan: “Teyta Jehovä äniyämanqan sitiumanmi ëwëkäyä.+ Noqakunawan ëwakushun.+ Allim tratayashqëki. Teyta Jehoväqa imëka allikunatam äniyämashqa”.+

30 Tsënam Hobabqa nirqan: “Manam qamkunawan ëwashaqtsu, markätam kastäkunaman kutikushaq”. 31 Tsëmi Moisesqa nirqan: “Ama kutikuytsu. Qamqa musyankim tsunyaq jirkachö carpäkunata* mëchö armayänäpaq kaqta, tsëmi pushayämänëkita* munayä. 32 Noqakunawan ëwaptikiqa,+ Teyta Jehovä bendiciyämaptin tariyanqätam rakipäyashqëki”.

33 Israelïtakunaqa Teyta Jehovä akranqan jirkapitam,+ quedakuyänampaq sitiuta ashir kima junaqpa viajayarqan.+ Y Teyta Jehoväpa Sagrädu Cäjantam* llapankunapa puntanta apayarqan.+ 34 Quedakuyanqan sitiupita ëwakuyaptinqa, entëru junaqmi Teyta Jehovä urätsimunqan pukutëqa pëkunapa puntanta ëwaq.+

35 Sagrädu Cäjata apar qallëkuyaptinqa, Moisesqa kënömi neq: “Jehovä Dios shamur,+ chikishoqnikikuna mëtsëpa ëwakuyänanta, y conträ këkaqkuna qeshpir ëwakuyänanta permitïkullë”. 36 Y Sagrädu Cäjata jamaratsiyaptinnam kënö neq: “Jehovä Dios, kananqa Israelchö mëtsika familiakunawanna quedakuy”.+

11 Israelïtakunaqa Teyta Jehoväpa rikëninchömi imanö këkäyanqampita quejakuyarqan, y Teyta Jehoväqa tsënö quejakuyanqantam wiyarqan. Tsëmi Teyta Jehoväqa campamentupita karuchö wakinkunata ninawan ushakätsirqan. 2 Tsënam israelïtakunaqa yanapananta munar Moisesta rogakuyarqan. Teyta Jehoväta Moises rogakuptinmi+ nina upiskirqan.* 3 Tsëpitanam pëkunaman Teyta Jehovä ninata mandamushqa kaptin+ Taberä* nir tsë sitiupa jutin churayarqan.

4 Y mëtsika forastërukunam*+ alli mikuyta munar quejakur qallëkuyarqan.+ Tsënam israelïtakunaqa yapë waqarnin kënö niyarqan: “¿Piraq ëtsata qaramäshun?+ 5 Egiptuchöqa, pepinïlluta, sandïllata, pöruta, ceböllata y äjustam mikoq kantsik. Pescädutanäqa grätisllam mikoq kantsik.+ 6 Kananqa manam kallpantsikpis kannatsu, y manä mikuyllatam mëchöpis rikantsik”.+

7 Manä mikuyqa,+ culantrupa murunnö+ y plantapa weqinnö yuraqmi karqan. 8 Tsëta juntëkurmi israelïtakunaqa rumi mulinuchö aqayaq o muchkachö takayaq. Tsëpitanam wakinkunaqa mankachö puwatsiyaq,* y wakinnam redondu tantakunata rurayaq.+ Tsë tantakunaqa aceitiwan rurashqa mishkeq gallëtanömi karqan. 9 Manä mikuyqa, shullya* paqaspa shikwanqan jananmanmi shikwamoq.+

10 Carpankunapa* yëkunachö cada nunata y cada familiata waqaqta rikarmi Moisesqa alläpa cölerakurqan,+ y Teyta Jehoväpis alläpam cölerakurqan. 11 Tsënam Moisesqa Teyta Jehoväta nirqan: “¿Imanirtaq sirwishoqnikita sufritsinki? ¿Imanirtaq yanapamankinatsu? ¿Imanirtaq israelïtakunapa problëmankunapita cargutsakunä?+ 12 Noqaqa manam pëkunapa mamantsu kä. Manam noqatsu pëkunata qeshyakurqö.* Tsëqa, ¿imanirtaq chichikaq* wamrata cuidaqnö pëchüchö apanäpaq nimanki, y unë kastankunata äninqëki markakunaman pushanäta munanki?+ 13 ¿Mëchöraq llapankunapaq ëtsata tarishaq? Pëkunaqa puntäman shamuykurmi ‘ëtsatam munayä’ nirnin waqayan. 14 Manam japalläqa llapankunata dirigita puëdïtsu. Pëkunata dirigiqa manam noqapaq fäciltsu.+ 15 Tsënö sufritsimänëki kaptinqa, jukllana wanuykatsimë,+ peru rikënikipaq alli kaptïqa, ama mana allikunata rikätsimënatsu”.

16 Tsënam Teyta Jehoväqa Moisesta kënö nirqan: “Israelïtakunata dirigeqkunapita o carguyoq kaqkunapita+ setenta ollqukunata akrë, y juntakäyanqëki carpaman* pushë y tsëchö quedakuyë. 17 Tsëchömi urämurnin+ qamwan parlashaq.+ Qam chaskinqëki podertam pëkunata rakipäshaq,+ y pëkunam israelïtakunata dirigir yanapayäshunki.+ 18 Y israelïtakunatam këta ninëki: ‘“¿Piraq ëtsata qaramäshun? Egiptuchöqa mas allim kawarqantsik”+ nir waqayanqëkitam Teyta Jehoväqa wiyashqa.+ Tsëmi Teyta Jehoväqa ëtsata qarayäshunki,+ y tsëpaqmi warëqa Teyta Diospa rikënimpaq limpiu kayänëki.+ 19 Y manam juk junaqllatsu ni ishkë ni pitsqa ni chunka ni veinti junaqllatsu mikuyanki, 20 sinöqa juk killam mikuyanki; senqëkikunapa yarqunqanyaq y melanäyanqëkiyaqmi mikuyanki.+ Tsënöqa kanqa, qamkunawan Teyta Jehovä këkaptin, “¿imapaqraq Egiptupita yarqamurqantsik?” nir waqar quejakushqa kayaptikim’”.+

21 Tsënam Moisesqa Teyta Diosta nirqan: “Pushëkanqä nunakunachöqa seiscientus mil soldädukunam kayan.+ ¿Tsënö mëtsikaq këkäyaptïku, juk killapa ëtsata qarayämänëkipaq niyämanki? 22 Mëtsika üshakunata y wäkakunata pishtaptïpis manachi pëkunapaq tinkunmantsu.* Y lamarchö llapan pescädukunapis, manachi pëkunapaq tinkunmantsu”.

23 Tsënam Teyta Jehoväqa Moisesta nirqan: “¿Noqa Jehovä tsëta rurëta mana puëdinqätaku pensanki?+ Kananmi rikanki ninqä cumplikanqanta o mana cumplikanqantapis”.

24 Tsëpitanam Moisesqa Diospa carpa* wayimpita yarqaramur Teyta Jehovä llapan ninqanta israelïtakunata willarqan. Y israelïtakunata dirigeqkunapita setenta ollqukunata akrëkurmi, juntakäyanqan carpapa lädunkunaman churakäyänampaq mandarqan.+ 25 Tsëpitanam Teyta Jehoväqa pukutëchö urämurnin+ Moisesta parlaparqan,+ y Moises chaskinqan podertam+ setenta dirigeqkunapis chaskiyarqan. Poderta chaskirirnam tsë setenta dirigeqkunaqa, Teyta Diospa willakoqninnö portakur qallëkuyarqan.*+ Tsënöqa tsë kutillam pasarqan.

26 Peru ishkë akrashqa ollqukunaqa, israelïtakuna këkäyanqan campamentuchömi quedakushqa kayarqan. Jutinkunaqa Eldad y Medadmi karqan. Juntakäyanqan carpaman* mana ëwashqa kayaptimpis, Moises akrashqa kaptinmi, pëkunapis Teyta Diospa poderninta chaskiyarqan. Tsëmi campamentuchö këkarnin Teyta Diospa willakoqninnö portakur qallëkuyarqan. 27 Tsënam juk jövinqa cörripa ëwar Moisesta kënö willarqan: “Eldad y Medadmi campamentuchö Teyta Diospa willakoqninnö portakuykäyan”. 28 Tsënam Nunpa tsurin Josuëqa,+ Moisesta nirqan: “Teyta Moises, tsënö mana portakuyänampaq michë”.+ Josuëqa jövin kanqampitam Moisesta yanapaq.* 29 Tsënam Moisesqa nirqan: “Ama noqarëkur llakikuytsu. Llapan israelïtakuna Teyta Jehoväpa willakoqnin kayaptin, y Teyta Jehoväpa poderninta chaskiyaptinqa, alläpa allichi kanman”. 30 Tsëpitanam Moiseswan dirigeqkunaqa, israelïtakuna këkäyanqan campamentuman kutiyarqan.

31 Tsëpitanam Teyta Jehoväqa israelïtakuna këkäyanqan campamentuman lamarpita vientuykatsirqan. Tsë vientum mëtsika codornizkunata apëkamurqan.+ Y tsë codornizkunaqa, ochenta y nuëvi centïmetrusyaqmi* patsachö montonaräyarqan. Y campamentupa juk lädumpam, juk junaq chakipa ëwanachönö montonaräyarqan, y juknin lädupapis juk junaq chakipa ëwanachönömi montonaräyarqan. 32 Tsëmi israelïtakunaqa tsë junaq, tsë paqas y waränin junaq codornizkunata juntar kayarqan. Wallkallata juntaqkunapis chunka matitam* juntayarqan. Y pishtaskirmi këkäyanqan campamentupa entërunman tsakinampaq mashtayarqan. 33 Y shiminkunallachöraq ëtsa këkaptinmi, Teyta Jehoväqa alläpa cölerakur israelïtakunata castigarqan. Teyta Jehoväqa israelïtakunata castigarmi mëtsikaqta ushakätsirqan.+

34 Tsëmi Quibrot-Hataavä*+ nirnin tsë sitiupa jutin churayarqan. Tsënöqa churayarqan alli mikuyta munaqkunata tsëchö pampashqa karmi.+ 35 Tsëpitanam israelïtakunaqa Quibrot-Hataavä sitiupita ëwakuyarqan, y Hazerot+ sitiuman chëkurmi tsëchö quedakuyarqan.

12 Cusïta warmiwan Moises casakushqa kaptinmi,+ Miriamwan Aaronqa Moisespaq rimar 2 kënö niyarqan: “¿Moisesllawanku Teyta Jehoväqa israelïtakunata parlapan? ¿Manaku noqantsikwampis parlapan?”.+ Tsënö parlayanqantam Teyta Jehoväqa wiyëkarqan.+ 3 Tsënö kaptimpis, Moisesqa humildi* nunam karqan,+ pënöqa manam ni pï nunapis karqantsu.

4 Tsënam Teyta Jehoväqa illaqpita Moisesta, Aaronta y Miriamta nirqan: “Juntakäyanqëki carpaman kimëki ëwayë”. Tsëmi kimankuna carpaman* ëwayarqan. 5 Teyta Jehoväqa pukutë rurinchömi+ carpapa* yëkunanman urämurqan, y tsë rurimpitam Aarontawan Miriamta qayarqan. Tsënam ishkankuna witiyarqan. 6 Y Teyta Diosqa kënömi nirqan: “Këta wiyarayämë. Israelïtakunapita pillapis noqa Jehoväpa willakoqnï kaptinqa, revelarninmi pï kanqäta musyatsïman+ o suëñuyninchömi parlapäman.+ 7 Tsënö kaptimpis, sirwimaqnï Moisestaqa manam tsënötsu parlapä. Pëqa llapan sirwimaqnïkunatam* cargunchö katsin.+ 8 Pëtaqa nunapura parlayanqannömi parlapä,+ y manam imatapis pakätsu. Pëtaqa kikï Jehovämi yuripü. Tsënö këkaptinku, ¿sirwimaqnï Moisespaq rimayarqunki?”.

9 Tsënö nïkurmi Teyta Jehoväqa ëwakurqan. 10 Y pukutëqa Diospa carpa* wayin janampitam sharkurqan.* Pukutë sharkuptinqa, Miriampa entëru cuerpunmi leprawan rashtanö* yuraq këkarqan.+ Aaron tumëkurqa, panin Miriamta lepra usharishqa kanqantam rikarqan.+ 11 Tsënam Aaronqa Moisesta kënö rogarqan: “Teytallë, upa këtam rurayarqö. Ama rurayanqä jutsapita* castiguëkayämëtsu. 12 Panintsik Miriampa qaranqa, wanushqa yureq wamrapa ismushqa qarannömi këkan. Ama dejëkuytsu tsënö quedakunanta”. 13 Tsënam Moisesqa Teyta Jehoväta kënö rogakurqan: “Dios Yaya, panï Miriamta alliyëkatsillë”.+

14 Tsënam Teyta Jehoväqa Moisesta nirqan: “Papänin cäranchö toqapuptinqa, ¿manatsuraq qanchis junaq penqakushqa kanman? Tsënö kaptinqa, qanchis junaq campamentupita karuchö katsun,+ y tsëpitaraq campamentuman kutimutsun”. 15 Tsëmi Miriamqa qanchis junaq campamentupita karuchö kakurqan.+ Campamentuman kutinqanyaqmi, israelïtakunaqa carpankunata* paskayarqantsu. 16 Tsëpitanam israelïtakunaqa Hazerot+ sitiupita ëwakuyarqan y Paran niyanqan tsunyaq sitiuchömi+ carpankunata* armayarqan.

13 Tsëpitanam Teyta Jehoväqa Moisesta kënö nirqan: 2 “Israelïtakunata äninqä Canaanchö markakunata rikapakoq ëwayänampaqmi ollqukunata mandanëki. Tsëpaqmi kastankunachö dirigeq ollqukunata+ cada kastapita akranëki”.+

3 Tsënam Moisesqa Teyta Jehovä mandanqannölla Paran+ niyanqan tsunyaq sitiupita rikapakoqkunata mandarqan. Tsë llapan ollqukunaqa, israelïtakunata dirigeqkunam kayarqan. 4 Kë ollqukunam akrashqa kayarqan: Rubenpa kastankunapita Zacurpa tsurin Samüa, 5 Simeonpa kastankunapita Horïpa tsurin Safat, 6 Judäpa kastankunapita Jefunëpa tsurin Caleb,+ 7 Isacarpa kastankunapita Josëpa tsurin Igal, 8 Efrainpa kastankunapita Nunpa tsurin Hosëa,+ 9 Benjaminpa kastankunapita Rafüpa tsurin Paltï, 10 Zabulonpa kastankunapita Sodïpa tsurin Gadiel, 11 Josëpa+ tsurin Manasespa+ kastankunapita Susïpa tsurin Gaddï, 12 Danpa kastankunapita Guemalïpa tsurin Amiel, 13 Aserpa kastankunapita Miguelpa tsurin Setur, 14 Neftalïpa kastankunapita Vofsïpa tsurin Nahbï, 15 y Gadpa kastankunapita Makïpa tsurin Gueuel. 16 Pëkunam kayarqan rikapakoq ëwayänampaq Moises akranqan ollqukuna. Nunpa tsurin Hosëatam Moisesqa Josuë*+ nir jutin churarqan.

17 Canaanchö markakunata manaraq rikapakoq ëwayaptinmi, Moisesqa pëkunata kënö nirqan: “Nëguebpa pasarnin jirkakunaman witsäyanki.+ 18 Y rikäyämunki tsë kinrëchö chakrakuna imanö kanqanta,+ nunakuna kallpasapa o kallpannaq kayanqanta, atskaq o wallkaqlla kayanqanta, 19 tsë kinrëchö chakrakuna alli o mana alli kanqanta, y tsëchö markakuna murallashqa o mana murallashqa kanqanta. 20 Tsënölla rikäyämunki chakrachö murukuykuna alli o mana alli kanqanta,+ y plantakuna kanqanta o mana kanqantapis. Teyta Dios llapan mandakunqanta rurayänëkipaqmi valienti kayanëki,+ y tsë chakrakunachö wayunqantam apayämunëki”. Tsë witsanqa, punta poqoq üvasta pallë witsanmi karqan.+

21 Tsënam pëkunaqa ëwarnin Zin niyanqan tsunyaq+ sitiupita Rehob markayaq rikapakuyarqan. Rehob+ markaqa, Lebö-Hamatpa*+ amänunchömi këkarqan. 22 Nëguebpa witsarmi Hebron+ markaman chäyarqan. Tsëchömi Anacpa+ kastankuna Ahiman, Sesäi y Talmäi+ nunakuna kawayaq. Hebron markata rurayanqampita qanchis wata pasanqanchöran, Egiptuchö Zoan markataqa rurayarqan. 23 Tsëpitanam Escol pampaman+ chëkur juk sarta üvasta mutuyarqan, y qeruman warkurkurmi ishkaq apayarqan. Tsënöllam granäda y hïgus frütatapis apayarqan.+ 24 Israelïtakuna juk sarta üvasta tsëchö mutushqa kayaptinmi, Escol* nirnin tsë pampapa+ jutin churayarqan.

25 Tsë rikapakoq ëwaqkunaqa cuarenta junaqtam+ kutiyarqan. 26 Moises, Aaron y israelïtakuna këkäyanqan Paran niyanqan tsunyaq sitiumanmi chäriyarqan. Tsëqa Cadeschömi këkarqan.+ Imakunata rikäyanqantam israelïtakunata willayarqan, y apayämunqan frütakunatam rikätsiyarqan. 27 Tsëpitanam Moisesta kënö willayarqan: “Mandayämanqëki markakunatam rikapakayämurqö. Rasumpam tsëchöqa lichipis, mielpis mëtsika kan,+ y tsëpitam kë frütakunatapis apayämurqö.+ 28 Tsënö kaptimpis, tsëchö nunakunaqa kallpasapam kayan, y markankunapis jatusaq y alli murallashqam. Tsëchömi Anacpa kastankunatapis rikäyarqö.+ 29 Nëguebchöqa+ amalequïta+ nunakunam kawayan, jirkakunachönam hitïta, jebuseu+ y amorreu+ nunakuna kawayan. Lamarpa y Jordan mayupa* kuchunchönam+ cananeu+ nunakuna kawayan”.

30 Tsënam Calebqa Moisespa puntanchö mantsakashqa këkaq nunakunata kënö nirqan: “Ama mantsakäyëtsu, aku pëkunawan pelyaq ëwashun. Pëkunataqa vencishunmi, markankunaqa noqantsikpanam kanqa”.+ 31 Tsënam pëwan rikapakoq ëwaqkunaqa niyarqan: “Ama pëkunawan pelyaq ëwashuntsu. Pëkunaqa noqantsikpitapis mas kallpasapam kayan”.+ 32 Y israelïtakunata mantsakätsirmi mana allikunata willar sïguiyarqan,+ y kënömi niyarqan: “Rikapakoq ëwayanqächö nunakunaqa alläpa jatusaqmi kayan, tsë markakunachöqa wanurmi ushakäshun.+ 33 Tsëchömi Anacpa jatusaq tsurinkunatapis rikäyarqö,+ pëkunaqa nefilimkunapa kastankunam kayan. Pëkunapa puntanchöqa chukllushnöllam* kayarqö, y chukllushkunatanömi pëkunapis rikäyämashqa”.

14 Tsënam israelïtakunaqa quejakuyarqan, y waqëkarmi tsë paqas waräyarqan.+ 2 Llapankunam Moisespaq y Aaronpaq quejakuyarqan,+ y pëkunapaq mana allita parlarmi kënö niyarqan: “Egiptuchö o kë tsunyaq sitiuchö wanukunqantsikmi o wañukunqantsikmi mas alliqa kanman karqan. 3 Espädawan wanutsimänapaqmi+ Teyta Jehoväqa kë tsunyaq sitiuman pushamarquntsik. Warmintsikkunata y tsurintsikkunatapis chikimaqnintsikkunam apakuyanqa.+ Egiptuman kutikunqantsikmi mas alliqa kanqa”.+ 4 Y kikinkunapuram ninakuyaq: “Egiptuman kutikunapaq juk pushamaqnintsik akrashun”.+

5 Tsënam Moiseswan Aaronqa, urkunkunapis patsaman chanqanyaq tsëchö juntarëkaq israelïtakunapa puntanman qonqurikuyarqan. 6 Rikapakoq ëwaqkunapita Josuëwan+ Calebpis+ llakikurmi röpankunata rachiyarqan. Josuëqa Nunpa tsurinmi karqan, y Calebnam Jefunëpa tsurin karqan. 7 Pëkunam israelïtakunata niyarqan: “Rikapakoq ëwayanqä markakunachöqa imëkapis allim wayun.+ 8 Lichipis, mielpis mëtsikam kan.+ Teyta Jehoväta cäsukushqaqa, pëmi tsë markakunaman pushamäshun, y tsë markakunatam entregamäshun. 9 Peru ama Teyta Jehoväpa contran churakäyëtsu ni tsë markakunachö nunakunata mantsayëtsu,+ pëkunaqa manam noqantsikpaq ni imatsu kayan.* Pëkunataqa manam ni pï yanapanqatsu, peru noqantsiktaqa Teyta Jehovämi yanapamäshun.+ Tsëmi pëkunata mantsanantsiktsu”.

