“Teyta Dios[qa] kuyashunkim”

1, 2. ¿Imaraq yanapashunki Jehovä Diosnintsik alläpa kuyashunqëkita següru kanëkipaq?

JEHOVÄ Diosnintsikqa llapan sirweqninkunatam alläpa kuyan. Tsënö kaptimpis, wakin sirweqninkunaqa imapaqpis mana väliyanqantam pensayan. ¿Imanir-raq tsënö pensayan? Capazchi wakin nunakuna despreciashqa kayaptin, mana alli tratashqa kayaptin o imapaqpis mana väliyanqanta nishqa kayaptin. ¿Qampis mana välinqëkitaku pensanki? Tsëqa, ¿imaraq yanapashunkiman Jehovä kuyashunqëkita següru kanëkipaq?

² Tsënö sientikurqa, juknintsik juknintsik imanö tratanakunata Jehovä munanqanta musyanëkipaqmi Bibliata leyinëki. Diosnintsikpa Tsurin Jesusqa llapan nunakunatam respëtuwan y kuyëpa tratarqan. Tsëwanmi entiendintsik Teytantsik Jehoväqa, humildi nunakunata y imapaqpis mana väleqnö sientikoqkunata alläpa kuyanqanta (Juan 5:19; Heb. 1:3). Peru ¿imanötan Jesusqa nunakunata yanaparqan Jehovä Diosnintsik kuyanqanta següru kayänampaq? Y ¿imatataq rurankiman Jehovä Diosnintsik kuyashunqëkita següru kanëkipaq? Tsëkunatam këchö yachakurishun (Ageu 2:7).

¿IMANÖTAN JESUSQA NUNAKUNATA YANAPARQAN JEHOVÄ KUYANQANTA ENTIENDIYÄNAMPAQ?

3. ¿Imanötan Jesusqa Galilëachö nunakunata tratarqan?

³ Galilëa markachö yachatsikuptinmi mëtsikaq nunakuna yachatsinanta munar y alliyätsinanta munar Jesusman ëwayarqan. Y Jesusqa “mitseqninnaq üshakunatanö sufrikaqta rikar y mana cäsuyanqanta rikarmi” tsë nunakunata yanaparqan (Mat. 9:36; Biblia de estudiuchö nötankunatapis leyi). Mandakoq religiösukunaqa tsë nunakunata rikäyaq imatapis mana musyaqtanö y imapaqpis mana väleqtanömi, y ‘maldicishqa’ nunakuna kayanqantam pensayaq (Juan 7:47-49; Biblia de estudiuchö nötantapis leyi). Peru Jesusqa tsë nunakunata respëtuwanmi tratarqan, tsëmi pacienciawan yachatsirqan y qeshyëkaqkunata alliyätsirqan (Mat. 9:35). Y mas nunakunata yanapëta munarmi apostolninkunatapis alli yachatsikoq kayänampaq yanaparqan y tukuyläya qeshyawan qeshyëkaqkunata jampiyänampaqmi permitirqan (Mat. 10:5-8).

4. ¿Imatataq yachakuntsik humildi nunakunata Jesus imanö tratanqampita?

⁴ ¿Imatataq yachakuntsik despreciashqa y maltratashqa nunakunata Jesus imanö tratanqampita? Kikin Jesuspis y Teytan Jehoväpis tsënö nunakunata alläpa kuyanqantam. Y qamqa, ¿Jehoväpa sirweqninku kanki? Tsënö sirwikarpis, ¿imapaqpis mana välinqëkitaku pensanki? Tsënö pensarqa yarpänëkim, Diospita yachakuyta munaq humildi nunakunata Jesus imanö tratanqanta. Tsëmi yanapashunki Jehovä Diosnintsik alläpa kuyashunqëkita entiendinëkipaq.

5. ¿Ima qeshyawantan Galilëachö juk warmi sufrirqan?

⁵ Jesusqa manam grüpuchö këkaq nunakunallatatsu yachatsirqan y yanaparqan, sinöqa cada ünutapis yanaparqanmi. Pensarishun Galilëachö 12 watapana yawar ëwëwan qeshyëkaq warmiman (Mar. 5:25). Tsë warmiqa yawar ëwëwan qeshyarmi Ley mandakunqannö limpiunatsu karqan, y pëta yataq kaqqa pï nunapis manam limpiunatsu kaq. Tsëmi wakin nunakunawan juntu këta puëdeqtsu, ni manam Diosta adorayänan wayikunachöpis juntakëta puëdeqtsu (Lev. 15:19, 25). Pensari, tsë warmiqa alläpachi tsë qeshyawan sufrirqan y imapaqpis mana välinqantachi pensarqan (Mar. 5:26).

6. ¿Imanötan yawar ëwëwan qeshyëkaq warmi alliyärirqan?

