Mana mantsakushpa yachatsikï rantikuyanqan sitiokunachö
1. Rantikuyanqankunachö yachatsikïta mantsapakurnin, ¿imanirtaq alläpa yarpachakushwantsu?
1 ¿Mantsakunkiku rantikuyanqan sitiokunachö yachatsikïta? Tsënö kaptinqa ama yarpachakïtsu, manam qamllatatsu pasashunki. Alli yachatsikoq këkarmi apóstol Pablupis mantsapakurqanraq yachatsikunampaq (1 Tes. 2:2). Qateqninchömi tarintsik kima tapukïkunata y respuestankunata, tsëmi yanapamäshun rantikuyanqankunachö imanö yachatsikunapaq.
2. ¿Imanirtaq pensashwantsu trabajaqkuna piñakuyänanta?
2 ¿Tiemponta perdetsinqätatsuraq trabajaqkuna pensayanqa? Atska negociokunachömi trabajaqkunaqa rurëkäyanqanta jaqiriyan nunakunata atiendeyänanrëkur. Tsëmi höraqa kushishqa chaskiyäshunki imallatapis rantinëkita pensar. Shumaq vestishqa kaptiki y shumaq trataptikiqa respëtowanmi rikäyäshunki.
3. ¿Imatataq rurankiman rantipaqninkunata mana shuyarätsinëkipaq?
3 ¿Atskaq rantipaqninkuna këkaptintsuraq yachatsishaq? Más alliqa kanman rantipaqninkuna mana alläpa kayanqan hora ëwanqantsikchï. Tsë negociota rikaq o trabajaq kaq japallan kanqan hörata shuyë y raslla parlapäri.
4. ¿Imanötaq parlapar qallankiman rantikuyänan sitiokunachö?
4 ¿Ima ninkimantaq? Atskaq trabajadorkuna kaptinqa tsë negociota rikaq encargädowan parlë. Itsa kënö ninkiman: “Rantikur trabajaqkunataqa manam wayinkunachö tariyätsu, tsëmi kë trabäjonman watukëkäyämö. Ocupado kayanqëkita musyämi, tsëmi raslla parlapäriyashqëki”. Rantikoq kanqëkita mana pensayänampaq allichi kanman donacionta mana mañanqëki, pero pillapis publicacionkuna ima qellëwan rurakämunqanta o maskunata musyëta munaptinqa allichi willarinkiman. Imanö negocio kanqanta rikëkurmi, encargädota nirinkiman wakin trabajadorkunawan raslla parlarinëkipaq. Pëkunatapis janachö yachakunqantsiknölla parlapë. Mëqan trabajadorpis alläpa ocupado këkaptinqa más ichikllata parlapärir tratädon jaqiri. Piwampis mana parlëta puëderqa, tapukuri jamakuyänankunachö y juk sitiokunachö publicacionkunata jaqita puëdenqëkita o manapis.
5. ¿Imanirtaq rantikuyanqankunachö mana mantsakïpa yachatsikushwan?
5 Jesuspis y Pablupis nunakuna trabajakuyänan sitiokunachömi mana mantsakushpa yachatsikuyaq y qampis pëkunanö rurëta puëdenkim (Mat. 4:18-21; 9:9; Hech. 17:17). Jehoväta mañakï mana mantsakushpa yachatsikunëkipaq (Hech. 4:29). Rantikuyanqankunachö yachatsikïqa alläpa allim, tsëchöqa nunakunata imëpis tarinkillam. ¿Tsë rurëta puëdenkimantsuraq?