10 Tsënö kaptimpis, llapan israelïtakunam Josuëtawan Calebta rumiwan wanutsita munayarqan.+ Tsë höram Teyta Jehoväqa juntakäyanqan carpaman* pukutë rurinchö urämurqan, y llapan israelïtakunam rikäyarqan.+

11 Tsëpitanam Teyta Jehoväqa Moisesta kënö nirqan: “¿Imëyaqraq israelïta mayikikuna respetayämanqatsu?+ Mëtsika milagrukunata rikëkarpis, pëkunaqa manam noqaman markäkayämuntsu o yärakayämuntsu.+ 12 Tsëmi pëkunata qeshyatsir ushakätsishaq. Y qampa kastëkikunatam mëtsikaman y pëkunapita mas puëdeq nacionman tikratsishaq”.+

13 Tsënam Moisesqa Teyta Jehoväta kënö nirqan: “Tsëta ruraptikiqa egipciukunam musyariyanqa. Pëkunaqa podernikita rikätsikur israelïtakunata pushamunqëkitam rikäyarqan.+ 14 Teyta Jehovä egipciukunam kë markakunachö kawaqkunata willayanqa. Pëkunapis israelïtakunata yanapëkanqëkita, pëkunata yuripur nunapura parlayanqannö parlapanqëkita+ y Teyta Jehovä kanqëkitam wiyayashqa.+ Qamqa pukutëwanmi junaqpa pushanki, y paqaspanam ninawan pushanki.+ 15 Llapan israelïtakunata wanuratsiptikiqa,* puëdeq kanqëkita wiyaq nunakunam kënö niyanqa: 16 ‘Jehoväqa äninqan markakunaman pushëta mana puëdirmi, tsunyaq sitiuchö israelïtakunata wanutsishqa’.+ 17 Mana tsënö niyänampaq, Teyta Jehovä, puëdeq kanqëkita rikätsikuy, y kënö niyämanqëkita yarpë: 18 ‘Noqa Jehoväqa pacienciakoq* y alläpa kuyakoqmi kä,+ y imachöpis pantaqkunata y jutsa* ruraqkunatam perdonä. Tsënö kaptimpis, culpayoq kayaptinqa manam tsënöllatsu dejarishaq. Papäninkuna culpayoq kayaptinqa, pëkunata, tsurinkunata, willkankunata y willkankunapa tsurinkunatam castigashaq’.+ 19 Kuyakoq kanqëkirëkur israelïtakunata perdonëkullë, Egiptuchö kayanqan witsampita kananyaq perdonanqëkinölla”.+

20 Tsënam Teyta Jehoväqa Moisesta kënö nirqan: “Qam nimanqëkinömi pëkunata perdonëkushaq.+ 21 Imanö kaptimpis, kawëkanqäta jurarmi këta nï: noqa Jehovä alläpa puëdeq kanqätaqa mëtsëchömi musyayanqa.+ 22 Tsënö kaptimpis, Egiptuchö këkäyaptiki y tsunyaq sitiuchö këkäyaptiki, alläpa puëdeq kanqäta y ruranqä milagrukunata rikëkar,+ chunka kutipa pruëbaman churamaqkuna,+ mandakunqäkunata mana cäsukoqkuna+ 23 y mana respetamaqkunaqa, manam awiluykikunata äninqä markakunaman chäyanqatsu.+ 24 Peru sirwimaqnï Calebqa,+ wakinkunapita jukläyam kashqa, pëqa llapan shonqunwanmi ninqäkunata cäsukushqa. Tsëmi rikapakoq ëwanqan markaman pushashaq, y kastankunam tsë markakunapa duëñun kayanqa.+ 25 Amana ëwëkäyanqëki nänipa ëwayënatsu. Tsë pampachöqa* amalequïta y cananeu+ nunakunam kawayan. Tsëmi Puka lamarman ëwaq nänipa, warë junaq tsunyaq sitiuta kutikuyänëki”.+

26 Tsëpitanam Teyta Jehoväqa Moisesta y Aaronta kënö nirqan: 27 “Israelïtakuna noqapaq parlayanqantam wiyarqö,+ ¿imëyaqraq kë mana alli nunakuna noqapita quejakuyanqa?*+ 28 Tsëmi pëkunata këta ninëki: ‘¡Kawëkanqanta jurarmi Teyta Jehoväqa parlayanqëkinölla rurayäshunëkipaq nishqa!+ 29 Veinti watapita masyoq llapan censashqa kaqkuna,+ y noqapita quejakoqkunaqa, kë tsunyaq sitiuchömi ushakäyanki,+ 30 manam mëqëkipis noqa änikunqä markakunaman yëkuyankitsu.+ Jefunëpa tsurin Caleb y Nunpa tsurin Josuëllam tsë markakunaman yëkuyanqa.+

31 ‘Chikimaqnintsikkunam tsurintsikkunata apakuyanqa’ nikäyaptikim,+ mana kaqpaq churayanqëki markakunaman pëkunata pushashaq, y pëkunam tsë markakunachö kawayanqa.+ 32 Peru qamkunaqa kë tsunyaq sitiuchömi ushakäyanki. 33 Y cuarenta watapam tsurikikunaqa kë tsunyaq sitiuchö animalkunata mitsir kayanqa.+ Jukwan jukwan kakoq* cuenta traicionayämanqëkipitam llapëki ushakäyanqëkiyaq tsënö kayanqa.+ 34 Cuarenta junaq rikapakoq ëwashqa karmi,+ cuarenta watapa mana allita rurayanqëkipita sufriyanki. Cada junaqpitam juk wata sufriyanki.+ Tsënömi musyayanki conträ churakaqkunawan* ima pasanqanta.

35 Noqa Jehovämi tsënö nikä. Noqaman mana confiakuyanqampita y conträ churakäyanqampitam, kë tsunyaq sitiuchö wanuyanqa o wañuyanqa.+ 36 Moises rikapakoq mandanqampita mana alli willakuykunawan kutimur, israelïtakunata Moisespa contran churakätseqkuna,+ 37 y tsë mana alli willakuykunata apamoq nunakunaqa, castigashqam kayanqa, y noqa Jehoväpa rikënïchömi wanuyanqa.+ 38 Peru rikapakoq ëwaqkunapita, Nunpa tsurin Josuë y Jefunëpa tsurin Calebqa manam wanuyanqatsu’”.+

39 Moises tsënö niptinmi israelïtakunaqa pasëpa* llakikuyarqan. 40 Y tempränulla sharkurmi, jirkaman witsëta munar kënö niyarqan: “Teyta Jehovä änimanqantsik markakunaman mana ëwëta munarmi jutsata* rurarquntsik, peru kananqa änimanqantsik markakunaman ëwashun”.+ 41 Tsënö niyaptinnam Moisesqa nirqan: “¿Imanirtaq Teyta Jehovä mandakunqanta cäsukuyankitsu? Tsëta rurarqa mana allimanmi chäyanki. 42 Ama ëwayëtsu, Teyta Jehovä mana yanapayäshuptikim chikiyäshoqnikikuna venciyäshunki.+ 43 Amalequïta y cananeu nunakunaqa, pelyayänëkipaqmi shuyëkäyäshunki,+ y espädankunawanmi wanutsiyäshunki. Teyta Jehoväta dejashqa kayaptikim, Teyta Jehoväqa yanapayäshunkitsu”.+

44 Tsënö kaptimpis, pëkunaqa jirkayaqmi ëwayarqan,+ peru Moises y Teyta Jehoväpa Sagrädu Cäjanqa campamentuchömi quedakuyarqan.+ 45 Jirkachö kawaq amalequïta y cananeu nunakunam pëkunawan pelyaq uräyämurqan. Tsënam israelïtakunaqa, Hormä+ markayaq wakpa këpa qeshpir ëwakuyarqan.

15 Tsëpitanam Teyta Jehoväqa Moisesta kënö nirqan: 2 “Israelïtakunatam këta ninëki: ‘Teyta Diosnintsik änimanqantsik markakunachöna këkar+ 3 ushakanqanyaq rupatsina qarëta,+ änikuyanqëkita cumpliyanqëkipita qarëta, kikikikuna munarnin apayanqëki qarëta+ o Teyta Jehoväpaq fiestakunachö qarëta aparqa,+ wäkata o üshatam apayänëki. Tsë qarëkuna ninawan rupanqan Teyta Jehoväta gustanampaqqa,+ 4 Teyta Jehoväpaq apayanqëki qarëkunawan juntum gränupita rurashqa qarëta apayänëki. Tsëpaqqa alli aqashqa juk kïlu* harinatam,+ juk litru* aceiti de olïvawan pichuyänëki. 5 Tsënöllam ushakanqanyaq rupatsina qarëpaq o üsha ëtsawan juntu rupatsiyänampaq juk litru vïnutapis apayänëki.+ 6 Carnëruta aparqa, litru y cuartunö aceiti de olïvawan pichurkurmi ishkë kïlunö alli aqashqa harinata gränupita rurashqa qarëpaq apayänëki. 7 Tsënöllam litru y cuartunö vïnutapis apayänëki. Tsëqa Teyta Jehoväta alläpam gustanqa.

8 Y ushakanqanyaq rupatsina qarëpaq,+ änikuyanqëkita cumplir+ o Teyta Dioswan amïgu kayanqëkita rikätsikur+ Teyta Jehoväpaq töruta aparqa, 9 tsë törutawan juntum gränupita rurashqa qarëta apayänëki.+ Tsëpaqqa kima kïlu y mediunö alli aqashqa harinatam, ishkë litrunö aceiti de olïvawan pichuyänëki. 10 Tsënöllam ishkë litru vïnutapis apayänëki.+ Tsë vïnu ninawan rupanqanqa, Teyta Jehoväta alläpam gustanqa. 11 Tsënömi rurayänëki cada törupaq, cada carnërupaq, cada üshapaq y cada chïvupaqpis.* 12 Ëka animalta aparpis, tsënöllam cada animalpaq rurayänëki. 13 Tsënömi israelïtakunaqa Teyta Diospaq rupatsina qarëkunata apayänan. Tsë qarëkuna ninawan rupanqanqa, Teyta Jehoväta alläpam gustanqa.

14 Tsëllaraq o unëpana qamkunawan kawaq forastërukuna Teyta Diospaq rupatsishqa qarëta aparqa, qamkuna rurayanqëkinöllam rurayänan.+ Tsë qarëkuna ninawan rupanqanqa, Teyta Jehoväta alläpam gustanqa. 15 Qamkuna y qamkunawan kawaq forastërukunapis Teyta Diosnintsik mandakunqannömi rurayänëki. Tsëtaqa qamkuna y tsëpita yureq tsurikikunapis cumpliyänëkim. Qamkuna y forastërukunapis Teyta Jehoväpa rikënimpaqqa igualmi kayanki.+ 16 Teyta Diosnintsik mandakunqantaqa llapëkim cäsukuyänëki, y marka mayikikunata o qamkunawan kawaq forastërukunata juzgarpis, Teyta Diosnintsik mandakunqannömi rurayänëki’”.

17 Tsëpitanam Teyta Jehoväqa Moisesta kënö nirqan: 18 “Israelïtakunatam këta ninëki: ‘Teyta Diosnintsik pushëkämanqantsik markakunachöna këkar 19 tsë chakrakunachö wayunqanta mikurqa,+ Teyta Jehoväpaqmi qarëta apayänëki. 20 Tsëpaqqa puntata cosechayanqëkitam+ saqtullata aqayänëki, y roscakunata rurëkurmi Teyta Diospaq apayänëki. Tsëtaqa ërapita apayanqëki qarëtanömi rurayänëki. 21 Puntata cosechayanqëkita saqtullata aqëkurmi Teyta Jehoväpaq apayänëki. Tsëtaqa qamkuna y tsëpita yureq tsurikikunapis rurayänëkim.

22 Tsënö kaptimpis, Moisesta Teyta Jehovä mandanqankunata pantarnin llapëki mana cäsukurqa, 23 awmi, Moisesta Teyta Jehovä parlapanqan tiempupita, qamkunapaq y tsurikikunapaq Teyta Jehovä llapan mandakunqanta mana cäsukurqa, 24 y llapëki israelïtakuna mana cuenta qokurnin mana cäsukushqa karqa, llapëkim ushakanqanyaq rupatsina qarëpaq mallwa töruta apayänëki. Y tsë töruwan juntum, gränupita rurashqa qarëta y vïnu qarëta apayänëki. Y jutsëkikunapita* perdonashqa kayänëkipaqmi mallwa chïvuta* apayänëki.+ Tsë llapantaqa Teyta Diosnintsik mandakunqannömi rurayänëki.+ Tsë qarëkuna ninawan rupanqanqa, Teyta Jehoväta alläpam gustanqa. 25 Pantayanqëkipita Teyta Jehoväpa rikëninman apayanqëki rupatsina qarëta, y jutsëkikunapita* perdonashqa kayänëkipaq apayanqëki qarëta Teyta Jehoväpaq sacerdöti rupatsiptinmi, llapëki perdonashqa kayanki.+ 26 Llapëki pantayanqëkipitam, qamkuna y qamkunawan kawaq forastërukunapis perdonashqa kayanki.

27 Mëqëkipis pantarnin jutsata* rurarqa, jutsëkikunapita perdonashqa kayänëkipaqmi juk watayoq cabrata Teyta Diospaq apayänëki.+ 28 Y pantarnin Teyta Jehoväpa rikënimpaq jutsata* rurayanqëkipita apayanqëki qarëta sacerdöti rupatsiptinmi, perdonashqa kayanki.+ 29 Qamkuna o qamkunawan kawaq forastërukuna imachöpis pantarqa, Teyta Diosnintsik mandakunqannömi rurayänëki.+

30 Pï nunapis o qamkunawan kawaq forastërukuna, mana alli këkanqanta musyëkar imatapis rurayaptinqa,+ Teyta Jehoväta mana respetayanqampitam wanutsiyänëki. 31 Teyta Jehovä ninqankunata mana kaqpaq churashqa karnin, y mandakunqankunata mana cäsukushqa karmi, tsë nunaqa wanunan o wañunan.+ Y wanunqampitaqa kikinmi culpayoq kanqa’”.+

32 Tsunyaq sitiuchö këkarmi, israelïtakunaqa juk nuna säbadu junaqchö yantakuykaqta tariyarqan.+ 33 Y tareqkunam, Moisespa, Aaronpa y israelïtakunapa puntanman tsë nunata apayarqan. 34 Y pëwan imata rurayänampaq kaqta mana musyarmi prësu katsiyarqan.+

35 Tsënam Teyta Jehoväqa Moisesta nirqan: “Carpëkikunapita* karuchömi tsë nunataqa llapëki rumiwan wanutsiyänëki”.+ 36 Tsënam israelïtakunaqa carpankunapita* karuchö rumiwan wanutsiyarqan. Tsëtaqa Moisesta Teyta Jehovä ninqannöllam rurayarqan.

37 Teyta Jehoväqa Moisesta kënöpis nirqanmi: 38 “Israelïtakunatam këta ninëki: ‘Qamkuna y tsëpita yureq tsurikikunapis röpëkikuna kuchunchömi shalshan rurayänëki, y tsëpa jananmannam azul hïluta churayänëki.+ 39 Röpëkikuna kuchunchö shalshanta rikäyanqëkim, Teyta Jehovä llapan mandakunqanta cäsukuyänëkipaq yarpätsiyäshunki.+ Manam shonquykikuna munapanqanta rurayänëkitsu ni nawikikuna rikanqanta munapäyänëkitsu. Tsëta rurarqa jukwan jukwan kakoq* cuentam Teyta Diosnintsikta traicionëkäyanki.+ 40 Tsë shalsham yarpätsiyäshunki Teyta Diosnintsik llapan mandakunqanta cäsukuyänëkipaq, y pëpa rikëninchö limpiu kayänëkipaq.+ 41 Noqam Jehovä Diosnikikuna kä. Diosnikikuna kanäpaqmi Egiptuchö esclävu kayanqëkipita pushamurqö.*+ Noqam Jehovä Diosnikikuna kä’”.+

16 Tsëpitanam Corë,+ Datan, Abiram y On, Moisespa contran churakäyarqan. Corëqa Levïpa+ kastanmi karqan. Levïpa tsurinqa Cohatmi,+ y Cohatpa tsurinnam Izhar,+ y Izharpa tsurinmi Corëqa karqan. Datan, Abiram y Onqa Rubenpa+ kastanmi kayarqan. Datan y Abiramqa Eliabpa+ tsurinkunam kayarqan, y Onnam Pëlezpa tsurin karqan. 2 Pëkunam doscientus cincuenta israelïtakunata dirigeqkunawan Moisespa contran churakäyarqan. Tsë dirigeqkunaqa israelïtakunatam consejayaq y reqishqa nunakunam kayarqan. 3 Aarontawan Moisestam niyarqan:+ “¡Qamkunaqa alläpanam kayanki! Teyta Jehoväpa rikëninchöqa llapantsikmi limpiu kantsik,+ y pëqa llapantsikwanmi këkan.+ Tsëqa, ¿imanirtaq Teyta Jehoväpa wakin sirweqninkunapita mas allish tukuyanki?”.

4 Tsënö niyanqanta wiyarmi Moisesqa urkumpis patsaman chanqanyaq qonqurikuykur, 5 Corëta y pëman qaqaqkunata kënö nirqan: “Warë tempränum Teyta Jehovä rikätsimäshun pikuna pëpa kayanqanta,+ rikënimpaq limpiu kayanqanta y pikunalla pëman witita puëdiyanqanta.+ Y Teyta Diosnintsik akranqan kaqllam+ pëmanqa witinqa. 6 Tsëmi këta rurayänëki: Corë y pëman qaqaqkuna,+ carbonta puritsinaman+ 7 carbonta winayë, y Teyta Jehoväpa rikëninchö inciensuta winayë. Tsëta rurayaptikim Teyta Jehovä akranqan nuna+ rikënimpaq limpiu kanqa. ¡Qamkunaqa alläpa mana allitam rurayarqunki Levïpa kastankuna!”.+

8 Tsëpitanam Moisesqa Corëta kënö nirqan: “Wiyayämë Levïpa kastankuna. 9 Qamkunataqa Teyta Jehovämi akrayäshurqunki Diospa carpa* wayinchö sirwiyänëkipaq,+ y israelïta mayintsikkunata yanapayänëkipaq.+ ¿Manaku tsënö yanapakurnin kushikuyankiman? 10 ¿Sacerdöti këtaraqku munayanki? ¿Manaku agradecikuyankiman qam y wawqikikuna Diospa carpa* wayinchö sirwiyanqëkipita?+ 11 Qam y qamman qaqämoqkunaqa Teyta Jehoväpa contranmi këkäyanki. Y Aaronpaqqa, ¿ima mana allita rurashqa kaptintaq quejakuyanki?”.+

12 Tsëpitanam Moisesqa Eliabpa tsurinkuna Datanta y Abiramta+ qayatsirqan, peru pëkunaqa kënömi niyarqan: “¡Manam ëwayäshaqtsu! 13 Lichipis, mielpis mëtsika kanqan markapita kë tsunyaq sitiuman wanur ushakäyänäpaq pushëkäyämarnïpis,+ ¿kananqa mandamaqnïkuna këtanaku munëkanki? 14 Kananyaqpis manam lichipis, mielpis mëtsika kanqan+ markakunaman chätsiyämankiraqtsu, ni murukuyänäpaq chakrakunata ni üvas chakrakunata rikätsiyämankiraqtsu. ¿Wisku o qapra cuenta qatiyänaqtaku munanki? ¡Manam shayämushaqtsu!”.

15 Tsë nunakunawan alläpa cölerarmi Moisesqa Teyta Jehoväta nirqan: “Ama gränupita rurashqa qarëninkunata chaskitsu. Noqaqa manam ashnunkunata duëñutukurqötsu, y manam mëqantapis imanarqötsu”.+

16 Tsëpitanam Moisesqa Corëta nirqan: “Qam, qamman qaqämoqkuna y Aaronpis Teyta Jehoväpa rikëninman warë shayämuy. 17 Y carbon puritsinaman inciensuta winarkur Teyta Jehoväpa rikëninman apayë. Llapëkikunaqa doscientus cincuenta carbon puritsikunatam apayämunëki. Y qamwan Aaronpis tsënöllam carbon puritsikunata apayämunëki”. 18 Tsënam llapankuna carbon puritsikunaman carbonta winayarqan, y tsëpa jananmannam inciensuta winayarqan. Y Moiseswan y Aaronwan juntum juntakäyänan carpapa* yëkunanchö shëkar* quedakuyarqan. 19 Corë y pëman qaqaqkuna juntakäyänan carpachö* këkäyaptinmi,+ llapankuna rikëkäyaptin pukutë rurinchö chipapäkur-raq Teyta Jehovä urämurqan.+

20 Tsëpitanam Teyta Jehoväqa Moisestawan Aaronta nirqan: 21 “Jinan höra ushakäratsinäpaq tsë nunakunapita witikuriyë”.+ 22 Tsënam pëkunaqa urkunkunapis patsaman chanqanyaq qonqurïkur kënö niyarqan: “Dios Yaya, qammi llapäkunatapis kawëkaqta katsiyämanki.+ Juk nunalla jutsata* rurëkaptinqa, ama llapäkunawan cölerakuytsu”.+

23 Tsënam Teyta Jehoväqa Moisesta nirqan: 24 “‘¡Corëpa, Datanpa y Abirampa+ carpankunapita* witikuyänampaq!’ Israelïtakunata nï”.

