Ashishun wiyakï munaqkunata
1. ¿Imanötaq rikätsikuntsik yachatsikïnintsik alläpa väleq kanqanta?
1 Jesusqa tukïnöpam alli willakïkunata chätsita tïrarqan alli shonquyoq nunakunaman (Isa. 61:1, 2). Pëmi noqantsiktapis yachatsikoq kachamashqantsik y shutinchömi yachatsikuntsik, tsëta kushikurmi pë ruranqannölla noqantsikpis wiyakï munaqkunata markantsikchö tukïnöpa y mana utishpa ashinantsik (Mat. 10:11; 2 Cor. 5:20).
2. ¿Imanötaq musyantsik Pablu më tsëchöpis yachatsikonqanta, y pitataq tsënö yachatsikonqan yanaparqan?
2 Më tsëchöpis yachatsikushun: Judïokuna y mana judïokuna ëllukäyänan wayikunamanraqmi apóstol Pabluqa imëpis yachatsikoq ëwaq (Hech. 14:1). Pero Filipos markachöqa, nunakunata tariyänanrëkurmi “Diosman mañacuyänan sitiu[ta]” ashirnin Silaswan ëwayarqan. Tsëchömi atska warmikuna këkaqta taririrnin yachatsiyarqan, tsënöpam Lidia shutiyoq warmipis cristiana tikrarerqan (Hech. 16:12-15).
3. Wayin wayin yachatsikurpis, ¿hina mëkunachötaq y imanötaq yachatsikushwan?
3 ¿Wayin wayin ëwarllatsuraq yachatsikushwan? ¿Manatsuraq yachatsikushwan cärrota shuyäkuyänan sitiokunachö, parquekunachö, oficïnakunachö, pï më puriyänan nänikunachö, qatukuyänankunachö y hatun tiendakunachö? Yëkunata mana haqikuyänan wayikunachö o täpaqyoq wayikunachö yachaqkunataqa, itsa cartapa o telëfonopa yacharatsishwan. Nunakunata mëchö más tarina kanqanta musyar y më tsëchöpis yachatsikorqa, Jesus mandamanqantsikchö ‘masmi uryashun’ o arushun (1 Cor. 15:58).
4. Hina, ¿imataraq rurashwan markantsikchö yachatsikunapaq territoriokuna pishiptenqa?
4 Más yachatsikuyänanrëkurmi wakin publicadorkunaqa huk congregacionpa o huk nacionpapis ëwayashqa. Hina wakinkunaqa huk idioma parlaq nunakunata yachatsiyänanrëkurmi, huk idiömata parlëta yachakuyashqa.
5. ¿Imanö tiempochönataq kawëkantsik, y imata ruranapaqtaq alli kallpachakunantsik?
5 Ama qonqëtsu, hinantin chakrakuna cuentaqa llapan ‘nunacunam cayan’ (Mat. 9:37; 13:38). Kë mana alli tiempo ushakänanna këkaptenqa, llapantsikmi más yachatsikunantsikrëkur alli rikänantsik tiempontsikta, y mëkunachö yachatsikïta puëdenqantsikta y imanö más yachatsikunapaq kaqtapis. Diospa Gobiernonta puntaman churashqaqa, llapan ruranqantsikchömi bendecimäshun (Mat. 6:33).