¿Mëqan publicacionkunaraq yanaparinqa?
1. ¿Imanirtaq Yachatsikun libruwan wakin nunakunaqa yachakïta munayanmantsu?
1 Pipis Diospa sirweqnin tikranampaqqa, Biblia yachatsikunqantaran alleq musyanan. Peru wakinkunaqa manam, Biblia Diospa palabran kanqanman ni Diosman creiyantsu. Itsa tsënö nunakunaqa Yachatsikun libruwan yachakïta munayanqatsu. Tsëpenqa, ¿ima publicacionkunaraq yanaparinqa? Kë qateqninchömi rikärishun ishkë chunka nacionkunachö publicadorkuna imanö yachatsikuyanqampita willakayämunqanta.
2. Pipis “Diosman manam creïtsu” nimashqaqa, ¿imatataq alleqraq musyanantsik y imanir?
2 Diosman mana creeqkunapaq. Pipis “manam Diosman creïtsu” nimashqaqa, precisanmi imanir tsënö pensanqanta musyanantsik. ¿Imëkapis kikinlla kamakashqa kanqanmanku crein? ¿Wakin religionkuna mana alli kayanqanta rikarku Diosman creinnatsu? ¿Dios mana kanqanman creeq nacionpitaku shamun? ¿O Dios kanqanman mana imëpis creishqa karllaku tsënö nin? Atskaq publicadorkunam, “¿imëpis tsënöku pensarqunki nir tapuyashqa?”, y tsënö tapuyanqanmi alli kashqa Diosman imanir mana creiyanqanta nunakuna willakuriyänampaq. Mana pantatsipa wiyanqantsikqa alläpam precisan, porqui tsënöpam Diosman imanir mana creinqanta y imanö y ima publicacionwan yanapanapaq kaqta musyashun (Prov. 18:13).
3. ¿Imanötaq nunakunata y creenciankunata respetanqantsikta rikätsikushwan?
3 Tsënö nunakunawan parlarninqa imanö pensanqanta respetë. Estädus Unïduspitam kë willakï chämurqan: “Precisanmi akrakuyanqan creenciankunata respetanantsik. Pantashqa këkäyanqanta rikätsinapa rantinmi, cuentata qokunampaq tapukïkunata ruranantsik”. Tsëtam ruran congregacionkunata watukaq juk wawqi. Nuna pensanqanta wiyarirmi kënö tapurin: “¿Imëllapis kënöqa pensashqankiku?” y tsëpitam sïguin parlaparnin.
4. ¿Imatataq yarpänantsik budistakunata parlaparninqa?
4 Budistakunaqa manam juk Dios kanqanman creiyantsu. Tsënö nunakunawan parlayaptinqa, Gran Bretäñachö publicadorkunataqa, Cómo hallar paz y felicidad duraderas follëtum alläpa yanapashqa. Qallanan päginakunachö yachatsikïta yachakurirmi, “¿Existe un Creador todopoderoso?” yachatsikïman pasariyan. Yapë kutirninnam “Una guía para toda la humanidad” yachatsikïta yachakur qallëkuyan. Y tsëpitanam precisaptinqa, Yachatsikun libruta kënö nishpa rikäratsiyan: “Diosman mana creiptikipis, Bibliapita yachakunqëkiqa alläpam yanapashunki, porqui shumaq y alli consëjukunam kan”. Estädus Unïduschö chïnu parlaqkunata yachatseq precursormi kënö nin: “Territoriöchö nunakunataqa alläpam gustan leyi, tsëmi watukaq kutirninqa jaqiyanqä publicacionkunata leyir ushashqatana tariyä. Peru mëtsikaqmi entiendiyantsu Bibliapita yachakï ima kanqanta. Tsëmi puntata watukarllana, Diospa alli willakïninkuna follëtuta qorï”. Estädus Unïduschö chïnu congregacionkunata watukaq wawqim, Yachatsikun libruwan punta visïtallachöna yacharatsi alli kanqanta nin. Peru mas alliqa kanqa, Bibliapaq parlaq 2 kaq capïtuluwan qallëmi, porqui 1 kaqqa Diospaqmi parlan.
5. ¿Imanirtaq pasienciawan yanapashwan?
5 Diosmanqa manam rasllatsu markäkuriyanqa, tsëmi pasienciawan yanapanantsik. Juk kutilla parlapärinqantsikwanqa manam juk Kamakoq kanqanman creir qallëkuyanqatsu, peru atska kuti watukashqaqa, Dios kanqanman creiriyanqam o entiendiriyanqam wakinkuna Diosman imanir creiyanqanta.
6. ¿Imanirtaq wakinkunaqa Biblia ninqanman creiyantsu?