25 Tsënam Moiseswan israelïtakunata dirigeqkunaqa,+ Datan y Abiram këkäyanqanman ëwayarqan. 26 Moisesqa israelïtakunatam nirqan: “Kë mana alli nunakunapita witikuyë y ama imankunatapis yatayëtsu. Tsënöpa pëkuna jutsata* rurayanqampita mana wanuyänëkipaq”. 27 Tsëmi israelïtakunaqa Corëpa, Datanpa y Abirampa carpankunapita* witikuyarqan. Peru Datanwan Abiramqa, warminkunawan, tsurinkunawan y llullu wamrankunawanmi quedakuyarqan.

28 Tsëpitanam Moisesqa kënö nirqan: “Kanan pasakunqanwanmi musyayanki Teyta Jehovä mandamaptin kë llapankunata ruranqäta, y mana kikïllapita ruranqäta. 29 Wakin nunakunanölla kë nunakuna wanuyaptinqa o wañuyaptinqa, y wakin nunakunanölla castïguta chaskiyaptinqa, manam Teyta Jehovätsu kë llapanta ruranäpaq mandamashqa.+ 30 Peru Teyta Jehovä patsata äyakäratsir llapan nunakunata ushakäratsiptinqa, kë nunakuna Teyta Jehoväta mana respetashqa kayanqantam musyayanki”.

31 Moises parlar ushariptinllam, patsa kichakar+ 32 Corëta, kastankunata, pëman qaqaqkunata+ y llapan imëkankunata ushakäratsirqan. 33 Pëkuna y llapan kapuyanqankunam kicharëkaq patsaman jeqarkuyarqan, y patsa wichqakäriptinmi llapankuna ushakäriyarqan.+ 34 Y patsa kichakaptin qayëkachäyaptinmi israelïtakunaqa wakpa këpa kënö nir ëwakuyarqan: “¡Noqantsikpis pëkunanöchi ushakärishun!”. 35 Y inciensuta rupëkätseq doscientus cincuenta nunakunatam+ Teyta Jehoväqa ninawan ushakäratsirqan.+

36 Tsëpitanam Teyta Jehoväqa Moisesta kënö nirqan: 37 “Sacerdöti Aaronpa tsurin Eleazarta mandë carbon puritsikunata ninapita jipinampaq,+ tsë carbon puritsikunaqa sagrädum. Y carbonkunata karuman jitanampaq mandë. 38 Jutsata* rurayanqampita wanoq o wañoq nunakuna noqa Jehoväpa rikënïman carbon puritsikunata apayämushqa kayaptinmi, tsë carbon puritsikunaqa rikënïpaq sagräduna. Tsëmi tsë carbon puritsikunata llapshayäratsirnin israelïtakuna mana qonqayänampaq+ altar jananman laqayänëki”.+ 39 Tsëmi sacerdöti Eleazarqa, ninawan rupar wanoq o wañoq nunakuna katsiyanqan cobripita carbon puritsikunata martilluwan llapshayäratsir altarman laqarqan. 40 Tsëtaqa Moisesta Teyta Jehovä mandanqannömi rurarqan. Tsëmi israelïtakunata yarpätsirqan Aaronpa kastampita mana karqa, Teyta Jehoväpa rikëninchö inciensuta mana rupatsiyänampaq,+ y Corënö y pëman qaqaqkunanö mana kayänampaq.+

41 Waränin junaqllam israelïtakunaqa yapë Moisespa y Aaronpa contran parlar kënö niyarqan:+ “Qamkunam Teyta Jehoväpa sirweqninkunata wanutsiyarqunki”. 42 Moisespa y Aaronpa contran juntarëkarmi, israelïtakunaqa juntakäyänan carpa* jananchö pukutëta rikäriyarqan. Y Teyta Jehoväpa podernin pukutëchö chipapëkaqtam rikäyarqan.+

43 Juntakäyänan carpaman* Moiseswan Aaron witiriyaptinmi,+ 44 Teyta Jehoväqa Moisesta kënö nirqan: 45 “Israelïtakunata juklla ushakäratsinäpaq pëkunapita witikuriyë”.+ Tsënam pëkunaqa mantsakarnin qonqurikuyarqan.+ 46 Y Moisesmi Aaronta nirqan: “Teyta Diosqa israelïta mayintsikkunata ushakätsinampaqmi këkan, tsëmi jutsata* rurayanqampita perdonashqa kayänampaq,+ carbon puritsinaman altarchö këkaq carbonta winë+ y tsë jananman inciensuta winarkur pëkuna këkäyanqanman cörripa ëwë. ¡Teyta Jehoväqa israelïta mayintsikkunatam wanutsir qallëkushqa!”. 47 Tsënam Aaronqa Moises ninqannölla carbon puritsikunata aparkur israelïta kaqkunaman cörripa ëwarqan. Chänampaqqa Teyta Diosqa israelïtakunata wanutsirnam qallashqa kanaq. Y tsëchömi Aaronqa israelïtakuna jutsankunapita* perdonashqa kayänampaq carbonta puritsinanman inciensuta winarqan. 48 Wanushqakuna y kawëkaqkuna këkanqanman chäriptinmi nunakunaqa wanuyarqannatsu. 49 Tsë junaqchöqa catorci mil setecientus nunakunam wanuyarqan o wañuyarqan. Corëwan wanoq nunakunaqa manam tsëchö yupashqatsu kayarqan. 50 Moises këkanqan juntakayänan carpapa* yëkunanman Aaron kutiriptinqa, manam nunakuna wanuyarqannatsu.

17 Tsënam Teyta Jehoväqa Moisesta kënö nirqan: 2 “Kastankunata dirigeqkuna juk tukruta apayämunampaq israelïtakunata nï,+ y llapanqa döcim kanan. Tsë tukrunkunamanmi kastankunata dirigeqkunapa jutinkunata qellqanëki. 3 Kastankunata dirigeqkunaqa juk tukrutam apayämushqa, tsëmi Levïpa kastankuna apamunqan tukruchö Aaronpa jutinta qellqanëki. 4 Y imëpis qamkunawan parlanqä+ Sagrädu Cäjapa puntanman,+ tsë apayämunqan tukrukunata churë. 5 Akranqä nunapa tukrun+ tseqlliramuptinmi, israelïtakunaqa noqapita ni qamkunapita+ quejakuyanqanatsu”.+

6 Tsënömi Moisesqa israelïtakunawan parlarqan, y Israel kastakunata dirigeqkunam döci tukrukunata apayarqan. Pëkunapawan juntum Aaronpa tukrumpis këkarqan. 7 Moisesqa Teyta Jehoväpa puntanchömi, Sagrädu Cäja këkanqanman tukrukunata churarqan.

8 Waränin junaq Sagrädu Cäja këkanqanman Moises yëkuskirqa, Aaronpa tukruntam tseqllishqata, wëtëkaqta y poqushqa almendrakunayoqta rikarqan. 9 Tsëmi Moisesqa, llapan israelïtakuna rikäyänampaq Teyta Jehoväpa rikënimpita tukrukunata jipimurqan. Tsënam dirigeqkunaqa tukrunkunata aptarkur rikapäyarqan.

10 Tsëpitanam Teyta Jehoväqa Moisesta nirqan: “Mana cäsukoqkuna+ noqapita y qampita mana quejakuyänampaq y mana wanuyänampaq,+ Sagrädu Cäja këkanqanman Aaronpa tukrunta yapë churë”.+ 11 Y Moisesqa Teyta Jehovä ninqannöllam llapanta rurarqan.

12 Tsënam israelïtakunaqa Moisesta niyarqan: “¡Kananqa wanushunchi o wañushunchi! ¡Kananqa llapantsikchi ushakäshun! 13 ¡Teyta Jehoväpa Sagrädu Cäjanman witirqa wanushunmi!”.+

18 Tsëpitanam Teyta Jehoväqa Aaronta kënö nirqan: “Carpa* wayichö mana allita rurayaptinqa+ qam, tsurikikuna y kastëkichö dirigeqkunam culpayoq kayanki. Tsënöllam sacerdöti këkäyaptiki ima mana allitapis rurayaptinqa qam y tsurikikuna culpayoq kayanki.+ 2 Carpa* wayichö+ qamta y tsurikikunata yanapayäshunëkipaq, Levï kastëkikunata qayatsi.+ 3 Pëkunaqa qamtam yanapayäshunki y juntakäyanqëki carpachömi* yanapakuyanqa.+ Tsënö kaptimpis, sagrädu sitiuchö cösaskunaman ni altarmampis manam witiyänantsu ni yatayänantsu, tsënöpa mana wanuyänampaq o wañuyänampaq.+ 4 Pëkunam yanapayäshunki juntakäyanqëki carpachö* y llapan rurayänampaq kaqtam cumpliyänan. Levïpa kastankunapita mana karqa, manam pï nunapis yanapakunantsu.+ 5 Israelïtakunata mana wanutsinäpaqmi,+ qamkunaqa sagrädu sitiuchö+ y altarchö+ rurënikikunata cumpliyänëki. 6 Israelïta mayikikunapitam Levïpa kastankunata yanapayäshunëkipaq akrarqö.+ Pëkunataqa, carpa* wayichö yanapayäshunëkipaqmi noqa Jehovä churamurqö.+ 7 Altarchö y Alläpa Sagrädu Cuartuchöqa+ qam y tsurikikunallam sirwiyänëki.+ Sacerdöti kayänëkipaqmi akrarqö.* Mana sacerdöti këkar witimoqqa wanunqam”.+

8 Teyta Jehoväqa kënöpis Aaronta nirqanmi: “Israelïtakuna noqapaq apayämunqan qarëkunata chaskinëkipaqmi qamta churarqoq.+ Tsë qarëkunapitam wakinta qampaq y tsurikikunapaq rakinëki, y tsënömi imëpis ruranëki.+ 9 Israelïtakuna apayämunqan rupatsina gränupita rurashqa qarë,+ jutsankunapita* perdonashqa kayänampaq qarë+ y culpayoq kayanqëkipita qarëqa+ sagrädum, tsë qarëkunam qampaq y ollqu tsurikikunapaq kanqa. 10 Tsë qarëkuna qampaq sagrädu kaptinmi,+ Levïpa kastankunapita ollqukunalla sagrädu sitiuchö mikuyänëki.+ 11 Teyta Diospaq rakiyanqan qarëkuna,+ y puntaman y qepaman kuyutsishqa qarëkunapis qampaqmi.+ Tsëtaqa qam y Teyta Diospa rikëninchö limpiu kaq+ ollqu y warmi tsurikikunapis mikuyta puëdiyankim.+

12 Noqa Jehoväpaq apayämunqan punta yarqoq+ aceiti, vïnu y gränukunaqa qampaqmi kanqa.+ 13 Israelïtakuna murukuyanqan punta wayunqanta noqa Jehoväpaq apayämunqanqa qampaqmi kanqa.+ Rikënïpaq limpiu kaq tsurikikunallam mikuyta puëdiyanqa.

14 Noqapaq apayämunqanqa qampaqmi kanqa.+

15 Israelïtakunapa punta yureq+ tsurinkuna y animalninkunaqa noqa Jehoväpam kayan. Peru punta tsurinkunapa y rikënïpaq mana limpiu animalkunapa+ rantinqa pagakuyänanmi,+ y tsë pagakuyanqanqa qampaqmi kanqa. 16 Y juk killayoq o masyoqna kaptinqa cincuenta siëti grämus pläta* qellëtam pagakuyänan,+ y tsë qellëtaqa sagrädu sitiuchö këkaq pësakunata churëkurmi pesayänëki. Tsëqa cincuenta siëti grämus pläta qellëmi kanan.* 17 Tsënö kaptimpis wäkakunapa, üshakunapa y cabrakunapa punta wawankunapitaqa manam pagakuyänantsu.+ Tsëkunaqa noqapaqmi kayan. Tsë animalkunapa yawarnintaqa altarmanmi pillchitsinëki*+ wirantanam rupatsinëki, y ninawan rupanqanqa, noqa Jehoväta alläpam gustamanqa.+ 18 Y ëtsanqa qampaqmi kanqa. Tsënöllam puntaman y qepaman kuyutsiyanqan pishtayanqëki animalkunapa pëchun y derëcha kaq chankampis qampaq kanqa.+ 19 Noqa Jehoväpaq apayämunqan llapan sagrädu qarëkunaqa+ qampaq, ollqu y warmi tsurikikunapaqmi imëpis kanqa.+ Kë parlanqantsiktaqa, noqa Jehovä, qam y tsurikikunam qonqanantsiktsu”.*

20 Teyta Jehoväqa kënöpis Aaronta nirqanmi: “Israelïtakuna noqapaq apayämunqampita wakin qarë qamkunapaq kaptinmi,+ qamkunaqa chakrata chaskiyankitsu.+

21 Juntakäyanqëki carpachö* Levïpa kastankuna yanapakuyaptikim, israelïtakuna apayämunqan cada chunka qarëkunapita juk qamkunapaq kanqa.+ 22 Juntakäyanqëki carpaman* mëqan israelïtapis witimurqa, jutsatam* rurëkan y wanunqam. 23 Juntakäyanqëki carpachö* rurëkunataqa Levïpa kastankunam rurayänëki, y israelïta mayikikuna tsëchö ima mana allitapis rurayaptinqa, qamkunam culpayoq kayanki.+ Levïpa kastankuna chakrata mana chaskiyänampaq mandakunqätaqa, qamkuna y tsëpita yureq tsurikikunapis cumpliyänëkim.+ 24 Tsënöqa kanqa, israelïtakuna noqa Jehoväpaq apayämunqan cada chunka qarëkunapita juk qarë Levïpa kastankunapaq kaptinmi, kënö mandakurqö: ‘Pëkunaqa manam chakrata chaskiyanqatsu’”.+

25 Tsëpitanam Teyta Jehoväqa Moisesta kënö nirqan: 26 “Levïpa kastankunatam ninëki: ‘Israelïta mayintsikkuna apayämunqan qarëkunata chaskiyanqëkipitam, qamkunapis cada chunka qarëkunapita juk qarëta Teyta Jehoväpaq apayänëki.+ 27 Tsë apayanqëki qarëkunaqa gränu mikuy,+ vïnu y aceiti qarënömi kanan. 28 Israelïta mayintsikkuna apayämunqan qarëkunata chaskiyanqëkipitam, qamkunapis cada chunka qarëkunapita juk qarëta Teyta Jehoväpaq apayämunëki. Y tsë qarëkunapitam, Teyta Jehoväpa kaqta sacerdöti Aaronman apayänëki. 29 Chaskiyanqëki qarëkunapitaqa mas allin kaqtam apayämunëki,+ y tsë qarëqa Teyta Jehoväpaq sagrädum kanqa’.

30 Levïpa kastankunataqa kënöpis ninëkim: ‘Chaskiyanqëki qarëkunapita mas alli kaqtaqa Teyta Diospaqmi apayänëki, y quedaq kaqnam qamkunapaq kanqa. Tsë qarëkunaqa gränu mikuy, vïnu y aceiti qarënömi kanan. 31 Y juntakäyanqëki carpachö* yanapakuyaptikim, tsë quedaq qarëkunaqa qamkunapaq y kastëkikunapaq kanqa, mëchöpis mikuyta puëdiyankim.+ 32 Mas allin kaqta Teyta Diospaq aparqa manam jutsata* rurayankitsu. Y israelïtakuna apayämunqan sagrädu qarëkunawan munayanqëkita rurarqa wanuyankim’”.+

19 Tsëpitanam Teyta Jehoväqa Moisesta y Aaronta kënö nirqan: 2 “Noqa Jehovämi këta mandakü: ‘Israelïtakunatam ninëki manaraq yügushqa, sänu puka wäkata apayämunampaq.+ 3 Sacerdöti Eleazarman apayätsun, y tsë wäkata israelïtakuna këkäyanqampita Eleazar jipiriptinmi, pë rikëkaptin pishtayänan. 4 Tsëpitanam sacerdöti Eleazarqa tsë wäkapa yawarninmam dëdunta tullpurkur, juntakäyanqëki carpapa* yëkunanman qanchis kuti pillchitsinan.*+ 5 Y tsë wäkapa qaranta, ëtsanta y yawarnintaqa panzantawanmi rupatsiyänan.+ 6 Tsë wäka rupëkanqan jananmanmi sacerdötiqa cedru qeruta, tsaqtsukuna plantata*+ y puka hïluta jitanan. 7 Röpanta taqshar y bañakur-ran sacerdötiqa campamentuman kutimunan, peru tardiyanqanyaqmi rikënïpaq limpiutsu kanqa.

8 Tsënöllam wäkata rupatseqpis röpanta taqshanan y bañakunan, peru tardiyanqanyaqmi rikënïpaq limpiutsu kanqa.

9 Teyta Diospa rikënimpaq limpiu nunam, tsë rupatsiyanqan wäkapa uchpanta campamentupita jipinqa+ y juk limpiu sitiuman churanqa. Israelïtakunanam limpiu kayänampaq yakuta alistarnin, tsë uchpawan takuyänan.+ Tsëqa jutsëkikunapita* perdonashqa kayänëkipaq qarëmi. 10 Tsënöllam wäkapa uchpanta juntaqpis röpanta taqshanan y bañakunan, peru tardiyanqanyaqmi rikënïpaq limpiutsu kanqa.

Kë mandakunqätaqa israelïtakuna y pëkunawan kawaq forastërukunapis rurayänanmi.+ 11 Ayata yataq nunaqa qanchis junaqpam rikënïpaq limpiutsu kanqa.+ 12 Pëqa kima junaq pasariptin limpiuyätsikoq yakuwan laqchipuyaptinran, qanchis junaqchö rikënïpaq limpiu kanqa. Tsënö kaptimpis, kima junaq pasariptin tsëta mana rurarqa manam qanchis junaq rikënïpaq limpiutsu kanqa. 13 Pï nunapis ayata yatashqa këkar, limpiuyätsikoq yakuwan laqchipuyänampaq mana ëwarqa, noqa Jehoväpa carpa* wayïtam mana limpiuta tikratsishqa,+ tsëmi tsë nunaqa wanunan o wañunan.+ Limpiuyätsikoq yakuwan mana laqchipuyashqa kaptinmi, rikënïpaq limpiutsu.+

14 Kë mandakunqätam cumpliyänëki pï nunapis carpanchö* wanuptin o wañuptin. Tsë nunapa carpanchö këkaqkuna y tsëman yëkoqkunaqa qanchis junaqpam rikënïpaq limpiutsu kayanqa. 15 Y mana täpayoq mankakunapis manam rikënïpaq limpiutsu kanqa.+ 16 Pampakunachö purikaptin espädawan wanutsiyanqan nunata, juk ayata, nunapa tullunta y aya pamparanqanta pï nunapis yatarqa, qanchis junaqpam rikënïpaq limpiutsu kanqa.+ 17 Rikënïpaq mana limpiu këkaq nunapaqmi, jutsampita* perdonashqa kanampaq rupatsiyanqëki wäkapa uchpanta juk mankaman winayänëki y tsë jananmannam ëwaq yakuta jichayänëki. 18 Tsëpitanam rikënïchö limpiu këkaq nuna+ tsaqtsukuna plantata+ tsë yakuman tullpurkur, carpachö* këkaq nunakunaman y mankakunaman tsaqtsunan. Tsënöllam ruranan wanushqa nunata, juk ayata, nunapa tullunta y aya pamparanqanta yataq nunawampis. 19 Tsë limpiu nunaqa, kima junaq pasariptin y qanchis junaq pasariptinmi,+ Teyta Diospa rikëninchö mana limpiu këkaq nuna jananman tsaqtsunan. Y mana limpiu nunaqa röpantam taqshanan y bañakunanmi, y tardiparan limpiu kanqa.

