Jehoväpa Testïgonkunata Pushaqkunapa cartan
Kuyashqa wawqikuna y panikuna:
Alläpa kushishqam qellqarayämö 7 millonpitapis masna Jehoväta mana jaqishpa sirweq cristiänokunaman. Juk nacionpita cristiano mayintsikwan reqinakurir, ¿imanötaq sientekuriyanki? Unëna reqinakushqanömi kuyanakuyanqëkita rikätsinakuriyanki (Juan 13:34, 35). Tsënöllam, kë Anuariochö wawqintsikkuna y panintsikkuna tukïkunata pasayanqanta leir, imëka reqiyashqëkipaqnö kuyayanqëkita sienteriyanki.
Jinantin Patsapita informekunam rikätsikun, Diosta Adorana Hörata mana jaqita rurëkäyanqëkita. Wamrayoq kaqkunaqa tukïtam rurayashqa wamrankuna Diospita alli yachakuyänanrëkur (Efe. 6:4). Casädokunapis Diosta Adorana Hörata cumpliyanqanrëkurmi más kuyanakïkäyan (Efe. 5:28-33). Awmi, soltero kaqkuna y casado kaqkunapis masmi Diospa Palabrampita yachakïkäyan juk paqasta yachakuyänanrëkur rakiyanqampita (Jos. 1:8, 9).
Alläpam yarparäyä tukï desgraciakuna kaptin cristiano mayintsikkuna imëkankunata oqrayanqampaq. Jina kë cartawanmi gracias niriyaq yanapakoq ëwashqa cristiänokunata (Hech. 11:28-30; Gal. 6:9, 10). Y desgraciapa pasashqa cristiänokunapa imëkankuna pisheqta rikarmi congregacionkunachö kaqkunapis imëkata rurayashqa yanapayänanrëkur, unë tiempo Dorcas cristiänanömi “allapa allicunata rura[r], y wactsacunatapis puede[yanqëquimanno] yanapa[yarqonqui]” (Hech. 9:36). Ama qonqayankitsu Jehová Diosnintsik tsë llapanta rikëkämunqanta y qamkunatapis bendeciyäshunëkipaq kaqta (Mat. 6:3, 4).
Wakinnikikunataqa mana alli juezkunam kikinkuna leyninkuna churarkur ñakatsiyäshurqunki o jipatsiyäshurqunki (Sal. 94:20-22). Tsënö mana allikunata rurayäshunëkipaq kaqta Jesus parlanqanta musyarmi, Jehoväman markäkur o yärakur alli tsarakuyarqunki (Juan 15:19, 20). “Imarecur creyicuyanqequita pipis tapuyäshuptiqui, shumaq cäyitsiyänequipaq listu” këkäyänëkipaqmi, Jehová yanapayäshunëkipaq imëpis mañakëkäyämö (1 Ped. 3:13-15).
Ollqutapis y warmitapis Satanás lluta punukïman ishkikätsiptinmi, qamkunaqa limpio kawakïkäyanki y tsëqa alläpa kushikïpaqmi. Mana alli rurëkuna más mirakïkaptimpis, qamkunaqa ‘callpata tsarirmi Jesucristuman marcäcur’ ‘pepa poderninwan allapa’ puëdeq këkäyanki (Efe. 6:10). Qamkunaqa “Teyta Dios qoyäshonqequi llapan armacunawan[mi] cuida[quicayanqui]. Tsemi alli firmi tsaracuyanqui diablupa engañunman mana ishquiyänequipaq” (Efe. 6:11, 12). ¡Yarpäyë, qamkunapa alli portakïnikikunawanmi Jehoväqa rikätsikïkan Satanás ulikoq o llullakog kanqanta! (Pro. 27:11.)
Alläpa kushikurmi willariyaq 2011 watachö Jesus wanunqanta yarpänapaq 19.374.737 nunakuna ëllukäyanqampita o gorikäyangampita. Tsënö mëtsikaqqa ëllukäyashqa, qamkuna precursor auxiliarnö abril killachö alläpa yanapakuyanqëkipitam. ¡Jinantin Patsachö nunakunam wiyayashqa Testïgonkuna juknölla Jehoväta alabayanqanta! (Rom. 10:18.) 2.657.377 precursor auxiliarkunawan sirwishqa kar o precursor këta mana puëdeshqa karpis llapan shonqïkikunawanmi atska hörakuna Jehoväta sirwiyarqunki. Tsënö yanapakuyanqëkiqa alläpam kushïkatsiyäman (Sal. 110:3; Col. 3:23).
Jehoväpa yanapakïninwanmi, qanyan wata 263.131 nunakuna bautizakuyarqan. Kë llapampitam alläpa Jehoväta agradecikuyä y qamkunatapis pï më nunakunata Apocalipsis 22:17 (NM) texto ninqannö invitakayämunqëkipita: “Santo espïrituwan noviam, imëpis nikäyan: ‘¡Shamï!’. Wiyaqkunapis niyätsun: ‘¡Shamï!’. Y yakunaq kaqkuna shamurnin kawatsikoq yakuta debaldilla upuyätsun”. Diospa Gobiernon tukïta ruramunampaq kaqkunata 2011 wata asamblëachö yachakunqantsikpita patsëmi, llapan kallpantsikwan, ‘¡llapan nunacuna mandadiquicho catsun!’ nintsik. Jina Jesus, “shamunäpaqnam quecä” nishqa kaptinmi, apóstol Juannö “¡tseno callätsun! ¡Eucallämïna, Teyta Jesus!” nintsik (Apo. 22:20).
Pasakunampaq kaqkunaman mäkoq mäkoqlla këkäyë. Ama qonqayëtsu wawqikuna panikuna noqakuna alläpa kuyayanqaqta, qamkunaqa rasumpa kaqwan y ‘rureniquikunawanmi’ Jehoväta kuyayanqëkita rikätsikïkäyanki (1 Juan 3:18).
Wawqikikuna y turikikuna,
Jehoväpa Testïgonkunata Pushaq