Mandakoq Sacerdötintsik Jesusqa alläpa llakipäkoqmi

1, 2. (1) ¿Imapaqtan Jehoväqa kë Patsaman Jesusta mandamurqan? (2) ¿Imatataq këchö yachakushun? (Hebrëus 5:7-9).

KUYË Tsurin Jesusta kë Patsaman Jehovä mandamunqampitaqa dos mil watakunanam pasarishqa. ¿Imapaqtan mandamurqan? Nunakunata jutsapita y wanuypita libranampaqmi y Satanas ruranqankunata ushakätsinampaqmi (Juan 3:16; 1 Juan 3:8). Peru Jehoväqa musyarqanmi Jesus kë Patsachö nunanö kawarninqa, mas llakipäkoq këta yachakurnin mas alli kaq Mandakoq Sacerdötintsik kanampaq kaqta. Jesusqa 29 watachö bautizakurmi Mandakoq Sacerdötintsik tikrarqan.a

² Këchöqa yachakushun, kë Patsachö kawanqan Jesusta “llapanchö alliyätsishqa” kanampaq imanö yanapanqantam, juk parlakuychöqa, mas alli kaq Mandakoq Sacerdötintsik kanampaq imanö yanapanqantam. Tsëta alli entiendirqa, jutsata ruranqantsikpita o mana allikunata rurëta munanqantsikpita mana alli sientikurpis Jehoväpa mas amïgunmi kashun y llapan shonquntsikwanmi mañakushun (leyi Hebrëus 5:7-9).

DIOSPA KUYË TSURIN KË PATSAMAN SHAMUN

3, 4. ¿Ima cambiukunapatan Jesus pasarqan kë Patsachö këkarnin?

³ Llapantsikpis imëka cambiukunapam pasantsik. Këllaman pensarishun: juk markata ëwakurqa kuyanqantsik markantsikta, wayintsikta, familiantsikkunata y amïguntsikkunata dejëkurmi ëwakuntsik. Tsëkunata rurananqa manam fäciltsu. Peru Jesuspa vïdanchöqa mas cambiukunam karqan. Ciëluchö karqa, Jesusqa wakin angelkunapitapis mas carguyoqmi karqan. Y kuyakoq Papänimpa “derëcha” kaq lädunchömi imëpis sirwirnin kushishqa karqan (Sal. 16:11; Prov. 8:30). Peru Filipensis 2:7 ninqannöpis, Jesusqa tsë “llapan[ta] [...] dejëkurmi” jutsasapa nunakunawan kawanampaq kë Patsaman shamurqan.

⁴ Y manam tsëllatsu, Jesusqa pobri familiachömi yurikurqan. Tsëmi mamäninwan papäninqa ishkë kullkushllata o ishkë llullu palumallata sacrificiupaq apayarqan (Lev. 12:8; Lüc. 2:24). Y Jesus yurishqa kanqanta musyarirnam Herödis wanutsita munarqan. Tsëmi mamäninwan papäninqa Egiptuta apakuyarqan y tsëchömi juk tiempupa forastërunö kawakuyarqan (Mat. 2:13, 15). Rikanqantsiknöpis, Jesusqa imëka cambiukunapam pasarqan.

5. ¿Nunakuna imanö kayanqantataq Jesus kë Patsachö këkar rikarqan? Y ¿imanötan tsëqa yanaparqan mas alli kaq Mandakoq Sacerdötintsik kanampaq? (Dibüjuta rikäri).

⁵ Jesusqa kë Patsachö karmi rikarqan, nunakuna alläpa sufriyanqanta. Y kikimpis wakin nunakunanöllam kuyashqa familiankuna wanukuyaptin llakikurqan. Capazchi papänin Josëtapis wanoqta rikarqan. Y yachatsikur purirpis rikarqanmi leprayoq, rikëta mana puëdeq, kuyukuyta o purita mana puëdeq y wamrankuna wanukushqa kaptin alläpa llakishqa këkaq nunakunata. Pëkunata rikarqa, alläpam llakiparqan (Mat. 9:2, 6; 15:30; 20:34; Mar. 1:40, 41; Lüc. 7:13). Rasunmi, ciëluchö këkarpis rikämurqanmi nunakuna sufriyanqanta. Peru kë Patsachö nunanö karninraqmi masqa entiendirqan nunakuna imanö sientikuyanqanta, ima rurëtapis mana puëdir llakikuyanqanta, yarpachakuyanqanta y utishqa o pishipashqa sientikuyanqanta. Kikimpis tsënömi sientikurqan (Is. 53:4).