20 Limpiuyätsikoq yakuwan mana tsaqtsukushqa karmi, noqa Jehoväpa sagrädu carpäta mana limpiu tikratsishqa, tsëmi tsë nunaqa wanunan o wañunan.+

21 Kë mandakunqätaqa cumpliyänëkim: Limpiuyätsikoq yakuwan pitapis tsaqtsoq,+ y tsë yakuta yataq nunaqa, röpantam taqshanan y tardiyanqanyaqmi rikënïpaq limpiutsu kanqa. 22 Rikënïpaq mana limpiu nuna imëkatapis yatanqanqa manam limpiunatsu, y tsë yatanqanta yataq nunapis tardiyanqanyaqmi rikënïpaq limpiutsu kanqa’”.+

20 Wata qallanan killam, israelïtakunaqa Cades markachö quedakuyarqan.+ Cades markaqa Zin niyanqan tsunyaq sitiuchömi këkan. Tsëchömi Miriam wanurqan, y tsëmanmi pampëkuyarqan.+

2 Tsë markachö yaku mana kaptinmi,+ israelïtakunaqa Moisespaq y Aaronpaq mana allita parlar qallëkuyarqan. 3 Moisestam kënö niyarqan:+ “¡Israelïta mayintsikkunata Teyta Jehovä ushakätsinqan höra noqakunapis wanuyäman o wañuyäman karqan! 4 Teyta Jehovä kuyanqan nunakuna këkäyaptïqa, ¿imapaqtaq mana imapis kaq sitiuman pushayämarqunki? ¿Animalnïkuna y noqakunapis wanuyänäpaqku?+ 5 ¿Imapaqtaq Egiptupita kë tsunyaq sitiuman pushayämarqunki?+ Këchöqa manataq murukuyänäpaq chakra, ni mikuyänäpaq hïgus, ni üvas, ni granäda, ni yaku kantsu”.+ 6 Tsënam Moiseswan Aaronqa israelïtakuna këkäyanqampita ëwakur, juntakäyanqan carpapa* yëkunanchö urkunkunapis patsaman chanqanyaq qonqurikuyarqan. Tsë höram Teyta Jehoväpa podernin pëkunapa puntanchö chipapar-raq yurirkurqan.+

7 Tsënam Teyta Jehoväqa Moisesta nirqan: 8 “Tukruykita aptë y wawqiki Aaronwan juntu israelïtakunata mandayë juntakäyänampaq, y pëkuna rikëkäyaptin qaqata parlapë yaku yarqamunampaq. Tsë yakutam israelïtakuna y animalninkuna upuyanqa”.+

9 Moisesqa Teyta Jehovä mandanqannöllam tukrunta aptarkurqan.+ 10 Tsënam Moiseswan Aaronqa israelïtakuna juntakäyänampaq niyarqan, y juntakäriyaptinnam Moisesqa nirqan: “¡Mana wiyakoqkuna, kë qaqapitam qamkunapaq yakuta yarqatsiyämushaq!”.+ 11 Tsënö nïkur tukrunwan qaqata ishkë kuti Moises takëkuptinmi, yaku yarqamur qallëkurqan. Tsënam israelïtakuna y animalninkuna upur qallëkuyarqan.+

12 Tsëpitanam Teyta Jehoväqa Moisestawan Aaronta nirqan: “Noqaman mana markäkamushqa o yärakamushqa kayaptiki y puëdeq kanqäta israelïtakunata mana rikätsishqa kayaptikim, israelïta mayikikunata änikunqä markaman pushayankinatsu”.+ 13 Yaku yarqamunqan Meribä* sitiuchömi,+ israelïtakunaqa Teyta Jehoväpaq mana allita parlayarqan. Tsëchömi Teyta Dios puëdeq kanqanta rikäyarqan.

14 Tsëpitanam Moisesqa Cades markapita Edom markachö gobernaqman+ willakoqkunata kënö niyänampaq mandarqan: “Kastëkikunam kayä,+ y qamqa musyankim ima mana allikunapa pasayanqäta. 15 Awiluntsikkuna Egiptuta ëwakushqa kayaptinmi,+ atska watakunapa tsëchö kawayarqö.+ Y unë kastantsikkunata y noqakunatapis tsëchöqa alläpam sufritsiyämashqa.+ 16 Tsëmi Teyta Jehoväta yanapëkayämänampaq rogakuyarqä,+ y pëqa angelninwanmi Egiptupita pushayämashqa.+ Kananqa markëkipa lädunchö këkaq Cades markachömi këkäyä. 17 Nänikillapa pasakurilläyäshaq. Manam chakrëkikuna janampa, ni üvas chakrëkikunapa pasayäshaqtsu, ni yakuykikunatapis manam upuyäshaqtsu. Nänikillapam* pasakulläyäshaq, manam wakman ni këmampis yaqayäshaqtsu”.+

18 Edomchö gobernaqnam nirqan: “Manam markäpaqa pasayankitsu. Tsëta rurayaptikiqa soldädukunawanmi shamushaq”. 19 Tsënam Moises mandanqan nunakunaqa niyarqan: “Jatun nänikillapam pasakuyäshaq,+ noqakuna y animalnïkuna yakuykita upurqa pagayashqëkim”.+ 20 Peru Edomchö gobernaqqa kënömi nirqan: “¡Manam markäpaqa pasayankitsu!”.+ Tsëmi Edom markachö gobernaqqa, soldädunkunata pusharkur israelïtakunawan pelyaq ëwarqan. 21 Y manam markampa pasayänanta dejarqantsu. Tsëmi israelïtakunaqa juk nänipa ëwakuyarqan.+

22 Cades markapitam, israelïtakunaqa Hor jirkaman chäriyarqan.+ 23 Edom markapa lindërunchö këkäyaptinran, Jehovä Diosqa Moisesta y Aaronta kënö nirqan: 24 “Aaronqa wanukunqanam o wañukunqanam.+ Yaku yarqamunqan Meribächö mana cäsuyämashqa kayaptikim, israelïtakunata äninqä markaman Aaronqa yëkunqanatsu.+ 25 Aaronwan y tsurin Eleazarwan Hor jirkaman witsäyë. 26 Tsëchömi Aaronpa röpanta,+ tsurin Eleazarta vistitsinëki.+ Y tsë jirkachömi Aaron wanunqa”.

27 Moisesqa Teyta Jehovä mandanqannöllam rurarqan. Y israelïtakuna rikëkäyaptinmi, Hor jirkaman witsäyarqan. 28 Chëkurnam Moisesqa Aaronpa röpanta Eleazarta vistitsirqan. Tsëchö Aaron wanuriptinmi,+ Moiseswan Eleazarllana jirkapita kutiyämurqan. 29 Aaron wanushqa kanqanta musyëkurmi israelïtakunaqa treinta junaqpa waqayarqan.+

21 Atarim nänipa israelïtakuna pasëkäyanqanta musyëkurmi,+ Arad markachö gobernaqqa pëkunawan pelyaq ëwar esclävu kayänampaq wakinta apakurqan. Pëqa Nëgueb markachömi kawarqan. 2 Tsënam israelïtakunaqa Teyta Jehoväta niyarqan: “Kë nunakunata ushakätsiyänäpaq yanapayämaptikiqa, llapan markankunatawanmi ushakätsiyäshaq”. 3 Tsëmi Teyta Jehoväqa pëkunata y markankunata ushakätsiyänampaq israelïtakunata yanaparqan. Tsëmi tsë sitiutaqa, Hormä nir reqiyarqan.+

4 Hor jirkapitam+ israelïtakunaqa Puka lamar nänipa y Edom markapa+ kuchumpa ëwayarqan. Tsëpa ëwëkarmi israelïtakunaqa ëwëta puëdiyarqannatsu.* 5 Tsëmi Teyta Diospaq y Moisespaq mana allita parlar+ niyarqan: “¿Imapaqtaq kë tsunyaq sitiuchö wanuyänäpaq o wañuyänäpaq Egiptupita pushayämarqunki? Këchöqa manam yakupis ni mikuyänäpaqpis kantsu+ y kë manä mikuytaqa* melanäriyarqönam”.+ 6 Tsëmi Teyta Jehoväqa israelïtakuna këkäyanqanman culebrakunata mandarqan, y tsë culebrakuna kaniptinmi mëtsikaq wanuyarqan o wañuyarqan.+

7 Tsënam israelïtakunaqa Moisesta niyarqan: “Teyta Jehoväpaq y qampaq mana allita parlarmi jutsata* rurayarqö.+ Kë culebrakunapita salvëkayämänampaq Teyta Jehoväman mañakuykullë”. Tsëmi Moisesqa pëkunapaq mañakurqan.+ 8 Teyta Jehoväqa Moisestam nirqan: “Cobripita culebrata rurë, y juk qeruman warkuy. Culebra kaninqan nunakunaqa, tsëta rikarmi wanuyanqanatsu”. 9 Tsë höram Moisesqa cobripita culebrata rurarkur+ juk qeruman warkurqan.+ Culebra pillatapis kaniptinqa, cobripita culebrata rikarmi wanoqnatsu.+

10 Tsëpitam israelïtakunaqa Obot markaman chëkur tsëchö quedakuyarqan.+ 11 Obotpitanam tsunyaq Iyë-Abarim-man ëwayarqan,+ y tsëchömi quedakuyarqan, tsëqa Moab markapa inti o rupay yarqamunan lädupam këkarqan. 12 Iyë-Abarimpitanam Zered pampaman ëwayarqan.+ 13 Zeredpitanam Arnon pampaman+ ëwayarqan, tsëqa Moab markapa y amorreu nunakunapa markankunapa chowpinchömi* karqan. 14 Teyta Jehovä ruranqan guërrapaq willakoq librum, kë sitiukunapaq parlan: “Sufä pampachö këkaq Vaheb sitiupaq, Arnon kinrë pampakunapaq 15 y Ar sitiuyaq chaq pampakunapaqmi. Ar sitiuqa Moab markapa lädunchömi këkaq”.

16 Tsëpitanam Beer pözuman chäriyarqan. Tsë pözupaqmi Teyta Jehoväqa, “yakuta upuyänampaq israelïtakunata qayatsi” nirqan Moisesta.

17 Tsëchömi israelïtakuna kënö cantayarqan:

“¡Yarqamuy yaku! ¡Yaku yarqamuptin cantashun!

18 Dirigeqkunapa tsurinkuna y mandakoqkuna rurayanqan pözu, tukrunkunawan uchkuyanqan pözu”.

Tsëpitanam Matanä sitiuman ëwayarqan, 19 Matanäpitanam Nahalielman, Nahalielpitanam Bamotman+ 20 y Bamotpitanam Moab markachö+ këkaq pampaman chäriyarqan. Tsë pampaqa Pisgä sitiupa+ jana umaninchömi këkarqan, y tsëpitaqa Jesimon tsunyaq sitiupis+ clärum rikakoq.

21 Tsëpitanam israelïtakunaqa, amorreu nunakunata gobernaq Sehonta kënö niyänampaq willakoqkunata mandayarqan:+ 22 “Markëkillapa pasakulläyäshaq. Manam chakrëkikuna janampa, ni üvas chakrëkikunapa pasayäshaqtsu, ni yakuykikunatapis manam upuyäshaqtsu. Nänikillapam* pasakulläyäshaq, manam wakman ni këmampis yaqayäshaqtsu”.+ 23 Peru gobernanti Sehonqa manam markampa pasayänanta munarqantsu. Tsëmi Jähaz sitiuchö israelïtakunawan pelyayänampaq, soldädunkunawan ëwayarqan.+ 24 Israelïtakunaqa ganaskirmi,+ Arnon pampapita+ Jaboc pampayaq+ markankunata duëñutsakuyarqan.+ Jabocqa Jazer markapa+ lädunchömi këkarqan, y Jazerqa Ammon markapa lädunchömi këkarqan.+

25 Tsënömi israelïtakunaqa amorreu nunakunapa+ markankunachö quedakuyarqan, Hesbonchö y llapan markankunachö. 26 Hesbon markachömi amorreu nunakunapa gobernaqnin Sehonqa kawarqan, pëmi Moab nunakunawan pelyaq ëwarqan y Arnon pampakunayaqmi chakrankunata duëñutsakuyarqan. 27 Tsënö pasakunqampitam nunakunaqa burlakurnin kënö niyaq:

“Hesbonman shayämuy.

Tsëchö gobernanti Sehonpaq mana ushakaq markan rurayë.

28 Hesbon markapa gobernantin Sehonmi soldädunkunawan imëka nina rupaqnöraq yarqayämoq.

Pëkunam Moabchö këkaq Ar markata ushakätsiyaq. Y Ar nunakunaqa, Arnon pampakunapa duëñunkunam kayaq.

29 ¡Allaw, Moab marka! ¡Kemos santuta adorëkarpis ushakäyanqam!+

Moab nunakunaqa tsurinkuna forastëru kayänantam dejayashqa, y esclävu kayänampaq warmi tsurinkunata gobernanti Sehon apakunantam dejayashqa.

30 Hesbonpita Dibonyaq, Dibonpita+ Nöfahyaq y Nöfahpita Medebäyaq+ markakunatam ushakätsiyashqa”.

31 Amorreu nunakunata ushakäratsirmi israelïtakunaqa tsë markakunachö quedakuyarqan. 32 Y Moisesqa Jazer markamanmi rikapakoqkunata mandarqan.+ Tsëpitanam israelïtakunaqa, tsë markachö amorreukunata qarquskir markankunata duëñutsakuyarqan. 33 Tsëpitanam israelïtakunaqa Basan nänipa ëwakuyarqan. Y tsëpa ëwëkäyanqanta musyëkurmi, Basan markachö gobernaq Og pëkunawan+ pelyaq Edrëi sitiuman ëwarqan.+ 34 Tsëmi Teyta Jehoväqa Moisesta nirqan: “Ama pëta mantsëtsu,+ Hesbonchö kawaq y amorreukunata gobernaq Sehonta y soldädunkunata ushakätsinëkipaq yanapanqaqnöllam,+ gobernaq Ogta, soldädunkunata y markankunata ushakätsinëkipaq yanapashqëki”.+ 35 Teyta Dios yanapaptinmi Basanchö gobernanti Ogta, tsurinkunata y soldädunkunata ushakätsiyarqan y manam jukllëllapis kawëkar quedarqantsu.+ Tsënömi israelïtakunaqa markankunata duëñutsakuyarqan.+

22 Tsëpitanam israelïtakunaqa Moab pampakunaman chëkur tsëchö quedakuyarqan. Tsë sitiuqa këkarqan Jericöpa frentinchö y Jordan mayupa* lädunchömi.+ 2 Ziporpa tsurin Balacqa+ amorreu nunakunata israelïtakuna ushakätsiyanqantam musyaskirqan. 3 Israelïtakuna mëtsikaq kayanqanta rikarmi, Moab nunakunaqa wanuypa mantsakäyarqan.+ 4 Tsëmi Moab nunakunaqa Madianchö dirigeqkunata niyarqan:+ “Qewata ushareq törunömi, israelïtakunaqa llapan kapamanqantsikta ushakätsiyämunqa”.

Tsë witsanqa, Ziporpa tsurin Balacmi Moabchö gobernëkarqan. 5 Pëqa, Beorpa tsurin Balaam kaqmanmi willakoqkunata mandarqan. Balaamqa yurikunqan Petor markachömi+ këkarqan, y tsë markaqa Eufratis mayu* lädunchömi këkarqan. Tsëchö këkaptinmi Balacqa kënö nir qayatsirqan: “Egiptupitam mëtsikaq nunakuna ëwakayämushqa, y mëtsika markakunatanam ushakätsiyashqa.+ ¡Kananqa markäkunapa frentinchönam këkäyan! 6 Israelïtakuna noqakunapita mas puëdeq kayaptinmi, pëkunata ushakätsiyänäpaq maldicïkunëkita munayä.+ Noqaqa musyämi qam parlanqëkiqa ninqëkinölla cumplikanqanta”.

7 Tsëmi Moabchö y Madianchö dirigeqkunaqa, Balaam yanapaptin pagayänampaq qellëta aparkur ëwayarqan. Pëkunaqa ima pasanampaq kaqta willakur Balaam yanapanantam munayarqan,+ y chëkurmi Balac ninqanta willayarqan. 8 Balaamnam nirqan: “Kanan paqasqa wayïchö quedakuyë, y Teyta Jehovä ima ninqantam willayashqëki”. Tsëmi tsë dirigeqkunaqa Balaampa wayinchö quedakuyarqan.

9 Tsëpitanam Teyta Diosqa Balaamta kënö tapurqan:+ “¿Pikunatan tsë nunakunaqa kayan?”. 10 Balaamnam Teyta Diosta nirqan: “Moab markapa gobernantin Balacmi willakoqkunata kënö niyämänampaq mandamushqa: 11 ‘Egiptupitam mëtsikaq nunakuna ëwakayämushqa, y mëtsika markakunatanam ushakätsiyashqa. Pëkunata ushakätsiyänäpaq maldicïkunëkitam munayä’”.+ 12 Tsënam Teyta Diosqa Balaamta nirqan: “Ama pëkunawan ëwëtsu ni israelïtakunata maldicitsu. Egiptupita yarqamoq israelïtakunataqa noqam yanapëkä”.+

13 Waräriptinnam, Balaamqa tsë nunakunata nirqan: “Kutikuyë, Teyta Jehoväqa manam munantsu markëkikunata ëwanäta”. 14 Tsëmi tsë dirigeqkunaqa markankunaman kutïkur Balacta niyarqan: “Balaamqa manam shamuyta munashqatsu”.

15 Tsënö willariyaptimpis, Balacqa mas atskaq willakoqkunata y mas autoridäyoq dirigeqkunatam Balaam kaqman yapë mandarqan. 16 Balaam këkanqanman chëkurnam, gobernanti Balacmi kënö nishunki niyarqan: “Ama imapis michäshuytsu noqaman shamunëkita. 17 Shamuptikiqa mas reqishqatam tikratsishqëki, y imëkakunatam makikiman churamushaq. Tsëpaqqa, pëkunata ushakätsiyänäpaq maldicïkullë”. 18 Tsënö niyaptinmi, Balaamqa Balac mandanqan nunakunata nirqan: “Wayin junta plätata y öruta Balac qaramaptimpis, Teyta Jehovä mandamanqanllatam rurashaq.+ 19 Tsënö kaptimpis kanan paqas këchö quedakuyë, Teyta Jehoväman mañakaramushaq mä ima mastash nimanqa”.+

20 Tsë paqasmi Teyta Diosqa Balaamta nirqan: “Tsë nunakuna pushayäshunëkipaq shamushqa këkäyaptinqa, pëkunawan ëwë. Peru noqa ninqaqllatam parlanëki”.+ 21 Tsëmi Balaamqa patsa waräriptinlla, china ashnun montarkur Moab markachö dirigeqkunawan ëwarqan.+

22 China ashnun montashqa y ishkë sirweqninkunawan Balaam ëwëkaptinmi, Teyta Jehoväqa Balaamwan cölerarnin Moab markata mana ëwanampaq juk angelninta mandarqan. 23 Teyta Jehoväpa angelnin espädanwan nänichö shëkaqta* rikarmi, Balaampa ashnunqa juk lädupa ëwakuyta munarqan. Tsëmi Balaamqa ashnunta kutitsimuyta munarnin wirurqan. 24 Tsëpitanam, Teyta Jehoväpa angelninqa kichki näniman shäkurirqan.* Tsë näniqa üvas chakrakunachö ishkan lädupa perqashqam karqan. 25 Teyta Jehoväpa angelninta rikëkurmi, ashnuqa perqaman laqakarnin Balaampa chakinta kaniratsirqan. Tsëmi Balaamqa ashnuta yapë wirurqan.

26 Tsëpitanam mas kichki nänimanna Teyta Jehoväpa angelnin shäkuykuptin,* ashnuqa pasëta munarqantsu. 27 Y Teyta Jehoväpa angelninta rikëkurmi Balaampa ashnunqa patsaman lätakuykurqan, tsëmi Balaamqa cölerar ashnunta masraq wirurqan. 28 Tsënam tsë ashnuqa Teyta Jehovä parlatsiptin+ Balaamta nirqan: “¿Imanarqoqtaq kë kiman kuti wirumänëkipaq?”.+ 29 Tsëmi Balaamqa ashnunta nirqan: “Upatanömi cäsumarqunkitsu. ¡Espädäta katsirqa mënam wanuratseqman karqan!”. 30 Tsënam ashnuqa Balaamta nirqan: “¿Manaku noqaqa imëpis shumaq puritserqoq? ¿Imëllapis mana cäsunqaqta rikarqunkiku?”. Balaamnam nirqan: “¡Manam!”. 31 Tsë höram Teyta Jehoväqa espädanwan këkaq angelninta Balaamta rikätsirqan.+ Y Teyta Jehoväpa angelninta rikëkurmi, Balaamqa urkumpis patsaman chanqanyaq qonqurikuykurqan.

32 Tsënam Teyta Jehoväpa angelninqa Balaamta kënö nirqan: “Mana allita ruraq ëwëkanqëkita musyarmi, noqa micharqoq tsë nänipa ëwanëkita.+ ¿Imanirtan kë kiman kuti ashnuykita maqarqunki? 33 Ashnuykiqa rikämashqa karmi noqa këkanqäpa pasëta munashqatsu.+ Tsëta mana rurashqa kaptinqa, mënam wanushqa këkankiman karqan y ashnuykiqa kawëkanmanmi karqan”. 34 Balaamnam Teyta Jehoväpa angelninta nirqan: “Tsëchö qam këkanqëkita mana musyarmi, mana allita rurarqö. Ëwanäta mana munaptikiqa këllapitachi kutikushaq”. 35 Tsëmi Teyta Jehoväpa angelninqa Balaamta nirqan: “Tsë nunakunawan ëwë. Peru ëwarnimpis, noqa ninqaqllata parlanki”. Tsënö niptinmi Balaamqa, Balac mandanqan nunakunawan ëwarqan.

36 Moab markaman Balaam chanqanta musyaskirmi, Balacqa pëwan tinkoq ëwarqan. Moab markaqa Arnon pampapa lädunchömi këkarqan. 37 Balaamwan tinkuskirmi Balacqa nirqan: “¿Imanirtaq qayatsinqaq höra shamurqunkitsu? ¿Mana paganaqpaq kaqtaku pensarqunki?”+ 38 Tsënam Balaamqa nirqan: “Këchöna këkarpis, Teyta Dios nimanqanllatam parlashaq, y manam kikïllapitaqa imatapis nishqëkitsu”.+

39 Tsëpitanam Balacqa Quiryat-Huzot sitiuman Balaamta pusharqan. 40 Tsëchömi Balacqa wäkakunata y üshakunata pishtëkur, tsë animalkunapa wakin ëtsankunata Balaampaq y pëwan këkaq nunakunapaq apatsirqan. 41 Patsa waräriptinnam, israelïtakuna këkäyanqan sitiuta Balaam rikänampaq, Bamot-Baal sitiuman Balacqa pusharqan.+

23 Tsëpitanam Balaamqa Balacta nirqan: “Qanchis törukunata y qanchis carnërukunata rupatsinapaq qanchis altarkunata perqë”.+ 2 Balacqa Balaam ninqannöllam altarkunata rurarqan. Tsëchömi Balacwan Balaamqa, tsë animalkunata rupatsiyarqan.+ 3 Tsëpitanam Balaamqa Balacta nirqan: “Noqaqa washatam ëwä. Qamqa kë ushakanqanyaq rupatsinqëki qarënikikuna këkanqanllachö quedakuy. Kutiramurnam Teyta Jehovä nimanqanta willashqëki”. Tsënö nirmi Balaamqa mana imapis kaq jirkaman ëwarqan.

