3 Problëmakuna kaptin alli tsarakunapaqmi yanapamantsik

Kanan witsankunaqa, manam wakin problëmankunapita librakïta puëdintsiktsu ni altsëtapis. Kuyashqa familiëki wanuptin o mana kachakaq qeshyawan karqa, itsapis alli tsarakunëkipaq tukï yanapakïkunata ashinëki precisanqa. ¿Bibliaqa tsëkunapa pasashqa yanapamënintsikta puëdinmantsuraq?

MANA KACHAKAQ QESHYAWAN KASHQA

Rösaqa kënömi willakun: “Kastäkuna qeshyayanqan qeshyallawanmi noqapis qeshyä, kë qeshyawanqa imëpis alläpam nanatsikü. Y alläpa qeshyapäkurmi unënönatsu kawä”. Bibliachö Diospita yachakunqan peqanman mana yëkuptinmi, Rösaqa alläpa yarpachakoq. Peru Mateu 19:26 textuchö Jesus kënö ninqanmi alläpa yanaparqan: “Diospaqqa llapampis puëdikanmi”. Rösaqa cuentatam qokurirqan juknöpapis yachakïta puëdinqanta. Alläpa nanapäkurmi leyitapis puëdirqannatsu, tsëmi Bibliata y publicacionkunata grabashqatana wiyar qallëkurqan.a Tsënö yanapakï mana kaptinqa, manachi Diospita yachakïta puëdinmantsu karqan.

Unënölla imatapis rurëta mana puëdirmi, Rösaqa alläpa llakishqa sientikun. Tsënö sientikunqan höram, 2 Corintius 8:12 textuchö kënö ninqan alläpa yanapan: “Sitsun ras rurëta munë puntachö kanqa, tsëqa, nuna kapunqanmannö qonqanmi Diostaqa kushitsin, y manam mana kapunqanmannö qonqantsu”. Kë textuqa, llapan puëdinqanmannö sirwiptin Dios alläpa kushishqa këkanqantam yarpätsin.

KUYASHQA KASTANTSIK WANUPTIN

Punta kaq yachatsikïkunachö parlanqantsik Diänaqa, kënömi pasanqanta yarpan: “18 watayoqllaraq këkar warmi wamrä wanukïkuptinqa, alläpa llakikurninmi wanukïta munarqä y punta kanqannöna imapis mana kanampaq kaqtam pensarqä”. Diänataqa Salmus 94:19 textum alläpa yanaparqan, tsëchöqa kënömi nin: “Imëkapaq yarpachakïnïkuna noqachö alläpa kaptinmi, shoqakïniki almäta shullpapar qallëkurqan”. Jina Diänaqa kënömi nirqan: “Alläpa mana llakikunäpaq ima rurëllatapis tarinäpaqmi, Jehoväta mañakurqä”.

Diänaqa Diospita yachatsikurmi qallëkurqan, y tsëta rurarmi alli sientikoq. Tiempu pasariptinqa, wamrakuna utilizäyanqan crayölanö sientikurqan. Porqui tsë crayölawanqa, pakiriptimpis pintëtaqa sïguiyanmi. Tsënöllam pëpis cuentata qokurirqan, alläpa llakishqa sientikurpis wakinkunata yanapëta puëdinqanta. Diänaqa kënömi willakun: “Yachatsinqä nunakunata shoqanäpaq Biblia ninqanwan yanapanqä y shumaq entienditsikunqäqa, noqatapis Jehovä alläpa shoqamanqantam cuentata qokurirqä”. Diänaqa tsënö llakikïkunapa pasashqa nunakunapa jutinkunatam Bibliachö ashir qallëkurqan. ¿Y imanö kayanqantataq musyarirqan? Llapankunapis Diosta mañakoq kayanqantam. Jinamampis, Bibliata leyirninlla tapukïninkunapa respuestankunata musyanampaq kaqtam yachakurqan.