6 Biblia ninqanman mana creeqkunapaq. Wakinkunaqa Diosman creirpis manam Biblia Diospa Palabran kanqanmanqa creiyantsu, tsëmi willakïninkunataqa precisaqpaqtsu churayan. Tsëqa pasakun mëtsikaq nunakuna Jesusman mana creeq nacionkunachömi. Jesusman creeqkunallapaq Biblia kanqantam pensayan. Tsënöllam pasakun Jesusman creeq nacionkunachö täraq nunakunawampis, Bibliapa consëjunkunataqa manam precisaqpaqtsu churayan. Tsëpenqa, ¿imataraq rurashwan tsë nunakuna Biblia ninqanman creiyänampaq y Yachatsikun libruwan yachakur qallayänampaq?
7. ¿Imanötaq yanapashwan Biblia ninqanman nunakuna creiyänampaq?
7 Grecia sucursalpita apatsiyämunqan cartam kënö nirqan: “Biblia ninqanman mana creeqkunata yanapanapaqqa, kikin Bibliata kichëkurmi ima ninqanta rikätsinantsik. Atskaq publicadorkunam rikäyashqa tsënö rurayanqan nunakunapa shonqunman mas alleq chanqanta (Heb. 4:12). Diospa jutin ima kanqanta rikëkurllam, mëtsikaq nunakuna yachakïta munayan. Indiachö këkaq sucursalpitam kënö qellqayämurqan: “Kawëpaq y wanïpaq (wanuypaq) Biblia parlanqanmi indükunataqa gustan. Jina gustayanmi, imëka mana allikunata y chikinakïta Dios ushakätsinampaq kaqta musyëtapis”. Imëka problëmakunapaq nunakuna yarpachakuyanqanta musyayanqanmi, publicadorkunata yanapan Diospa Gobiernun imanö ushakätsinampaq kaqta Bibliata kichëkur rikätsiyänampaq.
8. ¿Imataq nishwan cristiänu tukoqkunapa culpanrëkur Biblia ninqanman mana creeqkunata?
8 Cristiänu tukoqkunapa culpanrëkur pipis Biblia ninqanman mana creiptinqa, pëkuna yachatsikuyanqan y rurayanqanqa Biblia ninqannö mana kanqantam nishwan. Indiachö këkaq sucursalmi kënö qellqamurqan: “Höraqa religionkunapaq mana parlëllapam kikin Bibliapita parlanantsik”. Jina nirqanmi Indükunataqa, ¿Qué propósito tiene la vida? ¿Cómo descubrirlo? follëtupa chusku kaq yachatsikïnin alläpa gustanqanta, tsëchömi yachatsikun Diospa Palabranta religionkuna juknöpa yachatsikuyanqanta. Brasilchö juk precursormi nunakunata kënö nin: “Atskaq nunakunam, ima religionmampis mana mëtikushllapa, musyayänanrëkurlla Biblia ninqanta yachakur qallayashqa. ¿Imanirtaq qampis tsënö rurankitsu? Itsa mana musyanqëkikunata musyarinkiman”.
9. ¿Imanirtaq yachatsita jaqirishwantsu Bibliapita yachakïta mana munanqanta nimashqallaqa?
9 Nunakunapa shonquntaqa Jehovä rikëkanmi (1 Sam. 16:7; Prov. 21:2). Y alli shonquyoq kaqkunataqa rasumpa kaq religionninmanmi yëkatsimun (Juan 6:44). Mëtsikaqmi Diosta reqiyarqantsu ni Bibliapitapis yachakuyarqantsu. Peru yachatsikunqantsikmi yanapashqa, “rasonpa caqta” musyarir ‘salvacionta’ tariyänampaq (1 Tim. 2:4). Tsëmi pipis, Bibliapita yachakïta mana munaptinqa jaqirishwantsu, tsëpa rantinqa kapamanqantsik publicacionkunapitam pëkunata yanapanampaqnö kaqta akrashwan. Y tiempuwanqa itsa, Rasumpëpaqa, ¿imatataq Biblia yachatsikun? librutana utilisashwan yachatsinapaq.
[4 kaq päginachö recuadru]
¿Imanötaq yanapashwan Diosman mana creeqkunata?
• Diosman imanir mana creiyanqanta musyanapaqqa kënömi tapurishwan “¿Imëpis tsënöku pensarqunki?”.
• Budista kaptinqa, Cómo hallar paz y felicidad duraderas follëtupa 9-12 päginankunapita yacharatsi.
• Imëkapis kikinlla rurakäkushqa kanqanman creiptinqa, kë publicacionkunata utilisë:
¡Despertad! revistakunachö, “¿Casualidad o diseño?” yachatsikïkunata
Las maravillas de la creación revelan la gloria de Dios vidëuta
Cómo lograr una vida llena de satisfacción follëtupa chusku kaq partichö këkaq yachatsikunata y ¿Es la vida obra de un Creador? y El origen de la vida. Cinco cuestiones dignas de análisis follëtukunapitapis
• Imëka mana allikuna y sufrimientukunata pasakunqanrëkur Diosman manana creiptinqa, kë publicacionkunata utilisë:
¿Existe un Creador que se interese por nosotros? librupa 10 kaq capïtulunta
¿De veras se interesa Dios por nosotros? follëtupa 6 kaq partichö këkaq yachatsikïta y ¿Qué propósito tiene la vida? ¿Cómo descubrirlo? follëtupa 6 kaq yachatsikïninta
• Dios kanqanman creir qallëkuptinqa puëdintsiknam Yachatsikun libruwan yachatsita. Itsa 2 kaq capïtuluwan o mas gustanqan kaqwan qallarishwan.