JESUSQA NUNAKUNA IMANÖ SIENTIKUYANQANTAM ENTIENDEQ

6. ¿Jesus imanö kanampaq kaqtataq Isaïas entienditsikurqan? (Isaïas 42:3).

⁶ Diosnintsikpita yachatsikur purirninqa, Jesusqa pobrikunata y despreciashqa nunakunatam shumaq tratarqan. Tsënö shumaq tratanqanwanmi Isaïas willakunqan cumplikarqan. Diospa Palabranqa alli y kapoqyoq nunakunatam höraqa igualatsin alli regashqa jardinkunatawan y jatusaq plantakunatawan (Sal. 92:12; Is. 61:3; Jer. 31:12). Peru pobrikunapaq y despreciashqa nunakunapaqqa nin pakishqa shoqushnö y upinëkaq mëchanö kayanqantam (leyi Isaïas 42:3). Tsë igualatsikuywanmi Isaïas willakurqan, Jesusqa pobrikunata y despreciashqa nunakunata kuyanampaq y llakipänampaq kaqta.

7, 8. ¿Imanötan Jesuspaq Isaïas willakunqan cumplikarqan?

⁷ Isaïas ninqantam, Mateuqa Jesuspaq kënö nirqan: “[Manam] pakinëkaq shoqushtaqa pakinqatsu ni upinëkaq mëchata upiratsinqatsu” (Mat. 12:20). Milagrukunata Jesus ruranqanqa, masqa yanaparqan nunakuna mana alli tratayaptin sufrikaq nunakunata y qeshyarnin alliyäyänampaq imata rurëtapis mana puëdeq nunakunatam. Pensarishun leprawan qeshyëkaq nunallaman. ¿Pëqa pensarqantsuraq imëllapis alliyänampaq kaqta? ¿Pensarqantsuraq amïgunkunawan y familiankunawan imëllapis juntu kanampaq kaqta? Manachi (Lüc. 5:12, 13). O pensarishun, wiyëta y parlëta mana puëdeq nunaman. ¿Imanöraq sientikurqan wakinkuna kushishqa parlayanqanta rikarnin y pëqa ni wiyëta ni parlakuyta mana puëdirnin? (Mar. 7:32, 33). Y ¿imanö mastan sientikuyarqan?

⁸ Kë Patsachö Jesus kawanqan tiempuqa, ¿imatataq judïukuna creiyaq? Qeshyëkaq o invälidu nunakunaqa, jutsata rurashqa karnin o papäninkuna y mamäninkuna jutsata rurashqa kayaptin sufriyanqantam (Juan 9:2). Tsëmi nunakunaqa qeshyëkaqkunata y invälidukunata despreciayaq. Peru Jesusqa qeshyëkaq y invälidu nunakunatam alliyätsirqan y Dios kuyanqanta entiendiyänampaqmi yanaparqan, tsënömi Jesuspaq Isaïas willakunqan cumplikarqan. Peru ¿imatataq Jesuspita yachakuntsik?

9. ¿Imanötan Hebrëus 4:15 y 16 entienditsimantsik Jesus llakipäkoq Mandakoq Sacerdöti kanqanta?

⁹ (Leyi Hebrëus 4:15, 16). Jesusqa rasumpam llakipämantsik. Griëgu idiömachö Jesuspaq ‘llakipäkoq’ ninqanqa entienditsimantsik, nunakuna sufriyaptin y llakikuyaptin kikin sufrïkaqnö sientikunqantam. Y tsë palabrallatam apostol Pablupis, Hebrëus 10:34 textuchö utilizarqan carcelchö këkaqkunata llakipänantsikpaq parlarnin. Jesus milagrukunata ruranqampaq parlarqa, Bibliachö entienditsimantsik sufrikaqkunata rikarnin Jesus alläpa llakipanqantam. Tsëmi jampinan kaptinllatsu jampirqan, tsëpa rantinqa rasumpam pëkunata llakiparqan y yanaparqan. Këllaman pensarishun: leprawan qeshyëkaq nunataqa karullapitam jampirinman karqan. Peru manam tsëtatsu rurarqan, sinöqa witïkurmi yatëkurqan. Capazchi tsë nunataqa tsë qeshyawan kanqampita ni pipis yatashqatsu karqan, peru Jesus yatëkuptinqa alläpachi kushikurqan. Tsënöllam wiyëta mana puëdeq nunatapis alläpa llakiparqan, tsëmi atskaq nunakunachö këkarnin japallanta karuman apëkur alliyäratsirqan. Y arrepentikushqa warmita juk fariseu despreciaptimpis Jesusqa defendirqanmi. Tsë warmiqa arrepentikushqa karmi, Jesuspa chakinta weqinwan awipur aqtsanwan tsakitsirqan (Mat. 8:3; Mar. 7:33; Lüc. 7:44). Jesusqa manam qeshyëkaq o sufrikaq nunakunata dejarirtsu ëwakurqan. Tsëpa rantinqa, kushishqam chaskirqan y shumaqmi tratarqan. Tsënömi noqantsiktapis Jesusqa tratamantsik.