⁶ Peru tsë warmiqa alliyëta munarpis, manam alliyätsinampaq Jesusta mañakurqantsu. ¿Imanir-raq mañakurqantsu? Capazchi yawar ëwëwan qeshyarnin penqakurqan. O capazchi pensarqan mana limpiu këkarnin nunakuna rurinchö purikaqta rikarnin Jesus qayapänampaq kaqta. Tsëqa, ¿imatataq rurarqan? Alliyänampaq kaqman llapan shonqunwan confiakurmi Jesuspa röpanta yatëkurqan (Mar. 5:27, 28). Y confiakunqannömi alliyärirqan. Y Jesusqa cuentatam qokurqan röpanta yatashqa kayanqanta, tsëmi nunakunata tapurqan y tsë warmiqa pë yatashqa kanqantam nirqan. Peru ¿Jesusqa qayaparqanku?

7. ¿Imanötan Jesusqa qeshyëkaq warmita tratarqan? (Marcus 5:34).

⁷ Jesusqa cuentatam qokurqan tsë warmi ‘mantsakarnin karkaryëkanqanta’. Tsëmi kuyëllapa y respëtuwan parlaparqan (Mar. 5:33). Hasta “¡Hïja!” nirqanmi. Tsënö nirqa manam respëtullawantsu parlapëkarqan, sinöqa alläpa kuyarninmi tsënö nirqan (leyi Marcus 5:34). Tsë kutillam Jesusqa “¡Hïja!” nir juk warmita parlaparqan. Capazchi tsënöqa nirqan alläpa mantsakarnin ‘karkaryëkanqanta’ cuentata qokurnin. Tsë warmiqa, ¡alläpachi kushikurqan Jesus kuyëpa parlapäriptin! Peru pensari, ¿imanöraq sientikunman karqan Jesus mana alli trataptinqa? Qeshyanqampita alliyashqa karpis, capazchi Jesuspa röpanta yatashqa kanqampita y mana limpiu këkarnin nunakuna rurinchö purishqa kanqampita imëpis llakikunman karqan. Peru yachakunqantsiknöpis Jesusqa manam alliyätsirqanllatsu, tsëpa rantinqa Jehovä alläpa kuyanqanta entiendinampaqmi kuyëllapa parlaparqan.

8. ¿Imakunapatan panintsik Marïa pasarqan?

⁸ Kanan witsampis, Jehoväpa wakin sirweqninkunaqa qeshyayanqanrëkurmi alläpa llakikuyan y imapaqpis mana väliyanqanta pensayan. Rikärishun Brasil nacionpita Marïaa jutiyoq precursöra pasanqanta. Pëqa chakinnaq y izquierda kaq rikrannaqmi yurikurqan. Kënömi cuentakun: “Escuëlachöqa imëpis burlakurmi mana alli tratayämaq, hasta familiäkunapis despreciayämaqmi. Tsëmi imapaqpis mana väleqnö sientikoq kä”.

9. ¿Imatan panintsik Marïata yanaparqan Jehovä Diosnintsik kuyanqanta entiendinampaq?

⁹ ¿Imatan panintsik Marïata yanaparqan? Testïgu tikrariptinmi, congregacionninchö wawqikuna y panikunaqa kuyëllapa yanapayarqan Jehovä Diosnintsik alläpa kuyanqanta entiendinampaq. Panintsik Marïam kënö nin: “Llapan yanapamaqnïkunapa jutinkunata juk listaman churëta munarqa, ¡manachi ushämantsu! Llapan shonqüwanmi Jehovä Diosnintsikta agradecikü juk shumaq familiachö kanäpaq yanapamanqampita”. Wawqikuna y panikuna shumaq yanapayaptinmi panintsik Marïaqa entiendirqan Jehovä Diosnintsik alläpa kuyanqanta.

10. ¿Imatan Marïa Magdalënata pasarqan, y imanöraq sientikurqan? (Dibüjukunata rikäri).

¹⁰ Kananqa parlarishun Marïa Magdalënata Jesus imanö yanapanqanta. Pëtaqa siëti demoniukunam controlayaq (Lüc. 8:2). Tsë demoniukuna controlayaptinqa, capazchi Marïaqa alläpa mantsëpaq portakoq. Tsëta rikarqa, manachi nunakuna witipäyaqtsu. ¿Imanöraq Marïa Magdalëna tsë tiempuchö sientikurqan? Mantsakurllachi kawakoq y pensarqanchi pipis yanapëta mana puëdinqanta ni kuyanqanta. Peru Jesusqa capazchi tsë demoniukunapita librarirqan, tsëchi Marïaqa Jesusman markäkur o yärakur qateqnin tikrarirqan. Tsëta ruranqanwanmi Jesusqa Marïata yanaparqan Diosnintsik alläpa kuyanqanta entiendinampaq. Peru ¿imanö mastan Marïata yanaparqan?