Jina Diänaqa këtapis Bibliachö yachakushqam: pasanqankunaman yarparänampa rantin, shamoq tiempuman yarparë mas alli kanqanta. Hëchus 24:15 textuchö kënö ninqanmi pëtaqa alläpa yanapashqa: ‘Alli kaqta ruraqkuna y mana allita ruraqkunam kawariyämunqa’. ¿Diänaqa wamranta Jehovä kawaritsimunampaq kaqta creinku? Pëmi kënö willakun: “Wamrä kawarimunampaq kaqtaqa segürum këkä. Porqui ciëluchö këkaq Teytäqa musyannam imë junaq yapë rikänakuyänäpaq kaqta. Kawarimunqan junaq wamräwan huertächö këkaqnönam sientikü y tsë junaqtaqa wamrä yurikunqan junaqta yarpanqänöllam yarpä”.

a Tsë grabacionkunaqa cäsi llapanmi jw.org päginachö këkäyan.

Bibliaqa imëka mana allikunapa pasashqapis shoqamantsikmi

¿IMANÖTAQ DIOSQA YANAPAMANTSIK?

Bibliachömi kënö nimantsik: “Palabranta respetarnin llapan qayakoqninkunapa lädunchömi Jehoväqa këkan. Respetaqninkuna munayanqantam ruranqa, y qayakïninkunataqa wiyanqam, y salvanqam” (Salmus 145:18, 19). ¡Imanö shumaqmi këta musyëqa! Peru ¿imanötaq Diosqa mañakushqa yanapamantsik?

KALLPATA QOMARNINTSIK

Problëmakunaqa qeshyanätsimantsik, yarpakachätsimantsik y Diospa kaqta ruranqantsikchömi qelanätsimantsik (Proverbius 24:10). Peru Jehoväqa, “utishqa kaqkunatam kallpankuna qoykan y kallpannaq këkaqkunatam kallpayoqta tikratsin” (Isaïas 40:29). Imëka mana allikunapa pasashqa karnin y alli tsarakushqa karninmi, apostol Pabluqa kënö nirqan: “Dios kallpata qomaptinmi imëkapaq kallpä kan” (Filipensis 4:13). Diosqa santu espïritunwanmi alli tsarakunampaq yanaparqan, y tsënöllam qamtapis mañakuptikiqa yanapashunki (Lücas 11:13).

YACHAQ KËTA QOMARNINTSIK

¿Imaraq yanapamäshun Bibliata alleq entiendinapaq y yachakunqantsikmannö kawanapaq? Apostol Santiägum kënö nirqan: “Sitsun qamkunachö pipapis yachënin pishinqa, tsëqa Diosta mañakurnin sïguitsun, porqui pëqa llapankunatam shonqupita patsë mëtsikata qon, y manam qokunqampita imatapis nikuntsu, y tsënö mañakurqa chaskinqam” (Santiägu 1:5). Mañakunqantsiknö ruranapaqqa, Bibliatam leyinantsik y yachakunqantsikmannömi kawanantsik (Santiägu 1:23-25). Tsëta rurarqa, Bibliapa consëjunkuna alläpa yanapakoq kanqantam cuentata qokushun.

YAMË KËTA QOMARNINTSIK

Alläpa llakikushqaqa, Jehovämi yanapamantsik alli sientikunapaq. Palabranmi kënö nin: “Ama imapaqpis yarpachakur kayëtsu, sinöqa imëkachöpis mañakurnin y rogakurnin y jina agradecikurnin, yarpachakïnikikunata Diosta musyatsiyë; tsëqa imëka yarpachakïkuna janampa këkaq Diospa yamë këninmi, shonqïkikunata y pensënikikunata Cristu Jesusrëkur tsapanqa” (Filipensis 4:6, 7). Jehoväman mañakushun yamë këta qomänapaq.

Peru problëmantsikkuna mana raslla altsakaptinqa, ¿Diosnintsik qonqëkamanqantsiktatsuraq pensashwan? Manam. Porqui Jehoväqa kallpata y valortam qomantsik alli tsarakunapaq (1 Corintius 10:13). Jinamampis, Bibliaqa änimantsik ichikllachöna llapan problëmantsikkuna chipyëpa ushakärinampaq kaqtam.