MANDAKOQ SACERDÖTINTSIKNÖMI NOQANTSIKPIS LLAKIPÄKOQ KANTSIK

10. ¿Imawantan Jehoväpita yachakuyänampaq mana wiyaqkunata y mana rikaqkunata yanapantsik? (Fötukunata rikäri).

¹⁰ Noqantsikpis Jesusnömi imëpis kuyakoq y llakipäkoq këta munantsik (1 Pëd. 2:21; 3:8). Rasunmi, manam Jesusnöqa mana wiyaqkunata o mana rikaqkunata alliyätsita puëdintsiktsu, peru Jehovä Diosnintsikta reqiyänampaqqa yanapëta puëdintsikmi. Këllaman pensarishun: dirigimaqnintsikkunam mana wiyaqkunapaq 100 idiömapitapis maschö publicacionkunata sëñaschö traducitsiyämushqa. Y mana rikaqkuna leyiyänampaqnam 60 idiömapitapis maschö publicacionkunata braillichö ruratsiyämushqa y pëkunaman pensëkurmi 100 idiömapitapis maschö videukunatapis ruratsiyämushqa. Tsë publicacionkunawanmi wiyëta mana puëdeqkuna y rikëta mana puëdeqkunapis Jehovä Diosnintsikta y Jesusta reqita puëdiyan.

11. ¿Imanötan Jesus ruranqannölla dirigimaqnintsikkunaqa Jehoväpita yachakuyänampaq nunakunata yanapayan? (Hëchus 2:5-7, 33; fötukunata rikäri).

¹¹ Patsapita ciëluman kutiskirmi Jesusqa Jerusalenchö Pentecostes Fiestachö juntarëkaq qateqninkunata santu espïrituwan yanaparqan, tsëmi pëkunaqa tukuy idiömakunachö nunakunata Diospita yachatsiyarqan (leyi Hëchus 2:5-7, 33). Jesusnö kuyakoq karmi dirigimaqnintsikkunapis tukuy idiömata parlaq nunakunata Diospita yachakuyänampaq yanapayan. Tsëmi mil cien idiömapitapis maschö publicacionkunata traducitsiyämun, y wallkaq nunakunalla parlayanqan idiömakunamampis traducitsiyämunmi. Pensarishun Amërica del Sur y Amërica del Norti läduchö täkoq nunakunaman. Pëkunapaqmi Diospita yachakuyänanta munarnin 160 idiömapitapis maschö publicacionkunata traducitsiyämun. Tsënöllam romanï o gitänu idiömata parlaqkunapaqpis 20 idiömapitapis maschö traducitsiyämun. Tsë publicacionkunawanmi mëtsikaq nunakuna Jehovä Diosnintsikpita yachakuyashqa.

12. ¿Ima mastataq dirigimaqnintsikkuna rurayämun?

¹² Y dirigimaqnintsikkunaqa desgraciakunapa pasaqkunatapis yanapanapaqmi patsätsiyämun. Tsëchömi mëtsikaq wawqikuna y panikuna yanapakuyta puëdiyan. Tsënöllam Diosnintsikpita yachakuyänampaq salonkunatapis ruratsiyämun. Tsëman ëwarmi nunakunaqa, Jehovä Diosnintsik kuyakoq kanqanta yachakuyta puëdiyan.

MANDAKOQ SACERDÖTINTSIKQA CADA ÜNUTAM YANAPAMANTSIK

13. ¿Imanötan Jesusqa cada ünuta yanapamantsik?