4 Teyta Dios parlapaptinmi,+ Balaamqa nirqan: “Qanchis altarkunachömi törukunata y carnërukunata rupatsiyarqö”. 5 Teyta Jehovänam Balaamta+ nirqan: “Balac kaqman kuti y ninqäta willë”. 6 Kutiskirnam, Balacta y Moabchö dirigeqkunata altar lädunchö tarirqan. 7 Tsënam Balaamqa Teyta Dios ninqanta kënö willarqan:+

‘Shamuy y noqapa rantï Jacobpa kastankunata maldicïkuy.

Israelïtakuna ushakäyänampaq parlëkullë’.+

 8 ¿Imanöparaq Teyta Dios yanapëkanqan sirweqninkunata maldicïman?

¿Y imanöparaq Teyta Jehovä cuidëkanqan nunakuna ushakänampaq nïman?+

 9 Qaqa janampita y jirkapitam pëkunataqa rikä.

10 ¿Piraq Jacobpa kastankunata yupëta puëdinman?+

¿Piraq wakin israelïtakunallatapis yupëta puëdinman?

11 Balacnam Balaamta nirqan: “Qamtaqa qayatsimurqoq chikimaqnïkunata maldicinëkipaqmi, peru qamqa Teyta Dios bendicinampaqmi yanapëkanki”.+ 12 Balaamnam nirqan: “Noqaqa Teyta Jehovä llapan nimanqanllatam parlëkä”.+

13 Tsënam Balacqa nirqan: “Juk sitiuta ëwashun, tsëpitaqa wakinllatam rikanki y manam llapankunatatsu. Tsë sitiupita pëkunata maldicïkuy”.+ 14 Tsëmi Pisgä sitiu jananchö+ Zofim jirkaman pusharqan, tsëchömi törukunata y carnërukunata rupatsiyänampaq qanchis altarkunata Balac rurarqan.+ 15 Balaamnam nirqan: “Ëwä Teyta Dioswan parlamushaq. Kutimunqäyaq kë rupëkätsinqëki qarënikikuna këkanqanchö quedakuy”. 16 Teyta Jehovänam Balaamta nirqan:+ “Balac kaqman kuti y ninqäta willë”. 17 Kutiskirnam, Balacta y Moabchö dirigeqkunata altar lädunchö tarirqan. Chäriptinnam Balacqa, “¿ima nintan Jehovä?” nir tapurqan. 18 Tsënam Balaamqa Teyta Dios ninqanta kënö willarqan:+

“Ziporpa tsurin Balac wiyamë.

22 Pëkunataqa Teyta Diosmi Egiptupita pushamushqa.+

Y Teyta Dios yanapaptinmi, mëtsika markakunata ushakätsiyashqa.+

Jacobpa kastan israelïtakunapaqmi kënö niyan:

‘¡Pëkunata Teyta Dios yanapëkanqanta rikäyë!’.

24 Israelïtakunaqa leonnömi llapan chikeqninkunata ushakätsiyanqa.+

25 Tsënam Balacqa Balaamta nirqan: “Mana maldicirqa ama bendicipistsu”. 26 Balaamnam nirqan: “Noqaqa Teyta Jehovä nimanqanllatam willëkaq”.+

27 Tsënam Balacqa Balaamta nirqan: “Aku, juk sitiuta ëwashun. Tsë sitiupita pëkunata maldicïkunëkipaq, capaz kë kutiqa maldicïkunëkipaq Dios yanapashunki”.+ 28 Tsëpitanam Balacqa Peor jutiyoq jirkaman Balaamta pusharqan. Tsëpitaqa Jesimon tsunyaq sitium rikakaq.+ 29 Chëkurnam Balaamqa Balacta nirqan: “Qanchis törukunata y qanchis carnërukunata rupatsinapaq qanchis altarkunata perqë”.+ 30 Balacqa Balaam ninqannöllam rurarqan. Y kikin ruranqan altarkunachömi, Balacqa tsë animalkunata rupatsirqan.

24 Israelïtakunata Teyta Jehovä bendicinqanta rikarmi, Balaamqa israelïtakunata ima pasanampaq kaqta tapukoq ëwarqannatsu.+ Tsëpa rantinqa, israelïtakuna këkäyanqan tsunyaq sitiumanmi rikarqan. 2 Y israelïtakuna grüpu grüpu këkäyanqantam Balaamqa rikarqan.+ Tsë höram Teyta Diospa santu espïritunta chaskirqan.+ 3 Tsëpitanam Teyta Dios ninqanta kënö parlarqan:+

 5 Jacobpa kastankuna, ¡carpëkikunaqa* kuyëllapaqmi!

Israelïta nunakuna, ¡carpëkikunaqa alläpa shumaqmi!+

10 Tsënö niptinmi Balacqa Balaamwan alläpa cölerakurqan. Y makintapis paqchirmi o taqllarmi Balaamta nirqan: “Chikimaqnïkunata maldicinëkipaqmi qamtaqa qayatsimurqoq.+ Tsënö kaptimpis, kananwanqa kima kutinam pëkunata bendicirqunki. 11 Noqawanqa reqishqam tikrankiman karqan,+ peru Jehovämi munashqatsu. Kananqa wayikita kutikuy”.

12 Balaamnam Balacta nirqan: “Noqaqa mandamunqëki nunakunatam nimurqä: 13 ‘Wayin junta plätata y öruta Balac qaramaptimpis, Teyta Jehovä mandamanqanllatam rurashaq’. Y, ‘Teyta Jehovä nimanqanllatam parlashaq’.+ 14 Imanö kaptimpis, manaraq ëwakurmi markëkita israelïtakuna imata rurayänampaq kaqta willashqëki”. 15 Tsënö nirmi Teyta Dios ninqanta kënö parlarqan:+

20 Amalec nacionta rikarnam, Balaamqa kënö nirqan:

21 Quenïta nunakuna kawayanqan markakunata rikarnam kënö nirqan:+

“Qaqa jananchö y següru markachömi kawayanki.

22 Tsënö karpis, kawayanqëki markataqa ninawanmi ushakätsiyanqa.

Y imë karpis Asiria nunakunam prësu apakuyäshunki”.

23 Y Balaamqa kënöpis nirqanmi:

“¿Piraq salvakunqa Teyta Dios tsëta ruraptin?

Peru pëpis ushakätsishqam kanqa”.

25 Tsëpitanam Balaamqa+ markanta kutikurqan, y Balacpis ëwakurqanmi.

25 Israelïtakuna Sitim sitiuchö këkäyaptinmi,+ wakin israelïtakunaqa Moabpita+ warmikunawan oqllanakuyarqan. 2 Santunkunapaq+ qarëkunata aparmi tsë warmikunaqa israelïtakunata pushayaq. Tsënöpam israelïtakunaqa santunkunapaq apayanqan qarëta mikuyarqan y santunkunata adorayarqan.+ 3 Peor sitiuchö adorayanqan Baal+ santuta israelïtakuna adorayaptinmi, Teyta Jehoväqa pëkunawan alläpa cölerakurqan. 4 Y Teyta Jehoväqa Moisestam kënö mandarqan: “Israelïta mayinkuna rikäyänampaq,* jutsata* ruraq dirigeqkunata noqa Jehoväpa rikënïchö qeruman warkuy, tsënöpa noqa Jehoväpa cölerä pasanampaq”. 5 Tsënam Moisesqa israelïtakunapa dirigeqninkunata nirqan:+ “Carguykikunachö kaqkunapita Peor sitiuchö Baal santuta adoraqkunata wanutsiyë”.+

6 Juntakäyanqan carpachö* israelïtakuna waqëkäyaptinmi, Moises y wakin israelïtakuna rikëkäyaptin madianïta warmita+ juk israelïta chäratsirqan. 7 Tsëta rikarnam Aaronpa willkan Eleazarpa tsurin Finehasqa,+ jinan höra lanzanta aptarkur 8 tsë israelïtapa qepanta ëwarqan, y carpanman* yëkurmi ishkankunata lanzawan tuksir partinkunapa pasaratsirqan. Tsëran feyu qeshyawan israelïtakuna wanuykäyanqan o wañuykäyanqan pärarirqan.+ 9 Tsë junaqqa veinticuatru mil israelïtakunam qeshyawan wanuyarqan.+

10 Tsënam Teyta Jehoväqa Moisesta kënö nirqan: 11 “Aaronpa willkan Eleazarpa tsurin Finehasmi+ israelïtakunawan cölerashqa këkanqäta pasaratsishqa, pëqa manam permitishqatsu santukunata israelïtakuna adorayänanta.+ Tsëmi santukunata adorayanqampita israelïtakunata ushakätsirqötsu.+ 12 Tsëmi Finehasta ninëki pëta imëpis yanapanäpaq kaqta. 13 Santukunata adorayänanta mana permitinqampita+ y israelïtakunata salvanqampitam, pë y tsurinkuna imëpis sacerdöti kayänanta permitishaq”.+

14 Finehas wanutsinqan nunaqa Salupa tsurin Zimrïmi karqan. Pëqa Simeonpa kastankunachö dirigeqmi karqan. 15 Y Finehas wanutsinqan madianïta warmiqa Zurpa+ tsurin Cozbïmi karqan. Zurqa Madianchö kastakunapa juk dirigeqninmi karqan.+

16 Tsëpitanam Teyta Jehoväqa Moisesta kënö nirqan: 17 “Madianïta nunakunawan pelyaq ëwar llapanta ushakätsiyë.+ 18 Pëkunaqa Madianchö dirigeqpa warmi tsurin Cozbïwanmi,+ Peor sitiuchö santunkunata adorayänëkipaq inkitayäshurqëki,+ y mana allimanmi chätsiyäshurqëki. Tsë warmiqa israelïta mayikikuna qeshyawan wanuyanqan junaqmi wanurqan”.+

26 Israelïtakuna qeshyawan wanuyanqampita,+ ichik tiempu pasariptinmi Teyta Jehoväqa Moisesta y sacerdöti Aaronpa tsurin Eleazarta nirqan: 2 “Israelchö soldädu kayänampaq, veinti watapita masyoq llapan ollqukunata cada kastapa censayë”.+ 3 Tsënam Moiseswan sacerdöti Eleazarqa,+ Moabchö tsunyaq pampaman+ llapan israelïtakunata qayatsiyarqan. Tsëqa Jordan mayupa* kuchunchö y Jericöpa frentinchömi karqan.+ Tsëchömi kënö niyarqan: 4 “Moisesta Teyta Jehovä mandanqannölla, veinti watapita masyoq llapan ollqukunata censayë”.+

Këkunam kayarqan Egiptupita yarqamoq Israelpa tsurinkuna. 5 Israelpa mayor kaq tsurin Rubenpa+ tsurinkunam kayarqan:+ Hanok, pëpa kastankunataqa hanokïtakuna nirmi reqiyaq. Palü, pëpa kastankunataqa paluïtakuna nirmi reqiyaq. 6 Hezron, pëpa kastankunataqa hezronïtakuna nirmi reqiyaq. Y Carmï, pëpa kastankunataqa carmïtakuna nirmi reqiyaq. 7 Pëkunam kayarqan Rubenpa kastankuna, y tsë llapan censashqakunaqa, cuarenta y tres mil setecientus treintam kayarqan.+

8 Palüpa tsurinqa Eliabmi karqan. 9 Eliabpa tsurinkunanam kayarqan Nemuel, Datan y Abiram. Datanwan Abiramqa, israelïtakunata yanapayänampaq akrashqa këkarmi, Corëwan+ y pëman qaqaq nunakunawan Moisespa,+ Aaronpa y Teyta Jehoväpa contran churakäyarqan.+

10 Tsë höram patsa kichakarnin pëkunata illakäratsirqan. Corëta y pëman qaqaq doscientus cincuenta nunakunataqa, ninam ushakäratsirqan.+ Tsë pasakunqanqa wakinkuna yachakuyänampaqmi karqan.+ 11 Peru Corëpa tsurinkunaqa manam wanuyarqantsu.+

12 Simeonpa tsurinkunam kayarqan:+ Nemuel, pëpa kastankunataqa nemuelïtakuna nirmi reqiyaq. Jamin, pëpa kastankunataqa jaminïtakuna nirmi reqiyaq. Jakin, pëpa kastankunataqa jakinïtakuna nirmi reqiyaq. 13 Zërah, pëpa kastankunataqa zerahïtakuna nirmi reqiyaq. Y Shaul, pëpa kastankunataqa shaulïtakuna nirmi reqiyaq. 14 Pëkunam kayarqan Simeonpa familiankuna, y tsë llapan censashqakunaqa, veintidos mil doscientusmi kayarqan.+

15 Gadpa tsurinkunam kayarqan:+ Zefon, pëpa kastankunataqa zefonïtakuna nirmi reqiyaq. Haguï, pëpa kastankunataqa haguïtakuna nirmi reqiyaq. Sunï, pëpa kastankunataqa sunïtakuna nirmi reqiyaq. 16 Oznï, pëpa kastankunataqa oznïtakuna nirmi reqiyaq. Erï, pëpa kastankunataqa erïtakuna nirmi reqiyaq. 17 Arod, pëpa kastankunataqa arodïtakuna nirmi reqiyaq. Y Arelï, pëpa kastankunataqa arelïtakuna nirmi reqiyaq. 18 Pëkunam kayarqan Gadpa tsurinkunapa familiankuna, y tsë llapan censashqakunaqa, cuarenta mil quinientusmi kayarqan.+

19 Judäpa+ tsurinkuna Er y Onanqa+ Canaanchömi+ wanuyarqan o wañuyarqan. 20 Judäpa wakin tsurinkunam kayarqan: Selä,+ pëpa kastankunataqa selanïtakuna nirmi reqiyaq. Përez,+ pëpa kastankunataqa perizïtakuna nirmi reqiyaq. Y Zërah,+ pëpa kastankunataqa zerahïtakuna nirmi reqiyaq. 21 Përezpa tsurinkunam kayarqan: Hezron,+ pëpa kastankunataqa hezronïtakuna nirmi reqiyaq. Y Hamul,+ pëpa kastankunataqa hamulïtakuna nirmi reqiyaq. 22 Pëkunam kayarqan Judäpa kastankuna, y tsë llapan censashqakunaqa, setenta y seis mil quinientusmi kayarqan.+

23 Isacarpa tsurinkunam kayarqan:+ Tolä,+ pëpa kastankunataqa tolaïtakuna nirmi reqiyaq. Puvä, pëpa kastankunataqa punïtakuna nirmi reqiyaq. 24 Jasub, pëpa kastankunataqa jasubïtakuna nirmi reqiyaq. Y Simron, pëpa kastankunataqa simronïtakuna nirmi reqiyaq. 25 Pëkunam kayarqan Isacarpa kastankuna, y tsë llapan censashqakunaqa, sesenta y cuatru mil trescientusmi kayarqan.+

26 Zabulonpa tsurinkunam kayarqan:+ Sëred, pëpa kastankunataqa seredïtakuna nirmi reqiyaq. Elon, pëpa kastankunataqa elonïtakuna nirmi reqiyaq. Y Jahleel, pëpa kastankunataqa jahleelïtakuna nirmi reqiyaq. 27 Pëkunam kayarqan Zabulonpa kastankuna, y tsë llapan censashqakunaqa, sesenta mil quinientusmi kayarqan.+

28 Josëpa+ tsurinkunam kayarqan Manases y Efrain.+ 29 Manasespa tsurinkunam kayarqan:+ Makir,+ pëpa kastankunataqa makirïtakuna nirmi reqiyaq. Makirpa tsurinqa Galaadmi+ karqan. Galaadpa kastankunataqa galaadïtakuna nirmi reqiyaq. 30 Galaadpa tsurinkunam kayarqan: Yëzer, pëpa kastankunataqa yezerïtakuna nirmi reqiyaq. Hëlec, pëpa kastankunataqa helequïtakuna nirmi reqiyaq. 31 Asriel, pëpa kastankunataqa asrielïtakuna nirmi reqiyaq. Siquem, pëpa kastankunataqa siquemïtakuna nirmi reqiyaq. 32 Semidä, pëpa kastankunataqa semidaïtakuna nirmi reqiyaq. Y Hëfer, pëpa kastankunataqa heferïtakuna nirmi reqiyaq. 33 Hëferpa tsurin Zelofehadpaqa+ manam ollqu tsurinkuna karqantsu, sinöqa warmillam kayarqan,+ y jutinkunam karqan Mahlä, Noä, Hoglä, Milcä y Tirzä. 34 Pëkunam kayarqan Manasespa kastankuna, y tsë llapan censashqakunaqa, cincuenta y dos mil setecientusmi kayarqan.+

35 Efrainpa+ tsurinkunam kayarqan: Sutëlah,+ pëpa kastankunataqa sutelahïtakuna nirmi reqiyaq. Bëker, pëpa kastankunataqa bekerïtakuna nirmi reqiyaq. Y Tahan, pëpa kastankunataqa tahanïtakuna nirmi reqiyaq. 36 Y Sutëlahpa tsurinqa Eranmi karqan, pëpa kastankunataqa eranïtakuna nirmi reqiyaq. 37 Pëkunam kayarqan Efrainpa tsurinkunapa familiankuna, y tsë llapan censashqakunaqa, treinta y dos mil quinientusmi kayarqan.+ Pëkunam kayarqan Josëpa tsurinkunapa familiankuna.

38 Benjaminpa tsurinkunam kayarqan:+ Bëla,+ pëpa kastankunataqa belaïtakuna nirmi reqiyaq. Asbel, pëpa kastankunataqa asbelïtakuna nirmi reqiyaq. Ahiram, pëpa kastankunataqa ahiramïtakuna nirmi reqiyaq. 39 Sefufam, pëpa kastankunataqa sefufamïtakuna nirmi reqiyaq. Y Hufam, pëpa kastankunataqa hufamïtakuna nirmi reqiyaq. 40 Bëlapa tsurinkunam kayarqan Ard y Naaman.+ Ardpa kastankunataqa ardïtakuna nirmi reqiyaq, y Naamanpa kastankunatanam naamïtakuna nir reqiyaq. 41 Pëkunam kayarqan Benjaminpa tsurinkunapa familiankuna, y tsë llapan censashqakunaqa, cuarenta y cincu mil seiscientusmi kayarqan.+

42 Danpa+ kastankunam kayarqan: Suham, pëpa kastankunataqa suhamïtakuna nirmi reqiyaq. Pëkunam kayarqan Danpa kastankuna. 43 Suhampa censashqa familiankunaqa sesenta y cuatru mil cuatrocientusmi kayarqan.+

44 Aserpa tsurinkunam kayarqan:+ Imnä, pëpa kastankunataqa imnïtakuna nirmi reqiyaq. Isvï, pëpa kastankunataqa isvïtakuna nirmi reqiyaq. Y Berïas, pëpa kastankunataqa berïtakuna nirmi reqiyaq. 45 Berïaspa tsurinkunam kayarqan: Hëber, pëpa kastankunataqa heberïtakuna nirmi reqiyaq. Y Malkiel, pëpa kastankunataqa malkielïtakuna nirmi reqiyaq. 46 Aserpaqa juk warmi tsurimpis karqanmi, jutinqa Sërahm karqan. 47 Pëkunam kayarqan Aserpa tsurinkunapa familiankuna, y tsë llapan censashqakunaqa, cincuenta y tres mil cuatrocientusmi kayarqan.+

48 Neftalïpa tsurinkunam kayarqan:+ Jahzeel, pëpa kastankunataqa jahzeelïtakuna nirmi reqiyaq. Gunï, pëpa kastankunataqa gunïtakuna nirmi reqiyaq. 49 Jëzer, pëpa kastankunataqa jezerïtakuna nirmi reqiyaq. Y Silem, pëpa kastankunataqa silemïtakuna nirmi reqiyaq. 50 Pëkunam kayarqan Neftalïpa kastankuna, y tsë llapan censashqakunaqa, cuarenta y cincu mil cuatrocientusmi kayarqan.+

51 Llapan censashqa israelïtakunaqa seiscientus un mil setecientus treintam kayarqan.+

52 Tsëpitanam Teyta Jehoväqa Moisesta nirqan: 53 “Cada kastachö ëkaq kayanqanta rikëkurmi chakrankuna entreganëki.+ 54 Juk kastachö atskaq kayaptinqa, masllatam chakrankuna entreganëki, y juk kastachö wallkaqlla kayaptinqa mënusllatam chakrankuna entreganëki.+ Listachö ëkaq kayanqanta rikëkurmi, cada kastata chakrankuna entreganëki. 55 Tsë chakrakunataqa sorteupam entreganëki.+ Y cada israelïtam kastankunata tocanqanchö chakrankuna chaskinqa. 56 Ëkaq kayanqanta rikëkurmi, cada kastata chakrankuna sorteupa entreganëki”.

