Llapan pruëbantsikkunachömi Jehoväqa shoqamantsik

1, 2. ¿Imanötaq Jehoväqa shoqamantsik, y imatataq Palabranchö änimantsik?

JUK jövinlla wawqim yarpachakïkänaq 1 Corintius 7:28 textuchö “casakoq kaqkunaqa kawëninkunachömi mëtsika sufrimientukunayoq kayanqa” ninqanman. Tsëmi casakushqana Stephen jutiyoq anciänuta tapurqan, “mëtsika sufrimientukunayoq” këqa ima ninan kanqanta, y imëllapis casakurnin tsëpa pasar imanö altsanampaq kaqta. Stephenqa ‘tukïnöpa shoqakoq Diosqa, [...] llapan pruëbantsikkunachömi shoqamantsik’ ninqanmampis pensanampaq nirqan (2 Cor. 1:3, 4).

² Awmi, problëmakunapa pasashqa shoqamaqnintsik juk kuyakoq teytam Jehoväqa. Itsa Palabran Bibliawan imanö yanapashunqëkita yarpanki. Unë witsan sirweqninkunapaq alli kaqta munanqannöllam, noqantsikpaqpis alli kaqllata munan (leyi Jeremïas 29:11, 12a).

3. ¿Ima tapukïkunataq contestashun?

³ Casädu kawëchö y familiachö imanir pruëbakuna y problëmakuna kanqanta musyarninqa, mas fäcil-llam tsarakushun. Tsëqa, ¿imaraq chätsimashwan Pablu ninqan ‘mëtsika sufrimientukunaman’? ¿Bibliata qellqayanqan witsan y kanan witsampis ima pasanqankunataq shoqakïta qomashwan? Kë tapukïkunapa respuestanta musyanqantsikqa, tsarakurnin sïguinapaqmi yanapamäshun.

CASÄDU KAWËCHÖ ‘MËTSIKA SUFRIMIENTUKUNA’

4, 5. Casädu kawakïchö ima sufrimientukuna kanampaq kaqta willakaramï.

⁴ Adantawan Ëvata Dios casatsirninqa kënömi nirqan: “Tsërëkurmi ollquqa jaqirinqa mamanta y teytanta warminwan juntakänampaq. Y ishkankunapis juk ëtsallanam kayanqa” (Gen. 2:24). Jutsasapa karninmi, casakurirninqa ima problëmallapapis pasashun (Rom. 3:23). Teytakuna rurayanqan cargutaqa ollqu kaqmi chaskin, porqui Diosmi pëkunata churashqa warmimpa dirigeqnin kanampaq (1 Cor. 11:3). Itsa wakin ollqukunapaqqa familianta diriginanqa fäciltsu kanqa, y wakin warmikunapaqqa teytankunapa rantin qowantana cäsuyänanqa fäciltsu kanqa. Y kastankunawan problëmakuna kanqampis, tsëraq casakushqakunataqa llakitsinmanmi.

⁵ Wamrayoq kayänampaq kaqta musyarirnäqa masnam yarpachakuyanqa. Kushishqa sientikurnimpis, qeshyaq kanqan witsankuna salornin imanö kanampaq kaqmanmi yarpachakuyan. Jina mas gastukunanam kanqa. Peru manam tsëllatsu, warmi kaqqa llulluntanam masqa atiendinqa, y ollqu kaqnam familianta manteninampaq masna trabajanqa. Tsëmi ishkankuna juntu kayänampaq tiempunkuna kanqanatsu.

6-8. ¿Imanötaq sientikuyan wamrayoq këta mana puëdeq kaqkuna?

⁶ Wakin casädukunaqa alläpa munarnimpis, manam wamrayoq këta puëdiyantsu. Casädu kë ni wamrayoq këpis, manam yarpachakïkunapitaqa librakuntsu. Peru wamrayoq këta alläpa munëkar mana puëdiqa, alläpam llakitsikunman. Wakin warmikunaqa wamrayoq këta mana puëdirmi alläpa llakikuyan (Prov. 13:12). Biblia qellqakanqan witsanqa, mana wamrayoq këqa penqakïpaqmi kaq. Jacobpa warmin Raquelqa mana wamrayoq karnin, y nanan wamrayoq kanqanta rikarmi alläpa llakikurqan (Gen. 30:1, 2). Wakin nacionkunachöqa, atska wamrayoq këqa alläpa precisanqantam nunakuna niyan. Tsëmi tsëchö yanapakoq misionërukunata tapupäyan, imanir wamrankuna mana kayäpunqanta. Pëkuna shumaq willariyaptimpis, nunakunaqa kënömi niyan: “¡Allaw! Qamkunapaqmi mañakayämushaq”.

⁷ Inglatërra nacionchö juk cristiänam, wamran kananta alläpa munarqan. Pëta ima pasanqanta rikärishun. Mayorna karnin wamrayoq manana kanampaq kaqta musyarmi alläpa llakikurqan. Tsëmi, qowanwan juk wamrata adoptayänampaq decidiyarqan. Tsënö kaptimpis pëqa kënömi nirqan: “Wanupakushqanömi sientikurqä, porqui musyarqämi kikïpa wamranöqa mana kanampaq kaqta”.