¹³ Jesusqa alli mitsikoq cuentam cada ünuta cuidamantsik y manam Diosnintsikpita yachakunantsikpaq imatapis faltatsimuntsu (Juan 10:14; Efes. 4:7). Mana allikunapa pasarninqa, capazchi pakishqa shoqush cuenta o upinëkaq mëcha cuenta kashwan. Alläpam llakikushwan qeshyapäkurnin, juk wawqiwan o juk paniwan ofendinakushqa karnin o jutsata rurashqa karnin. Tsë hörakunaqa capazchi Diosnintsik änimanqantsikkunamanqa yarpashwantsu. Tsënö kaptimpis yarpänantsikmi Jesusqa imakunapa pasëkanqantsikta musyëkanqanta y imanö sientikunqantsikta entiendinqanta. Pëqa alläpa llakipäkoqmi y tukuynöpam yanapamantsik. Këllaman pensarishun: santu espïritutam utilizärinman kallpayoqta tikratsimänapaq (Juan 16:7; Tïtu 3:6). Congregacionkunamanmi anciänukunatapis “qarëtanö” churamushqa yanapamänantsikpaq. Y wawqikunawan y panikunawampis shumaqmi animamashwan y wananqantsikkunachö yanapamashwan (Efes. 4:8).

14. Alläpa llakikur o gänasninnaq sientikurqa, ¿imatataq yarpänantsik?

¹⁴ Alläpa llakishqa kanqantsik höra o gänasnintsik mana kanqan hörakunam Mandakoq Sacerdötintsik Jesusman pensanantsik. Pëtaqa Jehovä Diosnintsik Patsaman mandamurqan manam wanuypita salvamänallapaqtsu, sinöqa problëmakunapa pasarnin nunakuna imanö sientikuyanqanta musyanampaqmi. Jesusqa, jutsata ruranqantsikpita o mana allikunata rurëta munanqantsikpita llakikunqantsik hörakuna yanapamänapaqmi listu këkan (Heb. 4:15, 16).

15. ¿Imatan juk wawqita yanaparqan congregacionman yapë kutinampaq?

¹⁵ Y Jesus yanapamashqam, Jehoväta sirwita dejashqakuna congregacionman kutiyämunampaqpis yanapëta puëdintsik (Mat. 18:12, 13). Stëfanub jutiyoq wawqintsikta pasanqanta rikärishun. Pëtaqa jutsata rurarir mana arrepentikuptinmi congregacionpita rakiriyarqan y tsëpita 12 wata pasariptinmi Stëfanuqa reunionman ëwanampaq decidirqan. Kikinmi kënö nin: “Salonman yëkuytaqa alläpam penqakurqä, peru Jehoväpa kuyakoq sirweqninkunawan juntu këta munarmi penqakuykarpis yëkurqä. Anciänukunawan parlayaptïqa alläpa shumaqmi tratayämarqan. Peru höraqa Jehoväta dejanqäpitam alläpa cölerakoq kä y manam congregacionman kutita munaqtsu kä. Peru wawqikuna y panikunam yarpätsiyämarqan Jehoväwan Jesusqa kutinäta munayanqanta. Y yapë Testïgu tikrariptïqa, wawqi panikunam noqata y familiätapis kushishqa chaskiyämarqan. Y tiempuwanqa warmïpis Bibliapitam estudiar qallëkurqan y kananqa llapäkuna juntum Jehoväta sirwikäyä”. Alläpa kuyakoq Mandakoq Sacerdötintsik Jesucristuqa, alläpachi kushikun Jehoväpa juk sirweqnin arrepentikur congregacionman kutimuptin.

16. ¿Imanirtan alläpa agradecikuntsik Mandakoq Sacerdötintsik Jesus kanqampita?

¹⁶ Jesus kë Patsachö kanqan tiempuqa, mëtsikaq nunakunatam mas wanayanqan hörachö yanaparqan. Y kanampis mas wananqantsik hörachömi yanapëkämantsik. Y shamoq tiempuchönam, cäsukoq nunakunata yanapanqa jutsata rurayanqampita manana sufriyänampaq y jutsannaq këman chäyänampaq. Alläpam Jehovä Diosnintsikta agradecikuntsik kuyamarnintsik y llakipämarnintsik kuyë Tsurinta Mandakoq Sacerdötintsik kanampaq churamunqampita.