57 Levïpa censashqa+ kastankunaqa kayarqan: Guerson, pëpa kastankunataqa guersonïtakuna nirmi reqiyaq. Cohat,+ pëpa kastankunataqa cohatïtakuna nirmi reqiyaq. Y Merarï, pëpa kastankunataqa merarïtakuna nirmi reqiyaq. 58 Y Levïpa wakin kastankunaqa kayarqan: Libnïpa kastankuna,+ Hebronpa kastankuna,+ Mahlïpa kastankuna,+ Musïpa kastankuna+ y Corëpa kastankunam.+

Cohatmi Amrampa papänin karqan.+ 59 Amrampa warminqa Jokëbedmi karqan.+ Jokëbedqa Egiptuchö yurikoq Levïpa warmi tsurinmi karqan. Amrampawan Jokëbedpa wamrakunaqa kayarqan, Aaron, Moises y Miriammi.+ 60 Y Aaronpa tsurinkunaqa Nadab, Abihü, Eleazar y Itamarmi kayarqan.+ 61 Nadabwan Abihüqa, Teyta Jehoväta mana cäsukur inciensuta rupatsiyanqampitam wanuyarqan.+

62 Juk killapita masyoq censashqa Levïpa ollqu kastankunaqa,+ veintitres milmi kayarqan. Pëkunaqa manam wakin israelïtakunanötsu chakrata chaskiyarqan,+ tsëmi pëkunaqa aparti censashqa kayarqan.+

63 Tsënömi Moiseswan sacerdöti Eleazarqa, Moabchö tsunyaq pampachö llapan israelïtakunata censayarqan. Tsë pampaqa, Jordan mayupa* kuchunchö y Jericöpa frentinchömi karqan. 64 Y tsë censashqa nunakunapa jutinkunachöqa, manam karqantsu Moiseswan Aaron Sinaï jirkachö censayanqan+ nunakunapa jutinkunaqa. 65 Tsënöqa pasarqan, tsë nunakunapaq Teyta Jehovä “tsunyaq sitiuchömi wanuyanqa o wañuyanqa”+ nishqa kaptinmi. Tsëmi tsë llapan nunakunaqa tsunyaq sitiuchö wanuyarqan. Jefunëpa tsurin Caleb y Nunpa tsurin Josuëllam wanuyarqantsu.+

27 Tsëpitanam Zelofehadpa warmi tsurinkuna+ Moisesman ëwayarqan. Y jutinkunam karqan Mahlä, Noä, Hoglä, Milcä y Tirzä. Zelofehadqa Hëferpa tsurinmi karqan, Hëfernam Galaadpa tsurin karqan, Galaadnam Makirpa tsurin karqan, Makirnam Manasespa tsurin karqan y Manasesnam Josëpa tsurin karqan. 2 Tsë pitsqan warmikunam juntakäyanqan carpapa* yëkunaman ëwar Moisesta, sacerdöti Eleazarta, israelïtakunata dirigeqkunata+ y llapan israelïtakunata niyarqan: 3 “Papänïkunaqa kikimpa jutsampitam* tsunyaq sitiuchö wanurqan, peru manam Corëman ni pëman qaqaq nunakunaman qaqarqantsu ni Teyta Jehoväpa contran churakarqantsu.+ Y pëpaqa manam ollqu tsurinkuna kashqatsu. 4 ¿Peru ollqu tsurin mana kaptinku papänïkunapa jutinqa kastankunapita ushakärinman? Mana tsënö kanampaq, papänïkunapa kastankunata tocanqanchö chakräkuna rakipëkayämë”. 5 Tsë warmikuna tsënö niyaptinmi, Moisesqa Teyta Jehoväta tapurqan imata ruranampaq kaqta.+

6 Tsënam Teyta Jehoväqa Moisesta kënö nirqan: 7 “Zelofehadpa warmi tsurinkunaqa rasun kaqllatam nikäyan. Kastankunata tocanqanchö papäninkunapaq kaq chakrakunata entreguëkuy.+ 8 Y israelïtakunatam këta ninëki: ‘Pï nunapis ollqu tsurinnaq wanuptinqa, warmi tsurinkunatam papänimpa chakrankunata entregayänëki. 9 Warmi tsurinkuna mana kaptinqa, wawqinkunatam entregayänëki. 10 Wawqinkuna mana kaptinqa, tiyunkunatam entregayänëki. 11 Tiyunkuna mana kaptinqa, legïtimu kastankunatam tsë chakrata entregayänëki. Y yapë tsënö pasaptinqa, noqa Jehovä mandanqaqnömi israelïtakuna rurayänan’”.

12 Tsëpitanam Teyta Jehoväqa Moisesta kënö nirqan: “Abarim jirkaman witsämur+ israelïtakunata entreganäpaq kaq markakunata rikë.+ 13 Y tsë markakunata rikëkurmi wawqiki Aaronnölla+ wanukunki o wañukunki.+ 14 Tsënöqa pasanqa, Zin niyanqan tsunyaq jirkachö israelïtakuna noqapita quejakuyaptin, yaku yarqamunampaq mandakunqänö mana rurayanqëkipitam.+ Tsëqa pasarqan, yaku yarqamunqan Meribä sitiuchömi.+ Tsë sitiuqa Zin jutiyoq tsunyaq jirkachö+ Cades sitiupa+ amänunchömi këkan”.

15 Tsëpitanam Moisesqa Teyta Jehoväta kënö nirqan: 16 “Llapan nunakunata kawëkaqta katseq Teyta Jehovä, israelïtakunata pushanampaq juk nunata akrëkullë. 17 Pëmi Teyta Jehoväpa sirweqninkuna mitseqninnaq üshakunanö mana kayänampaq, llapan rurayanqanchö israelïtakunata diriginqa”. 18 Tsënö niptinmi, Teyta Jehoväqa Moisesta kënö nirqan: “Nunpa tsurin Josuëta akrë, y pëpa peqanman o umanman makikita churë.+ Pëqa puëdinqam israelïtakunata pushëta. 19 Tsëpitana sacerdöti Eleazarpa y israelïtakunapa puntanman pushëkur israelïtakunata diriginampaq churë.+ 20 Y israelïtakuna respetayänampaqmi+ autoridäyoq kanqanta ninëki.+ 21 Imatapis musyëta munarqa, sacerdöti Eleazarmanmi ëwanan, y pënam Urimta utilizar noqa Jehoväta tapumanqa.+ Pë mandakuptinmi kikin y llapan israelïtakunaqa, mëtapis ëwayanqa o imatapis rurayanqa”.

22 Tsënam Moisesqa Teyta Jehovä mandanqannölla, sacerdöti Eleazarman y israelïtakunaman Josuëta pusharqan. 23 Y Josuëpa peqanman o umanman makinta churarkurmi israelïtakunapa dirigeqnin kanampaq churarqan.+ Tsëtaqa Teyta Jehovä mandanqannöllam rurarqan.+

28 Tsëpitanam Teyta Jehoväqa Moisesta kënö nirqan: 2 “Kë mandakunqätam israelïtakunata willanëki: ‘Mandakunqan junaqchömi gränupita rurashqa qarëkunata y rupatsina qarëkunata Teyta Diospaq apayänëki. Tsëkuna ninawan rupanqanqa, Teyta Diosta alläpam gustanqa’.+

3 Y këtapis ninëkim: ‘Teyta Jehoväpaq rupatsiyänampaqmi, cada junaq juk watayoq ishkë sänu üshakunata apayänëki.+ 4 Juknin kaq üshataqa patsa warëmi apayänëki, y juknin kaqtanam tardipa.*+ 5 Y tsë qarëtawan juntum, juk kïlunö* alli kaq harinata juk litru* aceiti de olïvawan pichurkur Teyta Diospaq apayänëki.+ 6 Tsë qarëtaqa Teyta Dios Sinaï jirkachö mandakunqannömi cada junaq apayänëki. Tsëqa ushakanqanyaq rupatsina qarëmi kanqa,+ y ninawan rupanqanqa, Teyta Jehoväta alläpam gustanqa. 7 Y tsë qarëtawan juntum, cada üshapaq juk litru vïnuta apayänëki.+ Y tsë vïnutam sagrädu sitiuman jichayänan. Tsë vïnuqa Teyta Jehoväpaq qarëmi kanqa. 8 Juknin kaq üshatanam tardipa* apayänëki. Y tsë üshatawan juntu rupatsiyänampaqmi, gränupita rurashqa qarëta y vïnuta apayänëki. Punta kaq üshawan rurayanqëkinöllam kë kaq üshawampis rurayänëki. Tsëqa rupatsishqa qarëmi kanqa, y ninawan rupanqanqa, Teyta Jehoväta alläpam gustanqa.+

9 Tsënö kaptimpis, säbadu junaqchöqa+ juk watayoq ishkë sänu üshakunatam apayänëki. Y tsë üshakunatawan juntum, aceitiwan pichushqa ishkë kïlunö alli kaq harinata y vïnuta apayänëki. 10 Awmi, säbadu junaqchöqa vïnuta, y cada junaq apayanqëkipita ishkë mastam apayänëki.+

11 Cada killa qallaptinmi, ishkë mallwa törukunata, juk carnëruta y juk watayoq qanchis sänu üshakunata Teyta Jehoväpaq rupatsiyänampaq apayänëki.+ 12 Y cada törutawan juntum, joqta kïlu alli aqashqa harinata aceitiwan pichurkur Teyta Diospaq apayänëki.+ Y carnërutawan juntum, chusku kïlu alli aqashqa harinata aceitiwan pichurkur Teyta Diospaq apayänëki.+ 13 Y cada üshatawan juntum, ishkë kïlu alli aqashqa harinata aceitiwan pichurkur Teyta Diospaq apayänëki. Tsëqa ushakanqanyaq rupatsina qarëmi kanqa, y ninawan rupanqanqa, Teyta Jehoväta alläpam gustanqa.+ 14 Y cada törutawan juntum ishkë litru vïnuta apayänëki,+ carnëruwan juntunam litru y cuartunö vïnuta apayänëki+ y cada üshawan juntum juk litru vïnuta apayänëki.+ Kë qarëkunatam cada killa qallaptin apayänëki. 15 Tsënöllam jutsëkikunapita* perdonashqa kayänëkipaq juk chïvuta* Teyta Jehoväpaq apayänëki. Y cada junaqmi ushakanqanyaq rupatsina qarëta y vïnuta apayänëki.

16 Qallanan killa catorci junaqmi, Teyta Jehoväpaq Pascua Fiestata rurayänëki.+ 17 Quinci kaq junaqchöpis fiestatam rurayänëki. Y qanchis junaqpam levadürannaq tantata mikuyänëki.+ 18 Qallanan junaqqa Teyta Diosta adorayänëkipaqmi juntakäyänëki, y manam trabajayänëkitsu. 19 Teyta Jehoväpaq rupatsiyänampaqmi, ishkë mallwa törukunata, juk carnëruta y juk watayoq qanchis üshakunata apayänëki. Tsë animalkunaqa sänum kayänan.+ 20 Y cada törutawan juntum, joqta kïlu alli aqashqa harinata aceitiwan pichurkur Teyta Diospaq apayänëki.+ Y carnëruwan juntum, chusku kïlu alli aqashqa harinata aceitiwan pichurkur Teyta Diospaq apayänëki. 21 Y cada üshatawan juntum, ishkë kïlu alli aqashqa harinata aceitiwan pichurkur Teyta Diospaq apayänëki. 22 Tsënöllam jutsëkikunapita* perdonashqa kayänëkipaq juk chïvuta* apayänëki. 23 Cada junaq Teyta Diospaq rupatsiyänampaq apayanqëki qarëkunawan juntum, kë qarëkunataqa apayänëki. 24 Teyta Dios mandakunqannömi qanchis junaqpa rurayänëki. Tsëqa Teyta Diospaq mikuy cuentam kanqa. Tsë qarëtaqa, cada junaq apayanqëki qarëkunatawan y vïnutawan juntum apayänëki. Y ninawan rupanqanqa, Teyta Jehoväta alläpam gustanqa. 25 Qanchis kaq junaqqa Teyta Diosta adorayänëkipaqmi juntakäyänëki,+ y manam trabajayänëkitsu.+

26 Cosëcha Qallanan Fiestachö,+ puntata cosechayanqëkipita Teyta Jehoväpaq qarëta aparqa,+ Teyta Diosta alabayänëkipaqmi juntakäyänëki,+ y manam trabajayänëkitsu.+ 27 Teyta Diospaq rupatsiyänampaqmi, ishkë mallwa törukunata, juk carnëruta y juk watayoq qanchis üshakunata apayänëki. Y ninawan rupanqanqa, Teyta Jehoväta alläpam gustanqa.+ 28 Y cada törutawan juntum, joqta kïlu alli aqashqa harinata aceitiwan pichurkur Teyta Diospaq apayänëki. Y carnëruwan juntum, chusku kïlu alli aqashqa harinata aceitiwan pichurkur Teyta Diospaq apayänëki. 29 Y cada üshatawan juntum, ishkë kïlu alli aqashqa harinata aceitiwan pichurkur Teyta Diospaq apayänëki. 30 Tsënöllam jutsëkikunapita* perdonashqa kayänëkipaq juk chïvuta* apayänëki.+ 31 Cada junaq apayanqëki qarëkunawan y gränupita rurashqa qarëkunawan juntum, kë qarëkunataqa apayänëki. Tsë animalkunaqa sänum kayänan,+ y vïnutawan juntum apayänëki.

29 Qanchis kaq killa punta kaq junaqqa, Teyta Diosta adorayänëkipaqmi juntakäyänëki, y manam trabajayänëkitsu.+ Tsë junaqqa trompëtatam tocayänëki.+ 2 Teyta Diospaq rupatsiyänampaqmi, juk mallwa töruta, juk carnëruta, y juk watayoq qanchis üshakunata apayänëki. Tsë animalkunaqa sänum kayänan. Y ninawan rupanqanqa, Teyta Jehoväta alläpam gustanqa. 3 Y cada törutawan juntum, kima kïlu y mediunö alli aqashqa harinata aceitiwan pichurkur Teyta Diospaq apayänëki. Y carnëruwan juntum, chusku kïlu alli aqashqa harinata aceitiwan pichurkur Teyta Diospaq apayänëki. 4 Y cada üshatawan juntum, ishkë kïlu alli aqashqa harinata aceitiwan pichurkur Teyta Diospaq apayänëki. 5 Tsënöllam jutsëkikunapita* perdonashqa kayänëkipaq juk chïvuta* apayänëki. 6 Tsë qarëkunataqa, Teyta Dios mandakunqannömi cada killa apayanqëki gränupita rurashqa qarëtawan,+ cada junaq apayanqëki gränupita rurashqa qarëtawan,+ y vïnutawan juntu apayänëki.+ Tsëqa ushakanqanyaq rupatsina qarëmi kanqa, y ninawan rupanqanqa, Teyta Jehoväta alläpam gustanqa.

7 Qanchis kaq killa chunka junaqqa, Teyta Diosta adorayänëkipaqmi juntakäyänëki.+ Tsë junaqqa jutsata* rurayanqëkipitam llakikuyänëki,* y manam trabajayänëkitsu.+ 8 Teyta Diospaq rupatsiyänampaqmi, juk mallwa töruta, juk carnëruta y juk watayoq qanchis üshakunata apayänëki. Tsë animalkunaqa sänum kayänan.+ Y ninawan rupanqanqa, Teyta Jehoväta alläpam gustanqa. 9 Y cada törutawan juntum, joqta kïlu alli aqashqa harinata aceitiwan pichurkur Teyta Diospaq apayänëki. Y carnëruwan juntum, chusku kïlu alli aqashqa harinata aceitiwan pichurkur Teyta Diospaq apayänëki. 10 Y cada üshatawan juntum, ishkë kïlu alli aqashqa harinata aceitiwan pichurkur Teyta Diospaq apayänëki. 11 Y Jutsëkikunapita* Perdonashqa Kayänëki Junaqchö apayanqëki qarëtawan, cada junaq Teyta Diospa rupatsiyänampaq apayanqëki qarëtawan, gränupita rurashqa qarëtawan y vïnutawan juntum, jutsata rurayanqëkipita perdonashqa kayänëkipaq juk chïvuta* apayänëki.+

12 Qanchis kaq killa quinci kaq junaqpis, Teyta Diosta alabayänëkipaqmi juntakäyänëki, y manam trabajayänëkitsu. Qanchis junaqpam Teyta Jehoväpaq fiestata rurayänëki.+ 13 Teyta Diospaq rupatsiyänampaqmi,+ trëci mallwa töruta, ishkë carnëruta y juk watayoq catorci üshata apayänëki. Tsë animalkunaqa sänum kayänan.+ Y ninawan rupanqanqa, Teyta Jehoväta alläpam gustanqa. 14 Y cada törutawan juntum, joqta kïlu alli aqashqa harinata aceitiwan pichurkur Teyta Diospaq apayänëki. Y cada carnëruwan juntum, chusku kïlu alli aqashqa harinata aceitiwan pichurkur Teyta Diospaq apayänëki. 15 Y cada üshatawan juntum, ishkë kïlu alli aqashqa harinata aceitiwan pichurkur Teyta Diospaq apayänëki. 16 Y Teyta Diospaq rupatsiyänampaq cada junaq apayanqëki qarëtawan, gränupita rurashqa qarëtawan y vïnutawan juntum, jutsëkikunapita* perdonashqa kayänëkipaq juk chïvuta* apayänëki.+

17 Ishkë kaq junaqqa, döci mallwa töruta, ishkë carnëruta y juk watayoq catorci üshatam apayänëki. Tsë animalkunaqa sänum kayänan.+ 18 Y Teyta Dios mandakunqannömi, cada törutawan, cada carnërutawan y cada üshatawan juntu, gränupita rurashqa qarëta y vïnuta apayänëki. 19 Y Teyta Diospaq rupatsiyänampaq cada junaq apayanqëki qarëtawan, gränupita rurashqa qarëtawan y vïnutawan juntum, jutsëkikunapita* perdonashqa kayänëkipaq juk chïvuta* apayänëki.+

20 Kima kaq junaqqa, onci mallwa töruta, ishkë carnëruta y juk watayoq catorci üshatam apayänëki. Tsë animalkunaqa sänum kayänan.+ 21 Y Teyta Dios mandakunqannömi, cada törutawan, cada carnërutawan y cada üshatawan juntu, gränupita rurashqa qarëta y vïnuta apayänëki. 22 Y Teyta Diospaq rupatsiyänampaq cada junaq apayanqëki qarëtawan, gränupita rurashqa qarëtawan y vïnutawan juntum, jutsëkikunapita* perdonashqa kayänëkipaq juk chïvuta* apayänëki.+

23 Chusku kaq junaqqa, diez mallwa töruta, ishkë carnëruta y juk watayoq catorci üshatam apayänëki. Tsë animalkunaqa sänum kayänan.+ 24 Y Teyta Dios mandakunqannömi, cada törutawan, cada carnërutawan y cada üshatawan juntu, gränupita rurashqa qarëta y vïnuta apayänëki. 25 Y Teyta Diospaq rupatsiyänampaq cada junaq apayanqëki qarëtawan, gränupita rurashqa qarëtawan y vïnutawan juntum, jutsëkikunapita* perdonashqa kayänëkipaq juk chïvuta* apayänëki.+

26 Pitsqa kaq junaqqa, isqun mallwa töruta, ishkë carnëruta y juk watayoq catorci üshatam apayänëki. Tsë animalkunaqa sänum kayänan.+ 27 Y Teyta Dios mandakunqannömi, cada törutawan, cada carnërutawan y cada üshatawan juntu, gränupita rurashqa qarëta y vïnuta apayänëki. 28 Y Teyta Diospaq rupatsiyänampaq cada junaq apayanqëki qarëtawan, gränupita rurashqa qarëtawan y vïnutawan juntum, jutsëkikunapita* perdonashqa kayänëkipaq juk chïvuta* apayänëki.+

29 Joqta kaq junaqqa, puwaq mallwa töruta, ishkë carnëruta y juk watayoq catorci üshatam apayänëki. Tsë animalkunaqa sänum kayänan.+ 30 Y Teyta Dios mandakunqannömi, cada törutawan, cada carnërutawan y cada üshatawan juntu, gränupita rurashqa qarëta y vïnuta apayänëki. 31 Y Teyta Diospaq rupatsiyänampaq cada junaq apayanqëki qarëtawan, gränupita rurashqa qarëtawan y vïnutawan juntum, jutsëkikunapita* perdonashqa kayänëkipaq juk chïvuta* apayänëki.+

32 Qanchis kaq junaqqa, qanchis mallwa töruta, ishkë carnëruta y juk watayoq catorci üshatam apayänëki. Tsë animalkunaqa sänum kayänan.+ 33 Y Teyta Dios mandakunqannömi, cada törutawan, cada carnërutawan y cada üshatawan juntu, gränupita rurashqa qarëta y vïnuta apayänëki. 34 Y Teyta Diospaq rupatsiyänampaq cada junaq apayanqëki qarëtawan, gränupita rurashqa qarëtawan y vïnutawan juntum, jutsëkikunapita* perdonashqa kayänëkipaq juk chïvuta* apayänëki.+

35 Puwaq kaq junaqqa, Teyta Diosta adorayänëkipaqmi juntakäyänëki, y manam trabajayänëkitsu.+ 36 Teyta Diospaq rupatsiyänampaqmi, juk mallwa töruta, juk carnëruta, y juk watayoq qanchis üshata apayänëki. Tsë animalkunaqa sänum kayänan.+ Y ninawan rupanqanqa, Teyta Jehoväta alläpam gustanqa. 37 Y Teyta Dios mandakunqannömi, cada törutawan, cada carnërutawan y cada üshatawan juntu, gränupita rurashqa qarëta y vïnuta apayänëki. 38 Y Teyta Diospaq rupatsiyänampaq cada junaq apayanqëki qarëtawan, gränupita rurashqa qarëtawan y vïnutawan juntum, jutsëkikunapita* rurayanqëkipita perdonashqa kayänëkipaq juk chïvuta* apayänëki.+

39 Kë qarëkunatam Teyta Jehoväpaq apayänëki, pë mandakunqan fiestakunata rurarnin.+ Tsë qarëkunawan juntum, änikuyanqëkita cumplir,+ qamkuna munar,+ Teyta Diospaq ushakanqanyaq rupatsina qarëta,+ gränupita rurashqa qarëta,+ vïnuta+ y Teyta Dioswan amïgu kayänëkipaq qarëta+ apayänëki’”. 40 Moisesqa Teyta Jehovä llapan mandanqantam israelïtakunata willarqan.