11. ¿Imanötan Jesusqa Marïa Magdalënata entienditsirqan Jehovä Diosnintsik alläpa kuyanqanta? (Dibüjukunata rikäri).

¹¹ Jesusqa yachatsikoq ëwarmi Marïa Magdalënata invitarqan compañanampaq.b Tsënö compañarmi Marïaqa Jesus yachatsikunqankunata wiyëta puëdirqan. Jesusqa wanunqampita kawarkamurpis, puntataqa Marïa Magdalënatam yuripurqan, y kawarimushqa kanqanta apostolninkunata willanampaqmi mandarqan. Tsënömi Jesusqa, Jehovä Diosnintsik alläpa kuyanqanta entiendinampaq Marïata yanaparqan (Juan 20:11-18).

12. ¿Imanirtan Lidiaqa pensarqan ni pipis mana kuyanqanta?

¹² Kanan witsampis, mëtsikaqmi Marïa Magdalënanö ni pillapis mana kuyanqanta pensayan. Tsëmi pasarqan Espäñapita Lidia jutiyoq panintsikta. Pëtaqa, mamäninshi qeshyaq këkarnin shulluyta munanaq y yuririptinqa manash pëpaq yarpachakoqtsu y alläpa mana allish trataq. Lidiam kënö nin: “Mamänï mana kuyamashqa kaptinmi pillapis kuyamänanta munaq kä. Peru imapaqpis mana välinqäta mamänï creitsimashqa kaptinmi pillapis kuyamänanta mana merecinqäta pensaq kä”.

13. ¿Imatan Lidiata yanaparqan Jehovä kuyanqanta entiendinampaq?

¹³ Peru Lidiaqa Jehovä Diosnintsikpita yachakur qallëkurqa, manam tsënönatsu sientikurqan. ¿Imatan yanaparqan Diosnintsik alläpa kuyanqanta entiendinampaq? Wawqikuna y panikuna kuyayanqan, Diosnintsikman mañakunqan y Bibliata leyinqanmi. Lidiam kënö nin: “Qowäqa o runäqa seguïdum niman alläpa kuyamanqanta y yachanëpaq kanqäta. Tsënöllam amïgükuna y amïgäkunapis niyäman”. Y qamqa, ¿pillatapis reqinkiku imapaqpis mana väleqnö sientikoqta? ¿Imanötan yanaparinkiman Diosnintsik kuyanqanta entiendinampaq?

¿IMATATAQ RURANKIMAN JEHOVÄ KUYASHUNQËKITA SEGÜRU KANËKIPAQ?

14. ¿Noqantsikpaq Jehovä imanö pensanqantataq 1 Samuel 16:7 entienditsimantsik? (Leyi “¿Imanirtan Jehoväqa sirweqninkunata alläpa kuyan?” neq recuadruta).

¹⁴ Jehovä Diosnintsikqa manam nunakunanötsu noqantsikpaq pensan (leyi 1 Samuel 16:7). Nunakunaqa pitapis valorayan buenmözu, buenamöza, qellëyoq o estudiashqa kayaptinmi, peru Jehovä Diosnintsikqa manam tsërëkurtsu valoramantsik (Is. 55:8, 9). Tsëmi qampis Jehovä kuyashunqëkita següru kanëkipaqqa, Jehovä imanir kuyashunqëkita y valorashunqëkita pensanëki. ¿Imatan yanapashunkiman? Mana väleqnö sientikushqa nunakunapaqmi Bibliachö leyinkiman. Allim kanman Elïaspaq, Noemïpaq y Änapaq leyinqëki. Pëkunapita yachakurqa, Jehovä Diosnintsik alläpa kuyarnin imanö yanapanqanta entiendita procurë. Y Jehovä Diosnintsikqa, ¿imakunatataq kuyashurniki y valorashurniki ruramushqa? Tsë ruramunqankunata apuntë. Tsëmi yanapashunki Jehovä Diosnintsik kuyashunqëkita y valorashunqëkita entiendinëkipaq. Tsënöllam imapaqpis mana väleqnö sientikurqa, tsë asuntupaq parlaq tëmakunata publicacionnintsikchö ashinkiman.c

15. ¿Imanirtan Jehoväqa Danielta nirqan alläpa ‘kuyanqanta’? (Daniel 9:23).