[5 kaq päginachö recuadru]
¿Imanötaq yanapashwan Biblia ninqanman mana creeqkunata?
• La vida... ¿cómo se presentó aquí? ¿Por evolución, o por creación? librupa 17 y 18 capïtulunkunapitam yacharatsishwan (españolchöqa manam yarqëkämunnatsu).
• Hindü nuna kaptinqa, ¿Por qué debemos adorar a Dios con amor y verdad? follëtutam utilisashwan.
• Judïukunataqa, ¿Habrá algún día un mundo sin guerra? follëtupa 3-11 päginankunapitam yacharatsishwan, (españolchöqa manam yarqëkämunnatsu).
• Bibliapa consëjunkuna alli kanqanta rikätsinapaqqa, kë publicacionkunatam utilisashwan:
¡Despertad! revistachö yarqamoq, “Ayuda para las familias” yachatsikïkunata
La Biblia: el poder que ejerce en su vida vidëuta
“Diospa alli willakïninkuna” follëtupa 9 y 11 yachatsikïninkunata y Un libro para todo el mundo follëtupa 22-26 päginankunata (españolchöqa manam yarqëkämunnatsu) y Cómo lograr una vida llena de satisfacción follëtupa 2 kaq partichö këkaq yachatsikïta
Budista nuna kaptinqa, El camino de la paz y la felicidad follëtupa 3-7 päginakunapitam yacharatsishwan
Musulman nuna kaptinqa, La fe verdadera, la puerta a una vida feliz follëtupa 3 kaq yachatsikïnimpitam yacharatsishwan
Biblia ninqanman mana creiyanqan markakunachö täraq nunakunataqa, itsa willashwantsu yachëkätsinqantsik consëjukuna mëpita shamunqanta
• Biblia willakunqankuna imanö cumplikanqanta entienditsinapaqqa kë publicacionkunatam utilisashwan:
La Biblia: historia exacta, profecía confiable vidëuta
Un libro para todo el mundo, follëtupa 27-29 päginankunata (españolchöqa manam yarqëkämunnatsu)
• Biblia yachatsikunqankunapita masllata musyëta munaptinqa,Yachatsikun libruwannam yachatsir qallëkushwan.
[6 kaq päginachö recuadru]
“Manam Diosman creïtsu” niyaptin
• Kënömi nirishwan: “Noqataqa Diosman creinäpaq këmi yanapamarqan”. Tsëpitanam Razonamiento librupa 87-89 päginankunapita mas precisaq kaqta yacharatsishwan. Jina noqantsikta yanapamanqantsik publicacionta apapunapaqmi awnirishwan.
• Kënöpis tapurishwanmi: “Peru juk kamakoq kaptinqa, ¿imanö kanqantataq pensankiman?”. Tsënö tapukïtaqa mëtsikaq nunakunam contestayan, alli ruraq, llapankunata igualpa rikaq, alli y llakipäkoqchi nir. Ninqanta wiyarirqa, Diosqa tsënö kanqanta Bibliachö rikäratsi. (Itsa alli kanman Yachatsikun librupa 1 kaq capïtulumpa 6 kaq pärrafupita yacharatsinqëki.)
“Manam Biblia ninqanman creïtsu” niptin
• Kënömi nirishwan: “Mëtsikaq nunakunam tsënö pensayan. Wakinkunaqa, cientïficukuna niyanqanwan Biblia ninqan mana igualanqantam y kanan witsankunachö manana yanapakunqantam niyan. Peru ¿qamqa imëllapis leyirqunkiku? [Shuyäri contestashunëkita. Tsëpitana, Cómo lograr una vida llena de satisfacción follëtupa 3 kaq päginapa qallanan kaq yachatsikïninta rikäratsi y follëtuta munaratsi.] Yapëchöqa itsa parlarishwan kë follëtupa yanapakïninwan Bibliachö shumaq consëjukunapita”.
• Kënöpis nirishwanmi: “Mëtsikaqmi tsënö niyämashqa, peru Bibliachömi rikäratsita munä noqata yanapamanqan versïculuta [leyirishun Job 26:7 o Isaïas 40:22 textuta, tsëchömi cientïficukuna niyanqanwan Biblia igualan]. Jina familiakunata yanapaq consëjukunatapis Bibliachöqa tarintsikmi. Itsa yapëchö tsëpita parlarishwan”.
• O kënöpis nishwanmi: “Tsënö pensanqëkitaqa respetämi. Peru Dios juk libruta jaqipamashqantsik kaptinqa, ¿ima yachatsikïkunayoq kanqantaraq pensankiman?”. Tsëpitaqa nuna parlamunqanwan igualaq versïculuta Bibliachö rikäratsi.