30 Tsëpitanam Moisesqa Israelchö kastakunata dirigeqkunata kënö nirqan:+ “Teyta Jehovämi këta mandakushqa: 2 pï nunapis imata ruranampaq o mana ruranampaq Teyta Jehoväta änikurqa,+ tsë änikunqantam cumplinan.+

3 Pï warmipis shipashllaraq këkar y papänimpa wayinllachöraq këkar, imatapis ruranampaq o mana ruranampaq Teyta Jehoväta äniptinqa, 4 y papänin tsëta musyarir imatapis mana niptinqa, tsë änikunqanta cumplinanmi. 5 Peru papänin musyarir tsë änikunqanta cumplinanta michaptinqa, manam cumplinantsu. Y papänin michashqa kaptinmi, Teyta Jehoväqa änikunqanta mana cumplinqampita perdonëkunqa.+

6 Tsënö kaptimpis, tsë shipash manaraq shumaq pensar imatapis ruranampaq o mana ruranampaq änikuskirnin piwampis casakuptinqa, 7 y qowan o runan* tsëta musyarir imatapis mana niptinqa, tsë änikunqanta cumplinanmi. 8 Peru tsë änikunqanta qowan o runan* musyarir cumplinanta michaptinqa, manam cumplinantsu. Qowan o runan michashqa kaptinmi,+ Teyta Jehoväqa änikunqanta mana cumplinqampita perdonëkunqa.

9 Viuda këkar o divorciäda këkar Teyta Diosta imatapis änikurqa, änikunqanta cumplinanmi.

10 Tsënö kaptimpis, qowampa o runampa* wayinllachöraq këkar, imatapis ruranampaq o mana ruranampaq änikurqa, 11 y qowan o runan* musyarir imatapis mana niptin y cumplinanta mana michaptinqa, tsë änikunqanta cumplinanmi. 12 Peru tsë änikunqanta qowan o runan* musyarir cumplinanta mana munaptinqa, manam cumplinantsu.+ Qowan o runan cumplinanta mana munaptinmi, Teyta Jehoväqa änikunqanta mana cumplinqampita perdonëkunqa. 13 Pï warmipis imatapis ruranampaq o mana ruranampaq änikuptinqa, qowanran o runanran* cumplinampaq o mana cumplinampaq kaqta ninan. 14 Änikunqanta qowan o runan* musyarir atska junaqkunachö imatapis mana niptinqa, warmin änikunqanta cumplinanta munanqantam rikätsikunqa. 15 Peru musyanqampita tiempu pasanqanchöraq warmin änikunqanta mana cumplinanta munarqa, pëmi culpayoq kanqa.+

16 Juk nunapa warmin imatapis änikuptin o juk shipash papänimpa wayinllachöraq këkar imatapis änikuptinqa, Teyta Jehovä tsë asuntukunapaq mandakunqannömi rurayänëki”.

31 Tsëpitanam Teyta Jehoväqa Moisesta kënö nirqan: 2 “Israelïtakunata mana allita rurayanqampita+ madianïta nunakunata ushakätsi.+ Y tsëpitaqa qampis wanukunkim o wañukunkim”.+

3 Tsëmi Moisesqa israelïtakunata kënö nirqan: “Teyta Jehovä mandakunqannö madianïta nunakunata ushakätseq ëwanapaq wakinnikikuna alistakuyë. 4 Cada kastapitam mil ollqukunata akrayänëki”. 5 Tsëmi pelyaq ëwayänampaq cada kastapita mil ollqukunata akrayarqan,+ y llapanqa döci milmi kayarqan.

6 Tsëpitanam Moisesqa, Eleazarpa tsurin Finehasta+ y cada kastapita mil nunakunata pelyaq ëwayänampaq mandarqan. Finehasqa sagrädu cösaskunata y trompëtakunata aparmi soldädukunawan ëwarqan. Imatapis mandakurmi trompëtakunataqa tocayaq.+ 7 Teyta Jehovä mandakunqannöllam, Madianchö llapan ollqukunata wanutsiyarqan. 8 Tsënöllam Madianchö pitsqa mandakoqkunata y Beorpa tsurin Balaamtapis wanutsiyarqan.+ Tsë mandakoqkunapa jutinkunam karqan Evï, Rëquem, Zur, Hur y Reba. 9 Madianchö wamrakunata y warmikunataqa prësum apakuyarqan. Tsënöllam animalninkunata y cösasninkunatapis apakuyarqan. 10 Llapan markankunata y campamentunkunatam* ninawan ushakätsiyarqan. 11 Llapan tariyanqantam apakuyarqan, nunata y animaltapis. 12 Tsëpitanam prësuyanqan nunakunata y llapan tariyanqanta Moisesman, sacerdöti Eleazarman y israelïta mayinkunaman apayarqan. Pëkunaqa Jordan mayupa* amänunchö y Jericöpa frentin Moab pampachömi këkäyarqan.+

13 Tsëpitanam, Moises, sacerdöti Eleazar y israelïtakunata dirigeqkuna, pelyaq ëwaqkunawan tinkuyänampaq campamentupa amänunman ëwayarqan. 14 Y Moisesqa mil soldädukunata y cien soldädukunata dirigeqkunawan alläpa cölerakurmi 15 kënö nirqan: “¿Imanirtaq warmikunataqa wanutsiyarqunkitsu? 16 Tsë warmikunam Balaam nunata cäsurnin, Peor sitiuchö+ israelïta mayintsikkunata Teyta Jehoväpa rikëninchö jutsa* rurëman chätsiyarqan.+ Tsëta rurayanqampitam Teyta Jehoväqa israelïta mayintsikkunata qeshyawan ushakätsirqan.+ 17 Tsëmi llapan ollqu wamrakunata y ollquwan oqllanakushqa warmikunata wanutsiyänëki o wañutsiyänëki. 18 Peru ollquwan mana oqllanakushqa shipashkunataqa ama wanutsiyëtsu.+ 19 Pitapis wanutsishqa kaqkuna, ayata yatashqakuna+ y prësu apayanqëki nunakunapis, qanchis junaqmi campamentupita karuchö kayänëki. Kima kaq junaq y qanchis kaq junaqmi, Teyta Diospa rikënimpaq limpiuyätsishqa kayänëki.+ 20 Tsënöllam röpakunata, qarapita rurashqakunata, cabra millwapita rurashqakunata y qerupita rurashqakunatapis, Teyta Diospa rikënimpaq limpiuyätsiyänëki”.

21 Tsënam sacerdöti Eleazarqa pelyaq ëwaqkunata kënö nirqan: “Teyta Jehovämi Moiseswan kënö nir mandakushqa: 22 ‘Öruta, plätata, cobrita, fiërruta, estäñuta y plömutaqa, 23 nina mana tsullutsiptinmi, Teyta Diospa rikëninchö limpiu kanampaq ninawan rupatsiyänëki.* Tsëpitanam limpiuyätsikoq yakuwan Teyta Diospa rikënimpaq limpiuyätsiyänëki.+ Y nina tsullutsinqan kaqtaqa yakullawanmi awiyänëki.* 24 Qanchis junaqqa Teyta Diospa rikënimpaq limpiu kayänëkipaqmi röpëkikunata taqshayänëki, tsëpitaran campamentuman yëkuyanki’”.+

25 Tsëpitanam Teyta Jehoväqa Moisesta kënö nirqan: 26 “Sacerdöti Eleazarwan y Israelchö kastakunata dirigeqkunawan, llapan apayämunqanta listaman apuntayë, nunata y animaltapis. 27 Y llapan apayämunqanta ishkëman rakiyë. Pullan kaqmi pelyaq ëwaqkunapaq kanqa, y pullan kaqnam wakin israelïtakunapaq kanqa.+ 28 Pelyaq ëwaqkuna chaskiyanqampitam, cada quinientus shipashpita,* wäkapita, ashnupita, üshapita y cabrapita noqa Jehoväpaq jukta rakinëki. 29 Pëkuna chaskiyanqampitam pullan kaqta noqa Jehoväpaq sacerdöti Eleazarta entreganëki.+ 30 Y israelïtakuna chaskiyanqampitam, cada cincuenta shipashpita, wäkapita, ashnupita, üshapita y cabrapita levïtakunapaq jukta rakinëki.+ Pëkunaqa noqa Jehoväpa carpa* wayïchömi yanapakuyan”.+

31 Moiseswan sacerdöti Eleazarqa, Moisesta Teyta Jehovä mandanqannöllam rurayarqan. 32 Pelyaq ëwaqkuna apayanqanchöqa karqan seiscientus setenta y cincu mil üshakuna y cabrakuna, 33 setenta y dos mil wäkakuna, 34 y sesenta y un mil ashnunkunam. 35 Y ollquwan mana oqllanakushqa shipashkunaqa,+ treinta y dos milmi kayarqan. 36 Y pelyaq ëwaqkuna chaskiyanqan üshakuna y cabrakunaqa, trescientus treinta y siëti mil quinientusmi kayarqan. 37 Y tsëpitam Teyta Jehoväpaq seiscientus setenta y cincu üshata y cabrata rakiyarqan. 38 Y pelyaq ëwaqkunaqa treinta y seis mil wäkatam chaskiyarqan. Tsëpitam setenta y dos wäkata Teyta Jehoväpaq rakiyarqan. 39 Pelyaq ëwaqkunaqa treinta mil quinientus ashnutam chaskiyarqan, tsëpitam sesenta y un ashnuta Teyta Jehoväpaq rakiyarqan. 40 Pelyaq ëwaqkuna chaskiyanqan shipashkunaqa, dieciseis milmi kayarqan, pëkunapitam treinta y dosta Teyta Jehoväpaq rakiyarqan. 41 Moisesqa Teyta Jehovä mandanqannöllam, Teyta Jehoväpa kaqta+ sacerdöti Eleazarta entregarqan.

42 Pelyaq ëwaqkuna apayämunqampita pullantanam, Moisesqa israelïtakunata entregarqan, 43 trescientus treinta y siëti mil quinientus üshata y cabrata, 44 treinta y seis mil wäkata, 45 treinta mil quinientus ashnuta 46 y dieciseis mil shipashkunata. 47 Tsë chaskiyanqampitam, Moisesqa cada cincuenta shipashpita y animalkunapita levïtakunata jukta entregarqan.+ Pëkunaqa Teyta Jehoväpa carpa* wayinchömi yanapakuyan.+ Tsëtaqa rurarqan Teyta Jehovä mandanqannöllam.

48 Tsëpitanam mil soldädukunata y cien soldädukunata dirigeqkuna Moisesman ëwayarqan,+ 49 y kënömi niyarqan: “Cargükunachö pelyaq ëwaq soldädukunatam yupayarqö, y llapankunam këkäyan.+ 50 Tsëmi jutsäta* rurayanqäpita Teyta Jehovä perdonayämänampaq tariyanqä örupita cösaskunata, chakiman churakuyänan pulsërakunata, makiman churakuyänan argöllakunata, sellakuna sortijakunata, zarcillukunata* y tukuyläya jöyakunata Teyta Jehoväpaq apamuyta munayä”.

51 Tsënö niyaptinmi Moiseswan sacerdöti Eleazarqa, apayanqan öruta y jöyakunata chaskiyarqan. 52 Mil soldädukunata y cien soldädukunata dirigeqkuna Teyta Jehoväpaq apayanqan öruqa, cientu noventa y un kïlusnömi* karqan. 53 Cada soldädun tsëkunataqa apamushqa karqan. 54 Y Moiseswan sacerdöti Eleazarqa, Teyta Jehovä pëkunapaq ruranqanta israelïtakuna imëpis yarpäyänampaqmi, tsë llapan apayanqanta juntakäyänan carpaman* apayarqan.

32 Rubenpa+ y Gadpa+ kastankunapaqa, atskam animalninkuna karqan. Galaadchö y Jazerchö+ sitiukunaqa animalkunata wätanapaqmi alli karqan. 2 Tsëmi Gadpa y Rubenpa tsurinkunaqa, Moisesman, sacerdöti Eleazarman y israelïtakunata dirigeqkunaman ëwëkur kënö niyarqan: 3 “Atarot, Dibon, Jazer, Nimrä, Hesbon,+ Elealë, Sebam, Nëbu+ y Beon+ 4 markakunachö sitiukunaqa, allim animalkunata wätanapaq.+ Animalnïkuna atska kaptinmi, tsë markakuna noqakunapaq kananta munayä. Tsë markakunachö nunakunataqa Teyta Jehovämi ushakätsinapaq yanapamarquntsik”.+ 5 Y kënöpis niyarqanmi: “Rikënikipaq alli kayaptïqa, ama Jordan mayuta* tsimpayäshaqnatsu, tsëpa rantinqa kë markakunallachöna quedakuyäshaq”.

6 Tsënam Moisesqa, Gadpa y Rubenpa kastankunata kënö nirqan: “¿Israelïta mayikikuna pelyaq ëwëkäyaptinku qamkunaqa këllachöna quedakuyta munayanki? 7 ¿Imanirtaq Teyta Jehovä änimanqantsik markaman ëwëkaq israelïta mayintsikkunata qelanätsiyanki? 8 Cades-Barnëa sitiupita rikapakoq shamoq unë kastëkikunapis tsënöllam rurayarqan.+ 9 Escol pampapita+ kë markakunata rikapakurirmi, Teyta Jehovä änimanqantsik markaman ëwëkaq israelïta mayintsikkunata qelanätsiyarqan.+ 10 Tsë kutim Teyta Jehoväqa alläpa cölerar kënö nirqan:+ 11 ‘Egiptupita yarqamoq veinti watapita masyoq ollqukunaqa, manam llapan ninqäkunata cäsukuyarqunkitsu, tsëmi Abrahanta, Isaacta y Jacobta+ äninqä markakunaman yëkuyankitsu.+ 12 Jefunëpa tsurin Caleb+ y Nunpa tsurin Josuëllam,+ llapan noqa Jehovä ninqäkunata cäsukuyashqa, tsëmi pëkunalla tsë markakunaman yëkuyanqa’.+ 13 Tsëmi Teyta Jehoväqa israelïta mayintsikkunawan alläpa cölerakurqan, y Teyta Jehoväqa mana allita ruraqkuna ushakäyanqanyaqmi,+ cuarenta watapa tsunyaq sitiuchö kawayänanta dejarqan.+ 14 Y qamkunapis jutsata* ruraq unë kastëkikunanöllam rurëkäyanki, tsëmi Teyta Jehoväqa noqantsikwan masraq cölerakunqa. 15 Teyta Dios ninqanta mana cäsukuyaptikiqa, yapëmi israelïta mayintsikkunata tsunyaq sitiuchö dejarinqa, y culpëkikunarëkurmi llapan israelïtakuna ushakäyanqa”.

16 Tsëpitanam pëkunaqa Moisesta kënö niyarqan: “Animalnïkunapaq rumiwan corralkunata rurayänäta, y tsurïkunapaq markakunata perqayänäta permitïkayämë. 17 Tsëpitaqa Teyta Dios änimanqantsik markakunaman israelïta mayintsikkuna chäyanqanyaqmi, pëkunapa puntanta pelyar ëwayäshaq.+ Tsëyaqmi tsurïkunaqa nunakuna mana imanäyänampaq, murallashqa markakunachö quedakuyanqa. 18 Noqakunaqa llapan israelïta mayintsikkuna Teyta Dios änimanqantsik markata chaskiyaptinran, wayïkunaman kutiyämushaq.+ 19 Jordan mayupa* wak lädunchö ni juk läduchöpis noqakunaqa manam imatapis chaskiyäshaqtsu. Noqakunapa markäkunaqa Jordan mayupa kë lädunchömi kanqa”.+

20 Tsënö niyaptinnam Moisesqa kënö nirqan: “Tsëta rurarqa, y Teyta Jehoväpa rikëninchö pelyaq ëwar+ 21 y Jordan mayuta* tsimpar chikimaqnintsikkunata ushakätsiyanqëkiyaq Teyta Jehoväpa rikëninchö israelïta mayintsikkunata yanaparqa,+ 22 y tsë markakunapa duëñun tikranqantsikyaq Teyta Jehoväpa rikëninchö pelyarqa,+ puëdiyankim markëkikunaman kutimuyta.+ Tsëta rurarqa, Teyta Jehoväpa y israelïta mayintsikkunapa rikëninchöpis mana culpayoqmi kayanki. Y Teyta Jehoväpa rikëninchö akrayanqëki markakunam qamkunapaq imëpis kanqa.+ 23 Peru mana tsëta rurarqa, Teyta Jehoväpa rikëninchömi jutsayoq* kayanki, y tsërëkurmi sufriyanki. 24 Tsëqa, tsurikikunapaq markakunata perqayë y animalnikikunapaq corralkunata rurayë,+ y tsëpitaqa niyanqëkita cumpliyë”.

25 Tsënam Gadpa y Rubenpa kastankunaqa Moisesta kënö niyarqan: “Ninqëkinömi rurayäshaq. 26 Tsurïkuna, warmïkuna y animalnïkunaqa Galaad markakunachömi quedakuyanqa.+ 27 Noqakunaqa ninqëkinöllam, Teyta Jehoväpa rikëninchö pelyayänäpaq Jordan mayuta* tsimpayäshaq”.+

28 Tsënam Moisesqa sacerdöti Eleazarta, Nunpa tsurin Josuëta y Israelchö kastakunapa dirigeqninkunata 29 kënö mandarqan: “Gadpa y Rubenpa kastankunaqa, Teyta Dios änimanqantsik markakunapa duëñun tikrayanqëkiyaq yanapayäshunëkipaqmi niyashqa. Qamkunawan juntu Teyta Jehoväpa rikëninchö pelyayänampaq Jordan mayuta* tsimpayämuptinqa, Galaadchö markakunatam entregayänëki.+ 30 Peru qamkunawan juntu pelyayänampaq Jordan mayuta mana tsimpayämuptinqa, pëkunatapis Canaanchömi markankuna entregayänëki”.

31 Tsënam Gadpa y Rubenpa kastankunaqa niyarqan: “Teyta Jehovä ninqantam rurayäshaq. 32 Teyta Jehoväpa rikëninchö qamkunawan juntu Canaan kinrëchö+ pelyanapaqmi Jordan mayuta* tsimpayämushaq, peru noqakunapa markäkunaqa kë tsimpachömi kanqa”. 33 Tsëmi Moisesqa, Gadpa, Rubenpa+ y Josëpa tsurin Manasespa+ pullan kastankunata, amorreu nunakunapa markankunata, Basanchö markakunata y tsë markakunapa amänunchö markakunata entregarqan. Amorreu nunakunataqa Sehonmi+ gobernaq, y Basanchö nunakunatanam Og gobernaq.+

34 Gadpa kastankuna rurayanqan* markakunaqa kayarqan: Dibon,+ Atarot,+ Aroer,+ 35 Atrot-Sofan, Jazer,+ Jogbehä,+ 36 Bet-Nimrä+ y Bet-Harammi.+ Tsë markakunataqa alli murallashqatam rurayarqan. Tsënöllam animalninkunapaq rumipita corralkunatapis rurayarqan. 37 Rubenpa kastankuna rurayanqan markakunaqa kayarqan: Hesbon,+ Elealë,+ Quiryatäim,+ 38 Nëbu+ y Baal-Meon,+ tsë markakunapa punta jutinqa jukmi karqan. Tsënöllam Sibmä markatapis rurayarqan. Rubenpa kastankunam puntataqa markakunapa jutinkunata cambiayarqan.

39 Manasespa tsurin Makirpa kastankunanam,+ Galaad markakunaman yëkuykur amorreu nunakunata ushakätsiyarqan. 40 Tsëmi Moisesqa Makirpa kastankunata Galaadchö markakunata entregarqan.+ 41 Manasespa tsurin Jairnam, amorreukuna carpankunata* armayanqan taksha markakunapa duëñun tikrarqan, y Havot-Jair* nirmi jutin churarqan.+ 42 Tsënöllam Nöbahpis Quenat sitiupa y amänunchö markakunapa duëñun tikrarqan, y Nöbah nirmi jutin churarqan.