¹⁵ Ama qonqëtsu mana dejëpa sirwinqëkipita Jehovä alläpa kuyashunqëkita. Diospa willakoqnin Danielpis cäsi 100 watayoq këkarmi ‘kallpannaq’ sientikurqan (Dan. 9:20, 21). ¿Imanötan Jehovä yanaparqan? Angel Gabrieltam mandarqan mañakunqanta wiyashqa kanqanta willanampaq y kënö ninampaq: “Qamtaqa Teyta Dios kuyashunkim” (leyi Daniel 9:23). ¿Imanirtan Jehoväqa Danielta alläpa kuyaq? Yachanëpaq nuna kaptin, alli kaqkunata rurëta gustaptin y mana dejëpa sirwiptinmi (Ezeq. 14:14). Jehovä Diosnintsikqa consolamënintsikta munarmi, Danielta ninqankunata Palabranman qellqatsimurqan (Rom. 15:4). Y Jehovä Diosnintsikqa qamtapis Danieltanömi alli kaqkunata ruraptiki y mana dejëpa sirwiptiki alläpa kuyashunki, y mañakuptikipis wiyashunkim (Miq. 6:8, nötankunatapis leyi; Heb. 6:10).

16. ¿Imaraq yanapashunkiman Jehovä Diosnintsikta kuyakoq papätanö rikänëkipaq?

¹⁶ Jehoväqa alläpa kuyakoq papämi, tsëmanmi imëpis pensanëki. Jehoväqa manam pantanqantsikkunallatatsu rikarëkan, tsëpa rantinqa yanapamantsikmi (Sal. 130:3; Mat. 7:11; Lüc. 12:6, 7). Tsëman pensayanqanmi imapaqpis mana väleqnö pensaqkunata mëtsikaqta yanapashqa. Pensarishun Espäña nacionpita Michelle jutiyoq panintsikllaman. Pëtaqa qowanmi o runanmi mëtsika watapa mana alli tratarqan, tsëmi imapaqpis mana välinqanta, ni pipis mana kuyanqanta pensarqan. Panintsikmi kënö nin: “Mana väleqnö sientikunqä hörakunam Jehovä Diosnintsik janchëkämanqanta, alläpa kuyamanqanta y cuidëkämanqanta pensä” (Sal. 28:9). Y Sudafricapita Lauren jutiyoq panintsiknam kënö nin: “Jehoväqa kuyamarmi sirweqnin kanäta permitimashqa, kananyaq sirwinäpaq yanapëkäman y hasta wakinkunata yachatsinäta permitïkäman. Tsëwanmi cuentata qokü Jehovä Diosnintsik alläpa valoramanqanta y kuyamanqanta” (Os. 11:4).

17. ¿Imatataq rurankiman Jehovä Diosnintsik qamwan kushishqa këkanqanta següru kanëkipaq? (Salmus 5:12; fötuta rikäri).

¹⁷ Qamwan Jehovä kushishqa këkanqantam següru kanëki (leyi Salmus 5:12). Davidqa nirqan alli ruraq nunakunataqa Jehovä Diosnintsik ‘escüdu’ cuenta tsapanqantam. ¿Imata musyanqëkitan yanapashunkiman imapaqpis mana välinqëkita pensanqëki hörakuna? Qamwan Jehovä kushishqa këkanqanta y yanapëkäshunqëkita següru kanqëkim. Peru ¿imanötan musyankiman qamwan Jehovä kushishqa këkanqanta? Yachakurinqantsiknöpis, Palabran Bibliachömi nikäshunki alläpa kuyashunqëkita. Y anciänukunawan, amïguykikunawan y wawqi panikunawanmi seguïdu yarpätsishunki imëpis kuyashunqëkita. Peru pëkuna animayäshuptikiqa, ¿imatataq rurankiman?

18. ¿Imanirtan jukkuna animayäshuptiki creinkiman?

¹⁸ Amïguykikuna o wawqikuna y panikuna qampaq allikunata parlayaptinqa, creinëkim y yarpänëkim Jehovä Diosnintsikqa qamwan kushishqa këkanqanta nishunëkipaq pëkunata utilicëkanqanta. Punta kaq pärrafuchö parlanqantsik Michelle jutiyoq panim kënö nin: “Creinan mana fäcil kaptimpis, Jehovä Diosnintsik noqawan kushishqa këkanqanta yarpätsimänampaq pëkunata utilicëkanqanta cuentachö katsirmi kananqa animayämanqanta chaskiküna”. Anciänukunapis panintsiktaqa kuyëpam yanapayashqa, tsëmi kananqa panintsikqa precursöra regular y wayinllapitam Betelpaqpis trabajan.

19. ¿Imanirtan següru kanëki Jehovä Diosnintsik alläpa valorashunqëkita?

¹⁹ Jesusqa kuyëllapam yachatsimarquntsik Jehovä Diosnintsik alläpa valoramanqantsikta y kuyamanqantsikta (Lüc. 12:24). Tsëmi qampis següru kanëki Jehovä Diosnintsik alläpa kuyashunqëkita y valorashunqëkita. Tsëtaqa, ¡ama imëpis qonqëtsu! Tsënölla qampis, wakinkunata yanapë Jehovä Diosnintsik alläpa kuyanqanta entiendiyänampaq.