⁸ Warmikunapaqmi Bibliaqa kënö nin: “Warmiqa següru kanqa wamrakunayoq karmi” (1 Tim. 2:15). Peru kë textuqa manam imëyaqpis kawakïta tarinapaqqa wamrayoqraq kanantsiktatsu nikan, sinöqa wamrayoq y familiayoq warmiqa manam nunakunapa wasan rimanampaq; ni wakinkunapa asuntunkunaman mëtikunampaq tiempun kanqanatsu (1 Tim. 5:13). Peru tsënö kaptimpis casädu kawakïninchö y familianchöqa problëmakuna kanqam.

9. ¿Imanirtaq majantsikta oqrëqa alläpa llakikïpaq pruëba kanman?

⁹ Casädu kawëchö problëmakunapaq pensarninqa, juknin maja wanunampaq kaqmanqa manam ni ichikllapis pensarintsiktsu. Majanta oqrashqa kaqkunaqa itsa imëllapis pensayarqantsu tsëpa pasayänampaq kaqtaqa. Peru wanushqakuna kawariyämunampaq kaqta Jesus änikunqanmanmi, cristiänukunaqa alläpa confiakuyan. Tsëqa majankunata wanïchö oqraqkunatapis alläpam shoqan (Juan 5:28, 29). Tsënömi kuyakoq Teytantsikqa tsënöpa pasëkaqkunata Palabranwan shoqan y yanapan.

¿IMANÖTAQ PRUËBAKUNAPA PASARNINQA SHOQAKÏTA TARISHWAN?

10. ¿Imataq Änata shoqarqan? (Rikäri kë yachatsikïpa qallananchö këkaq dibüjuta).

¹⁰ Elcanä nunapa kuyashqan warmin Änaqa manam wamrayoq këta puëdirqantsu, peru juknin kaq warmin Peninäqa wamrayoqmi karqan (leyi 1 Samuel 1:4-7b). Wata watam Peninäqa Änapita burlakoq, tsëmi alläpa llakitseq. ¿Imataq Änata shoqarqan? Bibliachöqa nin problëmanta willarnin ‘Jehoväpa puntanchö unëpa mañakunqantam’. Awmi, pëqa segürum karqan mañakïninta Dios wiyanampaq kaqta. Tsëpitaqa “llakishqa këninqa mananam qaqllanchö rikakurqannatsu” (1 Sam. 1:12, 17, 18). Pëqa confiakurqanmi wamrayoq kanampaq Jehovä yanapanampaq kaqta o juknöpapis shoqanampaq kaqta.

11. ¿Imanötaq mañakïqa shoqamantsik?

¹¹ Jutsasapa këkarnin y Satanaspa makinchö mana cäsukoq nunakuna këkäyaptinllaraqqa, pruëbakunapa pasëkäshunllam (1 Juan 5:19). Peru musyantsikmi ‘tukïnöpa shoqakoq Diosqa’ yanapamänantsikpaq kaqta. Shonqupita patsë Jehoväman mañakushqaqa, Änatanömi problëmakunapa pasashqapis yanapamäshun. Peru manam problëmantsikkunallatatsu willanantsik; sinöqa Änanömi imanö sientikunqantsiktapis willanantsik y yanapamänapaqmi shonqupita patsë rogakunantsik (Filip. 4:6, 7).

12. ¿Imataq Änata yanaparqan kushishqa kanampaq?

¹² Wamrayoq këta mana puëdirnin o kuyashqa familiantsik wanuriptin alläpa llakikurnimpis, shoqakïtaqa tarita puëdintsikmi. Yarpärishun Jesus kawanqan witsan Diospita willakoq Äna warmiman. Qanchis watallaraq casäda këkaptinmi qowan wanukïkurqan, y wamrayoq kanqantaqa manam Bibliachö willakuntsu. Peru 84 watayoqna këkarpis, pëqa “manam ni imëpis templuman ëwëta jaqeqtsu, y ayunar y rogakurmi paqasta junaqta Diosta sirweq” (Lüc. 2:37). Jehoväta mana jaqipa sirwinqanmi, Änataqa alläpa kushitsirqan.

13. Congregacionchö amïgukuna imanö yanapakuyanqanta, juk pasakunqanwan willakaramï.

¹³ Jina congregacionchö amïguntsikkunapis yanapamënintsikta puëdiyanmi (Prov. 18:24). Paulawan pasakunqanta rikärishun. Jehoväta mamänin jaqiriptinqa, alläpam llakikurqan. Tsëqa manam fäciltsu karqan, porqui tsë witsanqa pitsqa watayoqllaraqmi karqan. Peru tiempuwanqa, congregacionchö Ann jutiyoq juk precursöra Diospita yachatsir yanapanqanqa, alläpam kushitsirqan. Paulaqa kënömi willakun: “Familiä mana këkarpis, Ann kuyamanqan y noqaman yarpachakunqanqa alläpam yanapamarqan Jehoväta sirwirnin sïguinäpaq”. Y congregacionman maman kutiriptinqa, Paulaqa alläpam kushikurqan. Y Ann panipis, Jehoväta mana jaqinampaq Paulata yanapanqampitaqa kushishqam sientikun.