33 Israelïtakuna grüpu grüpu+ Egiptupita yarqayämuptinqa,+ Moiseswan Aaronmi+ mëtsika sitiukunapa pushayarqan. 2 Teyta Jehovä mandaptinmi, Moisesqa mëpita yarquyanqanta y mëman chäyanqanta apuntarqan.+ 3 Pascua Fiesta+ pasariptinmi, israelïtakunaqa qallanan killa quinci junaq+ Ramesespita ëwakuyarqan.+ Egipciukuna rikëkäyaptinmi israelïtakunaqa mana mantsakushpa Egiptupita yarqayämurqan. 4 Teyta Jehoväqa egipciukuna adorayanqan santukunatam castigarqan,+ tsëmi egipciukunaqa Teyta Jehovä wanutsinqan punta tsurinkunata pampëkäyarqan.+

5 Israelïtakunaqa Ramesespita ëwakurmi, Sucot sitiuchö carpankunata* armayarqan.+ 6 Sucot sitiupita ëwakurnam, Ezam+ sitiuchö carpankunata* armayarqan. Ezam sitiupitaqa tsunyaq sitiunam qallaq. 7 Ezam sitiupita ëwakurnam, Baal-Zefon+ sitiupa frentin Pihahirot sitiuman chäyarqan. Y Migdol sitiupa+ frentinchömi carpankunata* armayarqan. 8 Pihahirot sitiupita ëwakurnam, lamar chowpimpa*+ tsimparnin tsunyaq sitiuman chäyarqan.+ Tsëpitanam Ezam tsunyaq jirkapa+ kima junaq ëwayarqan, y Marä sitiuman+ chëkurmi carpankunata* armayarqan.

9 Marä sitiupita ëwakurnam Elim sitiuman chäyarqan, y tsëchömi carpankunata* armayarqan. Tsëchöqa döci sitiuchömi yaku pashtamoq y setenta palmërakunam karqan.+ 10 Elim sitiupita ëwakurnam, Puka lamarpa lädunchö carpankunata* armayarqan. 11 Puka lamarpita ëwakurnam, Sin tsunyaq sitiuchö carpankunata* armayarqan.+ 12 Sin tsunyaq sitiupita ëwakurnam, Dofcä sitiuchö carpankunata* armayarqan. 13 Dofcä sitiupita ëwakurnam, Alus sitiuchö carpankunata* armayarqan. 14 Alus sitiupita ëwakurnam, Refidim+ sitiuchö carpankunata* armayarqan. 15 Refidim sitiupita ëwakurnam, Sinaï tsunyaq jirkachö carpankunata* armayarqan.+

16 Sinaï tsunyaq sitiupita ëwakurnam Quibrot-Hataavä+ sitiuchö carpankunata* armayarqan. 17 Quibrot-Hataavä sitiupita ëwakurnam, Hazerot+ sitiuchö carpankunata* armayarqan. 18 Hazerot sitiupita ëwakurnam, Ritmä sitiuchö carpankunata* armayarqan. 19 Ritmä sitiupita ëwakurnam, Rimon-Përez sitiuchö carpankunata* armayarqan. 20 Rimon-Përez sitiupita ëwakurnam, Libnä markachö carpankunata* armayarqan. 21 Libnä markapita ëwakurnam, Risä sitiuchö carpankunata* armayarqan. 22 Risä sitiupita ëwakurnam, Quehelatä sitiuchö carpankunata* armayarqan. 23 Quehelatä sitiupita ëwakurnam, Sëfer jirkachö carpankunata* armayarqan.

24 Sëfer jirkapita ëwakurnam, Haradä sitiuchö carpankunata* armayarqan. 25 Haradä sitiupita ëwakurnam, Maquelot sitiuchö carpankunata* armayarqan. 26 Maquelot sitiupita ëwakurnam,+ Tähat sitiuchö carpankunata* armayarqan. 27 Tähat sitiupita ëwakurnam, Tarë sitiuchö carpankunata* armayarqan. 28 Tarë sitiupita ëwakurnam, Mitcä sitiuchö carpankunata* armayarqan. 29 Mitcä sitiupita ëwakurnam, Hasmonä sitiuchö carpankunata* armayarqan. 30 Hasmonä sitiupita ëwakurnam, Moserot sitiuchö carpankunata* armayarqan. 31 Moserot sitiupita ëwakurnam, Bene-Jaacan+ sitiuchö carpankunata* armayarqan. 32 Bene-Jaacan sitiupita ëwakurnam, Hor-Haguidgad sitiuchö carpankunata* armayarqan. 33 Hor-Haguidgad sitiupita ëwakurnam, Jotbatä+ sitiuchö carpankunata* armayarqan. 34 Jotbatä sitiupita ëwakurnam, Abronä sitiuchö carpankunata* armayarqan. 35 Abronä sitiupita ëwakurnam, Ezion-Guëber+ sitiuchö carpankunata* armayarqan. 36 Ezion-Guëber sitiupita ëwakurnam, Cades sitiuchö carpankunata* armayarqan. Cades sitiuqa, Zin niyanqan tsunyaq sitiuchömi karqan.+

37 Cades sitiupita ëwakurnam, Hor jirkachö+ carpankunata* armayarqan, tsëqa Edomchö markakunapa lindërunchömi këkarqan. 38 Israelïtakuna Egiptupita yarqayämunqampita cuarenta wata pasanqanchömi, sacerdöti Aaronqa Teyta Jehovä mandaptin Hor jirkaman witsarqan, y tsëchömi pitsqa killa qallanan junaq wanurqan.+ 39 Sacerdöti Aaronqa cientu veintitres watayoq këkarmi wanurqan.

40 Tsë witsanmi Arad markachö gobernaqqa,+ israelïtakuna markanman ëwëkäyanqanta musyarirqan. Pëqa Canaan markakunachö këkaq Nëguebchömi kawarqan.

41 Hor jirkapita ëwakurnam,+ Zalmonä sitiuchö carpankunata* armayarqan. 42 Zalmonä sitiupita ëwakurnam, Punon sitiuchö carpankunata* armayarqan. 43 Punon sitiupita ëwakurnam, Obot sitiuchö carpankunata* armayarqan.+ 44 Obot sitiupita ëwakurnam, Iyë-Abarim sitiuchö carpankunata* armayarqan. Tsëqa Moabchö+ markakunapa lindërunchömi këkarqan. 45 Iyim sitiupita ëwakurnam, Dibon-Gad+ sitiuchö carpankunata* armayarqan. 46 Dibon-Gad sitiupita ëwakurnam, Almon-Diblatäim sitiuchö carpankunata* armayarqan. 47 Almon-Diblatäim sitiupita ëwakurnam, Abarim jirkachö+ carpankunata* armayarqan. Abarim jirkaqa Nëbu markapa+ frentinchömi këkarqan. 48 Abarim jirkapita ëwakurnam, Moab pampachö carpankunata* armayarqan. Tsëqa, Jordan mayupa* lädunchö y Jericöpa frentinchömi+ këkarqan. 49 Y Jordan mayupa* kuchunchö këkaq Moab pampachömi, Bet-Jesimot sitiupita Abel-Sitim sitiuyaq+ carpankunata* armayarqan.

50 Jordan mayupa* amänunchö y Jericöpa frentin Moab pampachö këkäyaptinmi, Teyta Jehoväqa Moisesta kënö nirqan: 51 “Israelïtakunatam këta ninëki: ‘Jordan mayuta* tsimparmi Canaanchö markakunaman yëkuyanki.+ 52 Canaanchö nunakunata, rumipita santunkunata,+ metalpita* santunkunata+ y santunkunata adorayänan sagrädu sitiukunatam,+ llapanta ushakätsiyänëki. 53 Teyta Dios änimanqantsiknömi, tsë markakunaman yëkur duëñun tikrayanki.+ 54 Tsë chakrakunataqa cada kastata y cada familiatam, sorteupa+ entregayänëki. Juk kastachö atskaq kayaptinqa, masllatam chakrankuna entregayänëki, y juk kastachö wallkaqlla kayaptinqa mënusllatam chakrankuna entregayänëki.+ Tsë chakrakunataqa sorteupam mëchöpis tocanqanchö entregayänëki. Y cada israelïtam kastankunata tocanqanchö chakrankuna chaskinqa.+

55 Peru tsë markakunachö llapan nunakunata mana ushakätsiyaptikiqa,+ nawikikunachö päjanö y costillëkikunachö kashanömi qamkunapaq kayanqa, y manam yamë kawakuyanëkita dejayäshunkitsu.+ 56 Y pëkunata ruranäpaq kaqtam qamkunata rurayashqëki’”.+

34 Tsëpitanam Teyta Jehoväqa Moisesta kënö nirqan: 2 “Israelïtakunatam ninëki: ‘Canaanchö markakunaman charqa,+ tsë markakunapa duëñunmi kayanki.+

3 Sur kaq lädupa lindërunqa, Edompa lädunchö këkaq Zin niyanqan tsunyaq sitiupitam qallanqa. Izquierda kaq lädupa lindërunnam, inti o rupay yarqamunan läduchö Kachi lamarpita* qallanqa.+ 4 Tsëpitanam Acrabim+ subïdapa sur kaq lädunman tumanqa. Y Zin tsunyaq sitiupam Cades-Barnëa+ sitiupa derëcha lädunman chanqa. Tsëpitanam Hazar-Addar+ markapa Azmon sitiuyaq chanqa. 5 Azmon sitiupitanam Egiptu pampaman chanqa, y Jatun lamarchömi* ushanqa.+

6 Inti o rupay jeqanan lädupa lindërunnam, Jatun lamarpa kuchun kanqa.+

7 Norti lädupa lindërunnam, Jatun lamarpita Hor jirkayaq ëwanqa.+ 8 Hor jirkapitanam Lebö-Hamat sitiupa*+ Zedad sitiuyaq+ chanqa. 9 Y Zifron sitiupa pasarmi Hazar-Enan sitiuyaq+ chanqa. Tsëmi norti kaq lädupa lindërun kanqa.

10 Inti o rupay yarqamunan lädupanam, Hazar-Enan sitiupita Sefam sitiuyaq kanqa. 11 Sefam sitiupitanam Riblä markayaq pasanqa. Tsëqa Ain sitiupa inti o rupay yarqamunan lädunchömi këkan. Urarkurnam Kinëret qochapa*+ inti o rupay yarqamunan lädumpa tsimpanqa. 12 Y Jordan mayupa* pasarmi Kachi lamarchö ushanqa.+ Tsëmi chaskiyänëki markakunapa lindërun kanqa’”.+

13 Tsënam Moisesqa israelïtakunata kënö nirqan: “Kë markakunataqa Teyta Jehovä mandakunqannömi, Israelchö isqun kastakunata y Manasespa pullan kastankunata sorteupa entregayänëki.+ 14 Tsënöqa kanqa, Rubenpa kastankuna, Gadpa kastankuna y Manasespa pullan kastankuna, markankuna chaskishqana kayaptinmi.+ 15 Pëkunaqa Jordan mayupa* inti o rupay yarqamunan lädunchömi markankuna chaskiyashqa.+ Tsëqa këkan Jericö markapa lädunchömi”.

16 Tsëpitanam Teyta Jehoväqa Moisesta kënö nirqan: 17 “Sacerdöti Eleazar+ y Nunpa tsurin Josuëmi+ markëkikuna entregayäshunki. 18 Y kastanchö kaqkunata chakrankuna entreganampaqmi, cada kastapita juk dirigeqta akrayänëki.+ 19 Judäpa+ kastankunapitaqa, Jefunëpa tsurin Calebmi+ kanqa. 20 Simeonpa+ kastankunapitanam, Amihudpa tsurin Semuel kanqa. 21 Benjaminpa+ kastankunapitanam, Kislonpa tsurin Elidad kanqa. 22 Danpa+ kastankunapitanam, Joglïpa tsurin Buquï kanqa. 23 Josëpa+ tsurin Manasespa+ kastankunapitanam, Efodpa tsurin Haniel kanqa. 24 Efrainpa+ kastankunapitanam, Siftanpa tsurin Quemuel kanqa. 25 Zabulonpa+ kastankunapitanam, Parnacpa tsurin Elizafan kanqa. 26 Isacarpa+ kastankunapitanam, Azanpa tsurin Paltiel kanqa. 27 Aserpa+ kastankunapitanam, Selomïpa tsurin Ahihud kanqa. 28 Neftalïpa+ kastankunapitanam, Amihudpa tsurin Pedahel kanqa”. 29 Pëkunam Teyta Jehovä mandakunqannö, israelïta mayinkunata Canaan markakunachö chakrankuna entregayanqa.+

35 Jordan mayupa* amänunchö y Jericöpa frentin Moab pampachömi,+ Teyta Jehoväqa Moisesta kënö nirqan: 2 “Israelïtakunatam ninëki, chaskiyanqan markakunapita wakin kaqta levïtakunata entregayänampaq.+ Tsënöllam tsë markakunapa amänunchö qewayoq chakrakunatapis entregayänan.+ 3 Levïtakunaqa entregayanqëki markakunachömi kawayanqa, y qewayoq chakrakunanam wäkankunata y wakin animalninkunata wätayänampaq kanqa. 4 Animalninkunata wätayänampaq qewayoq chakrakunaqa, markapa murällampitam cuatrocientus cuarenta y cincu metrus* kanan. 5 Tsë chakrakunataqa kënömi midiyänëki: murällampa chuskun esquïnampitam, ochocientus noventa metrusta midiyänëki. Tsënöpam tsë chakrakunapa anchun y largunqa, ochocientus noventa metrus kanqa.

6 Levïpa kastankunata entregayanqëki markakunapitaqa, joqta markakunam pitapis wanutseq nuna+ qeshpir ëwanampaq kanqa.+ Tsë markakunawan juntum, kawayänampaq cuarenta y dos markakunata entregayänëki. 7 Levïpa kastankunata entregayänëki markakuna y amänunchö qewayoq chakrakunaqa,+ cuarenta y öchum kanqa. 8 Israelïtakuna chaskiyanqampitam, tsë markakunataqa rakiyänëki.+ Mas markakunata chaskeqkunam masta entregayanqa, y mënusta chaskeqkunanam mënusta entregayanqa.+ Llapan kastakunam chaskiyanqan markakunapita Levïpa kastankunata rakipäyänan”.

9 Tsëpitanam Teyta Jehoväqa Moisesta nirqan: 10 “Israelïtakunatam ninëki: ‘Jordan mayuta* tsimpar Canaanchö markakunaman yëkurqa,+ 11 pitapis accidentipa wanutseq qeshpir ëwanampaqmi,+ fäcil chäna markakunata akrayänëki. 12 Tsë markakunamanmi pitapis accidentipa wanutseq nuna qeshpir ëwanan,+ tsënöpa juezkuna manaraq juzgayaptin, wanushqa nunapa familian mana wanutsinampaq.+ 13 Tsëpaqmi entregayanqëki joqta markakuna kanqa. 14 Kima markakunam Jordan mayupa* kë tsimpanchö kanqa,+ y kima markakunanam Canaan markakunachö kanqa,+ pitapis wanutseq nuna tsë markakunaman qeshpir ëwanampaq. 15 Tsë markakunaqa kanqa, israelïta mayikikuna, forastërukuna+ y qamkunawanna kawaq nunakuna, pitapis accidentipa wanutsir tsëman qeshpir ëwayänampaqmi.+

16 Peru pï nunapis, imapis fiërrupita rurashqawan maqar nuna mayinta wanutsiptinqa, kikintapis wanutsiyänanmi.+ 17 Y pï nunapis rumiwan nuna mayinta wanutsiptinqa, tsë nunaqa asesïnum, kikintapis wanutsiyänanmi o wañutsiyänanmi. 18 Tsënöllam pï nunapis, imapis qerupita rurashqawan nuna mayinta wanutsiptinqa, kikintapis wanutsiyänan.

19 Wanushqa nunapa familianmi, mëchöpis tarinqanchö tsë asesïnu nunata wanutsinan. 20 Pï nunapis nuna mayinta chikiparnin wanoqpaq kumarkuptin,* mana allita rurëta munarnin imawampis wanoqpaq chëkatsiptin,+ 21 o chikiparnin maqar wanutsiptinqa, wanushqa nunapa familianmi, mëchöpis tarinqanchö wanutsinan.

22 Peru pï nunapis mana cuentata qokushpa o mana chikipëkarnin pitapis kumarkuptin,* imawampis wanoqpaq chëkatsiptin,+ 23 mana cuentata qokushpa mana chikipanqan nunata rumiwan wanoqpaq chëkatsiptin o jananman rumita kachëkuptinqa, 24 kë mandakunqänömi Israelchö juezkunaqa, asesïnu nunapaq y wanushqa nunapa familiampaq justiciata rurayänan.+ 25 Mana culpayoq kaptinqa, wanushqa nunapa familian mana wanutsinampaqmi, juezkunaqa qeshpir ëwanqan markaman tsë asesïnu nunata kutitsiyänan. Y sagrädu aceitiwan akrashqa mandakoq sacerdöti+ wanunqanyaqmi tsë markachö kawanan.

26 Peru nuna mayinta wanutseq o wañutseq nuna markapita yarquptin, 27 wanushqa nunapa familian tarïkur wanutsiptinqa, manam wanutsinqampita culpayoqtsu kanqa. 28 Pï nunapis nuna mayinta wanutsirqa, mandakoq sacerdöti wanunqanyaqmi qeshpir ëwanqan markachö kawanan, y mandakoq sacerdöti wanuptinran markanman kutita puëdinqa.+ 29 Mëchö kawarnimpis tsënö cäsukuna pasaptinqa, Teyta Dios mandakunqannömi qamkuna y tsëpita yureq tsurikikunapis rurayänëki.

30 Pï nunapis nuna mayinta wanutsiptinqa, ishkaq o masraq rikashqa kayaptinran+ tsë nunata wanutsiyänëki,+ manam juk nunalla rikashqa kaptinqa. 31 Asesïnu nuna wanuyta mantsar pagakuyta munaptinqa manam chaskiyänëkitsu, nuna mayinta wanutsishqa karmi wanunan o wañunan.+ 32 Y pï nunapis mandakoq sacerdöti manaraq wanuptin, markanta kutikuyta munar pagakuyta munaptinqa, manam chaskiyänëkitsu.

33 Mëqëkipis nuna mayikikunata wanutsiyaptikiqa, kawayanqëki markakunam Teyta Diospa rikënimpaq limpiutsu kanqa.+ Y Teyta Diospa rikënimpaq limpiu kanampaqqa, tsë asesïnu nunataran wanutsiyänëki.+ 34 Teyta Jehoväqa noqantsikwanmi këkan, tsëmi kawanqantsik markakunaqa rikënimpaq limpiu kanan’”.+

36 Tsëpitanam Galaadpa kastankunapita dirigeqkunaqa, Moisesman y israelïtakunata dirigeqkunaman ëwayarqan. Galaadqa Makirpa tsurinmi karqan,+ Makirnam Manasespa tsurin karqan y Manasesnam Josëpa tsurin karqan. 2 Y chëkurmi kënö niyarqan: “Teytallë, Teyta Jehovämi nishurqëki israelïta mayintsikkunata sorteupa markankuna entreganëkipaq.+ Tsënöllam Teyta Jehoväqa kastäkuna Zelofehadpa warmi tsurinkunata chakrankuna entreganëkipaqpis nishurqëki.+ 3 Y pëkuna juk kasta israelïta mayintsikkunawan casakuyaptinqa, manam chaskiyanqan chakrakuna kastäkunapanatsu kanqa, sinöqa qowankunapa o runankunapa* kastankunapanam kanqa. 4 Kushikuypaq Watachöqa,+ tsë chaskiyanqan chakrakunaqa qowankunapa o runankunapa* kastankunapanam tikranqa, y manam kastäkunapanatsu kanqa”.

5 Tsëmi Moisesqa Teyta Jehovä mandaptin israelïtakunata kënö nirqan: “Josëpa kastankunaqa rasumpa kaqllatam nikäyan. 6 Zelofehadpa warmi tsurinkunapaqmi Teyta Jehovä këta nin: ‘Pëkunaqa papäninkunapa kastankunallawanmi piwan karpis casakuyänan. 7 Juk kasta chaskinqan chakrakunaqa, manam juk kastapa kanantsu. Sinöqa tsë kastallapam imëpis kanan. 8 Israelchö pï warmipis casakurqa, chaskiyanqan chakrakuna kastankunallapa kanampaqmi, papäninkunapa kastankunallawan casakunan.+ 9 Juk kasta chaskinqan chakrakunaqa, manam juk kastapa kanantsu. Sinöqa tsë kastallapam imëpis kanan’”.

10 Zelofehadpa warmi tsurinkunaqa, Moisesta Teyta Jehovä ninqannöllam rurayarqan.+ 11 Tsëmi Mahlä, Tirzä, Hoglä, Milcä y Noäqa, papänimpa kastankunallawan casakuyarqan.+ 12 Josëpa tsurin Manasespa kastankunallawanmi casakuyarqan. Tsënöpam chaskiyanqan chakrakunaqa, papäninkunapa kastankunallachö quedarqan.

13 Jordan mayupa* amänunchö y Jericöpa frentin Moab pampachö këkäyaptinmi, Moisesqa Teyta Jehovä ninqannölla, tsë mandakuykunata y leykunata israelïtakunata willarqan.+