Yachakïta munayänampaqnö yachatsikushun
1. ¿Imatataq yachakuntsik punta cristiänokuna Diospa kaqta tukïnöpa yachatsikuyanqampita?
1 Punta cristiänokunaqa tukï costumbreyoq y religionyoq nunakunamanmi alli willakïkunata chätsiyarqan (Col. 1:23). Pero më tsëchöpis tukïnöpam Diospa Gobiernompita yachatsikuyaq. Tsëmi juk kuti Diospa Palabranta respetaq judïokunata Pedru yachatsirqan profeta Joel willakunqampita (Hech. 2:14-17). Pero Pabluqa griego nunakunata juknöpa yachatsinqantam Hechos 17:22-31 texto willakun. Kanan witsampis wakin markakunachöqa Bibliata respetayanmi, tsëmi pëkunataqa Bibliapita parlapëta puëdentsik. Tsënö kaptimpis, mana cristiänokunawan, o Bibliata o religionta mana precisaqpaq churaqkunawan tinkurqa, capaz más alli kanqa Bibliapita defrente mana parlapänantsik.
2. ¿Imanötaq cada killachö yachatsikunapaq kaq publicacionkunata utilizashwan Bibliaman creeqkunata y mana creeqkunatapis yanapanantsikpaq?
2 Yachatsikunapaq kaq publicacionkunata shumaq utilizäshun. Kanan kaq sirwina watapita patsëqa cada ishkë killataran cambianqa ima publicacionkunawan yachatsikunapaq kaq, y tukï revistakunawan, tratädokunawan y follëtokunawan yachatsikunantsikpaqmi willakïkunachö yarqamunqa. Bibliapita parlëta mana munaq nunakunataqa capaz precisaqpaq churayanqan asuntokunapita parlapärishwan. Bibliapita mana parlapëkashqa y textota mana leikäpushqapis wiyakuptinqa, Kamakoqnintsikman y Palabranman creikunanrëkur yanapanantsikpaqmi kutinantsik. Pero Bibliata respetaqkunata tarirqa, allim Bibliapita yacharatsishwan y tsëpita parlaq publicacionkunata dejapushwan. Awmi, willakïkunachö mana niptimpis puëdentsikmi Yachatsikun librota y Diosta wiyakï o Diosta wiyakï imëyaqpis kawakunëkipaq follëtokunata dejapïta. Alläpam precisan yachakïta munayänampaqnölla yachatsikunantsik.
3. ¿Imanirtaq shonquqa imëka chakra cuenta?
3 Chakrata preparaq cuenta yanapakushun. Nunakunapa shonqunkunaqa imëka chakra cuentam (Luc. 8:15). Wakin chakrakunataqa alliran preparayan pampayanqan muru watsïrir o matsökurir jeqamunampaq, tsë cuentallam wakin nunakunatapis alliraq yanapanantsik rasun kaq yachatsikïkuna shonqunkunaman chänampaq. Punta cristiänokunapis tukïläya nunakunapa shonqunkunaman rasun kaq yachatsikïkunata chätsirmi yanapayarqan Diospa sirweqnin tikrayänampaq, y tsënö rurayanqampitam kushishqa këta tariyarqan (Hech. 13:48, 52). Noqantsikpis tsëta logrëta puëdentsikmi imanö yachatsikïkanqantsikman alli pensarqa.