14. ¿Imanötaq wakinta shoqanqantsikqa yanapamantsik?

¹⁴ Wakinkunata kuyarnin yanapakurqa, problëmantsikkunapita mananam alläpaqa llakikushunnatsu. Casäda o mana casäda karnimpis, mëtsika cristiänakunam musyayan, Diospa Gobiernumpita alli willakïkunata yachatsikïqa kushikïta apamunqanta. Tsëmi, Jehoväpa munëninta rurëta imëpis munayan. Y wakinkunataqa Diospita yachatsikïqa, jampi cuentam alläpa yanapan. Cristiänu mayintsikkunaman y yachatsinqantsik nunakunaman yarpachakunqantsikqa, congregacionchö juknölla kanapaqmi yanapakun (Filip. 2:4). Tsëtam apostol Pablupis rurarqan. Tesalönica markachö këkaq cristiänukunataqa juk ‘mama’ cuentam cuidarqan y teytan cuentam shoqarqan (leyi 1 Tesalonicensis 2:7, 11, 12).

FAMILIACHÖ SHOQAKÏ

15. Wamrankunata yachatsiyänampaqqa, ¿pikunataq carguyoq kayan?

¹⁵ Jina congregacionchö familiakunata shoqarnin yanapëqa, alläpam precisan. Höraqa, tsëllaraq bautizakushqakunaqa wamrankunata imanö yachatsiyänampaqmi, Jehoväta unëna sirweqkunata consëjuta mañakuyan; hasta wamrankunata Bibliapita yachatsiyänampaqpis niyanmi. Peru wamrankunata yachatsiyänampaqqa teyta kaqkuna carguyoq kayanqantam Diospa Palabranqa nin (Prov. 23:22; Efes. 6:1-4). Y wamrankunata yachatsiyänampaq jukkuna yanapayaptimpis, kikinkunam wamrankunataqa yachatsiyänan. Tsëmi teytakuna wamrankunawan imëpis parlayänanqa alläpa precisan.

16. Juk wamrata yachatsinapaq nimashqaqa, ¿imakunatataq yarpänantsik?

¹⁶ Juk teyta wamranta Bibliapita yachatsinapaq nimashqaqa, teytan mana kanqantsiktam yarpänantsik. Itsa hörataqa mana testïgu kaqkunapa wamrankunata Bibliapita yachatsishun. Tsënö pasakuptinqa, yarpänantsikmi Diospita yachatsirninqa manam teytantsu o mamantsu tikrarintsik. Tsëmi mas alli kanman, wayinchö teytankunapa o juk poqushqa cristiänupa rikëninchö yachatsinqantsik. Peru manam japallantsikllaqa wayi rurinchö yachatsishwantsu, tsënöpa wakinkuna mana allita mana pensayänampaq. Itsa tiempuwanqa, Jehovä mandakunqannö teytankunana Diospita yachatsiyanqa.

17. ¿Imanötaq wamrakunaqa shoqakï cuenta kayan?

¹⁷ Jehoväta cäsukïta y kuyëta yachakushqa jövinkunaqa teytankunata respetarnin, wanayanqankunachö yanaparnin y familiankuna Diospa kaqchö alli kayänampaq yanapakurninmi juk shoqakï cuenta kayan. Apäkï Tamya manaraq kaptinmi, Setpa tsurin Lamecqa Jehoväta adorarqan. Pëmi puntallapitana tsurin Noëpaq kënö willakurqan: “Kë patsata Jehovä maldecishqa kaptimpis, trabajarnin alläpa mana sufrinapaqmi kë wamraqa shoqakïta apamunqa”. Tsënö ninqanqa cumplikarqan, Patsata yapë manana maldecinampaq Jehovä ninqanwanmi (Gen. 5:29; 8:21). Kanan witsan Diosta mana jaqipa sirweq wamrakunaqa, shoqakï cuentam familiankunapaq kayan. Pruëbakunapa pasayaptin y Apäkï Tamyapitapis mas mantsanëpaq ushakë witsanchö salvakuyänampaqmi, familiankunata yanapëta puëdiyanqa.

18. ¿Imaraq yanapamäshun problëmakunapa pasar alleq tsarakunapaq?

¹⁸ Kanan witsan mëtsikaq nunakunam Diosman mañakurnin, Biblia willakunqankunaman yarpachakurnin y Diosta sirweqkunawan amïgu karnin shoqakïta tariyan (leyi Salmus 145:18, 19c). Jehovällam chipyëpaqa shoqamënintsikta puëdin. Tsëta musyanqantsikqa, kanan o shamoq tiempuchö ima pruëbapa o sufrimientupa pasashqapis yanapamäshunmi.